Lesona 107
Helamana 3–4
Faatomuaga
I le taimi lenei i le talafaasolopito o le Tusi a Mamona, sa fiafia ai sa Nifae i vaitaimi o le filemu ae na oo foi i taimi o finauga. E faitau fia sefulu afe o sa Nifae sa auai i le Ekalesia i le taimi o le filemu. Na sosoo ma lenei vaitaimi o le faamanuiaina tele, na amata ai ona ulu atu le faamaualuga i loto o tagata. Ae peitai, o tagata o le Ekalesia sa sili atu ona lotomaualalalo sa tutupu ae i lo latou faatuatua, e ui lava ina sauaina e i latou o e sa faamaualuluga. Ona o le amioleaga i le toatele o sa Nifae, sa aveesea atu ai o latou laueleele i le itu i saute ia sa Lamana.
Fautuaga mo le Aoaoga
Helamana 3
E toatele sa Nifae sa malaga atu i le itu i matu, a o manuia le Ekalesia i le totonugalemu o le amioleaga ma sauaga.
Tusi upu nei i luga o le laupapa (atonu e te manao e fai muamua a o le’i amataina le vasega):
Tagata i … (igoa o lou atunuu)
Tagata i … (igoa o le tou nuu)
Tagata i la’u uarota po o le paranesi
Tagata i lo’u aiga
O a’u
Fesili atu i tagata o le vasega po o ai, mai tagata uma o loo lisiina i luga o le laupapa, latou te lagona e mafai ona latou faatonutonuina. Ona fai atu lea i ai e sii o latou lima pe sa i ai se taimi sa latou lagona ai le lotovaivai ona o amioga a isi tagata. Fai i ai e sii pea o latou lima pe afai sa latou lotovaivai lata mai nei ona o faatinoga amioletonu a isi tagata. Faamalamalama atu a o latou suesueina le Helamana 3, o le a latou maua ai ni vaaiga manino e uiga i mea e mafai ona latou faia pe afai e le ola i latou o loo siomia i latou e tusa ai ma le talalelei.
Fai atu i se tagata o le vasega e faitau leotele le Helamana 3:1–2. Fai atu i le vasega e mulimuli ai a o faitau, ma vaavaai mo le ta’uina faafia o le fuaitau “leai ni finauga.” Fai atu i tagata o le vasega e faitau filemu le Helamana 3:3, 19, ma faailoa mai upu po o fuaitau o loo ta’u mai ai le suiga na oo i ai mea i sa Nifae.
-
I lou manatu aisea na vave ai le me’i atu o sa Nifae mai se periota o le leai o ni finauga i le anoanoai o finauga?
Otooto le Helamana 3:3–16 e ala i le faamalamalamaina e faapea i lenei vaitaimi o finauga, sa toatele sa Nifae sa malaga agai atu i matu.
Fai atu i se tagata o le vasega e faitau leotele le Helamana 3:20. Fai atu i le vasega e ta’u mai pe sa faapefea ona faamatalaina ia Helamana i lenei vaitaimi o finauga.
-
O le a se mea na faagaeetia ai oe e uiga i le faataitaiga a Helamana i le vaitaimi o finauga? (A o tali mai tagata o le vasega, atonu e te manao e fautua atu i ai ia latou faailogaina le upu e le aunoa i le Helamana 3:20.)
Fai atu i tagata o le vasega e faitau filemu le Helamana 3:22–26 ma faailoa mai pe na faapefea ona suia le tulaga o tagata sa Nifae.
-
O le a le mea na maofa ai taitai o le Ekalesia?
-
O le a se mea e mafai ona tatou aoao mai nei fuaitau e uiga i le uunaiga e mafai ona faia e le Ekalesia i tagata?
Faamanatu atu i tagata o le vasega a o tapena e Mamona faamaumauga o le Tusi a Mamona, o nisi taimi sa ia faailoa mai ai lesona sa manao o ia ia aoao mai e le au faitau mai ni tala faapitoa. I le Helamana 3, sa ia faaaogaina ai fuaitau “ua faapea ona mafai ona tatou vaai ai,” “ua faapea ona tatou vaai ai,” ma le “ua tatou vaai” e faailoa mai ai ana lesona. Fai atu i tagata o le vasega e faitau filemu le Helamana 3:27–30 ma ta’u mai po o a lesona sa manao Mamona ia tatou aoaoina. A uma ona lipoti mai e tagata o le vasega mea latou te maua, fesili atu i ai:
-
O le a le mea sa manao Mamona ia tatou iloa e uiga i le afioga a le Atua?
Tuu atu i tagata o le vasega se taimi e mafaufau loloto ai pe na faapefea ona mafai e lo latou suesue i tusitusiga paia ona latou maua faamanuiaga e pei ona folafolaina mai i le Helamana 3:29. Mafaufau e tofi ni nai tagata o le vasega e faasoa atu o latou aafiaga.
Faamalamalama atu o le vaega o loo totoe o le Helamana 3 o loo faamatala ai le auala, ina ua mavae se taimi o le faamanuiaina tele, sa sosolo atu le faamaualuga i sa Nifae. O le toatele o tagata lotomaualalalo o le Ekalesia sa oo i ai sauaga mai isi tagata o le Ekalesia o e sa faamaualuluga i o latou loto. Faitau leotele ia tulaga o loo i lalo. Fai atu i tagata o le vasega e mafaufau loloto i se taimi sa latou vaaia pe sa oo ai foi i ni tulaga faapenei.
-
Sa taufaifai se tamaitai talavou i se isi teineitiiti o lana uarota.
-
Sa taufaalili se alii talavou i se tasi o lana korama ona o lona fiafia tele e tali fesili i le vasega pe ofo atu mo tiute faaleperisitua.
-
Sa lē faaaofiaina e se vaega o alii talavou o se uarota se isi alii talavou i a latou talanoaga ma gaoioiga i fafo atu o le lotu.
-
Sa fai atu e se vaega o tamaitai talavou ni faamatalaga faatiga e uiga i lavalava o isi tamaitai talavou.
Fai atu i se tagata o le vasega e faitau leotele le Helamana 3:33–34. Fai atu i le vasega e sue ia tulaga na tali tutusa ai sa Nifae ma tulaga o loo faamatalaina i luga. A uma ona maua e tagata o le vasega se taimi e tali mai ai, fai atu fesili nei:
-
Aisea tou te manatu ai o le sauaina o tagata o le Ekalesia e isi tagata o le Ekalesia sa manatu i ai “o se mea leaga tele” ia sa Nifae?
-
O a mataupu faavae o le talalelei ua tatou solia pe a le lelei ona tatou faia pe agaleaga foi i isi tagata o le Ekalesia? E mafai faapefea ona tatou faamalolosia lo tatou alolofa i o tatou uso a Au Paia?
Fai atu i tagata o le vasega e faitau filemu le Helamana 3:35 ma faailoa mai pe sa faapefea ona tali atu le au lotomaualalalo o sa Nifae i le sauaina o i latou.
-
Pe sa faateleina, faaitiitia, pe tumau ai lava le faatuatua o tagata sa sauaina?
-
O a gaoioiga sa faia e tagata sa sauaina sa saofaga i le faateleina o lo latou faatuatua? (Sa latou tatalo ma anapopogi soo, saili ia lotomaualalo, ma gauai atu o latou loto i le Atua.)
-
E ese mai i se faatuatua ua faateleina, o le a se isi mea sa oo i ai gaoioiga lotomaualalalo a sa Nifae? (Olioli, faamafanafanaga, ma le faamamaina ma le faapaiaina o o latou loto.)
Tusi mea nei i luga o le laupapa: Pe a tatou … , o le a faateleina lo tatou faatuatua ia Iesu Keriso, e ui lava i sauaga ma tofotofoga. Fai atu i tagata o le vasega e faatumu le faamatalaga lenei e faavae i mea ua latou aoaoina mai le Helamana 3:33–35. Atonu o le a e manao e fai atu i nai tagata o le vasega e faasoa atu pe na faapefea ona latou faatumuina le faamatalaga. E ui atonu o le a eseese tali a tagata o le vasega, ia mautinoa latou te faasoa mai upumoni nei: Pe a tatou saili e ola amiotonu, o le a faateleina lo tatou faatuatua ia Iesu Keriso, e ui lava i sauaga ma tofotofoga. Ina ia fesoasoani i tagata o le vasega ia loloto lo latou malamalamaaga i aoaoga o loo i nei fuaitau, atonu e te manao e fai atu fesili nei:
-
Na faapefea ona fesoasoani le tatalo ma le anapogi ia te oe i se taimi o sauaga po o tofotofoga?
-
O le a sou manatu i le uiga o le gauai atu o o tatou loto i le Atua?
-
Aisea e manaomia ai le gauai atu o lou loto i le Atua ina ia mafai ona faateleina ai lou faatuatua i se taimi o sauaga po o tofotofoga?
Fai atu i tagata o le vasega pe na latou lagonaina le faateleina o lo latou faatuatua a o latou tali atu ma le amiotonu i sauaga. Fai i tagata o le vasega e faasoa atu o latou aafiaga. E mafai foi ona faasoa atu sou aafiaga patino.
Ina ia tapena tagata o le vasega e suesue le Helamana 4, fai atu i ai e faitau filemu le Helamana 3:36. Fai atu ia i latou e faailoa mai le tulaga lautele o sa Nifae. (Sa faateleina le faamaualuluga o sa Nifae, e ui lava i faataitaiga a soo lotomaualalalo o Keriso.)
Helamana 4
Ona o le amioleaga, sa aluese mai ai le Agaga o le Alii mai ia sa Nifae, ae manumalo ai sa Lamana i laueleele uma i saute o sa Nifae
Faamalamalama atu o le Helamana 4:4–8 o loo faamatala mai ai e uiga i se taua sa sii atu e sa Nifae ia sa Lamana ma e sa tetee ia sa Nifae. Fai atu i se tagata o le vasega e faitau leotele nei fuaitau. Fai atu i le vasega e mulimuli ai a o faitauina, ia iloa ai po o a laueleele o sa Nifae sa toe maua mai i lenei taua.
Tusi faatonuga nei i luga o le laupapa. (Atonu o le a e manao e fai lenei mea a o le’i amataina le vasega.) Fai atu i tagata o le vasega e kopi i lalo i a latou api po o api talaaga mo suesuega o tusitusiga paia.
Tusi ni fuaitau se tolu e faailoa mai ai uiga faaalia ma amioga a sa Nifae.
Tusi ni fuaitau se tolu e faailoa mai ai le mea sa tupu ona o nei amioga.
Vaevae tagata o le vasega i ni vaega taitoalua. Fai atu i vaega e faitau faatasi le Helamana 4:11–13, 23–26, ma vaavaai mo ma tusi i lalo fuaitau taua e tusa ai ma faatonuga o loo i luga o le laupapa.
Fai atu i ni nai paga e lipoti atu a latou tali. A o faasoa atu e tagata o le vasega mea ua latou tusia, atonu o le a e manao e fautua atu i ai e faailoga ia fuaitau o loo i lalo i a latou tusitusiga paia: “tuua ai i latou e faalagolago i lo latou lava malosi” (Helamana 4:13), “ua latou vaivai” (Helamana 4:24), ma le “ua faapea ona latou vaivai” (Helamana 4:26).
Fai atu i tagata o le vasega po o a mataupu faavae e mafai ona latou faailoa mai mai a latou suesuega o le Helamana 4. Fesoasoani atu ia latou iloa le mataupu faavae lenei: O le faamaualuga ma le amioleaga e vavaeese mai ai i tatou mai le Agaga o le Alii ma tuua ai i tatou i lo tatou lava malosi. Atonu e te manao e tusi le mataupu faavae lenei i luga o le laupapa. Atonu foi e te fautuaina atu ia tusi e tagata o le vasega i totonu o a latou tusitusiga paia i autafa o le mau Helamana 4:23–24.
Ina ia fesoasoani i tagata o le vasega ia malamalama i lenei mataupu faavae, fai atu i se tasi o i latou e sau i luma o le vasega. Fai i le tagata lea e mafaufau faapea ua tusia lona igoa e tau toatasi na o ia e faasaga ia sa Lamana. Fesili i ai pe fesili foi i le vasega po o le a sona avanoa e manumalo ai o ia e faatusa atu i se autau toatele naua. Fai i se isi tagata o le vasega e sau i luma ma tu i autafa o le tamaitiiti muamua. Fai atu i le tamaitiiti muamua pe mata o le a faateleina lona avanoa e manumalo ai i au a le fili ona o le i ai o le fesoasoani a le tamaitiiti lona lua. (Faasagatau i se autau toatele, o le faaopoopo atu o se tamaitiiti lona lua o le a le atili faateleina ai le avanoa mo le manumalo.) Ona tusi lea O Le Alii i luga o le laupapa. Fesili atu i le tamaitiiti muamua:
-
O le a sou manatu o le a se tele o ou avanoa e te manumalo ai i le taua pe afai e i ai le Alii i lau au?
Fai atu i tagata o le vasega pe faapefea ona faatatau lenei gaoioiga i le mataupu faavae na ta’uina mai i le Helamana 4. Mafaufau e tuuina atu fesili nei:
-
I le mea sa oo i ai sa Nifae, o le tuua i lo latou lava malosi o lona uiga o le faiaina i taua ma aveesea laueleele. O a ni “taua” tatou te ono faiaina ai pe afai e le i ai le Agaga Paia ia i tatou?
Fai atu i tagata o le vasega e mafaufau loloto i se mea se tasi e mafai ona latou faia e faatumauina ai le mafutaga ma le Agaga Paia i o latou olaga, ma fai atu ia i latou e fai. Faasoa atu lau molimau i le taua o le Agaga i lou olaga.
Tala ma Faamatalaga o Talaaga
Helamana 3:33–34, 36;4:12. O aafiaga o le faamaualuga i le Ekalesia
Sa ta’ua e Mamona o le faamaualuga sa le o se vaega o le Ekalesia a le Alii, peitai ona o le tele o oa, sa faapea ona amata ai ona oo atu i loto o nisi o tagata o le Ekalesia (tagai i le Helamana 3:33, 36).
Sa aoao mai e Peresitene Ezra Taft Benson e faapea:
“Mafaufau i mea sa tutupu mai i o tatou olaga, ma o tatou aiga, ma le ekalesia, i taimi ua mavae ma le taimi nei, ona o le faamaualuga.
“Mafaufau i le salamo e mafai ona vaaia i olaga ua suia, faasaoina o faaipoipoga, ma aiga ua faamalolosia, pe ana le taofia i tatou e le faamaualuga mai le tautau atu o a tatou agasala ma lafoaiina. (Tagai i le MF&F 58:43.)
“Mafaufau i le toatele o tagata o le Ekalesia ua le toaaga mai ona ua faatausuaiina i latou ma ua le mafai ona tuua i latou e lo latou faamaualuluga ia latou faamagalo atu pe o mai e taumamafa atoatoa i le laoai a le Alii.
“Mafaufau i le fiasefulu afe o alii talavou ma ulugalii e mafai ona fai misiona nei pe ana leai lo latou faamaualuluga ua taofia ai i latou mai le tuuina atu o o latou loto i le Atua. (Tagai i le Alema 10:6; Hela. 3:34–35.)
“Mafaufau foi i le faateleina o galuega faalemalumalu pe afai e sili atu le taua o le taimi e faaaoga mo lenei galuega sili ona taua nai lo le tele o mea faamaualuluga o loo faaaluina ai lo tatou taimi” (“Fa’aeteete i le Fa’amaualuga,” Liahona, Me 1989, 7).