Manatu mo Aso Fetuunai

O le taiala o le saoasaoa mo faiaoga o aso taitasi e faavae I le 36-vaiaso poo le 180-aso aoga o le tausaga faaleaoga. E 160 lesona o aso taitasi, o loo totoe ai le 20 aso ua le saunia ai ni punaoa faafaiaoga. O “aso fetuunai” nei e 20 e tatau ona faaaogaina ma le poto mo ni sini aoga ma gaioiga, e aofia ai le:

1. Fetuunaiina o lesona o aso taitasi. Atonu o le ā e manao e faaaluina se taimi faaopoopo i se lesona e umi se taimi e aoaoina lelei atu ai. Atonu foi o le ā e manao e faaaoga metotia faaopoopo faafaiaoga o loo i le faaiuga o nisi o lesona po o le faaalu se taimi e tali ai fesili ā tamaiti aoga e uiga i se fuaitau o mau patino po o se autu o le talalelei. O aso fetuunai e faatagaina ai oe e te faaaogaina nei avanoa ao faatumauina pea le faatulagaga o lau saosaoa ma faataunuuina lou tiutetauave e aoao atu tusitusiga paia.

2. Tauloto fuaitau o mau autu ma Aoaoga Faavae Autu. Atonu e te manao e faaaoga le gaoioiga o iloiloga mo fuaitau o mau tauloto o loo maua i le tusi lesona atoa ma le faaopoopoga. E mafai ona e fatufatu ni gaoioiga faaopoopo mo le iloiloina o mau tauloto e talafeagai ma manaoga patino ma mea e fiafia i ai tamaiti aoga o lau vasega. E mafai foi ona e faaaogaina se vaega o se aso fetuunai mo gaoioiga e fesoasoani i tamaiti aoga e iloilo ma faalolotoina lo latou malamalamaaga i Aoaoga Faavae Autu. I le amataga o le tausaga, e mafai ona e faaaogaina se aso fetuunai e faatautaia ai se Iloiloga o Aoaoga Faavae Autu (BDA) na mamanuina e fesoasoani i faiaoga e iloiloina ai le loloto ua iai le malamalama o tamaiti aoga, talitonu, iloa pe faapefea ona faaaoga, ma o loo mafai ona latou faamalamalamaina mai nisi o aoaoga faavae autu o le Ekalesia. Ina ia maua Iloiloga o Aoaoga Faavae Autu ma isi iloiloga i luga o le uepisaite ā le S&I (si.lds.org), saili e ala i le faaaoga o le uputatala iloiloga. O Lipoti BDA e fesoasoani i faiaoga o e na faatautaiina le iloiloga e iloilo ai manaoga o ā latou tamaiti aoga ma fetuunai auala e aoao atu ai ina ia mafai ona gafataulimaina na manaoga.

3. Iloiloina o anomea talu ai. E aoga mo tamaiti aoga le toe tagai i tua i mea latou aoaoina mai lesona talu ai pe mai se tusi o mau faapitoa. E mafai ona e tuuina atu le avanoa i tamaiti aoga e faamatala ai se upumoni mai se lesona talu ai ma faasoa pe na faapefea ona aafia o latou olaga e lena upumoni. E mafai foi ona e fatuina ma faatautaia se suega po o se gaoioiga e aoao ai lena e iloilo ai anomea talu ai.

4. Faatagaga mo fesuiaiga o le polokalama. Gaoioiga ā le aoga po o faatasiga, mea e tutupu i le lotoifale, o le tau, ma nisi faalavelave atonu e moomia ai le taofia pe faapuupuuina o vasega mai lea taimi i lea taimi. O aso fetuunai e mafai ona faaaoga mo fesuiaiga faapea.