Lesona mo Suesuega e Faia i le Aiga
Alema 5–10 (Iunite 15)
Sauniuniga o Anomea mo le Faiaoga o Suesuega e Faia i le Aiga
Aotelega o Lesona o Suesuega e Faia i le Aiga i Aso Taitasi
O le aotelega lenei o aoaoga faavae ma mataupu faavae na aoaoina e tamaiti aoga ao latou suesueina le Alema 5–10 (iunite 15) e le o fuafuaina e aoao atu o se vaega o lau lesona. O le lesona o loo e aoaoina e na o ni nai aoaoga faavae ma mataupu faavae nei o loo taulai atu i ai. Mulimuli i musumusuga a le Agaga Paia ao e mafaufau i manaoga o au tamaiti aoga.
Aso 1 (Alema 5:1–36)
A o suesue e tamaiti le lauga a Alema i le nuu o Saraemila, o le a latou iloa ai afai tatou te talitonu i le afioga a le Atua ma faaaoga le faatuatua ia Iesu Keriso, o le a tatou mauaina le liuga tele o le loto. Ao taliina e tamaiti ia fesili a Alema, o le a latou iloa foi o le mauaina o se liuga o le loto, ua saunia ai i tatou lava ina ia maua se nofoaga i le malo o le lagi.
Aso 2 (Alema 5:37–62)
Ao suesue tamaiti aoga i le afa lona lua o le Alema 5, o le a latou iloa ai nei mataupu faavae: Afai tatou te mulimuli i le siufofoga o le Alii (o le Leoleo Mamoe Lelei), o le a faapotopotoina i tatou i Lona malo. O le a mafai ona tatou iloaina mo i tatou lava, e ala i le Agaga Paia, o Iesu Keriso o le Faaola o tagata.
Aso 3 (Alema 6–7)
O le suesueina o le Alema 6, o le a iloa ai e tamaiti o le vaitaimi o sa Nifae ma faapea foi ma lo tatou vaitaimi o le a faatulagaina ai le Ekalesia mo le lelei o tagata uma. O le lauga a Alema i le nuu o Kitiona, na iloa ai e tamaiti aoga na puapuagatia Iesu Keriso ina ia laveai i tatou mai le agasala ma le oti ma fesoasoani ia i tatou i luitau o le olaga faaletino. Sa latou iloaina foi o le ola ai i mataupu faavae o le talalelei, ua tatou mulimuli atu ai i le auala o le malo o le Atua.
Aso 4 (Alema 8–10)
O le suesue e uiga i le naunautaiga o Alema ina ia toe foi atu i le nuu o Amonaea ina ua uma ona latou teena o ia, ua iloa ai e tamaiti aoga afai tatou te tali vave atu i le afioga a le Alii, Na te fesoasoani mai ia i tatou ia usiusitai i Ana poloaiga. Na alaga atu Alema i tagata ina ia salamo ma aoao atu i latou e uiga i le manaomia ona saunia mo le afio mai o le Faaola. Mai le mea na oo ia Amoleka ma se agelu, o le a iloa ai e tamaiti aoga afai tatou te faalogo ma usiusitai i le valaau a le Alii, o le a oo mai faamanuiaga ia i tatou faapea foi ma isi.
Faatomuaga
I lenei lesona, saili e fesoasoani atu i tamaiti ina ia taulai atu i mataupu faavae lea e mafai ona taitaiina atu ai i se suiga o le loto. Tagai mo ni auala e fesoasoani ai ia i latou ina ia faalagolago i le afioga a le Atua ma faateleina a latou molimau e uiga i le Faaola.
Fautuaga mo le Aoaoga
Alema 5:1–36
Na aoaoina e Alema e manaomia se liuga tele o le loto e ulu atu ai i le malo o le lagi
Tusi le upu liuga i le laupapa po o luga o se fasi pepa. Fai atu i tamaiti aoga e faasoa mai ni faataitaiga o ni auala atonu e suia ai e tagata o latou foliga, amioga po o uiga. Valaaulia i latou e faamatala mai po o le a se mea e ono mafua ai ona faia e tagata nei suiga.
Fai i tamaiti e faitau mai le Alema 5:14 ma faailoa mai ia fesili e tolu ia na fesiligia ai e Alema ia le nuu o Saraemila ina ia mafaufau i ai. Mafaufau e valaaulia ni nai tamaiti aoga e faamatala mai po o le a le uiga o le “liuga tele i o outou loto”.
Valaaulia ia tamaiti e faitau mai le Alema 5:3–7 ma faailoa mai po o le a le mea lea na tau atu e Alema i le nuu o Saraemila lea na fesoasoani e saunia ai o latou loto ina ia liua.
Na faamatala atu e Alema i le nuu o Saraemila e uiga i le liua o lona tama faapea ma isi, atoa ai ma lo latou laveaiina mai le ave faatagataotaua. Fesili atu: O le a sou manatu e uiga i le aoaoina o nei aafiaga ina ia fesoasoani ai i tagata ia saunia ia lagonaina se liuga o le loto? (Atonu e te manao e faamanatu atu i tamaiti sa latou tusia se tali o lenei fesili i le lesona mo le aso 1 i totonu o a latou taiala suesue a tamaiti aoga.)
Fai i se tamaitiiti aoga pe manao e faasoa mai se aafiaga na taitaiina atu ai i se liuga o lona loto. Atonu e te manao e faasoa atu sau oe lava aafiaga. Atonu foi e te manao e faamanatu atu i tamaiti le saunoaga a Elder D. Todd Christofferson (i le lesona mo le aso 1 i totonu o le taiala suesue a tamaiti aoga). Faamalamalama atu faapea mo le toatele o tagata, o le liuga tele i o tatou loto e tuputupu ae lemu ao tatou aoao ma ola i le talalalei.
Fai i tamaiti e tagai i le siata o le “Alema 5 Spiritual Cardiogram” i le lesona mo le aso 1 i le taiala suesue a tamaiti aoga. Valaaulia i latou e toe iloilo nisi o mau o i le Alema 5 lea o loo i le siata. Ona fai atu lea o fesili nei:
-
O fea o fesili a Alema e matuai anoa lava ia te oe?
-
E mafai faapefea ona fesoasoani nei fesili i se tagata e lagona ai se liuga o le loto?
Faamatala atu i tamaiti ua matuai finagalo lava le Faaola ina ia o mai tagata uma ia te Ia ma maua se liuga tele o le loto ina ia mafai ai ona latou maua le ola e faavavau. Fai i se tamaitiiti e faitau leotele le Alema 5:33–36. Fesili atu:
-
O le a le mea o loo valaauliaina i tatou e le Alii e fai?
-
O a ni taui mo le taliaina o Lana valaau?
Alema 5:43–52
Ua faamatala e Alema le auala na ia maua ai se molimau ma ua aoao atu e uiga i le salamo.
Faamatala atu o le uunaia o le nuu o Saraemila ina ia saili se liuga o le loto, na tuuina atu ai e Alema lana molimau ma faamatalaina le auala na ia maua ai. Mai lana apoapoaiga, ua tatou aoao i le auala e maua ai pe faamalolosia a tatou molimau. Fai i tamaiti e faitau le leoa le Alema 5:45–48. Fai atu ia i latou e faailoa mai le mea na fai mai Alema ua na iloaina. Fai atu foi ia i latou e faailoa mai le tali a Alema i le fesili “Ma o le a so outou manatu e faapefea ona ou iloa lo latou moni?”
Fai atu i tamaiti e faasoa mai se mea sa latou aoaoina, ma tusi a latou tali i le laupapa. Ia tusi foi le mataupu faavae lenei: O le a mafai ona tatou iloaina mo i tatou lava, e ala i le Agaga Paia, o Iesu Keriso o le Faaola o tagata.
Fesoasoani i tamaiti ina ia iloa o le a i ai se aso o le a luiina ai a latou molimau e se tagata po o se mea. Atonu ua uma ona tupu lenei mea. O le apoapoaiga a Alema ua ofoina mai ai ia i tatou se auala e tutu mausali ai ma le malosi e ui i le luiina o a tatou molimau. Mafaufau e faamatala atu se taimi sa outou feagai ai ma se luitau i lau molimau ma sa foiaina pe i se taimi sa feagai ai se tagata e te iloaina ma sea ituaiga luitau. E mafai foi e faasoaina atu se aafiaga mai se lauga o le konafesi aoao po o se tusiga mai le mekasini a le Ekalesia. Atonu foi e mafai ona e valaauliaina se tamaitiiti aoga e faasoa mai sea ituaiga aafiaga.
Faamatala atu na faaauau lava ona aoao atu e Alema ia tagata e uiga i le salamo. Atonu e te manao e tuu atu i se tamaitiiti e faitau mai le Alema 5:50 faapea ma le saunoaga a Elder Dallin H. Oaks o loo maua i le iunite 15, aso 2 o le taiala suesue a tamaiti aoga. Fai i tamaiti e faasoa mai ni o latou manatu e uiga i le mafuaaga e tatau ai ona tatou ola i aso taitasi e faapei o loo tatou sauniuni e feiloai ma le Alii.
Alema 7–10
Na aoao atu Alema i Kitiona ma Amonaea
Faailoa atu ia tulaga nei ma fai atu i tamaiti e mafaufau i ai ao latou faamanatuina ia aoaoga a Alema i le nuu o Kitiona:
-
O se tamaitai talavou ua malamalama o le Togiola e mafai ona fesoasoani ia te ia ina ia foia ana agasala, peitai sa iloa ifo e maua o ia i se faamai matautia ma e na te le talitonu e mafai ona fesoasoani le Togiola ia te ia.
-
O se alii talavou o loo tauivi ao tatala le faaipoipoga a ona matua, peitai na te le o sailia le fesoasoani a le Faaola.
-
O se tamaitai talavou o loo tauivi i le puleaina o le vave o lona ita. Na te lei mafaufauina pe faapefea ona fesoasoani le Togiola ia te ia.
Valaaulia ia tamaiti aoga e faitau le Alema 7:11–13 ma iloilo ia tulaga na naunau ai le Faaola ina ia “ave i ona [lava] luga” mo lo tatou manuia. Fai i ni nai tamaiti e aotele mai le mea na aoao atu e nei fuaiupu e uiga i le Togiola a Iesu Keriso. Ia uunaia foi ia tamaiti e tagai i le siata o loo faailoa atu ai nisi o tulaga tatou te pagatia ai i le olaga faitino (i le lesona mo le aso 3 i le taiala suesue a tamaiti aoga).
Faamatala atu i tamaiti o le mana o le Togiola, o le a siitia ae ai i tatou mai le tiga ma puapuaga o le mafatiaga o le olaga. Ia mautinoa o loo malamalama ia tamaiti aoga i lenei mataupu faavae. Na puapuagatia Iesu Keriso ina ia laveai i tatou mai le agasala ma le oti ma fesoasoani ia i tatou i luitau o le olaga faaletino.
Valaaulia ia tamaiti e faasoa mai le mea atonu o le a latou tauina atu i alii ma tamaitai talavou i tulaga ia e tolu ia na tuuina atu. Fesili atu: O faapefea ona faatatau ia aoaoga a Alema e uiga i le Togiola i nei tulaga e tolu?
Faamanatu atu i tamaiti ia ata e tolu ma mau faasino e uiga ia Alema a o i Amonaea (i le lesona mo le 4 i le taiala suesue a tamaiti aoga), lea na latou suesue i ai ma tusia ai ni autu. Atonu e te manao e fai atu i tamaiti e faasoa mai ni autu sa latou tusia e uiga i le mea na oo ia Alema ma le agelu. Fai i tamaiti e faasoa mai o latou lagona i le auala e faatatau ai lenei aafiaga i le mataupu faavae lenei: Pe a tatou tali vave atu i le afioga a le Alii, o le a Ia fesoasoani mai ia i tatou ina ia usiusitai i Ana poloaiga.
Iunite e Sosoo Ai (Alema 11–16)
Fai i tamaiti e mafaufau i fesili nei ao latou saunia e suesue i le galuega fai o le vaiaso a sau: Faamata e faapei sou lagona pe ana faapefea sa faamalosia oe e matamata i ni tagata e leai ni sala o fasiotia ona o lo latou faatuatua ia Iesu Keriso ma Lana talalelei? O le a sou manatu po o a ni lagona na oo ia Alema ma Amoleka ao matamata atu i lenei mea na tupu? O le a se mea na fai atu ai le tasi i le isi ina ua vaai atu i lenei mea o tupu? O a a latou mea na fai?