Lesona 89
Alema 31
Faatomuaga
Na iloa e Alema sa i ai se vaega o sa Nifae na taua o sa Sorama lea na o ese mai le upu moni o le talalelei ma pauu atu i faataitaiga sese. O le faanoanoa ona o nei lipoti o le amioleaga, na ave ai e Alema se vaega o faifeautalai e aoao atu le afioga a le Atua i tagata sa Sorama. Na vaai atu Alema ma ona soa i ala o tapuaiga a sa Sorama ua liliuese, pupu o latou loto i oa, ma le faamaualuluga. Na aioi atu ma le faamaoni Alema i le Alii ina ia faamafanafana mai o ia ma ona soa ao feagai i latou ma lenei luitau ma ina ia faamanuiaina i latou e toe aumai sa Sorama i le Alii.
Fautuaga mo le Aoaoga
Alema 31:1–7
Ua tuua e Alema ma ona soa Saraemila ina ia talai atu le afioga a le Atua i tagata sa Sorama ua liliuese
Fai i tamaiti e mafaufau po o le a se mea latou te faia pe afai e se ese se uo po o se tagata o le aiga mai le ola ai i le talalelei.
-
O le a se mea e te ono faia e fesoasoani ai i lenei tagata ina ia toe foi mai i le Ekalesia? E faapefea ona e fagua se manao i le tagata e tausia poloaiga? O ai e te ono liliu atu i ai mo se fesoasoani ina ia galulue ai ma le tagata o lou aiga po o se uo?
Tau atu i tamaiti o le lesona i le aso o loo faamamafaina ai le auala na taumafai ai Alema ma le tele o isi tagata ina ia fesoasoani atu i se vaega o tagata o e na se ese mai le talalelei. Valaaulia se tamaitiiti aoga e faitau leotele le Alema 31:1–4. Fai i le vasega e vaavaai mo popolega na i ai ia Alema ma isi e uiga ia sa Sorama.
-
O a ni lagona o Alema ina ua ia faalogo i le amioleaga o tagata sa Sorama?
-
Aisea na amata ai ona fefefe sa Nifae ona o sa Sorama?
Fai i tamaiti e vaai faalemafaufau faapea ua latou maua le avanoa e fautua ai Alema i le ala e foia ai ona popolega e uiga i tagata sa Sorama. Fesili atu i tamaiti po o le a se mea latou te fautuaina o ia e fai. Valaaulia se tamaitiiti aoga e faitau leotele le Alema 31:5. Fai i le vasega e tagai mo le mea na iloa e Alema o se auala sili ona lelei e fesoasoani atu ai i tagata sa Sorama.
-
O le a se mea na filifili Alema e fai e fesoasoani ai ia sa Sorama?
-
I se taumafaiga e fesoasoani ai i tagata ina ia suia, aisea e te manatu ai o le afioga a le Atua ua sili atu ona mamana nai lo le faamalosi po o nisi lava metotia?
E tusa ma le Alema 31:5, o le a se mea o tatou aoao e uiga i le mana o le afioga a le Atua i o tatou olaga? (Atonu e mafai ona eseese upu e faaaoga mai e tamaiti aoga, ae ia mautinoa ua latou malamama i le upu moni lenei: A o tatou suesue le afioga a le Atua, o le a taitaiina atu i tatou e fai le mea sao. Atonu e te manao e tusi le upu moni lenei i luga o le laupapa.)
Ina ia fesoasoani i tamaiti aoga ia malamalama lelei i le mana o le afioga a le Atua lea o loo fesoasoani ia i tatou e fai le mea sao, faasoa atu le faamatalaga lenei mai ia Peresitene Boyd K. Packer o le Korama a Aposetolo e Toasefululua: (Atonu e te manao e tusi le faamatalaga lenei i luga o le laupapa pe saunia se pepa e tufa atu.)
“O aoaoga faavae moni, e malamalama i ai, e suia ai uiga ma amioga.
“O le suesue i aoaoga faavae o le talalelei e vave ona faaleleia ai le amio nai lo le suesue i ala e faalelei ai le amio.… O le ala lea ua matou faamamafa ai le suesue i aoaoga faavae o le talalelei” (“Fanau Iti,” Liahona, Ian. 1987, 19).
Fai i tamaiti e faamatala mai se taimi na latou maua ai po o se isi foi tagata se manao sili atu ina ia faia le mea sao ona o tusitusiga paia po o aoaoga a taitai o le Ekalesia.
Aotele le Alema 31:6–7 e ala i le fai atu i tamaiti o se taunuuga o le talitonu o Alema i le mana o le afioga a le Atua, na ia alu atu ai faatasi ma isi e toafitu ma talai atu i tagata sa Sorama.
Alema 31:8–23
Na tatalo ma tapuai sa Sorama i se auala sese
Tau atu i tamaiti ina ua o atu Alema ma ona soa i sa Sorama, sa latou vaaia le ala na tapuai ai tagata i le Atua i se tulaga ofoofogia.
Fai i tamaiti e faitau le leoa le Alema 31:8–11, faailoa mai upu ma fuaitau e faamatala ai ia tapuaiga a sa Sorama. Faailoa atu o le vaefaamatalaga 10a o fautua mai o le fuaitau “tu o le ekalesia” e faatatau foi i sauniga faapea ma le “tatalo ma aioi atu i le Atua … i aso taitasi.”
-
E tusa ma le fuaiupu 10, o le a le mea na faia e sa Sorama na faatosina atu ai i latou i faaosoosoga?
-
O le a se mea tatou te aoao mai i le toilalo o sa Sorama e “tatalo ma aioi atu i le Atua e le aunoa i aso taitasi”? (Atonu e ono eseese ia tali a tamaiti, ae e tatau ona latou faailoa mai o a tatou taumafaiga i aso taitasi ina ia tatalo ma tausia ia poloaiga e faamalolosia ai i tatou e tetee atu ai i faaosoosoga. Atonu e te manao e tusi le mataupu faavae lenei i luga o le laupapa. Atonu e te manao foi e fautuaina tamaiti e tusi i totonu o a latou tusitusiga paia i talaane o le Alema 31:9–11.)
-
O anafea na e iloa ai e mafai e lena tatalo i aso taitasi ona fesoasoani ia i tatou e tetee atu ai i faaosoosoga?
I le avea ai ma se vaega o le talanoaga a tamaiti aoga e uiga i lenei fesili, faitau le faamatalaga lenei mai ia Elder Rulon G. Craven o le Fitugafulu:
“I tausaga ua mavae atu sa talosagaina ai a’u i nisi taimi, e le Au Uso, matou te fono ma ni tagata ua salamo o le Ekalesia ma faatalanoaina i latou mo le toefuataiina o o latou faamanuiaga o le malumalu. O se aafiaga ootia faaleagaga lava lena mea i taimi, le toefuataiina o faamanuiaga a na tagata lelei, ua salamo. Sa ou fai atu le fesili i nisi o i latou, ‘O le a se mea na tupu i lou olaga na aveesea ai lou igoa i se taimi le tumau, mai pepa faamaumau o le Ekalesia?’ Ma mata e tumu i loimata latou te tali mai: ‘Ou te lei usitai i mataupu faavae o le talalelei: o le tatalo, alu i le lotu e le aunoa, auauna i le Ekalesia ma suesue i le talalelei. Ona ou faamatuu atu lea i faaosoosoga ma aveesea ai le taitaiga ale Agaga Paia’” (“O Faaosoosoga,” Liahona, Iulai 1996, 91).
Valaaulia se tamaitiiti aoga e faitau leotele le Alema 31:12–14.Ona valaaulia lea o se isi tamaitiiti aoga e faitau leotele le Alema 31:15–18. A o lei faitau le tamaitiiti lona lua, fai i le vasega e mafaufau pe faapei so latou tali atu pe ana faapea sa latou faalogo i se isi tagata o tatalo faapea.
-
O a ni ou popolega pe ana faapea sa e faalogo i se tagata o tatalo faapea?
-
O a ni aoaoga faavae sese na taulotoina e sa Sorama i la latou tatalo?
-
O a ni uiga faaalia o tagata sa Sorama sa i ai e uiga i isi tagata? (Atonu e te manao e taulai atu le vaaiga a tamaiti i le ta’ua soo o le upu matou i le tatalo a sa Sorama.)
Valaaulia se tamaitiiti aoga e faitau leotele le Alema 31:19–23. Fai i le vasega e mulimuli i le faitauga ma tagai mo nisi faafitauli sa i ai le faiga o le tapuaiga a tagata sa Sorama. Valaaulia tamaiti e lipoti mea sa latou mauaina.
-
O a ni suiga e te manatu e manaomia ona fai e sa Sorama ina ia migao ma faafiafiaina i le Alii la latou tapuaiga?
Faamatala atu tatou te tapuai i le Atua e ala i lo tatou alolofa atu ia te Ia, migao, ma le tuuto. (Atonu e te manao e lisi i luga o le laupapa ia elemene nei o le tapuai.) E tatau ona tatou tapuai atu e le gata i a tatou amio ma galuega pe a tatou tatalo, anapogi, ma auai i le Lotu ae ia tatou amio ma galuega i le faagasologa o aso taitasi. Uunaia ia tamaiti e toe iloilo le tulaga o taulai atu i ai ma le faamaoni a latou lava tapuaiga.
Fai i tamaiti e matau ia auala eseese e mafai ona tatou tapuai atu ai ma le talafeagai i le Atua. Faataga ia lava se taimi mo i latou e faasoa mai ai ni manatu. Atonu e te manao e fai i se tamaitiiti aoga e tusi mea nei i luga o le lauapapa.
-
O le a se uiga e tatau ona tatou mauaina ao tatou tapuai atu? E faapefea ona tatou tausia pea lena uiga i le faagasologa o aso taitasi?
Ina ia fesoasoani i tamaiti ia malamalama i le auala o aafia ai e o tatou uiga le auala o tatou tapuai ai, fai i se tamaitiiti aoga e faitau le faamatalaga lenei a Elder Dallin H. Packer o le Korama a Aposetolo e Toasefululua:
“O le tapuaiga e tele ina aofia ai gaoioiga, ae o le tapuaiga moni e aofia ai se uiga faaalia faapitoa o le mafaufau.
“O le uiga faaalia o le tapuaiga e faaosofia ai i tatou i lagona loloto o le faatuatuaina, faaaloalogia, ma le maofa. O le tapuaiga e tuufaatasia ai le alofa ma le migao i se tulaga tuuto ma e aveina atu o tatou agaga ia latalata atu i le Atua” (Pure in Heart [1988], 125).
Fai i tamaiti e tusi i totonu o api o le vasega po o api talaaga mo le suesueina o tusitusiga paia se iloiloga puupuu o auala patino o tapuai atu ai i le taimi nei ma o latou lagona e uiga i le tapuaiga i vaega nei: tatalo patino o aso taitasi, suesuega patino o tusitusiga paia i aso taitasi, usitai i poloaiga, ma auai i le lotu ma le ai ma inu i le faamanatuga i vaiaso taitasi. Fai i tamaiti e seti se sini e faaleleia ai auala o latou tapuai atu ai faaletagata lava ia i aso taitasi.
Alema 31:24–38
Ua tatalo Alema mo le malosi ma le manuia ina ia toe aumaia sa Sorama i le Alii
Fai i tamaiti e faitau le leoa le Alema 31:24–25 , vaavaai i uiga ma amioga na o faatasi ma le faatuiese o tagata sa Sorama. Fai i tamaiti e lipoti mea sa latou mauaina.
Faamatala atu ina ua vaai Alema i le amioleaga o sa Sorama, sa ia tatalo. Fai i tamaiti e vaevae e fai paga. Tuu atu i paga e suesue le Alema 31:26–35 ma talanoa ia fesili nei. (Atonu e te manao e tusi fesili nei i se pepa ma tufa atu pe tusi i luga o le laupapa ao lei amataina le vasega.)
-
O le a le mea na taulai atu i ai le tatalo a sa Sorama? (Sa taulai atu ia i latou lava.)
-
O le a le mea na taulai atu i ai le tatalo a Alema? (Na ia taulai atu e fesoasoani atu i isi. Na oo lava i le taimi na ia tatalo ai mo ia lava ma ona soa, sa ia aioi atu mo le malosi e auauna atu ai i tagata sa Sorama.)
-
O a mea o i le tatalo a Alema e te fia manao e faaaofia i au lava tatalo patino?
Tusi le faamatalaga lenei i luga o le laupapa:
Afai tatou te tatalo ma galue ma le faatuatua, …
Faamalamalama atu faapea ina ua uma ona tatalo Alema mo se fesoasoani e aapa atu ai i tagata sa Sorama, na amata ona ia auauna atu ma ona soa, “e aunoa ma se manatu mo i latou lava” (Alema 31:37). Fai tamaiti e faitau le leoa le Alema 31:36–38, tagai mo faamanuiaga ia na oo mai ia Alema ma ona soa a o latou mauaina faamanuiaga o le perisitua ma talai atu le talalelei. (Atonu e te manao e faamalamalama faapea i le Alema 31:36, o le fasifuaitau “sa pati e ia ona lima i luga o i latou uma” e faasino lea i le tuuina atu i luga o lima. Tagai i le vaefaamatalaga 36b.)
-
O a faamanuiaga na oo mai ia Alema ma ona soa ona o a latou tatalo ma galuega?
E tusa ai ma mea sa e aoaoaina mai le faataitaiga a Alema ma ona soa, e faapefea ona e faaumaina le faamatalaga o i luga o le laupapa? (Atonu o le a tele ia tali eseese e tuuina mai e tamaiti e sao. Aotele a latou tali e ala i le faamaeaina o le faamatalaga o i luga o le laupapa. Afai tatou te tatalo ma galulue ma le faatuatua, o le a faamalolosia e le Alii i tatou i o tatou tofotofoga.)
Faamalamalama atu ina ua uma lana tatalo, na faaalia e Alema ma ona soa lo latou faatuatua e ala i le galulue ma faalagolago atu i le Alii e tausia i latou ao latou auauna atu ia te Ia. Fai i tamaiti e mulimuli i le faataitaiga a Alema o le tatalo ma le faatuatua.
Tala ma Faamatalaga o Talaaga
Alema 31:22. “Le tatalo lava lea e tasi”
Na talanoaina e Elder Joseph B. Wirthlin o le Korama a Aposetolo e Toasefululua le taua o le tatalo faamaoni:
“Pe i ai ea ni taimi e te lagonaina ai e tutusa lava au tatalo? Pe ua e tatalo ea e aunoa ma le mafaufau i ai, e solo mai lava upu e pei o faasolo mai e se masini? Pe i ai ni taimi e te augata ai a o e tatalo?
“Mata e gauai mai ea lo tatou Tama Faalelagi i ni tatalo e te faaleano i ai? Afai ua e oo i se tulaga ua fai ai au tatalo ona o se masani, tuu loa lau mea lena e fai ae mafaufau. Mafaufau loloto mo sina taimi i mea e te matuai faafetai ai lava. Vaai po o a na mea. E le tuli faapea o ni mea tetele pe ofoofogia. O nisi taimi, e tatau ai ona ta’u atu lo tatou faafetai mo nai mea iti ma le faatauvaa e pei o le manogi o le timu, o le tofo o le meaai e te fiafia i ai, po o le leo o se tagata e pele ia te oe” (“Faaleleia Atili o a Tatou Tatalo,” Liahona, Aok. 2004, 16).
Alema 31:26-35. Tatalo mo isi
Na molimau mai Elder David A. Bednar o le Korama a Aposetolo e Toasefululua i faamanuiaga lea e oo mai pe a tatou tatalo mo isi:
“O le aioi atu i le Tama Faalelagi mo faamanuiaga tatou te mananao ai i o tatou olaga patino, e lelei ma o le mea tatau. E ui i lea, o le tatalo ma le faamaoni mo isi, mo i latou tatou te alolofa i ai ma i latou e agaleaga mai ia te i tatou, o se elemene taua foi o le tatalo anoa. Tatalo mo isi faatasi ai ma le malosi uma o o tatou agaga, e faateleina ai lo tatou malosi e lagona ai ma gauai atu i le siufofoga o le Alii,” Ensign po o le Liahona, Nov. 2008, 43).