Lesona 77
Alema 12
Faatomuaga
Ina ua uma ona aumaia e upu a Amoleka ia Seseroma “ua amata ona tetete…i lalo i lona iloa o lona agasala” (Alema 12:1), na tu atu Alema e faailoa ia mea ia na aoao atu e Amoleka. Na taulai atu Alema i upu moni lea o le a fesoasoani i le nuu o Amonaea ina ia salamo i le maaa o o latou loto ma isi agasala. Na ia faamamafaina ia mailei faafoliga a Satani, le faamasinoga lea o le a pau i tagata amioleaga, ma le fuafuaga o le faaolataga, lea o le a mafai ai e i latou o e ua salamo ona faamagaloina a latou agasala.
Fautuaga mo le Aoaoga
Alema 12:1–7
Ua faailoa atu e Alema le fuafuaga a Seseroma—ma le fuafuaga a le fili—i le nuu o Amonaea
Mulimuli i le faataitaiga o i ai e nonoa se’i, pe faapona, se fasi maea po o se manoa. Faataitai le faaaogaina o le mailei e ala i le uuina o le faapona i luma o se fasi lole po o se meaai i luga o le laulau po o se kesi. Fai i se tamaitiiti e aapa i totonu o le mailei mo le meaai. Pe a ia faia, faamau le mailei. (Ia faaeteete e aua nei lavea se tamaitiiti.)
Fai i se tamaitiiti e toe faamanatu i le vasega le auala na taumafai ai Seseroma e pue Amoleka i le mailei (tagai i le Alema 11:21–25). Faamatala atu ina ua uma ona vaai Amoleka i faamoemoega a Seseroma ma tali atu ia te ia, na tu atu foi Alema ma tautala atu ia Seseroma ma tagata o e na faalogolgo (tagai i le Alema 12:1–2). Fai i tamaiti e faitau le leoa le Alema 12:3–6, vaavaai i upu ma fuaitau na faaaoga e Alema e faamatala ai ia metotia a Seseroma. (Atonu e te manao e uunaia ia tamaiti e faailoga ia upu ma fasifuaitau nei.) Tuu atu latou te lipoti mai mea sa latou mauaina.
-
O ai e ana le fuafuaga lea na mulimuli i ai Seseroma?
-
O le a se tala a Alema i faamoemoega a le tiapolo?
-
O le a se mea na mafai ai e Alema ona iloa lenei fuafuaga?
Fai i tamaiti e tau mai ia mataupu faavae lea e aoteleina maia ia mea sa latou aoaoina mai le Alema 12:3 e uiga i le auala e mafai ai ona latou iloa ia mea taufaasese a le fili. E ui e ono eseese ia upu e faaaoga e tamaiti aoga, ae e tatau ona latou faailoa mai ia le mataupu faavae lenei: E mafai ona fesoasoani le Agaga Paia ia i tatou ina ia iloa togafiti a le fili. Atonu e te manao e faamanatu i tamaiti aoga o le lesona ua tea, sa latou aoao ai afai latou te faalagolago i le Agaga Paia, o le a mafai ona tatou manumalo i faaosoosoga. Faamalamalama atu o le manumalo i se faaosoosoga po o se togafiti, e tatau ona tatou iloaina muamua ma le tulaga lamatia e ono oo ia i tatou. Ona tatou faia lea o mea uma tatou te mafaia e aloese mai ai.
-
O anafea na fesoasoani ai le Agaga Paia ia te oe ina ia iloa ma aloese mai faaosoosoga? (A uma ona tali mai tamaiti, atonu e te manao e faasoa atu sa oe foi aafiaga.)
Tuu atu i tamaiti ni nai minute e tusitusi ai i totonu o a latou api o le vasega po o api talaaga mo le suesueina o tusitusiga paia e uiga i le auala e mafai ai ona latou faateleina lo latou malamalama i uunaiga a le Agaga Paia ina ia mafai ai ona latou iloa ma aloese mai mailei a le fili.
Alema 12:8–18
Ua aoao atu Alema e uiga i le faamasinoga mulimuli o tagata uma
Fai i tamaiti e mafaufau e uiga i matata latou te fiafia e tulimatai atu i ai. Fai atu i nisi o i latou e talanoa e uiga i le matata latou te fiafia i ai. Fai atu ia i latou e fuafua pe fia se mea e totogi o le pili i se kolisi, iunivesite, po o se aoga matata ina ia maua ai le malamalama ma tomai e manaomia ina ia faamanuiaina ai i lena matata. Valaaulia se tamaitiiti aoga e faitau le saunoaga lenei a Elder David A. Bednar o le Korama a Aposetolo e Toasefululua. Fai i le vasega e faalogo i le “pili” lea na saunoa i ai Elder Bednar e tatau ona tatou totogiina ina ia maua ai le malamalama faaleagaga.
“O le malamalama faaleagaga… e le mafai ona na o le tuuina mai ia i [tatou]. O le pili o le maelega ma le aoao e ala i le suesue ma le faatuatua foi, e tatau ona totogi ina ia maua ai ma ‘umia’ ai e le tagata lava ia lena silafia. E na o le pau lea o le auala e mafai ai ona lagonaina i le loto le mea ua iloa i le mafaufau” (“Ia Mataala Pea ma le Maelega Atoatoa,” Ensign po o le Liahona, Me 2010, 43).
Valaaulia se tamaitiiti aoga e faitau leotele le Alema 12:7–8. Fai i le vasega e mulimuli i le faitauga, vaavaai mo se faamaoniga o le amataina e Seseroma o le totogiina o le “plili” faaleagaga lea na manaomia ina ia maua ai le malamalama faaleagaga. Fai i tamaiti aoga e faamatala mai le mea sa latou vaai i ai i nei mau lea na faailoa mai ai le amata ona suia o le loto o Seseroma.
Faailoa atu na fesili Seseroma ia Alema e uiga i le toetu. Nai lo le tali vave mai o lena fesili, na aoao o ia e Alema e uiga i le mauaina o le malamalama faaleagaga. Valaaulia se tamaitiiti aoga e faitau leotele le Alema 12:9–11. Fai i le vasega e vaavaai mo le mea na aoao atu e Alema ia Seseroma e uiga i le mauaina o le malamalama faaleagaga. Faamalamalama atu o “mealilo a le Atua o upumoni faaleagaga ia e nao faaaliga e mafai ai ona malamalama i ai … ia te i latou o e usiusitai i le talalelei” (Taiala i Tusitusiga Paia, “Mealilo a le Atua,” scriptures.lds.org). (Atonu e te manao e tusi le faamatalaga lenei i le laupapa.) Atonu e te manao foi e fautuaina tamaiti e tusi i totonu o a latou tusitusiga paia i talaane o le Alema 12:9.)
Fai i tamaiti e faamatala mai i ni a latou lava upu mea na aoao mai i le Alema 12:9 e uiga i le mea e tatau ona tatou faia e maua ai le upumoni faaleagaga. (E ono eseese ni upu e faaaoga e tamaiti aoga, ae e tatau ona faailoa mai e a latou tali na faaalia e le Alii upumoni faaleagaga ia i tatou e tusa ai ma le usiusitai ma le maelega tatou te tuu atu i Ana afioga. Atonu e te manao e fautuaina tamaiti e tusi le mataupu faavae lenei i totonu o a latou tusitusiga paia i talaane o le Alema 12:9.)
-
O le a le sootaga i le va o le tulaga o o tatou loto ma lo tatou gafatia ina ia maua se upumoni faaleagaga?
I le Alema 12:10–11, faasino atu ia taunuuga eseese mo i latou o e le faamaaaina o latou loto i le upumoni ma i latou o e faamaaa o latou loto.
-
E faapefea i le iloaina o nei taunuuga ona aafia au lou naunautaiga e saili atili le malamalama faaleagaga?
Faamalamalama atu ina ua uma ona aoao atu e Alema le ala na tatou iloa ai le upumoni faaleagaga, na ia taliina le fesili a Seseroma lea na fesiliina muamua. Fai i tamaiti e toe fai mai le fesili a Seseroma o i le Alema 12:8 i ni a latou lava upu. Valaaulia i latou e faitau le leoa le Alema 12:12–15, vaavaai mo le mea na aoaoina ai e Alema ia Seseroma e uiga i le toetu ma le faamasinoga. Ao faitau ia tamaiti, tusi le mea lenei i le laupapa: O le a tatou tali atu i luma o le Atua mo o tatou … , … , ma le …
A uma ona faitau tamaiti aoga, fai atu ia i latou e faauma le fuaiupu o i le laupapa: O le a tatou tali atu i luma o le Atua mo o tatou manatu, upu, ma galuega.
-
O le a sou manatu na faapefea ona aafia Seseroma i lenei upumoni? (Fai i tamaiti e sue i le Alema 14:6 ma le 15:3 e saili ai le tali.) Aisea e te manatu ai na tele se aafiaga o lenei upumoni ia Seseroma? (Atonu e te manao e faasino atu e lei popole Seseroma ia na o ia. Sa popole o ia e uiga i tagata na ia taitai seseina.)
-
O a ni ituaiga manatu, upu, ma galuega o tauivi ma tagata e ono faasalaina ai i latou pe afai latou te le salamo? (Ina ia fesoasoani i tamaiti ia mafaufau loloto ma talanoaina le auala e mafai ai e a latou filifiliga o mea faafiafia ma ala o faasalalauga ona aafia ai o latou manatu, upu, ma galuega, atonu e te manao e tagai i le fautuaga i mea faafiafia ma ala o faasalalauga o i le Mo le Malosi o le Autalavou.)
-
O le a se eseesega o le a i ai i au filifiliga i aso uma pe afai e te manatuaina le upumoni o loo tusia i le laupapa?
Faasino le mau faasino i le Mosaea 4:30 o i le Alema 12:14, vaefaamatalaga 14a, ma fai atu i se tamaitiiti aoga e faitau leotele mai le Mosaea 4:30. (Atonu e te manao e fautuaina tamaiti aoga e faailoga le mau faasino lenei.) A lava se taimi, fai i tamaiti e toe tagai i tua i mea sa latou tusia e uiga i le faateleina o lo latou mataalia i uunaiga a le Agaga Paia. Valaaulia i latou e faaopoopo ni nai manatu e uiga i le auala o latou malamalama ai i le latou tali atu patino ao lei uunaia e le Atua o latou naunautaiga ina ia iloa ma aloese mai tofotofoga.
Alema 12:19–37
Ua faamalamalama mai e Alema le ala e fesoasoani ai le fuafuaga o le togiolaina ia i tatou i le foia o aafiaga o le Pau
Faaali atu i tamaiti le ata o Atamu ma Eva o loo Tootutuli i se Fatafaitaulaga (Tusi Ata o le Talalelei [2009], nu. 4. Faamatala atu o se tagata e igoa ia Anetiona, o le sa avea ma se tasi o pule sili i totonu o Amonaea, na fesili e faatatau i mea na aoaoina e Alema ma Amoleka e uiga i le toetu. Na sau o ia e fesili ia Alema pe mafai faapefea ona ola pea le tagata e le oti. (Tagai i le Alema 12:20–21.)
Fesili atu i tamaiti pe mata latou te lagona le to’a pe afai latou te faamatalaina i se tagata e le o se tagata o le Ekalesia le auala e mafai ai ona toe faaolaina i tatou mai le Pau. Ina ia fesoasoani i le latou sauniuniga e aoao atu lenei upumoni i se isi tagata, fai atu ia i latou e saili ia mau o loo i le siata lenei ma tusi ni mea latou te aoaoina i koluma talafeagai. (Atonu e te manao e kopi le siata lenei i luga o le laupapa ao lei amataina le vasega. Fai i tamaiti e kopi le siata i totonu o a latou api o le vasega po o api talaaga mo le suesueina o tusitusiga paia.)
Aafiaga o le Pau (Alema 12:22, 24) |
O le a se mea na faia e le Atua e aumaia ai lo tatou togiolaina (Alema 12:24–25, 28–33) |
O le a se mea e tatau ona tatou faia ina ia togiolaina (Alema 12:24, 30, 34, 37) |
---|---|---|
Ao faatumuina e tamaiti aoga le siata, e ono manaomia e nisi o i latou lau fesoasoani. (O se tasi o auala e fesoasoani ai i tamaiti ina ia malamalama i tusitusiga paia o le faasino lea o i latou i vaefaamatalaga. Mo se faataitaiga, o le mau faasino o loo tuuina mai i le vaefaamatalaga 22i e ono fesoasoani i tamaiti aoga ina ia malamalama i le uiga o le avea ai le fanauga uma a tagata ma tagata leiloa ma pauu.) A uma ona faatumu e tamaiti le siata, fai atu fesili nei. (Atonu e te manao e tusi fesili nei i luga o le laupapa ao lei amataina le vasega ina ia mafai ona mafaufau tamaiti ia latou tali ao latou faatumuina le siata.)
-
E faapefea ona faatagaina i tatou e le Togiola a Iesu Keriso ina ia faatoilaloina ia aafiaga o le Pau? (Ona o le Togiola a Iesu Keriso, o le a faatoilaloina ai e i tatou le oti faaletino e ala i le toetu. Ma e ala atu i le Togiola a le Faaola ma lo tatou salamo, o le a mafai ai ona tatou toe foi atu i le Atua mai lo tatou tulaga “leiloa ma pauu”.)
-
E tusa ai ma le Alema 12:24, o le a se mea na aoaoina e Alema o le faamoemoega o le olaga? (Na ia fai mai o le olaga lenei o le taimi lea mo i tatou e saunia ai e feiloai ma le Atua. Atonu e te manao e fautuaina tamaiti aoga e faailoga ia fuaitau o i le Alema 12:24 lea o loo aoaoina ai le upu moni lenei.)
Ina ia fesoasoani i tamaiti aoga e faaaoga mea sa latou aoaoina, fai ia fesili nei:
-
Na faapefea e le iloaina o le faamoemoega o le olaga ona fesoasoani e taialaina oe?
-
Na faapefea ona fesoasoani lou faatuatua i le Tama Faalelagi ma Iesu Keriso e saunia ai oe e feiloai ma i Laua?
Faaiu atu i lau molimau faapea o le taimi lenei e saunia ai e feiloai ma le Atua.
Tala ma Faamatalaga o Talaaga
Alema 12:24. “Tulaga Nofovaavaaia”
I tusitusiga paia uma, o faaupuga “tulaga nofovaavaaia” po o le “taimi vaavaai” e na o le tusi lava a Alema o loo i ai (tagai i le Alema 12:24; 42:4, 10, 13). Na faamalamalama mai e Elder L. Tom Perry o le Korama a Aposetolo e Toasefululua lenei taimi vaavaaia:
“O le faamoemoega autu o le olaga i le lalolagi, ina ia mafai e o tatou agaga ia sa ola a o lei i ai le lalolagi, ona tuu faatasia ma o tatou tino mo se vaitaimi o avanoa maoae i le olaga faaletino. O le tuu faatasia o ia mea e lua ua tatou maua ai le avanoa e tuputupu ae ai, atiina ae matutua ai faalemafaufau, lea e na o le tuufaatasia lava o le agaga ma le tino e mafai ai e i tatou. E o’o o tatou tino i se vaitaimi faapitoa e tofotofoina ai, lea e ta’u o se vaitaimi faataitai o o tatou olaga. O le taimi lea e aoao ma tofotofoina ai ia faamaonia atu ai i tatou lava ia agavaa mo avanoa e faavavau. O se vaega atoa lea o le fuafuaga paia a lo tatou Tama mo Ana fanau” (“Folafola Atu Le Talalelei Mai Lea Nuu I Lea Nuu,” Liahona, Iulai 1989, 16).
Alema 12:32. Mauaina o poloaiga ina ua mavae le mauaina o se malamalamaaga i le fuafuaga
O Peresitene Boyd K. Packer o le Korama a Aposetolo e Toasefululua na aoao mai faapea o le malamalama i le fuafuaga a le Atua o le a fesoasoani ia i tatou ina ia iloa le mafuaaga e tatau ai ona tatou tausia poloaiga. O le talanoa atu i faiaoga a le autalavou, na ia saunoa ai:
“E mafaufau tagata talavou pe ‘aisea?’—Aisea ua poloaiina ai i tatou e faia nisi o mea, ma pe aisea ua poloaiina ai i tatou e aua le faia isi mea?” ( O se malamalama i le fuafuaga o le fiafia, e oo lava i le tulaga otootoina, e mafai ona tuu atu ai i mafaufau o talavou le ‘aisea.’ …
“O le tele o fesili faigata ua feagai ma i tatou i le Ekalesia i le taimi nei, ma e mafai ona tatou lisiina—faapau pepe ma isi mea uma, o luitau uma pe o ai e umiaina le perisitua ma pe o ai foi e le umiaina—e le mafai ona taliina e aunoa ma sina malamalamaaga o le fuafuaga e avea o se vaaiga i tua atu.
“O le upu lenei a Alema, ma o lau mau lea ou te fiafia i ai, ae ou te manatu ua leva, e ui lava ua ou suia nei ma toe sui foi: ‘na aumai ai e le Atua opoloaiga ia te i latou, ina ua uma ona ia faaali mai ia i latou le ala o le togiola’ (Alema 12:32; faaopoopo le faamamafa). …
“… Afai o e taumafai e tuu atu i [tamaiti aoga] se ‘aisea,’ mulimuli i lena mamanu: ‘Na tuuina atu e le Atua ia i latou ia poloaiga, ina ua uma ona faailoa atu ia i latou le fuafuaga o le togiolaina” (“The Great Plan of Happiness” [address to CES religious educators, Auk. 10, 1993], si.lds.org).