Potutusi
Lesson 144: Eteru 2

Lesona 144

Eteru 2

Faatomuaga

I le maea ai o le o ese mai le Olo o Papelu, na taitaiina e le Alii ia Iareto ma lona uso ma o laua aiga ma uo i le vao. Na faatonuina e le Alii le uso o Iareto e fau ni vaa se valu e ave ai ona tagata e sopoia le vasa agai atu i le laueleele o le folafolaga. A o usiusitai ma le faatuatua le uso o Iareto ma ona tagata i le Alii, sa tuuina atu e le Alii taitaiga ma faatonuga na manaomia ia manuia ai lo latou faigamalaga.

Fautuaga mo le Aoaoga

Eteru 2:1–12

Na amataina e sa Iareto lo latou faigamalaga e agai atu i le laueleele o le folafolaga

Ina ia fesoasoani i tamaiti aoga e vaavaai pe faapefea e le mulimuli ai i faatonuga tatou te maua mai le Atua, ona mafai ona saunia ai i tatou e maua taitaiga sili atu ma taitaiga mai ia te Ia, fai legaoioiga lenei:

A o lei faia le vasega, nana se mea e fai ma sui o se oa i totonu o le potu lea tou te faatasi ai. Saunia ni aitema e tai tutusa se tolu pe fa e tatai atu ai le tamaitiiti aoga i le oa. E te tuuina atu le faailo muamua i le tamaitiiti aoga. O lena faailo o le a taitai atu ai i leisi, lea o le a taitai atu ai i leisi, ma faapena ai seia oo ina maua e tamaiti aoga le oa. Pe a maea ona latou mauaina le oa, fesili atu:

  • O le a se mea atonu o le a tupu pe ana e faaleano i le faailo muamua? (O le a latou le mauaina le faailo lona lua.)

Valaaulia tamaiti aoga e iloilo leleoa le Eteru 1:41–42 , ma vaavaai mo vaega muamua o faatonuga a le Alii e taitai ai sa Iareto i le laueleele o le folafolaga.

Ina ia fesoasoani i tamaiti aoga e vaavaai pe na faapefea ona tali atu sa Iareto i nei faatonuga, valaaulia se tamaitiiti aoga e faitau leotele le Eteru 2:1–3.

  • Na faapefea ona tali atu sa Iareto i vaega muamua o faatonuga a le Alii?

Valaaulia se tamaitiiti aoga e faitau leotele le Eteru 2:4–6. Fai atu i le vasega e mulimuli i le faitauga, ma vaavaai mo faamanuiaga na maua e sa Iareto ina ua latou mulimuli i vaega muamua o faatonuga.

  • O le a le mea na tupu ina ua maea ona mulimuli sa Iareto i vaega muamua o faatonuga a le Alii? (Na tuuina atu e le Alii ia i latou faatonuga faaopoopo e ala atu i le uso o Iareto.)

  • O le a se mea e mafai ona tatou aoao mai i lenei tala e uiga i le ala e tatou te maua ai taitaiga mai le Alii? (Atonu e faaaoga e tamaiti aoga upu eseese, ae e tatau ona atagia i o latou tali le mataupu faavae o loo i lalo: A o tatou galulue i le faatuatua i faatonuga ua aumaia e le Alii, e mafai ona tatou mauaina taitaiga sili atu mai ia te Ia. Atonu e te manao e fautuaina ia latou tusiaina lenei upumoni i o latou tusitusiga paia i talaane o Eteru 2:6.)

Ina ia fesoasoani i tamaiti aoga ia malamalama lelei ma faaaoga lenei mataupu faavae, valaaulia i latou e mafaufau i se manatu po o se uunaiga sa latou maua lata mai mai le Alii. Ona faitau lea o le saunoaga o loo i lalo a Elder Richard G. Scott o le Korama a Aposetolo e Toasefululua e uiga i lo tatou mauaina e le aunoa o faaaliga:

Ata
Elder Richard G. Scott

“O le a oo mai o ni fasimea i lea taimi ma lea taimi, e oo mai i ni vaega, ina ia faateleina ai lou mana. A mulimulita’i ia vaega taitasi i le faatuatua, o le a taitai atu oe i isi vaega seia oo ina ia e maua atoa le tali. O lena mamanu e manaomia ai lou faaaogaina o le faatuatua i le mana o lo tatou Tama e tali mai ai. E ui o nisi taimi e matuai faigata lava, ae e taunuu i le matuai tuputupu a’e o le tagata lava ia (“Faaaogaina o le Meaalofa Faalelagi o le Tatalo,” Ensign po o le Liahona, Me 2007, 9).

Valaaulia tamaiti aoga e tali fesili o loo i lalo i api e tusi ai faamatalaga po o api talaaga o le suesueina o tusitusiga paia. Atonu e te manao e tusi fesili nei i le laupapa pe faitauina lemu ina ia mafai e tamaiti aoga ona tusi i lalo.

  • O anafea na e mulimuli ai i se musumusuga faaleagaga ma maua ai taitaiga sili atu mai le Atua?

  • Aisea e te manatu ai e tatou te manaomia i nisi taimi ona tali atu i se musumusuga faaleagaga ao lei mafai ona tatou mauaina faaaliga faaopoopo?

Otooto le Eteru 2:8–12 e ala i le faamalamalamaina na fetalai atu le Alii i le uso o Iareto faapea pe a taunuu sa Iareto i le laueleele o le folafolaga, o le a latou manaomia ona “auauna atu ia te ia, le Atua moni ma toatasi” (Eteru 2:8) pe afai o le a avea i latou ma malo maoae e pei ona Ia folafolaina. Pe afai e latou te le auauna atu ia te Ia, o le a “tafi ese i latou” mai le laueleele (Eteru 2:8–10). Na faapea mai Moronae o lenei mea o se “fetalaiga faatulafonoina tumau” (Eteru 2:10), o lona uiga e faatatau ia i latou uma o e o le a nonofo i lena laueleele.

Eteru 2:13–15

Na aoaiina e le Alii le uso o Iareto mo le le valaau atu ia te Ia i le tatalo

Valaaulia tamaiti aoga e faitau leleoa le Eteru 2:13–15, ma vaavaai mo mea na faia e sa Iareto ina ua latou taunuu i le matafaga.

  • O a mea na faia e sa Iareto? (Sa latou faatutu o latou faleie ma nonofo ai i le matafaga mo va o tausaga e fa.)

  • Aisea na aoaiina ai e le Alii le uso o Iareto?

  • O a lesona e mafai ona tatou aoao mai le Eteru 2:14? (Atonu e faailoa mai e tamaiti aoga upumoni eseese, e aofia ai mea nei: E finagalo le Alii ia tatou valaau atu ia te Ia e le aunoa i le tatalo; e le fiafia le Alii pe afai tatou te le valaau atu ia te Ia i le tatalo; mao le a leai se naunautaiga malosi o le Agaga ma i tatou pe a tatou agasala.)

Fai atu i tamaiti aoga e mafaufau i o latou lava tatalo faaletagata lava ia ao e faitauina le saunoaga a Elder Donald L. Staheli o le Fitugafulu:

“O tatalo faatauanau i aso taitasi e saili ai le faamagaloga ma le fesoasoani ma le taitaiga faapitoa e taua tele i o tatou olaga ma le faafaileleina o a tatou molimau. Afai tatou te faanatinati, tautu i upu, po o le faatalanoa, po o le galo ona faia a tatou tatalo, ua tatou matele atu lava i le le mauaina o le Agaga lea e matuai taua lava i le taitaiga faaauau pea lea tatou te moomia ina ia pulea lelei ai ia luitau o o tatou olaga i aso uma.” (“Faamautuina o a Tatou Molimau,” Ensign po o le Liahona, Nov. 2004, 39).

Tusi fesili nei i le laupapa ao lei amataina le vasega. (Pe atonu e te manao e tusiaina [fesili]i luga o pepa e tufatufaina atu pe faitau lemu ina ia mafai e tamaiti aoga ona tusi i lalo.) Tuu atu i tamaiti aoga le lua pe tolu minute e tusia ai a latou tali pupuu o fesili nei i api e tusi ai faamatalaga po o api talaaga mo le suesueina o tusitusiga paia.

O le a sou lagona e uiga i le tele o au tatalo faaletagata lava ia?

O le a sou lagona e uiga i au tatalo faamaoni faaletagata lava ia?

I au tatalo faaletagata lava ia, o e lagona ea o loo e fesootai moni ma le Tama Faalelagi? Aisea pe aisea e leai ai?

Afai e mafai ona e faia se suiga se tasi e faaleleia ai au tatalo faaletagata lava ia, o le a lena mea?

Eteru 2:16–25 (faapena foi Eteru 3:1–6; 6:4–9)

Sa fauina e sa Iareto vaa e folau ai i luga o le vasa e agai atu i le laueleele o le folafolaga

Fai i tamaiti aoga e mafaufau i se luitau atonu o ia te i latou po o se filifiliga taua atonu e moomia ona faia, i le taimi nei po o i le lumanai. Mo se faataitaiga, atonu latou te mafaufau e uiga i se tulaga faigata o le aiga, luitau o le aoga, filifiliaina po o ai e faaipoipo i ai, po o le filifiliaina o se matata e galue agai i ai. Valaaulia i latou e mafaufau loloto atonu pe faapefea ona tuu atu e le Alii taitaiga po o fesoasoaniga ia i latou. A o latou suesueina le vaega o totoe a Eteru 2, ia fautuaina i latou e vaavaai mo mataupu faavae o le a fesoasoani ia i latou e mauaina le fesoasoaniga a le Alii i le faia o filifiliga lelei.

Valaaulia se tamaitiiti aoga e faitau leotele le Eteru 2:16–17. Fai i le vasega e mulimuli i le faitauga, ma vaavaai mo mea na faatonuina ai e le Alii sa Iareto ia faia ina ia uluola ai i le laueleele o le folafolaga. Pe a maea ona faitauina e le tamaitiiti aoga, fesili atu pe i ai se tasi e manao e sau ma vave ona tusiaina i luga o le laupapa mea ua latou manatu e foliga i ai vaa a sa Iareto.

Tusi le siata lea i luga o le laupapa e aunoa ma le tuuina i ai o tali i vaega e tolu o loo i lalo. Saunia le siata o se pepa e tufatufaina atu pe fai i tamaiti aoga e kopi i api e tusi ai faamatalaga po o api talaaga mo le suesueina o tusitusiga paia.

Eteru 2:18–19

Eteru 2:20–25; 3:1–6; 6:4–9

Faafitauli i vaa

Tali

O le mea sa faia e le Alii

O le mea sa faia e le uso o Iareto

Leai se ea

Gaosia ia pu e mafai ai ona tatala ma tapuni i luga o fogavaa ma lalo o vaa

Tuu atu faatonuga ia Iareto

Gaosia ia pu

Leai se foeuli

O le a agia e matagi ia vaa agai atu i le laueleele o le folafolaga

Mafuaaga na agi ai le matagi

Faatuatuaina i le Alii

Leai se malamalama

Saunia maa faapitoa ma valaau atu i le Alii e pa’i i ai ina ia latou susulu

Fautuaina le uso o Iareto e uiga i mea o le a le aoga ma faatonuina o ia e saili se tali o le a aoga

Pa’i atu i maa ina ua maea ona saunia e le uso o Iareto

Saunia maa ma valaau atu i le Alii e pa’i i ai ina ia latou susulu i le pogisa

Valaaulia tamaiti aoga e saili i le Eteru 2:18–19 mo i latou lava ina ia maua faafitauli e tolu na iloa e le uso o Iareto e uiga i vaa.

  • O a faafitauli na iloa e le uso o Iareto? (Tusi tali a tamaiti aoga i le vaega muamua o le siata, e pei ona faaalia. Fautuaina i latou e faia le mea e tasi i o latou kopi o le siata.)

Pe maea ona faailoa mai e tamaiti aoga ia faafitauli, valaaulia i latou e suesueina le Eteru 2:20–25; 3:1–6; 6:4–9. (Faaaliga: O le fuaitau i le Eteru 3 ma le 6 o le a matuai auiliiliina i lesona 145 ma le 147.) Tuu atu ia i latou le taimi e faamaea ai e le tagata lava ia le siata atoa.

Pe a lava le taimi e faamaea ai e tamaiti aoga le siata, fai atu fesili nei e fesoasoani ai ia i latou e faailoa ai mataupu faavae mai le aafiaga o le uso o Iareto:

  • E tusa ai ma le tali i le faafitauli e uiga i le ea, e faapefea ona fesoasoani mai le Alii ia i tatou i nisi taimi e foia o tatou faafitauli po o tali i o tatou fesili? (O nisi taimi e tau mai e le Alii ia i tatou le ala e foia ai se faafitauli ma faamoemoe mai ia i tatou ia mulimuli i Ana faatonuga.)

  • E tusa ai ma le tali i faafitauli e uiga i le foeuli, e faapefea ona fesoasoani mai le Alii ia i tatou i nisi taimi e foia o tatou faafitauli po o tali i o tatou fesili? (O nisi taimi e faataunuuina lava e le Alii lava Ia le tali.)

  • E tusa ai ma le tali i faatatau e uiga i le malamalama, e faapefea ona fesoasoani mai le Alii ia i tatou i nisi taimi e foia o tatou faafitauli po o tali i o tatou fesili? (O nisi taimi e manaomia ai e le Alii ona tatou mafaufau i se fofo ma valaau atu mo Lana faamaoniga ma fesoasoaniga i le faataunuuina.)

Tusi le mataupu faavae lenei i le laupapa: A o tatou valaau atu i le Alii ma faia la tatou vaega e foia o tatou faafitauli, e mafai ona tatou maua le fesoasoaniga a le Alii. Ina ia fesoasoani i tamaiti aoga e faaaoga lenei mataupu faavae, fai atu ia i latou e mafaufau i le filifiliga taua sa latou mafaufau i ai i ni nai minute talu ai. Ona fai atu lea ia i latou e mafaufau loloto i fesili nei:

  • O le a se mea e te manatu atonu o le a faamoemoe le Alii e te faia i le faia o lenei filifiliga?

  • O le a se mea atonu o le a faia e le Alii e fesoasoani ai ia te oe?

  • E faapefea ona e faatinoina le faalagolago i le Alii ao e mafaufau e uiga i lenei filifiliga?

Tuu atu ni nai minute i tamaiti aoga e tusia ai se mea e uiga i mea ua latou aoaoina i le aso. Faasoa atu lau molimau faapea pe a tatou valaau atu ma le faatuatua i le Alii ma faia la tatou vaega e foia o tatou faafitauli, o le a Ia taitaiina ma fesoasoani ia i tatou e tusa ai ma Lona atamai ma le mana.

Tala ma Faamatalaga o Talaaga

Eteru 2:4–5. Tali i tatalo

Na aoaoina e Elder Richard G. Scott o le Korama a Aposetolo e Toasefululua:

“E matuai taua lava ona iloa o le Alii e tali mai foi i le ala lona tolu i le tatalo e ala i le taofia o se tali ao ofoina atu le tatalo. Aisea o le a Na faia ai lea mea?

“O Ia o lo tatou Tama e atoatoa. E sili ona alofa ia i tatou i le mea ua tatou malamalama i ai. Na te silafia le mea e lelei mo i tatou. Na te silafia le iuga mai le amataga. Na te finagalo ia tatou faia ni galuega e maua ai le malamalama tatou te manaomia:

“Pe a tali mai o Ia ioe, o le tuuina mai lea ia i tatou o le faamaoniga.

“Pe a tali mai o Ia e leai, o le puipuia lea o i tatou mai le sese.

“Pe a Ia taofia le tali, o le faatupuina lea o i tatou e ala i le faatuatua ia te Ia, usiusitai i Ana poloaiga, ma le lotomalie e saili le mea moni. Ua fuafuaina o le a faamasinoina i tatou e tusa ma a tatou filifiliga ina ia tusa ai ma ana aoaoga, e aunoa ma le muai tuuina mai o se faamaoniga. E le tatau ona tatou nonofo ma faatalitali, po o le muimui ona ua le fetalai mai le Alii. E tatau ona tatou faia se galuega.

“O le tele lava o taimi, e sa’o lava mea ua tatou filifilia e faia. O le a ia faamaonia i o tatou mafaufau le sa’o o a tatou filifiliga i Lana lava ala. O lena faamaoniga e masani ona oo mai e fesoasoani o loo maua i le ala. E mafai ona tatou maua na fesoasoani i le ola faaleagaga. O nei fesoasoani e pei o ni tusi mai lo tatou Tama alofa e faamaonia ai lona taliaina o lena filifiliga” (“A’oa’o Ia Iloa Tali I Tatalo,” Liahona,Ian. 1990, 32–34).

Eteru 2:14–15. O le aoaiina e le Alii o se faailoga o le alofa

E faatatau i leEteru 2:14–15, na maofa Elder Jeffrey R. Holland o le Korama a Aposetolo e Toasefululua i le malosi faaletagata o le uso o Iareto ma le faamagaloga alofa o le Atua:

“E faigata ona vaai faalemafaufau pe faapei se aoaiga e tolu itula mai le Alii, peitai na tutumau le uso o Iareto. Faatasi ai ma le salamo ma le tatalo i se taimi vave, na toe sailia e lenei perofeta le taitaiga mo le faigamalaga na tofiaina ai i latou ma i latou o e na mulimuli ai. Na taliaina e le Atua lana salamo ma tuuina atu ma le alofa taitaiga sili atu mo lo latou misiona taua” (Christ and the New Covenant: The Messianic Message of the Book of Mormon [1997], 15).

E ala i le Perofeta o Iosefa Samita, na aoao mai le Alii, “Ma o e Ou te alofa i ai Ou te aoaiina foi ina ia mafai ona faamagaloina a latou agasala, aua Ou te saunia, faatasi ma le aoaiga, se ala mo le laveaiga o i latou i fafo mai le faaosoosoga, i mea uma, ma sa Ou alofa ia te outou” (MF&F 95:1).

Eteru 2:22–23. E tatau ona tuufaatasia le tatalo ma le taumafaiga

E toatele tagata ua latou fai mai e tatau ona tatou tatalo e pei e faalagolago mea uma i le Alii ma galulue e pei e faalagolago mea uma ia i tatou. Na saunoa mai Elder Russell M. Nelson o le Korama a Aposetolo e Toasefululua e faapea e masani lava ona ia faalogo o saunoa mai Peresitene Gordon B. Hinckley, “Ou te le iloa pe faataunuu faapefea se mea se’i vagana lo’u tootuli ifo ma ole atu mo se fesoasoani, ona ou tu ai lea i luga ma alu i le galuega” (“Malosi Faaleagaga,” Liahona,Ian. 1998, 18).

Lolomi