Lesona 64

Mosaea 23–24

Faatomuaga

Ina ua mavae le solaaga a le nuu o Alema mai le autau a le Tupu o Noa, sa latou faavaeina se aai amiotonu. E ui ina ua liua i latou i le talalelei, ae sa latou feagai lava ma mafatiaga ma luitau. Sa faapologaina i latou e sa Lamana. Ina ua faaaoga e Alema ma lona nuu le faatuatua ma le onosai, sa faamamaina e le Alii a latou avega ma iu ai ina laveaiina i latou mai le nofopologa. (Matau o le Mosaea 23–24 o loo aofia ai pe tusa o le vaitaimi lava lea e tasi e pei ona i ai i le Mosaea 19–22.)

Fautuaga mo le Aoaoga

Mosaea 23:1–20

Na fesoasoani le Alii ia Alema ma lona nuu e sosolaese mai autau a le Tupu o Noa ma faatuina se aai amiotonu.

Faaali i tamaiti le ata o Alema o loo Faia Papatisoga i le Vai o Mamona (62332; Tusi Ata o le Talalelei [2009], nu. 76). Tofi se tamaitiiti e faamatala i le vasega le mea na te iloa e uiga i le tagata o loo papatisoina isi i le ata. (Afai e faigata ona tali mai tamaiti, e mafai ona e fautuaina e faitau le aotelega o le mataupu mo le Mosaea 18 e faamanatu atu ai ia i latou le tala ia Alema ma lona nuu i le Vai o Mamona.)

Ia fai paga tamaiti. Valaaulia paga taitasi e feauauai e faitau le tasi i le isi mai le Mosaea 23:1–5, 19. Fai i ai e vaavaai mo fasifuaitau o loo ta’u mai ai le ala na faamanuiaina ai e le Alii ia Alema ma lona nuu a o latou salamo ma filifili e ola amiotonu. (Atonu e te manao e fautuaina e maka ia nei fasifuaitau.) Fai i tamaiti e lipoti mai mea latou te mauaina.

Valaaulia tamaiti e vaavaai ia latou ata lea o loo iloa atu ai le Vaaiga Aoao o Malaga i le Mosaea 7–24. Faatonu i latou e tusi le nuu o Helama ia latou ata i lona tulaga e tatau ai. Faapena foi ona fai atu i ai e tusi se au mai le Vai o Mamona i le nuu o Helama ma ia latou faailoga lea au,” Ua Malaga ese Alema ma lona nuu.” (Mo le ata atoa, tagai i le faaopoopoga o i le faaiuga o le tusi lesona lenei.)

Vaaiga Aoao o Malaga i le Mosaea 7–24

malaga i le Mosaea 7–24

Faamatala faapuupuu o le Mosaea 23:6–14, tatou te faitau ai na teena e Alema le talosaga a tagata ina ia avea o ia ma o latou tupu. Tofi se tamaitiiti e faitau leotele le Mosaea 23:9–10, 12. Fai i le vasega e vaavaai mo le faamatalaga a Alema o lona aafiaga ma lona nuu i le Tupu o Noa. Fai i tamaiti e lipoti mai mea latou te mauaina.

• O a uiga o fasifuaitau nei “maua i se mailei” ma le “noanoa i noanoaga o le amioletonu” ua aoao mai ai e uiga i aafiaga o le agasala?

• Aisea e aoga ai mo i tatou ona iloa ia uunaiga ua taitai atu ai i tatou i le agasala i le taimi ua te’a?

• A uma ona tatou salamo, e taua i se a ona manatua le “tiga” e mafai ona oo i ai le salamo?

Fai i se tamaitiiti e faitau leotele le Mosaea 23:13. Faasino i le fautuaga a Alema e “ia tutu mausali i lenei saolotoga ua faasaolotoina ai outou.”

• E faatatau faapefea lenei fautuaga i le faagasologa o le salamo? (Fesoasoani ia malamalama tamaiti ua uma ona laveaiina i tatou e le Alii mai le agasala, ua tatou maua le saolotoga mo le faamagaloina, ma ua tatau foi ona tatou faia filifiliga amiotonu e faatumauina ai le saolotoga.

Valaaulia tamaiti e sue lemu i le Mosaea 23:14–18, ma vaavaai mo ni mea sa aoao atu e Alema i tagata e fai ina ia faatumauina ai lo latou saolotoga. Fai i ni nai tamaiti e lipoti atu mea sa latou maua.

Valaaulia se tamaitiiti e faitau le Mosaea 23:19–20. Fai i le vasega e faailoa mai le fasifuaitau o loo ta’u mai ai na faamanuiaina e le Alii le nuu ina ua latou filifili e ola amiotonu (“manuia tele”).

• E faapefea ona e aoteleina mea ua outou aoaoina mai le aafiaga o Alema ma lona nuu? (Faatasi ai ma isi mea moni, atonu e fai mai tamaiti a tatou salamo ma filifili e ola amiotonu, o le a faamanuiaina i tatou e le Alii ma faasaoloto i tatou mai noanoaga o le amioletonu.)

• O anafea na e vaaia ai le faataunuuina o lenei mataupu faavae i lou olaga po o le olaga o se uo po o se tasi o le aiga? (Faamanatu i tamaiti latou te le tau faasoa maia aafiaga e patino i le tagata lava ia pe faalilo.)

Alma Baptizes in the Waters of Mormon

Mosaea 23:21–29

Na faanofopologa e se autau a sa Lamana ma faitaulaga amioleaga a Noa ia Alema ma lona nuu

Ina ia fesoasoani i tamaiti ia malamalama o i latou e amiotonu e tatau lava ona oo i ni tofotofoga, fai i tamaiti e mafaufau i se taimi i o latou olaga e mafai ona latou faatatau i ai le saunoaga lea a Elder Richard G. Scott o le Korama a Aposetolo e Toasefululua:

Elder Richard G. Scott

“O tofotofoga …. e manaomia e ui ina o ‘e ola i se olaga agavaa, amiotonu, ma usiusitai i Ana poloaiga. E masani ona saputu le o’o mai o lu’i eseese ia i tatou i le taimi e tasi, i le taimi tonu lava e foliga mai ai ua matua lelei ma filemu mea uma i o tatou olaga.” (“Faalagolago i le Alii,” Liahona, Ianuari. 1996, 19).

Fai i tamaiti e sue le Mosaea 23:21–22 ia iloa ai pe aisea e faataga ai e le Alii i latou o e filifili e ola amiotonu, ia oo i tofotofoga ma mafatiaga. A o lipoti mai e tamaiti mea latou te mauaina, fesoasoani ia latou malamalama o le a tofotofo e le Alii lo tatou onosai ma le faatuatua e fesoasoani ai e faateleina lo tatou faalagolago atu ia te Ia.

Valaaulia tamaiti e tusi ia fesili nei i a latou api talaaga mo le suesueina o tusitusiga paia po o api o le vasega. Fai i ai e mafaufau loloto i fesili nei a o latou faitauina le vaega o totoe o le Mosaea 23. E le tatau ona latou tusia a latou tali sei vagana ua e faatonuina ai i latou i se taimi mulimuli ane o le lesona.

• O a tofotofoga o e feagai ai nei?

• E mafai faapefea ona e faaaogaina le faatuatua ma faalagolago i le Atua i taimi o ou tofotofoga?

Fai i tamaiti e faitau le Mosaea 23:23–29. Valaaulia i latou e vaavaai mo auala na tofotofoina ai Alema ma lona nuu ma le mea sa latou faia e faaalia ai lo latou faalagolago i le Atua.

• E mafai faapefea ona avea le tatalo ma le mulimuli i fautuaga a se perofeta e fesoasoani ai ia i tatou i se tofotofoga? (E mafai ona fesoasoani e faateleina ai lo tatou onosai ma le faatuatua. E mafai foi ona fesoasoani tatou te maua ai le malosi, faaaliga patino, filemu, ma le mautinoa ina ia mafai ai ona tatou onosaia o tatou tofotofoga pe maua mai ai se laveai.)

Mosaea 23:30–24:25

Na feagai Alema ma lona nuu ma sauaga, ae na faamamaina e le Alii a latou avega ma laveaiina faavavega i latou

Ina ia fesoasoani ia malamalama tamaiti i le faiā a Amulona ma sa Lamana ma lo latou tupu, aotele le Mosaea 23:30–39 ma le 24:1–7. Faamatala o Amulona o le taitai o faitaulaga amioleaga a le Tupu o Noa, lea na tuliesea Alema ona o lona lagolagoina o Apinati. O Amulona la faatasi ai ma isi faitaulaga amioleaga ma a latou ava sa Lamana, na latou soofaatasi atu i tagata sa Lamana. Na faatuatuaina e le tupu o sa Lamana ia Amulona, lea na tofia loa o ia e pule i tagata sa Nifae i le nuu o Helama, e aofia ai ma tagata o Alema.

Auai o tamaiti i le faatinoga

O le valaaulia o tamaiti e auai i le faatinoga o gaoioiga i luma o le vasega, e fesoasoani ai i tamaiti ia latou lagonaina lo latou aofia ai i le aoaoga, aua o la e fesoasoani se tasi o a latou uo e faiaoga. A e tofia tamaiti i luma o le vasega e auai i le faatinoga mo se taimi umi, ona fai lea i ai e aumai a latou tusitusiga paia ina ia auai ai pea lava i le faitauina o mau ma le talanoaga faatasi ma le isi vaega o le vasega.

Tofi mai se tamaitiiti i luma o le vasega, ma fai i ai e faafafa se ato faafafa e leai se mea o i ai. (E manaomia la ia tusitusiga paia a le tamaitiiti.) Fai i ai o le a matua faigofie lava lona tauaveina o se atofaafafa e leai se mea o i ai i le aso atoa. Fai i le tamaitiiti lena e faitau leotele le Mosaea 24:8–11. O taimi taitasi e faitau ai e le tamaitiiti se mea e avea o se tofotofoga ia Alema ma ona tagata, tuu se maa po o se mea mamafa i totonu o le atofaafafa. A uma ona faitau e le tamaitiiti, ona fai lea i ai pe o le a le faigofie o le a ia tauaveina ai le atofaafafa ua tumu i le aso atoa. (E tatau ona tu ai pea le tamaitiiti i luma o le vasega ma amo pea le atofaafafa seia faatonuina e nofo i lalo.) Fesili i le vasega:

• O a ni mea e ono faatusa i ai maa po o mea mamafa o i totonu o le atofaafafa i o tatou olaga?

• E aafia faapefea i tatou i ia ituaiga o avega?

Fai i tamaiti e faitau leotele le Mosaea 24:10–12. Valaaulia le vasega e vaavaai mo mea na faia e tagata o Alema ia maua ai le fesoasoani mo a latou avega. Fai i tamaiti e faamatala mea latou te mauaina.

• E mafai faapefea e le tatalo ona fesoasoani ia i tatou pe a i ai a tatou avega faigata?

• A tatou oo i faigata, e mafai faapefea ona faamafanafanaina i tatou i le iloa ai e silafia e le Atua “mafaufauga o o [tatou] loto”?

Valaaulia tamaiti e faitau le Mosaea 24:13–15 e sue ai le mea na tupu i tagata o Alema a o faaauau pea ona latou tatalo.

• O a mea na folafola atu le Alii e fai mo tagata o Alema? (A o tali atu tamaiti, e mafai ona e fai i se isi tamaitiiti pe toalua foi e sii i luga le pito i lalo o le atofaafafa e faamama ai le avega o loo tauaveina e le tamaitiiti—e faatusa i le ala e mafai ai e Alii ona faamama a tatou avega.) Na faapefea ona faiā lenei folafolaga i le feagaiga na latou osia i le Vai o Mamona?) (tagai Mosaea 18:8–10.)

• Aisea e aoga ai le iloa e le faapea e vave ona aveese e le Alii a tatou avega i taimi uma pe aveesea foi o tatou luitau?

• O le a se mea e mafai ona tatou aoao mai le ala na tali atu ai Alema ma ona tagata i o latou tofotofoga?

• O anafea na e lagonaina ai le tuuina atu e le Alii ia te oe o le malosi e onosaia ai tofotofoga pe tauaveina se avega?

Valaaulia tamaiti e faitau lemu le Mosaea 24:16–17, 21. Fai i ai e sue upu ma fasifuaitau o loo faamatala atili ai le ala na tali atu ai tagata i o latou tofotofoga ma le ala na fesoasoani ai le Alii ia i latou. Tofi se tamaitiiti se toatasi pe toalua foi e faamatala i a la’ua lava upu soo se sootaga o vaai i ai i le va o faatinoga a tagata ma faatinoga a le Alii. Tusi le mataupu faavae lea i luga o le laupapa: A tatou gauai atu ma le onosai i le finagalo o le Alii, o le a Ia faamalosia i tatou ma laveaiina mai tofotofoga i Lona taimi.

Fai i le tamaitiiti o i luma o le vasega e aveese le atofaafafa. Fai i ai e faamatala ona lagona ina ua saoloto mai le avega. Fai i le tamaitiiti lava lena e faitau le Mosaea 24:21–22. E mafai ona e fai i le tamaitiiti e faasoa atu pe mafai faapefea ona ia faafesootai atu i mea na faia e tagata i fuaiupu na.

Aotele le Mosaea 24:18–25 i le faamatala atu lea na mafai e Alema ma ona tagata ona sosolaese aua na faamoegase e le Alii ia tagata sa Lamana. Ona taitai lea e le Alii ia Alema ma ona tagata i Saraemila, lea na talia lelei ai ma le olioli i latou e le Tupu o Mosaea. Sa “sa’ati atu le faafetai i le Atua,” e Alema ma ona tagata aua ua latou iloa “e leai se tasi sa laveaiina i latou sei vagana ai le Alii lo latou Atua” (Mosaea 24:21; tagai foi Mosaea 25:16).

I a latou ata o loo faaalia ai le Vaaiga Aoao o Malaga i le Mosaea 7–24, fai i tamaiti e tusi se aū mai le nuu o Helama i le nuu o Saraemila. Faatonu i latou e faaigoa le malaga lenei o le “solaaga a tagata o Alema.”

malaga i le Mosaea 7–24

Ina ia faauma, fai i tamaiti e tusi ni tali i fesili e lua na latou tusia ia latou api talaaga mo le suesueina o tusitusiga paia a o faagasolo le lesona. Fai i ai e mafaufau i o latou tofotofoga ma pe mafai faapefea ona faaaoga lo latou faatuatua ma faalagolago i le Atua e fesoasoani latou te onosaia ai. Faasoa atu lau molimau afai tatou te gauai atu ma le onosai i le finagalo o le Alii, o le a Ia faamalosia i tatou ma laveai i tatou mai o tatou tofotofoga i Lona taimi. E mafai foi ona e valaaulia tamaiti e faasoa mai faataitaiga pe na faapefea e le Alii ona faamalolosia i latou i o latou tofotofoga.

Tala ma Faamatalaga o Talaaga

Mosaea 21–24 Faatusatusa le eseesega o le nofopologa o tagata o Limae ma le nofopologa o tagata o Alema

Tagata o Limae	Tagata o Alema
Na tuufaapologaina i latou ina ua mavae se faamaligitoto tele (tagai Mosaea 21:5–13).	Na tuufaapologaina e aunoa ma se faamaligitoto (tagai Mosaea 23:35–38).
Na faatelegese ona faafofogaina e le Alii a latou tagi ona o a latou amioleaga (tagai Mosaea 21:15).	Na vave ona tali le Alii i a latou tatalo (tagai Mosaea 23:10–13).
Na faamamaina a latou avega aua na faamaluluina e le Alii loto o tagata sa Lamana (tagai Mosaea 21:15).	Na faamalolosia i latou e le Alii ina ia mafai ai ona faigofie ona latou tauaveina a latou avega (tagai Mosaea 24:14–15).
Na i ai ia Kiteona se fuafuaga e sosolaese ai (tagai Mosaea 21:36; 22:1–9).	Na ta’u atu e le Alii ia i latou, “Ia faamafanafanaina outou, ona o le aso a taeao o le a Ou laveai ai outou mai le pologa” (Mosaea 24:16).
Na latou faaonanaina leoleo (tagai Mosaea 22:10).	Na faamomoe e le Alii ia leoleo (tagai Mosaea 24:19).

Mosaea 23:21. E mafai faapefea ona aoga o tatou tofotofoga ia i tatou?

E ui lava ina salamo ia tagata na mulimuli ia Alema ma faamaoni, ae sa tuu lava e le Alii i latou e faatigaina mo se taimi le tumau e sa Lamana e fai ma tofotofoga o lo latou onosai ma le faatuatua.

Na aoao mai e Elder Orson F. Whitney o le Korama a Aposetolo e Toasefululua e faapea, o mea uma lava tatou te oo i ai e aoao ai i tatou i ni lesona taua:

“E leai se tiga tatou te feagai, leai se tofotofoga tatou te oo i ai e maumau. E aoga mo lo tatou a’otauina, i le atinaega o na uiga auaumama e pei o le onosai, faatuatua, lototoa ma le lotomaulalo. O mea uma tatou te mafatia ai, ma mea uma tatou te onosaia, ae maise lava pe a tatou onosaia ma le faapalepale, e atiina ae ai o tatou tagata, faamama ai o tatou loto, faalautele ai o tatou agaga, ma faia ai i tatou ia sili atu ona agamalu ma agaalofa, sili atu ona agavaa e ta’ua o fanau a le Atua … ma e ala mai i faanoanoaga ma mafatiaga, o le galulue punouai ma puapuaga, tatou te maua ai le aoaoina lea ua tatou o mai ai iinei ina ia maua, ma o le a faapea ona avea atili ai i tatou e pei o lo tatou Tama ma Tina oi le lagi” (i le Spencer W. Kimball Faith Precedes the Miracle [1972], 98).

Na faamalamalama atili e Elder Richard G. Scott o le Korama a Aposetolo e Toasefululua le taua o le faamoemoega o tofotofoga:

“Afai o ia toatuga e le o ni iuga o sou faalogogata, o ni faamaoniga ia ua lagona e le Alii ua e saunia e te alualu atili i luma (tagai Faataoto 3:11–12). O lona uiga na te tuu mai ia te oe mea e uunaia ai le alualu i luma, malamalama ma le alofa e faaleleia atili ai oe mo lou manuia e faavavau. E manaomia se taumafaiga malosi tele lava, ina ia avatu oe mai le mea o loo e i ai nei, i le mea ua Ia finagalo ia e o’o atu i ai, ma o le tele o taimi, o le a lagona i lena taumafaiga, le mafatia ma le tiga.” (“Trust in the Lord,” Ensign, Nov. 1995, 16–17).

Mosaea 24:15–16. E mafai faapefea ona aafia lo tatou tuputupu ae patino i tofotofoga?

Ua fautuaina i tatou e Elder Richard G. Scott o le Korama a Aposetolo e Toasefululua ia faalagolago i le Alii pe a tatou feagai ma luitau:

“Ua naunau le Alii i lou tuputupu ae ma lou atinaega patino. E televave le alualu i luma pe a e naunau e faataga o Ia e taitai oe i aafiaga uma e tuputupu ae ai lua te feagai, pe e te fiafia i ai pe leai. A e faalagolago i le Alii, a e naunau e taulai atu lou loto ma lou mafaufau i Lona finagalo, pe a e ole atu ina ia taitai oe e le Agaga e faia Lona finagalo, e faamautinoaina oe i le fiafia aupito silisili i le ala ma mea silisili e ausia mai lenei aafiaga i le olaga nei. Afai e te fesiligia mea uma e poloaiina oe e fai, pe teena malosi ia luitau uma e le malie, ua e faafaigataina atili mo le Alii ona faamanuiaina oe” (“Mauaina o le Olioli i le Olaga,” Liahona, Iulai 1996, 25).

Manatu Faaopoopo Faafaiaoga

Mosaea 24:14–15. “O le a ou … faamamaina foi avega ua tuu i o outou tauau”.

Valaaulia se tagata o le vasega e faitau leotele le Mosaea 24:15–16. Faaali le ata vitio ua faaigoaina “Lifting Burdens” (lds.org/media-library/video/mormon-messages?#2009-10-38-lifting-burdens), lea e molimau mai ai uso o le Au Peresitene Sili ma le Korama a Aposetolo e Toasefululua i le mana o le Faaola e sii a’e ai, faamalolo, ma faamalolosia i tatou. A o matamata tamaiti, fautuaina i latou e mafaufau i se taimi na sii ese ai a latou avega e le Alii pe faamalolosia i latou.

• O anafea na e lagonaina ai le faamalosia e le Alii pe lagonaina ai foi Lona faamamaina o au avega?