Potutusi
Lesona 44: Iakopo 2:12–35

Lesona 44

Iakopo 2:12–35

Faatomuaga

I le faamaoni ai i lona tiutetauave o se taitai perisitua, na valaau atu ai Iakopo i lona nuu ina ia salamo, lapataiina i latou i agasala o le faamaualuga ma feusuaiga le mama. Na ia aoao atu e uiga i le matautia ma taunuuga o nei agasala taatele e lua.

Fautuaga mo le Aoaoga

Iakopo 2:12–21

Ua aoai e Iakopo lona nuu ona o lo latou faamaualuga

Tusi mea nei i luga o le laupapa: tupe, atamai, uo, taleni, malamalama o le talalelei. Valaaulia tamaiti aoga e mafaufau e uiga i faamanuiaga ua tuuina mai e le Alii ia i latou i nei vaega. Uunaia i latou e mafaufau pe o a ni o latou lagona e uiga i nei faamanuiaga a o latou suesueina le Iakopo 2.

Fai atu i se tamaitiiti aoga e faitau leotele le Iakopo 2:12–13. Valaaulia le vaega o totoe o le vasega e mulimuli i le faitauga, ma faailoa mai mea na sailia e le toatele o sa Nifae.

Pe a mae’a ona tali mai tamaiti aoga, faasino atu faapea na ta’u atu e Iakopo i lona nuu na latou mauaina oa e ala i le “aao o le Atua.” Atonu e te manao e faamalamalama atu faapea o le upu providence e faasino i le Atua.

  • Aisea e taua ai mo i tatou le manatua o o tatou faamanuiaga uma e maua mai lo tatou Tama Faalelagi?

  • E tusa ai ma le Iakopo 2:13, aisea na toatele ai nisi o sa Nifae na siitia i luga i le faamaualuga?

Mafaufau e faaaoga le vaega lenei mai i Vitio o le Tusi a Mamona a o e aoao atu le vaega lenei (tagai i le Vitio o le Tusi a Mamona: Faatonuga mo le Faiaoga Seminare).

Valaaulia se tamaitiiti aoga e faitau leotele le faamatalaga lenei mai ia Peresitene Dieter F. Uchtdorf o le Au Peresitene Sili. Fai atu i le vasega e faalogologo mo ni malamalamaaga e faatatau i le uiga o le siitia i luga i le faamaualuga:

Ata
Peresitene Dieter F. Uchtdorf

“I lona natura, o le faamaualuga o se agasala o le faatusatusaga, aua e masani lava ona amata i le ‘Vaai i lo’u maoa’e tele ma mea maoa’e ua ou faia,’ e masani lava ona foliga mai e faaiu i le ‘O le mea lea, e sili atu ai a’u nai lo oe.’ …

“… O le agasala lea o le ‘Faafetai le Atua ua sili atu lo’u taua nai lo outou.’ I lona natura tonu lava o le mana’o lea ina ia faamemelo atu pe lotoleaga atu [ia te ia]. O le agasala lea o le viia o le tagata lava ia” (“O le Faamaualuga ma le Perisitua,” Ensign po o le Liahona, Nov. 2010, 56).

Uunai tamaiti aoga e mafaufau loloto ma le filemu, pe sa i ai ea se taimi na ta’usalaina ai i latou i le agasala o le manatu ifo ua sili atu i latou nai lo se isi tagata.

Valaaulia se tamaitiiti aoga e faitau leotele le Iakopo 2:14–16. Fai atu i le vasega e tagai mo fasifuaitau ia ua faaalia ai taunuuga o le faamaualuga. Fai atu ia i latou e lipoti mai mea latou te mauaina.

  • Aisea e te manatu ai o le faamaualuga ua i ai le mana e “faaumatia ai o [tatou] agaga”? Iakopo 2:16

Valaaulia tamaiti aoga e faitau leleoa le Iakopo 2:17–21. Fai atu ia i latou e tagai mo fasifuaitau ia o loo aoao mai ai auala e mafai ai ona tatou faatoilaloina le faamaualuga ma uiga le talafeagai e faatatau i oa faaletino. Atonu e te manao e fautua atu ina ia latou makaina fasifuaitau latou te mauaina. Pe a mae’a ona latou suesueina nei fuaiupu, valaaulia i latou e filifili se fasifuaitau se tasi ua latou mauaina. Tuu atu i nisi o tamaiti aoga le avanoa e faamalamalama mai ai pe mafai faapefea e fasifuaitau na latou filifilia ona fesoasoani ia i tatou e faatoilaloina le faamaualuga po o uiga le talafeagai e faatatau i oa faaletino. (I le avea ai o se vaega o lenei gaoioiga, atonu foi e te manao e fautua atu ina ia faitauina e tamaiti aoga fuaitau o mau nei: 1 Tupu 3:11–13; Mareko 10:17–27, e aofia ai ma le Faaliliuga a Iosefa Samita o loo i le vaefaamatalaga 27a; 2 Nifae 26:31; Alema 39:14; MF&F 6:7.)

  • O le a sou manatu i le uiga o le saili le malo o le Atua? O le a sou manatu i le uiga o le mauaina o se faamoemoe ia Keriso?

  • E faapefea ona mafai e le sailiaina o le malo o le Atua ma le mauaina o se faamoemoe ia Keriso, ona aafia ai o tatou uiga e faatatau i le oa ma meatotino faaletino?

Fai atu i tamaiti aoga e vaai faalemafaufau pe faapefea ona latou aoteleina le manatu autu o le Iakopo 2:12–21 mo se tamaitiiti aoga e le o i ai i le vasega i le asō. Tuu atu i ni tamaiti aoga se toalua pe toatolu se avanoa e faasoa mai ai mea o le a latou fai atu ai. Atonu e mafai e tamaiti aoga ona tauina mai ni mataupu faavae moni eseese. Ia mautinoa ua latou malamalama e faapea e tatau ona tatou sailia le malo o le Atua e sili atu i lo isi mea uma e fiafia i ai. Tuu atu i tamaiti aoga le taimi e tusi ai i totonu o a latou api talaaga mo le suesueina o tusitusiga paia, po o api o tusigamanatu a le vasega, e uiga i se ala se tasi e mafai ai ona latou faaaogaina faamanuiaga ma avanoa ua tuuina mai e le Alii ia i latou e fausia ai le malo o le Atua ma faamanuia ai olaga o isi.

Iakopo 2:22–35

Ua aoaia e Iakopo tagata o e ua solia le tulafono o le legavia

Tusi i luga o le laupapa le faamatalaga lenei a Peresitene Ezra Taft Benson:

“O le agasala faataumaoi a lenei augatupulaga o le …”

Valaaulia tamaiti aoga e mafaufau e uiga i le auala atonu na faauma ai e Peresitene Benson lenei fuaiupu. Ona faitau lea o le faamatalaga lenei:

“O le agasala faataumaoi a lenei tupulaga o feusuaiga le mama. O lenei tulaga, na saunoa i ai le Perofeta o Iosefa, o le a avea ma puna o isi faaosoosoga, isi taufaifaiga, ma isi faigata mo toeaiina o Isaraelu nai lo se isi mea” (The Teachings of Ezra Taft Benson [1988], 277).

Valaaulia tamaiti aoga e faitau leleoa le Iakopo 2:22–23, 28, ma faailoa ia upu ma fasifuaitau na faaaogaina e Iakopo e faamatala ai le matuia o feusuaiga le mama. (Atonu e manaomia ona e faamalamalama atu e faapea o le upu faitaaga e faasino i agasala faalefeusuaiga.) Fai atu i tamaiti aoga e faasoa mai ni upu ma ni fasifuaitau na latou mauaina.

Ina ia fesoasoani i tamaiti aoga ia malamalama i le tulafono o le legavia, faitau atu i ai le faamatalaga lenei mai le tamaitusi o le Mo le Malosi o le Autalavou. Fai atu i tamaiti aoga e faalogologo mo ni amioga e tatau ona latou aloese mai ai.

“O le tulaga faatonuina a le Alii e faatatau i le mama a’ia’i i tulaga feusuai e manino ma e le masuia. Aua lava nei e faia ni sootaga feusuai a o le i faaipoipo, ma ia e faamaoni atoatoa i lou toalua pe a uma le faaipoipoga. …

“Aua lava nei faia soo se mea e mafai ona taitai atu ai i le agasala faalefeusuaiga. Ia taulimaina isi ma le faaaloalo, ae le o ni mea e faaaogaina e faamalie ai le tuinanau ma manaoga manatu faapito. A o lei faaipoipo, ia aua lava nei faia ni kisi faananau loto, pe taoto i luga o se isi tagata, pe tago i vaega lilo, po o itutino sa o se isi tagata, pe o fai ofu pe leai foi. Aua lava nei e faia soo se mea e faaosoina ai ni lagona feusuai. Aua nei e faaosoina na lagona i lou tino” (Mo Le Malosi o le Autalavou [tamai tusi, 2011], 35–36).

Faamanino atu faapea e tusa ai ma le Iakopo 2:23–24 o nisi o tagata i aso o Iakopo, na taumafai e faia ni alofaga mo a latou agasala faalefeusuaiga.

  • O faapefea ona saili tagata i nisi o taimi e faia ni alofaga mo tulaga le mama faalefeusuaiga i aso nei?

  • O a nisi o mea e mafai e talavou ona faia e aloese ai mai le faatoilaloina e faaosoosoga faalefeusuaiga? (O tali atonu e aofia ai le tatalo mo le malosiaga, faifaimea faatasi ma uo lelei, filifiliaina o faafiafiaga lelei atoatoa, ma le aloese mai tulaga ma nofoaga ia e ono i ai le faaosoosoga.)

Atonu e te manao e faamanino atu faapea, o se tasi o agasala a Sa Nifae na i ai, o le faia e aunoa ma le faatagaina o autaunonofo. Valaaulia tamaiti aoga e faitau le leoa le Iakopo 2:27–30. A o le i faitauina, atonu e manaomia lou faamalamalama atu faapea o le upu palake e faasino i se tamaitai o le sa faaipoipo faaletulafono i se alii, ae, o se sa i ai i se tulaga maualalo nai lo se ava.

  • E tusa ai ma le Iakopo 2:27, o le a le “afioga a le Alii” e uiga i le faia o le sili atu i le tasi le ava? (Ia mautinoa ua manino faapea, mai lava i le amataga, na poloaiina e le Alii faapea e tatau i se alii ona faaipoipo atu i le ava e toatasi. Tagai foi i le MF&F 49:15–16.)

Faamalamalama atu faapea o autaunonofo e le faatagaina, o se faataitaiga lea o se faitaaga, po o le agasala faalefeusuaiga. I fofoga o le Atua, o agasala faalefeusuaiga o ni agasala sili ona matuia.

  • E tusa ai ma le Iakopo 2:30, o a taimi e faatagaina ai tagata o le Alii e faia autaunonofo? (Pe a poloaiina ai e le Alii.)

Faamanino atu faapea i nisi o taimi patino i le talafaasolopito o le lalolagi, na poloaiina ai e le Alii Lona nuu e faia autaunonofo. Mo le faataitaiga, sa faia autaunonofo i taimi o le Feagaiga Tuai e Aperaamo ma Sarai (tagai i le Kenese 16:1–3; MF&F 132:34–35, 37) ma faapea le atalii o lona atalii o Iakopo (tagai i le MF&F 132:37), ma sa faia mo sina taimi i uluai aso o le Ekalesia toefuataiina, e amata mai ia Iosefa Samita (tagai i le MF&F 132:32–33, 53).

Ina ia faamamafa atu faapea o feusuaiga le mama e i ai sona aafiaga faataumaoi i luga o aiga, faitau leotele le Iakopo 2:31–35. Fai atu i tamaiti aoga e faitau faatasi, ma tagai mo nisi o taunuuga o le ola le mama. Faamanino atu faapea, e ui lava ina tautala faapitoa Iakopo i alii, o le tulafono o le le gaoia po o le legavia e tutusa lava lona taua mo tamaitai foi.

  • E tusa ai ma le faamatalaga a Iakopo, e faapefea ona aafia aiga pe a solia e se tagata o le aiga le tulafono o le le gaoia po o le legavia? E faapefea ona fesoasoani lenei mea e faamalamalama ai le mafuaaga e avea ai le soliina o le tulafono o le le gaoia o se agasala matuia?

  • O nisi tagata talavou latou te faapea ifo e mafai ona latou solia le tulafono o le le gaoia/legavia, aua o a latou gaoioiga e le afaina ai se isi tagata. Faamata e faapefea ona aafia isi tagata i le ola le mama o se tasi?

Ina ia faaiuina lenei talanoaga e uiga i taunuuga o agasala faalefeusuaiga, ia mafaufau e faitauina le faamatalaga lenei a Elder Richard G. Scott o le Korama a Aposetolo e Toasefululua. Valaaulia tamaiti aoga e faalogologo mo taunuuga o feusuaiga le mama.

Ata
Elder Richard G. Scott

“O na uiga feusuai e le faatagaina e le Alii ona faaaoga i fafo atu o tautinoga tumau o le faaipoipoga ona latou te faaleagaina ai Ona faamoemoega. I totonu o le feagaiga paia o le faaipoipoga o na sootaga ua tusa ai ma Lana fuafuaga. A faataunuuina i se isi lava ala, o le a tetee au i Lona finagalo. Latou te aumaia lagona matuia ma le faatamaiaga faaleagaga. E ui lava e le o iloaina e i latou o loo faia, o loo tupu i le taimi nei, ae o le a latou iloa lava i se taimi. O feusuaiga le mama e tulai mai ai se pa pupuni i uunaiga a le Agaga Paia faatasi ai ma ona gafatia musuia uma e faamalamalamaina ma faamanaina ai. E mafua ai lagona faaosofia malolosi faaletino ma faalelagona. E i ai taimi na te faatupuina ai se lagona le faamalieina lea e faaosofia ai le ua solitulafono e tuinanau i isi agasala sili atu ona matuia.” (“O le Faia o Filifiliga Sao,” Liahona, Ian. 1995, 44).

Valaaulia tamaiti aoga e iloilo le amataga o le Iakopo 2:28 ma saili le mea e fiafia i ai le Alii. (Atonu e te manao e fautua atu ina ia faailogaina e tamaiti aoga mea ua latou mauaina. Ia mautinoa ua latou malamalama e faapea e fiafia le Alii i le lē gaoiā.)

  • E tusa ma mea ua tatou talanoaina i le aso, aisea e te manatu ua fiafia ai le Alii i le lē gaoiā?

Ia fuafua e faaali atu se ata o lou aiga. Molimau atu i faamanuiaga ua oo mai ia te oe ma lou aiga, a o e ola ai i le tulafono a le Alii o le lē gaoiā [po o le legavia]. Faamamafa atu faapea o le mana e maua ai fanau o se meaalofa ofoofogia mai lo tatou Tama oi le Lagi, pe a faaaogaina i totonu o tuaoi ua Ia faatuina. Uunai tamaiti aoga ina ia paia ma mama aiai ina ia mafai e le Alii ona “fiafia i lo [latou] lē gaoiā” Iakopo 2:28

Ina ia fesoasoani i tamaiti aoga e faasoa mai a latou molimau e uiga i le ola ai i le tulafono o le lē gaoiā, atonu e te manao e fai atu le fesili lenei:

  • Faamata o le a sau tala e fai atu i se tasi e faapea mai o le tulafono o le lē gaoiā ua le o toe aoga ma ua le manaomia? (A o tali mai tamaiti aoga i lenei fesili, uunai i latou e molimau mai e uiga i faamanuiaga o le tausiaina o le tulafono o le lē gaoiā, ia le na o tulaga matautia o le le usitaiaina.)

Tau atu i tamaiti aoga faapea ua ia te oe le talitonuga e mafai e i latou ona mama atoatoa. Faamamafa atu faapea afai ua latou solia le tulafono o le lē gaoiā, e tatau ona latou saili atu mo le fesoasoani mai o latou epikopo po o le peresitene o le paranesi, o lē e mafai ona fesoasoani ia i latou ia salamo ma avea ma tagata mama e ala i le Togiola a Iesu Keriso.

Tala ma Faamatalaga o Talaaga

Iakopo 2:17. “Lima matala atu ia te i latou ia outou mea”

I totonu o le Ekalesia a Iesu Keriso o le Au Paia o Aso e Gata Ai, tatou te tuuina atu taulaga anapogi e fesoasoani ai ia i latou o manaomia le fesoasoani. E uunaia e taitai o le Ekalesia i tatou ina ia lotofoai e ala i a tatou taulaga. O Elder Joseph B. Wirthlin o le Korama a Aposetolo e Toasefululua na tuuina mai se fautuaga e uiga i le aofaiga e tatau ona foai atu:

“E fia ni tupe e tatau ona tatou totogi atu i le taulaga anapogi? Ou uso e ma tuafafine, o le aofaiga o la tatou taulaga ina ia faamanuiaina ai e matitiva o le aofaiga foi lena o lo tatou lotofaafetai i lo tatou Tama Faalelagi. Po o le a teenaina ea e i tatou ua sili ona faamanuiaina i latou o loo moomia la tatou fesoasoani? O le totogiina o se taulaga anapogi lotofoai o se fuataga lea o lo tatou naunau e faapaiaina o tatou tagata ina ia faamāmāina ai mafatiaga o isi.

“O uso Marion G. Romney, o le sa avea ma epikopo o le matou uarota, ina ua valaauina a’u i se misiona, ma, o le sa avea mulimuli ane ma se tasi o le Au Peresitene Sili o le Ekalesia, na apoapoai mai: ‘Ia e agalelei i mea e te foai atu, ina ia mafai ai ona tuputupu ae ai outou lava ia. Aua le tau na ona foai atu mo le faamanuiaina o e matitiva, ae ia foai atu mo lou lava manuia. Ia lava lau foai ina ia mafai ona e tuuina atu oe lava i le malo o le Atua e ala i le faapaiaina o au mea atoa ma lou taimi’” (“O le Tulafono o le Anapogi,” Liahona, Iulai 2001, 75; sii mai le Marion G. Romney, “O Faamanuiaga o le Anapogi,” Liahona, Tesema 1982, 2).

Iakopo 2:23-30 Autaunonofo

I aso o Iakopo, o nisi o Sa Nifae na amata ona auai i le faiga o autaunonofo, i le faapea mai ai ua latou mulimuli i faataitaiga a Tavita ma Solomona. Na teenaina e Iakopo lenei faiga mo mafuaaga nei e lua:

  1. Na poloaiina e le Alii lenei nuu, e ala i le perofeta o Liae, ina ia aua le auai i le faia o autaunonofo (tagai i le Iakopo 2:27, 34).

  2. Sa lei avea Tavita ma Solomona ma ni faataitaiga lelei. E ui lava sa la faaipoipo i ni ava se toatele e tusa ma poloaiga a le Alii i o laua aso, ae sa laua solia foi ni agasala ogaoga faalefeusuaiga. (tagai Iakopo 2:24;MF&F 132:38–39).

E tusa ai ma le faia o autaunonofo, na fetalai mai le Alii, “Afai ou te manao … e faatutu mai ni fanau mo a’u, o le a Ou poloaiina ai lo’u nuu; a le o lea, ia latou faalogo i nei mea” (Iakopo 2:30). I se isi faaupuga, o le faatonuga aoao a le Alii, o le aua nei auai i le faia o autaunonofo. Peitai, atonu e mafai ona Ia poloaiina Lona nuu ia faia mo se taimi e silafia e Ia ua tatau ai ina ia “faatutu mai ni fanau” mo Ia—i se isi faaupuga, pe a finagalo ai o ia mo Lona nuu, mo se vaitaimi puupuu, ia aumaia ai nisi fanau se tele i le lalolagi, o e o le a fananau mai i totonu o le feagaiga ma tausia i aiga e tutotonu ai le talalelei. I le usiusitai ai i le faatonuga mai le Atua e ala mai i se faaaliga i le Perofeta o Iosefa Samita, na mulimuli ai nisi o le Au Paia o Aso e Gata Ai i lenei faiga mo le tele o tausaga i le vaitau o le 1800 (tagai MF&F 132). I le 1890, ina ua suia tulaga o le Ekalesia ma i tulafono a le Iunaite Setete, na aveesea ai e le Alii Lana faatagaga o lea faiga i se faaaliga na oo mai ia Peresitene Uilifoti Uitilafi, o le sa avea i lea taimi ma Peresitene o le Ekalesia (tagai MF&F,Folafolaga Aloaia 1). Talu mai lena taimi, o le faia o autaunonofo, e le o toe faatagaina e le Alii, pe faatagaina e Le Ekalesia a Iesu Keriso o le Au Paia o Aso e Gata Ai. Soo se tasi o le Au Paia o Aso e Gata Ai, o le na te faia lea faatinoga, e tatau ona tapeina lona igoa mai le Ekalesia. Na aoao mai Peresitene Gordon B. Hinckley:

“Ou te fia tau atu ma le maumaututu, o lenei Ekalesia e leai lava ma sana aia ia i latou o loo faia au taunonofo. E le o i latou o ni tagata o lenei Ekalesia. O le toatele o i latou e lei avea lava ma ni tagata o le Ekalesia. Ua latou solia le tulafono faalemalo. Ua latou iloa ua latou solia le tulafono. Ua tatau ia i latou le faasalaga.

“Afai e i ai nisi o o matou tagata e maua o faia autaunonofo, e tape o latou igoa ma le ekalesia, o le faasalaga aupito matuia lea e mafai ona faia e le Ekalesia. E le gata o i latou ua aafia ai ua solia le tulafono faalemalo, ae ua latou solia foi le tulafono a lenei Ekalesia. O loo i ai se mataupu faavae o la matou faatuatuaga o loo fusia ai i matou. O loo faapea mai, ‘Matou te talitonu i le usiusitai i tupu, peresitene, faipule, ma faamasino, i le usiusitai, faamamaluina, ma le lagolagoina o le tulafono’(MF&F 1:12). 

“Ua silia ma le seneturi talu ai, na faaalia manino mai ai e le Atua i Lana perofeta o Uilifoti Uitilafi o le faia o autaunonofo, ua tatau ona faamutaina, o lona uiga, ua le tusa ai nei ma le tulafono a le Atua. E oo lava i atunuu e faatagaina ai e tulafono faalemalo pe faalelotu ia autaunonofo, ua aoaoina e le Ekalesia o faaipoipoga e tatau ona tasi le tane tasi le ava, ma e le taliaina e avea ma tagata o le ekalesia i latou e faia autaunonofo” (“O a Mea o loo Tuufesili ai Tagata e Uiga ia i Tatou?” Liahona, Ian. 1999, 82-85).

Lolomi