Lesona 97
Alema 40
Faatomuaga
A o lapataia e Alema lona atalii o Korianetona e uiga i taunuuga o le agasala, sa ia aoao atu foi e uiga i le olaga pe a mavae le oti. Na ia faamalamalamaina atu o le Togiola a Iesu Keriso, o le a toetutu ai tagata uma. Na ia aoao atu e uiga i le lalolagi o agaga, lea o loo faatalitali ai i latou ua maliliu a le o le parataiso po o le falepuipui, e fuafua lea i a latou filifiliga i le olaga faitino, seia oo i le toetu.
Faaaliga: I lenei lesona, o le a maua ai e tamaiti aoga le avanoa e aoao atu ai e le tasi le isi. A o lei amataina le vasega, saunia ni pepa e tufatufa atu o loo i ai ni faatonuga mo soa. Ia faamasani i seti taitasi o faatonuga ina ia mafai ona e fesoasoani atu i tamaiti ao latou sauni e aoao atu.
Fautuaga mo le Aoaoga
Alema 40
Ua aoao atu e Alema Korianetona e uiga i le lalolagi o agaga ma le toetu
Tusi fesili nei i luga o le laupapa ao lei amataina le vasega:
-
O le a se mea ua mafai ai ona tatou ola pe a mavae le oti? O ai o le a toetutu?
-
O fea tatou te o i ai pe a tatou feoti? O le a se faalogona iina?
-
O le a le toetu? O le a se eseesega o o tatou tino toetutu mai o tatou tino faaletino? O le a se mea o le a tatou faia pe a tatou toetutu?
Valaaulia ni tamaiti e mafaufau faapea o i latou o ni faifeautalai ma na setiina se latou taimi e feiloai ai ma se tagata o loo sailia ni tali o fesili ia o loo tusia i luga o le laupapa. Faamatala atu faapea o le Alema 40 o se faaauauina lea o aoaoga a Alema i lona atalii o Korianetona ma o loo i ai ni tali o na fesili.
Valaaulia tamaiti e faitau le leoa le Alema 40:1. Fai atu i tamaiti e faailoa mai le mafuaaga na talanoa ai Alema e uiga i le toetu i lona atalii.
-
O le a se mea na aoao atu e Alema ia Korianetona e uiga i le toetu?
-
A o tou toe mafaufau i filifiliga a Korianetona, aisea atonu na ia popole ai e uiga i le toetu?
Vaevae le vasega i ni paga. Ia tofu paga taitasi ma se numera: 1, 2, po o le 3. Fai i paga taitasi e galulue faapei o i laua o se soa faifeautalai, sauniuni e aoao atu se lesona puupuu e tali ai fesili o i le laupapa lea e o faatasi ma le numera na atofaina atu. Ina ia fesoasoani ia i latou e saunia, tuu atu ia i latou se kopi o faatonuga e o faatasi ma a latou numera (tagai i lalo). A o galulue tamaiti, atonu e te manao e savalivali solo i totonu o le potu ina ia mafai ona e faalogo ma fesoasoani atu pe a manaomia.
Soa 1—Alema 40:1–5
Fesili: O le a se mea ua mafai ai ona tatou ola pe a mavae le oti? O ai o le a toetutu?
Sauni e faaaoga le Alema 40:1–5 e tali ai fesili nei. A o e sauniuni, filifili po o fea o vaega o le lesona e aoao atu e soa taitasi. Ia saunia e fai le mea lenei:
Tuu atu se talaaga o le fasifuaitau sa tuuina atu ia te oe. (A e aoao atu mai tusitusiga paia, faamatala atu po o ai o tautala, o ai o loo tautala atu i ai, ma nisi lava tulaga e ono fesoasoani ai i tagata aoao ia malamalama i le fuaitau.)
Faitau ia fuaiupu ia e taliina ia fesili. Faamatala atu le auala o loo fesoasoani ai ia upu moni o nei fuaiupu i le taliina o fesili. A o e faia lea mea, ia mautinoa o loo malamalama tagata uma ona o Iesu Keriso, o le a toetutu uma ai ia tagata uma. Atonu e te manao foi e fautua atu i latou o loo e aoaoina ina ia tusi lenei upu moni i totonu o a latou tusitusiga paia i talaane o le Alema 40:1–5.)
Faasoa atu le mafuaaga e taua ai le folafolaga o le toetu ia te oe. Atonu e mafai foi ona e fesiligia i latou o loo e aoaoina pe aisea latou te talisapaia ai le folafolaga o le toetu.
Molimau atu e uiga i upu moni na e aoao atu.
Soa 2—Alema 40:6–14
Fesili: O fea tatou te o i ai pe a tatou feoti? O le a se faalogona iina?
Sauni e faaaoga le Alema 40: 6–7, 11–14 e tali ai fesili nei. A o e sauniuni, filifili po o fea o vaega o le lesona e aoao atu e soa taitasi. Ia saunia e fai le mea lenei:
Tuu atu se talaaga o le fasifuaitau sa tuuina atu ia te oe. (A e aoao atu mai tusitusiga paia, faamatala atu po o ai o tautala, o ai o loo tautala atu i ai, ma nisi lava tulaga e ono fesoasoani ai i tagata aoao ia malamalama i le fuaitau.)
Faitau ia fuaiupu ia e taliina ia fesili. Faamatala atu le auala o loo fesoasoani ai ia upu moni o nei fuaiupu i le taliina o fesili. (Atonu o le a fesoasoani le faailoa atu faapea ina ua faaaoga e Alema le fasifuaitau “pouliuli i fafo”, na te lei faatatau lea i le taunuuga o Satani ma i latou o le a malaia. Na ia faatatau i le tulaga o e amioleaga i le va o le taimi o lo latou feoti ma le taimi o lo latou toetutu. I lenei vaitaimi e masani lava ona tatou faatatau i lenei tulaga o le falepuipui o agaga.) A o tou faitauina nei fuaiupu, ia mautinoa o loo malamalama ia tagata uma o le va o le oti ma le toetu, o le a nonofo ia agaga o e amiotonu i le parataiso ao agaga o e amioleaga o le a nonofo i le falepuipui. Atonu e te manao e fautuaina i latou o loo e aoaoina e tusi le upu moni lenei i totonu o a latou tusitusiga paia i talaane o le Alema 40:11–14.)
Faasoa atu pe o faapefea ona uunaia e lou malamalama e uiga i lenei upu moni ia filifiliga o e faia i lenei olaga. Atonu e te fia fesiligia foi i latou o e aoaoina pe o faapefea ona fesoasoani lo latou malamalama e uiga i le olaga pe a mavae le oti ia i latou.
Molimau atu e uiga i upu moni na e aoao atu.
Soa 3—Alema 40:21–26
Fesili: O le a le toetu? O le a se eseesega o o tatou tino toetutu mai o tatou tino faaletino? O le a se mea o le a tatou faia pe a tatou toetutu?
Sauni e faaaoga le Alema 40:21–26 e tali ai fesili nei. A o e sauniuni, filifili po o fea o vaega o le lesona e aoao atu e soa taitasi. Ia saunia e fai le mea lenei:
Tuu atu se talaaga o le fasifuaitau sa tuuina atu ia te oe. (A e aoao atu mai tusitusiga paia, faamatala atu po o ai o tautala, o ai o loo tautala atu i ai, ma nisi lava tulaga e ono fesoasoani ai i tagata aoao ia malamalama i le fuaitau.)
Faitau ia fuaiupu ia e taliina ia fesili. Faamatala atu le auala o loo fesoasoani ai ia upu moni o nei fuaiupu i le taliina o fesili. (A o e sauni e aoao atu, atonu e aoga le iloaina o le upu agaga i nei fuaiupu o loo faasino lea i le agaga o se tagata.) Ia mautinoa o loo malamalama tagata uma o le toetu o le toe faatasia lea o le agaga ma le tino, ma le toefuatai mai lea o mea uma i lo tatou tulaga talafeagai ma le atoatoa. Atonu e te manao e fautuaina i latou o loo e aoaoina e tusi le upu moni lenei i totonu o a latou tusitusiga paia i talaane o le Alema 40:21–23.)
Faasoa atu le mafuaaga e te faafetai ai i le iloaina o le a i ai se aso o le a toefuatai mai ai lou tino ma le agaga i lo laua tulaga talafeagai ma le atoatoa. Atonu e mafai foi ona e faamatala atu le auala o aafia ai au filifiliga e lou iloaina o le a i ai se aso o le a e tu ai i luma o le Atua ma faamasinoina. Talosaga atu ia i latou o loo e aoaoina e faasoa mai o latou lagona e uiga i aoaoga faavae o le toetu ma le faamasinoga mulimuli.
Molimau atu e uiga i upu moni na e aoao atu.
A uma ona saunia tamaiti e tali mai a latou fesili ia na tuuina atu, faatulaga i latou i ni vaega toalaiti ina ia mafai ona latou aoao atu e le tasi le isi i se tala faatino faafaifeautalai. E tatau ona tolu soa i totonu o vaega taitasi, ma ia saunia soa taitasi e tali mai ni seti eseese o fesili. (Afai e toalaiti le vasega, tuu atu i vaega taitasi e aoao mai le vasega atoa.) Uunaia tamaiti aoga ia tumau i o latou lava tagata ao latou aoao atu ma aoao mai isi i le faatinoga o le tala faatino. Faamautinoa atu i latou o le Agaga Paia e mafai ona uunaia i latou ma e o loo latou aoaoina pe afai latou te faamaoni i a latou aoaoga ma tali. Faalogo atu a o latou aoao le tasi i le isi, ma tuuina atu ni faamatalaga pe a e lagona se uunaiga.
A ua lava se taimi mo tamaiti e aoao atu ai isi i totonu o vaega, mafaufau e fai atu nisi o fesili nei:
-
O le a se mea sa e aoaoina ao e saunia e tali au fesili na atofaina mai? O le a se mea sa e iloaina ao aoaoina oe e isi soa?
-
O le iloaina na tauivi Korianetona e usitaia le tulafono o le ola mama, o le a sou manatu, pe na fesoasoani ia te ia le iloaina o le natura o le olaga pe a mavae le oti ina ia tetee atu ai i faaosoosoga i le lumanai?
-
Aisea e taua ai ia te oe ia upu moni ia na tatou talanoaina i le asō?
Fai i tamaiti e faitau le leoa le Alema 40:25–26, vaavaai mo eseesega e i le va o le taimi faaiu o e amitonu faapea foi ma e amioleaga. A uma ona latou faamatalaina mai mea sa latou mauaina, fai atu ia i latou e faasoa mai pe na faapefea ona uunaia e lenei fasifuaitau a latou tautinoga ina ia ola ai i le talalelei. Atonu e te manao e faasoa atu lau tali i le fesili lava lea e tasi. Molimau atu i le matafaioi a Iesu Keriso i le tuuina mai o faamanuiaga o le toetu.
Iloiloga o le Mau Tauloto
O le a faateleina le malamalama o tamaiti e uiga i fasifuaitau o mau pe a latou fatuina ni a latou lava fesili e uiga i fasifuaitau. Fai i tamaiti e galulue faatasi, o se vasega po o ni vaega toalaiti, e tusi ni faaataataga e faasino i ni fasifuaitau faapitoa o le mau tauloto. (Atonu e te manao e filifili se vaega o fasifuaitau e te fia manao i tamaiti e suesue i ai pe iloiloina.) Ona tuu atu lea ia i latou e faitau mai a latou faaataataga ia te oe. E maua ni ou togi pe a sao lou mateina o se fuaitau o se mau tauloto. E maua togi o le vasega pe afai e le sao lau mate.
Faaaliga: O le umi o lenei lesona e ono maua ai se taimi mo lenei gaoioiga o le mau tauloto. Ae peitai, ina ia faamautinoa ua lava le taimi mo tamaiti e saunia ai ma auai atu ai i le lesona, atonu e te manao e faaaoga le gaoioiga lenei i le faaiuga o le vasega, pe a lava se taimi. Afai e le lava se taimi mo lenei gaoioiga e avea ai ma se vaega o lenei lesona, e mafai ona e faaaogaina i se isi aso. Mo nisi gaoioiga toe faamanatu, tagai i le faaopoopoga i le faaiuga o lenei tusi lesona.
Tala ma Faamatalaga o Talaaga
Alema 40:11. “E ave atu i fanua i lena Atua o le na ia tuuina ia te i latou le ola”
Na faamalamalama mai e Peresitene Iosefa Filitia Samita faapea o upu o i le Alema 40:11 e le o aoaoina mai ai se mea faapea o le a aumaia i tatou i luma o le Atua i le taimi lava tatou te feoti ai:
“O upu nei a Alema [Alema 40:11–14] e pei ona ou malamalama i ai, e le o faamoemoe e faailoa mai se manatu faapea o agaga uma e toe foi i le afioaga a le Atua mo se tofiga i se nofoaga o le filemu po o se nofoaga o le faasalaina ma ao lei oo atu ia te ia o le a maua e le tagata lona lava faasalaga. ‘E ave atu i fanua i lena Atua,’ [faatusatusa i le Faamasino 12:7] o lona uiga ua faaiuina lo latou ola faaletino, ma ua latou foi atu i le lalolagi o agaga, lea e atofaina ai i latou i se nofoaga e tusa ai ma a latou galuega faatasi ai ma e amiotonu po o e le amiotonu, ma faatalitali iina mo le toetu. ‘Toe foi i le Atua’ o se fuaitau lea e talitutusa ma le anoanoai o isi tulaga lauiloa. Mo se faataitaiga: o se tagata o loo faaaluina se taimi faapitoa i se galuega faamisiona i se atunuu ese. Afai ae uma [lana misiona] ma ua toe foi i le Iunaite Setete, atonu na te fai mai, ‘E ese le manaia o le toe foi mai i le aiga’; ae masalo o lona aiga o se mea i Iuta po o Idaho po o se isi vaega i Sisifo” ((Answers to Gospel Questions, tuuf. Joseph Fielding Smith Jr., 5 volu. [1957–66], 2:85).
Alema 40:11–15. O fea o i ai le lalolagi o agaga?
Na aoao mai Peresitene Polika Iaga:
O fea o i ai le lalolagi o agaga? O iinei.… Pe latou te [o agaga o i latou ua maliliu] o i tua atu o tuaoi o le lalolagi ua faatulagaina? Leai, latou te le o. Ua aumaia i latou i luga o lenei lalolagi” (Discourses of Brigham Young, sel. John A. Widtsoe [1954], 376).
Alema 40:11–15. O le a le mea e tupu i agaga o i le lalolagi o agaga?
“Pe a oti le tino faaletino, e faaauau pea ona ola le agaga. “Ona oo lea ina nonofo agaga o e amiotonu i le mea e fiafia ai, ua ta’ua o le parataiso, o le mea lea e mapu ai, o le mea e filemu ai, latou te malolo ai i o latou tiga uma, ma le popole uma, ma le faanoanoa” (Alema 40:12). O le nofoaga e taua o le falepuipui o agaga ua faaavanoa mo i latou o e na feoti i le agasala,aunoa ma se malamalama o le upumoni,poo le le usiusitai,ma latou teena perofeta’ MF&F 138:32. O agaga i le falepuipui o loo aoaoina ‘i le faatuatua i le Atua, le salamo mai agasala, le sui papatisoga mo le faamagaloina o agasala, le meaalofa o le Agaga Paia e ala i le faaee o lima, ma isi mataupu autu uma o le talalelei sa tatau ia te i latou ona iloa’ (MF&F 138:33–34). Afai latou te taliaina mataupu faavae o le talalelei, salamo i a latou agasala, ma talia sauniga na faia mo i latou i malumalu, o le a taliaina i latou i le parataiso” (Faamaoni i le Faatuatua: O Se Tusitaiala o le Talalelei [2004], 122–23).
Alema 40:13–14. Pouliuli i fafo
A faaaoga e Alema le fasifuaitau “pouliuli i fafo,” o loo ia faasino i se nofoaga le tumau i le lalolagi o agaga pe a mavae le olaga faitino lea o le a faatalitali ai e amioleaga mo le toetutu (tagai Alema 40:13–14). O isi perofeta e faasino i lenei nofoaga o se falepuipui (tagai i le 1 Peteru 3:18–20; MF&F 76:73; 138:28–42).