Lesona 156
Moronae 7:20–48
Faatomuaga
Na faamaumau e Moronae le faaiuga o le lauga a lona tama, o Mamona, na tuuina atu i se sunako i tausaga ua leva. I le lauga, na aoaoina e Mamona ona tagata faalogologo i le ala e “taofi mau i mea lelei uma” (Moronae 7:20, 25). Na ia faamatalaina le sootaga i le va o le faatuatua, faamoemoe, ma le alofa, ma faaiuina i se talosaga atu i ona tagata ia tatalo i le Tama ma le malosi atoa o le loto mo le meaalofa o le alofa mama, “le alofa mama o Keriso” (Moronae 7:47).
Fautuaga mo le Aoaoga
Moronae 7:20–39
Ua aoao mai Mamona faapea e ala mai le faatuatua ia Iesu Keriso, e mafai ai ona tatou taofi mau i mea lelei uma
A o lei amataina le vasega, tusi le fesili lenei i luga o le laupapa:
O a nisi mea lelei ua faamanuiaina ai oe e le Tama Faalelagi?
I le amataga o le vasega, tuu atu i tamaiti aoga se minute se tasi pe lua e tali ai lenei fesili i api e tusi ai faamatalaga po o api talaaga mo le suesueina o tusitusiga paia. Ona valaaulia lea o i latou e faitau nisi o mea na latou lisiina.
Faitau leotele le Moronae 7:24. Fai atu i le vasega e mulimuli i le faitauga, ma vaai mo le puna o mea lelei uma ua oo mai ia i latou.
-
O ai le puna o mea lelei uma ua oo mai ia te outou? (O tali a tamaiti aoga e ono eseese, ae e tatau ona latou faaalia le upumoni lenei: O mea lelei uma e oo mai ona o Iesu Keriso.)
Ina ia fesoasoani i tamaiti aoga ia malamalama i le aoaoga faavae ua aoaoina i le Moronae 7:24, faamatala atu i le avea ai ma tupuaga o Atamu ma Eva, ua tatou “pauu” ma ua le mafai ai ona maua ni faamanuiaga e i tatou lava ia (tagai foi Alema 22:14; Eteru 3:2; Mataupu Faavae o le Faatuatua 1:3). A aunoa ma Iesu Keriso ma Lana Togiola, “leai se mea lelei e mafai ona oo mai ia te i [tatou].” O mea lelei uma ua mafai ona tatou maua mai lo tatou Tama Faalelagi ua oo mai e ala mai le Faaola ma Lana Togiola.
Faamatala atu o loo teuina e le Tama Faalelagi le tele o faamanuiaga mo i tatou. E finagalo o Ia ia tatou “taofi mau i mea lelei uma” (Moronae 7:19), ma e finagalo o Ia e tuuina mai ia i tatou mea uma o loo ia te Ia (tagai MF&F 84:38).
Valaaulia se tamaitiiti aoga e faitau leotele le fesili a Mamona i Moronae 7:20. Ona valaaulia lea o tamaiti aoga e faitau le leoa le Moronae 7:21–24, ma vaai mo mea o loo aoaoina mai e nei fuaiupu e uiga i le ala tatou te taofi mau ai i mea lelei uma.
-
E faalagolago i mea na e faitau Moronae 7:21–24, e faapefea ona e tali i le fesili a Mamona i Moronae 7:20? (A o tali mai tamaiti aoga, fesoasoani ia i latou e faailoa mai le mataupu faavae lenei: A o tatou faatinoina lo tatou faatuatua ia Iesu Keriso, e mafai ona tatou taofi mau i mea lelei uma.)
Ina ia fesoasoani i tamaiti aoga ia malamalama i le ala e mafai ai ona latou “taofi mau i mea lelei uma,” fai atu ia i latou e auauai i le faitauina leotele mai o le Moronae 7:25–26, 32–38. Valaaulia le afa o le vasega e faailoa mai auala e tatau ona tatou faaalia ai lo tatou faatuatua ia Iesu Keriso. Valaaulia le isi afa e vaai mo mea lelei e oo mai ia i tatou o se taunuuga. (Pe a faitau e se tamaitiiti fuaiupu 33, atonu e te manao e faamatala atu o le fuaitau “tatau ai ia te au” e faatatau i mea ua tusa ai ma le finagalo o le Alii.)
A uma ona lipoti mai e tamaiti aoga mea na latou maua, mafaufau e fai atu ia i latou e tusi i lalo se sini o le a fesoasoani ia i latou e faatino ai se faatuatua sili atu ia Iesu Keriso ma taofi mau i mea lelei uma ua finagalo le Tama Faalelagi e tuuina mai ia i latou. Faasoa atu lau molimau faapea o faamanuiaga maoae e oo mai ona o le Faaola, Lana talalelei, ma Lana Togiola. Fautua atu i tamaiti aoga e faaaoga le faatuatua sili atu ia te Ia.
Moronae 7:40–43
Ua aoao mai Mamona o le faatuatua ia Iesu Keriso e taitaia i tatou ia maua le faamoemoe mo le ola faavavau
Tusi se ata o le nofoa e tolu-vae i le laupapa (pe faaali atu se nofoa e tolu-vae).
Faitau le saunoaga lenei a Elder M. Russell Ballard o le Korama a Aposetolo e Toasefululua:
“E tolu mataupu faavae paia na te faatuina se faavae lea e mafai ona tatou atinae ai se tulaga o o tatou olaga. … e aumaia faatasi e nei mea ia i tatou se faavae lagolago e pei o vae o se nofoa maualuga vaetolu” (“O Le Olioli o se Faamoemoe ua Faataunuuina,” Liahona, Ian. 1993, 41).
Faailoga le vae e tasi o le nofoa i le fuaitau Faatuatua ia Iesu Keriso. Fai atu i tamaiti aoga e mafaufau po o a mea e mafai ona suitulaga ai isi vae e lua. Ona valaaulia lea o tamaiti aoga e faitau le leoa le Moronae 7:40 e sue ai le mea o suitulaga ai le vae lona lua. (O le vae lona lua e suitulaga i le faamoemoe.)
Faitau leotele faaleoga nei o le faamoemoe. Valaaulia tamaiti aoga e faalogo i eseesega i le va o nei faamatalaga e lua.
-
Ou te faamoemoe e timu le aso.
-
E i ai lou faamoemoe i le folafolaga a le Alii e mafai ona ou lagona le filemu e ala i le salamo.
-
O a auala e eseese ai nei faaleoga? (Fesoasoani i tamaiti aoga ia iloa o le faataitaiga muamua, o le upu faamoemoe e faatatau i se moomooga le mautonu. I le faataitaiga lona lua, o le upu faamoemoe o se faamatalaga mautinoa. O se uunaiga mo le faatinoga, ma e faaautu i le Togiola a Iesu Keriso.)
Ina ia fesoasoani i tamaiti aoga ia malamalama i le upu faamoemoe e pei ona faaaoga i tusitusiga paia, valaaulia se tamaitiiti aoga e faitau leotele le saunoaga lenei a Peresitene Dieter F. Uchtdorf o le Au Peresitene Sili:
“O le faamoemoe o se meaalofa a le Agaga. …
“O le faamoemoe e le o se malamalama, ae o le faatuatua tumau o le a faapea ona faataunuuina e le Alii Ana folafolaga ia i tatou. O le mautinoa lea afai o le a tatou ola e tusa ai ma tulafono a le Alii ma upu a Ana perofeta i le taimi nei, o le a tatou maua faamanuiaga manaomia i le lumanai. O le talitonu ma le famoemoe o le a taliina a tatou talosaga. E faaali mai i le talitonu, lagona o le a lelei mea uma, naunautai ma le faapalepale ma le onosai.” (“O Le Mana e le Iu o le Faamoemoe,” Ensign po o le Liahona, Nov. 2008, 21–22).
Valaaulia se tamaitiiti aoga e faitau Moronae 7:41 leotele. Fai atu i le vasega e mulimuli i le faitauga, ma vaai mo mea na aoao mai e Mamona e tatau ona tatou faamoemoe i ai. A o lipoti mai e tamaiti aoga mea ua latou maua, faailoga le vae lona lua o le nofoa i le fuaitau Faamoemoe mo le Ola Faavavau.
Tau atu o le Moronae 7:41 o se mau tauloto. Atonu e te manao e fautua i tamaiti aoga e faailoga lenei fuaiupu i se auala faapitoa ina ia mafai ona latou maua gofie.
-
E tusa ai ma Moronae 7:41, e faapefea ona tatou maua le faamoemoe ina ia faatutuina i le ola faavavau? (E ui e mafai e tamaiti aoga ona faaaoga ni upu eseese, e tatau ona latou faailoa mai le mataupu faavae lenei: Afai tatou te faatino lo tatou faatuatua ia Iesu Keriso, e mafai ona tatou maua le faamoemoe e ala atu i Lana Togiola ina ia faatutuina i le ola faavavau.)
Valaaulia tamaiti aoga e faitau le Moronae 7:42–43 e i latou lava ia, ma vaai mo uiga tatou te manaomia ina ia maua ai le faatuatua ma le faamoemoe. Fai atu ia i latou e lipoti mai mea na latou maua. (Atonu e te manao e faamatala atu ina ia agamalu ma maualalo i le loto o lona uiga o le lotomaualalo, agavaivai, ma usitai i le finagalo o le Alii.)
-
Aisea i lou manatu e manaomia ai le agamalu ma le maualalo o le loto ina ia maua ai le faatuatua ma le faamoemoe i le Togiola a Iesu Keriso?
Valaaulia tamaiti aoga e tali i le fesili lenei i totonu o a latou api aoga po o tusi talaaga mo le suesueina o tusitusiga paia:
-
E faapefea e lou faatuatua ia Iesu Keriso ma Lana Togiola ona tuuina atu ia te oe le faamoemoe o le a e maua le ola faavavau?
Moronae 7:44–48
Ua aoao mai Mamona i le taua o le alofa mama
Toe tagai i le nofoa vae-tolu. Valaaulia tamaiti aoga e faitau le leoa le Moronae 7:44 ma faailoa mai se faailoga mo le vae lona tolu o le nofoa. A o lipoti mai e tamaiti aoga mea ua latou maua, faailoga le vae lona tolu i le upu Alofa Mama. Fai atu ia i latou e faamatala mai le uiga o le alofa mama ia latou lava upu.
Valaaulia se tamaitiiti aoga e faitau leotele le Moronae 7:45–47 . Fai atu i le vasega e mulimuli i le faitauga, ma vaai i le ala na faamatalaina ma faamaninoina ai e Mamona le alofa mama.
-
O faapefea ona faamaninoina e Mamona le alofa mama i le Moronae 7:47? (“O le alofa mama o Keriso.”)
-
O le a sou manatu i le uiga o le e le uma le alofa mama?
-
Aisea e te manatu ai o i tatou o ni meanoa pe afai e leai so tatou alofa mama?
Valaaulia tamaiti aoga e filifili faamatalaga o le alofa mama i le Moronae 7:45 ma faamanino mai o latou manatu i le uiga o na faamatalaga. Faamalamalama mai a latou faamatalaga pe a manaomia. (Mo se faataitaiga, “loa ona tali-tiga” o lona uiga o se tasi e tumau i puapuaga ma le onosai. “Le losilosivale” o lona uiga o se tagata e le lotoleaga i isi. “Le faafefeteina” o lona uiga o se tagata e lotomaualalo. “Le sailia e ia ana lava” ua faamatalaina ai le taua naua o le faamuamua o le Atua ma isi nai lo oe lava ia. “Le faaitagofie” o lona uiga e le faigofie ona ita. “Talia mea uma” ua faamatalaina se tasi ua taliaina upumoni uma.)
Fesili i tamaiti aoga pe faapefea ona latou tali i nei tulaga taitasi pe afai e leai so latou alofa mama. Ona fesili atu lea pe faapefea ona latou tali atu pe afai ua faatumuina i latou i le alofa mama. (Atonu e te manao e fetuunai nei tulaga e tusa ai ma manaoga ma mea e fiafia i ai tamaiti aoga o loo e aoaoina.)
-
Ua ula mai tagata ia te oe po o se tasi i le aoga.
-
E i ai sou uso po o se tuafafine e masani ona faaitaina oe.
-
O se tagata e te iloaina ua faia se agasala matuia.
-
E te le fiafia i se fautua fou o le korama po o le vasega e pei ona e fiafia i se fautua talu ai.
Valaaulia se tamaitiiti aoga e faitau le Moronae 7:48 leotele. Fai atu i le vasega e mulimuli i le faitauga ma faailoa mai le mea e tatau ona tatou faia ina ia faamanuiaina i le meaalofa o le alofa mama: A o ofoina mai e tamaiti aoga tali, ia mautinoa ua manino lenei mataupu faavae: Afai tatou te tatalo atu i le Tama ma le malosi atoa o le loto ma ola e pei oni soo moni o Iesu Keriso, e mafai ona faatumuina i tatou i le alofa mama.
Tau atu o le Moronae 7:45, 47–48 o se mau tauloto. Atonu e te manao e fautua atu i tamaiti aoga e faailoga nei fuaiupu i se auala faapitoa ina ia mafai ona latou maua gofie ai.
-
Aisea e te manatu ai e manaomia lo tatou tatalo mo le meaalofa o le alofa mama ma le malosi atoa o le loto?
-
O anafea na e molimauina ai ni faataitaiga o le alofa mama? (Valaaulia ni nai tamaiti aoga e faasoa mai ni aafiaga. Atonu foi e te manao e faasoa atu se aafiaga a oe lava ia.)
-
O anafea na e lagonaina ai na fesoasoani le Alii ia te oe e lagona le agaalofa sili atu mo isi?
Fai atu i tamaiti aoga e iloilo Moronae 7:45 ma filifili se elemene se tasi o le alofa mama latou te manaomia ia faaleleia. Fautuaina i latou e tatalo mo le meaalofa o le alofa mama a o latou tauivi e faaleleia atili i lenei vaega. Molimau atu i le uunaiga a le faatuatua, faamoemoe, ma le alofa mama i lou olaga.
Mau Tauloto—Moronae 7:41
Fesoasoani i tamaiti aoga e tauloto Moronae 7:41. Mafaufau e faaaoga se tasi o auala ua faamatalaina i le faaopoopoga i le faaiuga o lenei tusi lesona.
Mau Tauloto—Moronae 7:45, 47–48
Valaaulia tamaiti aoga e filifili mai le lisi lenei se tagata latou te mananao ia sili atu le alofa mama i ai: se tagata o le aiga, se tagata o le korama po o le vasega, se tasi i le vasega i le aoga, se uo, po o se tuaoi. Fautuaina i latou e mafaufau e uiga i le tagata ua latou filifilia a o faitau Moronae 7:45 ma mafaufau i auala e mafai ona latou faaalia ai i le tagata se alofa sili atu faa Keriso. Valaaulia i latou e tusi i apiapi e tusi ai faamatalaga po o api talaaga mo le suesueina o tusitusiga paia se auala e tasi pe lua o le a latou faaali atu ai le alofa mama mo le tagata ua latou filifilia. Valaaulia i latou ia faia lenei taumafaiga o se vaega o a latou tatalo i le vaiaso a sau. E mafai ona e mafaufau e tuuina atu i tamaiti aoga se avanoa e faasoa mai ai o latou aafiaga i aso o i luma.
Manatua: Ona o le umi o lenei lesona, atonu e te manao e faaaoga lenei gaoioiga i se isi aso, pe a lava sou taimi.
Tala ma Faamatalaga o Talaaga
Moronae 7:29–31. O le galuega a agelu
Na faamatalaina e Elder Dallin H. Oaks o le Korama a Aposetolo e Toasefululua le galuega a agelu:
“O le upu ”agelu“ o loo faaaogaina i tusitusiga paia mo soo se tagata paia e tauaveina le savali a le Atua’ (George Q. Cannon, Gospel Truth, sel. Jerreld L. Newquist [1987], 54). O loo tauina mai e tusitusiga paia le tele o faataitaiga o le faaali patino mai o se agelu. O faaaliga a agelu ia Sakaria ma Maria (tagai Luka 1) ma le Tupu o Peniamina ma Nifae, le atalii o Helamana (tagai Mosaea 3:2; 3 Ni. 7:17–18) ua na oni nai faataitaiga. …
“… O galuega a agelu e mafai foi ona le vaaia. O savali a agelu e mafai ona auina mai e se leo pe na o ni mafaufauga po o lagona e fesootai ai i le mafaufau. Na faamatalaina e Peresitene Ioane Teila o gaoioiga a agelu, po o avefeau a le Atua, i o tatou mafaufau, ina ia mafai e le loto ona tauaveina … ia faaaliga mai le lalolagi faavavau’ (Gospel Kingdom, sel. G. Homer Durham [1987], 31).
“Na faamatalaina e Nifae ia asiasiga e tolu o galuega a agelu ina ua ia faamanatu atu i ona uso faatautee faapea (1) na latou ‘vaaia se agelu,’ (2) ua latou ‘faalogo i lona siufofoga i lea aso ma lea aso,’ ma (3) na tautala atu se agelu i le ‘leo itiiti ma le filemu ia i [latou]’ ae ua ‘le toe lagona’ e i latou ma ‘ ua le toe mafafai ona lagona ana fetalaiga’ (1 Ni. 17:45). O loo aofia i tusitusiga paia le tele o isi faamatalaga faapea na auina mai agelu ina ia aoao le talalelei ma aumaia tagata ia Keriso (tagai Epe. 1:14; Alema 39:19; Moro. 7:25, 29, 31–32; MF&F 20:35). O le tele o fesootaiga faaagelu e lagonaina pe faalogoina nai lo le vaaia” (“O Le Perisitua Arona ma le Faamanatuga,” Liahona, Ian. 1999, 43–46).
Moronae 7:45–48. Alofa Moni: O Le Alofa Mama o Keriso
Na aoao mai Peresitene Thomas S. Monson e uiga i le manaomia o le meaalofa o le alofa mama:
“O loo i ai se tulaga manaomia tele o le alofa lea e gauai atu ai ia i latou e le amanaia, o le faamoemoe ia i latou ua lotovaivai, fesoasoani ia i latou ua puapuagatia. O le alofa moni lava o le alofa faatino. Ua i ai i soo se mea le manaomia o le alofa.
“O le alofa o le onosai lea i se tasi ua mafua ai ona tatou le fiafia. O le teena lea o le lagona o le itaitagofie. O le taliaina lea o vaivaiga ma faaletonu. O le taliaina o tagata i o latou tulaga moni o i ai. O le faaseloa o le vaai i luga atu o le vaaiga faaletino, i uiga faaleatua e le mu itiiti i le gasologa o le olaga. O le teena lea o le lagona e tuufaavasega isi. …
“… E leai se tasi o i tatou e atoatoa i lenei olaga. Nai lo le faamasinosino atu ma faitioina e le tasi le isi, ia tofu maua e i tatou le alofa mama o Keriso mo i latou o loo tatou malaga faatasi i lenei faigamalga o le olaga. …
“… Ia avea le [alofa] e taialaina ai outou i mea uma tou te faia. “… Ia avea le [alofa] e taialaina ai outou i mea uma tou te faia. Tau ina ia fatumulia ai o outou agaga ma ia faatinoina i o outou mafaufauga uma ma mea e fai” (“E Le Uma le Alofa,” Ensign po o le Liahona, Nov. 2010, 122–25).
Na lisiina e Elder Marvin J. Ashton o le Korama a Aposetolo e Toasefululua ni auala e mafai ai ona tatou faaalia ai le alofa mama:
“O le alofa moni e le o se mea e te foai atua; o se mea e te ausia ma avea ma vaega o oe. …
“Atonu o le alofa moni maoae o le a maua pe a tatou agalelei i le tasi ma le isi, pe a tatou le faamasino atu pe faatusatusa se isi tagata, pe a tatou taumafai e mafaufau i mea sili e uiga i le tasi ma le isi, pe gugu foi e aua le faia se tala. O le alofa moni o le talia lea o uiga ese o se tasi, vaivaiga ma pona; ma onosai i le isi tagata ua ia tuu i tatou i lalo; pe o le tetee atu foi i le lagona o le faaonoono pe a le taulimaina e le isi tagata se mea i se ala atonu sa tatou faamoemoeina. O le alofa moni o le musu lea e faaaoga vaivaiga o le isi tagata, ma naunau e faamagalo atu i le tasi ua faatiga mai ia i tatou. O le alofa moni o le faamoemoeina lea o mea sili e le tasi mai le isi(“E Mafai ona Avea le Laulaufaiva ma Pelu Maai,” Liahona, Me 1992,20).
Moronae 7:45–48. “O le faauigaina sili atu o le ‘alofa mama o Keriso’”
I le taua ai o upu a Mamona i Moronae 7:45–48, na aoao mai Elder Jeffrey R. Holland o le Korama a Aposetolo e Toasefululua:
“E aoga le manatua o le alofa mama, po o ‘le alofa mama o Keriso,’ e tatau ona tatou olioli ai e mafai ona faamatalaina ini auala se lua. O le tasi o ona uiga o le ituaiga agaalofa, alofa faamagalo e tatau ona i ai i soo o Keriso mo le tasi. O lona uiga, o Kerisiano uma lava e tatau ona taumafai e alofa e pei ona alofa le Faaola, faaalia o le agalelei mama, faaola mo tagata uma. Ae faanoanoa ai, e laiti, pe afai o i ai, ni tagata ola na faamanuiaina atoatoa i lenei taumafaiga, ae o se valaaulia e tatau ona taumafai tagata uma ia mafaia.
“O le faauigaga sili o le ‘alofa mama o Keriso,’ po o le a lava, e le o le mea o loo tatou taumafai i ai i le avea ai ma kerisiano ae matuai toilalo lava i le faataitaia i isi ae peitai o le faamanuiaina atoa lava o Keriso i le faataitaia mai ia i tatou. O le alofa mama moni e na o le tasi lava le taimi na iloa ai. O loo faaalia i le atoatoa ma le mama i le alofa manumalo, faaiu ma le alofa togiola a Keriso mo i tatou. O le alofa lena o Keriso mo i tatou ‘e onosai, ma e agalelei, ma e le losilosi.’ O lona alofa lena mo i tatou e le ‘faafefeteina … , le faaitaita gofie, le mafaufau i le leaga.’ O le alofa lena o Keriso mo i tatou e ‘talia mea uma, talitonu i mea uma, faamoemoe i mea uma, onosai i mea uma.’ E pei ona faataitaia e Keriso e ‘le uma le alofa.’ O le alofa moni lena—lona alofa mama mo i tatou—a aunoa ma lena o le a leai i tatou, leai se faamoemoe, mai alii ma tamaitai uma lava e sili le faanoanoa. E moni lava, o i latou e maua ua faatumuina i faamanuiaga o lona alofa i le aso mulimuli—o le Togiola, o le Toetu, ola faavavau, folafolaga faavavau—e mautinoa lava o le a lelei ia i latou.
“O lenei mea e le faaitiitia ai le poloaiga e tatau ona tatou taumafai ia maua lenei ituaiga o alofa o le tasi i le isi. E tatau ona tatou ‘tatalo atu i le Tamā ma le malosi atoa o le loto, ina ia faatumulia i [tatou] i lenei alofa.’[1 Korinito 13:4–5, 7–8; Moronae 7:48.] E tatau ona tatou taumafai ia sili atu lo tatou mausali ma le le fesuisuiai, sili atu le talitiga ma le agaalofa, faaitiitia le losilosivale ma le faafefeteina ia tatou fegalegaleaiga ma isi. E pei ona soifua Keriso e tatau foi ona faapena tatou, ma e pei ona alofa Keriso e tatau foi ona faapena lo tatou alolofa. Ae peitai o le ‘alofamama o Keriso’ na saunoa i ai Mamona o le alofa tonu lava lena—o Keriso. Faatasi ai ma lena meaalofa faalelagi, lena faaeega faaola, ua ia i tatou mea uma; a aunoa ma lena alofa ua leai sa tatou ma e iu lava ina avea ma meanoa, vagana ai i le iuga o ‘tiapolo [ma] agelu a le tiapolo.’[2 Nifae 9:9.]
“O le olaga e i ai lana vaega o le fefe ma le toilalo. O nisi taimi ua le lelei mea uma. O nisi taimi ua faatoilaloina i tatou e tagata, po o le tamaoaiga po o pisinisi po o malo ua faatoilaloina i tatou. Ae peitai e tasi le mea i taimi po o le faavavau e le faatoilaloina i tatou—o le alofa mama o Keriso. …
“… O le vavega o le alofa mama o Keriso e faaolaina ma faapea ona suia ai i tatou. O Lona alofa togiola e faaolaina i tatou mai le oti ma seoli faapea foi mai amioga faalelalolagi, faaletino, ma faaletiapolo. O lena alofa faaola e liua foi agaga, siitiaina i luga atu o tulaga faatonuina pau i se tulaga e sili atu le tamaalii, sili atu le paia. O le mea lea, e tatau ona tatou ‘pipii i le alofa mama’ —le alofa mama o Keriso mo i tatou ma la tatou taumafaiga malosi agai i le alofa mama o ia ma isi uma lava —aua a aunoa ma lena ua meanoa i tatou, ma o la tatou fuafuaga mo le fiafia faavavau ua maimau atoatoa. A aunoa ma le alofa faaola o Keriso i o tatou olaga, o isi uiga uma—e oo lava i uiga mama ma galuega o faataitaiga lelei—e le lava e maua ai le faaolataga ma le olioli” (Christ and the New Covenant: The Messianic Message of the Book of Mormon [1997], 336–37).