Lesona 57
Mosaea 9–10
Faatomuaga
I le taimi o le nofoaiga a le Tupu o Peniamina, na taitai ai e Senifa se vaega o tagata sa Nifae mai Saraemila e nonofo ma sa Lamana i le nuu o Nifae. O le Mosaea 9–22 o loo i ai se tala o aafiaga o nei tagata. Na faatagaina e le tupu o sa Lamana ia tagata o Senifa latou te nonofo aua sa ia fuafuaina faalilolilo e aumaia i latou e faanofo pologa. O agamasani pepelo ma le matau’a o sa Lamana i tagata sa Nifae, na iu ai lava i se taua. Na faalagolago tagata o Senifa i le Alii mo le malosi, ma sa mafai ona latou aveeseina tagata sa Lamana mai lo latou laueleele.
Fautuaga mo le Aoaoga
Mosaea 9:1–13
Ua taitai e Senifa se vaega o sa Nifae e toe foi i le laueleele o Nifae
Fai i tamaiti e mafaufau i se taimi na latou matuai mananao ai lava i se mea. Valaaulia nisi o i latou e faamatala mai nei aafiaga. Faamatala o le aso o le a latou aoao ai e uiga i se tagata sa matuai manao lava i se mea, ma na ia le iloa ai taunuuga e ono oo i ai ona faanaunauga.
Valaaulia tamaiti e tilotilo i le ata o malaga na amata ona latou tusia i le lesona ua mavae. Faamanatu i ai na taitai e se tagata e igoa ia Amona se vaega na malaga mai Saraemila ma maua ia Limae ma ona tagata i le nuu o Nifae. (Atonu e te manao e faamatala o loo ta’u mai e le Tusi a Mamona ni alii se toalua e igoa ia Amona. O le tasi lea e aoao nei i ai tamaiti i le aso. O le tasi o se atalii o Mosaea lea na avea ma faifeautalai maoae i tagata sa Lamana. O le a amata ona faitau e tamaiti e uiga ia te ia i le Mosaea 27.) Fai i tamaiti e sue i le Mosaea 7–8 ma vaavaai i le aso o loo i le pito i lalo o itulau po o aotelega o mataupu (pe tusa o le 121 TLM). Tuu i ai latou te faatusatusaina le aso lena ma le aso o i le Mosaea 9 (pe tusa o le 200 TLM, pe tusa o le 80 tausaga i luma atu). Fesili pe mafai e se tasi ona faamatala le suiga faafuasei o aso.
Faamatala e mai le Mosaea 8 i le Mosaea 9, e toe foi le taimi o le tala i le 80 tausaga ina ia aumaia ai le tala o le tama o le tama o le Tupu o Limae, o Senifa. Valaaulia tamaiti e faitau leotele le faatomuaga a Mamona i le talafaamaumau a Senifa i le amataga o le Mosaea 9. Ona fesili lea i se isi tamaitiiti e faitau leotele le Mosaea 9:1–2.
Fai i tamaiti e faaopoopo i a latou ata se ‘aū mo le malaga na faia e le vaega muamua lea na o mai mai Saraemila i le nuu o Nifae. Faasino i ai o Senifa o se tasi o lena vaega. E pei ona faaalia i le ata o i le itulau lea, o le ‘aū e ta’u mai ai na toe foi le vaega i Saraemila. E tatau ona faitauina le faaupuga “Na saili nisi tagata sa Nifae ia toe maua mai le nuu o Nifae.” (Mo le ata atoa, tagai i le faaopoopoga o loo i le faaiuga o le tusi lesona lenei.)
Fai i se isi tamaitiiti e faitau leotele le Mosaea 9:3–4. Valaaulia le vaega o totoe o le vasega a mulimuli ai, ma vaavaai mo (1) le mea na matuai naunau lava i ai Senifa ia maua ma (2) le mea na gese ona ia manatua.
-
O le a le uiga o le soona naunau? (Ua ova le naunau pe ua soona manao e tulimatai se mea.)
-
O le a sou manatu o le a le uiga o le gese ona manatua le Atua?
Faamatala talu ai ua soona naunau Senifa ma gese ona manatua o le Atua, na ia faia ai se mea sese. Fai i tamaiti e faitau le Mosaea 9:5–7, 10, ma vaavaai mo lena mea sese.
-
O le a le mea na le iloa e Senifa ona o lona soona naunau ia maua mai le laueleele o Nifae?
-
O a tulaga matautia o le soona naunau pe a faia ni faaiuga?
-
O a tulaga matautia o le faia o faaiuga e aunoa ma le talanoa ma le Alii?
Aotele le Mosaea 9:11–13 e ala i le faamatala i tamaiti ina ua mavae le 12 tausaga, sa matua faamanuiaina le nuu o Senifa ma o lea na popole ai le tupu o sa Lamana nei le mafai ona ia faanofo pologaina i latou o lea na “amata ai ona ia faaoso ona tagata ia latou finau ma tagata [o Senifa]” (Mosaea 9:13).
Mosaea 9:14–10:22
Na taumafai sa Lamana e aumaia tagata o Senifa ina ia faanofo pologa
Tusi upu nei ma fasifuaitau i luga o le laupapa: meaa’oga, onosaia o tofotofoga, faafitauli i uo, taitaiga, galuega, feeseeseaiga ma tagata o aiga, taaloga. (E fuafua i manaoga ma mea e fiafia i ai tamaiti, e mafai ona e faaopoopo i ai isi mea i le lisi lea.)
Valaaulia se tamaitiiti e sau i luma o le vasega ma faaloloa ona lima. Tuu ni nai mea laiti, e pei o tusi po o ni maa, i le lima o le tamaitiiti ma fai i ai e tuu i luga. Faamatala o nei mea e faatusa i luitau o loo lisi i luga o le laupapa. Fesili i le vasega:
-
O le fea o nei vaega e te manao ia tele atu ai lou malosi ma le lagolago?
Faaopoopo se isi mea pe lua i lima taitasi o le tamaitiiti. Fesili i le vasega:
-
Pe i ai se taimi na e manatu ai ua tele naua mea ua e tauaveina, ma e moomoo ai maimau pe ana tele atu lou malosi po o le tomai e taulimaina ai ou luitau?
Valaaulia ni tamaiti se toalua e o mai i luma o le vasega ma lagolago i lima o le tamaitiiti o loo uuina mea faitino. Faamatala o le vaega o totoe o le lesona i le aso, e faatatau i se vaega o tagata na mauaina i latou lava o manaomia se isi malosiaga sili atu. Fautau atu, i lenei lesona atoa, ia vaavaai tamaiti mo auala e mafai ona latou maua atili ai le malosi i o latou olaga. (Fai i tamaiti o i luma o le vasega e toe foi i o latou nofoaga.)
Faamatala o le Mosaea 9 ma le 10 o loo ta’ua ai taimi e lua na o mai ai sa Lamana e tau ma Senifa ma ona tagata. Kopi le siata lea i luga o le laupapa, ae aua nei tuuina i ai tala o loo faapuipui. Fai i tamaiti o le a latou suesueina ia mau o loo i ai i le siata, ma vaavaai mo tali i fesili o i le pito i luga o le siata. Valaaulia le afa o le vasega e faaaoga ia fuaitau o i laina muamua e sue ai tali e faatatau ia Senifa ma ona tagata. Valaaulia le isi afa o le vasega e sue i fuaitau o le laina lona lua mo tali e faatatau i tagata sa Lamana. Tofi se tamaitiiti mai vaega taitasi e tusi a latou tali i luga o le laupapa pe a maua.
|
O a mea na fai e tagata e saunia ai? |
O a mea na latou faia e tuu atu ai lo latou faalagolago i le Alii? |
O le a le taunuuga? | |
|---|---|---|---|
|
O Senifa ma ona tagata |
Mosaea 9:14–16; 10:1–2, 7, 9–10 (Na latou faaauupegaina i latou lava ma o atu e tau.) |
(Sa latou tatalo ma manatuaina na faasaolotoina e le Alii o latou tama.) |
(Na faamalolosia e le Alii i latou, ma sa faamanuiaina i le aveeseina o sa Lamana mai lo latou laueleele.) |
|
O Sa Lamana |
(Na latou faaauupegaina i latou lava ma o atu e tau.) |
(Sa leai lava se mea.Sa latou faalagolago i lo latou lava malosi.) |
(Na tutuli ese tagata sa Lamana mai le laueleele i se fasiga tele.) |
A uma ona faatumu e tamaiti le siata, ona fesili lea:
-
O a mea e tutusa ai ma ni eseesega o e vaai i ai i le va o tagata o Senifa ma tagata sa Lamana i le ala na latou tapena i ai mo a latou taua?
-
O a ni mea moni e mafai ona tatou aoao mai i lenei faatusatusaga?
Tusi le mataupu faavae lea i luga o le laupapa: O le a faamalosia e le Alii i tatou pe a tatou faia mea uma tatou te mafaia e tuu atu ai lo tatou faalagolago ia te Ia.
Toe faasino i luitau na lisi i luga o le laupapa, ma faamanatu i tamaiti le faamoemoega o le lesona.
-
E mafai faapefea ona faaaoga lenei mataupu faavae i nisi o nei luitau?
Fuafua e faaaoga ia faataitaiga nei e fesoasoani ai i tamaiti e mafaufau pe mafai faapefea ona fai la latou vaega ma faalagolago i le Alii a o latou saili atu mo le malosi:
-
E i ai sau suega taua i le aoga o loo loma, ma e te fia manao ia maua le malosi ia lelei ai ona e faatinoina.
-
Na e tauivi e momotu se mausa leaga, ma ua e manatu e le lava lou malosi e te faia ai na o oe.
-
Ua e feagai ma faigata i lou aiga, ma ua e manatu e le mafai ona e taulimaina lagona malolosi ua tulai mai ai, e aunoa ma se fesoasoani.
Fai i tamaiti e toe iloilo ia laina muamua e tolu o le Mosaea 9:18. (Atonu e te manao e fautua atu latou te makaina nei laina i a latou tusitusiga paia.)
-
O anafea na e iloa ai mea moni o loo ta’ua i nei laina?
Atonu e te manao e faasoa sou lava aafiaga e faaalia ai le naunautai o le Alii e faamalosia i tatou pe a tatou faia mea uma tatou te mafaia ma tuu atu lo tatou faatuatuaga ia te Ia.
Faamatala a o lei toe o atu Senifa ma ona tagata i le taimi lona lua i le taua, sa faamalamalama e Senifa i ona tagata le mafuaaga na faatumulia ai sa Lamana i le inoino i tagata Sa Nifae. Tusi upu feita ma le agaleagaina i luga o le laupapa, ma fesili i tamaiti pe mafai ona latou faamatalaina le uiga o nei upu. (O le feita o le matuai ita lava; agaleagaina o le faatiga lea pe taulimaina ma le faaitu’au po o se uiga e le tonu.)
Ina ia fesoasoani i tamaiti ia iloa o le faatiga i se tasi, tausisi i le ita, ma le musu e faamagalo atu e mafai ona aafia ai augatupulaga, vaevae i latou i ni paga ma fai i paga taitasi e faitau le Mosaea 10:12–18. Fai i ai e vaavaai mo mafuaaga na faaauau ai pea e e na tupuga mai ia Lamana ma Lemuelu le inoino i e na tupuga mai ia Nifae.
A maea ona faitau faatasi e paga ia fuaiupu, ona fai lea i ai e talanoaina tali i fesili nei. (Mafaufau e tusi fesili i luga o le laupapa ao faitauina e tamaiti fuaiupu na tofi i ai, pe tuuina atu foi fesili i paga taitasi i se pepa.)
-
Aisea na matua inoino ai tagata sa Lamana i tagata sa Nifae?
-
O ai e tiga pe a tatou ita pe mumusu e faamagalo atu?
-
E mafai faapefea ona aafia se aiga i le ita o se tagata, i le taimi nei ma le lumanai?
Faitau le saunoaga lea a Elder Donald L. Hallstrom o le Fitugafulu. Fesili i tamaiti e faalogologo mea e mafai ona tatou faia pe a tatou ita pe ua faatiga foi e se tagata.
“Afai e te lagona na faaseseina oe—e se tasi (se tagata o le aiga, se uo, se isi tagata o le Ekalesia, se taitai o le Ekalesia, se uo faapisinisi) po o soo se mea lava (o se maliu o se tasi e pele, faafitauli tau i le soifua malooina, o le suia o tulaga tau tupe , sauaina, o ni vaisu) – — ia taulimaina sao lava le mataupu ma lou malosi uma o i ai … Ma, ia aunoa ma le faatuai, liliu atu i le Alii. Faaaoga uma lou faatuatua o i ai ia te Ia. Ia faasoa atu ia te Ia ou mafatiaga. Ia faatagaina Lona alofa tunoa e faamamaina lau avega. … Aua lava nei faatagaina se tulaga faalelalolagi e taofia mai ai oe faaleagaga” (“Liliu atu i le Alii,” Ensign po o le Liahona, Me 2010, 80).
Fai i tamaiti e manatunatu loloto i fesili nei. (Atonu e te manao e fautuaina i latou e tusi a latou tali i api talaaga mo le suesueina o tusitusiga paia po o api o le vasega.)
-
Pe o i ai ni ou lagona ua agaleagaina oe po o ni lagona ita foi i se tasi?
-
O ai e mafai ona e alu i ai mo se fesoasoani i au taumafaiga e faamagalo atu? E mafai faapefea ona taumamao mai lagona faatiga ma le ita i le lumanai?
Fai i tamaiti e mafaufau i se taimi na latou faamagalo atu ai i se tagata. Valaaulia nisi o i latou e faasoa mai lagona o le faamagalo atu ma le lafoai o lagona o le faatiga po o le ita. Fuafua e faasoa atu lau lava molimau e uiga i le sailia o le fesoasoani a le Alii ina ia faamagalo atu i isi.
Tala ma Faamatalaga o Talaaga
Mosaea 9 O le Talafaamaumau a Senifa
O le ulutala i luma mai o le aotelega o le mataupu Mosaea 9 na tusia e Mamona ma o se vaega o le uluai faamaumauga na tuuina atu i le Perofeta o Iosefa Samita. E faapena foi ulutala na tusia e Mamona, o loo i le amataga o nisi o tusi ma mataupu i le Tusi a Mamona. O le fasifuaitau “e aofia ai le mataupu 9 e oo i le 22” na faaopoopo i ai i le 1879, ina ua lolomi le Tusi a Mamona i le faatulagaga o mataupu. O aotelega pupuu o loo i luma o mataupu taitasi o le Tusi a Mamona, na faaopoopo i ai i le lomiga o le 1920.)
Mosaea 10:12–18. O le a le mea e tatau ona ou faia pe a ou lagona ua agaleagaina au?
Na faasoa mai e Elder Harold G. Hillam o Fitugafulu se silafia e uiga i le auala e taulimaina ai lagona o le ita:
“Afai e te lagona ua tuuaiseseina oe, ia e saunia e faamagalo atu. Afai lava e i ai, po o le a lava le mafuaaga , o i ai se tulaga le lelei o manatuaina pea, ia faagalo. I tulaga e tatau ai, ia talanoa atu i lou epikopo; talanoa atu i lou peresitene o le siteki.
“Ia te outou uma lava, aemaise lava ia i latou o le a avea ma tama ma tina matutua i se aso, o o outou faamanuiaga faavavau faapea ia outou fanau e sili mamao atu ona taua nai lo soo se mafuaaga faasausili lava o le a taofia oe ma le toatele o isi mai le anoanoai o na faamanuiaga taua” (“O Le Taua O Agaga,” Ensign po o le Liahona, Me 2005, 32).