Potutusi
Lesona 66: Mosaea 26

Lesona 66

Mosaea 26

Faatomuaga

I le taimi o le nofoaiga a Mosaea, e toatele i latou o le tupulaga faia’e —i latou o ni fanau iti i le taimi o le saunoaga faaiu a le Tupu o Peniamina—e lei talitonu i aoaoga a le Ekalesia ma sa mumusu e valaau atu i le Alii. O na talavou le talitonu na uunaia ai isi tagata o le Ekalesia e faia agasala matuia. O le toatele o nei tagata solitulafono na aumaia i luma o Alema, le taitai o le Ekalesia. E lei iloa muamua e Alema le mea e fai, ae na iu lava ina ia fesili i le Alii mo se taitaiga pe faapefea ona faamasino ia tagata le usiusitai o le ekalesia. Na faaali e le Alii ia Alema le faiga e mulimuli ai ina ia tali atu ai tagata o le Ekalesia i a latou agasala. Sa aoao ai foi e Alema le alofa mutimutivale o le Atua ma lona naunau e faamagalo i latou o e salamo. Sa mulimuli Alema i le fautuaga a le Alii ma faatulagaina lelei ai le Ekalesia.

Fautuaga mo le Aoaoga

Mosaea 26:1–6

O le toatele o tupulaga faia’e e le talitonu i le talalelei ma taitai ai isi e faia le agasala

A o lei amataina le vasega, tusi le faamatalaga lenei i luga o le laupapa:

E faapefea ona e faamatalaina lau molimau i le taimi nei?

E faapefea ona e manao ia tuputupu ae lau molimau?

Fai i tamaiti e tali i fesili nei i a latou api talaaga mo le suesueina o tusitusiga paia po o a latou api o le vasega. A uma se taimi ua lava, faamatala o le Mosaea 26 o loo i ai se tala i se vaega o tagata latou te lei faia mea e tatau ona latou faia e fafaga ai a latou molimau. O le taunuuga, e lei tuputupu ae lo latou faatuatua i le Atua, ma sa latou taitaia le toatele o tagata o le Ekalesia i le agasala ma mea sese. Fautuaina a o suesue e tamaiti lenei tala, ia latou mafaufau i mea o aoao mai ai e uiga i le atiina ae ma le faamalolosia o a latou molimau.

Valaaulia se tamaitiiti e faitau leotele le Mosaea 26:1–3. Ona fesili lea i le vasega:

  • O le a le filifiliga na faia e le toatele o le tupulaga faiae? (Na latou filifili e talitonu i tu ma aga a o latou matua.)

  • Aisea e te manatu ai o le le talitonu o tagata ua faatelegese ai ona latou “malamalama i le upu a le Atua”? (Mosaea 26:3).

Faamatala o le talitonu (po o le i ai o se manao e talitonu) e tau atu i taga e faamalolosia ai molimau. I se isi itu, a filifili tagata e le talitonu, latou te filifili foi e le faia ni mea patino e fesoasoani ai e atiina ae a latou molimau malolosi. Valaaulia tamaiti e faitau lemu le Mosaea 26:3–4, 6. Fai i le afa o le vasega e vaavaai mo mea e le mananao le tupulaga faiae e fai ona o lo latou le talitonu. Fai i le isi afa o le vasega e vaavaai mo taunuuga o lena le talitonu.

  • O a mea na mumusu le tupulaga faiae e fai ona o lo latou le talitonu?

  • O a aafiaga o lo latou le talitonu?

A uma ona talanoaina e tamaiti fesili nei, tusi mea nei i luga o le laupapa: Ia atiina ae ma faatumauina se molimau, e tatau ona tatou …

Peresitene Henry B. Eyring

Fai i se tamaitiiti e faitau leotele le saunoaga lea a Peresitene Henry B. Eyring o le Au Peresitene Sili. Fai i le vasega e faalogologo mo auala e faauma ai le fuaiupu o i luga o le laupapa.

“O le molimau e manaomia ai le faafailelega a le tatalo o le faatuatua, o le galala mo le upu a le Atua i tusitusiga paia, ma le usiusitai i le upumoni ua tatou mauaina. E i ai le tulaga matautia i le faatalale i le tatalo. E i ai le tulaga matautia i a tatou molimau i le na o le suesue ma le faitauina o tusitusiga paia ae le o i ai le loto. O ni niuterene ia e tatau ai mo a tatou molimau. …

“O le taumamafa i Upu a le Atua, tatalo ma le loto, ma le usiusitai i poloaiga a le Alii e tatau ona faaaogaina tutusa ma ia faifai pea mo lau molimau ina ia ola ai ma manuia.” (“O Se Molimau Ola,” Ensign po o le Liahona, Me 2011, 127).

  • O a ni faatinoga na faailoa mai e Peresitene Eyring o le a fesoasoani ia i tatou e fafaga ai a tatou molimau? (A o faailoa mai e tamaiti nei faatinoga, tuu i le fuaiupu o i luga o le laupapa: Ina ia atiina ae ma faatumauina se molimau, e tatau ona tatou taumamafa i le afioga a le Atua, tatalo ma le faatuatua, ma usitai i poloaiga a le Alii.)

  • O faapefea ona uunaia e nei faatinoga lau molimau?

Valaaulia tamaiti e faitau lemu le Mosaea 26:5–6, ma vaavaai pe na faapefea e talavou le talitonu ona uunaia nisi o tagata o le Ekalesia.

  • Mafaufau i le faamatalaga lea: “Ona sa oo ina latou faaseseina le toatele o e sa i ai i le Ekalesia, ia latou upu taufaasee, ma faaoso i latou ia latou faia agasala e tele; o lea sa tatau ai ia te i latou o e na faia le agasala, o e sa i ai i le ekalesia, ona a’oa’ia e le ekalesia” (Mosaea 26:6). O le a sou manatu i le uiga o lenei saunoaga? (Na alagatatau i tagata o le Ekalesia na agasala ona faamasinoina ma tali atu mo i latou lava.)

Mosaea 26:7–14

Na fesili atu Alema i le Alii mo se taitaiga pe faapefea ona faamasinoina i latou ua agasala

Ia mafaufau tamaiti pe faapeī le avea ai ma se epikopo o se uarota ae i ai tagata o le au paia e faia ni agasala matuia ae le salamo. Fai i tamaiti e manatunatu filemu po o le a la latou mea e fai i lea tulaga. E faapefea ona latou faataunuuina lo latou tiutetauave ia tali atu tagata mo a latou lava agasala ma fesoasoani ia latou salamo? Faamatala, na feagai Alema, le taitai o le Ekalesia ma se luitau faapena.

Aotele le Mosaea 26:7–12 i le faamatala atu na aumaia i latou na agasala i luma o Alema. E lei tupu muamua se mea faapea i le Ekalesia, ma sa lei iloa e Alema le mea e fai. Sa tonu ai ia te ia e auina atu tagata solitulafono i le Tupu o Mosaea ina ia faamasinoina. Sa toe faafoi atu i latou e le Tupu o Mosaea ia Alema, o le sa umia le pule mai le Atua e faamasinoina ai tagata o le Ekalesia e agasala.

Valaaulia se tamaitiiti e faitau leotele le Mosaea 26:13–14. Fai i le vasega e vaavaai mo lagona o Alema e uiga i lona tiutetauave e faamasino i latou ua agasala.

  • Ina ua faaletonu Alema e uiga i lona tiute e faamasino tagata solitulafono, o le a le mea sa ia faia?

  • Aisea e taua ai le iloa o le epikopo ma le peresitene o le paranesi e saili ma maua mai le taitaiga mai le Alii pe a fesoasoani atu ia i latou o e agasala?

Mosaea 26:15–32

Na faaali atu e le Alii ia Alema le ala e faia ai ia tali atu tagata o le Ekalesia mo a latou agasala ma faatuina mai ai tuutuuga o le salamo

Ina ia fesoasoani i tamaiti ia malamalama i le matalalaga o le Mosaea 26:15–32, faasino i ai o fuaiupu nei o loo i ai le tali a le Alii i le fesili a Alema po o le a le mea e tatau ona ia faia e uiga i tagata solitulafono. A o suesue e tamaiti le tali a le Alii, fautuaina i latou e vaavaai mo mataupu faavae ma aoaoga faavae e fesoasoani latou te malamalama atili ai i le matafaioi a faamasino faaleperisitua, e pei o epikopo ma peresitene o paranesi (ma, mo e umia le Perisitua Mekisateko, peresitene o siteki, itu, ma misiona). Fai foi i ai e vaavaai mo mataupu faavae ma aoaoga faavae e uiga i le saili atu mo le faamagaloga.

Valaaulia tamaiti e faitau lemu le Mosaea 26:17–28, matau taimi taitasi e faaaoga ai e le Alii le upu lo’u/la’u po o le O Au. Atonu e te manao e fautuaina tamaiti e maka upu nei i taimi taitasi e vaaia ai. Ona fesili lea i le vasega:

  • I le Mosaea 26:17–28, o a mea o fautua mai e upu O Au ma le lo’u/la’u e uiga i le tulaga o le Alii i le faagasologa o le salamo? (Atonu e te manao e valaaulia tamaiti e faasoa mai ni fasifuaitau patino po o fuaiupu e lagolago ai a latou tali.)

  • O a upumoni e mafai ona tatou aoao mai i le Mosaea 26:20–21 e uiga i le matafaioi a auauna a le Alii i le faagasologa o le salamo? (Fesoasoani ia malamalama tamaiti o taitai perisitua o sui ia o le Alii ma afai o se agasala matuia, e mafai ona fesoasoani epikopo ma peresitene o paranesi ia i tatou ia salamo ma maua le faamagaloga.)

  • E mafai faapefea ona fesoasoani se epikopo po o se peresitene o le paranesi ia i latou o tauivi ma agasala ma faaosoosoga?

Faamatala na aoaoina Alema e le Alii i mea e tatau ona faia e i latou o e saili mo le faamagaloga ina ia salamo ai. Valaaulia tamaiti e faipaga e sue le Mosaea 26:29–32 ma faailoa mai mataupu faavae e fesoasoani ia latou malamalama ai i mea e manaomia e le Alii mai ia i tatou pe a tatou salamo.

A uma se taimi e suesue ai e tamaiti nei fuaiupu, valaaulia nisi o i latou e tusi i luga o le laupapa, e faaaoga ai a latou lava upu, ia mataupu faavae na latou mauaina. O a latou tali e ono aofia ai mea nei:

O le ta’uta’u o agasala e tau atu i le faamagaloga.

O le a faamagalo e le Alii i latou o e salamo ma le faamaoni i o latou loto.

E tatau ona tatou faamagalo atu i isi ina ia maua ai le faamagaloga a le Alii.

Ina ia fesoasoani ia malamalama atili tamaiti i nei mataupu faavae, fai nisi po o fesili uma nei:

  • I le Mosaea 26:29, o le a le uiga o le fasifuaitau “ta’utino mai e ia ana agasala i luma o oe ma au”? (E ono manaomia lou faasino atu o le fuaiupu lenei, o le upu oe e faasino ia Alema.)

  • A i ai se tasi e faia se agasala matuia, aisea e manaomia ai le tagata ia tautau atu i le Alii ma se taitai talafeagai o le Ekalesia? (O solitulafono matuia, e pei o le solia o le tulafono o le ola mama, e ono faamata’uina ai le auai o le tagata i le Ekalesia. O le mea lea, i tulaga faapena, e manaomia ona tautau atu e le tagata le agasala i le Alii ma Lona sui i le Ekalesia. O loo umia e epikopo ma peresitene o paranesi ia ki o le perisitua e fesoasoani ai ia i latou ua agasala ma o loo sailia le faamagaloga. E ui e na o le Alii e mafai ona faamagaloina i tatou, ae e i ai se matafaioi lagolago a taitai perisitua e fesoasoani ai i tagata ia maua le faamagaloga. Latou te tausisia le le faalauaiteleina o mea e tautau atu, ma fesoasoani ia i latou e tautauina atu i le faagasologa atoa o le salamo.)

  • O le a le uiga i se tasi ia salamo “ma le faamaoni o lona loto”? (Mosaea 26:29).

  • Aisea e manaomia ai e le Alii lo tatou faamagalo atu i isi? E faapefea ona fesootai le salamo ma le faamagalo atu i isi? (tagai 3 Nifae 13:14–15; MF&F 64:8–11.)

  • O a ni fasifuaitau o i ai i nei fuaiupu e ono avatu ai le lototele ma le faamafanafanaga i se tasi o manaomia ona salamo ae e le o manatu e mafai ona faamagaloina o ia?

Mosaea 26:33–39

Na usitai Alema i le fautuaga a le Alii, ma faamasinoina i latou o e ua agasala ma faatulagaina lelei le Ekalesia

Faamatala o le Mosaea 26:33–37 o loo toe faamatala ai le ala na mulimuli ai Alema i faatonuga a le Alii, faamasino tagata o le Ekalesia na agasala, ma faatulaga lelei le Ekalesia. Valaaulia tamaiti e faitau lemu le Mosaea 26:34–37, ma vaavaai mo taunuuga o taumafaiga a Alema e mulimuli i fautuaga a le Alii. Faasoa atu lau molimau a tatou salamo ma ola amiotonu, e mafai ona tatou maua le filemu i o tatou loto ma manuia ai faaleagaga.

Tala ma Faamatalaga o Talaaga

Mosaea 26:29–30. O elemene taua o le salamo

Na aoao mai e Elder Richard G. Scott o le Korama a Aposetolo e Toasefululua ia elemene taua o le salamo:

“Na [tuuina mai] e Spencer W. Kimball se taiala matagofie i le faamagaloga e ala i le salamo. Ua fesoasoani i le toatele e toe maua ai le ala e toe foi ai. Na ia [faailoa mai] elemene taua e lima o le salamo.

“Faanoanoa mo le agasala. Suesue ma manatunatu loloto ia e iloa le mamafa o lau solitulafono i le silafaga a le Alii. O lena mea o le a aumaia ai le faanoanoa ma le salamo. O le a aumai ai foi se naunau faamaoni mo se suiga ma se naunautaiga e usiusitai i taulaga manaomia uma mo le faamagaloina. …

Lafoaia o le agasala. O se tautinoga mausali lea ma tumau o le a le toe faia le solitulafono. O le tausia o lenei tautinoga, e le manaomia ai ona toe lagonaina le oona o le agasala.

“O le ta’u atu o le agasala. Ua manaomia lava ona e tau atu o au agasala i le Alii. Afai o ni agasala mamafa, pei o le faitaaga, e tatau ona ta’u i le epikopo po o le peresitene o le siteki. Ae ia e malamalama o le ta’u atu o le agasala e le o le salamo lena. O se laasaga taua peitai ua le lava na o lena. O le tautau atu o se vaega e ala i le tauina atu o mea sese laiti, o le a le fesoasoani ia te oe e faaleleia ai solitulafono matuia e lei faailoaina atu. … E taua i le faamagaloga o se naunautaiga lea e faailoa uma atu i le Alii, ma i tulaga e tatau ai, o Lana faamasino faaleperisitua mea uma na e faia. …

“Faaleleia mo le agasala. E tatau ona e toe faafoi atu e tusa ma le mea e mafai ona e faia, mea uma na e gaoia, na faaleagaina, pe na faaeleeleaina. O le naunau e toe faaleleia o se faamaoniga moni lea i le Alii, ua e tautino e faia mea uma e mafai ona e faia, e te salamo ai.

“Usiusitai i poloaiga uma. O le usiusitai atoatoa e te maua ai le mana atoa o le talalelei i lou olaga faatasi ma le malosi e te maua’a ai e lafoa’i agasala patino. E aofia ai mea atonu e te le’i mafaufau i ai muamua o se vaega o le salamo, pei o le auai i sauniga, totogi o le sefuluai, auauna atu ma le faamagalo atu i isi.

“Ou te faaopoopoina atu le laasaga lona ono: Taliaina o le Faaola. I laasaga uma o le salamo, ou te molimau atu o le laasaga silisili ona taua, o lou maua lea o se tautinoga ua i ai le faamagaloina ona o le Togiola. Ua taua ona e mautinoa ua na o Ana tuutuuga e mafai ona faamagaloina ai oe.” (“Mauaina o le Faamagaloina,” Liahona, Iulai 1995, 85- 86).