Faatomuaga i Le Tusi a Alema
Aisea e suesueina ai lenei tusi?
O le suesueina o le tusi a Alema, o le a aoao ai tamaiti aoga e uiga ia Iesu Keriso ma le tulaga manaomia o Lona Togiola ma le Toetu i le ata o le faaolataga. O le a latou aoao foi e uiga i le mana o le upu a le Atua e faatoilalo ai faitaulaga pepelo, aoaoga faavae sese, agasala, ita, ma le liliuese ma taitai atu ai tagata taitoatasi e lagonaina se suiga tele o le loto. E mafai ona aoaoina ma musuia tamaiti aoga ao latou faitau i taumafaiga faafaifeautalai a Alema, Amoleka, ma atalii o Mosaea, faapea foi ma le liuaina ma le faamaoni o Aneti-Nifae-Liae (le nuu o Amona). Ao latou suesueina ia mataupu o loo faamatala auiliili atu ai fetauaiga i le va o sa Nifae ma sa Lamana, o le a mafai ona latou aoao i mataupu faavae lea o le a taitaia ai i latou i taimi faigata o loo latou feola ai ma fesoasoani ia i latou ia manumalo i a latou fetauaiga patino ma le tiapolo.
O ai na tusia lenei tusi?
Na otootoina ma tuufaatasia e Mamona ia faamaumauga mai papatusi tetele a Nifae e fatu ai le tusi a Alema. Ua faaigoaina le tusi ia Alema, o le atalii o Alema, lea e masani ona valaau ia Alema le Itiiti. Ina ua amatalia e le Tupu o Mosaea le nofoaiga a faamasino i totonu o sa Nifae, o Alema le Itiiti na avea ma faamasino sili muamua ma sa ia suitulaga i lona tama e avea o se faitaulaga sili i le Ekalesia (tagai Mosaea 29:42). Na ia faamaloloina mai o ia mai lona tofiga o se faamasino sili ina ia tuu atu “atoatoa o [ia lava] i le perisitua maualuga” ma “talai atu le afioga a le Atua i tagata” i le laueleele atoa o sa Nifae (Alema 4:20; 5:1). Na faaaoga e Mamona ia faamaumauga o le talaiga a Alema (tagai Alema 1–44) ma tusitusiga a atalii o Alema o Helamana (tagai Alema 45–62) ma Sepulona (tagai Alema 63) e fatu ai le tusi a Alema.
O ai na tusi i ai lenei tusi, ma aisea foi?
E lei tusia e Mamona le tusi a Alema mo se aufaitau faapitoa pe o faamatalaina mai le mafuaaga na ia tusia ai. Ae peitai, o le anoanoai o aoaoga o le tusi e faatatau i le misiona togiola a Iesu Keriso o loo saofaga atu ai i se faamoemoega autu o le Tusi a Mamona, lea e molimau ai “faapea o Iesu o le Keriso, o le Atua Faavavau” (itulau atu o le Tusi a Mamona; tagai foi Alema 5; 7; 13; 32–34; 36; 39–42).
O anafea, ma o fea na tusia ai?
O uluai faamaumauga na faaaoga o ni punavai mo le tusi a Alema na foliga mai na tusiaina i le va o le 91 T.L.M. ma le 52 T.L.M. Na otootoina e Mamona na faamaumauga i le taimi i le va o le T.A. 345 ma le T.A. 385. E lei faamaumauina e Mamona le nofoaga sa i ai o ia ao ia tuufaatasia lenei tusi.
O a nisi o elemene tulaga ese o lenei tusi?
E ui e pito i umi lava le tusi a Alema i le Tusi a Mamona, ae na o le 39 tausaga le periota lea o loo kavaina ai—pe tusa o le 91 T.L.M. i le 52 T.L.M. O loo faamatalaina i le tusi ia uluai faataitaiga o galuega talai faamanuiaina i sa Lamana. O loo faamamafa mai ai foi le faamaoni o tagata sa Lamana ia na liua i le tausiga o o latou feagaiga (tagai Alema 23:6–7; 24). E le gata i lea, o le tusi a Alema o loo aofia ai ni aoaoga e uiga i le aoaoga faavae o le muai faauuina ma le galuega talai a Mekisateko (tagai Alema 13); o le mana o afioga a le Atua (tagai Alema 31); auala e atiina ae ai le faatuatua ia Iesu Keriso (tagai Alema 32–34); le tulaga matautia o le solia o le tulafono o le le gaoia (tagai Alema 39); le tulaga o o tatou agaga pe a mavae le oti (tagai Alema 40); o aoaoga faavae o le toetu ma le toefuataiga (tagai Alema 40–41); ma matafaioi o le faamasinoga tonu ma le alofa mutimutivale i le fuafuaga o le togiola a le Tama Faalelagi (tagai Alema 42). O loo i ai foi i lenei tusi ia ni aoaoga a le Alii e faatatau i le puipuia o i latou lava ma le mafuaaga e tatau ai ona tau (tagai Alema 43:45–47).
Otootoga
Alema 1–3 Ua amatalia e Neoa faafaitaulaga pepelo i sa Nifae. Ua taitaia e Alema tagata sa Nifae amiotonu e puipuia i latou lava mai ia Amiliki ma i latou o e na mulimuli ia te ia, lea ua aufaatasi ma autau a sa Lamana. Ina ua mavae le le fiafia i le taumafaiga a Amiliki e fia avea ma tupu ma faaumatia le Ekalesia, na faatoilaloina e sa Nifae se isi autau a sa Lamana.
Alema 4–16 Ua faamavae Alema mai le avea ma faamasino sili. Ua femalagaai o ia i le laueleele atoa o sa Nifae e faaitiitia le faamaualuga ma le amioleaga e ala i le talai atu o le afioga a le Atua. Ua faatasi atu Amoleka ia Alema, ma ua la aoao atu le Togiola a Iesu Keriso, le Toetu, ma le manaomia o le faatuatua i le Alii ma le salamo. Ua liua Seseroma ma papatisoina.
Alema 17–28 Ua talai atu e atalii o Mosaea le afioga a le Atua i tagata sa Nifae i le laueleele o Nifae. E faitau afe ua liua i le Alii. Na lafoai e tagata na liua a latou auupega o le taua ma o atu ma nonofo faatasi ma tagata sa Nifae. O le toatele o tagata na maliliu i se taua tele i le va o sa Nifae ma sa Lamana.
Alema 29–42 Ua manao Alema e aumaia ia agaga ia salamo. Ua ia faafememeaia ia Korioa, o se aneti-Keriso. Ao aoao atu ia sa Sorama, o se vaega o sa Nifae na vavae ese mai ia i latou, na faatusalia e Alema le afioga a le Atua i se fatulaau lea e tatau ona faafailele i le faatuatua. Na molimau atu Amoleka i le Togiola ma aoao atu ia sa Sorama e faaaoga le faatuatua e salamo ai. Na tuuina atu taitoatasi e Alema se fautuaga ma le molimau i ona atalii o Helamana, Sepulona, ma Korianetona. Na tuuina atu e Alema ia Helamana le tausiga o tusitusiga paia. Na ia aoao atu e uiga i le lalolagi o agaga pe a mavae le olaga faitino, toetu, ma matafaioi o le faamasinotonu ma le alofa mutimutivale i le fuafuaga a le Atua.
Alema 43–45 O le faaosofia i le ita e sa Nifae ia na vavae ese, na o mai ai sa Lamana ma tau faasagatau atu ia sa Nifae. Na taitai atu e Moronae sa Nifae i le manumalo i le autau a Seraemina. Na faatalanoaina ma faamanuia e Alema ia Helamana, valoaiaina le faatafunaina o sa Nifae, ma aluese mai le laueleele.
Alema 46–63 Na taitaia e Moronae, Liae, Teanekuma, Helamana, ma Paorana ia sa Nifae e manumalo i autau a sa Lamana lea na pulea e Amalekia ma Amorona. Na faafilemuina foi e Moronae ma Paorana le tetee o sa Nifae lea na o ese ma ua taua o tagata tupu. Na mauaina e Sepulona ia faamaumauga a sa Nifae ma tuuina atu mulimuli ane ia Helamana le atalii o Helamana. Ua faatoilalo e le autau a Moronaea ia sa Lamana i se isi taua.