Potutusi
Lesona 76: Alema 11

Lesona 76

Alema 11

Faatomuaga

Ao faaauau pea ona aoao atu e Alema ma Amoleka ia le nuu o Amonaea, na ofo atu e se loia e igoa ia Seseroma se tupe ia Amoleka ina ia faafiti ai e leai se Atua. Sa taumafai Seseroma e mimilo upu a Amoleka ma tauleagaina ana aoaoga e uiga ia Iesu Keriso. Ao puipuia e Amoleka o ia lava mai taumafaiga a Seseroma ina ia mailei o ia, na ia molimau atu faapea ua na o Iesu Keriso lava e maua ai le faaolataga mai le agasala. Na molimau atu foi Amoleka o le a toetutu tagata uma ma o le a aumaia ma “molia i luma o le pa faamasino a Keriso le Atalii, ma le Atua le Tama, ma le Agaga Paia” i le Aso o le Faamasinoga (Alema 11:44).

Fautuaga mo le Aoaoga

Alema 11:1–25

Ua teena e Amoleka le faaosoosoga a Seseroma ina ia faafiti e leai se Atua

Fai i tamaiti e mafaufau i se mea o loo ia i latou e matuai taua lava ia i latou e le mafai lava ona latou faatau esea atu. Fai i nai tamaiti e faamatala mai se mea sa latou mafaufau i ai ma pe aise e matuai taua ai na mea ia i latou.

Faamatala atu o le Alema 11 o loo faaauau ai pea le tala ia Alema ma Amoleka o loo aoaoina le nuu o Amonaea. Ao aoao atu Amoleka, sa faafeiloaia o ia e se tagata loia e igoa ia Seseroma, o le na ofoina atu se tupe e fesuiai ai mo se mea sa matuai taua lava ia Amoleka.

Fai i tamaiti e suesue i le Alema 11:21–22 e iloa ai pe fia se tupe na ofoina atu e Seseroma ia Amoleka, ma o le a le mafuaaga. Fai i tamaiti aoga e lipoti mai mea sa latou aoaoina.

Faasino i le faamalamalamaga a Mamona o le faatulagaga o mea tau tupe a sa Nifae o i le Alema 11:4–19 e fesoasoani tatou te iloa ai le tele o le faatosinaga a Seseroma. Fesoasoani i tamaiti ia malamalama o le oneti o se tupe siliva e pito i tele lona tau (tagai i le Alema 11:6, 11–13). O le oneti e tasi e tutusa lea ma le pe a ma le tasi le vaiaso o le totogi o le faamasino (tagai i le Alema 11:3, 11–13), o lona uiga o le ono oneti e tutusa lea i le pe a ma le ono vaiaso o le totogi mo se faamasino.

  • Aisea e ono faatosina ai i nisi tagata le ofo a Seseroma?

Valaaulia se tamaitiiti aoga e faitau leotele le Alema 11:23–25.

  • O le a se mea o loo faailoa mai i le tali a Amoleka e uiga ia te ia?

  • E tusa ma le Alema 11:25, o le a se mea na fuafua Seseroma e faia pe a talia e Amoleka lana ofo? O faapefea ona tali tutusa lenei mea i le mea o faia e Satani pe a gauai atu tagata i ana faaosoosoga?

Ina ia fesoasoani i tamaiti ia iloa le auala na mafai ai e Amoleka ona teena le ofo a Seseroma, tusi le faamatalaga lenei i luga o le laupapa: O le a ou le … atu se mea e le tusa ai ma le Agaga o le Alii.

Fai i se tamaitiiti e faitau le Alema 11:22. Fai i le vasega e saili mo le upu na faaaogaina e Amoleka e faatumu ai le faamatalaga lenei.

  • O a nisi upu e mafai ona tatou tuuina i le avanoa e ono fesoasoani ai ia i tatou ina ia faalagolago atu i le Agaga Paia i le teteeina o faaosoosoga? (“Fai”, “mafaufau”, po o le vaai”.)

Fai i tamaiti e tau mai se mataupu faavae e faatatau i le Alema 11:22 lea e mafai ona fesoasoani ia i latou i le auala e mafai ai ona latou manumalo i faaosoosoga. E ui e ono eseese ia tali a tamaiti, peitai e tatau ona atagia mai ai le mataupu faavae lenei: Pe a tatou faalagolago atu i le Agaga Paia, e mafai ona tatou manumalo i faaosoosoga. (Atonu e te manao e fautuaina tamaiti e tusi le mataupu faavae lenei i totonu o a latou tusitusiga paia i talaane o le Alema 11:22.)

  • O le a sou manatu, e faapefea ona fesoasoani le mataala i uunaiga a le Agaga Paia i le tatou foiaina o faaosoosoga?

Faitau le saunoga lenei a Peresitene Boyd K. Packer, Peresitene o le Korama a Aposetolo e Toasefululua:

Peresitene Boyd K. Packer

“Afai ua e se’e atu i mea e le tatau ona e oo i ai, pe afai foi ua e fegalegaleai ma tagata ua tosoina ese atu oe i le itu sese, o le taimi tonu lena e faatino ai lou tutoatasi, lau faitalia. Faalogo i le siufofoga o le Agaga, ma o le a le taitaiina sese lava oe.

“… I le avea ai ma auauna a le Alii, ou te folafola atu o le a puipuia outou ma leoleoina mai osofaiga a le fili pe afai o le a outou faalogo atu i uunaiga ia e sau mai le Agaga Paia” (“Fautuaga i le Autalavou,” Ensign po o le Liahona, Nov. 2011, 18).

Ina ia fesoasoani i tamaiti ia iloa ma lagona le taua o le mulimuli i uunaiga a le Agaga Paia, fai atu ia fesili nei:

  • O a nisi o tulaga o ono faaosoosoina ai le talavou ina ia tetee atu i a latou molimau?

  • O le a se mea o e faia e faalagolago atu ai i le Agaga Paia? O faapefea ona fesoasoani lena mea ia te oe?

  • O anafea na fesoasoani ai le Agaga Paia ia te oe i le foiaina o faaosoosoga?

Uunaia ia tamaiti aoga e faaaoga mea sa latou aoaoina e ala i le manatuaina o se faataitaiga a Amoleka i se isi taimi o le a faaosoosoina ai i latou e fetuunaia a latou talitonuga. Molimau atu faapea a o latou ola agavaa mo le mafutaga a le Agaga Paia, o le a mafai ona latou maua se talitonuga sili atu ina ia tu atu mo le upu moni ma foia ia faaosoosoga.

Alema 11:26–40

Ua molimau atu Amoleka e uiga i le Alo o le Atua ma ua manumalo i taumafaiga a Seseroma e tauleagaina lana upu

Fai atu i tamaiti pe na i ai se tagata na taumafai e fesiligia pe tetee atu ia latou talitonuga e ala i le tauaimisa po o le pepelo. Valaaulia se tamaitiiti se toatasi pe toalua foi e faasoa mai ni a latou aafiaga.

Faamatala atu ina ua mavae le toilalo a Seseroma i lana taumafaiga ia Amoleka ina ia faafiti e leai se Atua, sa suia ana metotia ma amata ona osofaia le faatuatua o Amoleka ia Iesu Keriso.

Valaaulia ni nai tamaiti aoga e feauauai i le faitauina leotele mai o le Alema 11:26–35. Fai i le vasega e tagai i le auala na taumafai ai Seseroma e mimilo upu a Amoleka. Fai atu i tamaiti e lipoti mai ni mea sa latou mauaina. Valaaulia se tamaitiiti aoga e faitau leotele le Alema 11:36–37. Fai i le vasega e matau mai le auala na faasaoina ai e Amoleka ia mea sese ia na aoaoina e Seseroma. Fai i tamaiti e tagai i le vaefaamatalaga 34a. (Atonu e te manao e fautuaina tamaiti aoga e faailoga le vaefaamatalaga 34a i a latou tusitusiga paia.) Valaaulia se tamaitiiti aoga e faitau leotele le Helamana 5:10–11.

  • Aisea e faigata ai le laveaiina mai ia tatou agasala? O le a le eseesega i le va o le laveaiina mai ia tatou agasala ma le laveaiina mai a tatou agasala?

Valaaulia se tamaitiiti aoga e faitau leotele le Alema 11:40. Faamalamalama atu o loo aofia i lenei mau se mataupu faavae e tatau ona tatou mulimuli i ai ina ia mafai ona laveaiina mai i tatou mai a tatou agasala. Tusi le mataupu faavae lenei i le laupapa: Afai tatou te talitonu ia Iesu Keriso, o le a mafai ona faaolaina i tatou mai a tatou agasala.

  • O le a le uiga ia te oe o le talitonu ia Iesu Keriso?

  • Aisea e tatau ai ona tatou talitonu ia Iesu Keriso ina ia laveaiina mai a tatou agasala?

Ina ia fesoasoani i tamaiti aoga ia malamalama o le faatuatua ia Iesu Keriso e taitai atu ai i le faaolataga e ala i le salamo, faitau i le saunoga lenei mai ia Peresitene Dieter F. Uchtdorf o le Au Peresitene Sili:

Peresitene Dieter F. Uchtdorf

“Tatou te manaomia se faatuatua malosi ia Keriso ina ia mafai ai ona salamo. O lo tatou faatuatua e tatau ona aofia ai se ‘manatu sao i le [Atua] lava ia, atoatoa, ma uiga’ (Lectures on Faith [1985], 38). Afai tatou te talitonu e silafia e le Atua mea uma, e alofa, ma e alofa mutimutivale, o le a mafai ona tatou tuu atu lo tatou faatuatuaga ia te ia mo lo tatou faaolataga e aunoa ma le fefoifoiai. O le faatuatua ia Keriso o le a suia ai o tatou mafaufauga, talitonuga, ma amioga ia e le tusa ai ma le finagalo o le Atua” (“Vaega Tonu o le Toe Foi Saogalemu,” Ensign po o le Liahona, Me 2007, 100).

Faatulaga tamaiti e fai paga. Fai atu i paga taitasi e auauai i le faamatalaina i le tasi ma le isi o le auala latou te tali atu ai pe afai e fai mai ni fesili faapenei a se tagata e laitiiti atu. (Atonu e te manao e tusi fesili nei i luga o le laupapa.)

  • Aisea e tatau ai ona ou talitonu ia Iesu Keriso ina ia mafai ai ona salamo ma laveaiina mai au agasala?

  • O faapefea i le mauaina o le faatuatua ia Iesu Keriso ona fesoasoani ia te oe ina ia salamo?

Molimau atu o le mauaina o le faatuatua ia Iesu Keriso, e mafai ai ona tatou salamo, laveaiina mai a tatou agasala, ma maua le ola e faavavau.

Alema 11:41–46

Na aoao mai Amoleka e uiga i le toetutu ma le faamasinoga o tagata uma.

Ina ia fesoasoani i tamaiti e mafaufau pe aisea e taua ai le iloaina o le a iu lava ina tatou toe tutu ma faamasinoina, fesili atu:

  • Mata o le a se auala e ono ese ai se tulaga e ola ai se tagata pe ana faapea e leai se olaga pe a mavae le oti?

Tusi upu Toetu ma le Faamasinoga i le laupapa. Fai atu i tamaiti e suesue lemu i le Alema 11:41–45, vaavaai mo le tele o faamatalaga e mafai ona latou maua e uiga i le toetu ma le faamasinoga. Ao lipoti mai e tamaiti aoga mea sa latou maua, tusi a latou tali i le laupapa. Ia mautinoa o se tasi o faamatalaga o i le laupapa o faailoa mai ai le upumoni faapea o tagata uma o loo nonofo i le lalolagi o le taunuuga lava o le toetutu. Faasino atu o le faauigaga faigofie o le toetu o loo i le Alema 11:45: “E le mafai ona toe oti i latou; ae faatasia o latou agaga ma o latou tino, e le toe tuueseeseina.” (Atonu e te manao e fautuaina tamaiti e faailoga le faamatalaga lenei.) A uma ona lipoti mai e tamaiti mea sa latou aoaoina, atonu e te manao e fautua atu ia i latou e tusi ia upu moni nei i le pito i luga o le itulau o a latou tusitusiga paia: E ala i le Togiola a Iesu Keriso, o le a mafai ai e tagata uma ona toetutu ma faamasinoina e tusa ai ma a latou galuega.

  • O fea o upu moni o i le laupapa o musuia oe ina ia saunia e fetaiai ma le Atua?

  • Aisea o aumaia ai e upumoni e uiga i le toetutu le filemu ma le faamoemoe i e amiotonu?

Fai i tamaiti e faitau le leoa le Alema 11:46, vaavaai i aafiaga na i ai o aoaoga a Amoleka ia Seseroma.

  • Aisea e te manatu ai e ono tali atu faapea se tagata i aoaoga a Amoleka?

  • O fea o aoaoga o i le Alema 11:41–45 e te manatu na ono faapopoleina ai Seseroma? Aisea?

Molimau atu faapea ona o le Togiola a Iesu Keriso, o le a mafai ai e tagata uma ona toetutu ma tu atu i luma o le Atua “e faamasinoina e tusa ma a latou galuega” (Alema 11:44). Tuu atu i tamaiti se taimi e mafaufau loloto ai i mea sa latou aoaoina i le aso ma e pe faapefea ona fesootai ia i latou. Ona tuu atu lea ia i latou e tusi ni tali o fesili nei i totonu o api o le vasega po o api talaaga mo le suesueina o tusitusiga paia: (Atonu e te manao e tusi fesili nei i luga o le laupapa.)

  • O a ni ou lagona pe a e mafaufau e uiga i le toetutu ma le faamasinoina?

  • O le a se mea e tatau ona e faia e saunia ai e tu i luma o le Atua?

  • O faapefea e lou talitonuga faapea o le a e toetu ma faamasinoina ona aafia ai le ala o e filifili ai e ola i aso taitasi?

Tala ma Faamatalaga o Talaaga

Alema 11:28. Mata e sili atu nai lo le toatasi le Atua?

O le aoaoga faavae a le Au Paia o Aso e Gata Ai e uiga i le Aiga Atua (e faapea o le Tama, le Alo, ma le Agaga Paia o ni Peresona mavaevae e toatolu o e ua tuufaatasia atoatoa i le faamoemoe ma le aoaoga faavae) ua osofaia e le lalolagi faaKerisiano i nei ona po. O tagata kerisiano o e ua fautua mai o latou manatu e uiga i le Atua i talitonuga o le seneturi lona fa ma le lima lea ua faailoa mai ai le Mataupu Faavae o le Tolutasi (e faapea o le Tama, le Alo, ma le Agaga Paia e le o ni tagata mavaevae) e matele ina fesiligia ai tagata o le Ekalesia e uiga i o tatou manatu uiga ese e faatatau i le Atua. O le fesili na tulai ae faatasi ai ma se tali na tuuina mai i le Alema 11:28–33 ua mafua ai foi ona tele nisi fesili e uiga i le aoaoga faavae a le Aiga Atua e pei ona otootoina atu i le Ekalesia toefuataiina. O Roy W. Doxey, fesoasoani i le ofisa a le Aufono a le Toasefululua ma o se taitai ua malolo faamamaluina o Aoaoga o Mataupu Faalelotu, Iunivesite o Polika Iaga, na faamatalaina se mafuaaga talafeagai mo le tali a Amoleka e faapea e na o le tasi lava le Atua:

“Mata e sili atu nai lo le tasi le Atua? E masani ona tulai mai lenei fesili e tali atu ai i le Alema mataupu e 11, lea e avea ai Seseroma, o se tagata faitio, o loo tetee i le faifeautalai o Amoleka. …

“Ina ia malamalama i le faamatalaga a Amoleka [e na o le tasi lava le Atua moni ma o loo soifua], e tatau ona tatou tagai atu i le talaaga atoa. O le vaega tele o le faagasologa o lo latou talafaasolopito, o le toatele o tagata Isaraelu (augatama a sa Nifae) na naunau e talia ia atua faatagata e tele a tagata Aikupito ma Kanana. E ui na lei magagana ia le Tusi a Mamona e uiga i tulaga liliuese faapitoa na taofi i ai tagata o le nuu o Seseroma o Amonaea, ae o loo manino lava o nisi o tagata sa nifae na liliuese i le vaitaimi o Alema na ifo i tupua—e pei ona sa i ai nisi o o latou augatama Isaraelu. Ao avea Alema, o le soa talai a Amoleka, ma faamasino sili faapea ma faitaulaga sili a le Ekalesia, na ia fesoasoani e faamautu se vaega malosi ma le faamaoni o tagata lolotu. Ae ui o lea, ‘o i latou o e sa le auai i la latou ekalesia, sa latou auai i le faia o mea faataulaitu, ma le ifo i tupua.’(Alema 1:32.) Na avea ma faafitauli le liliuese ma na mafua ai ona tuua e Alema le nofoa faamasino i se taimi mulimuli ane, ‘ina ia mafai e ia lava ona alu atu i totonu o ona tagata, po o tagata o Nifae, ina ia mafai ona ia talai atu le afioga a le Atua ia te i latou.’(Alema 4:19.)

“I le avea ai ma se faifeautalai, na iloa ai e Alema o le toatele o tagata na matuai loloto lava le ifo i tupua. Na iloaina, mo se faataitaiga, o tagata o le nuu o Sorama, ‘na faapiopio…ala o le Alii, ma e faapea o Sorama, o le sa avea ma o latou taitai, o loo ia taitai atu loto o tagata ia ifo i lalo i tupua le gagana.’Alema 31:1.)

“O le talaaga lenei, i lena vaitaimi, o le talanoaga a Alema ma Amoleka na faia ma Seseroma. O le vaai i ai i lenei tulaga, ua iloa ai o le tali a Amoleka e matuai malamalama lava, ma ioe, e sao: E na o le tasi lava le ‘Atua moni ma o loo soifua’—o le na te le faasoaina atu ni ona tulaga faaleatua ma le tele o atua pepelo na fauina e tagata” (“I Have a Question,”Ensign,Aug. 1985, 11).

Na faamalamalama mai e Elder Jeffrey R. Holland le auala ma le mafuaaga e ese ai le talitonuga a le Au Paia o Aso e Gata Ai i le Aiga Atua mai talitonuga faaKerisiano anamua i le Tolutasi Paia:

“O la tatou uluai mataupu faavae o le faatuatua ma sili ona taua i le Ekalesia a Iesu Keriso o le Au Paia o Aso e Gata Ai o le “Matou te talitonu i le Atua, le Tama Faavavau, ma Lona Alo, o Iesu Keriso, ma le Agaga Paia’ [Mataupu Faavae o le Faatuatua 1:1]. Tatou te talitonu o nei tamaalii paia e toatolu o loo maua ai se Aiga Atua e tasi e aufaatasi i le faamoemoe, i uiga, i le molimau, i le misiona. Tatou te talitonu e faatumulia i Latou i le faaleatua lava e tasi o le alofa mutimutivale ma le alofa, faamasino tonu ma le alofa tunoa, onosai, faamagalo, ma le togiola. Ou te manatu e sao ona faapea atu tatou te talitonu e tasi i Latou i uiga taua ma le faavavau e manatu i ai, sei vagana tatou te le talitonu o i Latou o ni tagata e toatolu o loo tuufaatasia i se mea e tasi, o se manatu o le Tolutasi e le o aoaoina mai lava i totonu o tusitusiga paia aua e le moni. …

“I le tausaga T.A. 325 sa taloina ai e le Kaisa Roma o Konesetatino le Aufono i Nisaea e talanoaina ai—faatasi ai ma nisi o mea—le faatupulaia lea o le mataupu e faapea o le Atua o le ‘tolutasi.’ O mea na aliae mai le vevela o feteenaiga o tagata lotu, tagata atamamai, ma taitai faalelotu lea na lauiloa (ina ua mavae le isi 125 tausaga ma isi fono tetele e tolu) [Konesetatino, T.A. 381; Ephesus, T.A. 431; Chalcedon, T.A.451] o le Faamatalaga Aloaia i Nisaea, ma nisi toe teuteuga e pei o le Faamatalaga Aloaia i Atenaisana. O fatufatuga ma le toefauga o talitonuga faalelotu ua matua femilosa’i ai le manino faigofie o aoaoga faavae moni, ua tautino mai ai o le Tama, o le Alo, ma le Agaga Paia ua na o ni otootoga, e le matea i se iloa, e le ausia e se tagata, e i ai i mea uma, e tutusa le taua, e faavavau faatasi, ma e le iloa e se tasi; e leai ni tino, itutino, po o ni lagona faamama’i; ma e nonofo i le vateatea ma le taimi. I faamatalaga aloaia faapea, o sui uma e toatolu o ni peresona mavaevae, ae o se tagata e toatasi, lea e masani ona taua o le ‘mea lilo o le tolutasi’. O i latou o ni peresona tumaoti e toatolu, ae peitai e le toatolu ni Atua ae toatasi. O peresona uma e toatolu e le mafai ona malamalama i ai, ae peitai e toatasi le Atua e le mafai ona malamalama i ai.

“O le manatu lena e tasi tatou te taufai ioe uma i ai ma le au faitio—e faapea o se manatu faapena mo le paia e moni e le mafai ona malamalama i ai. …

“Tatou te folafola atu o loo faamaonia mai i tusitusiga paia o le Tama, o le Alo ma le Agaga Paia o ni peresona mavaevae, o ni tagata paia e toatolu, ma ia tagai i faataitaiga manino ma le sao e pei o le Tatalo Faapuluvaga maoae a le Faaola lea sa faatoa ta’ua … , o Lona papatisoga i aao o Ioane, o le mea na tupu i le Mauga o Liua, ma le faamaturoina o Setefano—ua na o le fa ua ta’u atu” (“O Le Atua Moni e Toatasi Atoa Ma Le Na Ia Auina Mai o Iesu Keriso,” Ensign po o le Liahona, Nov. 2007, 40–41).

Alema 11:38–39 O faapefea ona avea Iesu Keriso ma Tama Faavavau?

Afai o manaomia e tamaiti le malamalama i le ala e mafai ai ona avea Iesu Keriso ma Alo o le Atua faapea ma le Tama Faavavau, atonu e manaomia lou aoao atu pe toe faamanatu atu ia manatu faaopoopo faafaiaoga mo le Mosaea 15:1–9 i le lesona e 60.