Lesona 69
Alema 1–2
Faatomuaga
I se taimi puupuu lava ina ua uma ona tofia Alema e fai ma faamasino sili, sa faatuina ai e Neoa ia lava e avea ma aoao i tagata. Na ia aoao atu e tetee i le Ekalesia ma ona aoaoga faavae, ma sa ia faatauanauina le toatele ina ia talitonu ia te ia ma avatu tupe ia te ia. Ina ua fasiotia e Neoa Kitiona, o le sa avea ma se tagata faamaoni o le Ekalesia, sa aumai o ia i luma o Alema. O le faamaonia o le solitulafono a Neoa e uiga i faafaitaulaga pepelo ma le taumafaiga e faamalosia faafaitaulaga pepelo e ala i le pelu, sa faasalaina ai e Alema ia Neoa i le oti. Na manuia le Ekalesia, i le taitaiga a faitaulaga filiga ma lotomaualalalo, peitai na faaauau pea ia faafaitaulaga pepelo. O Amiliki, o se tagata faitogafiti e tusa ma le faatulagaga o Neoa, na faapotopotoina le toatele o tagata ia mulimuli atu ia te ia ma taumafai ma le le faamanuiaina e avea ma tupu o sa Nifae. Na tetee o ia ma e na mulimuli ia te ia, ma sa latou o mai e tau ma sa Nifae, ma na tuufaatasia a latou autau ma autau a sa Lamana. Na faamalolosia e le Alii ia sa Nifae, e ui na toatele na pagatia ae na latou manumalo i osofaiga a nei autau.
Fautuaga mo le Aoaoga
Alema 1
E ui i le faateleina o faafaitaulaga pepelo ma sauaga, sa tumau pea le faatuatua o le toatele
Tusi le upu tautaua i luga o le laupapa.
-
O a nisi o tulaga lamatia o le sailia o le tautaua? O a nisi o tulaga lamatia o le mulimuli i tagata ona latou te tautaua?
Faamatala atu o se tagata e igoa ia Neoa na tautaua i nisi o tagata i Saraemila. Valaaulia ia tamaiti aoga e faitau le leoa le Alema 1:2–6, ma vaai po o le a se mea na aoao atu e Neoa ma po o le a se tali mai a tagata. Pe a uma ona lipoti mai e tamaiti aoga mea sa latou maua, mafaufau e fai ni fesili e pei o fesili nei:
-
Aisea e matautia ai ia aoaoga a Neoa i le Alema 1:4? (Afai o loo tauivi tamaiti aoga e tali lenei fesili, faailoa atu o le aoaoga a Neoa e faapea “e maua e tagata uma le ola e faavavau,” e tusa lava po o le a le mea o latou faia. E le amanaia e lenei aoaoga le manaomia o le salamo, sauniga, ma le tausiga o poloaiga a le Atua. Tagai foi i le Alema 15:15.)
-
O a ni taunuuga e oo mai i se tagata e talitonu i lenei aoaoga faavae?
-
Na faapefea ona aafia Neoa i lona tulaga manuia? (Tagai Alema 1:6.)
Otooto atu le Alema 1:7–15 e ala i le faamatalaina faapea i se tasi aso ao alu atu Neoa e talai atu ia i latou o e na mulimuli ia te ia, sa ia feiloai ai ia Kitiona, o le sa fesoasoani i le laveaiina o le nuu o Limae mai le pologa ma na auauna atu i le taimi lea o se aoao i le Ekalesia. Na “amata ona finau malosi [Neoa] ma [Kitiona], ina ia mafai ona ia taitai ese tagata o le ekalesia; peitai sa tutetee malosi atu [Kitiona] ia te ia, ma aoai o ia i le afioga a le Atua” (Alema 1:7). O lea sa oo le ita ia Neoa, ma sa ia seiina lana pelu ma fasioti ia Kitiona. Sa ave e tagata o le Ekalesia Neoa i luma o Alema, o ia o le faamasino sili, ina ia faamasinoina mo ana solitulafono. Na faasala e Alema Neoa i le oti, ma sa “mafatia [Neoa] i se oti maasiasi lava” (Alema 1:15). Atonu e manaomia lou faamalamalama atu faapea o le maasiasi o lona uiga o le faamataga, faamaasiasi, po o le faalumaina.
Valaaulia ia tamaiti aoga e saili i nai laina muamua o le Alema 1:12 le upu lea na faamatala ai e Alema mea na folasia e Neoa i nei tagata mo le uluai taimi. Valaaulia tamaiti aoga e tagai i le vaefaamatalaga 12a. Fai atu ia i latou e sue i le uluai faasino upu o loo lisiina: 2 Nifae 26:29. Fai atu ia i latou e faitau le leoa lenei mau.
-
I au lau upu, o le a le faafaitalauga pepelo? O le a sou manatu o le uiga i tagata o le “faatutu ae i latou lava e fai ma malamalama i le lalolagi”? Aisea e le saogalemu ai lenei mea?
-
Na faapefea ona avea le talaiga a Neoa ma faataitaiga o le faafaitaulaga pepelo?
-
E tusa ai ma manatu o Alema, o le a se mea semanu e tupu i tagata pe ana faamalosia le faafaitaulaga pepelo i o latou luga?
-
Aisea e te manatu ai e faaosoosoina tagata e aoao atu ina ia viia ai i latou e isi?
Valaaulia se tamaitiiti aoga e faitau leotele le Alema 1:16. Fai atu i le vasega e faailoa mai pe na faapefea ma pe aisea foi na faaauau ai pea le sosolo o le faafaitaulaga pepelo, e ui ina ua mavae le oti o Neoa. A uma ona lipotia mai e tamaiti aoga mea na latou maua, fesili atu:
-
E tusa ai ma le Alema 1:16, o a ni faamoemoega o tagata na faatinoina le faafaitaulaga pepelo? (Sa latou faia “mo le faamoemoe o le mauaina o le oa ma le mamalu”—i nisi upu, ina ia maua tupe ma ia lauiloa.)
Faamatala atu o le faafaitaulaga pepelo ma ona aafiaga na avea ma mala i sa Nifae mo le tele o tausaga (tagai Alema 2; 15:15; 24:28). Faailoa atu faapea, e manaomia i lo tatou vaitaimi lo tatou mataala i faafaitaulaga pepelo, e le gata i totonu o le Ekalesia ae faapea foi i fafo atu o le Ekalesia. E le tatau ona tatou faatagaina i tatou lava ina ia faaseseina e tagata o loo faatinoa le faafaitaulaga pepelo. E tatau foi ona tatou puipui e uiga i amioga ma faatinoga o le faafaitaulaga pepelo i a tatou lava taumafaiga e aoao atu le talalelei.
-
O a ni avanoa o e maua e aoao atu ai le talalelei? (Fesoasoani atu i tamaiti aoga ina ia iloa le anoanoai o a latou avanoa e aoao atu ai le talalelei. Latou te aoao le tasi ma le isi ao latou auai i le seminare ma a latou korama ma vasega. E mafai ona latou aoaoina o latou aiga i afiafi faaleaiga. E auauna atu alii talavou o ni faiaoga o aiga. Atonu e talosagaina alii talavou ma tamaitai talavou e lauga i se sauniga faamanatuga. E mafai ona latou faasoa atu le talalelei i isi i le taimi lenei, ma atonu o loo latou sauniuni e auauna atu o ni faifeautalai faamisiona.
Valaaulia se tamaitiiti aoga e faitau le faamatalaga a Elder David A. Bednar o le Korama a Aposetolo e Toasefululua:
“Soo se mea lava e te faia pe ou te faia foi o se faiaoga, ma le iloa ma le faamoemoe e taaina atu ai le vaaiga ia te oe po o a’u lava ia—i savali tatou te tuuina atu, i metotia tatou te faaaoga, po o o tatou uiga faaletagata—o se ituaiga lava lena o faitaulaga pepelo ua faalavefau i le lelei o le aoao atu a le Agaga Paia” (“Saili e Aoao e ala i le Faatuatua,” Liahona, Sete. 2007, 66–67).
Faamamafa atu faapea tatou te tataina maia ma le iloa le vaaiga ia i tatou lava i a tatou taumafaiga e aoao atu le talalelei, o le a tatou faaitiitia le mataalia o aoaoga a le Agaga Paia.
Faitau le lisi lenei o uunaiga atonu e maua e tagata pe a latou aoao atu. Valaaulia ia tamaiti aoga e talatalanoa po o fea o uunaiga e mafai ona avea ma faataitaiga o le faafaitaulaga pepelo ma pe aisea.
Ina ia taialaina isi i le Faaola.
Ina ia faaalia lo latou tulaga malie.
Ina ia fesoasoani i isi ia lagona le Agaga.
Ina ia faaalialia lo latou atamai.
Ina ia fesoasoani i isi e faaaoga upumoni o le talalelei i o latou olaga.
Valaaulia se tamaitiiti aoga e faitau leotele le Alema 1:26–27. Fai atu i le vasega e faailoa mai ni auala na ese ai mea na faatinoina e faitaulaga a le Atua mai ia Neoa.
-
E mafai faapefea ona fesoasoani faataitaiga a faitaulaga a sa Nifae ina ia tatou aloese mai i faafaitaulaga pepelo?
-
Na faapefea ona faaalia e nei faitaulaga lo latou tuuto i le Atua?
Faamalamalama atu faapea o le faafaitaulaga pepelo na taitaiiina atu ai i le fetauaiga ma le sauaina i totonu o sa Nifae. Ina ia fesoasoani i tamaiti aoga e sauni e suesue le Alema 1:19–33, fai atu ia fesili nei:
-
O anafea na e vaai ai i tagata o taufaalilili, ulagia, pe faasaua ia i latou o e tausi ia poloaiga a le Atua?
-
Pe na e lagona ea sa taufaalili, ulagia, pe sauaina oe ona o le tausia o poloaiga? Afai o lea, na faapefea ona e tali atu?
Valaaulia tamaiti aoga e faitau le leoa le Alema 1:19–20, tagai mo ni faataitaiga o tagata o le Ekalesia na sauaina. A uma ona lipotia mai e tamaiti aoga mea sa latou mauaina, tusi ia fesili nei i luga o le laupapa ma valaaulia ia tamaiti aoga e kopi i totonu o a latou api e tusi ai faamatalaga po o api talaaga mo le suesueina o tusitusiga paia. Tuu atu ia i latou se taimi e faitau ai ma le le leoa ia fuaitau o mau ma taliina e i latou lava ia ia fesili.
E tusa ai ma le Alema 1:21–24, na faapefea ona tali mai nisi o tagata o le ekalesia i sauaga? O a ni taunuuga o a latou amioga?
E tusa ai ma le Alema 1:25–31, na faapefea ona ola nisi o tagata o le Ekalesia e ui i sauaga? O a faamanuiaga na latou mauaina?
A lava se taimi e suesue ai e tamaiti aoga nei fuaitau, fesili atu ia i latou po o a ni mea e mafai ona tatou aoao mai nei fuaitau. Atonu e mafai e tamaiti aoga ona faailoa mai nisi po o mataupu faavae uma nei:
E ui i le le usiusitai o tagata o loo siomiaina i tatou, e mafai lava ona tatou tutumau mausali ma le le mafaagaeetia i le tausiga o poloaiga.
Afai tatou te ola i le talalelei, o le a mafai ona tatou maua le filemu i o tatou olaga, e tusa lava pe o sauaina i tatou.
-
O anafea na e iloa ai e moni nei mataupu faavae?
Alema 2
Na tetee Amiliki ma isi ma na iu lava ina aufaatasi ma sa Lamana e tau ma sa Nifae.
Faamatala atu ina ua mavae le fa tausaga talu ona maliu Neoa, sa toe feagai foi sa Nifae ma se isi tagata amioleaga o le sa mauaina le lagolagoina ma le tautaua. Vaevae tamaiti aoga e fai paga. I paga taitasi, fai atu i le tasi tamaitiiti aoga e faitau mai le Alema 2:1–7 ae faitau mai e le isi le Alema 2:8–18. Faatonu tamaiti aoga e saunia ni ulutala mo tusiga o talafou e faatatau i mau na atofaina ia i latou, ma famatala mai mea na faia e tagata amiotonu e tetee atu ai i le amioleaga. A uma le fa po o le lima minute, fai atu i tamaiti aoga e fefaasoaai a latou ulutala ma a latou paga. Atonu e te manao e fai atu i nai tamaiti aoga e faasoa mai a latou ulutala i le vasega.
Fai atu ia fesili nei e faamautinoa ai ua malamalama ia tamaiti aoga i fuaiupu sa latou suesueina:
-
O le a se mea na manao Amiliki e fai?
-
E tusa ai ma le Alema 2:18, aisea na mafai ai e sa Nifae ona taofia ia taumafaiga a Amiliki e avea ma tupu? (“Sa faamalosia e le Alii le lima o sa Nifae.” Atonu e te manao e uunaia ia tamaiti aoga e faailoga le faamatalaga lenei i a latou tusitusiga paia.)
Fai atu i le vasega e lisi mai ni faataitaiga o le amioleaga o loo feagai ma talavou i lenei vaitaimi. Atonu latou te ta’ua ia faaosoosoga, ma atonu foi latou te ta’ua ia tofotofoga o loo feagai ma i latou ona o le amioleaga o isi. Ao faaauau pea ona latou suesue i le Alema 2, valaaulia i latou e mafaufau i ni auala e mafai ai ona latou maua le fesoasoani a le Alii ina ia manumalo ai i tofotofoga ma luitau o loo feagai ma i latou.
Faamatala atu na faatoilaloina e autau a sa Nifae le toatele o sa Amiliki, peitai sa latou ofo i le vaaia o e na totoe o sa Amiliki ua aufaatasi ma le autau a sa Lamana (tagai i le Alema 2:19–25). Ao lei toe foi atu le autau a sa Nifae i le aai o Saraemila, na osofaia i latou e le autau tuufaatasi. Fai atu i tamaiti aoga e saili i le Alema 2:27 mo se fasifuaitau o loo faailoa mai ai le toatele o le autau tuufaatasi a sa Lamana ma sa Amiliki.
Valaaulia ia tamaiti aoga e malolo mo sina taimi ma mafaufau po o le a so latou manatu ma po o a le a foi so latou lagona pe ana faapea sa avea i latou ma se vaega o le autau a sa Nifae. Fai atu i se tamaitiiti aoga e faitau leotele mai le Alema 2:28–31, 36, ma fai atu i le vasega e tagai po o le a le auala na faaiuina ai le taua. A uma ona lipotia mai e tamaiti aoga mea na latou mauaina, atonu e te manao e fautuaina i latou e faailoga ia upu malolosi ma le faamalolosia i totonu o nei fuaiupu.
-
E tusa ai ma le Alema 2:28, aisea na faamalosia ai e le Alii sa Nifae? (E mafai ona faasoa mai e tamaiti aoga le eseese o tali i lenei fesili. Fesoasoani ia i latou ia iloa le mataupu faavae lenei: Afai tatou te valaau atu i le Atua ina ia fesoasoani mai ia i tatou e tu e tetee atu i le amioleaga, o le a Ia faamalosia i tatou.)
-
Aisea tou te manatu ai e taua le mauaina o le malosi mai le Atua e tu e tetee atu ai i le amioleaga nai lo le aveesea atoa o aafiaga amioleaga mai o tatou olaga?
-
E mafai faapefea ona e mulimuli i le faataitaiga a Alema pe afai o e tu e tetee atu i le amioleaga?
Valaaulia ia tamaiti aoga e tusi ni tali i se tasi o fesili nei:
-
Na faapefea ona faamalosia oe e le Alii ao e feagai ai ma le amioleaga?
-
O le a se auala se tasi e mafai ona e tu e tetee atu ai i le amioleaga i le taimi lenei?
A lava loa le taimi e tusitusi ai tamaiti aoga, valaaulia nisi o ilatou e faasoa mai a latou tali. Atonu e te manao e faasoa atu foi au tali. Uunaia ia tamaiti aoga e mulimuli i faataitaiga a sa Nifae—ia tatalo mo le fesoasoani a le Alii ma ia agavaa e faamalolosia e le Atua i a latou taumafaiga. Faaiu e ala i le molimau atu faapea o le a faamalolosia i tatou e le Atua ao tatou tutu e tetee atu i le amioleaga.
Tala ma Faamatalaga o Talaaga
Alema 1:3-4. Lototoa e filifili le mea sao
Na faaaoga e Neoa le faaviivii e faatosina mai ai e na mulimuli ia te ia, ma sa ia faaaogaina ia aoaoga faavae sese e osofaia ai le Ekalesia a le Atua. Na tautaua ana aoaoga aua sa faatagaina le agasala i le igoa o le lotu. Na ia uunaia le amioleaga, i le faapea atu “i le iuga, o le a maua e tagata uma le ola e faavavau,” e ui i a latou amioga (Alema 1:4).
Ua uunaia i tatou e Elder L. Tom Perry o le Korama a Aposetolo e Toasefululua ina ia maua le lototoa e tetee atu ai i Neoa o nei ona po ma a latou savali:
“Sa logolelei i tagata upu a Ne’oa, a o lana mataupu, e ui sa lauiloa i le toatele, a e sa le sa’o. A o feagai i tatou ma filifiliga e tele i le olaga, o savali faigofie ma lauiloa a le lalolagi e masani lava e le o ni savali tonu ia e filifili mai ai, ma e manaomia le lototele e filifili ai le mea tonu” (“Filifili le Mea Tonu,” Liahona, Ian. 1994, 76).
Alema 7:11-18. Faasalaga autu
Ao faitau tamaiti aoga e uiga i le faasalaina e Alema o Neoa i le oti, atonu o le a i ai ni a latou fesili e uiga i le vaaiga a le Ekalesia i le faasalaga autu. E ono fesoasoani ia faamatalaga nei ia te oe i le taliina o a latou fesili.
Ia Noa, na faaalia e le Alii faapea “o se na te faamaligiina le toto o le tagata, e faamaligiina lona lava toto e le tagata” (Kenese 9:6).
I le 1889 na lolomiina ai e le Au Peresitene Sili ma le Korama a Aposetolo e Toasefululua se tautinoga aloaia e uiga i le faasalaga autu:
“Matou te faia ma le agaga maualalo lenei folafolaga, e faapea:
“E vaai le Ekalesia lenei ma le inoino tele i le faamaligi o le toto o tagata. Ua tatou avea le fasiotia o tagata soifua, sei vagana ai ua tusa ai ma le tulafono a le malo, o se solitulafono matuai ogaoga e tatau ona faasalaina i le faamaligiina o le toto o le tagata solitulafono, pe a maea se faamasinoga faalauaitele i luma o se fale faamasino faaletulafono a le atunuu.
“… O e na aafia i le ola ma meatotino [e tatau] ona auina atu ma tuuina i ai tulafono o le laueleele” (“Official Declaration,” Millennial Star, Ian. 20, 1890, 33–34).
Na lolomiina talu ai nei e le Ekalesia se faamatalaga aloaia e uiga i le faasalaga autu: “E faamamaluina e Le Ekalesia a Iesu Keriso o le Au Paia o Aso e Gata Ai le fesili e uiga ma i le a le tulaga e tatau ona faamalosia ai e le malo le faasalaga autu o se mataupu e ao ona fuafuaina e ala na o faatulagaga o tulafono faamaonia. Tatou te le lagolago pe tetee i faasalaga autu” (newsroom.lds.org/official-statement/capital-punishment; iloiloina ia Iulai 23, 2012).
Alema 1:19–20, 25 Onosaia o sauaga
Na saunoa Peresitene Harold B. Lee faapea e tatau ona tatou tutu atu mo le mea sao e ui i sauaga:
“O le sauaina mo le amiotonu ona o se mafuaaga tele ua lamatia ai le upu moni ma le amioatua ma le mamalu, o se tulaga faaleatua ia. O le faatama’iga tele e ono oo mai sauaga, e le mai le sauaga lava ia ae e mai le aafiaga e ono oo i ai e na faasauaina ma atonu o le a faalotovaivaiina ai lo latou naunau mo le amiotonu. O le tele lava o na sauaga e mafua mai i le le lava o le malamalama, aua e ‘augofie tagata e tetee atu i mea latou te le malamalama ai. O se isi vaega e mafua mai i tagata e faamoemoe i mea leaga. Ae po o le a lava le mafuaaga, e foliga mai ua matua faasoloatoa sauaga e faasaga ia i latou o loo punoua’i i se mafuaaga amiotonu. …
“… Afai e te tu mausali mo le mea sao e tusa lava po o a taufaifaiga a tagata pe oo lava i sauaga faaletino, o le a faapaleina oe i le paia o le olioli e faavavau. O ai na iloa pe toe manaomia i o tatou aso nisi o le au paia e oo lava i aposetolo, e pei o aso anamua, e foai atu o latou soifua i le puipuiga o le upu moni? Afai e oo mai lena taimi, ia alofa le Atua ia latou le toilalo lava!”(Decisions for Successful Living [1973], 61–62).
Na aoao mai Elder Russell M. Nelson o le Korama a Aposetolo e Toasefululua faapea e mafai e sauaga ona uunaia i tatou ina ia lototoa sili atu:
“O loo i luma aso faigata. I le lumanai, o le a seasea lava faigofie pe lauiloa le avea ma se tagata faatuatua o le Au Paia o Aso e Gata Ai. O le a tofotofoina i tatou uma taitoatasi. Na lapatai mai le Aposetolo o Paulo e faapea, o aso e gata ai, o i latou o e mulimuli ma le filiga i le Alii “e sauaina i latou.”[2 Timoteo 3:12]. O lena lava sauaga e mafai ona olopala ai oe seia e matua vaivai ai lava, pe faaosofia ai foi oe ia e avea ma faataitaiga lelei ma lototele atili i lou olaga i aso uma” (“Faasaga Atu ma le Faatuatua i le Lumanai,” Ensign po o le Liahona, Me 2011, 34–36).