Lesona 7
1 Nifae 2
Faatomuaga
O le tala o loo i le 1 Nifae 2 ua faaalia ai tali eseese i poloaiga mai le Alii. Sa usitaia e Liae le faatonuga a le Alii e taitai atu lona aiga i le vao. I le feagai ai ma le faigata o lenei faatonuga, sa tetee Lamana ma Lemuelu. I le faatusatusa atu i ai, sa saili Nifae mo se molimau faamautinoa.
Fautuaga mo le Aoaoga
1 Nifae 2:1–7
Ua faatonu e le Atua Liae e malaga ese atu i le vao
Fai atu i tamaiti aoga e mafaufau faapea ua tauina atu e o latou matua ia i latou o o latou aiga e ao ona tuua o latou fale a taeao, ma tuua ai le toeititi lava o a latou meatotino uma. O le a latou savavali atu i le vao, ma aveina atu na o meaai e manaomia e ola ai.
-
Faamata e faapefea ona e tali atu?
-
O le a faapefea ona suia lau tali atu, pe afai ua e iloaina o le faatonuga ina ia siitia atu i le vao na sau mai le Alii?
Valaaulia se tamaitiiti aoga e faitau leotele le 1 Nifae 2:1–6. Fai atu i le vasega e vaavaai mo mafuaaga na taitai atu ai e Liae lona aiga i le vao.
-
O le a le poloaiga na maua e Liae mai le Alii? (Tagai i le 1 Nifae 2:2.)
-
O le a se mea e mafai ona e aoao mai faaiuga a Liae i mea e tatau ona ave ma mea e tatau ona tuu?
Mafaufau e faaaoga le vaega lenei mai i Vitio o le Tusi a Mamona a o e aoao atu le vaega lenei (tagai i le Vitio o le Tusi a Mamona: Faatonuga mo le Faiaoga Seminare).
Fai atu i se tamaitiiti aoga e faitau leotele le 1 Nifae 2:7.
-
Sa ofo atu e Liae le faafetai i le Alii ina ua faatoa tuua lona aiga ma meatotino. O le a se mea e mafai ona tatou aoaoina mai lenei tulaga?
-
O le a le mea sa tatau ona faafetai ai Liae?
Tusi le faamatalaga lenei i luga o le laupapa: Pe a tatou faatuatua ma usiusitai, o le a fesoasoani mai le Alii ia i tatou i taimi o tofotofoga.
-
O anafea na e lagonaina ai ua fesoasoani le Alii ia te oe i taimi o tofotofoga? (Uunai tamaiti aoga e saili le taitaiga a le Agaga i le taliina ai o lenei fesili. Fesoasoani ia i latou ia malamalama faapea e le manaomia ona latou faasoaina atu aafiaga ia e patino ia i latou lava, pe le tatau ona faalauaiteleina.)
1 Nifae 2:8–15
Ua muimui Lamana ma Lemuelu faasaga i lo laua tama
Fai atu i tamaiti aoga e fesili lemu ifo ia i latou lava pe na i ai se taimi na latou muimui ai, ma le leo po o totonu foi o le loto, e uiga i se poloaiga mai le Alii, po o se talosaga mai se matua po o se taitai o le Ekalesia. Tuu atu ia i latou sina taimi e mafaufau ai i o latou aafiaga.
-
Aisea tatou te muimui ai i nisi taimi, pe a tuuina mai ia i tatou faatonuga?
Tusi leVaitafe ma le Vanu i luga o le laupapa. Valaaulia se tamaitiiti aoga e faitau leotele le 1 Nifae 2:8–10.
-
O le a le auala na manao ai Liae ia Lamana ina ia avea faapei o se vaitafe? O le a le auala na ia manao ai ia Lemuelu ina ia avea faapei o se vanu? (Atonu e te manao e fai atu i tamaiti aoga e tusi a latou tali i luga o le laupapa, e sosoo ma le upu Vaitafe ma le Vanu.)
-
O le a le mea na taumafai Liae e aoao atu ia Lamana ma Lemuelu?
Tuu atu i tamaiti aoga e faitau lemu le 1 Nifae 2:11– 14.
-
O a nisi o mafuaaga na muimui ai Lamana ma Lemuelu faasaga i lo laua tama?
-
I le 1 Nifae 2:11, o le upu ua maaa e faatatau i le faamaualuga po o le ua malo. Aisea e avea ai lagona o le faamaualuga ma auala e taitai atu ai tagata e muimui i nisi taimi?
-
Aisea e te manatu ai o le muimui e tupu mai, i nisi taimi, pe a le malamalama tagata i faiga a le Atua?
Mafaufau e faaaoga le vaega lenei mai i Vitio o le Tusi a Mamona a o e aoao atu le vaega lenei (tagai i le Vitio o le Tusi a Mamona: Faatonuga mo Faiaoga Seminare).
Faamalamalama atu faapea o se tasi mafuaaga e manao ai Satani ia i tatou e muimui, o le faapea e taofia ai tatou mai le mulimuli i perofeta soifua, o isi taitai musuia, ma matua. I le avea ai o se vaega o la outou talanoaga, atonu e te manao e faasoa atu le mea lenei, e tusa ai ma se faamatalaga mai ia Elder H. Ross Workman o le Fitugafulu:
“O le muimui e tolu ona laasaga, e tofu fesootai atu i le isi, i se ala faaifoifo i lalo, i le le usiusitai.” Muamua, e amata e tagata ona tuufesili. Latou te fesili “muamua i o latou lava mafaufau,” ona latou totoina lea o fesili “i mafaufau o isi.” Lona Lua, o i latou o e muimui e amata ona faia “fetuunaiga ma ni ‘alofaga mai le le faia o le mea [na] faatonuina ai i latou. … O lea na latou [faia] ai se ‘alofaga mo lo latou le usiusitai.” O a latou ‘alofaga e taitai atu ai i le laasaga lona tolu: “O le paie e mulimuli i le poloaiga a le Matai …
“Ou te talo atu ina ia outou tulimatai atu i le poloaiga mai perofeta soifua o loo sili ona avea ma faalavelave ia te oe. Pe e te tuufesili ea pe o faatatau ia te oe le poloaiga? Pe o e faia ea ni ‘alofaga faigofie o le mafuaaga e le mafai ai ona e tausia le poloaiga? Pe e te ita ma le fiafia ia i latou o e o loo faamanatu atu ia te oe le poloaiga? Pe e te paie ea i le tausiga o lea tulafono? Ia faaeteete i le taufaasese o le tiapolo. (i le Conference Report, Oke. 2001, 104–6; po o le Liahona, Nov. 2001, 85–86). (“Ia Faaeteete i le Muimui,” Liahona, Ian. 2002, 98–100).
Valaaulia tamaiti aoga e tali le fesili lenei i totonu o a latou api talaaga mo le suesueina o tusitusiga paia, po o api e tusi ai faamatalaga i le vasega:
-
O le a se mea e mafai ona e faia pe a e iloa ua e muimui e uiga i perofeta ma poloaiga a le Alii?
1 Nifae 2:16–19
Ua sailia e Nifae le malamalama mai le Alii
Ia fai atu i tamaiti aoga e faitau lemu ma mafaufau loloto i le 1 Nifae 2:16, 19.
-
Na faapefea ona tali atu Nifae i le savali a lona tama?
-
O anafea na e valaau atu ai i le Atua ma lagonaina ua faamaluluina lou loto?
Tuu atu i tamaiti aoga le avanoa e faamatala ai taimi na faamaluluina ai o latou loto e le Alii (ae faamanatu atu i ai e le tatau ona faapea e tatau lava ona faasoa mai aafiaga e patino tau le tagata lava ia, po o mea e le tatau ona faalauaiteleina). E le gata i lea, atonu e te manao e faamatala atu se taimi na faamaluluina ai e le Alii lou loto. Faamautinoa atu i ai pe a tatou valaau atu i le Atua, e mafai ona Ia faamaluluina o tatou loto ina ia talitonu i Ana afioga.
Faitau leotele le 1 Nifae 2:19. Fai atu i tamaiti e faamalamalama i a latou lava upu le uiga o le “filiga” ma le “maualalo o le loto.” Uunai e saili atu i le Alii e pei ona sa faia e Nifae.
Valaaulia se tamaitiiti aoga e faitau leotele le 1 Nifae 2:17–18.
-
O a mataupu faavae e mafai ona tatou aoao mai tali eseese a Nifae, Sama, Lamana, ma Lemuelu?
-
O anafea na faamalosia ai lou faatuatua e upu a se sui o le aiga po o se uo, e pei ona sa faamalosia e upu a Nifae le faatuatua o Sama?
1 Nifae 2:20–24
O i latou o e tausia poloaiga o le a faamanuiaina
Tuu atu i tamaiti aoga e faitau le 1 Nifae 2:20–21 Valaaulia i latou e faailoga pe maka le folafolaga faapea “ma o le tulaga e te tausia ai au poloaiga, o le a e manuia.” Faamalamalama atu a o latou suesueina le Tusi a Mamona, o le a latou faitau e uiga i le tele o faataitaiga o le faataunuuina o lenei folafolaga.
Mafaufau e faasoa atu le saunoaga lenei a Elder Bruce R. McConkie o le Korama a Aposetolo e Toasefululua:
“O le usiusitai, o le uluai tulafono lea o le lagi. O le alualu i luma atoatoa, o le atoatoaga uma, o le olataga uma, o le uiga faale-Atua uma, o mea uma ua sa’o ma tonu ma moni, o mea lelei uma e oo mai ia i latou o e tausia tulafono a Ia o le e Faavavau. E leai se isi mea i le faavavau atoa e sili atu lona taua nai lo le tausia o poloaiga a le Atua” (The Promised Messiah: The First Coming of Christ [1978], 126).
Faasoa atu lau molimau faapea e faamanuia e le Atua i latou o e usiusitai ma faamaoni. Faapei o Nifae, e mafai e tamaiti aoga ona atiae le talitonuga i le mauaina o le taitaiga mai le Alii. Uunai latou e tauivi ina ia sili atu ona usiusitai ma mulimuli i le taitaiga latou te mauaina mai le Agaga Paia.
Tala ma Faamatalaga o Talaaga
1 Nifae 2:2-6. Auala atonu na uia e le aiga o Liae
Atonu na taitai atu e Liae lona aiga i le Sami Ulaula i tafatafa ane o le Fagaloa o Akapa, pe tusa o le 180 maila (290 kilomita) mai Ierusalema. O lenei mea atonu na manaomia ai le malaga i luga o se laueleele vevela ma toafa, lea na lauiloa mo au faomea o e faatalitali e gaoi mai tagata malaga le saunia. Ina ua mavae ona taunuu i le Sami Ulaula, sa faaauau ona faimalaga le aiga mo isi aso e tolu, a o le i tolauapi i se vanu o se vaitafe. O le malaga mai Ierusalema i le vanu o se vaitafe atonu na alu ai le tusa o le 14 aso. Atonu e te manao e faamanatu atu i tamaiti aoga e uiga i lenei mamao ma taimi, pe a latou faitau e uiga ia Nifae ma ona uso i le toe malaga ai i Ierusalema.
Mafaufau e faaaoga le vaega lenei mai i Vitio o le Tusi a Mamona a o e aoao atu le vaega lenei (tagai i le Vitio o le Tusi a Mamona: Faatonuga mo le Faiaoga Seminare).
1 Nifae 2:7. Faaali atu o le loto faafetai i le Alii
O le agaga faafetai o Liae mo le taitaiga ma le puipuiga a le Alii ua faaalia i le 1 Nifae 2:7: “Ma sa oo ina faia e ia se fatafaitaulaga i maa, ma osi ai se taulaga i le Alii, ma avatu le faafetai i le Alii lo matou Atua.” O le uluai faataitaiga lenei o faataitaiga eseese i le Tusi a Mamona, na osia ai e soo faatuatua o Keriso taulaga ma taulaga mu e faaalia ai le faafetai i le Atua (tagai i le, mo se faataitaiga, 1 Nifae 7:22; Mosaea 2:3–4). O faaaliga faamaoni o le loto faafetai ma le usiusitai i le Tama Faalelagi, e tatau mo Ana fanau uma, pe afai latou te mananao e faafiafia ia te Ia (tagai i le MF&F 59:21).