Lesona mo Suesuega e Faia i le Aiga
Alema 33–38 (Iunite 19)
Sauniuniga o Anomea mo le Faiaoga o Suesuega e Faia i le Aiga
Aotelega o Lesona o Suesuega e Faia i le Aiga i Aso Taitasi
E le o faamoemoe le aotelega lenei o aoaoga faavae ma mataupu faavae lea na aoao e tamaiti aoga a o latou suesue i le Alema 33–38 (iunite 19) ina ia aoao atu o se vaega o lau lesona. O le lesona e te aoao atua ua na o ni nai vaega o aoaoga faavae ma mataupu faavae nei e taulai atu i ai. Mulimuli i uunaiga a le Agaga Paia a o e mafaufau i manaoga a au tamaiti aoga.
Aso 1 (Alema 33–35)
Na aoao atu e Alema sa Sorama e mafai ona tatou tapuai e le aunoa i le Atua e ala i le tatalo. Ua tatou mauaina le alofa mutimutivale o le Tama Faalelagi, e aofia ai le faamagaloga o a tatou agasala, ona o le Togiola a Iesu Keriso. Na aoao atu e Alema sa Sorama o le Togiola le iu ma le faavavau a Iesu Keriso ua maua ai e tagata uma le olataga. Ia mautinoa o malamalama ia tamaiti ina ia mafai ona mauaina atoa faamanuiaga o le Togiola, e ao ona tatou faaaogaina le faatuatua e salamo ai.
Aso 2 (Alema 36)
Mai le tala a Alema i lona liua, o le a iloa ai e tamaiti o le agasala e mafai ona taitai atu ai i le tiga tele ma le faanoanoa. I se faaopoopoga, latou te aoaoina afai latou te faaaogaina le faatuatua i le Togiola a Iesu Keriso, o le a Ia laveaiina i tatou mai le tiga o a tatou agasala ma o le a faatumulia i tatou i le fiafia. Faapei o Alema, e mafai ona tatou mauaina le fiafia sili ao tatou saili e aumai isi ia Keriso.
Aso 3 (Alema 37)
Na tuuina atu e Alema i lona atalii o Helamana se tiute o le tausiga ma le faasaoina o talafaamaumau paia. E ala i le suesueina o upu a Alema, o le a iloa ai e tamaiti o le aumaia o Ona faamoemoega e faavavau, e galue le Alii e ala atu i mea laiti ma faatauvaa. Na latou aoao foi afai tatou te usiusitai i poloaiga a le Alii, o le a tatou manuia. Na aoao e Alema lona atalii e faapea e tatau ona tatou aoao e tausi poloaiga a le Atua i lo tatou talavou ma afai tatou te usiusitai i afioga a Iesu Keriso, o le a latou taitaiina i tatou ina ia maua le ola e faavavau.
Aso 4 (Alema 38)
A o suesue tamaiti i le fautuaga a Alema ia Sepulona, sa latou aoao ai e faapea afai latou te amata i lo latou talavou ina ia tutumau mausali ma le faamaoni i le tausiga o poloaiga, o le a aumaia le olioli sili i o latou matua. Na molimau atu Alema i ona atalii o le a laveaiina e le Atua tagata taitoatasi mai faigata, faafitauli, ma mafatiaga pe a latou tauaveina mea uma ma le onosai ma faalagolago atu ia te Ia. Na molimau atu foi Alema faapea o le mauaina o le faamagaloga o a tatou agasala ma le filemu i o tatou agaga, e tatau ona tatou tagi atu i le Alii mo le alofa mutimutivale. Ma le mea mulimuli, o le a aoaoina e tamaiti o le atinaeina o uiga amiotonu o le a saunia ai i tatou e aoao atu ma auauna atu i isi.
Faatomuaga
Na aoao atu e Amoleka sa Sorama o le Togiola e “le gata ma faavavau” (Alema 34:10). Na aoaoina e tamaiti lenei upu moni i a latou suesuega faalevaiaso, ma o lenei lesona o le a tuuina atu ai ia i latou se avanoa sili atu ina ia malamalama ai ma faatauaina le Togiola a Iesu Keriso.
Fautuaga mo le Aoaoga
Alema 33–35
Na aoaoina e Alema ma Amoleka sa Sorama e uiga i le Togiola a Iesu Keriso
Fesili: Aisea ua na o Iesu Keriso lava e mafai ona togiola mo agasala a le lalolagi?
Toe faamanatu atu i tamaiti, o se vaega o a latou galuega fai faalevaiaso, ia latou faitauina le Alema 34:10–14 ma faailoga ia fasifuaitau lea o loo aofia ai ia upu le gata ma le faavavau. Fai i se tamaitiiti e faitau leotele mai ia fuaiupu nei, ona fai atu lea i tamaiti e faasoa mai ia fasifuaitau ia sa latou mauaina.
Valaaulia se tamaitiiti aoga e faitau mai le faamatalaga lenei mai ia Elder Russell M. Nelson o le Korama a Aposetolo e Toasefululua ina ia fesoasoani ia i latou ia malamalama i le auala e le gata ai ma faavavau le Togiola a Iesu Keriso:
“O Lana Togiola e le faatuaoia—e leai sona uiga. E le faatuaoia foi ina ia mafai ona faaolaina tagata ola uma mai le oti e le uma. E le faatuaoia pe a fuafua i Lona puapuagatia tele. … E le faatuaoia i se tulaga—na faia i le taimi e tasi mo tagata uma. Ma sa faalautele atu le alofa mutimutivale o le togiola e le gata i tagata e le mafaitaulia, ae faapena foi i lalolagi e le mafaitaulia na foafoaina e Ia. E le faatuaoia i le tulaga e le oo i ai se fua faatatau po o se malamalama o le tagata soifua.
“E na o Iesu lava e mafai ona ofoina atu lea ituaiga togiola le faatuaoia talu ona soifua mai o Ia i se tina faitino, ma se Tama e tino ola pea. Talu ai lena tofi tulaga ese, o Iesu o se Tagata e le faatuaoia” (“O Le Togiola,” Liahona, Ian. 1997, 39 40).
Fesili: O faapefea ona fesoasoani ia i tatou ia aoaoga a Amoleka faapea foi ma faamatalaga a Elder Nelson ina ia tatou malamalama ai i le mafuaaga ua na o Iesu Keriso lava e mafai ona togiola mo agasala a le lalolagi?
Tuu atu i tamaiti aoga e aotele mea na latou aoaoina mai le Alema 34 e uiga i le Togiola a Iesu Keriso. Faamatala atu o se mataupu faavae taua e mafai ona tatou aoao mai lenei vaega e faapea o le Togiola e le gata ma le faavavau a Iesu Keriso ua maua ai e tagata uma le olataga.
Tusi le fasifuaitau lenei i luga o le laupapa po o luga foi o se fasi pepa: Vaai faalemafaufau atu i le olaga e aunoa …
Tuu i luga se mea faitino e taua i le toatele o tagata talavou (e pei o se telefoni feaveai). Fesili: O le a se tulaga semanu e i ai le olaga pe ana leai lenei mea?
Ma le isi, tuu i luga se fagu po o se ipu vai (po o se isi mea ese e taua i le tausiga o le ola). Fesili: O le a se tulaga semanu e i ai le olaga pe ana leai se vai?
A uma ona tali mai tamaiti i nei fesili, faatumu le faamatalaga o i le laupapa: Vaai faalemafaufau i le olaga pe ana leai le Togiola a Iesu Keriso.
Fai atu fesili nei:
-
O le a sou mafaufau i le vaaiga a tagata i le olaga pe afai latou te le iloa ia Iesu Keriso pe latou te le talitonu foi e i ai se Atua.
-
O le a sou mafaufau o le eseesega o le olaga mo oe pe ana leai le Togiola a Iesu Keriso? (Tuu atu i tamaiti se taimi e mafaufau ai i lenei fesili ao lei talosaga atu mo ni tali.)
Faamatala atu na aoao atu e Amoleka sa Sorama e manaomia lo latou salamo ina ia mafai ai ona maua faamanuiaga o le Togiola i o latou olaga (tagai i le Alema 34:15–17). Fesili atu i tamaiti pe sa i ai se taimi sa latou faatuai ai ona salamo ona sa latou fefefe e tautau atu a latou agasala pe fefefe ona sa lei lava lo latou malolosi e suia ai. Ona fesili atu lea: Aisea e matautia ai le faatuai ona salamo?
Valaaulia tamaiti aoga e feauauai i le faitau leotele mai o le Alema 34:30–35, tagai mo le mea na aoao atu e Amoleka e uiga i le mafuaaga e le tatau ai ona faatuai ona tatou salamo. Talatalanoa i mau nei e ala i le faia o fesili nei:
-
Tagai i le Alema 34:32. Aisea e tatau ai ona tatou salamo i lenei vaitaimi? (Ao tali mai tamaiti, fesoasoani ia i latou ina ia malamalama i lenei mataupu faavae:) O le olaga lenei o le taimi lea mo i tatou e saunia ai e feiloai ma le Atua.)
-
Tagai i le Alema 34:33. O le a le faamoemoega o lenei olaga? O le a se mea e tupu ia i latou o e faatuai ona salamo?
-
Tagai i le Alema 34:31. O le a se folafolaga ua tuuina atu ia i latou o e ua salamo i le taimi lenei?
Faitau le saunoga lenei a Peresitene Boyd K. Packer, Peresitene o le Korama a Aposetolo e Toasefululua:
“E te le tau manaomia ona iloa mea uma a o lei aoga le mana o le Togiola mo oe. Ia faatuatua ia Keriso ona amata ai lea ona galue ia te oe i le aso lava e te ole atu ai!” (“Fufulu Faamama,” Liahona, Iulai 1997, 10).
Fesili: O le a se mea o aoao atu ia te oe e lenei saunoaga mai ia Peresitene Packer? Aisea e aoga ai ia te oe?
Alema 36
Ua fautuaina e Alema lona atalii o Helamana
Na aoaoina e au tamaiti aoga le fautuaga a Alema i lona atalii o Helamana, o loo faamaumauina i le Alema 36, ma aoao ai e uiga i le fiafia na lagonaina e Alema ao ia salamo ma le faamaoni i ana agasala. Na talosagaina ia tamaiti e faitau le Alema 36:19–22 ona tusi lea i totonu o a latou api talaaga mo le suesueina o tusitusiga paia po o le a se mea o loo aoao mai e nei mau ia i latou e uiga i le mana o le Togiola (aso 2, galuega fai 3). Valaaulia ni nai tamaiti e faasoa mai mea sa latou tusiaina. Faaiu i le tuuina atu o lau lava molimau e uiga i le Togiola a Iesu Keriso ma le fiafia e oo mai i le salamo.
Le Isi Iunite (Alema 39–44)
Fai i tamaiti e mafaufau e uiga i se auala e ono faasao ai e se matua popole ma le alofa se atalii po o se afafine o le ua faia ni solitulafono faalefeusuaiga. Na feagai Alema ma lenei tulaga ma sa aoao atu ni upu moni taua i lona atalii o Korianetona, o le sa faia le agasala ao auauna atu i se misiona.