Lesona 70
Alema 3–4
Faatomuaga
Ina ua uma ona tuufaatasia ma le autau a sa Lamana, na faailoga ese e sa Amiliki i latou lava mai sa Nifae i le faailogaina o o latou muaulu i le lanu mumu. Na tau sa Amiliki ma sa Lamana e faasagatau ia sa Nifae, ma e “afe ma afe ma sefulu o afe” na maliliu i le taua (tagai i le Alema 3:26). Ina ua mavae lenei taua, o le toatele o sa Nifae na faamaualalaloina i latou lava ma “na fagua ai i latou i le manatuaina o lo latou tiute” (Alema 4:3). Pe a ma le 3,500 na papatisoina ma auai i le Ekalesia. Ae peitai, i le tausaga na sosoo ai, o le toatele o tagata o le Ekalesia na amata ona faamaualuluga ma amata ona faasaua i isi. O le popole e uiga i lenei amioleaga, na faamalolo ai e Alema o ia mai ona tiute o se faamasino sili ae faaauau lana auaunaga o se faitaulaga sili mo le Ekalesia. I lenei matafaioi, na ia fuafua ai e faimalaga faataamilo i le nuu, tuuina atu se molimau mama aiai ma valaauina tagata ina ia salamo.
Fautuaga mo le Aoaoga
Alema 3:1–19
Na fetauai sa Nifae ma sa Amiliki ma sa Lamana
Vaevae le vasega i ni vaega toalaiti. Tuu atu i vaega taitasi se fasi pepa o loo tusia ai upu nei: ofu, sitaili o ulu, tautaliga, ula ma taulima, pe’a. Fai atu i vaega e talanoaina po o a ni savali e ono auina atu e tagata, a le o le leai o se faamoemoe po o le i ai foi o se faamoemoe, e faaaoga ai nei mea.
Faamanatu atu i tamaiti aoga na vavaeeseina mai e sa Amiliki i latou mai sa Nifae ma auai atu faatasi ma le autau a sa Lamana (tagai i le Alema 2). Valaaulia tamaiti aoga e faitau le Alema 3:4 ma faailoa mai pe na faapefea ona suia e sa Amiliki o latou foliga.
-
O ai na mananao sa Amiliki ia “faailoga ese mai ai”?
-
Faamata o faapefea ona faailoga ese e nisi o tagata i nei vaitaimi i latou lava mai le amiotonu e ala i o latou foliga vaaia i fafo? (Ao tali mai tamaiti aoga, ia mautinoa ua faamanino atu faapea o nisi o tagata latou te suia o latou foliga e aunoa ma se uiga ina ia aveesea mai ai i latou lava mai e amiotonu pe tetee atu ai foi i tulaga faatonuina o le Ekalesia. O isi latou te mulimuli i sitaili o le lalolagi e aunoa ma le iloaina o loo latou auina atu ni savali e faatatau ia i latou lava.)
Faamalamalama atu faapea ina ua faailogaina e sa Amiliki o latou muaulu e faailoga ese ai i latou lava mai sa Nifae, ua latou faailoa atu lo latou aumaia i o latou lava luga o le fetuu a sa Lamana. Valaaulia ni nai tamaiti aoga e feauauai i le faitauina leotele mai o le Alema 3:14–19. Fesoasoani atu i le vasega e vailiili fuaiupu nei e ala i le tuuina atu o nisi o fesili po o fesili uma nei:
-
O le a le fuaiupu i le Alema 3:18 o loo faamatalaina ai ia amioga ma uiga o sa Amiliki agai i le Atua? (“Fouvale aliali e faasaga i le Atua.”)
-
Na faapefea ona aumai e sa Amiliki le fetuu “i o latou lava luga”? (Alema 3:19).
-
O a nisi upumoni e mafai ona tatou aoaoina mai nei mau? (O tali e ono aofia ai faapea o i latou o e fouvale aliali i le Atua e oo mai ai taunuuga le lelei i o latou lava luga ma afai tatou te o ese mai le Atua, ona ua tatou aveesea i tatou lava mai ia te Ia.)
Ina ia fesoasoani i tamaiti aoga ia malamalama i le taua o le faailoga ese o i latou lava i se auala amiotonu, fai atu fesili nei:
-
O a nisi o auala e mafai na tatou faailoa atu ai e ala i o tatou ofu ma foliga vaaia o i tatou o soo o Iesu Keriso? (Afai e tauivi ia tamaiti aoga i le taliina o lenei fesili, e mafai ona e fai atu ia i latou e faitau mai le faamatalaga “Ofu ma Foliga Vaaia” i le Mo le Malosi o le Autalavou [2011], itulau 6–8. Faamamafa atu faapea o a tatou molimau i totonu e uiga i le talalelei e tatau ona aafia ai o tatou ofu ma foliga vaaia.)
Uunaia ia tamaiti aoga e faailoa mai faapea latou te mulimuli i le Alii pe a latou faia ia filifiliga i aso taitasi, e aofia ai filifiliga e uiga i o latou ofu ma foliga vaaia. Faamamafa atu faapea o o tatou ofu ma foliga vaaia e mafai ai ona faailogaina ese i tatou lava e avea ai o ni soo o Iesu Keriso.
Alema 3:20–27
E faitau afe na fasiotia i se taua i le va o sa Nifae ma sa Lamana ma sa Amiliki
Fai se aotelega o le Alema 3:20–25 i le fai atu sa tutuli ese e sa Nifae ia sa Lamana, ae peitai na mafatia itu uma e lua i le faitau afe o e na manunua ma maliliu. Valaaulia se tamaitiiti aoga e faitau leotele le Alema 3:26–27. Fai atu i le vasega e faalogo i se lesona na manao Mamona ina ia tatou malamalama i ai.
-
E tusa ai ma nei fuaiupu, o le a se taui o le a oo mai ia i latou o e usiusitai i le Alii?
-
O le a se taunuuga o le a oo mai ia i latou o e le mulimuli i le Alii?
I le avea ai ma se aotelega, atonu e te manao e tusi le mataupu faavae lenei i luga o le laupapa: Tatou te maua le fiafia po o le faanoanoa e fuafua lea po o ai tatou te filifili e usiusitai i ai.
Valaaulia ia tamaiti aoga e mafaufau e uiga i ni faamanuiaga lea na oo mai e ala i le filifili e mulimuli i le Alii.
-
O a ni faamanuiaga na e mauaina mai le Alii a o e filifili e mulimuli ia te Ia?
Alema 4:1–14
Ina ua mavae se vaitau o le tuputupu ae o le Ekalesia, na amata ona faamaualuluga ia tagata o le Ekalesia ma amata ona femisaai le tasi ma le isi.
Tusi le upu faalotomaualalo ma le faamaualuga i luga o le laupapa.
-
O le a le uiga o le faalotomaualalo? (O le faalotomaualalo o le mafai lea ona aoaoina ma ia iloa ma le agaga faafetai lo tatou faalagolago atu i le Alii —ia malamalama tatou te manaomia i taimi uma Lana fesoasoani.)
Valaaulia ni nai tamaiti aoga e feauauai i le faitauina leotele mai o le Alema 4:1–5. Fai atu i le vasega e sue ni faamaoniga faapea na amata ona faalotomaualalalo ia sa Nifae. Ao faamatala mai e tamaiti aoga mea na latou mauaina, atonu o le a fesoasoani le faasino atu faapea e le manaomia ona tatou onosaia o se faafitauli e faalotomaualalo ai —e mafai ona tatou filifili ina ia lotomaualalo.
Faailoa atu o le faamatalaga o sa Nifae i le Alema 4:6 e matuai ese lava mai le faamatalaga o i le Alema 4:3–5. Faasino i le upu faamaualuluga i luga o le laupapa.
-
O le a le uiga o le faamaualuga? (O le faamaualuga o le faafeagai lea o le faamaualalo. O tagata e faamaualuluga latou te tuu faafeagai i latou lava ma isi faapea ma le Atua. Latou te tuuina i latou lava i luga atu o isi o loo siomiaina i latou ma mulimuli i o latou lava tuinanauga nai lo le finagalo o le Atua.)
Valaaulia le afa o le vasega e faitau le leoa le Alema 4:6–8 ma le isi afa e faitau le leoa le Alema 4:9–12. Fai atu i vaega uma e lua e faailoa mai ia uiga faamaualuluga o nisi o sa Nifae ma le auala na aafia ai isi ona o na uiga. Afai ae lava se taimi, tuu atu i vaega uma e lua e tau mai ni mea na latou mauaina.
-
O le a se mea o loo aoao mai e nei mau e uiga i le auala o loo uunaia ai e le faamaualuga le ala tatou te taulimaina ai isi?
-
O le a se lapataiga o e vaaia i le Alema 4:10? (Ia mautinoa o loo malamalama ia tamaiti aoga faapea afai tatou te setiina se faataitaiga lē amiotonu, o le a mafai e a tatou amioga ona faatuai le taliaina e isi o le talalelei.)
Valaaulia se tamaitiiti aoga e faitau leotele le Alema 4:13–14. Fai atu i le vasega e vaai mo ni faataitaiga o le auala na faamaualalalo ai nisi o sa Nifae e ui lava na faamaualuluga isi.
-
O le a se mea o loo aoao mai e nei mau e uiga i le auala o loo uunaia ai e le faamaualalo le ala tatou te taulimaina ai isi?
Faamamafa atu faapea o la tatou filifiliga ina ia lotomaualalo pe faamaualuga o le a aafia ai i tatou faapea ma isi. Afai e lava le taimi, valaaulia ia tamaiti aoga e tusi i totonu o api e tusia ai faamatalaga po o api talaaga mo le suesueina o tusitusiga paia e iuga i aafiaga na latou mauaina lea na faailoaina ai le moni o lenei faamatalaga.
Alema 4:15–20
Ua faamavae Alema i le avea ma faamasino sili ina ia mafai ona tuuto atu lona taimi i le valaauina o tagata ia salamo.
Valaaulia tamaiti aoga e mafaufau faapea o loo latou i ai i le tulaga o Alema. Ua avea i latou ma faamasino sili, ma o le toatele o tagata ua amata ona faamaualuluga ma o loo faasaua ia i latou o loo tumau i le lotomaualalo.
-
O le a se mea e te ono faia e fesoasoani ai i tagata ina ia suia?
Valaaulia se tamaitiiti aoga e faitau leotele le Alema 4:15–19. Fai atu i le vasega e vaai po o le a le mea na filifili Alema e fai.
-
O le a se mea na filifili Alema e fai? (Na ia filifili e tuuese atu lona tofiga o se faamasino sili ina ia mafai ona tuuto atu lona taimi i le aoaoina o tagata.)
-
O le a le mea o fautua mai i le fuaitau “e ala atu i le molimau manino” (Alema 4:19) e uiga i le auala na aoao atu ai Alema?
-
O anafea na e faalogo ai i tagata o tuu atu se “molimau manino”? Na faapefea ona uunaia oe e nei aafiaga?
-
O a ni upumoni e mafai ona tatou aoaoina mai le faataitaiga a Alema i le Alema 4:19?
O tali a tamaiti aoga e ono aofia ai mea nei:
O le faataunuuina o tatou tiute faaleagaga e manaomia ai le ositaulaga.
O le tuuina atu o se molimau manino o le a fesoasoani i isi ina ia latalata atili ai i le Atua.
Uunaia tamaiti aoga e vaai mo le molimau manino a Alema ao latou faitauina le Alema 5–16 i a latou lava suesuega ma ao latou talatalanoa i nei mataupu i lesona a sau. Uunaia foi i latou e gauai atu i le aafiaga o le molimau a Alema i luga o tagata.
Iloiloga o le Mau Tauloto
Folasia atu i tamaiti aoga ni nai fuaitau fou o mau tauloto, pe toe iloilo ni nai fuaitau ua uma ona latou iloaina. Sauni ni fesili o le a fesoasoani ia i latou ina ia iloa ia mataupu faavae o loo i fuaitau. Valaaulia i latou e tusi se sini i totonu o api e tusia ai faamatalaga po o api talaaga mo le suesueina o tusitusiga paia e uiga i le mea o le a latou faia ina ia ola lelei atili ai i se tasi o nei mataupu faavae. Tuu atu ia i latou se taimi faatulagaina faapitoa e faamaea ai a latou sini, ma fai atu ia i latou e sauni e lipoti atu i se tagata o le vasega po o le vasega atoa pe a uma ona latou faamaeaina.
Manatua: Afai e le lava sou taimi e faaaoga ai lenei gaoioiga e avea o se vaega o lenei lesona, faaaoga i se isi aso. Mo isi gaoioiga faaleiloiloga, tagai i le faaopoopoga i le faaiuga o le tusi lesona lenei.
Tala ma Faamatalaga o Talaaga
Alema 3:4. Pe’a ma le tatuiina o le tino
Na faailogaina e sa Amiliki i latou lava ina ia “faailoga ese …mai sa Nifae” (Alema 3:4). I o tatou vaitaimi, ua lapataia e perofeta alii ma tamaitai talavou ina ia tausia ma le paia o latou tino i le le faailogaina o i latou lava i pe’a po o le tatuiina o le tino. Ua saunoa mai Peresitene Gordon B. Hinckley:
“Ou te le malamalama aisea i soo se alii talavou poo se tamaitai talavou, mo le na mataupu—na momoo e agai atu i se faagasologa tiga o le makaina o le pau i lanu eseese e fai ma sui o tagata,manu ma faailoga e tele i pea, o le taina e tumau, sei vagana ua iai se isi mea tiga ma taugata e faaogaina e aveesea ai. Tama,tau i ou atalii e aua le taina ni pea i o latou tino. Atonu latou te le fia faalogo i lau tala i le taimi nei, ae sau le taimi o le a latou faafetai ai ia te oe. O le pea o se ata tusi i le malumalu o le tino. Faapena i le faapupuina o le tino mo ni mama se tele i taliga, totonu o le isu, e oo foi i le laulaufaiva.
“Mata e mafai ona latou manatu ua matagofie lenei mea?… O le Au Peresetene Sili ma le Korama e toa Sefululua ua faamaonia mai tatou te le faatagaina le taina o ni pea ma e faapena foi le faapupuina o le tino e ese mai nai lo faamoemoega faafomai. Tatou te le, peitai, avea i soo se tulaga ‘i le faaititia o le tatuiina o taliga e tina mo le nao le tasi pea tautaliga’—tasi le pea” (“Great Shall Be the Peace of Thy Children,” Ensign,Nov. 2000, 52).
Alema 3:5. O le mulimuli i sitaili
Na suia e sa Amiliki o latou foliga ina ia foliga atili e faapei o sa Lamana. O le toatele o le Au Paia o Aso e Gata Ai i lenei vaitaimi ua lagona le uunaia malosi e mulimuli i sitaili ina ia foliga atili faapei ai o tagata o loo tautaua i le lalolagi. Ae peitai o nisi o sitaili ua taitaiina atu ai tagata i le “le usiusitai i le perofeta ma, nai lo lena, ua mulimuli i sitaili a le lalolagi” (“Questions and Answers,” New Era, Mat. 2006, 14; tagai foi i le Mo Le Malosi o le Autalavou [2011], 6–8).
Na aoaoina e Elder M. Russell Ballard ia alii talavou o e umia le perisitua faapea o nisi o sitaili e faaitiitia ai lo latou agavaa e tu atu mo le upumoni:
“O loo i ai se lala o se faalapotopotoga latou te faafiafiaina a latou keni ma a latou amioga faasolitulafono i musika, o ituaiga o lavalava, gagana, uiga faaalia, ma amioga. E toatele outou ua matauina uo faatosina, ua latou faia sitaili o se ‘tifiga’ ma faapea e ‘manaia,’ ae iu ina tosina atu ai i le lala o lea faalapotopotoga ona ua uiga faatasi ma vaega fai keni. …
“… Ou te le talitonu, e mafai e oe ma a’u ona tutu atu mo le upumoni ma le amiotonu, a o ofuina se isi mea e le tatau ai i se tasi e umia le perisitua a le Atua” (“Tutu Atu Mo Le Upumoni ma le Amiotonu,” Liahona, Ian. 1998, 43–44).
Alema 3:6–17. O le faailoga ma le fetuu
Ao suesue e tamaiti aoga le Alema e 3, atonu o le a i ai ni a latou fesili e uiga i le faailoga ma le fetuu na tuu i luga o sa Lamana. Atonu e te manao e faamatala atu o loo i ai se eseesega i le va o le faailoga ma le fetuu. O le faailoga na tuu atu i luga o sa Lamana o le faauliuli o le pa’u (tagai i le Alema 3:6). O le faamoemoega o lenei faailoga ina ia faailoga ese sa Lamana mai ia sa Nifae (tagai i le Alema 3:8). O le fetuu, lea na sili atu ona tuga, o le tulaga lea o le “vavae ese lava mai luma o le Alii” (2 Nifae 5:20). Na aumaia e sa Lamana ma sa Amiliki lenei fetuu i o latou lava luga talu ai lo latou fouvale i le Atua (tagai i le 2 Nifae 5:20; Alema 3:18–19). E ui o le faauliuliina o le pa’u sa faaaogaina i lenei tulaga e avea o se faailoga o le fetuu lea na tuuina i luga o sa Lamana, ae o loo aoao mai le Tusi a Mamona “e le teena e ia [le Alii] se tasi e sau ia te ia, e uliuli pe paepae, e pologa pe saoloto, o le tane ma fafine; … ua tutusa tagata uma i le Atua” (2 Nifae 26:33). O le talalelei a Iesu Keriso e mo tagata uma. E matuai faitioina lava e le Ekalesia le faailoga lanu, e aofia ai soo se faailoga lanu uma lava mai le taimi ua mavae e tagata taitoatasi e le gata i totonu ae faapea foi ma fafo atu o le Ekalesia. Na folafola atu e Peresitene Gordon B. Hinckley:
“E leai se tagata o le na te faia ni faamatalaga taufaifai e faatatau i isi ituaiga e mafai ona taua o ia o se soo moni o Keriso. E le mafai foi ona ia manatu ia te ia lava e faapea ua ogatusa ma aoaoga a le Ekalesia. …
“Ia tatou iloa uma o i tatou uma taitoatasi o se atalii po o se afafine o lo tatou Tama o i le Lagi o le e alofa i Ana fanau uma” (“O Le Moomia o le Agalelei Tele Atu,” Ensign po o le Liahona, Me 2006, 58). Mo se fesoasoani faaopoopo i lenei mataupu, tagai i le lesona 27.
Alema 4:9–12. “O se maagao tele”
Ina ua amata ona faamaualuluga nisi tagata o le Ekalesia sa Nifae, na avea a latou faataitaiga le lelei ma se maagao ia i latou o e lei auai i le Ekalesia (tagai i le Alema 4:9–12; tagai foi i le Alema 39:11). Na faamatalaina e Peresitene Gordon B. Hinckley le tala lenei, lea na faailoa mai ai ia taunuuga o faataitaiga leaga ma faataitaiga lelei:
“E le auai o ia i le Ekalesia. Sa toaaga o ia ma ona matua i se tasi tapuaiga.
“Sa ia fai mai a o tuputupu a’e o ia sa i ai nisi o ana uo o le AAG sa faatauemu ia te ia, latou te faaesea o ia ma taufaalili ia te ia.
“Na oo ai ina inoino i lenei Ekalesia ma ona tagata. E leai se mea lelei na ia iloa atu ia i latou.
“Ona le toe faigaluega lea o lona tama ma sa latou siitia ese ai. I le nofoaga fou, sa mafai ai i le 17 o tausaga ona aoga i le kolisi. O iina, mo le uluai taimi, sa ia lagonaina ai le mafanafana o uo, o se tasi o i latou sa igoa ia Lisati, sa fai atu ia te ia ina ia auai i se kalapu o loo ia peresitene ai. Na ia tusia: ‘O le taimi muamua lenei i lo’u olaga ua manao ai se tasi matou te mafuta. Sa ou leiloa sa’u taga a fai, ae sa ou auai ma le faafetai. Sa ose lagona sa ou fiafia iai, le lagona o le iai o se uo. Sa ou tatalo ai i lou olaga atoa. Ma o lenei i le mavae ai o tausaga e 17 o faatali, Ua tali mai le Atua i lena tatalo.’
“I le 19 o tausaga sa ia iloaina ai la te faleie faatasi ma Lisati i le taimi o le latou galuega i le taumafanafana. Sa ia matauina le faitauina e Lisati o se tusi i po uma. Na ia fesili atu i ai po le a lana mea o loo faitau. Sa ta’u atu ia te ia o loo ia faitauina le Tusi a Mamona. Na ia faaopopo: ‘Na vave na ou suia le mataupu ma ou moe. I le aluga o taimi, o le tusi lena lea na faaleaogaina ai lou tamaititi. Na ou taumafai e faagalo, ae i le aluga o le vaiaso sa le mafai ona ou moe. Aisea na ia faitauina ai i po uma? Na toeititi le mafai na ou tatalia se tali o le fesili lenei i lou mafaufau. I se tasi la po na ou fesili ai ia te ia o le a se mea taua o i ai i lena tusi. O le a se mea o i ai i totonu? Sa amata na ia faitau mai le mea na gata ai. Na ia faitau e uiga ia Iesu ma uiga i lona faaali atu i le au Amerika. Sa ou tei. Sa ou te’i.Ou te lei manatu e talitonu Mamona ia Iesu.’ …
“I se isi faatasiga mulimuli ane sa faimalaga atu ai lenei alii talavou ma lana uo. Sa tuu atu e Lisati ia te ia se Tusi a Mamona ma fai atu i ai na te faitauina leotele. Sa ia faia, ma e lei umi ae pa’i atu le musumusuga a le Agaga Paia ia te ia.
“Ua mavae atu aso ma ua faatupulaia lona faatuatua. Sa malie o ia e papatiso.
“O le iuga lena o le tala, ae e tele ni faaupuga o loo i ai i lena tala. O le isi, o tulaga maasiasi sa faia ia te ia e ana uo talavou Mamona.
“O le isi o uiga lea na faalia ma faia e lana uo fou na maua o Lisati o ia. Sa matua eseese lava mai ona aafiaga muamua. Na taitaia i lona liliu ma papatisoina i foliga mataga ma le tutusa” (“The Need for Greater Kindness,”Ensignpoo le Liahona,Me 2006, 59–60).
Alema 4:19. “Molimau manino”
Ina ua vaai atu Alema e tatau ia te ia ona toe aumaia tagata e ala ile “toso i lalo i le molimau manino i ai latou” Alema 4:19, na ia valaau i tagata e salamo. Peitai, i le tatou sauniga anapogi ma molimau, o tatou molimau e tatau ona faigofie le folafolaina atu o lo tatou faatuatua ae le o upu faifai. Na saunoa mai Peresitene Spencer W. Kimball:
“Aua le fai atu i le isi i le ala e ola ai. Nao lou fai atu e uiga i lou lagona i totonu. O le molimau lena. O le taimi lava e amata ai ona e lauga atu i isi, ua uma lau molimau” O le Aoaoga a Spencer W. Kimball,ed. Edward L. Kimball [1982], 138).