Lesona mo Suesuega e Faia i le Aiga
Alema 17–24 (Iunite 17)
Sauniuniga o Anomea mo le Faiaoga o Suesuega e Faia i le Aiga
Aotelega o Lesona o Suesuega e Faia i le Aiga i Aso Taitasi
O le aotelega lenei o aoaoga faavae ma mataupu faavae e aoao e tamaiti aoga a o latou suesue le Alema 17–24 (iunite 17) e le o faamoemoe ina ia aoao atu o se vaega o lau lesona. O le lesona e te aoao atu ua na ona taulai atu i ni nai vaega o aoaoga faavae ma mataupu faavae nei. Mulimuli i uunaiga a le Agaga Paia a o e mafaufau i manaoga a au tamaiti aoga.
Aso 1 (Alema 17–18)
Mai le faataitaiga a Amona ma ona uso o loo aoaoina ia sa Lamana, ua aoao ai e tamaiti aoga o le suesue i tusitusiga paia, tatalo, ma le anapogi, o le a mafai ai ona tatou maua le Agaga Paia ma aoao atu isi faatasi ai ma le mana. O le auaunaga a Amona i le Tupu o Lamonae ua aoao mai ai foi se vaega taua o le galuega faafaifeautalai —afai tatou te setiina ni faataitaiga lelei, o le a faia i tatou e le Alii ma meafaigaluega i Ona aao. Na iloa e tamaiti o le auaunaga a Amona ia Lamonae na saunia ai le taitai sa Lamana atoa ai ma isi e talia le talalelei. O le faaliliuina o le Tupu o Lamonae na aoao mai ai faapea afai tatou te malamalama i lo tatou manaomiaina o le Faaola, o le a tatou mananao e salamo.
Aso 2 (Alema 19–20)
Na iloa e tamaiti o le molimau ma le faataitaiga amiotonu a Amona na fesoasoani i le liliu maia o le tama o Lamonae i le Alii. Na latou iloaina foi o a tatou galuega alofa e mafai ona taitaiina ai isi ina ia faamaluluina o latou loto ma sailia ia iloa le upu moni.
Aso 3 (Alema 21–22)
O le tala i le galuega faafaifeautalai a Arona na fesoasoani lea i tamaiti ia iloa afai tatou te tumau ai pea ma le faamaoni i taimi o tatou tofotofoga, o le a fesoasoani mai le Alii ia i tatou e faataunuu Lana galuega. Na fesoasoani Arona i le tama o Lamonae ina ia malamalama e na o le galuega lava a Iesu Keriso e mafai ai ona ia maua le faaolataga. E pei o le tupu, e tatau ona tatou mananao e lafoai uma a tatou agasala ina ia liua ai faaleagaga ma fanauina i la le Atua.
Aso 4 (Alema 23–24)
O le fia afe o tagata sa Lamana ia na taliaina le talalelei na faaalia mai o le liua o se suiga faaleagaga—aveaina ma se tagata fou e ala i le mana o le Atua. O le faataitaiga a sa Lamana ia na avea ma Aneti-Nifae-Liae, na iloa ai e tamaiti afai tatou te faia mea uma tatou te mafaia ina ia salamo ai, o le a aveesea e le Atua lo tatou tausalaga ma fesoasoani mai ia i tatou ina ia tumau ai i le mama. O le faaliliuga o sa Lamana na faailoa mai ai e mafai ona tatou fesoasoani atu i isi e liliu mai pe a tatou faamaoni.
Faatomuaga
Na filifili atalii e toafa a le Tupu o Mosaea e teena ia avanoa ma mea mananaia o le aiga ina ia mafai ai ona latou talai atu le talalelei i totonu o sa Lamana. O tala o nei faifeautalai e toafa na faailoa mai ai le auala e mafai ai ona saunia tamaiti aoga ina ia aoao atu ma le lelei ma anoa le talalelei a Iesu Keriso i isi.
Fautuaga mo le Aoaoga
Alema 17–22
Na aoao atu e Amona ma ona uso ni tupu sa Lamana se toalua
A o lei amataina le vasega, tusi le fuaiupu lea e le’i uma i luga o le laupapa po o luga foi o se fasipepa: “O le mea sili ona taua e tasi e mafai ona e faia ina ia saunia ai mo se valaauga e auauna atu [i se misiona] o le …”
Fai i ni nai tamaiti aoga e faamatala atu pe faapei so latou lagona i le vaai atu i se tagata o le aiga po o se uo ua toe foi mai ma le faamaoni mai le galuega faafaifeautalai. Ona fesili atu lea i tamaiti: O le a se suiga o le tagata ina ua uma lana misiona? O le a se mea e te manatu na mafua ai le suiga?
Fai i tamaiti pe faapefea ona latou faamaeaina le faamatalaga o i le laupapa. A uma ona tali mai tamaiti, faasoa atu ia i latou pe na faapefea ona faamaeaina e Elder David A. Bednar o le Korama a Aposetolo e Toasefululua le faamatalaga: “O le mea sili ona taua e tasi e mafai ona e faia ina ia saunia ai mo se valaauga e auauna atu [i se misiona] o le avea lea ma se faifeautalai a o lei taitai ona e alu i se misiona” (“Avea ma se Faifeautalai,” Ensign po o le Liahona, Nov. 2005, 45).
Fesili: O a ni auala e mafai ai e alii ma tamaitai talavou ona mulimuli i le fautuaga a Elder Bednar ma avea ma faifeautalai ao lei auauna atu o se faifeautalai faamisiona?
Faasoa atu le faamatalaga lenei mai ia Peresitene Thomas S. Monson:
“O le galuega faafaifeautalai o se tiute faaleperisitua—o se matafaioi ua faamoemoe le Alii mai ia i tatou ua tele naua mea ua tuuina mai ai. Alii talavou, ou te apoapoai atu ia te outou ia saunia mo le galuega faafaifeautalai. Ia tausisia lo outou mama ma le atoatoa ma le agavaa e avea ma sui o le Alii. Tausisia le ola maloloina ma le malosi. Suesue i tusitusiga paia. Afai o i ai, ia auai i le seminare po o le inisitituti. Faamasani i le tusitaulima a faifeautalai o le Talai La’u Talalelei.
“O se upu ia te outou taufafine talavou: e ui e le tutusa o outou tiutetauave faaleperisitua ma alii talavou e auauna atu faafaifeautalai faamisiona, e i ai foi lo outou sao taua o ni faifeautalai, ma e matou te taliaina la outou auaunaga” (“A o Tatou Toe Potopoto Faatasi Ai,” Ensign po o le Liahona, Nov. 2010, 6).
Tusi le faamatalaga lenei i luga o le laupapa: O le a faamanuiaina i tatou e le Alii i le Agaga Paia ma le mana e aoao atu ai Lana upu a o tatou …
Vaevae le vasega i ni vaega se fa: Tuu atu i vaega taitasi se tasi o fasifuaitau o mau nei: Alema 17:1–4; Alema 17:9–13; Alema 17:19–25; 18:1–9; Alema 17:26–30. (Faaaoga le gaoioiga lenei pe afai e toalaiti lau vasega.)
Fai i tamaiti e faitau le leoa a latou fuaitau ia na tuuina atu, vaavaai mo le mea na faia e atalii o Mosaea lea na faamanuiaina ai i latou i le Agaga ma le mana ao latou aoaoina atu le talalelei. Faamalamalama atu a maea galuega a tamaiti, fai i ai e faasoa mai se mea sa latou iloaina ma le auala o le a latou faamaeaina ai le fuaiupu lea o loo i luga o le laupapa.
A ua lava se taimi, fai i se tagata mai vaega taitasi e faamatala mai mea na faia e atalii o Mosaea ma le auala o le a faamaea ai e tagata o le vaega le mataupu faavae o loo i luga o le laupapa. O tali a tamaiti e ono aofia ai mea nei: suesue i tusitusiga paia, anapogi ma tatalo, onosai, seti se faataitaiga lelei, faalagolago i le Alii, auauna atu ma le faamaoni i isi, ma alofa atu i isi e pei o ou uso ma tuafafine. A o faasoa mai e tamaiti a latou tali, lisi i luga o le laupapa. Fai i tamaiti e faamatala mai po o le a so latou manatu, pe faapefea ona fesoasoani ia gaoioiga taitasi po o uiga faaletagata i se tagata e faasoa atu ai ma le lelei atili le talalelei.
Afai e i ai ni tamaiti na liliu mai i le talalelei ina ua maea ona aoaoina e faifeautalai faamisiona, atonu e te manao e fai atu ia i latou e faasoa mai o latou lagona a o latou aoaoina le talalelei.
Faamanatu i tamaiti ina ua uma ona puipuia e Amona le lafu manu a le tupu, na ofo le Tupu o Lamonae i le malosi o Amona faapea foi ma lona usiusitai ma faamaoni i le faataunuuina o poloaiga a le tupu (tagai Alema 18:8–10). Na saunia Lamonae e faalogo i le savali na sau Amona e faasoa atu ia te ia. Fai i tamaiti e feauauai i le faitauina leotele mai o le Alema 18:24–29. Fai i le vasega e tagai i le auala na fausia ai e Amona le malamalama o Lamonae i le Atua ina ia mafai ai ona ia saunia Lamonae ia malamalama i le aoaoga faavae moni.
Fai atu i tagata fesili nei:
-
Afai sa fai se lua talanoaga ma sau uo e ese lana tapuaiga e uiga i le Atua, e faapefea ona e faaaogaina lua talitonuga uma e lua, e pei ona faia e Amona? E faapefea ona fesoasoani lenei taumafaiga i lau uo?
-
O a nisi autu faalelotu e mafai ona tou talanoaina ma au uo ina ia tatalaina ai avanoa e faasoa atu ai le talalelei ia i latou?
Faamanatu atu i tamaiti na fiafia le Tupu o Lamonae e faalogo i le talalelei a Iesu Keriso, e pei lava foi o lona tama. Fai i se tamaitiiti e toatasi e faitau leotele le Alema 18:39–41—o le tali atu a Lamonae i le aoaoina e uiga ia Iesu Keriso. Fai i se isi tamaitiiti aoga e faitau le Alema 22:14–18—o le tali a le tama o Lamonae. Valaaulia le vasega e mulimuli i le faitauga i a latou tusitusiga paia ma tagai mo mea e tutusa ai ia tali a nei alii.
Fesili: O le a se mea na mananao uma nei alii e fai ina ua la aoao e uiga ia Iesu Keriso?
Faamatala atu na pai atu le Agaga ia Lamonae ma lona tama e ala i aoaoga a faifeautalai. O se taunuuga la, sa la mananao i faamanuiaga o le talalelei ma sa malilie e lafoai a laua agasala ma salamo. Faamanatu atu i tamaiti aoga le upu moni lea sa latou suesueina i lenei vaiaso: E tatau ona tatou mananao e lafoai uma a tatou agasala ina ia liua ai faaleagaga ma fanauina i la le Atua.
Fai i se tamaitiiti e faitau leotele le faamatalaga lea mai ia Elder Dallin H. Oaks o loo maua i totonu o la latou tusi taiala o suesuega: “Ua luitauina i tatou e le talalelei a Iesu Keriso ina ia suia. O le ‘salamo’ o lana savali faifai pea lea, ma o le salamo o lona uiga o le lafoai ese uma lea o mea tatou te faia—faaletagata, faaleaiga, faaleaganuu, ma faaleatunuu—e feteenai ma poloaiga a le Atua. O le faamoemoega o le talalelei o le liuaina lea o tagata faaletino e avea ma tagatanuu faaselesitila, ma e moomia ai le suia” (“Salamo ma Suia,” Ensign po o le Liahona, Nov. 2003, 37).
Fai i tamaiti e mafaufau i o latou olaga ma vaai pe e manaomia ona latou lafoai soo se agasala ina ia liua ai faaleagaga, e pei o Lamonae ma lona tama. Faaiu i le faasoaina atu o lau faamalosiauga ma lau molimau afai tatou mananao e lafoai a tatou agasala, o le a fesoasoani mai le Alii ia i tatou ina ia suia ma tuputupu ae.
Iunite e Sosoo ai (Alema 25–32)
Fai i tamaiti e mafaufau i le fesili lenei: O le a se mea e te fai atu ai i se tagata o se aneti-Keriso? I le iunite e sosoo ai, o le a aoao e tamaiti le auala na taulimaina ai e Alema ia fesili ma tauemuga a Korioa, o se aneti-Keriso. E le gata i lea, o le a latou aoao atili e uiga i le faatuatua ao latou faitau ai e uiga i le auala na galulue ai Alema ma isi e aoao atu tagata sa Sorama ua liliuese, o e ua faapiopio ala a le Alii.