Lesona 78
Alema 13
Faatomuaga
Ina ao amata ona talai atu Alema i le nuu po o tagata loto maaa o Amonaea, sa latou finau mai ia te ia, fai mai, “O ai oe?” ma fesiligia lana pule (tagai i le Alema 9:1–6). Sa latou i ai i le tulaga o le liliuese, ona o le taliaina o le faatulagaga a Neoa—o faafaitaulaga pepelo, ma o lana sini o le manuia faaletagata (tagai i le Alema 1:2–15; 15:15; 16:11). E ese mai aoaoga a Neoa, sa aoaoina i latou e Alema e uiga “i le perisitua maualuga o le faatulagaga paia a le Atua,” ma lana sini o le fesoasoani lea i isi ia salamo ma ulu atu i le malologa a le Alii (tagai i le Alema 13:6). Na ia sii maia le faataitaiga a Mekisateko, lea na talaiina le faatuatua ma le salamo ma fesoasoani i lona nuu ina ia ola i le filemu. Na aoao atu foi e Alema e uiga i le muai olaga ma le muaifaauuina. Na ia faaiuina lana lauga e ala i le valaauliaina o tagata ia faalogologo i ana upu ina ia mafai ona latou saunia e ulu atu i le malologa a le Alii.
Fautuaga mo le Aoaoga
Alema 13:1–12
Ua aoaoina e Alema ia tagata o Amonaea e uiga i tofiga o faitaulaga sili.
Faamatala atu faapea o loo i ai i le Alema 13 aoaoga a Alema e uiga i se vaega o tagata o e na sili ona faamanuiaina le Ekalesia. O le mea moni, o tagata uma o le Ekalesia na faamanuiaina e ala i auaunaga a nei tagata.
Tau atu i tamaiti aoga latou te iloa tagata o e o avea o se vaega o lenei faalapotopotoga. Ona fai atu lea i tamaiti aoga e faitau le leoa le Alema 13:1 e faamaonia ai po o a nei tagata. A mavae se taimi latou te faitauina ai lenei mau, fautua atu ia latou faitauina foi le Alema 13:10, 14 ma le Mataupu Faavae ma Feagaiga 107:1–3. Atonu e te manao e fautuaina i latou e tusi mau faasino nei i le laina avanoa o loo sosoo ma le Alema 13:1.
Faailoa atu na tautala atu Alema e uiga i faitaulaga i le faatulagaga o le Alo o le Atua, o le Perisitua Mekisateko. I nisi upu, na talanoa e uiga i tagata o e na umia le tofi o le faitaulaga sili i le Perisitua Mekisateko. Valaaulia se tamaitiiti aoga e faitau le faamatalaga lenei a Elder Bruce R. McConkie o le Korama a Aposetolo e Toasefululua:
“O nei sa Nifae, o e sa faatuatua ma faamaoni i le tausiga o tulafono a Mose, na i ai le Perisitua Mekisateko, o lona uiga sa latou mauaina foi le atoaga o le talalelei. … O nisi o a tatou faamatalaga sili e uiga i le Perisitua Mekisateko o loo maua i le Alema 13” (The Promised Messiah [1978], 421).
-
O a ni faamanuiaga na oo mai i lou olaga e ala mai i le Perisitua Mekisateko? (Atonu o le a ta’ua e tamaiti aoga le meaalofa o le Agaga Paia, faamanuiaga faapeteriaka, isi faamanuiaga o le perisitua, le taitaiga a le Pulega Aoao, le taitaiga a taitai i le lotoifale e pei o epikopo po o peresitene o paranesi, ma faamanuiaga na latou maua e ala i feagaiga na osia e o latou matua i le malumalu. Atonu o le a latou ta’ua foi le papatisoga ma le faamanatuga, lea e faataunuuina e ala i le pule o le Perisitua Arona ae i lalo o le taitaiga a taitai o le Perisitua Mekisateko.)
Faapipii i luga o le laupapa ia fesili nei, pe faaaofia i se pepa e tufa atu. Tuu atu i tamaiti aoga se taimi e faitau ai le Alema 13:2–10 ma saili ia tali o fesili.
O anafea na muai tofia ma saunia ai e na umia le Perisitua Mekisateko? (Tagai i le Alema 13:3–5.)
O le a se tiute o i ai i le au Perisitua Mekisateko uma? (Tagai i le Alema 13:6.)
O a ni fasifuaitau o loo i le Alema 13:7 e faamatalaina ai le Perisitua Mekisateko?
O a nisi o agavaa o le a faauuuina ai i le Perisitua Mekisateko? (Tagai i le Alema 13:10.)
Afai ae maua e tamaiti aoga se taimi e saili ai ia tali o fesili, tuu atu ia i latou e lipoti mai a latou tali. Atonu e te manao e tusi a latou tali i luga o le laupapa.
Ina ia fesoasoani i tamaiti aoga ia malamalama atili ma talanoaina mea sa latou faitauina, filifili e fai atu ia fesili nei:
-
O a ni auala o le a fesoasoani ai ia i tatou le auaunaga a le au perisitua ina ia tatou iloa le auala e vaavaai atu ai ia Iesu Keriso mo le faaolataga? (Tagai i le Alema 13:2, 8, 16. E ala atu i a latou faataitaiga ma aoaoga ma e ala atu i sauniga latou te faatinoina, o le a latou faasinoina i tatou i le Faaola.)
-
O le a le uiga o upu a Alema lea na ia fai atu ai o faitaulaga sili “sa valaauina ma saunia i latou mai le faavaega o le lalolagi?” (Alema 13:3). (O lana faamatalaga e faapea o nisi o alii na muai faauuina e maua ni tofi faapitoa o le perisitua.)
Ina ia fesoasoani i tamaiti aoga ia malamalama i le muai faauuina ma le auala o loo faatatau ai i o latou olaga, atonu e te manao e fai atu i se tamaitiiti aoga e faitau mai faamatalaga nei.
O le Perofeta o Iosefa Samita na aoao mai: “O tagata uma e i ai se valaauga e talai atu i tagata o le lalolagi na faauuina mo lena lava faamoemoe i le Aufono Sili i le lagi a o lei i ai le lalolagi. Ou te manatu na faauuina a’u i lenei lava tofiga i lena Aufono Sili” (Aoaoga a Peresitene o le Ekalesia: Iosefa Samita [2007], 544).
Sa saunoa mai Peresitene Spencer W. Kimball: “I le lalolagi sa tatou i ai, ae tatou te lei o mai iinei, sa tuuina atu i tamaitai faamaoni ni tofiga faapitoa, a o alii faamaoni sa muai faauuina i galuega faapitoa i le perisitua. E ui ina ua tatou le manatuaina nei ia auiliiliga, ae le avea lena ma mea e suia ai le paia moni o le mea sa tatou malilie i ai” (Aoaoga a Peresitene o le Ekalesia: Spencer W. Kimball [2006], 241).
-
O le a se mea o loo aoao atu e le Alema 13:3 e uiga i mea e tatau ona tatou faia e faataunuu ai la tatou misiona na muai faauuina i ai?
-
Afai ae faauuina se alii i se tofi o le perisitua, o le a uiga o lena faauuina ia te ia? (Tagai i le Alema 13:8. Manatua e mafai ona taliina lenei fesili e tamaitai talavou faapea foi ia alii talavou. Atonu o le a faamanuiaina ia alii talavou i le faalogo atu i tali a tamaitai talavou.)
Fai atu i tamaiti aoga e faitau le leoa le Alema 13:11–12, tagai mo ni auala na suia ai le au Perisitua Mekisateko lea na ta’ua e Alema e ala i le Togiola a Iesu Keriso.
-
O le a sou manatu o le uiga mo le “tātā sinasina o latou ofu e ala i le toto o le Tamai Mamoe”?
-
Aisea e te manatu ai e ao ona suia le au Perisitua Mekisateko e ala atu i le Togiola a Iesu Keriso? O a ni auala e mafai ai ona tatou mulimuli i a latou faataitaiga?
Faamanatu atu i tamaiti aoga faapea na aoaoina e Alema nei upumoni i le nuu o Amonaea. O le toatele o nei tagata “sa auai i le faatuatuaga a Neoa” (Alema 14:18; 15:15), o lona uiga sa latou opomauina ia aoaoga a Neoa. O Neoa o se tagata na faavaeina se faatulagaga sese lea na ta’ua e Alema o le “faafaitaulaga pepelo” (tagai i le Alema 1:12–15).
-
O a ni mea e tulaga eseese ai le au Perisitua Mekisateko faamaoni ma i latou o e mulimuli i aoaoga a Neoa? (Atonu e te manao e valaaulia ia tamaiti aoga e toe tagatagai i le Alema 1:2–6, ma vaavaai i ni auala e eseese ai le faafaitaulaga pepelo a Neoa ma le Perisitua Mekisateko.)
-
O tagata o Amonaea na muai aoaoina e uiga i le Perisitua Mekisateko ma maua ia faamanuiaga e ala i le Perisitua Mekisateko (tagai i le Alema 9:21; 13:1). Aisea e te manatu ai e taua i tagata o Amonaea le toe faamanatu atu o mea sa latou muai aoaoina e uiga i le Perisitua Mekisateko?
-
O le a se mea ua uma e aoaoina e uiga i le perisitua mai lenei lesona? (E ui atonu o le a fautua atu e tamaiti aoga se vaega o upumoni, ae e tatau lava ona faailoa atu ia latou tali le vaega lea faapea o sauniga o le perisitua ma le auaunaga a le au perisitua ua fesoasoani ia i tatou ia iloa le auala e vaavaai atu ai ia Iesu Keriso mo le Faaolataga.)
Atonu e te manao e fautuaina tamaiti aoga e tusi i totonu o api e tusia ai faamatalaga po o api talaaga mo le suesueina o tusitusiga paia lenei mataupu faavae na latou faailoaina mai. Afai ae lava se taimi, fai atu ia i latou e tusi e uiga i le auala na uunaia ai e nei mataupu faavae le auala na latou vaai ai i le mana ma faamanuiaga o le perisitua.
Alema 13:13–20
Ua aoao atu Alema e uiga ia Mekisateko, o se faitaulaga sili maoae lea sa faatuina le filemu i ona tagata
Tusi upu ma fasifuaitau nei i luga o le laupapa: faitaulaga sili, tupu, faaaoga le faatuatua tele, talai atu le salamo, faatuina le filemu, aloalii o le filemu, nofotupu i lalo o lona tama. Malolo pe a uma ona tusi upu po o fasifuaitau taitasi ina ia tuu atu i tamaiti aoga e mate mai, e aunoa ma le tilotilo ia latou tusitusiga paia, po o ai o loo faamatalaina e Alema i nei upu ma fasifuaitau. (Sa ia faamatalaina ia Mekisateko.) Afai e lei sao mate a tamaiti aoga ae ua uma ona e tusia upu ma fasifuaitau uma i luga o le laupapa, fai atu ia i latou e faitau le Alema 13:14.
Afai na mate mai e nisi o tamaiti aoga o Iesu Keriso lea na talanoa i ai Alema, fesili atu ia i latou pe aisea na avea ai le faamatalaga o se faitaulaga sili amiotonu ma faamanatu ia i latou o le Faaola. Fesoasoani atu ia i latou ia malamalama o le au Perisitua Mekisateko e “tusa ma le faatulagaga a le Alo, o le Toatasi na Fanaua e le Tama” (Alema 13:9; tagai foi i le MF&F 107:2–4). Faailoa atu o e umia le Perisitua Mekisateko e tatau ona taumafai e mulimuli i le faataitaiga a Iesu Keriso i a latou auaunaga ma a latou aoaoga. Ia faamanatu atu foi i tamaiti aoga o sauniga o loo faataunuuina e ala i le pule o le Perisitua Mekisateko o le a fesoasoani e faalatalata atili atu ai i tatou i le Faaola.
Fai atu i se tamaitiiti e faitau leotele le Alema 13:14–19.Uunaia le vasega e mafaufau e uiga i le auala semanu e faamanuia ai ia tagata amioleaga o Amonaea mai le aoao e uiga ia Mekisateko.
-
I le Alema 13:17, o a ni upu o loo faamatala ai tagata o le nuu o Mekisateko? Na faapefea ona tutusa nei tagata ma tagata o Amonaea? (Tagai i le Alema 8:9; 9:8.)
-
O le a se mea na faia e Mekisateko i le avea ai ma taitai o lona nuu? Na faapefea ona avea lana taitaiga ma faatosinaga i tagata? O le a se mea na ese ai lenei faatosinaga mai le faatosinaga a i latou i Amonaea o e na mulimuli i aoaoga a Neoa? (Tagai i le Alema 8:17; 10:27, 32.)
Valaaulia ia tamaiti aoga e fai se aotelega o le Alema 13:16–18, e faaalia ai upumoni o loo aoao atu e nei mau e uiga i tiutetauave o taitai perisitua. Ao latou fautuaina mai ni aotelega, ia mautinoa ua latou faailoa mai faapea o loo fesoasoani taitai perisitua ia i tatou e vaavaai atu ia Iesu Keriso, salamo, ma ola i le filemu. (Atonu e te manao e uunaia ia tamaiti aoga e tusi a latou aotelega i totonu o a latou tusitusiga paia i talaane o le Alema 13:16–18.) Faailoa atu o isi taitai o le Ekalesia, e pei o taitai o le Aualofa ma Tamaitai Talavou, o ni tagata auai taua i lenei taumafaiga. O le galulue faatasi ma taitai perisitua, latou te fesoasoani i le taitaiina o tagata ma aiga ina ia o mai ia Keriso.
-
Na faapefea ona faamanuiaina oe e ala i le auaunaga a taitai o le Ekalesia?
Alema 13:21–31
Ua valaaulia e Alema ia tagata ina ia faalogo i le siufofoga a le Alii ma ulu atu i Lona malologa
Valaaulia ia tamaiti aoga e vaai mo se manatu o loo toe ta’ua i le Alema 13:12, 13, 16, 29. E tatau ona latou mauaina le upu malologa ma le fuaitau “malologa o le Alii.” Atonu e te manao e uunaia i latou e faailoga le manatu lenei i mau taitasi. Ina ia fesoasoani i tamaiti aoga ia malamalama i le uiga o le ulu atu i le malologa o le Alii i lenei olaga ma pe a mavae lo tatou oti, faitau i faamatalaga nei:
“Na ta’ua e perofeta anamua le ‘ulu atu i le malologa o le Atua’ [tagai i le Alema 12:34; MF&F 84:23–24]; o le a lona uiga? I lo’u manatu, o lona uiga o le ulu atu i le malamalama ma le alofa o le Atua, ina ua maua le faatuatua i ona faamoemoega ma lana fuafuaga, e oo i le tulaga tatou te iloa ai e sao i tatou, ma tatou te le o sailiili mo se isi mea” (Iosefa F. Samita, Aoaoga a Peresitene o le Ekalesia: Iosefa F. Samita [1998], 56).
“O au paia faamaoni e ulu atu i le malologa o le Alii ao i ai i lenei olaga, ma o le tumau ai i le upumoni, latou te faaauau ai pea i lea tulaga faamanuiaina seia latou malolo ma le Alii i le lagi. … O le malologa a le Alii, i le faavavau, o le mauaina lea o le ola e faavavau, ina ia maua le atoatoaga o le mamalu o le Alii” (Bruce R. McConkie, Mormon Doctrine, lomiga lona lua. [1966], 633).
Faamalamalama atu na uunaia e Alema ia tagata o Amonaea ina ia salamo ma saunia mo le toe afio mai o Keriso (tagai i le Alema 13:21–26). Ona ia faasoa atua lea o ni mataupu faavae sa manaomia e i latou e mulimuli i ai e ulu atu ai i le malologa o le Alii.
Fai i tamaiti aoga e faitau le leoa le Alema 13:27.
-
O a ni upu o i le Alema 13:27 o faaalia ai lagona o Alema e uiga i tagata atoa ai ma lana savali?
Valaaulia ni nai tamaiti aoga e feauauai i le faitauina leotele mai o le Alema 13:27–29. Fai atu i le vasega e saili ia mataupu faavae lea na faamoemoe Alema o le a mulimuli i ai ia tagata. Ona fai atu lea i tamaiti aoga e lisi mai ia mataupu faavae na latou mauaina. Mo se faataitaiga, atonu o le a latou fai mai ao tatou tali atu ma le faamaualalo i le valaaulia ina ia salamo, o le a taitaiina i tatou e le Agaga i le malologa o le Alii.
Valaaulia ia tamaiti aoga e tusi ni sini e faatatau i le auala o le a latou mulimuli ai i le fautuaga o loo i le Alema 13:27–29. Molimau atu e mafai ona tatou ulu atu i le malologa o le Alii i lenei olaga faapea ma le isi olaga pe a tatou mulimuli i mataupu faavae na aoao mai e Alema.
Tala ma Faamatalaga o Talaaga
Alema 13:1. “Ou te fia sii o outou mafaufau i luma”
Atonu o le a manatunatu tamaiti aoga pe aisea na fai mai ai Alema “Ou te fia sii o outou mafaufau i luma” ma talanoa lea i mea ua uma ona tutupu (tagai i le Alema 13:1). E taua le manatuaina o leAlema 13 o se faaauauina o se talanoaga o loo i ai foi i le Alema 11 ma le 12. O le faaiuga o le Alema 12 o loo i ai ni upu a Alema e uiga i le Pau a Atamu ma Eva (tagai i le Alema 12:22–23, 30–32). I le amataga o le Alema 13, o loo faaauau ai e Alema lana faamatalaga, talosaga atu i tagata ina ia “sii o [latou] mafaufau i luma” i se taimi ina ua mavae le Pau ao faauuina e le Alii ia faitaulaga e aoao atu Ana poloaiga.
Alema 13:3. O le faitalia i le muai olaga
O le talanoa ai e uiga i e umia le perisitua ma lo latou muai faauuina i le muai olaga, na aoao atu Alema faapea “o le mea muamua i le tuuina atu o i latou e filifili i le lelei po o le leaga” (Alema 13:3). Na toe faalauteleina mai e Peresitene Iosefa Filitia Samita lenei upumoni:
“Sa tuuina atu e le Atua i ana fanau le filifiliga saoloto i le [muai olaga] lalolagi o agaga, lea na maua ai e agaga taitasi le avanoa, e pei lava ona maua e tagata iinei, i le filfiliina o le lelei ma le teenaina o le leaga, po o le faia o le leaga ma puapuaga ai i taunuuga o a latou agasala. Ona o lenei mea, na i ai nisi iina sa sili atu ona faatuatua nai lo isi i le tausiga o poloaiga a le Alii. …
“O agaga o tagata e i ai a latou filifiliga saoloto.… E le tutusa uma ia agaga o tagata. Atonu sa i ai so latou amataga tutusa, ma ua tatou iloa sa ta’umamaina i latou uma i le amataga; ae o le aia tatau i le filifiliga saoloto lea sa tuuina atu ia i latou sa mafai ai e nisi ona sili atu i isi, ma o le mea lea, o le vaitau umi o le muai olaga, ia filiga atili, faatuatua atili atu, aua sa latou saoloto e galulue mo i latou lava, e mafaufau mo i latou lava, ia maua le upumoni pe fouvale foi i ai” (Doctrines of Salvation, comp. Bruce R. McConkie, 3 vols. [1954–56], 1:58–59).
Alema 13:3–5. Olaga i le muai olaga ma le muai faauuina
Na aoao mai e Peresitene Boyd K. Packer o le Korama a Aposetolo e Toasefululua:
“E le o toe i ai se upumoni maoae e fesootai mai ia i tatou i le toefuataiga nai lo le malamalama i lo tatou i ai i le muai olaga. E leai se isi ekalesia e iloaina pe aoaoina lenei upumoni. O le aoaoga faavae ua na o le mamanu faaotootoga ua tuuina mai ai, ae o mea moni e faatatau i ai e tele ina tuuina mai pea lava pea i faaaliga e faamautinoa mai ia i tatou ia upumoni faavae faapitoa.
“… O nisi nei o upumoni taua ua tatou iloa e uiga i o tatou tulaga i le muai olaga: ‘Sa i ai foi le tagata i le amataga faatasi ma le Atua.’(MF&F 93:29.) Sa tatou nonofo faatasi ma le Atua, lo tatou Tama Faavavau; o i tatou o Ana fanau. O le atamai, po o le agaga, na faatulagaina o ni tino agaga ae lei i ai le lalolagi. (Tagai Aperaamo 3:22.) Na tuuina ia i tatou taitoatasi le faitalia. Na faaeeina le pule ma filifilia ia taitai.Alema 13:1–4.)” ((Our Father’s Plan[1984], 14–15).
O Le Faamaoni i le Faatuatua e aofia ai faamatalaga nei e uiga i le muai faauuina:
“I le muai olaga o agaga, sa tofia ai e le Atua ni agaga e faataunuuina ni misiona patino i le taimi e soifua ai i le olaga nei. O lenei mea ua taua o le muai faauuina.
“O le muai faauuina e le faapea ua mautinoa ai o ia tagata o le a maua ni valaauga po o ni tiutetauave faapitoa. O nei avanoa e oo mai i lenei olaga o se taunuuga o le faaaogaina ma le amiotonu o le saolotoga, e pei lava o le oo mai o le muai faauuina o se taunuuga o le amiotonu i le muai olaga.
“O le mataupu faavae o le muai faauuina e faatatau i tagata uma o le Ekalesia, e le na o le Faaola, ma Ana perofeta. Ao lei foafoaina le lalolagi, sa tuuina atu ni tiutetauave faapitoa i ni tamaitai faamaoni ma sa muai faauuina foi ni alii i ni tiute faapitoa o le Perisitua. E ui lava e te le o manatuaina lena taimi, ae e mautinoa lava na e malie atoatoa e faataunuuina feau faapitoa i le galuega a lou Tama. A e faailoa atu lou lava agavaa, o le a tuuina atu ia te oe avanoa e faataunuuina ai tofiga na e mauaina i lea taimi” Faamaoni i le Faatuatua: O Se Tusitaiala o le Talalelei [2004], 116–17).
Na aoao mai Elder Neal A. Maxwell o le Korama a Aposetolo e Toasefululua:
“O le muai olaga e le o se mataupu paie lenei mataupu. Ua tofu i tatou ma filifiliga e fai, o galuega le uma ma faigata e tatau na fai,iai se aafiaga o mea faigata e faaleleia ma taimi e faaaoga lelei, ma taleni ma meaalofa e faaaoga lelei. E le faapea na filifilia i tatou i ‘inā i lena taimi,’ ona tatou le manatu mamafa ai lea i ‘inei ma le taimi nei.’ E tusa pe na muai faauuina alii, pe na muai tofia tamaitai, e tatau ia i latou uma na tofia ma saunia, ona faamaonia lo latou ‘filifilia ma lo latou faamaoni.’ (Tagai Faaaliga 17:14; MF&F 121:34–36.)” (“O Le Muai Olaga, o se Mataupu Moni Mamalu,” Liahona, Ian. 1986, 12).