Lesona 128
3 Nifae 19
Faatomuaga
Ina ua faamae’aina e le Faaola Lana asiasiga muamua i tagata sa Nifaē, na salalau atu le tala o Lana asiasiga i tagata i lena po atoa. (O mea na tutupu o loo faamauina i le 3 Nifae 11–18 na tutupu uma lava i le aso e tasi.) I le po atoa, na galulue ai tagata “matua toatele lava … ina ia mafai ona latou i ai i le aso e sosoo ai i le nofoaga” lea o le a toe afio mai i ai le Faaola (3 Nifae 19:3). I le taeao, na aoao atu ai e le au soo ia tagata ma tatalo ma i latou. Na faaali mai Iesu Keriso ma poloaiina tagata e tatalo, a o Ia tatalo atu i le Tama mo i latou. Ona o lo latou faatuatua, na faamamaina ai le au soo e toasefululua. Na tatalo Iesu ina ia mafai ona tasi faatasi ma Ia ma Lona Tama le au soo ma i latou uma o e na talitonu i a latou upu.
Fautuaga mo le Aoaoga
3 Nifae 19:1–14
Ua auauna atu le au soo e toasefululua i tagata, e pei ona poloaiina ai e le Faaola
Valaaulia tamaiti e mafaufau i mea atonu latou te faia, po o o latou lagona pe a latou iloaina faapea o taeao o le a afio mai ai Iesu Keriso i le malumalu (po o le nofoaga autu o le siteki, po o le nofoaga autu o le aai, po o se isi nofoaga lea o le a manaomia ai se taumafaiga mai tamaiti e malaga atu i ai).
-
Faamata e faapefea ona e oo iina?
-
Mata o ai o le a e manao tou te o faatasi?
-
Mata o le a le mea o le a e faia e saunia ai mo lenei aafiaga?
Toe faamanatu i tamaiti faapea, ina ua latalata i le faaiuga o le asiasiga a le Faaola i sa Nifaē i le aso muamua, na Ia uunaia tagata e o i o latou fale ma mafaufau loloto ma tatalo e uiga i Ana aoaoga ina ia saunia mo Lana asiasiga i le aso e sosoo ai (tagai i le 3 Nifae 17:3). Fai i tamaiti e faitau lē leoa le 3 Nifae 19:1–3 ma vaavaai mo le tali a sa Nifaē i le folafolaga a le Faaola faapea o le a toe sau o Ia i le aso e sosoo ai. Pe a uma ona lipoti mai e tamaiti mea ua latou mauaina, otooto le 3 Nifae 19:4–8 e ala i le faamalamalamaina faapea ina ua uma ona faapotopoto le motu o tagata i le aso na sosoo ai, na vaevaeina e le au soo e toasefululua tagata i ni vaega e sefululua ma amata ona aoao i latou. Ina ua uma ona faatonuina le motu o tagata e tootutuli e tatalo, na tatalo foi le au soo e toasefululua, ona latou aoao lea o tagata i upumoni lava ia na aoao mai e le Faaola i le aso na mavae atu. Ona toe tootutuli lea o le au soo i le tatalo.
Valaaulia se tamaitiiti aoga e faitau leotele le 3 Nifae 19:8–9. Fai atu i le vasega e mulimuli i le faitauga, ma vaavaai mo mea na tatalo atu ai le au soo.
-
O le a le mea na sili ona mananao ai le au soo?
-
O le au soo e toasefululua sa saunia e taitai le Ekalesia i totonu o sa Nifaē, ina ua afio ese le Faaola. Aisea e te manatu ai na latou manaomia ai le Agaga Paia i la latou auaunaga?
-
I au tatalo e ofoina atu, o a ni nai mea e sili ona e manao i ai?
-
E te tatalo ea mo le Agaga Paia? Aisea, pe aisea e leai ai?
Valaaulia se tamaitiiti aoga e faitau leotele le 3 Nifae 19:10–12. Pe a uma ona ia faitauina, faamalamalama atu faapea o lenei papatisoga faalua o se tulaga faapitoa. E ui o tagata sa Nifaē sa paptisoina muamua mo le faamagaloina o agasala ma sa agavaa e i ai faatasi ma Iesu Keriso, na poloaiina i latou e le Faaola ina ia toe papatisoina, aua sa Ia faatoa faatulagaina le Ekalesia fou.
Valaaulia se tamaitiiti aoga e faitau leotele le 3 Nifae 19:13–14. Fai atu i le vasega e mulimuli i le faitauga, ma vaavaai mo faamanuiaga na maua e le au soo, o se tali mo o latou manaoga amiotonu. Ina ia fesoasoani e faateleina le manao o tamaiti aoga mo le uunaiga a le Agaga Paia i o latou olaga, ia fai le gaoioiga lenei:
Vaevae tamaiti i ni paga. Fai atu i paga taitasi e fai se lisi i totonu o api po o api talaaga o le suesueina o tusitusiga paia, o mea e faia e le Agaga Paia mo i latou o e ola agavaa. Ona sosoo lea, ia valaaulia tamaiti e faatusatusa a latou lisi ma le saunoaga lenei mai ia Elder Robert D. Hales o le Korama a Aposetolo e Toasefululua. (A o lei amataina le vasega, fai ni kopi o le saunoaga, pe tusi i luga o le laupapa.) Fai i tamaiti e faaopoopo i a latou lisi, soo se manatu fou lava latou te maua a o latou faitauina le saunoaga.
“O le Agaga Paia … o le pogai lea o a tatou molimau e uiga i le Tama ma le Alo. …
“Tatou te manaomia le Agaga Paia o se paaga tumau e fesoasoani ia i tatou ia faia filifiliga sili o faaiuga e faafetaiaia i tatou i aso taitasi.” … O le mafutaga ma le Agaga, o le a tuuina atu ai ia i latou [a tatou talavou] le malosiaga e teena ai le tiapolo ma, pe a talafeagai ai, salamo ma foi i le ala sao ma vaiti. … O i tatou uma e manaomia le faamalosiauga lea e maua e ala i le Agaga Paia. … O le mauaina o le meaalofa o le Agaga Paia, e fesoasoani ai i tagata o aiga e faia filifiliga poto—filifiliga ia o le a fesoasoani ia i latou e foi i o latou aiga i lo latou Tama i le Lagi ma Lona Alo, o Iesu Keriso, e nonofo faatasi ma i Laua e faavavau” (“O Le Feagaiga o le Papatisoga: Ia I Ai i le Malo ma le Malo,” Ensign, Nov. 2000, 8).
-
O a auala o le a fesoasoani ai faamanuiaga o loo i lau lisi i le autalavou o le Ekalesia?
Valaaulia tamaiti e toe iloilo le lisi o faamanuiaga na latou tusia, ma mafaufau i mea e manaomia ona tatou faia e agavaa ai mo nei faamanuiaga. Fai atu ia i latou e faitau lē leoa le 3 Nifae 19:9, 13 ma vaavaai mo se mataupu faavae e faatatau i le mauaina o le uunaiga o le Agaga Paia. Fai i tamaiti e tusi i lalo le mataupu faavae ua latou faailoaina mai. Fai atu i nisi o i latou e faasoa mai mea na latou tusiaina. (Atonu e faasoa mai e tamaiti se mea faapei o lenei: O o tatou manaoga amiotonu ma tatalo, e mafai ona faaagavaaina ai tatou ina ia faatumuina i le Agaga Paia.)
-
O anafea na fesoasoani ai ia te oe ou manaoga amiotonu ma tatalo, e te lagonaina ai le uunaiga a le Agaga?
Tusi le faamatalaga lenei i luga o le laupapa. Valaaulia tamaiti e tusi i lalo le fasi faamatalaga lea, ona faauma mai lea i a latou lava upu.
O le a ou faaali atu i le Tama Faalelagi lo’u manao mo le mafutaga ma le Agaga Paia e ala i le …
3 Nifae 19:15–36
Ua faaali mai le Faaola, ma ua tatalo mo tagata ina ia faamamaina e ala i lo latou faatuatua
Fai atu i se tamaitiiti aoga e faitau leotele mai le 3 Nephi 19:15–16. Faamanino atu faapea, a o tootutuli tagata, na latou molimauina Iesu Keriso o ofoina atu tatalo maoti e tolu mo Lona au soo ma le motu o tagata. (Faamalamalama atu faapea, i se taimi mulimuli ane o le lesona, o le a suesueina ai e le vasega le tatalo lona tolu a le Faaola.)
Tusi mau faasino ma fesili nei i luga o le laupapa, a o le’i amataina le vasega (pe saunia i luga o se pepa e tufa atu mo tamaiti taitasi):
O le a se mea e mafai ona e aoao mai lenei fuaitau e uiga i le tatalo?
E faapefea ona e faaaogaina mea ua e aoaoina mai nei fuaiupu i au lava tatalo patino?
Vaevae le vasega i ni vaega e taitoatolu e i ai. (Afai e toalaiti lau vasega, atonu e manaomia le vaevaeina o le vasega i vaega laiti atu.) Tofi se tamaitiiti i vaega taitasi e faitau se tasi o mau fuaitau ua tusia i luga o le laupapa. Faailoa atu i tamaiti aoga e tatau ona latou saunia uma e tali fesili o loo i le laupapa i totonu o a latou vaega.
A uma ona tuuina atu se taimi ia lava, fai i tamaiti e faasoa mai a latou tali i fesili, faatasi ma isi tagata o la latou vaega. Ia saunia e tali atu, pe a fesili mai tamaiti i le mafuaaga na tatalo atu ai le au soo i le Faaola (tagai i le 3 Nifae 19:18). Faamanino atu faapea, i lenei taimi patino, na tatalo atu ai le au soo ia Iesu Keriso ona sa Ia faatasi ma i latou i le taimi lava lena, o se sui o le Tama (tagai i le 3 Nifae 19:22).
Valaaulia se tamaitiiti aoga e faitau leotele le 3 Nifae 19:31–34. Fai atu i le vasega e mulimuli i le faitauga, ma mafaufau i le mafuaaga na matuā aafia ai tagata i le tatalo a le Faaola. Valaaulia ni nai tamaiti e lipoti mai mea ua latou mauaina. E ui atonu e aoaoina e tamaiti aoga le tele o upumoni mai le tasi ma le isi a o latou fefaasoaa’i, o le gaoioiga lenei o le a faamamafa atu ai mataupu faavae e lua, ia atonu o le a latou mauaina mai i la latou suesuega.
Tusi le faamatalaga lenei i luga o le laupapa: A o tatou faatinoina le faatuatua ia Iesu Keriso, …
Fai atu i tamaiti e toe iloilo lē leoa le 3 Nifae 19:28 ma vaavaai mo auala e faauma ai le faamatalaga ua tusia i luga o le laupapa. (Valaaulia tamaiti e tusi i lalo a latou tali. O le tasi auala lenei atonu e mafai e tamaiti ona faauma ai le faamatalaga: A tatou faatinoina le faatuatua ia Iesu Keriso, o le a mafai ona faamamaina i tatou.)
-
O le a le uiga o le faamamaina? E faapefea e le faatinoina o le faatuatua ia Iesu Keriso, ona fesoasoani ia i tatou ina ia mama?
-
O a auala na faatino ai e le au soo le faatuatua, i le taimi o mea na tutupu o loo faamaumau i le 3 Nifae 19?
Ina ia fesoasoani i tamaiti ia malamalama e faamamaina i tatou e le Agaga Paia, toe faamanatu ia i latou na maua e le au soo le Agaga Paia ma na “faatumuina … i le afi” (3 Nifae 19:13). Faamalamalama atu faapea o le fuaitau “faatumuina … i le afi” o se faailoga, e faatatau i le faamanuiaga o le faamamaina e ala i le uunaiga a le Agaga Paia.
Fai atu i tamaiti e toe faitau lē leoa le 3 Nifae 19:23, 29 ma vaavaai mo se isi faamanuiaga e o’o mai ia i latou o e maua le Agaga o le Alii. (Pe a uma ona faitau tamaiti, atonu e te manao e fautua atu ia i latou e faailoga i fuaiupu uma e lua le fuaitau “ina ia tasi i tatou.”)
-
E faapefea ona tasi Iesu Keriso ma le Tama? (E eseese i laua, i tino, ae tasi i laua i faamoemoega ma aoaoga faavae. I le finagalo e tasi atoatoa, ua laua faataunuuina ai le fuafuaga paia o le faaolataga a le Tama Faalelagi.)
-
O le a le uiga mo i tatou o le avea ia tasi ma le Atua le Tamama le Alo?
-
O le a le mea ua tatou aoaoina mai le 3 Nifae 19:23, 29 e uiga i le auala e mafai ai ona tasi i tatou ma i Laua? E ala i le faatuatua, e mafai ona faamamaina ai i tatou ma avea ia tasi ma Iesu Keriso, a o tasi o Ia ma le Tama.)
Valaaulia se tamaitiiti aoga e faitau le saunoaga a Elder D. Todd Christofferson o le Korama a Aposetolo e Toasefululua: Fai i le vasega e faalogologo mo le auala e mafai ai ona tasi i tatou ma le Tama ma le Alo:
“Na maua e Iesu le lotogatasi atoatoa ma le Tama, e ala i le gauai atu o Ia lava, i le tino ma le agaga, i le finagalo o le Tama. O lana galuega e manino lava lona taulaiga, aua foi sa le finagalo o Ia e faavaivaia pe faalavelaveina lo la tasi ma le Tama. Na fetalai Iesu e faatatau i Lona Tama, e faapea, ‘Ou te faia pea lava o mea lelei ia te ia (Ioane 8:29). …
“O le mea moni lava o le a le mafai ona tatou tasi ma le Atua ma Keriso, sei iloga tatou te avea o Laua finagalo ma faamoemoe, e fai ma o tatou faanaunauga sili. O lea usiusitai e le mafai ona ausia i se aso se tasi, peitai e ala mai i le Agaga Paia, o le a aoaoina ma taitaiina i tatou e le Alii, pe afai tatou te naunau i ai, seia oo i le taimi tonu, e mafai ona faapea mai ai ma le faamaoni, o Ia ua i totonu ia i tatou, e pei o le Tama o i totonu ia te Ia” (“Ina ia Tasi i La’ua ia i Tatou,” Liahona, Nov. 2002, 72, 73).
Valaaulia tamaiti e faitau lē leoa le 3 Nifae 19:35–36 ma ia mafaufau loloto i le malosi o a latou lava tatalo. Folafola atu i tamaiti e mafai foi e i tatou ona maua aafiaga faaleagaga sili atu ma tuputupuae i le tulaga o le avea ia tasi ma le Tama ma le Alo, pe a tatou faateleina lo tatou faatuatua ma tatalo faatauanau mo le mafutaga ma le Agaga.
Tala ma Faamatalaga o Talaaga
3 Nifae 19:10–13. Faafouina i le Papatisoga
Na faamalamalama mai e Peresitene Iosefa Filitia Samita le mafuaaga na manaomia ai le toe papatisoina o le au sa Nifaē:
“E leai se mea uiga ese i le mea moni na tupu faapea, ina ua afio mai le Alii i sa Nifaē, na papatisoina Nifae faapea foi isi tagata uma, e ui lava na papatisoina muamua i latou.
“O le Ekalesia sa i ai i sa Nifaē, a o le’i afio mai Keriso, sa le’i i ai i lona tulaga atoatoa ma sa i lalo o le tulafono a Mose. Sa toefuatai e le Faaola le atoatoaga ma tuu atu ia i latou sauniga ma faamanuiaga uma o le talalelei. O le mea lena, na avea moni ai o se faalapotopotoga fou, ma e ala i le papatisoga na latou o mai ai i totonu.
“Ua i ai se tulaga faapena i lenei tisipenisione. O le perofeta o Iosefa Samita ma Oliva Kaotui na papatisoina e ala i le faatonuga a le Agelu o Ioane le Papatiso. E toatele isi na papatisoina a o le’i faatulagaina le Ekalesia. Peitai ane, i le aso na faatulagaina ai le ekalesia, o i latou uma na papatisoina muamua na toe papatisoina, e le mo le faamagaloina o agasala, ae mo le ulufale ai i le Ekalesia. I vaega taitasi sa tutusa lava le mafuaaga” Tali i fesilio le Talalelei,tuut. Iosefa Filitia Samita leititi.,5 vols. [1957–66], 3:205–6).
3 Nifae 19:18, 22. “Sa latou tatalo ia Iesu”
Mai tusitusiga paia ma aoaoga a perofeta o aso e gata ai, ua tatou iloa ai e ao ona tatou tapuai i le Atua le Tama, ma ua na o Ia e tatalo atu i ai. E le tatau ona tatou tatalo atu ia Iesu Keriso. Mo se faataitaiga, na aoao e le Faaola le au sa Nifaē, “E tatau ai ona outou tatalo atu i le Tama i lo’u igoa” (3 Nifae 18:19). Peitai ane, e le’i leva ona aoao atu e le Faaola lenei mea, ae tatalo sa’o atu lava Lona au soo sa Nifaē ia te Ia (tagai i le 3 Nifae 19:18). Na latou faia lena mea, Na Ia fetalai ai, ona o lea na Ia faatasi ma i latou (tagai 3 Nifae 19:22). Na faamalamalama e Elder Bruce R. McConkie o le Korama a Aposetolo e Toasefululua faapea, o lenei mea o se mea na faatagaina— o se tulaga e ese mai ai:
“Sa i ai se mafuaaga faapitoa na ala ai ona faia lea tulaga i lenei faataitaiga, ma mo na o le tasi lava le taimi. Ua uma ona aoao atu e Iesu i latou ina ia tatalo e ala i lona suafa i le Tama, lea na latou faia muamua. O Iesu sa faatasi ma i latou, o se faailoga o le Tama. O le vaai ai ia te ia, sa faapei lava o loo latou vaai i le Tama, o le tatalo ai ia te ia, sa faapei lava o loo latou tatalo atu i le Tama. Sa o se tulaga faapitoa ma tulaga ese” (The Promised Messiah [1978], 560, 561).