Potutusi
Lesona 9: 1 Nifae 5

Lesona 9

1 Nifae 5

Faatomuaga

A o faatalitali le ava a Liae o Saraia mo ona atalii ina ia toe foi mai Ierusalema, sa fefe o ia faapea ua fano i latou i la latou taumafaiga e maua mai papatusi apamemea. Ina ua latou toe foi mai ma le saogalemu faatasi ma papatusi, sa ia mauaina se molimau malosi atu faapea sa taitaiina ma faasaoina e le Atua lona aiga. Sa suesueina e Liae papatusi apamemea ma iloa ai le matua taua tele o ia mea i lona aiga. A o ia faitauina papatusi, sa faatumulia o ia i le Agaga Paia, ma sa ia vavalo atu faapea o tusitusiga paia ua i ai, o le a faasaoina mo ana fanau.

Fautuaga mo le Aoaoga

1 Nifae 5:1–9

Ua toe foi mai ma le saogalemu atalii o Liae i lo latou aiga i le vao

Valaaulia se tamaitiiti aoga e faitau leotele le 1 Nifae 5:1–3. Fai atu i le vasega e vaavaai mo mafuaaga na amata ai ona muimui Saraia.

  • O a muimuiga a Saraia? (O tali atonu e aofia ai le faapea o Liae o se alii mau faaaliga, faapea sa ia taitaia ese lona aiga mai le laueleele o lo latou tofi, ma faapea sa ia faia faaiuga e ono taitai atu ai i le leiloloa o ona atalii, ma o lena mea e ono taitai atu ai i lo latou lava oti i le vao.)

Mafaufau e faaaoga le vaega lenei mai i Vitio o le Tusi a Mamona a o e aoao atu le vaega lenei (tagai i le Vitio o le Tusi a Mamona: Faatonuga mo Faiaoga Seminare).

Fai atu i tamaiti aoga e manatunatu i se taimi atonu na latou muimui ai e uiga i se tulaga o se mea na tupu e ui lava sa le’i i ai ia i latou faamatalaga uma e uiga i lena tulaga.

Valaaulia se tamaitiiti aoga e faitau leotele le 1 Nifae 5:4–6. Fai atu i le vasega e taulai atu o latou mafaufau i le auala na tali atu ai Liae i muimuiga a Saraia.

  • O a mea ua faagaeetiaina ai oe e uiga i le auala na tali atu ai Liae i le muimui a Saraia? (Atonu e te manao e faasino atu faapea, na tali atu Liae faatasi ma le molimau ma le loto talitonu i le Alii, nai lo le mata’u po o le masalosalo. Sa ia le’i tali atu i le ita po o le le onosai.)

  • O le a le mea e mafai ona tatou aoaoina mai le tali a Liae ia Saraia?

Fai atu i se tamaitiiti aoga e faitau leotele le 1 Nifae 5:7–9.

  • O le a le mea na maua mai e Saraia mai lenei aafiaga?

1 Nifae 5:10– 22

Ua sailiiliina e Liae papatusi apamemea

Fai atu i tamaiti aoga e manatunatu pe i ai lava se mea atonu latou te mafaufau e ositaulagaina ai o latou ola ina ia maua mai pe tausiaina.

Valaaulia se tamaititi aoga e otooto le 1 Nephi 3–4 ma faamatala osigataulaga na faia e le aiga o Liae ina ia maua mai ai papatusi apamemea. (Na lamatia ola o Nifae ma ona uso, ositaulagaina a latou oa, ma faimalaga i se malaga umi.)

  • Aisea e te manatu ai ua alagatatau na ituaiga o osigataulaga?

Faamalamalama atu ina ua mae’a ona osia e le aiga osigataulaga ma ave atu le faafetai i le Alii, na amata loa lava ona faitau Liae i mea o i ai i papatusi. Valaaulia ni tamaiti aoga eseese e feauauai i le faitauina leotele o le 1 Nifae 5:11–16. Fai atu i le vasega e vaavaai mo mea na mauaina e Liae i luga o papatusi apamemea. Atonu e te manao e lisi faapupuu a latou tali i luga o le laupapa.

Valaaulia tamaiti aoga e faitau lemu le 1 Nifae 5:10 . Fai atu ia i latou e vaavaai mo le upu lea e faamatalaina ai le faitauina e Liae o tusitusiga paia. (Sa ia “sailiili i ai.”) Valaaulia tamaiti aoga e faatulaga i latou i paga taitoalua e talanoa ai le fesili lenei:

  • O le a le eseesega i le va o le sailiiliina o tusitusiga paia, ma le na o le faitauina? (Atonu e te manao e uunai tamaiti aoga e faamatala e uiga i taimi na latou sailiiliaina ai tusitusiga paia.)

Faitau le saunoaga lenei a Elder D. Todd Christofferson o le Korama a Aposetolo e Toasefululua:

“O lou fai atu e ‘suesue’, o lona uiga, e sili atu nai lo le na ona faitau. O se mea lelei i nisi o taimi le faitau o se tusi mai tusitusiga paia, mo sina taimi ia maua ai se lagona aoao o lana savali, ae ina ia liua, e tatau ona e manatu mamafa i le tele o le taimi e te faaaluina i tusitusiga paia, nai lo le tele o lau faitau i lena taimi. Ou te iloa o nisi taimi tou te faitauina ai ni nai fuaiupu ona mafaufau lea i ai, ma toe faitau ma le faaeteete na lava fuaiupu, ma a o outou mafaufau pe o le a le uiga, tou te tatalo mo se malamalama, tuufesilisili i lou mafaufau, ma faatalitali mo ni lagona faaleagaga, ma tusitusi i lalo lagona ma malamalamaaga e oo mai ina ia mafai ai ona outou manatua ma aoao atili ai. O le suesue faapea, atonu e le tele ni mataupu po o ni fuaiupu tou te faitauina i se afa itula, ae peitai o le a e tuua ai se vaega i lou loto mo le upu a le Atua, ma o le a fetalai atu o Ia ia te oe. Manatua le faamatalaga a Alema i le lagona e maua ai: “E amata ona faateleina ai lou loto; ioe, ua amata ona faamalamalamaina ai lo’u mafaufau; ioe, ua amata ona suamalie ia te a’u” [Alema 32:28] (“Pe a Liua Mai Oe,” Ensign po o le Liahona, Me 2004, 11–12).

Tuu atu i tamaiti aoga le taimi e tomanatu ai i a latou lava suesuega o tusitusiga paia. Fai atu ia i latou e tusi i totonu o a latou api talaaga mo le suesueina o tusitusiga paia po o api e tusi ai faamatalaga i le vasega, e uiga i auala aoga latou te suesueina ai tusitusiga paia. A mae’a ona latou tusitusi, valaaulia i latou e mafaufau pe faamata e faapefea ona faaleleia a latou suesuega o tusitusiga paia. Fai atu ia i latou e filifili se auala se tasi e faaleleia atili ai a latou lava sailiiliga o tusitusiga paia. Uunai i latou e tusi lenei sini i a latou api talaaga mo le suesueina o tusitusiga paia. Atonu e te manao e fautua atu ina ia fefaasoaai e tamaiti aoga le sini faatasi ma se isi tagata (mo le faataitaiga, o oe, o se matua, po o se isi tamaitiiti aoga) o le o le a faamanatuina atu ia i latou le sini ma uunaia i latou e ausia.

Faamalamalama atu faapea na faamanuiaina e le Alii Liae mo le suesueina o tusitusiga paia. Ina ia fesoasoani i tamaiti aoga e iloaina nei faamanuiaga, valaaulia i latou e faitau le leoa le 1 Nifae 5:16–20.

  • Na faapefea e le sailiiliina o papatusi apamemea ona aafia ai Liae?

Faamamafa atu faapea, ina ua sailiiliina e Liae tusitusiga paia, sa faatumuina o ia i le Agaga Paia ma maua ai faaaliga “e faatatau i ana fanau” (lana fanau). Faamautinoa atu i tamaiti aoga faapea a o tatou sailiiliina tusitusiga paia, e mafai ona faatumuliaina i tatou i le Agaga Paia ma maua ai faaaliga. E faapea foi, pe a tatou ositaulagaina o tatou taimi ma le malosi e sailiili ai tusitusiga paia e pei ona sa faia e Liae, e mafai ona tatou maua le malosi e tausi ai poloaiga a le Atua.

  • O a auala ua faamanuiaina ai oe e le sailiiliina o tusitusiga paia?

  • O anafea na e lagonaina ai le Agaga Paia, a o e suesueina tusitusiga paia?

Valaaulia se tamaitiiti aoga e faitau le faamatalaga lenei, lea na molimau mai ai Elder Robert D. Hales o le Korama a Aposetolo e Toasefululua, e uiga i faamanuiaga o le sailiiliina o tusitusiga paia:

Ata
Elder Robert D. Hales

“A tatou mananao e talanoa i le Atua, tatou te tatalo. Ma a tatou mananao ia te Ia e talanoa mai ia i tatou, tatou te suesue i tusitusiga paia; aua o Ana afioga e fetalaia mai e ala i Ana perofeta. Ma o le a Ia aoaoina i tatou a o tatou faalogologo atu i musumusuga a le Agaga Paia.

“Afai e te le’i faalogoina Lona siufofoga o fetalai atu ia te oe lata mai nei, ia e foi atu i tusitusiga paia ma se vaaiga fou ma e pei o le taimi muamua lea ua e faalogo i ai. (“Tusitusiga Paia: O le Mana o le Atua i lo Tatou Faaolataga,” Ensign po o le Liahona, Nov. 2006, 26–27).

Faitau leotele le 1 Nifae 5:21–22, ma fai atu i tamaiti aoga e mulimuli i a latou tusitusiga paia, a o faitauina. A o outou faitauina, faamamafa atu upu nei: “O le poto sa i le Alii sa tatau ai ona matou ave o nei papatusi faatasi ma i matou, a o matou malaga i le vao.”

  • Aisea e talafeagai ai mo i tatou ona aveina a tatou tusitusiga paia i a tatou malaga?

  • O a auala e mafai ai ona tatou aveina tusitusiga paia faatasi ma i tatou?

Faasino atu faapea o Liae ma lona aiga na mauaina papatusi apamemea e ala i osigataulaga maoae. A na le seanoa tusitusiga paia, atonu o le a le faamanuiaina Liae ma lona aiga i la latou malaga. Uunai tamaiti aoga e aveina tusitusiga paia ma i latou, a o latou faimalaga ai i le olaga faitino.

Valaaulia tamaiti aoga e toe tomanatu i a latou lava suesuega o tusitusiga paia. Mafaufau e valaaulia se tamaitiiti aoga, o le e masani lava ona faitau i tusitusiga paia, e ofoina atu le faamalosiauga ma le molimau i ana uo i le vasega. Uunai tamaiti aoga ia avea o se mausa le faaaluina o se taimi i aso taitasi e sailiili ai tusitusiga paia.

Manatua: O le umi o lenei lesona atonu e maua ai se avanoa mo le gaoioiga o mau tauloto mai le lesona faatoa mavae atu.

Tala ma Faamatalaga o Talaaga

1 Nifae 5:10-22. O le taua o tusitusiga paia

Ina ia aoao atu e uiga i le auala e mafai ai ona tatou mauaina le taitaiga e ala i la tatou suesuega o tusitusiga paia, na faasoa mai e Elder Robert D. Hales o le Korama a Aposetolo e Toasefululua le tala i le suesueina e Liae o papatusi apamemea:

“Ina ua toe foi mai Nifae ma ona uso [mai Ierusalema faatasi ma papatusi apamemea], sa olioli Liae, lo latou tama. Sa amata ona ia suesue i tusitusiga paia ‘e afua mai le amataga,’ ma ‘ua iloa ua manaomia, ioe, ua aoga tele lava … ina ia mafai [e Liae ma lana fanau] ona faatumauina poloaiga a le Atua e oo atu ia [latou] fanau.’

“E moni lava, o papatusi apamemea o se faamaumauga o augatama o Liae, e aofia ai la latou gagana, gafa, ma le mea sili ona taua, le talalelei na aoaoina mai e perofeta paia a le Atua. A o suesue Liae i papatusi, sa ia iloa ai mea ua tatou iloaina uma e ala i le suesueina o tusitusiga paia:

“• O ai i tatou.

“• O a tulaga e mafai ona tatou oo i ai.

“• O valoaga mo i tatou ma a tatou fanau.

“• O poloaiga, tulafono, sauniga, ma feagaiga e ao ona tatou ola ai ina ia maua ai le ola e faavavau.

“• Ma le ituaiga olaga e tatau ona tatou ola ai ina ia mafai ona tumau seia oo i le iuga ma toe foi atu ma le mamalu i lo tatou Tama Faalelagi.

“E matuai taua tele nei upumoni o lea na tuuina atu ai e le Tama Faalelagi ia Liae ma Nifae ni faaaliga manino e faatusaina le afioga a le Atua i se ai uamea. Sa iloa uma e le tama ma le atalii o le pipii atu i lenei taiala malosi, mausali, ma le matuai faatuatuaina ua na o le”pau lea o le ala e tumau ai i lena ala sa’o ma le vaapiapi, e tau atu i lo tatou Faaola” (“Tusitusiga Paia: O Le Mana o le Atua i lo Tatou Faaolataga,” Ensign po o le Liahona, Nov. 2006, 25).

1 Nifae 5:18-19. O papatusi apamemea

O Elder Bruce R. McConkie o le Korama a Aposetolo e Toasefululua, na molimau mai i le taua o le mauaina e le aiga o Liae o papatusi apamemea:

“O le tau o Papatusi Apamemea i le au sa Nifae e le mafai ona soona maualuga. O na papatusi ua mafai ai ona latou faasaoina le gagana (1 Ni. 3:19), o le toatele o le malo, ma le malamalama faalelotu o tagata mai le mea na o mai ai.(1 Ni. 22:30.) I se faatusatusaga, o sa Moleka, o e na taitaieseina mai Ierusalema e tusa ma le 11 tausaga talu ona malaga ese Liae, ma na leai ni a latou faamaumauga e pei o Papatusi Apamemea, e lei umi ae faaitiitia i le liliuese ma le le faatuatua ma leiloa ai la latou gagana, o tagata, ma le tapuaiga.(Ominae 14–18.)

“Mai lea perofeta i lea perofeta mai lea tupulaga i lea tupulaga sa tuufaasolo Papatusi Apamemea ma faasaoina ai e sa Nifae.(Mosaea 1:16;; 28:20; 3 Ni. 1:2.) I se aso o loo lumanai, na folafola mai ai e le Alii o le a aumaia ai, e le afaina i le faagasologa o taimi ma e tumau pea lo latou iila e pei ona i ai i le amataga, ma o tala faaletusipaia na faamaumauina ai i luga o le a ‘oo atu i atunuu uma, ma ituaiga, ma gagana eseese, ma nuu uma.’(Alema 37:3–5; 1 Ni. 5:18–19.)”(Mormon Doctrine, lomiga lona 2 [1966], 103).

Lolomi