Lesona mo Suesuega e Faia i le Aiga
Alema 45–63 (Iunite 21)
Sauniuniga o Anomea mo le Faiaoga o Suesuega e Faia i le Aiga
Aotelega o Lesona o Suesuega e Faia i le Aiga i Aso Taitasi
E le o i ai se faamoemoega o le aotelega lenei o aoaoga faavae ma mataupu faavae lea na aoao e tamaiti aoga a o latou suesue i le Alema 45–63 (iunite 21) ina ia aoao atu o se vaega o lau lesona. O le lesona e te aoao atua ua na o ni nai vaega o aoaoga faavae ma mataupu faavae nei e taulai atu i ai. Mulimuli i uunaiga a le Agaga Paia a o e mafaufau i manaoga o tamaiti aoga.
Aso 1 (Alema 45–49)
Na faamalamalama atu e Alema i lona atalii o Helamana e le mafai ona silasila atu le Alii i le agasala ma se faatagaga. I le faatusatusaina o taua a sa Nifae ma a latou lava taua, e mafai ai e tamaiti aoga ona aoao i upumoni nei: Afai tatou te lototoa i le tausiga o poloaiga e pei ona faia e Kapeteni Moronae, o le a faamalolosia ma faamanuiaina i tatou e le Atua. Na saili Satani e faatoilalo i tatou, ma sa ia faaosoosoina i tatou i ni tulaga e tuu ai i lalo o o tatou tulaga faatonuina.
Aso 2 (Alema 50–52; 54–55)
E ui na faamanuiaina sa Nifae mo se taimi talu ona aluese atu ia Amalekia, ae na faaauau pea ona saunia e Moronae ia tagata mo nisi osofaiga i le lumanai. O faataitaiga a sa Nifae i taimi o tulaga faigata o le a fesoasoani i tamaiti ia malamalama o le faamaoni i le Atua o le a aumai ai le fiafia, e oo lava i le ogaoga o faigata—peitai o le vaevaega ma finauga e mafai ona lepeti ai lo tatou filemu. E mafai e tamaiti aoga ona aoao faapea afai tatou te tutu mausali mo le mea sao, o le a mafai ona tatou taofia ia faatosinaga amioleaga mai le mauaina o le malosi ia i tatou.
I le aluga o nisi o taimi sili ona faigata o fetauaiga, na taitai ai e Helamana se autau o alii talavou o e o le nuu o Amona. Na faaalia e nei talavou malolosi faapea afai tatou te galulue i le faatuatua, o le a mafai ona tatou maua le malosi mai le Atua. Na aoao tamaiti aoga mai faataitaiga a nei talavou totoa faapea afai tatou te faalagolago i le Alii ma usiusitai ia te Ia ma le atoatoa sao, o le a Ia lagolagoina i tatou i o tatou taua. E ui i le tele o o latou manua na maua ma le tele o faigata sa latou onosaia, ae na faaalia lava e le autau sa Nifae ma fitafita talavou totoa le tulaga lea afai tatou te liliu atu i le Atua i taimi o faigata ma puapuaga, o le a mafai ona tatou mauaina le faamautinoaga faalelagi faapea o le a faamalolosia lo tatou faatuatua ma aumaia ia i tatou le faamoemoe.
Aso 4 (Alema 59–63)
Talu ai ona o fouvalega i totonu lava, na aveesea ai le tele o aai a sa Nifae; o lenei mea o le a faailoa atu ai i tamaiti e sili atu le faigofie ma sili atu le lelei pe afai e tumau faamaoni nai lo le toe foi i le faatuatua pe a mavae le liliuese. Na vavevave Moronae i le tuuaia o le faamasino sili o Paorana ona o le faatamala i ona tiute, ma o le a aoao ai e tamaiti le tali atu a Paorana lea na ia filifili ai e aua nei ona tiga i nei upu ma amioga a isi. E le gata i lea, o le a aoao tamaiti aoga afai tatou te tutufaatasi i le amiotonu faatasi ai ma isi, o le a sili atu lo tatou malolosi i o tatou taua e faasagatau atu ai i le amioleaga, e pei ona faaalia e Moronae ma Paorana.
Faatomuaga
Talu ai o lenei lesona e aofia ai ia mataupu e 19 o le tusi a Alema, o le a le mafai ona e aoao atua pe faamamafaina uma ia talaaga faasolopito ma aoaoga faavae ma mataupu faavae uma ia na aoaoina e tamaiti i le aluga o le vaiaso. O fautuaga faafaiaoga nei o le a tuu atu ai i tamaiti se avanoa e faaaoga ai ia upumoni sa latou aoaoina mai le suesue i fetauaiga a sa Nifae i fetauaiga i o latou lava olaga. Suesue ma le agaga tatalo ia mau mo lenei lesona ina ia mafai ona musuia oe e faamamafa atu ia upumoni ia e manaomia e tamaiti aoga ona taulai atu i ai i le taimi o le vasega.
Fautuaga mo le Aoaoga
Alema 45–63
O le faalagolago i le Atua ma le mulimuli i taitai musuia, na mafai ai e sa Nifae ona faatoilalo ia sa Lamana.
Tusi le faamatalaga lenei a Peresitene Ezra Taft Benson i le laupapa ao lei amataina le vasega: “Mai le Tusi a Mamona ua tatou aoao ai i le ala na ola ai soo a Keriso i taimi o taua” (“O Le Tusi a Mamona—O Le Maa Auau a Lo Tatou Tapuaiga,” Ensign, Nov. 1986, 7).
Fai atu i tamaiti e tau mai nisi o taua lea na tauina e le atunuu lea o loo latou nonofo ai. Ona fai atu lea ia i latou e tau mai nisi o luitau e ono feagai ma tagata i le taimi o se taua.
Fesili atu: Faamata aisea e faigata ai le avea ma se soo a Iesu Keriso i le taimi o se taua?
Fai i tamaiti e mafaufau e uiga i ni taua sa latou suesueina i vaiaso ua tea, e pei ona faamaumauina i leAlema 45–63. Atonu e te manao e uunaia i latou e toe faamanatu faatopetope nisi o aotelega o mataupu mo Alema 45–63. Valaaulia i latou e tau mai nisi o luitau na feagai ma sa Nifae i taimi o latou taua.
Toe faamanatu i tamaiti e tusa lava pe tatou te lei tau lava i se taua faaletino, ae o loo tatou auai uma lava i se taua faaleagaga. Valaaulia se tamaitiiti aoga e faitau le faamatalaga lenei mai ia Peresitene Henry B. Eyring o le Au Peresitene Sili, o le sa faamatala mai se taua faaleagaga lea o tatou auai uma i ai. Atonu e te manao e saunia se kopi mo tamaiti taitasi.
“O le a outou manaomia le lotototoa ma le lototetele aua ua tusia o outou igoa i le autau a le Alii i le tisipenisione faaiu. E le o se taimi lenei o le filemu. Na faapea lava talu mai ona faatulaga e Satani ana au e faasagatau atu i le fuafuaga a lo tatou Tama Faalelagi i le muai olaga. Tatou te le iloa faamatalaga auiliili o le taua i lena taimi. Ae ua tatou iloa se taunuuga se tasi. Na tuliesea mai Satani ma ana au i le lalolagi. Ma talu mai le foafoaina o Atamu ma Eva o loo faaauau ai lava le feteenaiga. Ua tatou vaaia ua faateteleina. Ma ua fautua mai tusitusiga paia o le a oo ina sili atu le leaga ma o le a toatele tagata o le itu a le Alii e maliliu faaleagaga” (“Ua Lavea le Fitafita!” Ensign po o le Liahona, Me 2009, 63).
Faasino i tamaiti le faamatalaga lea a Peresitene Benson o loo i le laupapa. Tau atu ia i latou pe o tatou talanoa e uiga i le taua faaletino po o le taua faaleagaga, e moni le faamatalaga. Faamatala atu o le suesue i olaga o le au soo o e na soifua mai i le vaitaimi o taua i taimi o le Tusi a Mamona o le a mafai ona fesoasoani ia i tatou e atiina ae ai ni uiga lelei lea o le a taua i a tatou lava taua faaleagaga.
Tusi ia igoa ma mau faasino nei i le laupapa, pe saunia i se pepa e tufa atu. Fai i tamaiti e filifili se tasi o nei tagata po o ni vaega e suesue i ai. Taumafai ina ia tofu tamaiti ma se tagata e toatasi po o se vaega e suesue i ai.
-
Moronae—Alema 46:11–21; 48:7–17
-
Helamana—Alema 48:19–20; 56:2–9; 58:4–12, 32–37
-
O fitafita totoa talavou e 2,060 —Alema 53:16–22; 56:47–56; 57:19–27
-
Paorana—Alema 50:39–40; 51:1–7; 61:1–21
Tuu atu i tamaiti se taimi e suesue ai i le tele o mau latou te mafaia e uiga i tagata taitasi po o se vaega latou te filifilia. Fai atu ia i latou e sauni e aoao atu ni manatu nei i le vasega (atonu e te manao e tusi mea nei i le laupapa pe tuu i se pepa ma tufa atu):
-
O se mea na tupu mai le olaga o lenei tagata po o vaega lea na faaalia ai le avea moni o nei tagata o ni soo o le Faaola.
-
O se tasi po o le sili atu foi o ni uiga lelei o lenei tagata po o vaega na fesoasoani latou te tumau ai ma le lototoa i le taimi o le taua faatasi ai ma sa Lamana.
-
O se tasi o mataupu faavae o le talalelei e mafai ona tatou aoao mai lenei tagata po o vaega lea e mafai ona faamalosia ai i tatou i o tatou taua faaleagaga i lenei vaitaimi.
Valaaulia le tele o tamaiti aoga e mafai e faasoa mai se mea latou aoaoina i le vasega. Atonu e te manao e fai atu i tamaiti e tusi ni mataupu faavae o le talalelei sa latou aoaoina i le laupapa.
Mafaufau e fai atu ia fesili nei ina ia fesoasoani ai i tamaiti aoga e faaaoga mea sa latou aoaoina mai a latou suesuega o leAlema 45–63:
-
Mafaufau i ni uiga lelei o se soo o Iesu Keriso na e vaaia i tagata o e na soifua i le taimi o taua ma sa Lamana. O fea o nei uiga e sili ona e manao e atiina ae i lou olaga? Aisea?
-
O a nisi o taua faaleagaga o feagai ma i tatou i lenei vaitaimi? E mafai faapefea e faataitaiga a nei soo a le Faaola ona fesoasoani ia te oe ina ia maua le faatuatua ma le lototoa ao e feagai ai ma nei taua?
Atonu e te manao e faasoa mai se tasi o au fuaitau e sili ona e fiafia i ai mai le Alema 45–63. Molimau atu o nei mataupu faavae na tatou aoaoina mai nei mataupu o le a mafai ona fesoasoani ia i tatou ina ia avea ai ma soo moni o Iesu Keriso i taimi o fetauaiga faaleagaga i aso mulimuli.
Le Isi Iunite (Helamana 1–9)
Faamatala atu i tamaiti o le mataupu muamua o le Helamana o loo faamaumauina ai le maliliu o ni faamasino sili se toatolu. Tau atu ia i latou o le a latou maua ai ni tali i fesili nei: Na faapefea ona maliliu ia faamasino? O le a se vavega na tupu ia Nifae ma Liae ina ua la i ai i le falepuipui? O ai le siufofoga lea na la faalogoina? Faamatala atu i tamaiti o le perofeta o Nifae na mafai ona faailoa mai se fasiotiga e ala i le mana o valoaga.