Lesona 56
Mosaea 7–8
Faatomuaga
Pe tusa ma le 80 tausaga a o lei avea Mosaea le atalii o le Tupu o Peniamina ma tupu, sa i ai se tagata e igoa ia Senifa na taitaia se vaega o tagata Nifae mai Saraemila e nonofo i le laueleele o Nifae, lea na faapea “o le laueleele o lo latou tofi” (tagai Ominae 1:27–30). Na faatagaina e le Tupu o Mosaea se tagata e igoa ia Amona e taitaia se vaega toaitiiti i le laueleele o Nifae ia iloa po o le a le mea ua oo i ai le vaega a Senifa. Na maua atu e Amona ma ana paaga ia e na tutupu mai i le vaega a Senifa o nofo pologa i tagata sa Lamana. O le atalii o le atalii o Senifa o Limae lo latou tupu. O le taunuu atu o Amona na avatu ai le faamoemoe ia Limae ma ona tagata. Na fesili Limae ia Amona pe mafai ona ia faaliliuina ia faamaumauga i papatusi e 24 auro na maua e ona tagata. Na faamatala e Amona o le tupu i Saraemila, o le Tupu o Mosaea, o se tagatavaai e mafai ona faaliliuina na faamaumauga anamua.
Fautuaga mo le Aoaoga
Mosaea 7
Na maua e Amona le laueleele o Liae-Nifae ma iloa ai le ala na nofo pologa ai tagata o le Tupu o Limae.
Tusi le mea lea i luga o le laupapa: faanoanoa: lagona le salamo po o le faavauvau
-
O a ni mafuaaga e ono faanoanoa ai tagata?
Valaaulia se tamaitiiti e faitau leotele le Mosaea 7:24, ma fai i le isi vaega o le vasega e mulimuli ai. Faasino i ai le fasifuaitau “ua oo mai nei mea uma ona o le amioletonu.” Faamatala o le fuaiupu lenei e faasino i tulaga na alia’e mai ona o filifiliga amioletonu a se vaega o tagata. Valaaulia tamaiti e mafaufau loloto pe na i ai se taimi na latou faanoanoa ai ona o se tulaga na tupu “ona o le amioleaga.” Faamatala o le aso, o le a latou suesue ai i le Mosaea 7–8 ia latou aoao ai e uiga i se tupu e igoa ia Limae, ma mafuaaga o lona faanoanoa tele. Valaaulia tamaiti e vaavaai po o a mea na uunaia e Limae lona nuu e fai ina ia aveesea ai lo latou faanoanoa.
Valaaulia se tamaitiiti e faitau leotele le Mosaea 7:1Fai i le vasega e faailoa mai nofoaga e lua o loo ta’ua i le fuaiupu lea. Tusi i luga o le laupapa le ata muamua o loo avatu ai i lenei lesona, ma fai i tamaiti e faia foi lena lava mea i a latou api talaaga mo le suesueina o tusitusiga paia po o a latou api o le vasega. A e faaaogaina le ata lea, faamatala e leai se tulaga aloaia o le Ekalesia e uiga i le faataatiaga faalelaueleele o le Tusi a Mamona vagana ai mea na tutupu i Amerika.
Manatua: I le taimi o la latou suesuega o le tusi a Mosaea, o le a faaopoopo e tamaiti nisi faamatalaga ia latou ata. Ina ia mautinoa e lava le avanoa e faaopoopo ai nei faamatalaga, tusi le ata i luga o le laupapa e pei ona faaalia. Faasino i ai le avanoa faaopoopo a o lei amata tusia ata a tamaiti. (O loo maua le ata ua mae’a i le faaopoopoga i le faaiuga o le tusi lesona lenei.)
Faamatala ina ua taunuu le aiga o Liae i le laueleele folafolaina, sa latou faamautuina i latou lava i le laueleele o Nifae (o nisi taimi e faaigoa ai o le laueleele o Liae-Nifae po o le laueleele o lo latou uluai tofi). E lei leva ona maliu Liae, sa poloai atu le Alii ia Nifae e sola i le vao, ma ave i latou uma e mananao latou te o. Na nonofo ai pea tagata o Nifae i le laueleele o Nifae ae sa vavaeese i latou mai i e na mulimuli ia Lamana ma Lemuelu. Ina ua mavae le tele o tausaga, sa poloaiina e le Alii se vaega o tagata Nifae e sosola ese mai le laueleele o Nifae. O lea vaega na faamautu mulimuli ane i se laueleele na faaigoa o Saraemila, e i le itu i matu o le laueleele o Nifae.
I le tele o augatupulaga mulimuli ane, sa taitaia ai e se tagata e igoa ia Senifa se vaega o sa Nifae i le laueleele o Nifae e “fia maua le laueleele o lo latou tofi” (tagai Ominae 1:27–30). O Senifa o se tasi o se isi vaega na lei mafai ona mauaina le laueleele i lena itu (tagai Mosaea 9:1–2). Fai i tamaiti e tusi se ‘aū mai Saraemila i le laueleele o Nifae ma faaigoaina “vaega o sa Nifae na taitaia e Senifa.” O le vaega lenei na tuua Saraemila pe tusa o le 80 tausaga a o lei avea Mosaea ma tupu.
Valaaulia tamaiti e toe faitau le Mosaea 7:1, ma vaavaai mo mea na manao Mosaea e iloa. A uma ona lipoti atu, ona valaaulia lea o i latou e faitau le Mosaea 7:2–3 e su’e ai po o le a le mea na fai e Mosaea ia maua ai se tali i lana fesili. Fai i tamaiti e tusi se ‘aū lona lua mai Saraemila i le laueleele o Nifae, o le malaga a se vaega suesue na taitaia e Amona, ma faaigoaina foi faapena.
Aotele le Mosaea 7:4–11 e ala i le faamatalaina na maua e Amona le aai na nonofo ai tagata na tutupu mai i tagata o Senifa i lalo o le puleaga a le atalii o le atalii o Senifa o Limae. Na vaaia e Limae le vaega a Amona i fafo atu o puipui o le aai. Na manatu o i latou o nisi o faitaulaga amioleaga a lona tama ua maliu, o Noa, o lea na ia faatonuina ai ana leoleo e pue i latou ma faafalepuipuiina (tagai Mosaea 21:23). Na ia fesiligia i latou ina ua mavae aso e lua. Fai i tamaiti e faitau lemu le Mosaea 7:12–15, ma vaavaai mo le tali a Limae ina ua ia iloaina Amona ma le mea na sau ai.
-
Aisea na matua fiafia ai Limae ina ua iloa o Amona e mai le nuu o Saraemila?
Toe faasino i le upu faanoanoa i luga o le laupapa. Aotele le Mosaea 7:16–19 e ala i le faamatalaina na faapotopoto e le Tupu o Limae lona nuu e faafeiloai atu ai Amona ia te i latou, ma tautala atu ia i latou e uiga i mafuaaga o lo latou faanoanoa ma le le fiafia, ma fesoasoani ai ia latou iloa le mea e liliu atu i ai mo se laveaiga.
Tusi le upu mafuaaga i luga o le laupapa i lalo o le faauigaga o le faanoanoa. Valaaulia ni tamaiti e feauauai i le faitauina o le Mosaea 7:20–28. Fai i le vasega e sue ia mea na faailoa mai ai e Limae o ni mafuaaga o tofotofoga ma le faanoanoa o lona nuu. (E mafai ona fesoasoani le ta’u atu i tamaiti o le perofeta na ta’ua i le Mosaea 7:26 o Apinati, lea na susunuina ma maliu ai i le taimi o le nofoagai a le tamā o Limae, o Noa.) A uma ona faitau ia fuaiupu, ona valaaulia lea o ni nai tamaiti e lisi i luga o le laupapa i lalo o mafuaaga ia mea sa latou mauaina.
-
O le a le mea na foliga mai o le mafuaaga autu o lenei faanoanoa o tagata? (amioleaga, po o le agasala.)
Fai i tamaiti e faitau lemu le Mosaea 7:29–32. Valaaulia i latou e filifili se fasifuaitau o loo faaalia ai le malamalama o Limae i le sootaga i le va o agasala a tagata ma le faanoanoa o tagata. (Atonu e manaomia ona e faamalamalama atu o le upu aputi e faasino i le otaota e totoe pe a uma ona tuueseese le fatu saito mai ‘au saito. I le Mosaea 7:30, “selesele mai ai le aputi” o lona uiga o se mea ua le aoga.) Valaaulia ni nai tamaiti e faitau ma faamatala ia fasifuaitau na latou filifilia.
-
E mafai faapefea e le iloaina o taunuuga o a tatou agasala ona fesoasoani ia i tatou?
Valaaulia se tamaitiiti e faitau leotele le Mosaea 7:33 Fai i le vasega e vaavaai mo mea na manao Limae i lona nuu e fai.
-
O a mataupu faavae e mafai ona tatou aoao mai ia Limae ma lona nuu e uiga i le aafiaga o le iloa ma lagonaina le faanoanoa ona o a tatou agasala? (A o faailoa mai e tamaiti mea moni mai lenei mataupu, fesoasoani ia latou iloa o le iloaina ma le lagonaina o le faanoanoa ona o a tatou agasala, e mafai ona taitai atu ai i tatou e liliu atu i le Alii mo se laveaiga. Atonu e te manao e tusi le mataupu faavae lenei i luga o le laupapa.)
Ina ia fesoasoani ia malamalama atili tamaiti i lenei mataupu faavae, fai i ai e mafaufau faapea ua latou alolofa i se tasi ua lagonaina le faanoanoa ona o ana agasala ma ua manao e salamo ma liliu atu i le Alii ae e le o mautinoa pe faapefea ona fai. Molimau atu o le fautuaga a Limae i ona tagata o i le Mosaea 7:33 o loo i ai ki e faatoilalo ai le faanoanoa ma le le fiafia e o faatasi ma le agasala. Valaaulia tamaiti e sue lemu i le Mosaea 7:33, vaavaai mo fasifuaitau e fesoasoani i se tasi ia iloa ai pe faapefea ona “liliu atu i le Alii.” (Atonu e te manao e fautuaina i latou e maka fasifuaitau nei.)
A uma ua lava se taimi, valaaulia ni nai tamaiti e faasoa mai ia fasifuaitau e taua ia i latou. Ia faamatala e tamaiti taitasi le uiga o le fasifuaitau na ia filifilia e ala i le (1) faaupuina i ni ana lava upu pe (2) tuu mai foi ni faataitaiga o faatinoga po o uiga faaalia o se tasi o loo taumafai e faaaoga le mataupu faavae o loo ta’ua i le fasifuaitau.
Fai i tamaiti e manatunatu loloto pe o i ai ni a latou agasala e lei salamo ai o loo mafua ai ona faanoanoa ma le fiafia ma faapena ai foi i latou e alolofa i ai. Valaaulia tamaiti e tusi se tali i le fesili lea i a latou api talaaga mo le suesueina o tusitusiga paia:
-
E mafai faapefea ona e faaaogaina le Mosaea 7:33 i lou olaga i le taimi nei?
Faasoa lau molimau a tatou liliu atu i le Alii ma o tatou loto ma mafaufau atoa, o le a Ia faasaolotoina i tatou mai le faanoanoa e oo mai ona o a tatou agasala.
Mosaea 8
Na iloa e Amona e uiga i papatusi auro e 24 ma ta’u atu ai ia Limae e uiga i se tagatavaai e mafai ona faaliliuina tusitusiga o loo i ai
Fai i ni tamaiti se toalua e o mai i luma o le vasega. Fusi mata o se toatasi, ona tuu lea o ni tusi, fasipepa, po o nisi mea e le afaina ai i soo se mea i luga o le fola o le potu. Fai i le tamaitiiti lona lua e ta’ugutu atu ni faatonuga e fesoasoani ai i le tamaitiiti muamua e savali ai i le isi itu o le potu e aunoa ma lona pa’i i se mea o loo i luga o le fola. Ona fusi lea o mata o le tamaitiiti lona lua. Toe faatulaga mea o i luga o le fola, ae tuu atu e le tamaitiiti muamua ia faatonuga. Peitai, o le taimi lea, ia lē faaaogaina ma le loto i ai e le tamaiiti o loo fusi mata ia faatonuga. (Talanoa faalilolilo i le tamaitiiti lea a o lei amataina le vasega, ma fai i ai e aua na te amanaiaina ia faatonuga.)
-
O le a le taua o le faalogo i se tasi o loo mafai ona vaai i mea e le o mafai ona tatou vaai i ai?
Aotele le Mosaea 8:5–12 e ala i le faamatala na auina atu e Limae se aumalaga ia maua mai se fesoasoani mai Saraemila i se taimi a o lei taunuu mai Amona. Sa feofeoa’i lea vaega i le vao, ma nai lo latou mauaina o Saraemila, sa latou mauaina ia ponaivi o se nuu ua faaumatia. O iina na latou mauaina ai ni papatusi auro e 24 o i ai ni tusitusiga. (Atonu e te manao e faamatala o ia ponaivi na maua e tagata o Limae ona pau na o mea na totoe o le nuu o sa Iareto. O se faamaumauga o sa Iareto, na tusia mai papatusi auro e 24, o loo aofia ai i le Tusi a Mamona ua faaigoa o le tusi a Eteru.) Faaopoopo le malaga lea i le ata o i luga o le laupapa. Faamatala na manao le Tupu o Limae ia malamalama i tusitusiga na vaeina i luga o papatusi e 24. Na ia fesili ia Amona pe na te iloaina se tasi e mafai ona ia faaliliuina.
Valaaulia se tamaitiiti e faitau le tali a Amona o loo i le Mosaea 8:13–15. Fai i le vasega e vaavaai mo le faalaniga na faaaoga e Amona e faaigoa ai se tagata o i ai le mana e faaliliu ai na faamaumauga. Fai i tamaiti e suesue lemu i le Mosaea 8:16–19, ma vaavaai mo nisi tomai o se tagatavaai. Fai i ni tamaiti e ta’u atu mea ua latou maua.
Tusi le faamatalaga lea i luga o le laupapa: Ua saunia e le Alii ia perofeta, tagatavaai, ma talifaaaliga mo le manuia o tagata.
-
E toafia tagatavaai o i ai i le lalolagi i ona po nei? (Sefululima—uso o le Au Peresitene Sili ma le Korama a Aposetolo e Toasefululua.)
-
O a nisi o mea e faailoa mai e perofeta, tagatavaai, ma talifaaaliga ia i tatou? (Afai e faigata i tamaiti ona tali mai, fesili po o a mea ua faailoa mai e tagatavaai ia i tatou e uiga i autu e pei o faaipoipoga ma aiga, a’oga, faafiafiaga ma faasalalauga, po o le mama a’ia’i taufeusuaiga.)
-
Ua faamanuiaina faapefea lou olaga e perofeta o ona po nei, tagatavaai, ma talifaaaliga?
Atonu e te manao e faamatala pe na faapefea ona faamanuiaina lou olaga e perofeta, tagatavaai, ma talifaaaliga. Valaaulia tamaiti e faitau ma mafaufau loloto i se lauga o se konafesi talu ai nei a se uso o le Au Peresitene Sili po o le Korama a Aposetolo e Toasefululua ma mulimuli i le fautuaga o i lena lauga.
Tala ma Faamatalaga o Talaaga
Mosaea 1–29. Vaaiga aoao faasolopito
Mo se vaaiga aoao faasolopito i le tusi a Mosaea, tagai i le folasaga i le tusi a Mosaea i le tusi lesona lenei.
Mosaea 8:16. “O se tagatavaai o se talifaaaliga ma se perofeta foi”
Na faamalamalama e Elder John A. Widtsoe o le Korama a Aposetolo e Toasefululua le uiga o le faalaniga “perofeta, tagatavaai, ma le talifaaaliga”:
“O faalaniga eseese e tolu i le faalaniga masani, e talitutusa lava le uiga i le faaaogaaga lauiloa, ae e i ai eseesega e lava le taua e faamaonia ai lo latou faaaogaina.
“O se perofeta o se faiaoga. O le uiga taua lena o le upu. Na te aoao le tino o le upumoni, le talalelei, na faaalia mai e le Alii i le tagata; ma i lalo o musumusuga e faamatalaina ai ia malamalama tagata. O ia o se faamatalaupu mo le mea moni. Ae sili i lo lena, na te faaali mai o le auala i le fiafia o le tagata e ala mai lea i le usiusitai i tulafono a le Atua. Na te valaau atu ia salamo i latou e o ese mai le upumoni. E avea o ia ma fitafita mo le faataunuuga o faamoemoega o le Alii e tusa ai ma le aiga o tagata. O le faamoemoega o lona soifua, o le lagolagoina lea o le fuafuaga a le Alii o le faaolataga. Na te faia nei mea uma i le fesootai vavalalata ai lea ma le Alii, seia ‘faatumulia o ia i le mana o le agaga o le Alii.’Mika 3:8; tagai foi MF&F 20:2634:1043:16) …
“I le gasologa o taimi na faauiga ai le upu ‘perofeta’, atonu o le autu lava, o se alii e mauaina faaaliga, ma taitaiga mai le Alii. O le pisinisi autu lava a se perofeta ua manatu sese i ai faapea o le muai ta’u mai o mea o le a tutupu, faaleo maia valoaga, lea ua na o se tasi o galuega faaperofeta.
“I le uiga o se perofeta o se tagata e mauaina faaaliga mai le Alii, o faalaniga ‘tagatavaai ma talifaaaliga’ ua na ona faalauteleina ai o le uiga telē atu ma aofia ai ma le uiga o le faalaniga ‘perofeta.’ Peitai, e manino lava, e tele le poto i le faaupuga patino o galuega a le perofeta o se tagatavaai ma talifaaaliga, e pei ona faia ai i konafesi a le Ekalesia.
“O se perofeta e mauaina foi faaaliga mai le Alii. E mafai ona avea nei ma faamalamalamaga o upumoni ua uma ona maua mai, po o ni upumoni fou e lei mauaina e le tagata. O na faaaliga e gata lava i le tofiga aloaia o loo umia. E le mauaina e le tofi maualalo ni faaaliga mo le tofi e maualuga atu.
“O se tagatavaai o se tasi e iloa mea i mata faaleagaga. Na te iloa le uiga o mea e foliga nenefu i isi; o le mea lea o ia o se tagata faaliliuupu ma faamalamalama o le upumoni e faavavau. Na te muai vaai i le lumanai mai le taimi tuanai ma le taimi nei. Na te faia lena mea e ala i le mana o le Alii e galue tuusao e ala mai ia te ia, pe lē tuusao mai foi e ala mai i meafaigaluega faalelagi e pei o le Urima ma le Tumema. A faapuupuu, o ia o lē e vaai, o lē e savali i le malamalama o le Alii a o pupula ona fofoga. (Tusi a Mamona, Mosaea 8:15–17)
“O se talifaaaliga e faaalia, faatasi ai ma le fesoasoani a le Alii, se mea e lei iloa muamua. Atonu o se mea e fou po o se upumoni ua galo, po o se faaaogaaga fou pe ua galo o se upumoni ua iloa e manaomia e le tagata. O taimi uma lava, o le talifaaaliga e feagai lava ma le upumoni, upumoni a’ia’i (MF&F 100:11) ma o taimi uma foi e oo mai ma le faamaoniga faalelagi. E mafai ona maua faaaliga i auala eseese, peitai e talia lava foi i taimi uma o le talifaaaliga e soifua ma faia ia lava ia ogatusa ma le agaga faalelagi o faaaliga, le agaga o le upumoni, ona agavaa ai lea mo le mauaina o savali faalelagi.
“I se aotelega: O se perofeta o se faiaoga o le upumoni ua iloa: o se tagatavaai o sē e vaai i le upumoni natia; o se talifaaaliga o sē e tauaveina le upumoni fou. I se uiga e sili ona lautele, lea e sili ona faaaoga soo, le faalaniga perofeta, e aofia ai ma isi faalaniga ma ta’uga o le perofeta, o se faiaoga, o lē e vaai, ma lē e tauaveina le upumoni” (Evidences and Reconciliations, arr. G. Homer Durham, 3 vols. in 1 [1960], 257–58; faaopoopo le faamamafa).
Mosaea 2:41. “O se tagatavaai e mafai ona iloa mea … o le a oo mai”
Na faasoa mai e Peresitene Boyd K. Packer o le Korama a Aposetolo e Toasefululua se faataitaiga o le ala e faatino ai e perofeta o aso e gata ai, tagatavaai, ma talifaaaliga, le avea ma tagatavaai:
“O loo tautala tusitusiga paia e uiga i perofeta o ni ‘tagatavaai i luga o le olo’ o lē e iloa atu ‘le fili [a o] mamao ese’ ma lē e vaaia foi mea e le o iloa e mata faalenatura … [aua] ua faatuina se tagatavaai e le Alii i lona nuu.’
“[I le tele o tausaga ua mavae] na lapataia ai i tatou e le Usoga i le malepelepe o le aiga ma fai mai ia tatou sauniuni. Na folasia mai le afiafi faaleaiga i vaiaso taitasi e le Au Peresitene Sili. … Ua saunia mo matua ni ‘anomea silisili mo le aoaoina o a latou fanau, faatasi ai ma se folafolaga o le a faamanuiaina i latou e faamaoni ma faatuatua.
“E ui ina tumau le le suia o aoaoga faavae ma faalapotopotoga ua faaalia, ae na toe fatufatu i la latou sootaga o le tasi i leisi ma le aiga. Na toe faatulaga ia mataupu aoaoina atoa a le Ekalesia —e faavae i tusitusiga paia. Ma sa faaalu tausaga i le tapenapenaina o lomiga fou o le Tusi Paia, le Tusi a Mamona, le Mataupu Faavae ma Feagaiga, ma le PeninaTau Tele. …
“E mafai ona tau ina tatou mafaufau po o fea semanu tatou te i ai pe ana fai e na ona tatou tali atu nei i lenei toefaauigaga matautia o le aiga. Peitai, e le o le tulaga lea. Tatou te le o agai ma le popole e uiga i le taumafai e filifili pe o le a le mea e fai. Ua tatou iloa poo le a le mea e fai ma poo le a le mea e aoao. …
“O le ala ua tatou mulimuli ai e le o sa tatou lava ala. O le ata o le faaolataga, o le ata sili o le fiafia, na faailoa mai ia i tatou, ma o loo faaauau pea ona maua e perofeta ma Aposetolo faaaliga mo le Ekalesia ma ona tagata pe afai e manaomia nisi faaaliga.” (“O Le Tama ma Le Aiga ,” Liahona, Iulai 1994, 25).