Lesona 90
Alema 32
Faatomuaga
Ina ua uma ona molimauina le tulaga faatuiese o tapuaiga a sa Sorama, na amata ona talai atu e Alema ma ona soa le afioga a le Atua i sa Sorama. Na amata ona latou maua ni manuia i totonu o le vasega o tagata matitiva o e na tutuli i fafo mai o latou sunako. O le faatusaina o le afioga a le Atua i se fatulaau, na aoao atu Alema i tagata i le auala e maua ai le afioga a le Atua ma le faateleina o lo latou faatuatua.
Fautuaga mo le Aoaoga
Alema 32:1–16
Na faaalia e tagata sa Sorama ua faalotomaualalaloina lo latou saunia e faalogo i le afioga a le Atua
Fai i tamaiti e mafaufau faapea o oe o se uo na talosagaina i latou pe faapefea ona e iloa e moni le talalelei a Iesu Keriso. Fesili i ai po o le a sa latou tala e fai mai e fesoasoani ai ia te oe i le mauaina o se molimau.
A uma ona faasoa mai e tamaiti o latou manatu, tusi i luga o le laupapa Auala e maua ai ma faamalosia ai se molimau. Tau i tamaiti i le faagasologa o le lesona, o le a e lisiina ia mataupu faavae ma malamalamaaga latou mauaina e uiga i le auala e maua ai ma faamalosia se molimau.
Toe faamanatu atu i tamaiti na vaaia e Alema ma ona uso le auala na tapuai sese ai sa Sorama, o se vaega o sa Nifae na liliuese. Ona o lona faanoanoa i le amioleaga o tagata, o lea na ia tatalo ai mo se faamafanafanaga ma le malosi ina ia mafai ona aoao ai i latou. (Tagai i le Alema 31.)
Valaaulia se tamaitiiti aoga e faitau leotele le Alema 32:1–3. Fai i le vasega e tagai po o fea o vaega o sa Sorama lea na faaalia le fiafia i le savali a faifeautalai. Fai i ai e lipoti mai mea sa latou mauaina.
-
E tusa ma le Alema 32:3, o a ni mafuaaga na matitiva ai nei tagata? (“Sa latou matitiva e faatatau i mea o le lalolagi; ma sa latou matitiva foi i le loto.”)
-
O le a sou manatu, o le a le uiga o le “mativa i le loto”?
Ina ia fesoasoani i tamaiti e tali le fesili lenei, valaaulia nisi o i latou e feauauai e faitau leotele mai le Alema 32:4–12. (Atonu e ono fautua mai tamaiti o le mativa i le loto e aofia ai le lotomaualalo, salamo, ma saunia e faalogo i le afioga a le Atua.)
-
O faapefea ona faaalia i le fesili o i le Alema 32:5 ua matitiva sa Sorama i le loto?
-
Na faapefea ona avea le mativa ma auala e taitaiina atu ai lenei vaega o tagata sa Sorama i faamanuiaga?
-
O a ni mea o aoao mai e nei mau e uiga i le mauaina ma le faamalosia o se molimau? (A o faasoa mai e tamaiti aoga ni mataupu faavae eseese, tusi i lalo o le ulutala o i luga o le laupapa. Ia mautinoa o loo latou faaalia maia le mataupu faavae lenei: O le lotomaualalo e saunia ai i tatou ina ia maua le afioga a le Atua.)
-
Aisea e taua ai le lotomaualalo i le faagasologa o le mauaina ma le faamalosia o se molimau?
Valaaulia ni nai tamaiti aoga e feauauai i le faitauina leotele mai o le Alema 32:13–16. Fai i le vasega e tagai i ni auala eseese se lua e mafai ona faalotomaualalo ai ia tagata. (Atonu e mafai ona filifili ia tagata ina ia lotomaualalo, pe faamalosi foi i latou ina ia lotomaualalo.)
-
O a mea e mafai ona tatou aoaoina e uiga i le lotomaualalo mai nei fuaiupu? (Fesoasoani i tamaiti ia iloa le mataupu faavae lenei: e sili atu le faamanuiaina o i tatou pe a tatou filifili ia lotomaualalalo nai lo le faamalolosia o i tatou e lotomaualalalo.) Aisea e te manatu ai e sili atu le filifili ia lotomaualalo?
-
O le a sou manatu o le uiga o le faalotomaualalo o oe lava “ona o le afioga”? (Alema 32:14). Faamata e faapefea ona faatatau lenei mea i o tatou uiga i le ekalesia, seminare, po o suesuega faaleaiga o tusitusiga paia?
Alema 32:17–43
Ua aoao e Alema sa Sorama i le ala e faateleina ai lo latou faatuatua
Faamalamalama atu na iloaina e Alema se manatu sese sa i ai i le toatele o tagata e uiga i le mauaina o se molimau. Fai i se tamaitiiti aoga e faitau leotele mai le Alema 32:17–18 ao sailia e le vasega lenei manatu sese.
-
O le a se manatu sese sa i ai i le toatele o tagata e uiga i le mauaina o se molimau?
-
O le a le mea e leaga ai le manaomiaina o se faailoga ao lei talitonu? (Atonu e te manao e toe faamanatu atu i tamaiti aoga le faataitaiga a Serema i le Iakopo 7:13–16 ma le faataitaiga a Korioa i le Alema 30:43–52. Atonu e te manao latou te faitauina foi le Mataupu Faavae ma Feagaiga 63:9 e faamamafa atu ai o faailoga o ni aafiaga ia o le faatuatua, e le o se mea e tatau ona tatou talosagaina ae tatou te lei mauaina le faatuatua.)
Faamalamalama atu na aoaoina e Alema ia tagata e uiga i le faatuatua. Fai i tamaiti aoga e faitau le leoa le Alema 32:21, vaavaai i le faauigaina e Alema o le faatuatua. Faailoa atu o lenei mau o se fasifuaitau o le mau tauloto. Atonu e te manao e uunaia ia tamaiti aoga e faailogaina i se auala faapitoa ina ia faigofie ai ona latou sueina.
Fai i tamaiti e faitau le leoa le Alema 32:22, vaavaai mo le fautuaga i le auala e maua ai ma faamalosia ai se molimau. Valaaulia i latou e lipoti mai mea sa latou mauaina.
Faaopoopo le Ia manatua le alofa mutimutivale o le Atua ma le Ia talitonu i le afioga a le Atua i le lisi o i le laupapa.
-
Aisea e taua nei uiga i le atinaeina o lo tatou faatuatua?
Faamalamalama atu ina ia fesoasoani i sa Sorama ia malamalama i le auala e talitonu ai i le afioga a le Atua, na fautua atu Alema latou te faia se faataitaiga.
-
Aisea e fai ai e tagata ni faataitaiga faasaienisi? (Ina ia iloa ai pe moni se talitonuga po o se manatu.)
Fai i tamaiti e faamatala mai ni faataitaiga sa latou faia i ni vasega faasaienisi po o nisi tulaga. Fesoasoani atu ia i latou ina ia iloa e manaomia e faataitaiga ni galuega, ae le na o na taumatemate, i le vaega o se tagata suesue po o le sailiili. O le faagasologa o le mauaina po o le faamalosia o se molimau e manaomia ai foi galuega.
Tuu atu i se tamaitiiti e faitau leotele mai le Alema 32:27. Fai i le vasega e tagai mo le faataitaiga na valaaulia ai e Alema ia sa Sorama e faatino. Faaopoopo le Faataitaiga o le afioga i le lisi o i le laupapa.
-
O le a sou manatu i le uiga o le tala a Alema ina ua ia fai mai ia “tofotofo i [ana] upu”?
-
O le a sou manatu i le uiga o le tala a Alema ina ua ia fai mai ia “ala mai ma fafagu o outou mafaufau”? (Atonu e manaomia lou faamalamalamaina mai o le upu mafaufau e faasino i lo tatou gafatia e mafaufau ai ma galue ma faatino ni mea. Na valaaulia e Alema ia tagata e galulue e tusa ai ma ana upu. Atonu e te manao e faaopoopo le Ala mai ma fafagu o outou mafaufau i le lisi o i le laupapa.)
-
O le a sou manatu o le uiga o le “faaaoga sina vaega itiiti o le faatuatua”?
Ina ia fesoasoani i tamaiti aoga ia iloa le auala e mafai ona latou amataina ai le faatinoga o lenei faataitaiga i o latou olaga, valaaulia i latou e faitau le leoa le Alema 32:28.
-
O le a se mea na faatusatusa i ai e Alema le afioga a le Atua? (O se fatu.)
-
O a nisi punavai o le afioga a le Atua? (O tali e tatau ona aofia ai tusitusiga paia, o aoaoga a perofeta o aso e gata ai, ma faaaliga patino mai le Agaga Paia.)
-
O le a se mea na fai mai Alema e tatau ona tatou faia i lenei “fatu”?
Lisi ia tali a tamaiti i luga o le laupapa. Atonu e te manao e tusiina i lalo o le Faataitaiga o le afioga, lea na e tusia muamua. O le lisi e ono aofia ai ia elemene nei:
-
Fai se avanoa ina ia mafai ona toto ai le afioga (po o le fatu) i lou loto.
-
Aua nei tiaia i fafo le afioga i lou le talitonu.
-
Ia iloa le malena ae i totonu o oe le afioga.
Ina ia fesoasoani i tamaiti ia malamalama i mea sa latou faitauina e uiga i le faataitaiga po o faatusatusaga, fai atu ia fesili nei:
-
E faapefea ona faatusatusa le afioga a le Atua i se fatu lea e mafai ona totoina i o tatou loto? (O tali e mafai ona aofia ai le mafai ona tupu, e mafai ona faamalosia i tatou, ma e manaomia lo tatou tausiaina.)
A o talanoaina e tamaiti le faatusatusaga o le afioga a le Atua i se fatu, valaaulia i latou e faitau le leoa le Alema 33:22–23. Ae latou te lei faitauina, fai atu ia i latou e tagai i le faamalamalamaga a Alema e uiga i “lenei afioga”. Fesoasoani ia i latou ina ia iloa o loo faasino lea ia Iesu Keriso ma Lana Togiola.
-
O le a sou manatu o le uiga o le “tuu ane se avanoa” e totoina ai le afioga i totonu o o tatou loto? (Tagai i le Alema 32:28. O tali e ono aofia ai le manaomiaina e i tatou o le tatalaina o o tatou loto ma le manaomiaina e i tatou o le faia o ni avanoa i o tatou olaga mo le suesueina o tusitusiga paia.)
-
O le a sou manatu o le uiga ia lagona o le a “malena ae” le afioga a le Atua i totonu o lou fatafata? Afai o le afioga a le Atua o loo malena ae i totonu o outou, o le a la le mea o loo tupu i lau molimau ma lou faatuatua?
-
O anafea na faalauteleina ai e le afioga a le Atua lou agaga ma faamalamalamaina lou malamalamaaga?
Fai i ni nai tamaiti e feauauai i le faitauina o le Alema 32:29–34. Valaaulia le vasega e mulimuli i le faitauga, tagai mo upu ma fasifuaitau o loo faamatala mai ai mea sa tatou aoaoina e uiga i le afioga a le Atua. Ona fai lea i tamaiti e faitau mai ia upu ma fasifuaitau ia sa latou mauaina ma faamalamalama mai le mafuaaga na latou filifilia ai. Faasino i le ata o i luga o le laupapa ma fesili atu:
-
Aisea o le a le atoatoa ai lo tatou faatuatua pe a uma ona faatino lenei faataitaiga? O a nisi mea e te manatu e tatau ona tatou faia ina ia maua ai se molimau tumau o le talalelei?
-
O faapefea ona tutusa le tulaga o le fesoasoani i se laau ina ia tupu ae ma le tulaga o le faamalosia o se molimau?
Valaaulia ni nai tamaiti aoga e feauauai i le faitauina leotele mai o le Alema 32:35–40. Fai i le vasega e tagai i le fautuaga a Alema e faatatau i le auala e faamaea ai le faataitaiga.
-
E tusa ma le Alema 32:37–40, o le a se mea e ao ona tatou faia ina ia faaauau pea ona tupu ae lo tatou faatuatua i le afioga a le Atua? (Faaopoopo le Tausia le afioga i le lisi o i le laupapa.)
-
O le a se mea e mafai ona tatou faia e tausia ai le afioga? (O tali e ono aofia ai le mafai ona tatou suesue i tusitusiga paia i aso taitasi, tatalo mo se taitaiiga a o tatou suesue, tagai mo ni auala e faaaoga ai ia tusitusiga paia ma aoaoga a perofeta o aso e gata ai i o tatou olaga, ma le faasoa atu o mea ua tatou iloa.)
-
O le a se mea e tupu pe a tatou tuulafoai i se laau pe le manatu i ai mo lona tausiga? O le a se mea e tupu pe a tatou tuulafoai le afioga a le Atua ua uma ona totoina i o tatou loto?
Fai i tamaiti e tusi i totonu o api o le vasega po o api talaaga mo le suesueina o tusitusiga paia mea sa latou maua mai le Alema 32 e uiga i le auala e maua ai ma faamalosia ai se molimau. E mafai foi ona e fautuaina i latou e tusi ia aotelega nei i totonu o a latou tusitusiga paia i talaane o le Alema 32:37–43.
Valaaulia tamaiti e faasoa mai mea na latou tusia. A o latou faasoa mai, ia faamautinoaina o latou faailoa mai afai tatou te tausia ma le maelega le afioga a le Atua i o tatou loto, o le a tuputupu ae lo tatou faatuatua ma la tatou molimau e uiga ia Iesu Keriso ma Lana talalelei.
Fai i tamaiti e faitau le Alema 32:41–43, tagai i le faamatalaga a Alema e uiga i le laau ma le fua.
-
O fea se isi mea o loo i ai i le Tusi a Mamona se faamatalaga o se laau ma fua e “sili ona suamalie i luga o mea uma ua suamalie”? (Atonu e manaomia lou toe faamanatuina i tamaiti o le faamatalaga o le laau o le ola i le 1 Nifae 8:11–12 ma le 1 Nifae 11:9–24.)
-
I le faaaliga ia Liae ma Nifae e uiga i le laau o le ola, o le a le mea na faatusa i ai le laau ma le fua? (O le laau na faatusa i le alofa o le Atua e pei ona faaalia mai e le Faaola ma Lana Togiola, ao le fua na faatusa i faamanuiaga o tatou mauaina e ala mai i le Togiola. Tagai i le lesona 12 i totonu o lenei tusi.)
-
I le faaaliga ia Liae ma Nifae, na faapefea ona taunuu atu tagata i le laau? (E ala i le mulimuli i le ai uamea, lea na faatusa i le afioga a le Atua.) O faapefea ona tutusa lenei mea ma le faatusatusaga a Alema o le afioga a le Atua i se fatu?
Valaaulia ni nai tamaiti e faasoa mai pe na faapefea ona latou mulimuli i le faataitaiga o loo faamatalaina mai i le Alema 32. Fesili atu ia i latou pe o faapefea ona aafia o latou olaga e lenei faataitaiga. Mafaufau e faasoa atu ni au oe lava aafiaga i se taimi na e lagona ai le mana o le afioga a le Atua.
Mau Tauloto—Alema 32:21
Fai i tamaiti e faaaoga le Alema 32:21 e filifili pe na faapefea ona faaaogaina e tagata na oo i tulaga nei le faatuatua pe lei faaaogaina foi le faatuatua.
-
O se tamaitai talavou o loo manao i se faamaoniga faaletino i le moni o le Tusi a Mamona ao lei talitonu o ia i ai.
-
O se alii talavou na faalogo e tatau i alii talavou agavaa uma ona auauna atu i se galuega faamisiona. E ui e mativa lona aiga, ae sa ia naunau lava e auauna atu ma faia sauniuniga e auauna atu ai.
-
O se tamaitai talavou o loo manao ina ia faamamaina o ia mai ana agasala e ala i le Togiola a Iesu Keriso. Na te iloa e manaomia ona ia tautau atu nisi o ana mea sese i lana epikopo ina ia salamo atoatoa ai. Na ia faia se avanoa e vaai ai lana epikopo.
Faaaliga: E mafai ona e faaaogaina lenei manatu i le taimi o le lesona a o e folasiaina atu ia fasifuaitau o mau tauloto, pe e mafai foi ona e faaaogaina i le faaiuga o le lesona.
Tala ma Faamatalaga o Talaaga
Alema 32:21-22, 26-27 Faatuatua o se filifiliga
Na aoao mai Epikopo Richard C. Edgley o le Au Epikopo Pulefaamalumalu faapea o le faatuatua o se filifiliga:
“Ona o feteenaiga ma luitau o loo tatou feagai i le lalolagi i aso nei, ou te fia fautuaina atu ai se filifiliga se tasi—o se filifiliga o le filemu ma le puipuiga, o se filifiliga e talafeagai mo tagata uma. O lena filifiliga o le faatuatua. Ia silafia o le faatuatua e le o se meaalofa e maua fua e tuuina mai e aunoa ma se mafaufau i ai, manao i ai, po o se taumafaiga. E le faapea e te’i lava ua oo mai e pei o le pau mai o se sau mai le lagi. … Ua fetalai le Faaola, ‘Ia outou o mai ia te au’ (Mataio 11:28) ma ‘Tu’itu’i atu ona toina ai lea ia te outou’ (Mataio 7:7). O veape galue nei—o mai, tu’itu’i. O ni filifiliga foi. O lea la ou te faapea atu ai, filifili le faatuatua. Filifili le faatuatua i lo le masalosalo; filifili le faatuatua i lo le fefe; filifili le faatuatua i lo le le mailoa ma le le vaaia; ma filifili le faatuatua i lo le le mautonu.
O le faamalamalamaga iloga e Alema o le faatuatua e pei ona tusia i le mataupu e 32 o le Alema i le Tusi a Mamona o se faasologa o filifiliga ina ia mautinoa ai le tuputupu ae ma le faasaoina o lo tatou faatuatua. Na tuuina mai e Alema ia i tatou se poloaiga e filifili ai. O ana upu faatino na amatalia i le filifili. Sa ia faaaogaina upu o le ala mai, fagua, tofotofoga, faaaoga, manao, galue, ma le toto. Ona faamalamalama mai lea e Alema, afai tatou te faia nei filifiliga ae le o le tiai o le fatu ona o le le talitonu, e “amata ona tupu ai i totonu o o [tatou] fatafata’ (Alema 32:28).
“Ioe, o le faatuatua o se filifiliga, ma e tatau ona sailia ma atiina ae. O lea, ua nafa ai i tatou lava ma lo tatou lava faatuatua. Ua nafa foi i tatou ma le leai o so tatou faatuatua. O le filifiliga e a oe lea” (“Faatuatua—o le Filifiliga e A Oe Lea,” Ensign po o le Liahona, Nov. 2010, 31–32).
Alema 32:40-43. Sailia o se molimau ola
Na faailoa mai e Peresitene Henry B. Eyring o le Au Peresitene Sili ni auala e mafai ai ona tatou tausia a tatou molimau:
“O le molimau e manaomia ai le faafailelega a le tatalo o le faatuatua, o le galala mo le upu a le Atua i tusitusiga paia, ma le usiusitai i le upumoni ua tatou mauaina. E i ai le tulaga matautia i le faatalale i le tatalo. E i ai le tulaga matautia i a tatou molimau i le na o le suesue ma le faitauina o tusitusiga paia ae le o i ai le loto. O ni meaai ia e tatau ai mo a tatou molimau.
“O le taumamafa i le afioga ale Atua, tatalo ma le loto, ma le usiusitai i poloaiga a le Alii e tatau ona faaaogaina tutusa ma ia faifai pea mo lau molimau ina ia ola ai ma manuia. O i tatou uma lava e i ai tulaga e le oo i ai lo tatou malosi, e faalavelaveina ai la tatou mamanu o le sueuseina o tusitusiga paia. Atonu e i ai ni taimi tatou te filifili ai ona o se mafuaaga, tatou te le tatalo ai. Atonu e i ai ni poloaiga tatou te filifili i se taimi e faagalogalo.
“Ae o le a le to maia ia te oe lou manao mo se molimau ola, pe afai e galo ia te oe le lapataiga ma le folafolaga o loo i le Alema [32:40–43]” (“O Se Molimau Ola,” Ensign po o le Liahona, Me 2011, 127–28).