Potutusi
Lesson 143: Eteru 1

Lesona 143

Eteru 1

Faatomuaga

Sa otootoina e Moronae le tusi a Eteru mai papatusi auro e 24 lea sa mauaina e le au suesue sa auina atu e Limae (tagai Mosaea 8:7–11). O loo i ai i nei papatusi le talafaasolopito o le nuu a sa Iareto. E amata le tala a sa Iareto ia Iareto ma lona uso ao [la] sailia le agalelei ma le taitaiga a le Alii mo o latou aiga ma uo ina ua faaeseeseina e le Alii ia gagana o tagata i le Olo o Papelu (tagai Kenese 11). Ona sa tatalo faamaoni le uso o Iareto i le Alii, sa faasaoina ai e le Alii le gagana a Iareto, o lona uso, ma o latou aiga ma uo. Sa folafolaina e le Alii o le a Ia taitaiina i latou i le nuu o le folafolaga, lea o le a avea ai i latou ma se malo maoae.

Fautuaga mo le Aoaoga

Eteru 1:1–32

Ua faamaumau e Moronae le gafa o Eteru agai i tua ia Iareto i le Olo o Papelu

Ina ia fesoasoani i tamaiti aoga e manatua le mea sau ai le tusi a Eteru, iloilo ma i latou le otootoga o faigamalaga i leMosaea 7–24 i le faaopoopoga o lenei tusi lesona. Fai atu ia i latou e tagai i le faigamalaga 4: taumafaiga e saili Sara’emila. Ona valaaulia lea o i latou e vaai mo mea na maua e le nuu o Limae i lenei faigamalaga. Ona fai atu lea ia i latou e susue i le itulau muamua o le tusi a Eteru. O le otootoga i lalo o le ulutala ua faamalamalamaina ai o le tusi a Eteru sa aumaia mai i papatusi auro e 24 e le nuu o Limae.

Faamalamalama atu ina ua maea ona [faamaumauina] e Moronae le faamaumauga a lona tama, sa ia tusia se otootoga, po o se vaega o otootoga sa faapuupuuina, o faamaumauga na maua i papatusi auro e 24. Sa i ai i lenei faamaumauga le talafaasolopito a sa Iareto, o e na aumau i le konitineta o Amerika ao lei i ai sa Nifae ma sa Lamana. Fai atu i tamaiti aoga e faitau leleoa le Eteru 1:1–5 , ma vaavaai mo le mea na filifilia e Moronae e aofia i lana otootoga o le faamaumauga a sa Iareto. Fai atu i tamaiti aoga e lipoti mai mea ua latou mauaina.

Afai e i ai sau ata o le Olo o Papelu, mafaufau e faaali atu. Fai atu i tamaiti aoga e otooto mea ua latou iloa e uiga i le olo ua taua i le Eteru 1:5 ma mea na tutupu ia i latou na taumafai e fausiaina. (Sa faaaigoaina o le Olo o Papelu. Sa faaeseeseina e le Alii le gagana o tagata o e na taumafai e fausiaina ma faasalalauina i latou ona o lo latou amioleaga; tagai Kenese 11:1–9.)

Ina ia fesoasoani i tamaiti aoga ia malamalama i le sootaga i le va o talafaasolopito a sa Iareto ma sa Nifae, atonu e te manao e tatai atu i latou i le faasologa o i le faailoga tusi o le Tusi a Mamona (aitema numera 32336). Faamalamalama atu sa amataina e Moronae lana tala o le talafaasolopito a sa Iareto e ala i le faamaumauina o tupuaga o le perofeta o Eteru, o le sa tusiaina le talafaasolopito i papatusi auro e 24. Sa faamaumau e Moronae talaaga o Eteru e amata mai i se alii e igoa ia Iareto, o le sa soifua i le taimi o le Olo o Papelu.

Eteru 1:33–43

E ala i tatalo a le uso o Iareto, sa maua ai e lona aiga ma uo le alofa tunoa ma le taitaiga

Fesili i tamaiti aoga pe na i ai se tasi o i latou sa i ai i se nofoaga sa latou le i malamalama ai i le gagana na tautatala ai tagata sa siomiaina i latou. Valaaulia i latou e faasoa o latou lagona i lena tulaga. Ona fai lea ia i latou e vaai faalemafaufau pe na faapefea faalogona o tagata na siomia le Olo o Papelu ina ua latou iloa ua faaeseeseina gagana a tagata uma. Fai atu ia i latou e mafaufau loloto leleoa i fesili nei:

  • Afai sa e i ai i lena tulaga, o ai e ona se fesootaiga o le a sili ona e misia? Aisea?

Valaaulia tamaiti aoga e faitau le leoa le Eteru 1:33–34. Ao lei faitauina e i latou, fai ia i latou e vaavaai mo (1) o ai na manao Iareto ia mafai ona la fesootai ma (2) pe na faapefea ona ia fuafua e faafoia le faafitauli. (Sa ia manao ia mafai ona ia fesootai ma lona aiga, ma sa ia fai atu i lona uso e tatalo ina ia le faaeseeseina lo laua gagana.) A maea ona lipoti mai e tamaiti aoga mea sa latou mauaina, fesili atu:

  • O le a le uiga o le fasifuaitau “tagi atu i le Alii” ia te oe?

  • Mai ia Eteru 1:33–34, o le a le mea ua e aoaoina e uiga i faalogona a Iareto e uiga i lona uso ma le tatalo a lona uso?

Vaevae le vasega i ni paga. I paga taitasi, auauai tamaiti aoga e faitau leotele mai le Eteru 1:35–42. Fai atu ia i latou e vaavaai mo tatalo a le uso o Iareto ma mo tali a le Alii i na tatalo. Pe a lava se taimi e faitau ai tamaiti aoga, fesili atu:

  • O le a le mea e faafiafiaina ai oe e uiga i le tatalo a le uso o Iareto?

  • Sa faapefea ona tali e le Alii tatalo a le uso o Iareto?

  • O a mataupu faavae e mafai ona tatou aoao mai le ala sa tatalo ai le uso o Iareto ma le ala sa tali ai e le Alii ana tatalo? (A o faasoa e tamaiti aoga a latou manatu, fautuaina i latou e mafaufau loloto i le agalelei ma le alofa o le Tama Faalelagi mo i latou. Tusi i le laupapa mataupu faavae nei: A o tatou tagi atu i le faatuatua i le Atua e le aunoa, o le a Ia agalelei mai ia i tatou.)

A o lei amataina le vasega, tusi le fesili lenei i luga o le laupapa: (Pe e te mafaufau e saunia ni pepa e tufa atu o i ai fesili pe faitau lemu leotele ina ia mafai ona tusi e tamaiti aoga i lalo.)

O a auala e eseese ai le tagi atu i le Tama Faalelagi mai le na ona “faia o se tatalo”?

O anafea na e lagona ai le agalelei o le Tama Faalelagi i tali i ou tatalo? O anafea na tau atu ai e tagata o lou aiga po o uo ia te oe le agalelei o le Tama Faalelagi i tali o tatalo?

O a mea ua aoao mai i tali a le Atua i a tatou tatalo e uiga i Ona lagona mo i tatou?

O le a se mea e mafai ona e faia ia atili anoa ai ou tatalo?

Valaaulia tamaiti aoga e tali fesili nei i a latou api e tusi ai faamatalaga po o api talaaga mo le suesueina o tusitusiga paia. Atonu e te manao e tuu ia i latou le avanoa e faasoa ai mea na latou tusiaina. Molimau atu e te iloa e alofa le Tama Faalelagi ia i tatou ma ua finagalo e faamanuia i tatou pe a tatou valaau atu ia te Ia e le aunoa.

Faamalamalama atu o le tala i le Eteru 1 e mafai ona tatou maua ai faaopoopoga o malamalamaaga o le alofa o le Atua mo i tatou ma faamanuiaga e oo mai e ala i le tatalo. Fai i tamaiti aoga e iloilo leleoa le Eteru 1:34, 36, 38, ma vaavaai mo mea na talosagaina e Iareto e tatalo ai lona uso. Valaaulia se tamaitiiti aoga e avea ma se tagata tusitusi ma lisi tali a tamaiti aoga i luga o le laupapa. Atonu e te fautuaina le tagata tusitusi e tusi tali nei i lalo o le upu “tagi atu i le Tama Faalelagi” i le mataupu faavae ua e tusiaina i le laupapa.

Atonu e te manao e fautuaina tamaiti aoga e faailoga le fasifuaitau “ia tatou faamaoni i le Alii” i le faaiuga o le Eteru 1:38. Faamamafa atu o faatinoga a Iareto ma lona uso na faaalia ai lo la faatuatua ma le naunautaiga e usiusitai i le Alii. Sa laua valaau atu i le faatuatua mo faamanuiaga la te manaomia.

Valaaulia tamaiti aoga e iloilo leleoa le Eteru 1:35, 37, 40–42, ma vaavaai mo auala na faamanuiaina ai e le Atua ia Iareto ma lona uso ma o laua aiga ma uo. Tuu atu i le tamaitiiti aoga ua avea ma tagata tusitusi e tusi mea na mauaina e tamaiti aoga i lalo o le upuagaleleii le mataupu faavae ua e tusiaina. Ia mautinoa ua iloa e tamaiti aoga le sootaga i le va o le talosaga a le uso o Iareto ma faamanuiaga na aumaia e le Alii.

Valaaulia se tamaitiiti aoga e faitau leotele le Eteru 1:43. Fai atu i le vasega e mulimuli i le faitauga, ma vaavaai mo faamanuiaga na folafolaina e le Atua e ui lava e le i talosagaina patino e le uso o Iareto mo [na faamanuiaga].

  • O a faamanuiaga faaopoopo na folafolaina e le Ali i tagata? (Na talosagaina e Iareto lona uso ia valaau atu i le Alii po o fea e tatau ona latou o i ai. Na manatu Iareto o le a taitai i latou e le Alii i se nuu sa“silisili ona lelei i luga o le lalolagi atoa” [Eteru 1:38]. Na folafola lava e le Alii o le a taitaiina i latou i le laueleele o le folafolaga. Faaopoopo i ai, na Ia tuu atu ni faatonuga patino ia i latou e uiga i mua’i sauniuniga mo lo latou faigamalaga. Sa ia folafola foi o le a Ia faatuina se malo tele mai i o latou aiga ma o le a leai lava se isi malo sili atu i le fogaeleele.)

Valaaulia tamaiti aoga e susue i le 2 Nifae 4:35. (Atonu e te fautuaina ia latou tusia le 2 Nifae 4:35 i talaane o le Eteru 1:43 i o latou tusitusiga paia.) Ona fai atu lea ia i latou e faitau leleoa le 2 Nifae 4:35 ma le Eteru 1:43 , ma vaavaai mo mea ua aoao mai e nei fuaiupu e uiga i faamanuiaga e tuuina mai e le Atua i tali o o tatou tatalo.

  • I le 2 Nifae 4:35, o le a le mea ua aoao mai e Nifae e uiga i tali a le Atua i tatalo? (O le a auina tele mai e le Atua ia i latou o e saili atu ia te Ia i le tatalo. Atonu e te manao e faamalamalama atu o le upu tele o lona uiga o le agalelei.) E faapefea ona faamautinoa e le tala i le Eteru 1:43 le faamatalaga a Nifae i le 2 Nifae 4:35?

  • E tusa ai ma le Eteru 1:43, o a mafuaaga na tuuina atu ai e le Alii mo faamanuiaga folafolaina sili atu nai lo o mea na talosagaina e sa Iareto? (Na folafolaina e le Alii faamanuiaga faaopoopo aua sa latou faatuatua i o latou tatalo. Atonu e te manao e fautuaina tamaiti aoga e faailoga fasifuaitau nei i le Eteru 1:43: “ona o lenei taimi umi ua e tagi ma iai ia te au.”)

  • O a mataupu faavae e mafai ona tatou aoao mai le Eteru 1:43? (E mafai ona faaaoga e tamaiti aoga upu eseese, ae e tatau ona latou faailoaina le mataupu faavae lenei: Pe afai tatou te tatalo e le aunoa ma le faatuatua i le Atua, e mafai ona tatou maua faamanuiaga sili atu nai lo mea na tatou talosagaina. Atonu e te manao e fautua atu i tamaiti aoga e tusi lenei mataupu faavae i a latou tusitusiga paia.)

  • O anafea na e vaaia ai lenei mataupu faavae i lou olaga, po o le olaga o se tasi e te iloaina?

A maea ona faasoa mai e tamaiti aoga o latou tali, atonu e te manao e faasoa ni faataitaiga mai lou olaga po o olaga o isi. O le Perofeta o Iosefa Samita, o se faataitaiga lelei o lenei mataupu faavae. Sa ia maua faamanuiaga sili atu nai lo mea sa ia talosagaina ina ua ia tatalo e fia iloa le ekalesia sa moni (tagai Iosefa Samita—Talafaasolopito 1:10–20) ma ina ua ia tatalo ia iloa lona tulaga i luma o le Alii (tagaiIosefa Samita—Talafaasolopito 1:29–47).

E faaiu ai, ia faamalosiau i tamaiti aoga e faia se taumafaiga e tatalo ma le faamaoni sili atu. Fautuaina foi i latou ia manatua e tumu le Tama Faalelagi i le agalelei ma o le a Ia tali o latou tatalo e tusa ai ma lo latou faatuatua ma e tusa ai ma mea Ua Ia silafia o le a aumaia ai faamanuiaga silisili i o latou olaga.

Iloiloga o Mau Tauloto

Vaevae le vasega i ni paga. Tuu atu ia i latou le taimi e fesoasoani ai i le tasi e iloilo ai faasino upu ma fasifuaitau autu o mau tauloto uma e 25 o le Tusi a Mamona. Atonu e te manao e fautua atu ia latou faaaogaina kata o mau tauloto e suesue ai e le tasi le isi (tagai i le manatu o iloiloga o mau tauloto i le faaiuga o le lesona 45). Ona tuu atu lea ia i latou se suega puupuu i fasifuaitau, atonu i le faaaogaina o faailoilo mai le kata o mau tauloto o tusitusiga paia. Togi faatasi o se vasega le suega puupuu. Fai atu i tamaiti aoga e tusi se faamatalaga i fuaitau e latou te manaomia ona iloiloina, ma fautuaina i latou e suesueina faaletagata lava ia. A o faasolo ina tuua le aoga, mafaufau e tuuina atu se suega mulimuli i fuaitau o mau tauloto o tusitusiga paia i le Tusi a Mamona.

Faaaliga: E mafai ona e faia lenei gaoioiga i le amataga po o le faaiuga o le vasega. Afai e te faaaogaina le gaoioiga i le amataga o le vasega, faapuupuu ina ia lava le taimi mo le lesona. Mo isi iloiloga o gaoioiga, tagai i le faaopoopoga i lenei tusi lesona.

Tala ma Faamatalaga o Talaaga

Eteru 1:34–35. O ai le igoa o le uso o Iareto?

Sa faamatalaina e Elder George Reynolds o le Fitugafulu le tala lenei, lea e taua ai na faailoa atu i le Perofeta o Iosefa Samita le igoa o le uso o Iareto:

“A o faamautu ai i Katelani o Elder Reynolds Cahoon sa fanau se atalii ia te ia. A o pasi ane Peresitene Iosefa Samita i se tasi o aso i lona faitotoa, sa ia valaaulia le Perofeta i totonu ma fai atu ia te ia e faamanuia ma faaigoa le pepe. Sa faia e Iosefa ma tuuina atu le igoa o Mahonri Moriancumer i le tama. Ina ua uma ona ia faamanuiaina [le pepe] sa ia faataoto le tamaitiiti i luga o le moega, ma faliu atu ia Elder Cahoon ma faapea atu, o le igoa ua ou tuuina atu i lou atalii o le igoa o le uso o Iareto; lea faatoa faailoa mai e le Alii ia te au. O Elder William F. Cahoon, o le sa tu latalata ane, sa lagonaina a o faia e le Perofeta lenei faamatalaga i lona tama; ma o le taimi muamua lenei na faalauiloa ai le igoa o le uso o Iareto i le Ekalesia i lenei tisipenisione” (“The Jaredites,” Juvenile Instructor, Me 1, 1892, 282).

Eteru 1:43. “Ona o lenei taimi umi ua e tagi mai ia te au”

Na aoao mai Peresitene Spencer W. Kimball e tatau ona tatou tuuina se taumafaiga tele ia tatou tatalo ma e tatau ona tatou tatalo e le aunoa:

“Pe e te maua ea tali i au tatalo? Afai e leai, atonu e te le o totogina le tau. Pe e te tuuina atu ea na o ni nai upu faatauvaa ma faamatalaga e leai se aoga, pe e te talanoa felatai i le Alii? Pe e te tatalo ea i nisi taimi ae tatau ona e tatalo e le aunoa, i taimi uma, ma soo se taimi? Pe e te tuuina atu ni pene e totogi ai ni aitalafu tetele ae tatau ona tuuina atu ni tala e faauma ai lena aitalafu?

“Pe a e tatalo, pe na ona e tautala ea, pe e te faalogo foi? Na fetalai mai lou Faaola, ‘Faauta, ou te tu atu i le puipui ma tuitui: ai se tasi e faalogo mai i lou leo, ma tatala mai le puipui, ou te ulufale atu ia te ia, ma te talisua foi ma ia, o ia foi ma au.’(Faa. 3:20.)” (“Tatalo,” New Era, Me. 1980, 17).

Lolomi