Lesona mo Suesuega e Faia i le Aiga

Iakopo 5–Ominae (Iunite 10)

Anomea o Sauniuniga mo le Faiaoga o Suesuega e Faia i le Aiga

Aotelega o Lesona o Suesuega e Faia i le Aiga i Aso Taitasi

O le aotelega lenei o aoaoga faavae ma mataupu faavae sa aoaoina e tagata o le vasega a o latou suesueina le Iakopo 5–Ominae (iunite 10) e le o faamoemoe e aoao atu o se vaega o lau lesona. O le lesona e te aoao atua e na o nai aoaoga faavae ma mataupu faavae o loo taulai i ai. Mulimuli i uunaiga a le Agaga Paia a o e mafaufau i manaoga o tagata o le vasega.

Aso 1 (Iakopo 5–6)

I la latou lesona i le talafaatusa i laau olive i le Iakopo 5, sa taulai atu tagata i le mataupu faavae e alofa le Alii ia i tatou ma galue ma le maelega mo lo tatou faaolataga. Sa tusia e tagata o le vasega mea sa latou aoaoina mai le Iakopo 5 e tusa ai ma le alofa o le Alii mo i latou. I le Iakopo 6, sa aoaoina ai e tamaiti, tatou te popoto pe a tatou saunia nei mo le faamasinoga e ala i le salamo ma le mauaina o le alofa mutimutivale o le Alii.

Aso 2 (Iakopo 7)

O tamaiti na suesueina le Iakopo na fetaiai ma Serema, o se aneti-Keriso. Sa latou aoaoina a tatou faalagolago i le Alii, e mafai ona tatou faatoilaloina luitau i lo tatou faatuatua. Mai le faataitaiga a Iakopo, sa latou aoaoina ai foi e le mafai ona maluelue lo tatou faatuatua pe afai e faavae a tatou molimau i faaaliga ma aafiaga moni faaleagaga. E le gata i lea, sa vaai le au aooga i se ata o le mataupu faavae faapea, a tatou tali atu i fesili po o faitioga o lo tatou faatuatua i ni auala e valaaulia ai le Agaga, e mafai ona tatou fesoasoani i isi e liliu mai i le Alii. Sa tusia e le au aooga e uiga i auala o le a latou faaaoga ai se mataupu faavae sa latou mauaina i le Iakopo 7:15−23.

Aso 3 (Enosa)

Mai le faataitaiga a Enosa, sa aoao ai e le au aooga e faapea, a tatou faaaogaina le faatuatua ia Iesu Keriso, e mafai ona faamagaloina a tatou agasala ma e mafai foi ona faaatoatoaina i tatou. Sa latou aoaoina foi a oo ina tatou iloa faamanuiaga o le Togiola a Iesu Keriso, o le a tatou saili e fesoasoani i isi ia maua lo latou faaolataga. Sa tusia e tamaiti se auala e tasi e mafai ona latou faaaoga ai nei mataupu faavae.

Aso 4 (Iaroma ma Ominae)

I la latou suesuega o Iaroma ma Ominae, sa faailoa mai ai e tamaiti aoga upumoni nei: A tatou usitaia poloaiga a le Atua, o le a tatou manuia. Sa latou tusi faamaumauina le ala sa faamanuiaina ai i latou e le Alii mo le tausiga o Ana poloaiga. Sa suesueina foi e tamaiti aoga mo sina taimi le malaga a sa Nifae i le laueleele o Saraemila, ma latou iloa ai tagata o Saraemila, o sa Iareto, ma se vaega o sa Nifae (tagata o Senifa) sa toe foi i le laueleele o Nifae. Sa aoaoina foi e tamaiti aoga le mataupu faavae lenei: Afai tatou te o mai ia Keriso ma tumau e oo i le iuga, o le a faasaoina i tatou. Sa latou faamaeaina lenei lesona i le tusia o se lauga e tasi I le lua minute i se tasi o auala sa uunaia ai i tatou e Amaleki e o mai ia Keriso.

Faatomuaga

I le lesona lenei, o le a maua ai e le au aooga le avanoa e mafaufau ai i le alofa o le Alii mo i latou e pei ona faaalia i le Iakopo 5. Afai e lava se taimi, atonu foi e te manao e aoao atu i latou mai le Iakopo 5 e uiga i la latou matafaioi o ni auauna a le Alii. O le a mafai e tamaiti aoga ona talanoaina upumoni mai le Iakopo 7 ia e mafai ona fesoasoani ia i latou pe a fesiligia pe faitioina e isi o latou talitonuga. O le a latou maua foi le avanoa e faamatala ai i le vasega pe na faapefea ona latou faaaogaina mea sa latou aoaoina mai le tusi a Enosa. E le gata i lea, e mafai foi e tamaiti ona faasoa atu a latou lauga sa latou saunia e uiga i le auala e mafai ai ona latou taliaina le valaaulia o loo tuuina mai i le Ominae e o mai ia Keriso. Afai e te manao ina ia latou faia, e mafai ona fesoasoani le vave faafesootai o ni tamaiti, ma valaaulia i latou e sauniuni e faasoa mai a latou lauga i le vasega.

Fautuaga mo le Aoaoga

Iakopo 5–6

Ua ta’ua e Iakopo le tala faataoto i laau o olive e faailoa mai ai na galue punouai le Alii mo lo tatou faaolataga

Faamanatu i tamaiti o le tala faatusa i laau o olive, o lala mai le laau olive toto sa salalau i le tovine. E faatusa lea i le faasalalauina o le nuu o le feagaiga a le Atua—tagata o le aiga o Isaraelu —i le lalolagi atoa. Peitai, mulimuli ane, e oo ina leaga uma laau o le tovine (tagai Iakopo 5:46). Faamatala e faatusa lea i le vaitau o le Liliuese Tele.

Valaaulia tamaiti e faitau lemu le Iakopo 5:61–62, ma vaai pe o a mea na faatonu e le Alii Lana auauna (Lana perofeta) e fai ina ia fesoasoani ai i laau ia fua mai ai ni fua lelei. Ona fai lea o fesili nei:

• O ai e ono faasino i ai nei “auauna”? (Taitai o le Ekalesia, faifeautalai, ma tagata uma o le Ekalesia.)

• O le a le mea e tulaga ese i le taimi na valaauina ai nei auauna e galulue?

Faamatala faapuupuu o nei taumafaiga e faatusa i le faapotopotoina o Isaraelu. Ina ia fesoasoani ia iloa e tamaiti aoga o i latou o se vaega o le vaega o auauna, o e ua valaauina e galulue i le tovine a le Alii, faitau le saunoaga lea a Elder Dean L. Larsen o le Fitugafulu. Fai i tamaiti e faalogologo po o ai ia na te faasino i ai “o tagata mulimuli e galulue i le tovine.”

“O le [taimi nei] o le periota ua faia ai e le Alii ma ana auauna le taumafaiga maoae mulimuli e aveina atu le savali o le upu moni i tagata uma o le lalolagi ma toe aumaia tupuaga o Isaraelu anamua o e na leiloloa o latou faasinomaga moni. …

“Ua outou o mai i le lalolagi i le taimi ua uma ai ona faataatia o le faavae o lenei galuega tele. Ua uma ona toefuatai mai o le talalelei mo le taimi mulimuli. Ua toeitiiti nei soo ona faatuina o le Ekalesia i le lalolagi atoa. Ua lata nei le taimi o le vaega faaiu. O outou o le a avea ma e e faia lena vaega. O outou o nisi o le aufaigaluega faaiu i le tovine. … O le galuega lena ua filifilia i ai outou” (“O Se Tupulaga Tautupu,” Liahona, Iulai 1983, 33).

Fai fesili nei:

• O ai lea na fai mai Elder Larson o auauna, po o “le aufaigaluega faaiu ,” na valaauina e galulue i le tovine?

• O a avanoa ua outou maua e auauna atu ai i le Alii ma fesoasoani ai i isi e aumaia “fua lelei”?

Faitau leotele faatasi e le vasega le Iakopo 5:71. Valaaulia tamaiti e faailoa mai mea na folafola mai e le Alii ia i latou e galulue faatasi ma Ia. Fesili i tamaiti po o anafea na latou lagonaina ai ua faamanuiaina mo a latou taumafaiga e auauna atu i le Alii.

Iakopo–7

Ua faalagolago Iakopo i le Alii a o ia fetaiai ma Serema, ma taitaia se vaega toatele o sa Nifae e liliu atu i le Alii

Manatua: I le Iakopo 7 sa aoaoina ai e le au aooga le auala na faatoilalo ai e Iakopo le tetee i lona faatuatua ia Iesu Keriso, mai se tagata e igoa ia Serema, o se aneti-Keriso. E ui e le o taulai atu lenei lesona i le aafiaga o Iakopo ma Serema, ae atonu e te manao e valaaulia tamaiti e aotele mai mea na tutupu, ma faailoa mai se upumoni sa latou aoaoina mai le faataitaiga a Iakopo. Aemaise ai, atonu e te manao e faamamafa atu le upumoni e le mafai ona luluina i tatou i lo tatou faatuatua pe afai e faavae a tatou molimau i faaaliga ma aafiga moni faaleagaga.

Enosa

Ina ua uma ona maua se faamagaloga o ana agasala, ona tatalo lea o Enosa mo isi ma galue mo lo latou faaolataga

ata o le tatalo

Tusi le ata lea i luga o le laupapa po o luga o se fasipepa. Fai i tamaiti e faamatala mai pe faapefea ona faiā ma le aafiaga o Enosa.

Vaevae le vasega i ni vaega se tolu. (Afai e toalaiti lau vasega, e mafai ona tasi se tagata i se vaega.) Fai i le vaega muamua e faitau le Enosa 1:4–6 ma sauniuni e faamatala se upumoni e mafai ona tatou aoao mai le tatalo a Enosa mo ia lava. Fai i le vaega lona lua e faitau le Enosa 1:9–10 ma sauniuni e faamatala se upumoni e mafai ona tatou aoao mai lena vaega o le tatalo a Enosa. Fai i le vaega lona tolu e faitau le Enosa1:11–14 ma sauniuni e faamatala se upumoni e mafai ona tatou aoao mai lena vaega o le tatalo a Enosa. Ona fai lea i ni sui o vaega taitasi, e faasoa mai mea sa latou tapenaina. Fai i tamaiti e toe iloilo le galuega fai o le aso 3, 9 i a latou api talaaga o suesuega o tusitusiga paia, ma valaaulia nisi e faasoa mai pe na faapefea ona latou filifili e faaaoga upumoni mai le tusi a Enosa.

Iaroma ma Ominae

Ua faamatala e le au tusitalafaamaumau ia tauiviga ma faamanuiaga a sa Nifae

Afai e i ai ni fesili a le au aooga e uiga i malaga a tagata eseese i le laueleele o le Lalolagi i Sisifo, atonu e te manao e talanoaina ma i latou ia anomea o i le tusi lesona a tamaiti aoga e uiga i le Ominae 1:1−30, e aofia ai le saunoaga a Peresitene Anthony W. Ivins o le Au Peresitene Sili.

Valaaulia tamaiti aoga e iloilo ia lauga sa latou saunia e uiga i le o mai ia Keriso (aso 4, galuega fai 4). A lava le taimi, atonu e te manao e fai i ni tamaiti e tuuina atu a latou lauga i le vasega. Afai na e vave fai i ni tamaiti e tuuina atu a latou lauga, ia mautinoa e lava se taimi e faia ai.

Ia mautinoa e te faafetai i tamaiti mo la latou faatinoga. Molimau atu i le alofa o le Tama Faalelagi ma Iesu Keriso mo au tamaiti taitasi, ma faamautinoa atu ia te i latou a latou o mai ia Keriso ma o latou loto atoa, o le a faasaoina i latou i Lona malo.

O Le Isi Iunite (Upu a Mamona–Mosaea 6)

I le isi iunite, o le a faitau ai e le au aooga e uiga i se agelu a le Atua na faaali i le Tupu o Peniamina, ma faatonuina o ia, i mea e ta’u atu i lona nuu (tagai Mosaea 3). Na tuuina atu e le Tupu o Peniamina upu nei i lona nuu, o e sa oo i se liua tele o o latou loto.