Mosaea 19–20

Faatomuaga

Ina ua mavae le sosola ese o Alema ma lona nuu mai le autau a le Tupu o Noa, sa amata ona pagatia le Tupu o Noa ma ona tagata i taunuuga o a latou amioletonu, e pei ona valoia ai e Apinati —sa osofaia i latou ma ave faapagotaina e sa Lamana, ma sa susunuina le Tupu o Noa i le afi. Na avea Limae le atalii o Noa ma tupu ina ua maliu ia Noa. Ina ua ave faamalosia e i latou na avea ma faitaulaga a Noa se vaega o afafine o sa Lamana, sa tuua’ia e tagata sa Lamana ia le nuu o Limae, ma sa latou sauniuni ai e osofaia i latou. Sa tau ma le totoa tagata o Limae, ma sa latou faamanualia ma pueina le tupu o sa Lamana. Sa faatoafilemu e Limae le tupu o sa Lamana, o le sa faaoleole i lona nuu e toe foi ma le filemu i lo latou lava laueleele.

Fautuaga mo le Aoaoga

Mosaea 19–20

Sa iloa e tagata sa Nifae i le nuu o Liae-Nifae le faataunuuina o valoaga a Apinati

Valaaulia tamaiti e mafaufau i se taimi na lapataia ai e se tasi i latou e uiga i se tulaga matautia sa le mafai ona latou muai iloa. Fai i ai e faamatala mai pe na faapefea ona faamanuiaina i latou ona o le mulimuli i se lapataiga. Fesoasoani i tamaiti e talanoaina le faamoemoega o lapataiga e ala i le fai atu i ai o fesili nei:

O le a le faamoemoega o se lapataiga? O ai e lapataia oe e uiga i mea e tatau ona aloese mai ai, po o mea e ono afaina ai oe?
O ai e faaali i ai e le Atua ni lapataiga faaleagaga mo Lana Ekalesia?

Faamanatu i tamaiti na auina atu e le Alii ia Apinati e lapataia sa Nifae e uiga i taunuuga o a latou agasala. Ina ia fesoasoani i tamaiti e toeiloilo ia valoaga a Apinati i tagata sa Nifae i le nuu o Liae-Nifae, kopi le siata lea i luga o le laupapa. Ia mautinoa e lava se avanoa e tuu mo tamaiti e tusi ai i lalo ifo o mau faasino.

Valoaga e uiga i le nuu o le Tupu o Noa (Mosaea 12:1–2; 17:17)	Faataunuuina (Mosaea 19:10, 14–15; 20:20; 21:2–4)
Valoaga e uiga i le Tupu o Noa (Mosaea 12:3; 17:18)	Faataunuuina (Mosaea 19:18–20)

Valaaulia se tamaitiiti e faitau leotele le Mosaea 12:1–2. Fai i tamaiti e faailoa mai po o le a le mea na valoia e Apinati o le a tupu i le nuu o le Tupu o Noa ona sa latou le salamo. Valaaulia se tamaitiiti e lisi taunuuga nei i le pusa o i le pito i luga o le itu tauagavale o le siata i luga o le laupapa. Fai i se isi tamaitiiti e faitau leotele le Mosaea 12:3. Fai i le vasega e faailoa mai le mea na valoia e Apinati o le a tupu i le Tupu o Noa. Fai i se tamaitiiti e tusi le taunuuga lena i le siata.

Ina ia fesoasoani i tamaiti e mafaufau e uiga i le taua o lapataiga faaleagaga tatou te maua mai e ala i perofeta, faasoa atu le tala lea na faamatalaina e Elder David R. Stone o le Fitugafulu:

“I le taeao o se tasi Aso Sa, ua silia ma se tausaga talu ai, na matou ala a’e ai i se aso matagofie i Santo Domingo i le Ripapelika Tominika. Sa susulu manaia le la o le Atu Karipeane, ma sa manino le lagi. Sa agiagi malie si savili, sa tau le ila ai lau i luga o laau; sa mafanafana ma toafilemu ma maninoa. Ae i tai i le vasa, i talaatu o o matou sane faaletino i lena aso, sa agai mai ai le faaoosala, ma le matamataita ma le le mateenaina. Sa faifai pea e le aunoa e le Ofisa Tutotonu o Afa, le tiutetauave o le tulitulimatai ma aumai faamatalaga fou sa maua i luga o le Initoneti ma ta’u mai ai le ala o le Afa o Georges. I le toafimalie, ma le toto’a o lena taeao, e ala i vaaiga a le au vaaitau, na ou vaaia ai le alamatagi, o faasagatonu mai lava e pei o se ‘aū i le fatu o Santo Domingo.

“I totonu o le 48 itula ae taia loa e le … afa matamataita, ma tuua ai i lona ala le faatamaiaga, faatafunaga, ma le oti. …

“E ui lava ina tele le faatamaiga ma le faatafunaga ma le oti mai nei malosiaga faanatura, ae sili atu foi le pagatia e oo mai i le soifua o tagata e ala mai i afa fulifao faaleagaga. O nei malosiaga matautia, e sili atu le faatafunaga e oo mai ai nai lo afa fulifao faaletino, aua latou te faatamaia o tatou agaga ma faoa lo tatou faamoemoega e faavavau ma le folafolaga. …

“Ae peitai, e i ai foi o tatou leoleo faaleagaga, o o latou valaauga o le mataitu ma faufautua, ma fesoasoani ina ia tatou aloese mai le faaleagaina faaleagaga, faatafunaga, ma le oti. O o tatou leoleo i le ‘olo, o aposetolo ma perofeta. O o tatou mata faaleagaga ia agai i le lagi, ma ua latou silafia, e ala mai i musumusuga ma le tofa loloto ma le malamalama mama atoatoa, le alavaa e ono oso mai ai nei afa. O loo faaauau pea ona sii ae o latou siufofoga o le lapataiga, e ta’u mai ia i tatou taunuuga matautia o le le tausia po o le solia o poloaiga a le Alii. O le faatalale ma le loto i lapataiga, e valaaulia mai ai le faanoanoa, o le faavauvau, ma le faaleagaina. Ina ia mulimuli i ai, ia mulimuli i auauna filifilia a le Alii i laufanua faaleagaga o le filemu ma le lafulemu. (“O Afa Fulifao Faaleagaga,” Liahona, Ianuari. 2000, 36–37).

E faiā faapefea lenei tala i le matafaioi a Apinati i le nuu o le Tupu o Noa?

Ta’u i tamaiti o le gaoioiga lenei o le a fesoasoani ia i latou e masani lelei ai i le faasologa o mea na tutupu i le Mosaea 19–20 ma vaai ai i le faataunuuina o valoaga a Apinati i mataupu nei. A uma le gaoioiga lea, ona faamaea lea e tamaiti o le koluma taumatau o le siata o i luga o le laupapa.

Tusi faamatalaga ia e 11 i luga o le laupapa a o lei amataina le vasega, pe saunia foi se tufaaga mo tamaiti taitasi. Valaaulia tamaiti e faitau ma le faaeteete i le Mosaea 19–20. A o latou faitau, fai i ai e faanumera le faasologa o mea na tutupu i luga o le lisi. Atonu e te manao e fai i tamaiti o loo maua i aotelega o mataupu ia faaataataga aoga.

Ua saili Kiteona e fasiotia le Tupu o Noa.

Ua aioi atu fafine sa Nifae ma a latou fanau i tagata sa Lamana e aua le fasiotia i latou.

Ua susunuina le Tupu o Noa i le afi.

Ua o mai se autau a sa Lamana i tuaoi o Semulona.

Ua ave faamalosi e faitaulaga a Noa ia afafine e 24 o sa Lamana.

Ua aioi atu le tupu o sa Lamana i lana autau e faasao ia tagata o Limae.

Ua sosola ia Noa ma nisi o ona tagata mai ia sa Lamana, ae tuua ai a latou ava ma fanau.

Ua poloaiina e Limae ona tagata e aua nei faaumatiaina le tupu o sa Lamana.

Ua i ai le filemu i le va o sa Nifae ma sa Lamana mo le lua tausaga.

Ua folafola atu Limae o le a totogi e ona tagata le afa o a latou meatotino i tagata sa Lamana.

Ua talitalia e sa Nifae se osofaiga a sa Lamana ma latou pueina ai le tupu o sa Lamana.

Tuu i tamaiti le 5 i le 10 minute e faamaea ai le gaoioiga lea. Ona faaaoga lea o le lisi e toeiloilo ai le faasologa o mea na tutupu i le Mosaea 19–20. (O le faasologa sao o mea na tutupu, e amata mai i le pito i luga o le lisi, e faapea: 1, 4, 5, 2, 8, 11, 3, 10, 7, 6, 9.)

Toe faasino tamaiti i le siata i luga o le laupapa. Vaevae tamaiti i ni vaega se lua. Fai i le tasi vaega e sue le Mosaea 19:10, 14–15; 20:20; 21:2–4 e iloa ai pe na faataunuuina faapefea valoaga a Apinati e uiga i tagata o le Tupu o Noa. Fai i le vaega lona lua e sue i le Mosaea 19:18–20 e iloa ai pe na faataunuuina faapefea le valoaga a Apinati e uiga i le Tupu o Noa. Valaaulia se tamaitiiti o vaega taitasi e aotele pe na faapefea ona faataunuuina valoaga a Apinati. Valaaulia se isi tamaitiiti e tusi a latou aotelega i luga o le siata.

Tofi se tamaitiiti e faitau lemu le Mosaea 20:21.

O le a le tala a Kiteona i le mafuaaga o le pagatia o tagata?

Fai i tamaiti e faamatala i a latou lava upu le mea na manao Kiteona ia malamalama ai tagata. Atonu latou te faaaogaina ni upu eseese, ae e ao i tamaiti ona faapupula mai se malamalama faapeao le teena o upu a auauna a le Alii e oo mai ai mafatiaga ma faanoanoaga. (Atonu e te manao e tusi le mataupu faavae lea i luga o le laupapa.)

Ta’u i tamaiti na tuuina mai foi e le Alii se lapataiga faapea ia i latou i aso e gata ai, o e le faalogo ma usitai i Lona siufofoga. Fai atu i se tamaitiiti e faitau leotele le Mataupu Faavae ma Feagaiga 133:70–72. Atonu e te manao e fautuaina tamaiti e tusi le mau faasino lea ia latou tusitusiga paia i autafa o le Mosaea 20:21.

O a nisi o mea ua aoao mai e perofeta ma aposetolo i o tatou aso, o le a fesoasoani ia i tatou e aloese ai mai mafatiaga ma faanoanoaga? O a mea ua latou aoao mai e fesoasoani tatou te maua ai le filemu ma le fiafia ma fesoasoani ai tatou te toe foi atu i le afioaga o le Atua? (E mafai ona e faaali atu ia i latou se lomiga fou o le konafesi aoao i le Ensign ma ta’ua ai nisi o autu o lauga na tuuina mai e perofeta.)

Valaaulia tamaiti e faamatala mai taimi na faamanuiaina ai i latou ona o lo latou mulimuli i fautuaga a taitai o le Ekalesia.

Ina ia fesoasoani ia malamalama tamaiti o le gauai atu i upu a perofeta e mafai ai ona tatou maua le filemu ma toe foi atu ai i le afioaga o le Atua, faasoa atu le saunoaga lea a Elder Robert D. Hales o le Korama a Aposetolo e Toasefululua:

Ata

Elder Robert D. Hales

“O lo tatou saogalemu faaleagaga o loo i ai pe a tatou mulimuli i le siufofoga manino o lo tatou perofeta soifua. Afai tatou te faalogo i lona siufofoga ma usitai i ana fautuaga, o le a mafai ona tatou ola e pei ona finagalo ai Keriso tatou te ola ai ma tumau seia oo i le iuga, ina ia i ai se aso e mafai ai e i tatou faatasi ai ma o tatou aiga, ona toe foi atu i le afioaga o lo tatou Tama Faalelagi ma lo tatou Faaola o Iesu Keriso” (“Faalogo i le Siufofoga o le Perofeta ma Usitai,” Liahona, Iulai 1995, 19).

Faaiu le lesona i le molimau atu i le filemu ma le saogalemu faaleagaga e maua mai le mulimuli i fautuaga a auauna a le Alii.

Iloiloga o Mau Tauloto

A lava le taimi, atonu e te manao e iloilo ia fuaitau mai mau tauloto sa e aoao atu i lenei tausaga e fesoasoani ai i tamaiti e toe faamanatu ia upu o fuaitau taitasi.

Tuu atu i tamaiti ni nai minute e toe iloilo ai mau tauloto ua maea ona latou aoaoina i lenei tausaga faaleaoaoga. Valaaulia se tamaitiiti e sau i luma o le vasega ma ana tusitusiga paia. Fai i se tamaitiiti e sue i se tasi o mau tauloto e aunoa ma le faaalia i se tasi. (Afai o i ai kata o mau tauloto, e mafai ona tuu i se tamaitiiti e faaaoga se tasi.) Fai i le tamaitiiti e tusi se upu se tasi mai le mau tauloto i luga o le laupapa. (Fautuaina le tamaitiiti e filifili ia upu autu mai le fuaitau o le mau nai lo upu e le taua tele e pei o le mapo o le o le.) Valaaulia isi tamaiti uma o le vasega e sue a latou tusitusiga paia mo le mau tauloto ua latou manatu e sau ai le upu lea. Afai e leai se tasi na te mauaina le mau e faaaoga ai le upu e tasi, fai i le tamaitiiti e tusi se isi upu mai le mau i luga o le laupapa. Fai pea lava le faasologa lea seia oo ina maua e se tamaitiiti le mau sa’o. Valaaulia le isi vaega o le vasega e sue le mau, ona tauloto faatasi lea e tamaiti. Ona toe fai lea o le gaoioiga e faaaoga ai se isi tamaitiiti ma se isi mau tauloto ese.