1 Nifae 1–6; 9 (Iunite 2)

Sauniuniga o Anomea mo le Faiaoga o Suesuega e Faia i le Aiga

Aotelega o Lesona o Suesuega e Faia i le Aiga i Aso Taitasi

O le otootoga lenei o aoaoga ma mataupu faavae na aoaoina e tamaiti aoga a o latou suesueina le 1 Nifae 1–6; 9 (Iunite 2) e le o fuafua e aoaoina atu o se vaega o lau lesona. O le lesona e te aoaoina atu e taulai atu i le na o nai aoaoga ma mataupu faavae. Mulimuli i uunaiga a le Agaga Paia, a o e mafaufau i manaoga o tamaiti aoga.

Aso 1 (1 Nifae 1)

A o suesue tamaiti aoga e uiga i le vavalo atu o Liae i tagata ma lapataia i latou ina ia salamo, sa latou aoaoina faapea o perofeta latou te lapatai faasaga i le faia o le agasala ma aoao atu le faaolataga e ala ia Iesu Keriso. I le faaopoopo atu i ai, latou te aoaoina faapea o le alofa mutimutivale agamalu o le Alii ua faaloaloa mai ia i latou o e faaalia le faatuatua ia te Ia.

Aso 2 (1 Nifae 2)

Sa tali atu Liae i le faatonuga a le Alii e tuua Ierusalema. Sa ia faaalia i lona soifuaga le mataupu faavae faapea, pe a tatou faatuatua ma usiusitai, o le a fesoasoani mai le Alii ia i tatou i taimi o tofotofoga. Na faaalia e Nifae se uiga o le usiusitai ma aoaoina mo ia lava faapea, pe a valaau mai le Atua, e mafai e Ia ona faamaluluina o tatou loto ina ia talitonu i Ana afioga. Sa aoaoina e tamaiti aoga faapea, e faamanuiaina e le Atua i latou o e usiusitai ma faatuatua.

Aso 3 (1 Nifae 3–4)

Ina ua ta’u atu e Liae ia Nifae ma ona uso le faatonuga a le Atua mo i latou e toe foi i Ierusalema ma aumai papatusi apamemea, na tali atu Nifae e ala i le molimau atu faapea, afai o le a tatou faia le mea ua poloai mai ai le Alii, ona ia saunia lea o se auala mo i tatou e faataunuu ai lena mea. Na iloa e Nifae ma ona uso e faigata ona faataunuu le faatonuga a le Alii. O le naunautaiga o Nifae e toe foi i Ierusalema na fesoasoani i tamaiti aoga e iloa ai, pe a tatou faaalia le faatuatua i le Atua ma saili e faia le mea ua Ia fetalai mai ai, e tusa lava pe le mafai ona tatou vaaia le taunuuga, o le a Ia taitaiina i tatou e ala i le Agaga Paia.

Aso 4 (1 Nifae 5–6; 9)

A o suesueina e tamaiti aoga le aafiaga o Liae i le sailiiliina o papatusi apamemea, na latou iloaina ai le mataupu faavae lenei: A o tatou sailiiliina tusitusiga paia, e mafai ona faatumulia i tatou i le Agaga Paia ma maua faaaliga. A o latou aoaoina le faamoemoega o Nifae mo le tusiaina o lana talafaamaumau, na aoaoina ai foi e tamaiti aoga faapea o le faamoemoega o le Tusi a Mamona, o le faatauanauina lea o tagata uma e o mai ia Iesu Keriso.

Faatomuaga

O le lesona o le vaiaso lenei o le a tuuina atu ai i tamaiti aoga se avanoa e toe iloilo ma talanoaina ai mea na latou aoaoina mai le faataitaiga a le aiga o Liae, ma a latou faatinoga o le faatuatua. A o e aoaoina atu le lesona, faamamafa atu le usiusitai faamaoni o Nifae i faatonuga a le Alii ma lona saili ma le naunautai ia iloa le moni aiai o “upu uma na tautalaina e [lona] tama” (1 Nifae 2:16). A o mulimuli tamaiti aoga i le faataitaiga a Nifae o le usiusitai, o le a latou fausiaina a latou lava molimau o le talalelei.

I lau aoao atu, mulimuli i le faamalosiauga a Elder Jeffrey R. Holland o le Korama a Aposetolo e Toasefululua:

“E ao ona tatou toe faafouina ma toe faapaleina aoaoga sili a le Ekalesia—i le aiga, mai le pulelaa, i a tatou fonotaga faaleautaitai, ma totonu o potuaoga. O aoaoga musuia, e le tatau lava ona avea ma se taumafaiga e mou ese atu i le Ekalesia, ma e ao ona tatou mautinoa o la tatou taumafaiga ia le avea ma tu masani e mou ese atu. …

“… Tau ina ia tatou toe faaeaina le aoao atu i le aiga ma le Ekalesia, ma faaleleia a tatou taumafaiga uma e faamalosiau ma faatonu atu” (“O se Aoao ua Maliu mai le Atua,” Liahona, Iulai 1998, 29, 31).

Fautuaga mo le Aoaoga

1 Nifae 1

E faalauteleina mai e le Alii lona alofa mutimutivale agamalu i e faatuatua

Tusi le mataupu faavae lenei i luga o le laupapa: O le alofa mutimutivale agamalu o le Alii ua faalauteleina mai ia i latou o e faaalia le faatuatua ia te Ia. Valaaulia tamaiti aoga e tagai faatopetope i le 1 Nifae 1 ma saili le fuaiupu lea o loo aoaoina mai ai lenei upu moni (fuaiupu 20).

Fai atu fesili nei ina ia fesoasoani ai i tamaiti aoga e toe manatua ma otooto ai mea na latou aoaoina, a o latou suesueina le 1 Nifae 1–6; 9 i lenei vaiaso:

Mai mea na outou aoaoina i totonu o mataupu sa outou suesueina i lenei vaiaso, na faapefea ona faalauteleina atu e le Alii Lona alofa mutimutivale agamalu ia Liae ma lona aiga?
O a faataitaiga o le usiusitai ma le faatuatua na faaalia e Liae ma lona aiga?
O anafea na e vaaia ai le faalauteleina mai e le Alii o Lona alofa mutimutivale agamalu ia te oe, po o se isi e te iloaina?

Atonu e te manao e faamatala atu e uiga i se taimi na faalauteleina mai ai e le Alii lona alofa tunoa ia te oe ma lou aiga, a o e faatinoina le faatuatua, pe faasoa atu se aafiaga na e mauaina i totonu o se faasalalauga a le Ekalesia. Uunai tamaiti aoga e vaavaai mo faataitaiga o le faalauteleina atu e le Alii o Lona alofa tunoa i le aufaatuatua, a o latou suesueina le Tusi a Mamona i le tausaga atoa.

1 Nifae 2

E mafai e le Alii ona faamaluluina o tatou loto ina ia talitonu i Ana afioga

Faamanatu i tamaiti aoga faapea, ina ua mavae ona faatonuina Liae e tuua Ierusalema faatasi ma lona aiga, sa faia e lona atalii o Nifae se taumafaiga, a ia lava, ina ia iloa ma malamalama i le moni o faaaliga a lona tama. Valaaulia se tamaitiiti aoga e faitau leotele le 1 Nifae 2:16, 19.

Fesili atu i tamaiti aoga: E ui lava sa le’i muimui Nifae, o le a le faamaoniga o loo i ai i le 1 Nifae 2:16 faapea o le tuua o Ierusalema atonu sa avea ma se mea faigata mo ia? (Na tusia e Nifae faapea, na ia tatalo mo le malamalamaaga ma sa faamaluluina e le Alii lona loto. O lenei mea ua faailoa mai ai faapea o le tuua ai o Ierusalema sa le’i faigofie mo ia, o le mea lea na fesoasoani ai le Alii ia te ia e taliaina.)

Fesili atu: O le a le faamaoniga o e vaaia faapea e ui lava ina sa usiusitai Liae ma lona aiga i le Alii, ae sa le’i faigofie le olaga mo i latou? (Tagai i le 1 Nifae 2:4, 11.)

Fai atu i tamaiti aoga e faasoa mai manatu ua latou mauaina e uiga i manaoga o Nifae, ma, e uiga i mea na ia faia na taitaiina atu ai o ia e talia poloaiga a le Alii na tuuina mai e ala mai lona tama.

Valaaulia ni nai tamaiti aoga e faasoa mai mea na latou tusia i totonu o a latou api talaaga mo le suesueina o tusitusiga paia mo le aso lona 2, galuega fai 4: Faasoa atu se faataitaiga o se taimi na, faapei o Nifae, e valaau atu ai i le Tama Faalelagi ma mauaina se faamaluluina o lou loto e ala i le Agaga, po o se taimi na e mauaina ai se molimau o se mea na fetalai mai ai le Alii.

Faasoa atu lau lava molimau faapea pe a tatou valaau atu i le Atua, e mafai ona Ia faamaluluina o tatou loto ina ia talitonu i Ana afioga.

Fai atu i tamaiti aoga e mafaufau i mea e mafai ona latou faia e faamalolosia ai a latou molimau ma maua ai faamautinoaga mo i latou lava, e faapei ona sa faia e Nifae. Tuu atu ia i latou le avanoa e faasoa mai ai o latou manatu pe a latou mananao ai. Uunai i latou e faatino o latou manatu ma faalogona.

1 Nifae 3–4

O le a saunia e le Alii le auala a o tatou usitaia ma le faatuatua Ana poloaiga

Faatonu tamaiti aoga taitasi e galulue ma se paga. Tusi mau fefaasinoai nei i luga o le laupapa: 1 Nifae 3:6–7 ma le 1 Nifae 4:6–13. Valaaulia tamaiti aoga e faitau mau ma talanoaina fesili nei faatasi ma a latou paga:

O le a sou manatu e taua ai le faamatalaga a Nifae “E ui lea, sa ou alu atu”? (1 Nifae 4:7).
Na faapefea e le faatuatua o Nifae ona mafai ai mo ia ona maua papatusi apamemea?

A uma ona talanoaina e tamaiti aoga o latou manatu faatasi ma a latou paga, faamalamalama atu faapea atonu e fetalai mai le Alii ia i tatou e faia se mea, e pei ona sa Ia faia ia Nifae ma ona uso, e aunoa ma le vave faaalia mai pe aisea, o afea, pe faapefea ona tatou faataunuuina. Na aoaoina e Nifae le aisea, o afea, ma le faapefea ona fesoasoani mai le Alii ia te ia i le mavae ai ona ia faatagaina o le Agaga e taitaiina o ia ma le mavae ai ona ia filifili e alu atu i luma i le faatuatua. Faasoa atu lau molimau faapea pe a tatou faaalia le faatuatua i le Atua ma saili e faia le mea ua Ia finagalo ai, e tusa lava pe le mafai ona tatou vaaia le taunuuga, o le a Ia taitaia i tatou e ala i le aafiaga o le Agaga Paia.

Pe a lava le taimi, atonu e te manao e fai atu i tamaiti aoga pe i ai ni a latou fesili, pe mananao e faasoa mai manatu mai lo latou aso lona 4 o le suesueina o le 1 Nifae 5–6; 9. Mo le faataitaiga, atonu e mafai ona e valaauliaina i latou e faasoa mai pe na faapefea ona latou tali atu i le galuega fai lona 4, lea na faatonuina ai i latou e tusitusi e uiga i se taimi na latou suesueina ai tusitusiga paia ma lagonaina le Agaga o le Alii.

Faaiu e ala i le fai atu i se tamaitiiti aoga e faitau leotele (pe tauloto mai lona mafaufau) le mau tauloto 1 Nifae 3:7. Ona fai atu lea o fesili nei:

O le a le mataupu faavae o loo aoao mai e le 1 Nifae 3:7 e uiga i le usiusitai i poloaiga a le Alii? (E tatau i tamaiti aoga ona mafai ona faamatala le mataupu faavae faapea afai o le a tatou saili e faia le mea ua poloaiina ai e le Alii, o le a Ia saunia se auala mo i tatou e faataunuuina ai lena mea.)
E tusa ai ma mea ua e faitau i ai i le1 Nifae 1–6 ma le 9, o a taunuuga o le usiusitai o Liae ma Nifae i poloaiga a le Alii?
O anafea na saunia ai e le Alii se auala e fesoasoani ai ia te oe e tausia se poloaiga?

Valaaulia tamaiti aoga e mafaufau loloto i se vaega e mafai ona latou faaalia atoatoa ai lo latou usiusitai i le Atua. Atonu e te manao e faaiu le lesona e ala i le molimauina o faamanuiaga ua faapea ona o’o mai i lou olaga e ala i au taumafaiga e usiusitai i poloaiga a le Alii.

Iunite e Sosoo Ai (1 Nifae 7–14)

I le iunite e sosoo ai, o le a suesue ai e tamaiti aoga faaaliga a Liae ma Nifae. O faaaliga a Liae ma Nifae e uiga i le laau o le ola ua faatatau i o tatou olaga i aso nei. O le tala a Nifae i lana miti e aofia ai faamatalaga o le fanau mai, auaunaga, ma le Togiola a Iesu Keriso, o le mauaina ma le nofoiaina o Amerika e Tagata o Nuu Ese, ma le leiloloa o upu moni taua mai le Tusi Paia ma lo latou toefuataiina mai e ala i le Tusi a Mamona. O le tala a Nifae o lana faaaliga o loo faaiuina faatasi ma se faamatalaga o le Toefuataiga o le talalelei.