Lesona 98
Alema 41
Faatomuaga
O le faaauau pea ona fautuaina o lona atalii o Korianetona, na aoao atu ai e Alema le fuafuaga o le toefuataiga e aofia ai e le gata i le toetu faaletino ao o le toefuataiga faaleagaga lea o le a atagia mai e a tatou galuega ma manaoga faaletino lo tatou nofoaga e faavavau. Na faamamafaina atu ai foi e Alema o le amioleaga e le mafai lava ona taitaiina atu ai i le fiafia.
Fautuaga mo le Aoaoga
Alema 41
Ua aoao atu e Alema ia Korianetona e uiga i le fuafuaga o le toefuataiga
Fai i le vasega e mafaufau pe faapefea ona uunaia ni uiga o se tagata pe afai latou te talitonu i faamatalaga nei (taofi pe a uma aitema taitasi ina ia tuu atu ai i tamaiti e tali mai):
E leai se ola pe a mavae le oti.
A mavae lo tatou oti, o le a faaatoatoaina i tatou e tusa lava po o a a tatou galuega na fai i luga o le fogaeleele.
I le Faamasinoga Mulimuli, o le a tauia i tatou mo a tatou galuega lelei ae faasalaina mo a tatou galuega le lelei.
-
Aisea e taua ai le mauaina o se malamalamaaga sao o le mea o le a tupu ia i tatou pe a mavae lo tatou oti?
Faamanatu atu i tamaiti o le Alema 40 ua latou iloa ia aoaoga a Alema ia Korianetona e uiga i le lalolagi o agaga, toetu, ma le faamasinoga. Faamalamalama atu o le Alema 41 ua tatou iloa ai sa le mautonu Korianetona ona o mea sa aoaoina e nisi tagata e uiga i le toetu. Faailoa atu le fasifuaitau “o sese mamao ese ai” i le Alema 41:1, ma fai atu i tamaiti e faitau le fuaiupu lenei ma vaavaai i le mea na mafua ai na o ese nisi tagata.
-
Aisea na o ese ai nisi tagata? (Atonu e te manao e faamatala atu o le mimilo o tusitusiga paia o le faaseseina, pe suia mai o latou uiga.)
-
O le a le mea na fai mai Alema o le a ia faamalamalamaina ia Korianetona?
A maua loa e tamaiti le upu toefuataiga, atonu e te manao e tusi i luga o le laupapa. Faamalamalama atu o le toefuataiga o lona uiga o le toe aumai po o le toe faafoi i lona tulaga sa i ai muamua.
Faamalamalama atu sa manao Alema ina ia malamalama Korianetona e i ai se tulaga faaletino ma se tulaga faaleagaga lea na ia taua o le “fuafuaga o le toefuataiga” (Alema 41:2). Fai i tamaiti e suesue le leoa i le Alema 41:2–5, vaavaai mo mea o le a toefuatai mai ia i tatou faaletino pe a mavae le oti ma mea o le a toefuatai mai faaleagaga. Atonu e te manao e fautuaina tamaiti e faailoga mea sa latou mauaina. Ao lei faitauina e tamaiti, e ono fesoasoani ia te oe le faamalamalama atu faapea o mea e tatau ai o lona uiga o mea e manaomia pe e taua.
-
O le a se tulaga faaletino o le fuafuaga o le toefuataiga o loo ta’ua i le Alema 41:2? (I le toetu, o le a toefuatai le agaga i lona tino, ma o le a toefuatai ia vaega uma o le tino.)
-
O le a le tulaga faaleagaga o le fuafuaga o le toefuataiga o loo faamatalaina i le Alema 41:3–5? (A o tali mai tamaiti, tusi le upu moni lenei i luga o le laupapa: O le a toefuatai mai i tatou a le o le fiafia po o le faanoanoa e tusa ma a tatou galuega ma manaoga i le olaga faaletino.)
Fai i tamaiti e mafaufau o loo aoaoina atu nei fuaiupu i se vasega o le Peraimeri.
-
Faamata e faapefea ona e faaamatalaina le aoaoga faavae o le toefuataiga faaleagaga ina ia mafai ai e tamaiti ona malamalama i ai?
Faamanatu atu i tamaiti na solia e Korianetona le tulafono o le ola mama ma lafoai ona tiutetauave faafaifeautalai (tagai i le Alema 39:2–4).
-
Faamata na faapefea ona fesoasoani le sao o le iloa o aoaoga faavae o le toefuataiga faaleagaga ia Korianetona e faia ai ni filifiga lelei? Na faapefea ona uunaia e le iloaina o lenei aoaoga faavae a tatou galuega ma manaoga?
Molimau atu i le moni o lenei aoaoga faavae, ma faasoa atu ni ou manatu e uiga i le faamasinogatonu a le Atua i le toefuatai mai o i tatou taitoatasi i le lelei po o le leaga e tusa ai ma o tatou manaoga ma galuega.
Tusi le fesili lenei i luga o le laupapa: A e a pe afai na ou agasala?
-
E tusa ai ma le fuafuaga o le toefuataiga, o le a se mea tatou te mauaina pe afai na tatou agasala?
-
E i ai se auala e toefuatai ma ai ia i tatou le lelei ma le fiafia pe afai o tatou faia le mea sese?
Valaaulia se tamaitiiti aoga e faitau leotele le Alema 41:6–9. Fai i le vasega e tagai i le mea e mafai ona tatou faia ina ia toefuatai mai ai ia i tatou le lelei ma le fiafia e tusa lava pe na tatou agasala. (E tatau ona tatou salamo ma manao i le amiotonu i lo latou olaga atoa.)
-
O a upu po o fasifuaitau o i le Alema 41:6–7 o fautua mai ai tatou te tali lava mo mea tatou te mauaina i le toetu? O le a se tulaga e avea ai i tatou ma o tatou lava faamasino? (O a tatou filifiliga i le olaga faitino e fuafua i ai le ituaiga faamasinoga o le a tatou mauaina pe a tatou tutu i luma o le Atua.)
Faailoa atu o nisi o tagata latou te mafaufau e mafai lava ona latou toe foi atu e nonofo faatasi ma le Atua e aunoa ma le mafaufau patino i a latou amioga. E masani lava ona latou fai mai o a latou filifiliga sese e malie. O nisi taimi e foliga mai ai i latou o e faia le agasala e fiafia.
Fai i tamaiti e tutu ma faitau faatasi leotele mai le Alema 41:10. Faailoa atu o le Alema 41:10 o se fasifuaitau o se mau tauloto. Atonu e te manao e fautuaina tamaiti aoga e faailoga lenei fasifuaitau i se auala faapitoa ina ia faigofie ai ona latou sueina. Talu ai ona o se fasifuaitau o se mau tauloto, atonu e te manao latou te fai faatasi mai ia sili atu nai lo le faatasi. E mafai ona e fesili atu pe i ai se tagata i le vasega e mafai ona taulotoina mai.) A uma, fai i le vasega e nonofo i lalo. Tusi i le laupapa, “E lei avea lava le amioleaga ma fiafia.”
-
Aisea e moni ai [le faaupuga lea] “e lei avea lava le amioleaga ma fiafia”?
-
O le a se faataitaiga o se auala a Satani lea tatou te solia ai se poloaiga ma talitonu e mafai lava ona tatou lagona le fiafia?
Ina ia fesoasoani i tamaiti ia amanaiaina le eseesega i le va o le fiafia puupuu faalelalolagi ma le fiafia lea e ofoina mai e le Alii, faitau i le saunoga lenei a Elder Glenn L. Pace o le Fitugafulu:
“O mea ua faasaina pea e le Alii ma i le tele o tausaga sa teena e tagata peitai i le taimi nei ua taliaina ma ua lagolagoina e na lava tagata. Ua faasalalauina ia mea i nusipepa ma televise i ni auala ua faafoliga mai ai o ni mea lelei. …
“… Aua nei o outou ave sese tuinanau faatelesitila faapea o le fiafia ma le oliloli moni lena faaselesitila. Aua nei o outou ave sese le le pulea lelei o le tagata lava ia, faapea o le saolotoga. O le saoloto faasoloatoa e aunoa ma ni taofiofiga tatau, tatou te pologa ai i o tatou tuinanau. Aua nei outou moomoo i se olaga maualalo. …
“… E lei tuuina mai ia te outou poloaiga ua outou tausia e se Atua lē alofa na te taofi ai outou mai le fiafia, ae na tuuina mai e se Tama o i le Lagi alofa ua finagalo ia outou fiafia ao outou ola ai i lenei lalolagi faapea ma le olaga a sau” (“E Le o Fiafia Moni i Latou,” Liahona, Ian. 1988, 39–40).
Tusi le faamatalaga lenei i luga o le laupapa:Atonu e te manao e fautuaina tamaiti e tusi le faamatalaga i totonu o a latou tusitusiga paia i talaane o le Alema 41:10. (O le faamatalaga o loo maua i le “To ‘the Rising Generation,’” New Era, Iuni 1986, 5.)
“E le mafai ona e faia se mea sese ma e lagona se lagona lelei. E matua le mafai lava!” (Peresitene Ezra Taft Benson).
Faamatala atu i tamaiti o le Alema 41:11 o loo faamalamalama mai ai le mafuaaga e le mafai ai ona e maua moni ai le fiafia pe afai o e faia ni filifiliga sese. Kopi le siata lenei i luga o le laupapa (atonu e te manao e faia ao lei amataina le vasega), pe saunia se pepa e tufa atu i tamaiti taitasi. Faatulaga tamaiti i ni paga, ma faatonu i latou e faafetaui ia fasifuaitau taitasi mai le Alema 41:11 ma lona uiga. Fai atu foi ia i latou e talanoaina ia fesili nei.
O fasifuaitau o i le Alema 41:11 lea o loo faamatalaina le avea ma se “tulaga o le natura” |
Faauigaga | |
---|---|---|
|
| |
|
| |
|
| |
I lenei fuaiupu, ua tatou iloa ai o le “natura o le Atua” o le “natura o le fiafia”. O le a se mea o tau mai e lenei mea ia te oe e uiga i le mafuaaga e tetee ai le agasala i le natura o le fiafia? O a nisi o faataitaiga faapitoa o le mafuaaga e ono oo ai le tagata lava ia i le tulaga o le le fiafia? |
(Tali: 1-i, 2-a, 3-e)
Ina ia fesoasoani i tamaiti ia iloa le auala o loo faaauau ai pea ona fesootai le “tulaga o le natura” i le aoaoga faavae o le toefuataiga, fai i tamaiti e faitau le Alema 41:12. A uma ona faitau le mau, fai atu i tamaiti e tali mai le fesili a Alema. Ona fai lea i tamaiti e faitau le tali a Alema i lana lava fesili i le Alema 41:13. (Atonu e te manao e fautuaina i latou e faailoga le mea na tau mai e Alema o le a toe aumaia ia i tatou o se vaega o le fuafuaga o le toefuataiga.)
Fai i tamaiti e mafaufau e i ai so latou uo o loo filifili e tetee atu i poloaiga a le Alii ae fia manao e toefuatai i le amiotonu. Fai i tamaiti e faamatala atu le aoaoga faavae o le toefuataiga i se paga, e pei o ia o lena uo, faaaoga le Alema 41:12–13. (E mafai ona faaaoga mai e tamaiti ni a latou lava faaupuga po o le faaupuga o le faamatalaga o loo tusia i le laupapa: “O le a toefuatai mai i tatou a le o le fiafia po o le faanoanoa e tusa ma a tatou galuega ma manaoga i le olaga faaletino.”)
Faaali atu i tamaiti se pumaregi [boomerang] pe tusi se ata i luga o le laupapa.
Tau atu i tamaiti le mea e fai e le pumaregi pe a sao le togiina. (E toe foi i le nofoaga lea na togi atu ai.) Fai atu ia i latou e faitau le leoa le Alema 41:14–15, vaavaai mo ni auala e ono suia ai e le pumaregi ia upu moni o loo aoaoina i nei fuaiupu. (Atonu e te manao e fautuaina ia tamaiti aoga e faailoga ia fuaiupu nei.) Valaaulia tamaiti e faamatala mai mea na latou maua.
-
O a nisi mea e te faamoemoe e maua mai i isi ma mai le Alii i lenei olaga ma le isi olaga? (O tali e ono aofia ai le agalelei, alofa mutimutivale, ma le alofa. Mafaufau e lisi tali a tamaiti i luga o le laupapa.)
-
O anafea na e faaalia ai le amiolelei, alofa mutimutivale, po o le agalelei atu i isi ma mulimuli ane ua toe tauia mai e isi?
Uunaia ia tamaiti e seti se sini ma atiina ae ni amio po o ni uiga e atagia mai ai se mea latou te faamoemoe o le a toefuatai ia i latou i lenei olaga faapea ma le isi olaga. Molimau atu i le fiafia lea o le a oo mai pe a tatou galulue i le amiotonu.
Mau Tauloto—Alema 41:10
Faaaliga: Talu ai ona o le natura ma le umi o lenei lesona, e sili pe a faaaoga le gaoioiga lenei i se isi aso pe a lava se taimi.
Tusi le upu moni lenei i luga o le laupapa: … o le fiafia.
Fai i tamaiti e tau mai se faamatalaga faafeagai o le aoaoga faavae lea o loo aoaoina mai i le Alema 41:10. (O se tasi o tali talafeagai o le “O le amiotonu o le fiafia lea.”) Ona valaaulia lea o tamaiti e lisi mai ni galuega amiotonu faapitoa latou te lagona e fetaui i le avanoa. (Mo se faataitaiga, “O le auauna atu i isi o le fiafia lea.”) Fai i tamaiti pe mafai ona latou molimau atu faapea o soo se galuega amiotonu nei o le a mafai ona taitai atu ai i le fiafia. A uma ona faasoa mai e ni nai tamaiti a latou aafiaga ma molimau, fai i le vasega e tusi i luga o se kata e ofi i totonu o le taga po o se fasi pepa ni galuega amiotonu se tasi pe lua foi e mafai ona latou faia i le aluga o le vaiaso e faateleina ai lo latou fiafia. Uunaia i latou e o ma feaveai a latou pepa e avea ma se faamanatu ma ia lipoti mai a latou taumafaiga i ni aso a sau.
Tala ma Faamatalaga o Talaaga
Alema 41:10. E lei avea lava le amioleaga ma fiafia
O le faamatalaga lenei mai le Faamaoni i le Faatuatua ua faamalosia ai le manatu faapea e mafai e tamaiti ona maua le malie ma le fiafia i ni auala amiotonu:
E toatele tagata ua latou taumafai e saili le fiafia ma le faamalieina i gaoioiga e le tusa ai ma poloaiga a le Atua. O le le amanaiaina o le fuafuaga a le Atua mo i latou, ua latou teena ai le punavai o le fiafia moni. Ua latou gauai atu i le tiapolo, o lē ‘saili ina ia malaia tagata uma e pei o ia lava’ (2 Nifae 2:27). E le pine ae latou iloa le moni o le lapataiga a Alema i lona atalii o Korianetona: ‘E lei avea lava le amioleaga ma fiafia’ (Alema 41:10). …
“A o e saili ia e fiafia, ia manatua ua na o le pau lava le ala i le fiafia moni o le ola i le talalelei. O le a e maua le fiafia faavavau filemu a o e taumafai e tausi poloaiga, tatalo mo le malosi, salamo i au agasala, auai i gaoioiga lelei, ma tuuina atu auaunaga aoga. O le a e iloa ai e maua le fiafia i totonu o tuaoi ua uma ona faatulagaina e se Tama alofa i le Lagi” (Faamaoni i le Faatuatua: O Se Tusitaiala o le Talalelei [2004], 70).
Alema 41:10–11. O tagata uma ua i ai i “se tulaga o le natura”
Na aoao mai Peresitene David O. McKay ua tatou maua se natura itulua ma le tomai e filifili ai le fiafia e ala i le pulea o oe lava ia:
O le ola ai i le upu moni ma le ola mama e aumaia ai le fiafia ma le olioli, ae o le solia o le ola mama ma tulafono lautele e oo atu ai i le le fiafia, faanoanoa, ma le faalumaina pe a matuia tele.
“Ua i ai i le tagata se natura itulua—o le tasi, e faatatau lea i le olaga faalelalolagi po o le olaga o tuinanau; o le isi, o le olaga faaleagaga, e faatatau i le olaga faalelagi. O le tino o le tagata ua na o se tapeneko lea o loo nofo ai le agaga. O le toatele lava ua gauai atu e mafaufau faapea o le tino, o le tagata lea ma, o lea, ua taulai atu ai a latou taumafaiga i le faamalieina o tuinanau ma manaoga o le tino. E toalaiti lava ua iloaina o le tagata moni lava o se agaga e le oti, lea na tuuina mai ai le “upu moni o le atamai po o le malamalama” e avea o se tagata ao lei fausiaina le tino, ma o lenei mea faaleagaga faatasi ai ma ona uiga patino, o le a faaauau pea pe a muta le faamalieina o le tino i siosiomaga faalelalolagi.
“Afai e tumau ona faamalieina se tagata i mea ua tatou faaigoa o le lalolagi o tuinanau, faamalieina i mea o le a tuuina mai e le lalolagi o tuinanau ia te ia, ma gauai atu e aunoa ma se taumafaiga i faanaunauga faatautala o lona manao ma tuinanau, ma atili tosina atu ai i le lalolagi o tuinanauga, po o le [faaaoga] o lona loto pulea e tulai ma agai atu i fiafiaga e maua ai le atamai, o aoaoga aoga, ma faaleagaga e faalagolago lava i le ituaiga filifiliga na te faia i aso uma— leai, o itula uma lava o lona olaga” (Liahona, Iulai 2006, 30).
Alema 41:11. “Tulaga e le maua ai le fiafia”
Na faamatalaina e Elder F. Enzio Busche o le Fitugafulu faapea o le suesueina ma le faamaoni o upu a auauna tofia a le Alii o le a fesoasoani ia i tatou ina ia mataalia pe a tatou pauu atu i le tulaga o le le maua o le fiafia:
“O i tatou uma lava, e i ai nisi taimi e gauai atu ai i tulaga e le maua ai le fiafia, atonu foi o nisi taimi pe a tatou i ai i lena tulaga, e le faapea ona ua tatou faia atoatoa o le amioleaga po o le agasala. Peitai i taimi uma tatou te i ai i lenei lalolagi i le olaga faataitai, e mafai lava ona uunaia i tatou e le tiapolo. E mafai ona oo ia i tatou le faatamala i nisi taimi. E mafai ona tatou manatu faatauvaa i a tatou mafutaga ma e pele ia te i tatou. Atonu foi ua tatou faatagaina ni nai sese laiti i nisi taimi e oo mai i o tatou olaga; po o le lafoai ese foi o le malamalama moni e uiga i le taua o le tausia o se feagaiga i lona atoatoa. Afai o le tulaga lea, ua tatou oo atu i se tulaga matautia. E tatau ona tatou malamalama i ai i lena mea. E le tatau ona tatou faatalale i ai i lena tulaga. E mafai ona tatou iloa mo sina taimi ua tatou le maua le fiafia moni, ma ua tatou taumafai foi i taimi uma e faamalosia i tatou ia mata fiafia, po o lo tatou lata atu foi i le tulaga o le pagatia. Atonu e mafai ona tatou faaseseina isi tagata, a e le mafai ona tatou faaseseina i tatou lava ma le Alii.
“O le talalelei i lona atoatoa ua talaiina atu i le lalolagi e auauna tofia a le Alii, ina ia mafai ai e tagata uma ona malamalama i lona tulaga. Ina ia mafai ona tatou faalatalata i upu a auauna tofia a le Alii, e tatau ona tatou faitau ma suesue i tusitusiga paia ma le faamaoni ma le naunautai.
“… E le finagalo le Alii ia tatou mafaufau i lo tatou tulaga faatauvaa ma le le aoga (tagai i le Mosaea 4:11; Alema 26:12; Hel. 12:7; Mose 1:10) seia oo i le Aso Faamasino. I le taimi nei ma aso taitasi o lo tatou olaga i la le tino, e finagalo o Ia ia faateleina lo tatou malamalama, ina ia avea i tatou ma o tatou lava faamasino, a o Ia valaauina i tatou i le ala faaauau pea o le salamo” (“Iunivesite mo le Ola e Faavavau,” Liahona, Iulai 1989, 89, 90).
Alema 41:11. Ua mafai ona suia lo tatou natura e ala i le alofa tunoa o Keriso
Na aoao mai Elder David A. Bednar o le Korama a Aposetolo e Toasefululua e faapea:
“O le natura moni o le talalelei a Iesu Keriso e afua ai se suiga taua ma le mautu i o tatou lava natura, e mafai i lo tatou faalagolago i ‘taui, ma le alofa mutimutivale ma le alofa tunoa o le Mesia Paia’ (2 Nifae 2:8). A o tatou filifili e mulimuli i le Matai, ua tatou filifili ia suia—ia toefanau faaleagaga” (“Ye Must Be Born Again,” Ensign po o le Liahona, Me 2007, 20).