Faatomuaga i Le Tusi a Eteru
Aisea e suesueina ai lenei tusi?
A o suesue tamaiti aoga i le tusi a Eteru, o le a latou aoao e uiga ia sa Iareto—o se vaega o tagata na faimalaga i le Itulagi i Sisifo ma nonofo ai iina mo le tele o seneturi ao lei taunuu le nuu o Liae. O le a aoaoina e tamaiti aoga mataupu faavae taua e uiga i le tatalo, o faaaliga, ma le sootaga i le va o le faatinoina o le faatuatua ia Iesu Keriso ma le mauaina o le atamai faaleagaga. O le a latou aoao foi e uiga i matafaioi a perofeta i le faatauanauina o tagata ia salamo ma e uiga i taunuuga e oo mai ia i latou o e teena Iesu Keriso ma Ana perofeta.
O ai na tusiaina lenei tusi?
Na otootoina e Moronae lenei tusi mai le 24 papatusi auro na faaigoaina o papatusi a Eteru. Sa faaaigoa lenei tusi mo le perofeta o Eteru, o le na avea ma perofeta mulimuli o sa Iareto ma le sa faia se faamaumauga o lo latou talafaasolopito (tagai Eteru 15:33–34). E tusa ma le 500 tausaga ao lei faia e Moronae lona otootoga o faamaumauga paia, na maua ai e nisi o le nuu o Limae papatusi a Eteru ao latou saili mo le nuu o Sara’emila (tagai Mosaea 8:7–11; Eteru 1:2). Sa faasolo i lalo e perofeta o sa Nifae ma tausi talafaamaumau papatusi a Eteru seia oo ina ua maua e Moronae. Sa taua e Moronae e na te le’i aofia ai e oo lava i le“tasi vaeselau” o faamaumauga o lana otootoga (Eteru 15:33).
O ai na faatatau i ai le tusiaina o lenei tusi, ma pe aisea foi?
Ona sa otootoina e Moronae papatusi a Eteru ina ua maea ona faaumatia sa Iareto ma ona lava tagata, sa faamoemoeina e ia lenei tusi mo tagata o o tatou aso. Sa lapata’iina e Moronae ia Nuuese o aso e gata ai ina ia salamo, auauna i le Atua, ma lafoai faapotopotoga faalilolilo (tagai Eteru 2:11–12; 8:23). Sa ia faamaumauina foi afioga a Iesu Keriso, i le valaauliaina o “tuluiga uma o le lalolagi” ia salamo,o mai ia te Ia, ma ia papatisoina, ma maua le malamalama lea ua taofia mai le lalolagi ona o le le talitonu (tagai Eteru 4:13–18).
O anafea ma o fea foi na tusia ai lenei tusi?
Sa faamaeaina e Eteru faamaumauga a ona tagata ao faia ma le maea ai o le taua sili mulimuli na fasiotia ai tagata uma sei vagana ai sa Iareto e toalua—o ia lava ma Korianetuma (tagai Eteru 13:13–14; 15:32–33). Ma sa ia natiaina lea o ana faamaumauga “i se ala na maua ai e tagata o Limae” (Eteru 15:33; tagai foi Mosaea 8:7–9). Sa otootoina e Moronae faamaumauga a Eteru i le va o le T.A. 400 ma le T.A. 421 (tagai Mamona 8:3–6; Moronae 10:1). Sa tusia e Moronae faapea sa faaumatia sa Iareto i “lenei laueleele i matu” (Eteru 1:1), ma faailoa mai atonu sa i ai o ia i le laueleele lea na faaumatia ao ia otootoina o latou faamaumauga.
O a nisi o vaaiga iloga o lenei tusi?
E le pei o isi tusi i le Tusi a Mamona, e le faamatalaina e le tusi a Eteru le talafaasolopito o le tupuaga o Liae. Ua faamaonia e le tusi le ala na oo mai ai sa Iareto mai le Olo o Papelu ma malaga atu i le laueleele o le folafolaga, lea na iu ai na faaumatia. O le tusi a Eteru o se molimau lona lua i faamaumauga a sa Nifae ua faaaliaina faapea “ma o soo se atunuu latou te mauaina [le nuu o le folafolaga] ia auauna atu i le Atua, a leai o le a tafi ese i latou … pe a matua i latou i le amioletonu” (Eteru 2:9).
O le faaali mai o Iesu Keriso i la le agaga i le uso o Iareto “ua tulaga ai o se tasi o taimi maoae i le talafaasolopito sa faamauina.” O lenei mea sa tupu sa “lauiloa ai le uso o Iareto faatasi ai ma perofeta maoae a le Atua e faavavau” (Jeffrey R. Holland, Christ and the New Covenant: The Messianic Message of the Book of Mormon [1997], 17). O le faamatalaina e Moronae o le faaaliga ua maua ai se molimau mamana ia Iesu Keriso ma faailoa mai ai aoaoga iloga e uiga i le natura o tino faaleagaga (tagai Eteru 3:4–17).
Otootoga
Eteru 1–3 Ua faasaoina e le Alii le gagana a sa Iareto i le Olo o Papelu ma folafolaina e taitai atu i latou i se nuu o le folafolaga ma avea ai i latou ma malo maoae. Ua Ia taitai atu i latou i le matafaga ma faatonuina i latou e fau ia vaa mo lo latou faigamalaga i le vasa. Ua faaalia e le Alii o Ia lava ma “mea uma” (Eteru 3:26) i le uso o Iareto.
Eteru 4–5 Ua faamaufaailogaina e Moronae tusitusiga a le uso o Iareto. Ua ia faamaumauina le fetalaiga a Iesu Keriso faapea o nei tusitusiga o le a faaali ia i latou o e faatinoina le faatuatua ia te Ia. Ua aoao mai e Moronae e faapea o molimau e toatolu o aso e gata ai o le a faatasi atu ma le Tama, le Alo, ma le Agaga Paia i le molimauina o le Tusi a Mamona.
Eteru 6–11 O le faigamalaga a sa Iareto i le laueleele o le folafolaga. Na uluola tagata ma amata ona salalau atu i le laueleele. O se faatulagaga o tupu amiotonu ma tupu amioleaga sa puleaina le tele o augatupulaga. Sa toetoe lava a faaumatia sa Iareto ona o faapotopotoga faalilolilo. Sa lapataiina e le toatele o perofeta ia tagata ia salamo, ae sa latou teena i latou.
Eteru 12 Ua aoao e Moronae e moomia le faatuatua ao lei mauaina e se tagata se molimau faaleagaga. Ua ia faailoa i le Alii lona atuatuvale o le a muimui e Nuuese i le lumanai lona vaivaiga i le tusiaina o faamaumauga paia, ma sa ia faamaumauina le tali a le Alii ia te ia. Ua apoapoai e Moronae ia le au faitau o aso e gata ai ia saili ia Iesu Keriso.
Eteru 13–15 Ua talanoaina e Moronae le valoaga a Eteru i le Ierusalema Fou. Ina ua maea ona teena e sa Iareto ia Eteru, ua ia molimauina ma faamaumauina lo latou faafanoga atoa.