Lesona 149: Eteru 12:1–22

Lesona 149

Eteru 12:1–22

Faatomuaga

I le maea ai ona toe faamatalaina o le tele o tausaga o talaaga a sa Iareto, na faailoa ai e Moronae le galuega a le perofeta o Eteru. Ona taofia lea e Moronae le talaaga o talafaasolopito ia faamaumau ai nisi o faamanuiaga e oo mai ia i latou o e faatinoina le faatuatua ia Iesu Keriso. E aofia i lenei lesona le Eteru 12:1–22, ao le lesona e 150 e aofia ai Eteru 12:23–41.

Fautuaga mo le Aoaoga

Eteru 12:1–4

Ua talai atu e Eteru le salamo i a sa Iareto

Amata le vasega i le valaauliaina o se tamaitiiti aoga e sau e tusi se ata o ni galu ma se vaa o loo taulaina i le laupapa.

Aisea e taua ai ona i ai se taula mo se vaa?
O a mea matautia po o faigata atonu e feagai ma se vaa pe afai e leai se taula?
O a ni aafiaga o i ai i galu i se vaa? (O tali atonu e aofia ai o galu e mafua ai ona alu solo le vaa, tafea, po o le felafoaiina ii ma o.)

Faailoga le vaa i upu lou olaga.

Afai o vaa e fai ma sui o o tatou olaga, o a mea e mafai ona faatusaina ai ia galu? (O tali e mafai ona aofia ai mamafatu faaleagafesootai, faigata, aoaoga sese, po o le amioleaga.)
Faamata e faapefea ona avea se olaga o se tagata o se vaa e aunoa ma se taula? (Atonu e te manao e fautuaina atu i tamaiti aoga e faitau le Mamona 5:17–18 ia fesoasoani ia i latou e tali lenei fesili.)
O a nisi o mea ua saunia e le Alii e mafai ona avea ma taula faaleagaga i o tatou olaga? (E mafai ona tuuina mai e tamaiti aoga tali eseese. O le tele o aoaoga o le talalelei e mafai ona faatusaina i se taula.)

Fautuaina tamaiti aoga e vaavaai mo faataitaiga o taula faaleagaga ao latou suesueina le Eteru 12.

Faamalamalama atu e amata le Eteru 12 i le faatomuaga a Moronae ia Eteru, o se perofeta a sa Iareto na talai i le aluga o se taimi na teena ai e tagata perofeta ma ola i le amioleaga. Valaaulia tamaiti aoga e faitau leleoa le Eteru 12:1–3, ma faailoaina soo se mea e faafiafiaina ai i latou e uiga i amioga a Eteru. Tuu atu ia i latou e lipoti mai mea ua latou mauaina.

Valaaulia se tamaitiiti aoga e faitau leotele le Eteru 12:4. Fai atu i le vasega e mulimuli i le faitauga, ma faailoaina mea e mafai ona “faamoemoe mo” i latou o e ua talitonu i le Atua e tusa lava pe o siomia i faigata ma le amioleaga. Ao tali mai tamaiti aoga, atonu e te manao e faamanino atu o le “lalolagi sili atu ona lelei” ua tatou faamoemoe i ai mo o “se nofoaga lava i le aao taumatau o le Alii.”

O le a le uiga o le i ai o se nofoaga i le aao taumatau o leAtua? (Ia toe foi atu i Lona afioaga ma maua le ola e faavavau.)
E faapefea ona e manatu o le i ai o se faamoemoe “ma le mautinoa” e ese mai i le na ona fia maua o se mea? (I tusitusiga paia, ua faatatau le faamoemoe i le mauaina o le lototoa e mafai ona tatou maua ai faamanuiaga ua folafolaina mai e le Atua ia i tatou pe afai tatou te tausia o tatou feagaiga ma Ia.)
E tusa ai ma Eteru 12:4, e faapefea ona tatou maua le faamoemoe o le mauaina o se nofoaga i le aao taumatau o le Atua? (Ao tali mai tamaiti aoga, faamalamalama atu o le faatuatua na taua i le Eteru 12:4 ua faatatau i le faatuatua ia Iesu Keriso.) E faapefea e le faatuatua ia Iesu Keriso ona faatagaina i tatou ia faamoemoe “moni lava” mo se nofoaga i le aao taumatau o le Atua?

I le laupapa, faailoga le taula ma upu o le faatuatua ma faamomoe.

E tusa ai ma Eteru 12:4, o le a le mea e tupu pe a i ai i se tasi le faamoemoe ma le faatuatua ia Iesu Keriso? (Atonu o le a tali mai tamaiti aoga i upu eseese, ae e tatau ona latou faailoaina le mataupu faavae o loo i lalo: Pe a i ai ia i tatou le faamoemoe ma le faatuatua ia Iesu Keriso, o le a tatou mausali ma o le a faatumulia i tatou i galuega lelei.)
O le lou manatu i le uiga o le “faatumulia” i galuega lelei? (Ia faia mea lelei e tele.)
O a nisi o galuega lelei o le a “viia ai le Atua”? (O tali e mafai ona aofia ai le tatalo, suesueina o tusitusiga paia, auauna atu i isi, ma le atiina ae o taleni.)
Mafaufau i tagata e te iloa o e faatumulia i taimi uma i galuega lelei ma e le matamuli e viia le Atua. O a nisi o mea patino latou te faia e avea ai i latou ma faataitaiga lelei o lenei mataupu faavae?

Valaaulia tamaiti aoga e mafaufau loloto i taimi na faigata ai mo i latou ona mausali ma faatumulia i galuega lelei. Ia fesoasoani i tamaiti aoga ia saunia mo tulaga faapenei i o latou olaga, fautuaina i latou e vaavaai mo auala e mafai ona faateleina ai lo latou faatuatua ma le faamoemoe ao latou faaauau ona suesue i le Eteru 12.

Eteru 12:5–22

Ua toe faamatalaina e Moronae vavega ma galuega ofoofogia na oo mai ona o le faatuatua

Tusi le fasifuaitau o loo i lalo i le laupapa: Ou te manao ia maua se molimau faaleagaga na …

Valaaulia tamaiti aoga e fautua mai soo se upumoni o le talalelei, mataupu faavae, po o aoaoga faavae lea atonu e mafai ona sailia e tagata mo se molimau faaleagaga. Ao tali mai tamaiti aoga, tusi a latou tali i le laupapa. (O tali e mafai ona aofia ai se molimau e moni le Tusi a Mamona; ole ola ai i se olaga mama ma amiomama e taua;o le Upu o le Poto o se tulafono a le Atua; E tatau ona ou saunia e auauna atu i se misiona.) Valaaulia tamaiti aoga e mafaufau i se upu moni o le talalelei lea o le a latou maua ai se molimau faaleagaga po o se molimau malosi.

Faamalamalama atu o nisi tagata o loo ia i latou uiga o loo i lalo: “Ou te le talitonu pe ola e tusa ma se mataupu faavae o le talalelei seia ou vaai i se faamautinoaga e moni lena mea.” Valaaulia tamaiti aoga e faitau leleoa le Eteru 12:5–6, ma vaavaai pe faapefea ona fesootai nei fuaiupu i lenei uiga. Faamanino atu o le Eteru 12:6 o se fuaitau o mau tauloto. Atonu e te manao e fautuaina ia faailoga e tamaiti aoga lenei fuaitau i se tulaga ese ina ia faigofie ona latou mauaina.

E tusa ai ma le Eteru 12:6, o a mea e tatau ona tutupu ao le i mafai ona tatou mauaina se molimau?
O a manatu ua ia te oe pe a e mafaufau i le fasifuaitau “tofotofoina lo outou faatuatua”?

A maea ona tali mai tamaiti aoga, atonu e te manao e faamalamalama atu o nisi tagata ua sese lo latou faauigaina o le “tofotofoina o lo outou faatuatua” o le faatatauina i taimi uma i faigata. O le fasifuaitau “tofotofoina o lo outou faatuatua” e mafai ona faamatalaina soo se mea e tuuina mai ia i tatou le avanoa e faatino pe galueaiina lo tatou faatuatua ia Iesu Keriso. Ina ia fesoasoani i tamaiti aoga ia malamalama lelei i lenei fasifuaitau, valaaulia se tamaitiiti aoga e faitau leotele le faamatalaga lenei a Elder Richard G. Scott o le Korama a Aposetolo e Toasefululua. Ao le i faitauina le faamatalaga, fai atu i le vasega e faalogologo i le faamalamalamaina e Elder Scott o le fasifuaitau “tofotofoina lo outou faatuatua.”

“E mafai ona e aoao ia sili atu le faaaogaina o le faatuatua i le faaaogaina o lenei mataupu faavae na aoao mai e Moronae: ‘… tou te le maua se molimau seia uma onatofotofoina o lo outou faatuatua’ [Eteru 12:6; faaopoopo i ai le faamamafa]. O le mea lea, soo se taimi e tefaataitaia ai lou faatuatua, o le galue lena ma le agavaa i se musumusuga,o le a e maua ai se molimau faamaonia a le Agaga. O na lagona o le a faamalosia lou faatuatua. Ao e toe faia lena mamanu, o le a saga faamalosia lou faatuatua” (“O Le Mana Fesoasoani o le Faatuatua I Taimi o le Le Mautonu ma Tofotofoga,” Ensign po o le Liahona, Me 2003, 76).

E faapefea ona ese le faamatalaina e Elder Scott o le faagasologa mai uiga o i latou o e mananao i se faamautinoaga ao le i talitonu pe faatino?

Tusi le faasino mau o loo i lalo i le laupapa: Eteru 12:7–12; Eteru 12:13–18; Eteru 12:19–22, 30–31. Vaevae le vasega i ni vaega se tolu, ma atofa se tasi o fuaitau o mau i vaega taitasi. Fai atu i tamaiti aoga e vaavaai mo faamanuiaga na oo mai ona o le taunuuga o le faatuatua o tagata na faamatalaina i le fuaitau. Fautuaina i latou ia matau le faaaogaina o le fasifuaitau “mavae ona latou faatuatua” po o le “seia mavae ona latou faatuatua” i fuaiupu 7, 12, 17, 18, ma le 31. (Atonu e te manao e fautuaina tamaiti aoga e faailoga nei fasifuaitau i taimi taitasi e maua ai.)

A maea ona lipoti mai e tamaiti aoga mea ua latou mauaina, valaaulia i latou e otootoina mea ua saunia e le Alii pe a maea ona tatou faatinoina le faatuatua ia Iesu Keriso. Atonu e ui lava e faaaoga e tamaiti aoga upu eseese, e tatau ona latou faailoa se upumoni e tutusa ma mea nei: Afai tatou te manao i se molimau faaleagaga, ona tatau lea ona tatou faatinoina muamua le faatuatua ia Iesu Keriso. Faamalamalama atu e pei lava o molimau faaleagaga, e le oo mai vavega seia mavae lo tatou faatinoina o lo tatou faatuatua.

Faasoa atu tulaga nei i le vasega. Valaaulia tamaiti aoga e faamalamalama pe faapefea e tagata taitoatasi ona mafai ona faatinoina le faatuatua i le Alii i tulaga taitasi.

Ua manao se tamaitai talavou na te mauaina se molimau o le moni a’ia’i o le Tusi a Mamona.
Ua i ai i se alii talavou se manao malosi e fesoasoani i tagata e alofa i ai ia talia le talalelei.

Valaaulia tamaiti aoga e mafaufau loloto i se taimi na latou po o tagata latou te iloa ona mauaa molimau faaleagaga po o vavega ina ua maea ona faatinoina le faatuatua i le Alii. Valaaulia ni nai tamaiti aoga e faasoa a latou aafiaga ua latou mafaufau i ai. (Ia mautinoa ua malamalama tamaiti aoga e le tatau ona latou lagonaina le tatau ona faasoa aafiaga ua patino pe le faalauaiteleina.) Atonu e te manao foi e faasoa se aafiaga.

Valaaulia tamaiti aoga e toe manatu i le upumoni o le talalelei lea e mananao ia maua ai se molimau faaleagaga. Valaaulia i latou e tusi i api e tusi ai faamatalaga po o api talaaga mo le suesueina o tusitusiga paia se mea atonu latou te faia ia faatinoina ai le faatuatua tele i le Alii.

Mau Tauloto—Eteru 12:6

Ia fesoasoani i tamaiti aoga e taulotoina le Eteru 12:6, valaaulia tamaiti aoga taitasi e tusi le fuaiupu i se fasi pepa, e aunoa ma faasino upu po o fasifuaitau ma tuu i ai ni avanoa i o latou tulaga. A maea ona latou faia, tuu atu i tamaiti aoga se minute e taumafai ai e taulotoina le fuaiupu, ia faatumuina faalemafaufau avanoa i o latou pepa.

Fai atu i tamaiti aoga e fesuiai pepa ma le isi tagata e latalata ia i latou. E tatau ona faitauina leotele e tamaiti aoga taitasi a latou pepa fou, ao taumafai e faatumu avanoa mai i a latou manatuaga. Pe a lava le taimi, tuu atu i tamaiti aoga ia faaauau pea le gaoioiga e ala i le toe fesuiaia o pepa.

Valaaulia tamaiti aoga e ave a latou pepa i le fale ma faaaogaina i le taulotoina o le Eteru 12:6 i se matua. Fautuaina i latou e fesili atu i o latou matua e uiga i se taimi na latou faaalia ai lo latou faatuatua ia Iesu Keriso ma maua ai se molimau po o se vavega na latou sailia.

Faaiu i lou molimau atu i mataupu faavae na aoaoina i lenei lesona.

Tala ma Faamatalaga o Talaaga

Eteru 12:4–6. O le a le faamoemoe?

I leEteru 12, o aoaoga a Moronae e uiga i le mataupu faavae o le faamoemoe ma le faatuatua ua faaalia ai e vavalalata lo la sootaga. Na ia faamatalaina le faatuatua o se “mea ia ua faamoemoe i ai ae ua le vaaia” (Eteru 12:6) ma na aoaoina o lo tatou faamoemoega mo le olataga e “sau mai le faatuatua” ia Iesu Keriso (Eteru 12:4). O le tamaitusi o le Faamaoni i le Faatuatua ua aoao mai mea nei e uiga i le faamoemoe:

“Pe a maua e i tatou le faamoemoe, tatou te faatuatuaina folafolaga a le Atua. Ua maua e i tatou se faamautinoaga leleoa pe afai tatou te faia ‘galuega o le amiotonu,’ tatou ‘te maua ai [lo tatou] taui, o le filemu lea i lenei lalolagi, ma le ola e faavavau i le lalolagi a sau’ (MF&F 59:23). … O le mataupu faavae o le faamoemoe e oo atu i le faavavau, ae e mafai foi ona lagolagoina oe e ala i luitau o aso fai soo o le olaga” (Faamaoni i le Faatuatua: O Se Tusi Taiala o le Talalelei [2004], 52–53).

Ua faamatalaina e Peresitene Dieter F. Uchtdorf le faamoemoe e pei ona taua i lalo:

“O le faamoemoe o se meaalofa a le Agaga. [Tagai Moronae 8:26}.] O se faamoemoe lea e ala i le Togiola a Iesu Keriso ma le mana o Lona Toetu, o le a tatou siitia ai i le ola faavavau, ona o lo tatou faatuatua i le Faaola. [Tagai Moronae 7:41.] O lenei ituaiga faamoemoe o se mataupu faavae uma o le folafolaga faapea ma se poloaiga [tagai Kolose 1:21–23], e pei foi ona i ai i poloaiga uma, ua i ai sa tatou tiutetauave ia avea lea ma se vaega malosi o o tatou olaga ma faatoilalo le faaosoosoina ina ia faaleaoga le faamoemoe. O le faamoemoe i le fuafuaga alofa o le fiafia a lo tatou Tama Faalelagi e taitaiina atu ai i le filemu [tagai Roma 15:13], alofa tunoa [tagaiSalamo 33:22], fiafia [tagaiRoma 12:12], ma le olioli. [Tagai Faataoto 10:28.] ] O le faamoemoe o le faaolataga e pei lava o se puloutau [tagai 1 Tesalonia 5:8]; o se faavae lava o lo tatou faatuatua [tagai Eperu 11:1; Moronae 7:40] ma o se taula i o tatou agaga. [Tagai Eperu 6:19; Eteru 12:4. ]” (“O Le Mana e Le Iu o le Faamoemoe,” Ensignpo o leLiahona, Nov. 2008, 21–22).

Eteru 12:6 . “O le tofotofoina o lou faatuatua”

Ua faamatalaina e Peresitene Gordon B. Hinckley se tala ua faaalia ai le mataupu faavae o le mauaina o se molimau ina ua maea ona tofotofoina lo tatou faatuatua:

“Sei ou faamatalaina atu se tala i se fafine i Sao Paulo, i Pasila. Sa faigaluega o ia ma alu i le aoga ina ia lava mea e tausi ai lona aiga. Ou te faaaogaina ana lava upu e faamatala ai lana tala. Sa fai mai o ia:

“‘O le iunivesite sa ou aoga ai, e i ai se tulafono e faasa ai tamaiti aoga sa nofo aitalafu ona sue i suega. O le mafuaaga lea, a maua lou totogi e muamua lava ona ou aveeseina le tupe mo le sefuluai ma taulaga, ma o le tupe e totoe sa faasoasoa e totogi ai le aoga ma isi tupe faaalu.

“‘Ou te manatuaina se taimi sa ou … feagai ai ma faigata o mea tau tupe. O se Aso Tofi, ina ua maua mai lou totogi. Ina ua ou tago e faavasega lau paketi faalemasina, sa ou vaaia o le a le lava se tupe e totogi [uma] ai lau sefuluai ma lau aoga. Sa tatau ona ou filifili i mea e lua. O suega e tailua masina ma fai, o le a amata i le vaiaso e sosoo ai, ma afai ou te le sue ai o lona uiga, e le aoga atoa le tausaga o le aoga. Sa ou matua mafatia lava. Sa tiga lou loto. O se faaiuga tiga lea ua taatia nei i ou luma, ma sa ou le iloa pe o le a le mea tonu e fai. Sa ou mafaufau loloto i faaiuga e lua: pe totogi le sefuluai po o le faamata’uina o le avanoa e ono le maua ai togi manaomia e faamaonia ai lou nofo i le aoga.

“‘O lenei lagona sa mafatia ai lou agaga ma sa i ai pea ia te au seia oo i le Aso Toonai. O iina na ou manatua ai, ina ua ou papatiso, sa ou ioe ai ou te ola i le tulafono o le sefuluai. Sa ou tauaveina i ou luga se matafaioi, mai lou Tama Faalelagi, ae le o faifeautalai. O le taimi lena, sa amata ai ona mou atu le mafatia, ae avanoa ai le nofoaga mo se lagona malie o le toafilemu ma le naunautai.

“‘O le po lena ina ua ou tatalo, sa ou ole atu ai i le Alii e faamagalo mai au i lo’u le mautonu. I le Aso Sa, a o lei amataina le sauniga faamanatuga, sa ou faafesootaia le Epikopo, ma sa ou totogi lau sefuluai ma taulaga ma lou fiafia tele. O se aso faapitoa lena. Sa na ona ou lagonaina lava o le fiafia ma le toafilemu ia te au lava ia ma le Tama Faalelagi.

“‘O le aso na sosoo ai ao ou i ai i lou ofisa; sa ou taumafai e sue se auala e mafai ai ona fai au suega ia e amata i le Aso Lulu e sosoo ai. O le faatele ona ou mafaufau i ai, o le mamao ese foi lena o le le maua o se faaiuga.

“‘O le a uma le taimi faigaluega ae sau lou pule e aumai faatonuga mulimuli o le aso. Ina ua maea, sa tago i lana ato ma faatofa mai. E le i umi, ae tu ma tilotilo mai ia te au ma fesili mai, “O a mai lau aoga?” Sa ou tei ma sa ou le talitonu i le mea lea na ou faalogo i ai. Na pau lava le mea sa mafai ona ou tali atu ai ma le gatete o le, “O loo lelei mea uma!” Sa tilotilo mai ma le agalelei ia te au ona toe faatofa mai foi lea.

“‘E le i leva ae ulufale mai le failautusi i le potu ma faapea mai, o au o se tagata laki tele! Ina ua ou fesili pe aisea ae sa na ona tali mai lava: “Faatoa uma nei ona fai mai le pule e amata atu i le aso, ona totogi atoa e le kamupani lau aoga uma ma au tusi. Ae e te lei alu, sau i lo’u ofisa e ta’u mai le totogi, ina ia oo atu taeao ua mafai ona ou avatua le siaki.”

“‘Ina ua alu o ia, sa ou tagi ma le lagona lotomaualalo ma ou tootuli ifo i le mea tonu sa ou i ai, ma faafetai atu i le Alii mo Lona agalelei. Sa ou … fai atu i le Tama Faalelagi, na te le tau aumaia lenei faamanuiaga ua tele naua mo au. Sa na o le totogi lava o le masina e tasi, ma o le sefuluai sa ou totogiina i le Aso Sa, e laitiiti tele pe a faatusatusa i le aofaiga o le tupe ua ou maua! I le taimi o lena tatalo, sa ou manatua ai upu o loo tusia i le Malaki: “Ia outou tofotofo mai ia te au i lenei mea, ua fetalai mai ai Ieova o ‘au, pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele” (Mal. 3:10). E oo mai i lena taimi, ou te le i lagonaina lava le maoae o le folafolaga o loo i ai le mau, ma o lenei poloaiga o se molimau moni o le alofa e aumaia e lo tatou Tama Faalelagi i Lana fanau i lenei lalolagi’” (“O Le Faatuatua Ua Matou Savavali Ai,” Liahona, Iulai 2002, 81–82).

Eteru 12:6 . “Aua tou te le maua se molimau, seia uma ona tofotofoina o lo outou faatuatua”

Na aoao mai Peresitene Spencer W. Kimball:

“O le uiga faaletagata, tatou te mananao e aveese mai o tatou olaga le tiga faaletino ma le faalemafaufau ma ia tatou mautinoa ia tumau pea le faigofie ma le saogalemu, peitai, afai e tapunia faitotoa i le faanoanoa ma le puapuaga, e le taumate o le a tatou tapunia ai a tatou uo pito sili ma fesoasoani. O le mafatia e mafai ona avea ai tagata ma tagata amiotonu a o latou aoaoina le onosai, faapalepale, ma le pulea e le tagata o ia lava” (Aoaoga a Peresitene o le Ekalesia: Spencer W. Kimball [2006], 18).