Lesona 22

2 Nifae 1

Faatomuaga

O upumoni i le 2 Nifae 1 sa tautalagia e se matua ma se taitai alofa o lē ua talioti. Sa aioi atu Liae i ona atalii, o atalii o Isamaeli, ma Sorama ina ia usiusitai i poloaiga a le Atua. Sa ia folafola atu ia i latou afai latou te tausia poloaiga a le Atua, o le a latou manuia i le nuu. Sa ia apoapoai atu foi ia i latou ia mulimuli i le taitaiga faaperofeta a Nifae.

Taulai atu i tamaiti aoga

Sa faamalamalama mai e Elder Richard G. Scott o le Korama a Aposetolo e Toasefululua e faapea o le fesoasoani atu i tamaiti aoga ia maua le malamalama, e sili atu ona taua lena nai lo le talanoaina o mea uma i totonu o se fuafuaga o se lesona: “Manatua, o le mea aupito sili ona e faamuamuaina o le aua ne’i aoaoina mea uma pe a le mafai ona malamalama lelei i ai. Fai le mea e mafai ona e faia i lou malamalama. … A malamalama i se mataupu faavae autu [ma] faaaogaina … o lona uiga la ua ausiaina le faamoemoega sili ona taua” (“To Understand and Live Truth” [address to CES religious educators, Feb. 4, 2005], 2–3, si.lds.org).

Fautuaga mo le Aoaoga

2 Nifae 1:1–23

Ua apoapoai atu Liae i lona nuu ina ia ola amiotonu

Fai atu i tamaiti aoga ina ia mafaufau e faapea o le a faafuasei ona latou tuua tagata o o latou aiga ma atonu o le a le toe vaai lava ia i latou.

• Afai o le a e tuua ni nai upu mulimuli o fautuaga i lou aiga, o le a sau tala o le a fai atu? Aisea?

A maea ona faalogologo atu i ni tamaiti aoga , ona faamalamalama atu lea o mataupu 1–4 o le 2 Nifae o loo i ai faamaumauga a Nifae o fautuaga mulimuli a lona tama. O loo taulai atu lenei lesona i le 2 Nifae 1, lea o loo i ai le fautuaga a Liae na faasoa atu i ona atalii, o atalii o Isamaeli, ma Sorama.

• Aisea e taua patino ai se fautuaga mulimuli a se matua po o se perofeta?

Valaaulia se tamaitiiti aoga e faitau leotele le 2 Nifae 1:1–5. Fai atu i le vasega e faailoa mai “mea tetele na faia e le Alii” mo le aiga o Liae.

• Na faapefea ona faaalia e nei mea tetele le alofa mutimutivale o le Alii?

• O le a se faataitaiga o se mea tele ua faia e le Alii mo oe ma lou aiga?

• O a ni ou lagona pe a e mafaufau i le alofa mutimutivale o le Atua ia te oe ma lou aiga?

I le tasi itu o le laupapa, tusi ai Faatinoga. I le isi itu o le laupapa, tusi ai Taunuuga.Vaevae le vasega i ni vaega se lua.Valaaulia le vaega muamua e faitau le 2 Nifae 1:6–9 ma le vaega lona lua e faitau le 2 Nifae 1:10–12. Fai atu i vaega uma e lua e sue faatinoga ia na fai mai ai Liae e ono faia e e tupuga mai ia te ia. Fai atu foi ia i latou e tagai mo taunuuga o na faatinoga. Mo se faataitaiga, sa fai mai Liae afai e auauna atu tagata i le Alii e tusa ma Ana poloaiga, o le a avea le laueleele ma nuu o le saolotoga mo i latou (tagai i le 2 Nifae 1:7). A o faasoa mai e tamaiti aoga a latou tali, tuu atu i se tamaitiiti aoga e tusi tali i luga o le laupapa.

• A o e suesueina ia tali i luga o le laupapa, e faapefea ona e aoteleina le savali a Liae i lona aiga? (Atonu e tali mai tamaiti aoga i ni faaupuga eseese, ae ia mautinoa e manino le savali lenei: E faamanuiaina e le Alii i tatou pe a tatou tausia Ana poloaiga, ma Na te taofia faamanuiaga pe a tatou le tausia Ana poloaiga.)

• I le 2 Nifae 1:9, o le fasifuaitau “lenei laueleele” o loo faasino ia Amerika. O le a le mea sa folafola atu e le Alii i e usiusitai o le a nonofo i “lenei laueleele”?

Ina ia fesoasoani i tamaiti aoga ia malamalama i le uiga o upu faafaataoto na faaaogaina e Liae e faamalosiau ai i ona atalii e tausi poloaiga a le Alii, ia faaali atu se uati faailo, se filifili, ma se mea o i ai se pefu po o se efuefu i luga (ia mautinoa e faamamafa atu le efuefu/pefu, ae le o le mea faitino).

Valaaulia tamaiti aoga e faitau le leoa le 2 Nifae 1:13–14, tagai mo ni upu po o ni fasifuaitau e fesootai ma nei mea faitino e tolu. A uma ona latou faitauina, uu i luga mea faitino taitasi ma fai atu i tamaiti aoga e faasoa mai ni upu ma ni fasifuaitau ua latou mauaina. (E mafai ona aofia i tali le “ala mai,” “moe lava o seoli,” “lulu ese filifili leaga matautia,” “filifili lava ia e noatia ai,” ma le “tutulai mai i le efuefu.”) Fai atu i tamaiti aoga po o le a le uiga o le “moe gase,” noatia i “filifili leaga matautia,” po o le manaomia ona “tutulai mai i le efuefu.”

• Ina ua faaaoga e Liae nei upu ma fasifuaitau, o le a le mea sa ia apoapoai ai ona atalii e fai? (Ia salamo, ia suia o latou ala.)

• O le a le mea sa lapatai mai ai Liae o le a tupu pe a le “lulu ese [e ona atalii a latou] filifili”? (Tagai i le 2 Nifae 1:13.)

Upu Faafaataoto i tusitusiga paia

O se upu faafaataoto o se ituaiga o le gagana lea e faamatala ai i se upu po o se fasifuaitau se mea faitino po o se faatinoga e aunoa ma se fesootaiga moni i lena mea faitino po o se faatinoga. Mo se faataitaiga, e le i faapea na lilofia moni atalii o Liae i le efuefu ina ua tau atu e Liae ia i latou ina ia “tutulai mai i le efuefu” (2 Nifae 1:14). E tele lava ina faaaoga e le Alii ma Ana perofeta ni upu faafaataoto i a latou aoaoga e fesoasoani ai ia i tatou ia fesootai ma mataupu faavae o le talalelei. O nei upu faafaataoto e mafai ona avea ma ni faamanatu mamana. A o outou talanoaina ni upu faafaataoto, fesoasoani i tamaiti aoga ia taulai atu i le uiga faaleagaga lea e fesootai mai e upu.

Valaaulia tamaiti aoga e suesue le leoa le 2 Nifae 1:14–18. Faamalamalama atu na tuu atu e Liae lenei fautuaga ma le agalelei ma le alofa atoa ai ma le popolega sili (“popole”) mo le tulaga manuia o ana fanau. Fai atu i tamaiti aoga e tagai mo mafuaaga na manao ai Liae e tausi e lona aiga poloaiga a le Alii.

• Aisea na popole ai Liae mo ana fanau? (Sa ia popole i taunuuga o le a latou puapuagatia ai ona o a latou faatinoga, ma sa ia manao ina ia latou iloa le alofa o le Atua, e pei ona ia iloaina.)

Tuu atu i tamaiti aoga e toe faitau taitoatasi le 2 Nifae 1:15.

• O a faamanuiaga na maua e Liae ona o lona faamaoni?

• O anafea na e lagonaina ai le siomiaina o oe i aao alofa o le Atua?

Vaevae le vasega ia faipaga. Fai atu i se tamaitiiti aoga se toatasi o paga taitasi e saili le 2 Nifae 1:19–22 mo ni folafolaga ia sa ono mafai ona musuia ai atalii o Liae e salamo. Fai atu i le isi tamaitiiti aoga o paga taitasi e saili le fuaiupu lava lea e tasi mo ni taunuuga na tau atu e Liae e ono oo mai pe afai e filifili ona atalii e teena lana fautuaga. (Atonu e te manao e tusi le galuega atofaina lenei i luga o le laupapa.) Tuu atu i tamaiti aoga ni minute se tolu pe fa e faamaea ai le galuega atofaina ma fefaasoaai mea ua latou maua i le tasi ma le isi. Atonu e te manao e fealualuai i le potuaoga a o latou tuu maia a latou lipoti ina ia mafai ai ona e fesoasoani e taiala a latou talanoaga.

Faitau leotele le lu’i a Liae o loo i le 2 Nifae 1:23 i tamaiti. Atonu e te manao e uunaia tamaiti aoga e faailoga lenei fuaiupu. E mafai foi ona e uunaia i latou e tusi i totonu o a latou api talaaga o le suesueina o tusitusiga paia po o se api e tusi ai faamatalaga i le vasega e uiga i se mea se tasi atonu latou te manaomia ona fai e “ala mai” ai pe “lulu ese [ai] filifili” pe “tutulai mai [ai] i le efuefu” ina ia mafai ai ona latou mauaina faamanuiaga ia na saunoa i ai ia Liae.

• O le a le uiga ia te oe o le “faamaulu le ufifatafata o le amiotonu”? (Tagai i le MF&F 27:15–18.)

2 Nifae 1:24–32

Sa apoapoai atu Liae i ona atalii ia mulimuli i le taitaiga faaperofeta a Nifae

Faamalamalama atu e faapea sa aoao atu Liae e uiga i se puna o le malosi ma musumusuga na saunia e le Alii mo lona aiga. Valaaulia tamaiti aoga ia sue lena puna i le 2 Nifae 1:24. (O le puna sa i ai o Nifae, o le o le a avea ma o latou perofeta pe a maliu Liae.)

Fai atu i se tamaitiiti aoga e faitau leotele le 2 Nifae 1:25–28. Fai atu i le vasega e tagai mo ni mafuaaga na tuu atu e Liae i tagata e mulimuli ai ia Nifae.

• O a ni uiga lelei na faamamafa atu e Liae ina ua ia saunoa e uiga i le taitaiga a Nifae? Aisea o le a e faatuatuaina ai se taitai e i ai nei uiga lelei?

• O anafea sa e vaaia ai ni taitai o le Ekalesia o fai ma faataitaiga o nei uiga lelei?

Valaaulia tamaiti aoga e faitau le leoa le 2 Nifae 1:30–32. Fai atu ia i latou e tagai mo ni folafolaga na tuu atu e Liae ia Sorama.

• O a ni folafolaga na e maua?

• E mafai faapefea ona faatatau nei folafolaga ia i tatou ma o tatou aiga a o tatou mulimuli i le perofeta?

A maea lenei talanoaga, ia faamautinoa ua malamalama tamaiti aoga e faapea a tatou mulimuli ia i latou ua valaauina e le Atua e taitai i tatou, o le a faamanuiaina i tatou i faamanuiaga faaleagaga ma le puipuiga. I le lagolagoina o lenei mataupu faavae, ia faasoa atu lau molimau e uiga i faamanuiaga e oo mai pe a tatou mulimuli i o tatou taitai o le Ekalesia.

Tala ma Faamatalaga o Talaaga

2 Nifae 1:22. “Faaumatiaga e faavavau”

I le 2 Nifae 1:22, sa saunoa ai Liae e uiga i le “faaumatiaga lava lea e faavavau o le agaga atoa ma le tino.” O le saunoaga lenei a Peresitene Iosefa Filitia Samita atonu e fesoasoani ia te oe e faamalamalama atu upu a Liae:

“O le uiga o le faaumatiaga e le o le aveeseina atoa lea. Ua tatou iloa, ona ua aoaoina i tatou i faaaliga a le Alii, e le mafai ona faaumatia le agaga.

“O agaga uma e fananau mai i lenei lalolagi o le a mauaina le toetu ma le tino ola pea ma tumau e faavavau. E le o le uiga la o le faaumatiaga o le aveeseina mai atoa. Pe a fetalai mai le Alii e ao ona faaumatia i latou, o le uiga o lana fetalaiga, e faateaeseina mai i latou mai lona afioaga, o le a motusia mai i latou mai le afioaga o le malamalama ma le upumoni, ma o le a le ia i latou le avanoa e maua ai lenei faaeaga; ma o le faaumatiaga lena” (Doctrines of Salvation, comp. Bruce R. McConkie, 3 vols. [1954–56], 2:227–28).

2 Nifae 1:28. “Afai tou te faalogologo i le leo o Nifae tou te le fano”

Sa folafola atu e Liae o i latou e “faalogologo i le leo o Nifae” o le a faamanuiaina (tagai i le 2 Nifae 1:28). Ina ia faitau e uiga i folafolaga na faia e le Alii ma i latou e mulimuli i perofeta soifua i o tatou aso, tagai i le Mataupu Faavae ma Feagaiga 21:5–6.

Sa saunoa mai Peresitene Uilifoti Uitilafi e faapea: “Ou te faamoemoe lava tatou te mulimuli uma i le ala ua uma ona faataatia mai e auauna a le Alii mo i tatou, aua a tatou faia lea mea ou te iloa o le a tatou saogalemu i lenei lalolagi, ma malupuipuia ai le fiafia ma le faaeaga i le lalolagi a sau. Afai tatou te faamaoni o le a latou taitai i tatou i le ala o le ola, ma afai lava e i ai ia i tatou le faatuatua e talitonu ai i a latou faatonuga, i aoaoga a le Agaga Paia e auala mai ia i latou, o le a tatou i ai pea i le ala saogalemu, ma o le a mautinoa lo tatou taui” (Aoaoga a Peresitene o le Ekalesia: Wilford Woodruff [2004], 199).