Faatomuaga i Le Nifae Fa: O Le Tusi a Nifae
Aisea e suesue ai lenei tusi?
A o suesue e tamaiti aoga le 4 Nifae, o le a latou aoao e uiga i faamanuiaga e oo mai i tagata e lotogatasi i le ola ai i le talalelei a Iesu Keriso. I le mulimuli ai i le galuega a le Faaola i fanau a Liae, na liua tagata uma o le laueleele. A o latou usiusitai i poloaiga, na latou olioli i le filemu, faamanuiaina, ma le ofoofogia o faamanuiaga faaleagaga. Na tautino mai e Mamona, “Ma e moni e le mafai ona i ai o ni tagata e sili atu ona fiafia i totonu o tagata uma na foafoa e le aao o le Atua” (4 Nifae 1:16). O le a aoao foi e tamaiti aoga ni lesona taua mai le agaigai malie atu i se tulaga o le amioleaga.
O ai na tusiaina lenei tusi?
Na tuufaatasia ma faapuupuu e Mamona talafaamaumau a tusitala e toafa e fatu ai le tusi o le 4 Nifae. O le tusitala muamua o Nifae, lena na faaigoa ai le tusi. O Nifae o le atalii o Nifae, o le na avea ma se tasi o soo e toasefululua na filifilia e le Alii i le taimi o Lana galuega i fanau a Liae (tagai 3 Nifae 11:18–22; 12:1). O i si tusitala e toatolu o le atalii o Nifae o Amosa ma atalii o Amosa o Amosa ma Amorona (tagai 4 Nifae 1:19, 21, 47).
O ai na tusi i ai lenei tusi ma aisea foi?
E le i tusia e Mamona le tusi o le 4 Nifae i aofia faapitoa, ma na te le i ta’ua foi pe aisea na ia tusia ai. Ae ui i lea, o lenei tusi ua saofaga i faamoemoega aoao o le Tusi a Mamona—ia molimau atu o Iesu o le Keriso ma faailoa atu feagaiga a le Alii (tagai i le itulau autu o le Tusi a Mamona). Ua faia e ala i le faapupula mai o faamanuiaga e oo mai pe afai e salamo tagata, o mai ia Iesu Keriso, ma osia feagaiga ma Ia. O loo faaalia mai ai foi taunuuga faatafuna e tulai mai pe afai e teena e tagata le Faaola ma Lana talalelei ma lafoai a latou feagaiga.
O anafea ma o fea na tusia ai?
O uluai talafaamaumau na faaaoga o ni punaoa mo le tusi o le 4 Nifae na tusia latalata lava i le va o le T.A. 34 ma le T.A. 321. Na faapuupuuina e Mamona na talafaamaumau i se taimi i le va o le T.A. 345 ma le T.A. 385. E le i taua e Mamona pe o fea na i ai ao ia tuufaatasia lenei tusi.
O a nisi o vaaiga uigaese o lenei tusi?
I le na o le 49 fuaiupu, ua faamatalaina mai ai e le tusi o le 4 Nifae se vaitaimi e latalata i le 300 tausaga—toeitiiti lava o le tasi vae tolu o le talafaasolopito atoa o sa Nifae o loo aofia ai i le Tusi a Mamona. O le puupuu o le 4 Nifae ua saofaga ai i lona mana. O loo faamamafa faapuupuu ai le eseesega i le va o tagata amiotonu i le faatoa mavae ai o le galuega a le Faaola ia i latou ma lo latou amioleaga i le fa tupulaga mulimuli ane. O fuaiupu muamua e 18 o le tusi ua faailoa mai ai faamanuiaga na olioli ai se nuu ua fausia i luga o le talalelei a Iesu Keriso. O i si fuaiupu mulimuli o loo aumai ai se molimau i le matautia o le faamaualuga, o loo faaalia ai le ala na faaleagaina malie ai lenei nuu seia oo ina toeitiiti faaumatia atoa i le agasala.
Otootoga
4 Nifae 1:1–18 Ina ua mavae le galuega a Iesu Keriso, na liua uma tagata o le laueleele ma papatisoina. Ua le toe vaevaeina i latou lava o sa Nifae ma sa Lamana. Sa latou “tuutele mea uma” (4 Nifae 1:3), ua latou faia le tele o vavega, ma ua faamanuiaina i latou ma ola i le lotogatasi ma le fiafia mo le 110 tausaga.
4 Nifae 1:19–34 Ua maliu Nifae, ma ua tausia e lona atalii o Amosa ia talafaamaumau. Ua tuuina atu mulimuli ane e Amosa talafaamaumau i lona atalii o Amosa. E toatele tagata ua faatagaina Satani e “umia o latou loto” (4 Nifae 1:28). Ua tulai ae i tagata ia fevaevaeaiga, faamaualuga, ma lotu pepelo. Ua amata ona faasaua tagata amioleaga i tagata o le Ekalesia moni ma o “soo o Iesu o e na nonofo faatasi ma i latou” (4 Nifae 1:30).
4 Nifae 1:35–49 Ua toe vaevaeina e tagata i latou lava o sa Nifae ma sa Lamana. Ua tetee ma le loto i ai sa Lamana i le talalelei ma ua atiina ae faalapotopotoga faalilolilo a Katianetona. Ua iu lava, ina avea foi sa Nifae ma e amioleaga. Ua maliu Amosa, ma ua tausia e lona uso o Amorona ia talafaamaumau mo se taimi a o le’i uunaia e le Agaga Paia e natia.