Potutusi
Lesona 145: Eteru 3

Lesona 145

Eteru 3

Faatomuaga

Taliina o le fesili a le Alii—“O le a se mea tou te mananao ia ou faia ina ia outou maua se malamalama i totonu o o outou vaa?”—na saunia e le uso o Iareto ni maa laiti e sefulu ma le ono ma le lotomaualalo ma na ia ole atu i le Alii ia pa’i i ai “ma saunia i latou ina ia susulu atu i le pogisa” (Eteru 2:23; 3:4). Aua sa maoae le faatuatua o le uso o Iareto, lea sa ia vaaia ai le tamatamaiaao o le Faaola ao pa’i atu i maa. Ona faaali ai lea e le Alii o Ia lava i le uso o Iareto ma faaalia le tele o mea. Na poloaiina e le Alii le uso o Iareto e tusi mea na ia vaaia ma faalogoina ma faamaufaailogaina nei tusitusiga seia finagalo le Alii e faaali atu.

Fautuaga mo le Aoaoga

Eteru 3:1–20

Ua pa’i le Alii i maa ina ia i ai le malamalama mo vaa a sa Iareto ma faaali o Ia lava i le uso o Iareto

Valaaulia se tamaitiiti aoga e avea ma se tagata tusitusi. Ona fesili lea o fesili nei i tamaiti aoga ma fai i le tagata tusitusi e lisi tali a tamaiti aoga i le laupapa.

  • O a nisi o mea e tatalo faamaoni ai le autalavou?

Fai i tamaiti aoga e vaai faalemafaufau i se tasi o latou uo o tatalo mo se mea se tasi o loo lisiina i luga o le laupapa. E fia iloa e lenei uo pe faapefea ona faaleleia ana tatalo ma faatinoga ina ia mafai ona maua le fesoasoaniga ma le taitaiga a le Alii. Fautuaina tamaiti aoga e mafaufau e uiga i lenei talosaga ao latou suesueina le faataitaiga a le uso o Iareto i le Eteru 3, ma vaavaai mo manatu faaopoopo atonu e latou te faasoaina ma o latou uo.

Faamanatu i tamaiti aoga o le lesona talu ai, sa latou talanoaina ai le tala i le uso o Iareto ao fesili atu i le Alii e uiga i le ala e mauaina ai le malamalama i totonu o vaa a sa Iareto.

  • O a mea na faia e le uso o Iareto ina ia fesoasoani ai ia maua le malamalama mo vaa? (Tagai Eteru 3:1.)

  • O le a le mea na valaau atu ai le uso o Iareto i le Alii ia faia ina ia maua ai le malamalama? (Tagai Eteru 3:1, 4.)

  • O le a le mea e faafiafiaina ai oe e uiga i le taumafaiga a le uso o Iareto?

Faamanino atu na faia e le uso o Iareto se taumafaiga maoae ina ia saunia ia maa. Ona valaaulia lea o tamaiti aoga e mafaufau i le auala na aoga ai maa i le mauaina o le malamalama pe ana le pa’i i ai [aao] o le Alii. Valaaulia tamaiti aoga e faitau leleoa le Eteru 3:2–5, ma vaavaai mo fasifuaitau e tau mai ai le iloaina e le uso o Iareto o lona faalagolago atu i le Alii.

Pe a maea ona faitauina e tamaiti aoga, vaevae i latou i ni paga. Fai atu ia i latou e lipoti mea na latou mauaina i le tasi ma le isi. Fautuaina foi i latou e faasoa mea ua faafiafiaina ai i latou e uiga i le tatalo a le uso o Iareto.

Ao faitau e tamaiti aoga le Eteru 3:2, atonu e i ai o latou fesili e uiga i fasifuaitau “ua matou le agavaa i ou luma” ma le “o le pau o o matou natura ua matou leaga ai pea e le aunoa.” Fesoasoani ia i latou ia iloa ina ua faaaogaina e le uso o Iareto nei upu, sa ia faatatau i le tulaga ua tatou mauaina “ona o le pau.” Ua vavaeina i tatou faaletino ma faaleagaga mai le Atua, ma ua tatou atili vavamamao ai i tatou lava mai ia te Ia pe a tatou agasala. Faatusatusa ia te Ia, e tatou te vaivai ma le agavaa. A le aunoa ma Lona fesoasoani, e le mafai lava ona tatou toe foi atu e nonofo i Lona afioaga.

Ia fesoasoani i tamaiti aoga ia malamalama atili i le uiga o fuaiupu sa latou faitauina, fesili atu fesili nei:

  • Aisea e te manatu ai e taua mo i tatou ona iloa lo tatou faalagolago atu i le Alii pe a tatou ole atu mo Lana fesoasoani?

  • I le Eteru 3:1–5, o a faamaoniga ua e vaaia sa faatuatua le uso o Iareto o le a fesoasoani ai le Alii ia te ia e foia ona faafitauli? (E pei ona manaomia, vave fai i tamaiti aoga e saili mo fasifuaitau ua faamatala ai le taumafaiga o le uso o Iareto ma fasifuaitau ua faaalia ai lona faatuatua i le Alii.)

Ia faamamafa le mana o le faatuatua o le uso o Iareto, fai atu i se tamaitiiti aoga e faitau le saunoaga lenei a Elder Jeffrey R. Holland o le Korama a Aposetolo e Toasefululua:

“E moni lava o le Atua, e oo lava i le tagata faitau, e lagonaina se mea mataina i le mamai a’ia’i e pei o se tamaitiiti ma le tuuto o le faatuatua o lenei alii. Silasila Mai, Le Atua e, E Te mafaia lenei mea” Atonu ua le o toe i ai se faatuatua sili ona mamana ma ogatasi ua tautalagia e tagata i tusitusiga paia. … Peitai, o le perofeta le mautonu, o lona uiga o lona lava tomai, ualeailava sona le mautonu i le mana o le Atua” (“Rending the Veil of Unbelief,” i le Nurturing Faith through the Book of Mormon: The 24th Annual Sidney B. Sperry Symposium [1995], 12).

Faaali le ata Ua vaai le Uso o Iareto i Tamatamaiaao o le Alii (62478; Tusi Ata o le Talalelei [2009], nu. 85). Valaaulia se tamaitiiti aoga e faitau le Eteru 3:6. Fai atu i le vasega e mulimuli i le faitauga ma vaavaai faalemafaufau i aafiaga sa faamaumauina i lenei fuaiupu atonu sa faapena mo le uso o Iareto.

Ata
Ua Vaai le Uso o Iareto i le Tamatamaiaao o le Alii

  • O le a sou manatu po o faalogona pe afai sa ia te oe se aafiaga e tai tutusa ma lena sa i le uso o Iareto?

Otooto le Eteru 3:6–8 e ala i le faamalamalamaina ina ua vaai le uso o Iareto i tamatamaiaao o le Alii, sa ia “pau i lalo i luma o le Alii” (Eteru 3:6). Sa ia maofa i le vaai atu i tamatamaiaao o le Alii “sa pei o le tamatamailima o se tagata, e pei o le o, aano ma le toto” (Eteru 3:6). (Na aoaoina mulimuli ane e le uso o Iareto sa ia vaaia se vaega o le tino o le agaga o le Alii [tagai Eteru 3:16].)

Valaaulia tamaiti aoga e faitau leleoa le Eteru 3:9 , ma vaavaai mo mafuaaga na mafai ai ona vaai le uso o Iareto i tamatamaiaao o le Alii.

A maea ona tali mai tamaiti aoga, tusi le faamatalaga e le’i maea lenei i le laupapa:

A o tatou valaau atu ma le faamaualalo i le Alii, o le a Ia faamanuia i tatou e tusa ai ma lo tatou … ma Lona finagalo.

Fai i tamaiti aoga e fautuaina mai ni upu e mafai ona faaaoga e faauma ai lenei faamatalaga. E tatau ona fautuaina mai e tamaiti aoga le upufaatuatua e faauma ai le fuaiupu. E mafai foi ona latou fautuaina mai upu e pei o letaumafaiga, agamalu, mea e manaomia, ma lefaamaoni. Fesoasoani ia latou iloa o upu uma nei e faailoga ai le faamatalaina o lo tatou faatuatua. Ona faauma lea o le faamatalaga i luga o le laupapa: A o tatou valaau atu ma le faamaualalo i le Alii, o le a Ia faamanuia i tatou e tusa ai ma lo tatou faatuatua ma Lona finagalo.

Toe tagai i tua i le lisi i luga o le laupapa mai le amataga o le lesona. Filifili se aitema se tasi pe lua mai le lisi. Valaaulia tamaiti aoga e faasoa mai o latou manatu i le ala atonu e mafai ai e se tasi ona faaali le faatuatua i le Alii i na taimi patino. A maea ona faasoa mai tamaiti aoga, toe tagai i le mataupu faavae lea faato’a e tusiaina i le laupapa.

  • O a aafiaga na e oo i ai ua fesoasoani ai e te iloa e moni lenei mataupu faavae?

Ia fesoasoani i tamaiti aoga e faaaoga lenei mataupu faavae i o latou olaga, valaaulia i latou e mafaufau i se tulaga na latou manaomia ai le fesoasoani a le Alii. Tuu atu ia i latou le taimi e tusi ai i api e tusi ai faamatalaga po o api talaaga o le suesueina o tusitusiga paia e uiga i se auala se tasi e mafai ona latou faatinoina ai le faatuatua sili atu ao latou saili atu ma le faamaualalo mo le fesoasoaniga a le Alii. Fautuaina tamaiti aoga ia latou mulimuli i mea na latou tusiaina. Atonu e te manao e faasoa seaafiaga na e oo i ai ina ua e mauaina faamanuiaga aua sa e faatinoina lou faatuatua i le Alii.

Valaaulia se tamaitiiti aoga e faitau le saunoaga lenei, lea e faamatala ai e Elder Jeffrey R. Holland o o tatou aafiaga ua tuanai e mafai ona faamalosia ai lo tatou faatuatua.

“O le faatuatua faasauniuni e fausiaina e ala i aafiaga i le taimi ua tuanai—e ala i mea ua iloga, lea e maua ai se faavae mo talitonuga” (Christ and the New Covenant: The Messianic Message of the Book of Mormon [1997], 18).

  • Amata mai le Olo o Papelu, o a nisi o aafiaga na maua e le uso o Iareto na mafai ona faamalosia ai lona faatuatua i le Alii? O le a sou manatu na faapefea ona saunia e nei aafiaga o ia e faatino lena faatuatua maoae ina ua ia avatu ia maa i le Alii?

Valaaulia tamaiti aoga ia vaevaeina i ni paga ma talanoaina fesili nei:

  • O a aafiaga na faamalosia ai lou faatuatua i le Alii? E faapefea ona saunia oe e na aafiaga ia faatino le faatuatua sili atu i se taimi mulimuli ane o lou olaga?

Valaaulia ni nai tamaiti aoga e feauauai i le faitauina leotele mai o le Eteru 3:9–12. Fai i le vasega e mulimuli i le faitauga. Ona fesili atu lea o fesili nei:

  • Ina ua fesili le Alii “E te talitonu ea i upu o le a ou tautala atu ai?” na faapea atu le uso o Iareto, “Ioe, le Alii e” (Eteru 3:11–12). Aisea e te manatu ai e taua le tuuto o le uso o Iareto ia talitonu i afioga a le Alii ao lei faalogo i ai o ia?

Faamalamalama atu ina ua maea ona aoaoina e Elder Holland e uiga i le faatuatua na faavaeina i aafiaga ua tuanai, sa ia aoaoina e uiga i se faatuatua atoatoa sili atu e manaomia ona tatou atiinae. Valaaulia se tamaitiiti aoga e faitau leotele le faamatalaga lea mai i a Elder Holland:

Ata
Elder Jeffrey R. Holland

“O le faatuatua toe maua mai e tatau ona faatinoina e le aunoa agai i aafiaga i le lumanai—o le le faailoaina, lea ua maua ai se avanoa mo le ofoofogia. O le faatuatua luitauina, o le faatuatua e mafuli ai mauga, e pei o lena faatuatua a le uso o Iareto, muamuale vavega ma le atamai. … O le faatuatua o le ioeina ma le atoatoa—i luma mai—i soo se tulaga atonu e moomia ai e le Atua i taimi uma e lua, i le [taimi] lata mai ma le mamao o le lumanai.

“Na atoatoa le faatuatua o le uso o Iareto” (Christ and the New Covenant, 18–19).

Fautuaina tamaiti aoga e mafaufau pe o lava lo latou faatuatua i le Alii e tuuto ai ia talitonu ma mulimuli i mea o le a Ia faaali mai ia i latou faapena foi ao lei faaalia e Ia.

Valaaulia tamaiti aoga e faitau leleoa le Eteru 3:13–20, ma vaavaai mo faamanuiaga na maua e le uso o Iareto ona o lona faatuatua. Atonu e te manao e tuu atu le taimi ia i latou e tusi ai upumoni sa ia aoaoina ma aafiaga na ia mauaina. Pe a lava le taimi e tusitusi ai tamaiti aoga, mafaufau e fai atu i nisi o i latou e faasoa mai mea ua latou tusiaina.

I le amataga o lenei lesona, ina ua faitaui tamaiti aoga e uiga i le uso o Iareto ua vaaia le tamatamaiaao o le Alii, na e fesili ia i latou pe na faapefea o latou faalogona pe afai e latou te mauaina se aafiaga taitutusa ma le na. Taimi nei, i le maea ai ona latou faitauina le tele o mea e uiga i le aafiaga o le uso o Iareto, atonu e te mafaufau e toe tuu atu lena fesili.

Molimau atua o tatou faatinoina se faatuatua faapena e pei o le uso o Iareto, o le a tatou latalata atili i le Alii.

Eteru 3:21–28

Na poloaiina e le Alii le uso o Iareto ia tusia mea na ia vaaia ma faamaufaailogaina lana faamaumauga

Valaaulia se tamaitiiti aoga e faitau le Eteru 3:25–26, ma fai atu i le vasega e faailoa mai mea na faaalia e le Alii i le uso o Iareto i se faaaliga. Valaaulia tamaiti aoga e lipoti mai mea sa latou aoaoina.

Otooto le Eteru 3:21–24, 27–28 e ala i le faamalamalamaina, na poloaiina e le Alii le uso o Iareto e tusi i lalo mea na ia vaaia ma faalogoina ma ia faamaufaailogaina ana faamaumauga. Na faamalamalama mai foi e le Alii o le a Ia saunia se auala e faaliliuina ai tusitusiga a le uso o Iareto i le lumanai—e ala i maa e lua. O nei maa o ni vaega ua faaigoaina o le Urima ma le Tumema (tagai MF&F 17:1; tagai foi i leTaiala i Tusitusiga Paia, “Urima ma le Tumema”).

Faaiuina i le fautuaina o tamaiti aoga e faaaoga mea sa latou aoaoina i le aso—ia saili auala e faatinoina ai lo latou faatuatua ma le faamoemoe i le Alii. Faasoa atu lau faamautinoaga, pe a tatou faatinoina le faatuatua ia Iesu Keriso, o le a faamanuiaina i tatou e le Atua e pei ona Ia faamanuia i le uso o Iareto.

Tala ma Faamatalaga o Talaaga

Eteru 3:7, 9. Na tuuina atu e le Alii fesili i le uso o Iareto

Na tuuina atu e le Alii fesili i le uso o Iareto: “Tulai ia, aisea ua e pau ai?”(Eteru 3:7). “Vaai ea i se mea e sili atu nai lo lenei?”(Eteru 3:9). Ua aofia i tusitusiga paia le tele o faataitaiga a le Alii o tuuina atu fesili e ui ua Ia silafiaina ia tali. Na aoao mai e Elder Jeffrey R. Holland o le Korama a Aposetolo e Toasefululua le mafuaaga na fesili ai le Alii i ia fesili:

“O se faavae o mataupu faavae o tapuaiga o le Au Paia o Aso e Gata Ai o le Atua e ‘silafia mea uma, ma ua leai se mea ua le silafia e ia.’[2 Nifae 9:20. O tusitusiga paia uma, o anamua ma aso nei, ua faatumulia i lenei folafolaga o malamalamaaga. E ui i lea, ua fesiligia soo e le Atua ia tagata, e masani lava o se auala e tofotofoina ai lo latou faatuatua, fuaina o lo latou faamaoni, po o le atiinaae o lo latou atamai” (Christ and the New Covenant: The Messianic Message of the Book of Mormon [1997], 19–20).

Eteru 3:15. “Ou te lei faaalia au lava i se tagata”

Ua tuuina mai e Elder Jeffrey R. Holland o le Korama a Aposetolo e Toasefululua se faamalamalamaaga tonu mo le fetalaiga a Iesu Keriso, e faapea e Na te lei faaalia o Ia lava i se tagata ao lei faaalia o Ia lava i le uso o Iareto:

“Na fetalai atu Keriso i le uso o Iareto, ‘Ma ou te lei faaalia au lava i se tagata i lenei auala, e aunoa ma lou finagalo, ua na o le naunautaiga a le talitonu.’ Avea ai ma se tulafono, o perofeta e valaauliaina i le afioaga o le Alii, ua faatagaina e ulufale atu i lona afioaga e ala atu ia te ia ma ua na o lana faamaoniga. O le uso o Iareto, i le isi itu, ua foliga mai ua ia tulei o ia lava i le veli, e le o se malo e le manaomia ae atonu o se tasi e lei valaauliaina moni lava. E moni lava na fesootai le Alii lava ia i faatuatua tulaga ese ma i lana faaaliga tulaga ese. Afai sa le tulaga ese le faaaliga lava ia, o lona uiga o le faatuatua ma le ala na mauaina ai le faaaliga na sa le ogatasi. Ua na o le pau lava le auala e mafai ai ona mataina le faatuatua, ona o lona tomai e ave ai le perofeta, le valaauliaina, lea sa mafai ona ave i ai isi sei vagana ai le faatagaga a le Atua” (Christ and the New Covenant: The Messianic Message of the Book of Mormon [1997], 23).

Eteru 3:16. “O lenei tino … o le tino lea o lou agaga”

Na faamamafaina e Elder Cecil O. Samuelson o le Fitugafulu faapea, e ala i le tala o le uso o Iareto, ua tatou aoao ai e uiga i le tino faaleagaga ma le faaleatua o le Faaola:

“E leai se mea o i tusitusiga paia e sili atu le manino ai o le tala o le natura o le tino faaleagaga o le Alii o Iesu Keriso ma, e moni lava, o foliga vaaia a o tatou lava agaga. E le na o le tamatamaiaao o Iesu Keriso faaleagaga sa vaaia e le uso o Iareto ae e moni lava sa vaaia Lona tino atoa faaleagaga (tagai Eteru 3:6, 13). O le malamalama ai i le muai faaleatua o Iesu Keriso, faatasi ai ma o tatou faasinomaga faaleagaga ae tatou te le i fananau mai i la le tino o se faamanuiaga maoae ma le manuia. O nei malamalamaaga o le tatalaina o tuaoi faaanamua, sa avea o ni taunuuga tuusao o le faatuatua le faatuaoia o le uso o Iareto” (“The Brother of Jared,” i leHeroes from the Book of Mormon [1995], 185).

Eteru 3:23–24. “Maa nei e lua”

O maa e lua na tuuina atu e le Alii i le uso o Iareto o ni vaega ua faaigoaina o le Urima ma le Tumema. Ua faatautauina e tusitusiga paia le silia ma le tasi Urima ma Tumema, peitai ua faailoa mai ia i tatou sa ia Iosefa Samita le tasi sa faaaogaina e le uso o Iareto (tagaiEteru 3:22–28; MF&F 10:1; 17:1). I leIosefa Samita—Talafaasolopito 1:35, ua saunia e le Perofeta o Iosefa se faamatalaga o se vaega o lenei Urima ma le Tumema. Na ia faaaogaina e faaliliu ai le Tusi a Mamona ma i le mauaina o isi faaaliga.

Lolomi