Lesona 147
Eteru 6
Faatomuaga
Ina ua maea ona faia sauniuniga e tusa ai ma poloaiga a le Alii, sa uta e sa Iareto o latou vaa, ma le talitonuga o le a faasaoina i latou e le Alii i lo latou faigamalaga faigata i le laueleele o le folafolaga. Na auina mai e le Alii se matagi e felafoaiina vaa i luga o galu ma tanumia i latou i le sami i le tele o taimi, peitai na auina atu e lena matagi ia vaa agai atu i le laueleele o le folafolaga. I le faatulagaina o i latou lava i le laueleele fou, na filifilia ai e tagata se tupu, e ui lava i lapataiga mai le uso o Iareto.
Fautuaga mo le Aoaoga
Eteru 6:1–12
Na auina atu e le Alii se matagi ina ia taitaiina vaa a sa Iareto i le laueleele o le folafolaga
A o lei amataina le vasega, tusi le faamatalaga lenei i luga o le laupapa:
Faasoaina atu o le talalelei i se uo
Ola ai i se olaga mama
Filifiliaina o uo e i ai tulaga faatauaina maualuluga
Faatulagaina o faamuamua e sa’o i le olaga
Faamanino atu o faataitaiga nei o mea ua finagalo le Alii ia tatou faia. Peitai, o nisi tagata ua manatu e faigata tele nei mea. Valaaulia tamaiti aoga e mafaufau i isi faataitaiga e mafai ona faaopoopoina i le lisi. Faamalamalama atu o le tala i le faigamalaga a sa Iareto i le laueleele o le folafolaga ua i ai mataupu faavae e mafai ona taitaiina ai i tatou pe a tatou iloa ua faigata ona faia mea ua poloaiina e le Alii. Fautuaina tamaiti aoga ao latou suesue i le Eteru 6ma vaavaai mo mataupu faavae o le a fesoasoani ia i latou i luitau e pei o na ua lisiina i le laupapa.
Valaaulia se tamaitiiti aoga e faitau leotele le Eteru 2:24–25. Fai atu i le vasega e mulimuli i le faitauga, ma vaavaai mo lapataiga a le Alii i a sa Iareto e uiga i faigata o lo latou faigamalaga i le laueleele o le folafolaga.
-
O le a le folafolaga a le Alii o le a Ia faia e fesoasoani ai i a sa Iareto ia taunuu ma le saogalemu i le laueleele o le folafolaga?
Faamanatu i tamaiti aoga ina ia mafai ona tetee atu i galu ma le matagi, na fausia e sa Iareto ia vaa ia “malu e pei lava o se ipu” (Eteru 2:17), ma se pu i luga ma lalo ina ia mafai ona latou aveese mo se ea. Valaaulia se tamaitiiti aoga e faitau leotele le Eteru 6:1–4. Fai i le vasega e mulimuli i le faitauga ma faailoa isi auala na saunia ai sa Iareto mo nei faigata.
-
O le a sou manatu i le uiga o le tuuvaa atu o sa Iareto a o “tuu atu i latou lava i le Alii lo latou Atua”? (Sa latou faatuatuaina i latou lava i le Atua mo le tausia ma le faasaoina.)
-
Aisea e te manatu ai na taua mo sa Iareto ona tuuina atu i latou lava i le Alii ina ua uma ona latou faia o mea uma e saunia ai i latou lava?
-
Aisea atonu na faigata ai le faatuatuaina o le Alii i lenei tulaga? (Afai e le tauina mai e tamaiti aoga mea nei, atonu e te manao e faamanino atu na tatau ona fausia e sa Iareto o latou lava vaa, sa le mafai ona latou faafoeina o latou vaa, ma sa lei iloaina moni le ala i le laueleele o le folafolaga pe o le a le umi o le faigamalaga.)
Ina ia fesoasoani i tamaiti aoga ina ia vaai faalemafaufau i mea na tutupu sa taua i le Eteru 6, fai atu ia i latou e tusi se otootoga faigofie o se vaa a sa Iareto i a latou api e tusi ai faamatalaga po o api o talaaga mo le suesueina o tusitusiga paia. Ona tuu atu lea ia i latou e tusi se ata pe lisiina mea na fausia ai vaa e tusa ai ma le Eteru 6:1–4.
Valaaulia ni nai tamaiti aoga e feauauai i le faitauina leotele mai o le Eteru 6:5–11. Fai atu i le vasega e vaai i o latou ata na tusi a o latou faalogologo ma vaavaai faalemafaufau pe na faapei le faimalaga ai i na vaa.
-
O le sou manatu o le a faigata i le faimalaga ai i se vaa a sa Iareto?
-
E tusa ai ma Eteru 6:11, o le a le umi na malaga ai sa Iareto i lenei auala?
-
O le a sou manatu i le uiga o le fasifuaitau “galu mauga”? (Eteru 6:6). O le a sou manatu o a ni ou faalogona pe afai na e i totonu o se vaa a sa Iareto a o “tanumia ai i latou i le loloto o le sami” ona o lena galu? (Atonu e te manao e faamanatu i tamaiti aoga na faatalitali sa Iareto seia o a’e i luga vaa faato’a mafai ona latou aveese mea na punitia ai pu ma maua ai se ea.)
Ia fesoasoani i tamaiti aoga e saunia e faailoa se mataupu faavae, fesili atu:
-
E faapefea ona faaalia e sa Iareto lo latou faatuatuaina o le Alii ao latou sopoia le vasa? (Tagai Eteru 6:7, 9.)
-
O a nisi o fasifuaitau i le Eteru 6:5–11 lea o ua faamatala ai mea na faia e le Alii mo sa Iareto ona o lo latou faatuatuaina o Ia?
Valaaulia tamaiti aoga e faitau leleoa le Eteru 6:12, ma faailoaina taunuuga o le faigamalaga a sa Iareto.
-
Aisea na tutulu ai sa Iareto i loimata o le olioli? O a “alofa mutimutivale” na tuuina atu e le Alii ia i latou?
Ina ia fesoasoani i tamaiti aoga e faailoa se mataupu faavae na faatinoina e ala i aafiaga a sa Iareto, fesili atu:
-
E tusa ai ma mea na e aoaoina mai le faigamalaga a sa Iareto’, o le a le mea o le a faia e le Alii mo i tatou ao tatou faatuatuaina o Ia ma faia Lona finagalo? (O se tasi o mataupu faavae e tatau ona faaailoaina e tamaiti aoga o lepe a tatou faatuatuaina le Alii ma faia Lona finagalo, o le a Ia taitaiina le ala o o tatou olaga. Tusi lenei mataupu faavae i le laupapa. Fai atu i tamaiti aoga e mafaufau loloto i le mataupu faavae ma faasoaaafiagalea na fesoasoani ia i latou e iloa ai e moni. Atonu e te manao e faasoa le ala e te iloa ai e moni.)
Valaaulia tamaiti aoga e tomanatu pe faapefea ona lelei atu lo latou faatuatuaina o le Alii ma mulimuli i Ana taitaiga i tulaga faigata o loo feagai mai latou i le taimi nei. Faamalamalama e mafai ona latou maua isi mataupu faavae i le Eteru 6:1–12. Tape ese mea uma i le laupapa sei vagana ai le faamatalaga e uiga i le faatuatuaina o le Alii. Tusi se ata faigofie o le vaa i le tasi itu o le laupapa. I le isi itu, tusi ai Laueleele o le Folafolaga.
-
Faamata o le a se mea e faatusatusa i ai le laueleele o le folafolaga i le ata o le faaolataga? (Ola e faavavau.)
-
Pe a tatou feagai ma faigata o le olaga, e mafai faapefea ona tatou mulimuli i faataitaiga a nei sa Iareto? E faapefea ona fesoasoani mai le Alii ia i tatou, e pei ona Ia fesoasoani ia sa Iareto, i le aluga o la tatou faigamalaga i le olaga faaletino? (O tali a tamaiti aoga e tatau ona atagia ai le mataupu faavae o loo i lalo: A tatou faatuatuaina le Alii, o le a Ia lagolagoina i tatou ao tatou alualu i luma ma saunia ia maua le ola e faavavau. Atonu e te manao e fautua atu i tamaiti aoga e tusi lenei mataupu faavae i o latou tusitusiga paia i talaane o le Eteru 6:5–12.)
Valaaulia tamaiti aoga e mafaufau e uiga i faigata sa feagai mai latou po o feagai nei mai latou i o latou olaga. Tuu ia i latou e tusi i api e tusi ai faamatalaga po o api talaaga mo le suesueina o tusitusiga paia e uiga i o latou faalogona i a latou tali atu ma le faatuatua i nei faigata ma le ala na lagolagoina ai i latou e le Alii.
Fautuaina ni nai tamaiti aoga e faasoa mea sa latou tusiaina. Ona tuuina atu lea o fesili nei:
-
E faatatau i mea ua e suesueina i le aso, o a fautuaga o le a e avatu i se tasi o loo feagai ma faigata po o tulaga lamatia?
Eteru 6:13–18
Na aoaoina e sa Iareto a latou fanau ia savavali ma le faamaualalalo i luma o le Alii
Otooto le Eteru 6:13–18 e ala i le faamalamalamaina ina ua taunuu atu sa Iareto i le laueleele o le folafolaga, sa amata ona latou atiina ae o latou aiga ma galueaiina mea toto. Valaaulia tamaiti aoga e faitau leleoa le Eteru 6:17, ma vaavaai mo mea na aoao ai e sa Iareto a latou fanau. Ona tuuina atu lea o fesili nei:
-
O le a lou manatu i le uiga o le “savavali faamaualalalo i luma o le Alii”? O a nisi o faataitaiga na e vaaia ai i le mulimuli ai o tagata i lenei mataupu faavae? Na faapefea ona fautuaina oe e ou matua ma isi ia savali faamaualalo i luma o le Alii?
-
O le a le uiga o le aoaoina “mai luga”?
-
O a sootaga e te manatu o loo i ai i le va o le savali faamaualalo i luma o le Atua ma le aoaoina mai luga? (O tali a tamaiti aoga e tatau ona atagia ai le mataupu faavae o loo i lalo: Afai tatou te savavali faamaualalo i luma o le Alii, e mafai ona aoaoina i tatou mai luga.)
Atonu e te manao e valaaulia tamaiti aoga e tusi e uiga i se taimi na latou lagona ai o loo “aoaoina mai luga” i latou. Fautuaina nisi o i latou e faasoa mea sa latou tusiaina. Valaaulia tamaiti aoga e mulimuli i le mataupu faavae na faamaumauina i le Eteru 6:17.
Eteru 6:19–30
Ua filifilia e sa Iareto se tupu
Otooto le Eteru 6:19–22 e ala i le faamalamalamaina ina ua amata ona toeaina Iareto ma lona uso, sa talosaga sa Iareto mo se tupu. Fai i tamaiti aoga e suesue i le Eteru 6:23 ia maua ai mea na lapataiina e le uso o Iareto o le a tupu pe a latou filifilia se tupu.
Faaiuina i lou molimau atu i mataupu faavae o i lenei lesona.
Tala ma Faamatalaga o Talaaga
Eteru 6:1–12. Ua sopoiaina ma le saogalemu e sa Iareto le vasa
Na aoaoina e Peresitene Thomas S. Monson le ala e mafai ai ona tatou saunia mo luitau o faasaga mai ia i tatou:
“Ua tatou ola i se taimi ua toatele i latou i le lalolagi ua se’e ese atu mai taula saogalemu o le tausiga o poloaiga. O se taimi lava o le tuufau, ua fai ma masani a tagata le le amanaia o tulafono a le Atua ma solia. E tele taimi tatou te feausi ai e faasaga i le fafati mai o peau, a o nisi taimi e foliga mai sa mafai ona tafi ese atu i tatou e peau.
“Ua ou manatua ai afioga a le Alii o loo maua i le tusi a Eteru i le Tusi a Mamona. Na fetalai le Alii, ‘E le mafai ona outou sopoia lenei moana tele vagana ai ua ou saunia outou aua galu o le sami, ma matagi ua o atu, ma lologa o le a oo mai’ Eteru 2:25 . Ou uso e ma tuafafine, ua uma ona Ia saunia i tatou. Afai tatou te gauai atu i Ana afioga, ma ola i poloaiga, o le a faasaoina i tatou i lenei taimi o le tuufau ma le amioleaga—o se taimi e mafai ona faatusatusa i peau ma matagi ma tafega e mafai ai ona faatafuna. Na te silafia mea tatou te manaomia. E alofa o Ia ia te i tatou uma ma o le a Ia faamanuiaina i tatou pe a tatou faia le mea tonu” (“Tuleiga Faaiu,” Ensignpo o leLiahona,Nov. 2009, 109).
Eteru 6:22–24. Ua filifilia e sa Iareto se tupu
I tusitusiga paia, ua lapataiina e perofeta le aafiaga leaga o le a i ai i le faia o tupu. Mafaufau e mulimuli i faataitaiga nei:
-
Na lapataiina e le uso o Iareto ona tagata o le i ai o se tupu o le a taitai atu ai i latou i le faatagataotauaina (tagai Eteru 6:23).
-
Na lapataiina e le Tupu o Mosaea ona tagata e uiga i tulaga lamatia o taitaiga a se tupu amioletonu. Na ia fautuaina ia latou atiina ae se faiga o faamasino nai lo [tupu]. (Tagai Mosaea 29.)
-
Sa lapataiina e Samuelu le perofeta o le Feagaiga Tuai e uiga i faafitauli o puleaga o tupu ina ua mananao ona tagata i se tupu ia latou “pei o nuu uma” (tagai1 Samuelu 8).