Lesona 91

Alema 33

Faatomuaga

O se vaega o sa Sorama na mananao ia iloa pe faapefea ona mulimuli i le fautuaga a Alema ina ia toto le afioga a le Alii i o latou loto ma faaaoga le faatuatua. O le faaaogaina o tusitusiga paia, na aoao ai e Alema ia tagata e uiga i le tapuai, tatalo, ma le alofa mutimutivale lea tatou te mauaina mai le Atua ona o le Faaola. Na ia uunaia ia tagata e vaai atu ia Iesu Keriso ma talitonu i le mana o Lana Togiola.

Faaaliga: O le Lesona 94 o loo tuuina atu ai se avanoa mo ni tamaiti aoga se toatolu e aoao atu ai. Atonu e te manao e filifili i le taimi lenei ni tamaiti aoga se toatolu ma tuu atu ia i latou ni kopi o ni vaega ua filifilia o le lesona 94 e mafai ai ona latou saunia. Uunaia i latou e suesue ma le agaga tatalo i anomea o le lesona ma saili le taitaiga a le Agaga Paia ina ia latou iloa ai le auala e fetuunai ai le lesona e tusa ma manaoga o a latou uo aoga.

Fautuaga mo le Aoaoga

Alema 33

Ua aoao atu e Alema sa Sorama ina ia amata ona talitonu ia Iesu Keriso

Tusi le upu faaaoga i luga o le laupapa.

• O le a le uiga o le faaaoga o se mea? (A o tali mai tamaiti i lenei fesili, atonu e te fia manao i se tamaitiiti e faataitai mai le auala e faaaoga ai ona lima, e faia ai ni faamalositino, po o ona vae, e tamoe ai i le tulaga.)

Tuu atu i tamaiti e faitau le leoa le Alema 33:1, faailoa mai le tulaga o le faaaogaina lea na manao ia sa Sorama ia malamalama i ai. A uma ona lipoti mai e tamaiti mea sa latou mauaina, tusi le fesili lenei i luga o le laupapa: O faapefea ona tatou faaaogaina le faatuatua? Valaaulia ia tamaiti aoga e vaavaai ni tali ia le itiiti ifo ma le tolu i le fesili lenei a o latou suesue ma talanoaina le Alema 33.

Faamatala atu a o amata ona tali e Alema ia fesili a sa Sorama e uiga i le auala e faaaoga ai le faatuatua, sa ia faasaoina se manatu sese sa ia i latou e uiga i le tapuai. Valaaulia se tamaititii aoga e faitau leotele mai le Alema 33:2. Fai i le vasega e faailoa mai se manatu sese a sa Sorama e uiga i le tapuai i le Atua.

• Aisea na manatu ai nei tagata sa Sorama e le mafai ona latou tapuai i le Atua? (Ona sa le faatagaina i latou i totonu o a latou sunako.)

Fai i tamaiti e aotele mai mea sa latou aoaoina i le Alema 31 e uiga i le tulaga na tapuai ai sa Sorama. (Tagai i le Alema 31:22–23. Na ofoina atu e sa Sorama le tatalo lava lea e tasi e faatasi i le vaiaso i le sunako, ma e latou te le toe tautatala e uiga i le Atua i le vaiaso atoa.)

• Aisea e avea ai ma se vaega taua o la tatou tapuaiga le auai i le Lotu? O a nisi auala e mafai ona tatou tapuai ai i le Atua e ese mai ai i le auai i a tatou sauniga Lotu faalevaiaso?

Faamatala atu na siiina mai e Alema ni aoaoga a le perofeta e igoa ia Senosa e faasaoa ia manatu sese a sa Sorama e uiga i le tapuai i le Atua. Fai i tamaiti e faitau le leoa le Alema 33:3, vaavaai mo le upu na faaaogaina e Alema e fesuiai ma le upu tapuai. (O le upu o le tatalo.)

Fai i tamaiti e faitau le leoa le Alema 33:4–10, faailoa mai ia tulaga taitasi lea na fai mai ai Senosa na ia tatalo ai.

• O anafea ma o fea foi na tatalo ai Senosa?

• O le a se mea na aoao atu e Alema e uiga i le tapuai ina ua ia siiina mai upu a Senosa? (Fesoasoani i tamaiti ia iloa le upu moni lenei: E mafai ona tatou tapuai atu e le aunoa i le Atua e ala i le tatalo.)

Faasino i le fesili o i le laupapa: O faapefea ona tatou faaaogaina le faatuatua? I lalo ifo o lena fesili, tusi ai Tatalo e le aunoa.

• O a ni auala o avea ai le tatalo ma se faatinoga o le faatuatua i le Tama Faalelagi ma Iesu Keriso?

• O anafea na e tatalo ai i se tulaga faapei o na sa ta’ua e Senosa? Na faapefea ona tali mai lau tatalo? (Toe faamanatu atu i tamaiti aoga e le manaomia lo latou faasoa maia o se mea e patino pe le faalauaiteleina.)

Fai i tamaiti aoga e toe iloilo le leoa le Alema 33:4–5, 8–9. Fai atu ia i latou e vaavaai i fasifuaitau ia o loo ta’ua ai le alofa mutimutivale o le Atua (e pei o le “ua e alofa mutimutivale” ma le “sa e alofa mutimutivale”).

Ina ia fesoasoani i tamaiti ia iloa le fesootaiga i le va o le Togiola a Iesu Keriso ma le alofa mutimutivale o le Tama Faalelagi, valaaulia se tamaitiiti aoga e faitau leotele mai le Alema 33:11–16. Fai i le vasega e mulimuli i le faitauga, vaavaai mo se fasifuaitau lea e faafa ona faaalia mai i mau nei. (O le fasifuaitau o le “ona o lou Alo”. Atonu e te manao e uunaia ia tamaiti e faailoga le fasifuaitau lea.)

Faailoa mai ia upu ma fasifuaitau o loo ta’ua soo

E masani ona faamamafa mai e perofeta ia upu moni e ala i le ta’ua soo. A o mauaina e tamaiti aoga ia upu, fasifuaitau, ma manatu o loo ta’ua soo, fai atu ia i latou e mafaufau po o le a se upu moni o loo aoao mai e le tusitala ma pe aisea e taua ai le malamalama i ai.

• O le a sou manatu o le uiga o le tala a Senosa, “Ua e liliu ese au faasalaga mai ia te au, ona o lou Alo”? (Fesoasoani i tamaiti ia iloa le upu moni lenei: Ua tatou mauaina le alofa mutimutivale o le Tama Faalelagi, e aofia ai le faamagaloga o a tatou agasala, ona o le Togiola a Iesu Keriso. Atonu e te manao e valaaulia tamaiti e tusi le upu moni lenei i totonu o a latou tusitusiga paia i talaane o le Alema 33:11–16.)

Ina ia fesoasoani i tamaiti ia malamalama atili i le alofa mutimutivale e mafai ona tatou mauaina e ala mai le Togiola a Iesu Keriso, mafaufau e faasoa atu le tala lenei na siina mai e Peresitene Gordon B. Hinckley:

“Sa faapea atu le faiaoga, ‘Talofa alii, ua tatau ona amata la tatou aoga.’ Sa feei mai tamaiti ma taufaalili. ‘Ia, ou te fia manao i se aoga lelei, peitai ou te fia tautino atu ou te le iloa pe faapefea, sei vagana ua outou fesoasoani mai ia te au. E tatau ona fai ni nai a tatou tulafono. Tau mai e outou ae ou tusia i luga o le laupapa.’

“Sa ee mai se tasi alii, ‘E sa le gaoi!’ Sa faataio mai le isi, ‘E sa le tuai.’ Mulimuli ane, ua sefulu tulafono sa i ai i luga o le laupapa.

“‘Ia,’ o le tala lea a le faiaoga, ‘e lē lelei se tulafono sei vagana ua i ai se faasalaga e tuu i ai. O le a se mea e tatau ona tatou faia i le tagata e solia tulafono?’

“‘Aveese lona peleue ae sasa faasefulu lona papatua,’ o le tali lea a le vasega.

“‘Ua fai si ogaoga tele, sole. Pe moni lava ua outou sauni e talia?’ Sa ee mai se tasi, ‘Ou te faaluaina le manatu,’ ma sa faapea atu le faiaoga, ‘Ia ua lelei, o le a tatou faamamaluina! Fifilemu nei loa!’

“E tasi le aso pe a, ae iloa e le ‘Lapo’a o Toma’ ua gaoia lana meaai. Sa maua le tagata gaoi—o se alii faatinoiti fiaai, pe tusa ma le sefulu tausaga le matua. ‘Ua matou mauaina le gaoi ma e tatau lava ona faasala e tusa ai ma la outou tulafono —sefulu ta i le papatua. Simi, sau iinei!’ o le tala lea a le faiaoga.

“Sa savalivali lemu mai le alii faatinoiti, ma le gatete, ma le peleue tele ua fusi mau i le ua ma aioi ane, ‘Faiaoga, e pule lava oe po o le a le mamafa o au ta ia te au, ae faamolemole, aua le aveesea lo’u peleue!’ [Faaaliga: Atonu e manaomia lou faamalamalamaina atu o le upu ta i le tala lenei, o lona uiga o le fasiina lea o se tagata.]

“‘Aveese lou peleue,’ o le tala lea a le faiaoga. ‘Sa e fesoasoani foi i le faiga o tulafono!’

“‘Oi, faiaoga, aua faamolemole!’ Sa amata talai faamau, ma o le a la le mea na vaaia e le faiaoga? E leai se ofutino o le tamaitiiti, ma sa iloa atu se tino laitiiti pipili iviivia.

“‘E mafai faapefea ona ou sasaina lenei tamaitiiti?’ o ona mafaufauga ia. ‘Peitai e tatau lava ona ou faia, e tatau lava ona fai sa’u gaoioiga pe afai ou te manao ia i ai pea lenei aoga.’ Sa le toe gase se mea e pei o se oti.

“‘Ua leai o le a sou ofutino, Simi?’

“Sa tali mai o ia, ‘Ua oti lo’u tama ae mativa lava si o’u tina. E na o le tasi lo’u ofutino ma o la na ia taina nei, ma sa ou ofuina le peleue tele o lo’u uso ina ia ou mafanafana ai.’

“Sa faatuatuai le faiaoga, a’o uu le sasa i lona lima. O le taimi tonu lea na oso mai ai le ‘Lapoa o Toma’ ma faapea mai, ‘Faiaoga, afai e le afaina ia te oe, ona sasa lea o a’u e sui ai Simi.’

“‘Ua lelei, o loo i ai se tulafono e mafai ai e se tasi ona sui mo le isi. Pe tou te ioe uma i ai?’

“Off came Tom’s coat, and after five strokes the rod broke! The teacher bowed his head in his hands and thought, ‘How can I finish this awful task?’ Then he heard the class sobbing, and what did he see? Little Jim had reached up and caught Tom with both arms around his neck. ‘Tom, I’m sorry that I stole your lunch, but I was awful hungry. Tom, I will love you till I die for taking my licking for me! Yes, I will love you forever!’” [Author unknown.]

Ina ua uma ona siiina atu lenei tala, sa saunoa atu Peresitene Hinckley, “Ina ia faaaogaina se fasi fuaitau mai lenei tala faigofie, o Iesu, lo’u Togiola, na ‘sasaina o ia mo a’u” (“O Le Tala Moni ma le Ofoofogia o le Kerisimasi,” Liahona, Tes. 2000, 5, 6).

• O faapefea ona fesootai lenei tala i aoaoga a Alema e uiga i le Togiola a le Faaola? (Pe a manaomia, faamalamalama atu o le manao o Toma e ‘ave e ia ia ta a Simi” o le faatusa lea o le Togiola. Na tauave e le Faaola le faasalaga mo a tatou agasala i Ona lava luga ina ia tatou le mafatia i lena faasalaga pe a tatou salamo.)

Faamatala atu ina ua uma ona sii atu ia upu a Senosa, na sii mai e Alema ia upu a Senoka, o se isi perofeta. Faitau leotele le Alema 33:15–16 i tamaiti. Faamamafa atu le le fiafia o le Tama Faalelagi pe a mumusu tagata e malamalama i le mea na faia e Lona Alo mo i latou.

Fai i tamaiti e faitau le leoa le Alema 33:12–14, vaavaai mo le sosia na faaaoga e Alema ina ua ia faasoa atua nei aoaoga.

• Aisea na ma masani ai Alema i upu a Senosa ma Senoka? (Ona sa i totonu o tusitusiga paia ia upu. Atonu e te manao e faasino i upu a Alema o loo i le fuaiupu 12 ma le 14 o fautuaina atu ai faapea na mauaina foi e sa Sorama nei tusitusiga paia. Faamamafa atua o tusitusiga paia na molimau ia Iesu Keriso.)

I lalo ifo o le fesili o i le laupapa, tusi ai Suesue ma talitonu i tusitusiga paia.

Faailoa atu na faasino Alema i se isi tala faatusipaia ina ia fesoasoani ai i sa Sorama e atiina ae le faatuatua ia Iesu Keriso. Faaali atu le ata o Mose ma le Gata Apamemea (62202; Tusi Ata o le Talalelei [2009], nu. 16). Aotele le tala lenei e ala i le faamatalaina atu ina ua taitaiina e Mose le fanauga a Isaraelu i le vao, o le toatele o tagata na tetee e faasaga ia te ia ma le Alii. I le tali atu i lenei le usiusitai, na auina mai ai e le Alii ni gata uogo e uina ia tagata. Na o atu tagata ia Mose mo se fesoasoani. Na tatalo Mose ma sa faatonuina e fau se gata ma tuu i luga o se pou ina ia mafai ona vaai atu i ai tagata. Na usitai o ia, ma faia se gata apamemea. (Tagai i le Numera 21:4–9.) Tuu atu i se tamaitiiti e faitau leotele mai le Alema 33:19–20. Fai i le vasega e faailoa mai le mea na tupu ia i latou o e na tetepa atu i le gata apamemea ma le mea na tupu ia i latou o e e lei filifili e tepa atu i ai.

• E tusa ma le Alema 33:20, aisea na filifili ai le toatele ina ia aua nei tetepa i le [gata apamemea]?

Fai i tamaiti e mafaufau pe faamata latou te filifili e tetepa pe ana faapefea sa latou i ai i lea tulaga.

Faaali le ata O Le Faasatauroga (62505; Tusi Ata o le Talalelei, nu. 57). Faamalamalama atu o le gata apamemea sa i luga o le pou sa avea o se “faatusa” (Alema 33:19). I nisi upu, sa avea o se faailoga o se mea o le a tupu i le lumanai. Sa avea o se faatusa o Iesu Keriso i luga o le satauro (tagai i le Ioane 3:14).

Fai i tamaiti e faitau le leoa le Alema 33:21–23, tagai i le auala na faatusa ai e Alema lenei tala i tagata sa Sorama. Fai i tamaiti e lipoti mai mea na latou mauaina, toe faasino i le fesili o i le laupapa. O faapefea ona tatou faaaogaina le faatuatua?

• E faapefea ona aoao mai i tatou e le tala o le fanauga a Isaraelu ma le gata apamemea e uiga i le mea e tatau ona tatou faia ina ia faamaloloina ai faaleagaga?

• E faapefea ona taliina e le Alema 33:22–23 lenei fesili? (Fesoasoani i tamaiti ia iloa le upu moni lenei: Tatou te faaaogaina le faatuatua e ala i le filifili e talitonu ia Iesu Keriso ma Lana Togiola.)

I lalo ifo o le fesili o i le laupapa, tusi ai Talitonu ia Iesu Keriso ma Lana Togiola.

• O a ni uiga po o ni amio o e vaaia i tagata o e talitonu i le Togiola a le Faaola?

Ina ia faamamafa atu o le talitonu ia Iesu Keriso o se filifiliga tatou te faia, ia taulai atu le vaaiga a tamaiti aoga i le fasifuaitau lenei o loo i le Alema 33:23: “Ma o nei mea uma lava e mafai ona outou faia, pe afai tou te loto i ai.” Atonu e te manao e uunaia ia tamaiti e faailoga le fasifuaitau lenei.

Tusi le faamatalaga lenei i luga o le laupapa, ma mafaufau e uunaia ia tamaiti e tusi i totonu o a latou tusitusiga paia. (O loo maua le faamatalaga i le “Inquire of the Lord” [lauga i faiaoga faalelotu a le OAE, Fep. 2, 2001], 1, si.lds.org.)

“O tamaiti taitasi i augatupulaga taitasi e filifili le faatuatua po o le le talitonu. O le faatuatua e le o se mea na fanau mai ma ia; o se filifiliga” (Peresitene Henry B. Eyring).

Fai i tamaiti e tali se fesili se tasi o fesili nei i totonu o api o le vasega po o api talaaga mo le suesueina o tusitusiga paia: (Atonu e te manao e tusi fesili nei i luga o le laupapa ao lei amataina le vasega, saunia se pepa o i ai fesili e tufa atu, pe faitau lemu ia fesili ina ia mafai e tamaiti ona tusiina i lalo.)

• Na faapefea ona aafia e lau filifiliga ina ia talitonu i le Faaola lou olaga i aso taitasi?

• Na faapefea ona faamalosia e au suesuega i tusitusiga paia lou faatuatua i le Tama Faalelagi ma Iesu Keriso?

• Na faapefea ona faamalosia e au tatalo patino i aso taitasi ma le ala o e tapuai ai lou faatuatua i le Tama Faalelagi ma Iesu Keriso?

• O le a sou lagona i le mea o finagalo le Tama Faalelagi e te faia ina ia faaaoga atili ai le faatuatua?

Fai i ni nai tamaiti e faasoa mai a latou tali. Molimau atu i le taua o le filifili e talitonu i le Faaola.