Lesona 71
Alema 5:1–36
Faatomuaga
Ina ua lamatia le Ekalesia e ala i finauga tetele ma le amioleaga i totonu (tagai i le Alema 4:9–11), na tuua ai e Alema le nofoa faamasino ina ia mafai ona ia taulai atu i ana taumafaiga o le faamalosia o le Ekalesia. Na alu lana misiona e toe aumai le nuu o Nifae e ala i le “molimau manino e faasaga ia te i latou” (Alema 4:19). Na amatalia e Alema lana misiona i le toe faamanatu atu i le nuu o Sara’emila na laveaiina e le Alii o latou tuaa mai le pologa faaletino ma le faaleagaga. Na ia faamalosiau ia i latou e saunia mo le aso mulimuli o le faamasinoga e ala i le talitonu i le afioga a le Atua ma le toe iloiloina o tulaga faaleagaga o o latou loto.
Fautuaga mo le Aoaoga
Alema 5:1–14
Ua toefaitauina e Alema le liua o lona tama ma i latou o e na mulimuli ia te ia.
Tusi le upu suiga i luga o le laupapa. Fai atu i tamaiti aoga e faasoa mai ni faataitaiga o ni auala atonu e suia ai e tagata o latou foliga po o amioga. Valaaulia i latou e faamalamalama mai po o le a se mea e ono taitaiina atu ai pe aumaia ai nisi o nei suiga i tagata
Toe faamanatu atu i tamaiti aoga na popole Alema i le amioleaga lea ua amata ona tuputupu ae i totonu o sa Nifae. Na ia iloaina afai latou te le suia, o le a latou le maua ia faamanuiaga folafolaina o feagaiga na latou osia. Na ia tuua le nofoa faamasino ma tuuto atu o ia lava e talai atu i tagata ma valaauina i latou ia salamo. Na ia amata i le aoaoina o tagata Sara’emila.
Valaaulia ni nai tamaiti aoga e feauauai i le faitauina leotele o le Alema 5:3–6. Fai atu i le vasega e vaavaai mo ni mea na tutupu lea na faamamafaina atu e Alema ao amata ona ia aoao atu ia tagata.
-
Faamata na faapefea ona fesoasoani le faalogo o tagata o le nuu o Alema i tala o le nofopologa, laveaiina, ma le liua o le tama o Alema ma i latou na mulimuli ia te ia?
-
Tagai i le Alema 5:7. E tusa ai ma lenei mau, o le a le ituaiga liua lea na tupu i olaga o le tama o Alema ma lona nuu?
I luga o le laupapa, faaopoopo atu i ai ia upu o le loto e sosoo ma le liuga, ina ia faitauina liuga o le loto.
-
O le a sou manatu o le uiga o le oo i se “liuga o le loto”? (Ina ia fesoasoani i tamaiti aoga e tali lenei fesili, atonu e te manao e tau atu ia i latou faapea o Elder Gerald N. Lund o le Fitugafulu na aoao mai o totonu o tusitusiga paia, o le upu loto e matele ina faasino i ai o le “tagata moni o loo i totonu” [“Understanding Scriptural Symbols,” Ensign, Oke. 1986, 25].)
-
O le a le eseesega o le liuga o le loto ma ituaiga liuga lea na tatou talanoaina i le amataga o le lesona?
Faamalamalama atu i le Alema 5:7–9, 14, na faaaoga ai e Alema ni fuaitau eseese o loo faamatala ai pe faapei le liuga o le loto. Faaopoopo atu i le fuaitau o loo i luga o le laupapa ina ia faitauina, O se liuga o le loto e faapei …
Fai atu i tamaiti aoga e faitau le leoa le Alema 5:7–9, 14, ma tagai i faamatalaga a Alema pe faapei le liuga o le loto. Valaaulia i latou e lipoti mai mea na latou mauaina. Ao lipoti mai ia tamaiti aoga, faaopoopo atu ia fuaitau i luga o le laupapa. (Atonu e foliga faapea lau lisi: O se liuga o le loto e faapei … o le ala mai i luga o se moe loloto; faatumulia i le malamalama; faasaoloto mai filifili; faalauaitele lou agaga; pesepese e uiga i le alofa togiola; fanauina i le Atua; mauaina o foliga o le Alii i ou mata.)
-
E faapefea ona faapei le liuga o le loto e pei o le faamatalaga o loo lisiina i luga o le laupapa?
-
E faapefea ona vaaia le liuga o le loto i amioga o se tagata? E faapefea ona iloagofie le liuga o le loto i foliga o se tagata? (Atonu e te manao e fai atu i tamaiti aoga e faamatala mai ia foliga po o uiga o se tagata latou te iloa ma lagona ua “mauaina ia foliga [o le Alii] i [ona] mata.”)
Valaaulia se tamaitiiti aoga e faitau leotele mai le Alema 5:10, ma fai atu i le vasega e faailoa mai ia fesili e tolu ia na fesili atu ai Alema i tagata. (Atonu e te manao e fautua atu i tamaiti aoga e faailoga ia fesili nei.) O le faitauina o nei fesili o le a fesoasoani i tamaiti aoga e faaailoa mai i fuaiupu o loo sosoo ia mafuaaga na mafua ai ona tupu se liuga tele o le loto ia Alema ma lona nuu.
Valaaulia se tamaitiiti aoga e faitau leotele le Alema 5:11–13, ma fai atu i le vasega e faailoa mai po o le a se mea na mafua ai le liuga tele o le loto o le tama o Alem ma e na mulimuli ia te ia. (O la latou talitonuga i le afioga a le Atua ma, i le faalauaiteleina, o lo latou faatuatua ma le talitonu i le Atua. Atonu foi e te manao e faailoa atu le uunaiga a le afioga a le Atua o loo ta’ua i le Alema 5:5, 7.)
-
O le a se fesootaiga o e vaaia i le va o le talitonu i le afioga a le Atua ma le lagonaina o se liuga o le loto? (Fesoasoani i tamaiti aoga e faailoa mai le mataupu faavae lenei: Afai tatou te talitonu i le afioga a le Atua ma faaaoga le faatuatua ia Iesu Keriso, o le a tatou mauaina se liuga tele o le loto. Faamamafa atu o le afioga a le Atua e pei ona talaiina e Apinati ma Alema o loo taulai atu i le faaolataga lea e oo mai e ala mai ia Iesu Keriso [tagai Mosaea 16:4–9; 18:1–2].)
Faamalamalama atu o se isi auala e faailoa atu ai se tagata na i ai se liuga tele o le loto o le fai atu sa toe fanauina. Fesoasoani atu i tamaiti aoga ina ia malamalama o le “toe fanauina i le Atua” po o le “toe fanauina” o loo faatatau lea i se liuga na oo i ai se tagata ina ua latou taliaina Iesu Keriso ma amatalia se olaga fou o le avea ai ma Ona soo. Ina ia fesoasoani i tamaiti aoga ia malamalama o le mauaina o se liuga tele o le loto, po o le toe fanauina, e masani lava o se faagasologa faifai malie, faitau le faamatalaga lenei a Elder D. Todd Christofferson o le Korama a Aposetolo e Toasefululua.
“Atonu tou te fesili, Aisea e le vave ai ona tupu lenei suiga tele ia te au? … O le toatele lava o i tatou, e faifai malie suiga ma e umi se taimi e tulai mai ai. O le toefanaufouina … o se faasologa ae le o se mea ua fuafua e tupu. Ma o le galue ai i lena faasologa, o le faamoemoega tutotonu lea o le olaga nei” (“Toe Fanauina,” Ensign po o le Liahona, Me 2008, 78).
-
O anafea na e lagona ai se liuga i totonu o lou loto ao e taumafai e ola e tusa ai ma le afioga a le Atua?
-
E faapefea ona e faamatalaina ia lagona ma faatinoga lea e o faatasi ma se liuga o le loto?
-
Na faapefea ona liua lou loto ao e suesue i le Tusi a Mamona i le seminare i lenei tausaga?
Tuu atu ni nai minute i tamaiti aoga e tusi ai i totonu o api e tusi ai faamatalaga po o api talaaga mo le suesueina o tusitusiga paia e uiga i se mea se tasi pe lua foi o le a latou faia e ola faamaoni atili ai e tusa ai ma le afioga a le Atua.
Alema 5:15–36
Na aoaoina e Alema e manaomia se liuga tele o le loto e ulu atu ai i le malo o le lagi
Saunia ia tofu le tamaitiiti aoga ma se pepa e tufa atu o loo i ai le siata lenei, pe faapipii le siata i luga o le laupapa e kopi ai tamaiti aoga.
Faamalamalama atu o le faamaumauga o le tata o le fatu o se siata lea e faaaoga e fomai i nisi taimi e suesue ai pe siaki ai le galuega a o tatou fatu faaletino. E fesoasoani ia i latou e iloa ai ni faaletonu po o ni tulaga e manaomia ai se togafitiga.
Faamatala atu i tamaiti aoga ina ua uma ona aoao atu Alema faapea o le afioga a le Atua na taitaiina atu lona tama ma isi ina ia maua se liuga tele o le loto, sa ia tuuina atu i tagata ni fesili ina ia mafai ona fesoasoani ia i latou i le suesueina o le tulaga o o latou lava loto. Valaaulia ia tamaiti aoga e faitau le leoa le Alema 5:14, ma vaavaai mo fesili e tolu lea na fesiligia ai e Alema ia tagata. (Atonu e te manao e fautua atu i tamaiti aoga e faailoga ia fesili nei.)
Faamalamalama atu na tuuina atu e Alema ni fesili se tele ina ia fesoasoani i lona nuu e mafaufau ai i le tulaga o o latou loto. Valaaulia ia tamaiti aoga e faaaoga ni nai minute e suesue ai ma mafaufau loloto i fuaitau o mau o loo lisiina i le pito i luga o le faamaumauga o le tata o le fatu faaleagaga. Uunaia i latou e faailoga ia pusa i le siata e sili ona faamatalaina ai o latou lagona e uiga ia i latou e tusa ai ma fesili i fuaitau taitasi. (Manatua o nisi o mau e silia ma le tasi se fesili.) Talu ai ona o le tulaga patino o lenei gaoioiga, e le tatau ona talosagaina tamaiti aoga e faasoa mai a latou tali i le vasega.
Afai e uma ona faatumuina e tamaiti aoga le faamaumauina o le tata o latou fatu, valaaulia i latou e faitau le leoa le Alema 5:29–31, ma tagai mo nisi fesili. Na talosagaina e Alema le fesoasoani i lona nuu e suesue o latou loto. (Atonu e te manao e fautua atu i tamaiti aoga e toe faaupu laitiiti ia fesili ina ia faatatau ia i latou lava: “Ua tafiesea ea mai ia te au le mataua?” “Pe ua ou faatauemu ea i isi?” “Pe ua ou faasaua ea i isi?”)
Valaaulia ni nai tamaiti aoga e feauauai i le faitauina leotele mai o le Alema 5:17–18, 20–25. Fai atu i le vasega e tagai mo ni mafuaaga e tatau ai ona liua o tatou loto e sauniuni ai mo le aso o le faamasinoga. Fai atu fesili nei e fesoasoani ai i tamaiti aoga ina ia malamalama o le mauaina o se liuga o le loto, ua saunia ai i tatou lava ina ia maua se nofoaga i le malo o le lagi:
-
O a ni upu ma ni fuaitau na faaaogaina e Alema e faamatala ai le tulaga e te fia i ai pe a tu i luma o le Atua e faamasinoina? (Ao tali mai tamaiti aoga i le fesili lenei, atonu e te manao e tatai atu lo latou vaaiga i le Alema 5:16, 19.)
-
E faapefea i le mauaina o se liuga o le loto i le taimi nei ona fesoasoani ia te oe i le mauaina o se nofoaga i le malo o le lagi?
Tusi fesili nei i luga o le laupapa. (Atonu e te manao e tusi fesili i luga o le laupapa ao lei amataina le vasega.)
O le a le mea o loo valaauliaina i tatou e le Alii e fai?
O a ni taunuuga o le taliaina po o le teenaina o lenei valaaulia?
O a ni mea o loo aoao mai e nei mau e uiga i le Faaola?
Fai atu i se tamaitiiti aoga e faitau leotele mai le Alema 5:33–36 ao saili e le vasega atoa ia tali o fesili o loo i luga o le laupapa. Valaaulia ia tamaiti aoga e faasoa mai ni tali sa latou mauaina.
Faaiu i le tuuina atu i tamaiti aoga o ni nai minute e tusitusi ai ni mea. Fai atu ia i latou e filifili se fuaiupu po o se fuaitau mai le Alema 5:1–36. Valaaulia i latou e tusi po o le a se uiga o na fuaiupu po o fuaitau ia i latou ma pe faapefea ona latou faatinoa mea o loo fautua mai ao latou saili e faaliliuina o latou loto e ala i le Togiola a Iesu Keriso. Molimau atu afai e faaauau ai pea ona tatou mauaina se liuga o le loto ma toefuatai mai ia galuega a le amiotonu, o le a tatou saunia e ulu atu i le malo o le Atua.
Tala ma Faamatalaga o Talaaga
Alema 5:14, 26. “Ua oo ea lenei liuga tele i o outou loto?”
Na faamatalaina e Peresitene Ezra Taft Benson o le mauaina “o se liuga tele o le loto” e tele lava ina avea ma se faagasologa faateleina:
“O le avea e faapei o Keriso o se sailiga o le olaga atoa ma e masani lava ona aofia ai le tuputupu ae ma le suia lea e telegese, e toetoe lava a le iloaina. Ua tusia i tusitusiga paia ni tala maoae e uiga i tagata o e na matua liua o latou olaga, i lena lava taimi e pei o: Alema le Itiiti, o Paulo i le ala i Tamaseko, o Enosa na tatalo seia oo i le leva o le po, o le Tupu o Lamonae. O ia faataitaiga ofoofogia o le mana e liua ai, e oo lava i e ua i ai i le loloto o le agasala, e maua le talitonu mautinoa e mafai e le Togiola ona aapa atu i e ua matua atuatuvale lava.
“Ae ao lava ona tatou faaeteete a o tatou talanoaina nei faataitaiga ofoofogia. E ui e moni ma mamana, peitai, o ni aafiaga uiga ese ia ma le masani ai, ae le o se ala masani e tupu mai ai le liua. Aua o Paulo uma, o Enosa uma, ma Tupu Lamonae uma lava, e selau ma selau afe tagata ua latou iloa o le laasaga o le salamo, e sili atu le atamai ma e faifai malie. O lea aso ma lea aso e latou te faalatalata atu ai i le Alii, ma lo latou le iloa moni o loo atiina ae e i latou se olaga faapei o le Atua. Ua ola filemu i latou i ni olaga lelei, ma auauna atu atoa ma le maelega. Ua pei i latou o sa Lamana, o e na fetalai ai le Alii ‘sa papatisoina i le afi ma le Agaga Paia, a ua latou le iloa.’ ( ’ ( 3 Ni. 9:20; faaopoopo faamamafa)” (“O Se Liua Maoae O Le Loto,” Liahona, Mat. 1990, 7).
Alema 5:21–24:27 “E leai se tagata e mafai ona faaolaina sei vagana ai ua tata faasinasina ona ofu”
Na saunoa mai Peresitene Boyd K. Packer o le Korama a Aposetolo e Toasefululua i le auala na ia malamalama ai i le taua o le mama faaleagaga:
“I le sili atu i le 50 tausaga ua mavae i le Taua Lona Lua a le Lalolagi, sa oo ai se mea ia te au ou te manatuaina. Sa aoaoina la matou vaega faapau pomu i Langley Field i Virginia, e faaaoga fausaga fou—o reita. Sa faatonuina i matou e agai atu i le Talafatai i Sisifo ona sosoo ai lea ma le Pasefika.
“Sa aveina i matou i se nofoaafi la’u uta ma ni taavale nofoaafi sa i ai ni moega sipulini lauiti, e mafai ona toso i lalo ma i le puipui i le po. Sa leai ni taavale e aai ai. Na o ni umukuka faatolauapi sa fau i totonu o taavale o nofoaafi ma o fola o ni palapala.
“Sa matou oofu i ni togiga lanu vaivai o le taumafanafana. O le taavale na ave ai atopau, sa le faapipiia i le nofoaafi, ma sa leai ni ofu e sui ai o matou ofu i le malaga sa alu i aso e ono. O le vevela ia o le sopoia atu o Texas ma Arizona. O le asu ma le kasa mai le afi o le nofoaafi, sa matua le lelei lea i le tele o le faigamalaga. Sa leai se mea e taeele pe tata ai o matou ofu togiga. Sa matou o atu i Los Angeles i se tasi taeao—ma a matou togiga foliga eleelea—ma e sa faatonuina i matou e toe foi atu i le nofoaafi i lena afiafi.
“Sa matou mafaufau muamua i meaai. Sa to ifo i fafo e i matou e toasefulu i la matou vaega, a matou tupe ma agai atu i se faleaiga lelei na mafai ona matou maua.
“Sa tumu, o lea sa matou o atu ai ma tutu i se laina umi e faatalitali e nonofo i lalo. O au sa muamua, i tua tonu mai lava o ni tamaitai lavalava lelei. E ui lava e lei faliu mai o ia i tua, ae sa le pine ae iloa e le tamaitai malualii sa i o’u luma o loo ma tutu ai iina.
“Sa faliu mai o ia ma tilotilo mai ia i matou. Ona toe faliu mai lea ma tilotilo mai e amata mai lo’u ulu e oo i o’u vae. Sa ou tutu iina i se ofu togiga susu i le afu, eleelea, lefulefua, ma maanuminumi. Na faapea mai o ia ma se leo inoino, ‘Tafefe e, matua eleelea nei tamaloloa!’ Sa tau fai tilotilo mai uma tagata ia i matou.
“E le tau masalomia na moomoo o ia ina ia matou le i ai iina; sa ou moomoo foi faapena. Sa ou lagona lo’u eleelea aua na ou palapala, ma le lelei la’u faalogona ma sa ou maasiasi.
“Mulimuli ane, ina ia amata ona ou matua suesue i tusitusiga paia, sa ou maitauina ni mau e uiga i le mama faaleagaga. Fai mai le isi fuaiupu, ‘O le a sili atu ona outou pagatia i le mau faatasi ma se Atua paia ma fai mea tonu, i lalo o lo outou iloa lelei o lo outou eleelea i ona luma, nai lo lo outou mau faatasi ma agaga faasalaina i seoli.’[Mamoma 9:4.]
“E mafai ona ou malamalama i lena mea. Ou te manatua se lagona sa ou maua i lena aso i Los Angeles. Na ou manatu faapea, o le eleelea faaleagaga e sili atu ona aumaia ai le maasiasi ma le toilalo e le mafuatia, nai lo so’u lagona i lena taimi. Sa ou maua ni mau—e itiiti ifo ma le valu mau—lea e fai mai e leai se mea eleelea e mafai ona ulu atu i le afioaga o le Atua [tagai 1 Nifae 10:21; 15:34; Alema 7:21; 11:37; 40:26; 3 Nifae 27:19; MF&F 94:9; Mose 6:57]. A o ou iloa o nei mau e itiiti so latou faia ma lavalava eleelea po o lima palapala, ua tonu ia te au ou te manao ia tumau lo’u mama faaleagaga” (“Fufulu Mama,” Liahona, Me 1997, 9).