Lesona 45
Iakopo 3–4
Faatomuaga
I le Iakopo 3, tatou te faitau ai i le faaiuga o le lauga na tuuina atu e Iakopo i lona nuu. Na ofoina atu faapuupuu e Iakopo upu o le faamafanafanaga ma folafolaga i e loto mama. Na ia aoai foi i e faamaualuluga ma ola le mama sa i ai i lona nuu, ma lapataiina i latou i taunuuga o le a oo mai pe afai latou te le salamo. O le Iakopo 4 o loo i ai upu na musuia Iakopo e tusia mo tagata o le a faitau i lana faamaumauga i se aso. Na ia molimau atu e uiga i le Togiola a Iesu Keriso ma apoapoai mai i le au faitau ina ia toe faaleleia i latou lava ma le Atua le Tama e ala i le Togiola. Faatasi ai ma se leo o le lapataiga, na ia taua ai tagata Iutaia o e o le a teenaina Iesu Keriso ma le manino o Lana talalelei.
Fautuaga mo le Aoaoga
Iakopo 3:
Ua faamafanafana ma fautua atu Iakopo ia i latou o e loto mama, ma fautua atu i isi ina ia salamo
Valaaulia tamaiti aoga e mafaufau po o le a se fautuaga atonu latou te mafai ona tuuina atu i tagata o i ai i tulaga nei:
-
O se tamaitai talavou o loo tauivi e ola amiotonu, ae ua mafatia ona o lona tama ua avea le ava malosi ma ana vaisu.
-
O se alii talavou o loo taumafai i le mea sili na te mafaia e ola i le talalelei, ae ua oo i tofotofoga ona ua tete’a ona matua.
-
O se tamaitai talavou o loo taumafai ma le filiga ia alofa i lona aiga, ae o loo faigata ona faatino i le aiga ona o le manatu faapito ma amioga faaloloto a lona uso.
Valaaulia tamaiti aoga e faitau leleoa le fuaiupu muamua o le Iakopo 3:1. Fai atu ia i latou e faailoa mai po o ai o loo talanoa muamua i ai Iakopo i lenei mataupu.
Faamalamalama atu sa tautala sa’o lava Iakopo i tagata o e na tausalaina i agasala o le faamaualuga ma faalefeusuaiga. Ona ia liliu atu lea i tagata amiotonu, o e na oo i tofotofoga ona o le amioleaga a isi. Valaaulia tamaiti aoga e faitau leleoa leIakopo 3:1–2. Fai atu ia i latou e saili mo mea e fa na fai atu ai Iakopo i e loto mama ina ia faia.
-
O a mea e fa na apoapoai atu Iakopo i e loto mama ina ia faia? (“Tepa taulai atu i le Atua ma le mausali o le mafaufau, … tatalo atu ia te ia ma le faatuatua tele, … ia ea ia o outou ulu ma tali le afioga malie a le Atua, ma taumamafa fiafia i lona alofa.”) O le a le mea na folafola atu e Iakopo i e loto mama pe afai o le a latou tumau i le faamaoni? (Faamafanafanaga mai mafatiaga ma le puipuiga mai fili.)
-
O le a le mea tou te manatu e mafai ona tatou faia e talia ai le afioga a le Atua?
I le fesootaiga ma le fesili e uiga i folafolaga na tuuina atu e Iakopo i e loto mama, ia faamautinoa ua malamalama tamaiti aoga faapea o le a faamafanafanaina e le Atua e loto mama i o latou mafatiaga. Atonu e manaomia lou faamalamalamaina atu faapea o le upu faamafanafanaina o lona uiga o le faamafanafana i se tasi o loo faanoanoa pe o atuatuvale. Ina ia fesoasoani i tamaiti aoga e mafaufau loloto ma faaaoga lenei upumoni, ia fesili atu:
-
E faapefea ona faamafanafana oe e le Alii?
-
Sa faapefea ona fesoasoani le tatalo ma le faatuatua ia te oe i se taimi o tofotofoga?
-
O le a se taimi na fesoasoani ai le afioga a le Atua ia te oe e lagonaina Lona alofa?
Faamalamalama atu faapea ina ua mae’a ona saunoa atu i e loto mama, sa toe saunoa atu foi Iakopo ia i latou o e sa lē loto mama.
Valaaulia se tamaitiiti aoga e faitau leotele le Iakopo 3:3–4. Fai atu i le vasega e faailoa po o le a le mea na fautua atu ai Iakopo i ē le loto mama e fai.
-
Faamata o le a le mea e tupu pe ana le salamo le nuu o Iakopo?
Faailoa atu faapea na tau atu e Iakopo sa sili atu ona amiotonu sa Lamana nai lo nisi o sa Nifae i lea taimi. Fai atu i tamaiti aoga e faitau leleoa le Iakopo 3:5–7, ma vaavaai mo auala sa sili atu ai ona amiotonu sa Lamana nai lo nisi o sa Nifae.
-
O a auala na sili atu ai ona amiotonu sa Lamana nai lo nisi o sa Nifae?
-
O a mataupu faavae ua e aoaoina mai le Iakopo 3:7 e uiga i sootaga faaleaiga? (O tane ma ava e tatau ona alofa le tasi i le isi, ma o matua e tatau ona alolofa i a latou fanau.)
-
O a nisi o taunuuga e mafai ona tutupu, pe a le mafai e tagata o aiga ona alofa le tasi i le isi, ma lē faataunuuina o latou tiutetauave faaleaiga?
Fai atu i tamaiti aoga e faitau leleoa le Iakopo 3:10, ma vaavaai mo le lapataiga na tuuina atu faapitoa e Iakopo i tamā o sa Nifae.
-
O le a le lapataiga na tuu atu e Iakopo i tamā o sa Nifae?
-
Aisea e te manatu ai e taua mo tagata o le aiga le faia o faataitaiga lelei e le tasi mo le isi?
Faitau leotele le Iakopo 3:11–12 i tamaiti aoga. Atonu e manaomia lou faamalamalama atu faapea, i le fuaiupu 11, o le fasifuaitau “fafagu mai mafaufau o o outou agaga” e faasino i le manaomia ona ala mai faaleagaga. I le Iakopo 3:12, o le fasifuaitau “faitaaga ma le mataaitu” e faasino i agasala faalefeusuaiga. A o e faitauina nei fuaiupu, faamamafa atu ia “iuga leaga matautia” o agasala faalefeusuaiga. E faaopoopo atu i ai, faamanatu atu i tamaiti aoga folafolaga a Iakopo i e loto mama (tagai i le Iakopo 3:1–2). Fesoasoani i tamaiti aoga ia malamalama o le ala aupito sili e maua ai na faamanuiaga folafolaina, o le taumafai lea ia loto mama i taimi uma. Peitai, o tagata o e ua solia agasala faalefeusuaiga e mafai ona sailia le fesoasoaniga mai lo latou epikopo, po o le peresitene o le paranesi, o e o le a fesoasoani ia i latou ia salamo, avea ma tagata mama e ala i le Togiola a Iesu Keriso, ma maua faamanuiaga ua folafolaina mai i e loto mama.
Iakopo 4
Ua molimau mai Iakopo faapea e ala i le Togiola a Iesu Keriso, o le a mafai ai ona tatou toe faalelei ma le Atua.
A o le i faia le vasega, faapipii se tamai ata o Iesu Keriso i le ogatotonu o le laupapa. I autafa o le ata, ia tusi ai ni nai upu e faailoa ai ni mea e mafai ona tataiese ai tagata mai le Faaola ma Lana talalelei. Mo se faataitaiga, e mafai ona e faaaofia ai nisi o mea lelei—e pei o le aoga, taaloga, ma uo—ia e taua, ae e le tatau ona avea ma taulaiga muamua i o tatou olaga. E mafai foi ona e lisiina isi mea—e pei o ponokalafi, musika le lelei, ma fualaau faasaina—ia e leaga mo o tatou agaga, ma taitai ese ai tatou mai le Faaola.
Fai atu i tamaiti aoga e su’e i le Iakopo 4:14. Faamalamalama atu o lenei fuaiupu o loo aofia ai le fasifuaitau “vaai i tala atu o le faailoga.” Ma aoao mai Elder Neal A. Maxwell o le Korama a Aposetolo e Toasefululua, e faapea i lenei fuaiupu, “o le faailoga o Keriso” (“Jesus of Nazareth, Savior and King,” Ensign, Dec. 2007, 45). Atonu e te manao e uunaia tamaiti aoga e tusi lenei faamatalaga i totonu o a latou tusitusiga paia i autafa o le Iakopo 4:14.
A mae’a ona faasoa atu lenei faamalamalamaga, valaaulia se tamaitiiti aoga e faitau leotele le Iakopo 4:14–15.
-
O le a sou manatu i le uiga o le vaavaai i tala atu o le faailoga? (O le taulai atu o o tatou olaga i se isi mea, e ese mai le Faaola ma Lana talalelei.)
-
E tusa ai ma le tala a Iakopo, o a uiga ma amioga na taofia ai tagata Iutaia mai le taliaina o Iesu Keriso?
Faamalamalama atu faapea, e ui sa faasino patino atu Iakopo i agasala a nisi o tagata Iutaia, ae o nisi o vaega o le Iakopo 4:14–15 e mafai ona faatatau foi ia i tatou, ma e mafai ona avea o se lapataiga mo i tatou. Ina ia fesoasoani i tamaiti aoga ia iloa lenei faatatauga, ia fai atu fesili nei:
-
Aisea e teenaina ai e tagata i nisi taimi “upu manino” ae saili atu mo isi mea e le mafai ona latou malamalama i ai? O a nisi o tulaga matautia o le vaai i tala atu o upumoni faigofie o le talalelei?
-
Faamata o a nisi mea e mafai ona faaopoopo atu i le laupapa, e avea ma nisi faataitaiga o mea e taitaieseina ai tatou mai le Faaola ma Lana talalelei? (Faaopoopo tali a tamaiti aoga i upu ua uma ona e tusiaina i luga o le laupapa.)
Tape upu na e tusiaina i luga o le laupapa ma tusi ai le fesili lenei: O a mea e mafai ona tatou faia ina ia aua ai ne’i tatou vaai i tala atu o le faailoga, ae tumau le taulai atu ia Iesu Keriso?
Tusi mau faasino nei i luga o le laupapa: Iakopo 4:4–5; Iakopo 4:6–7; Iakopo 4:8–9; Iakopo 4:10; Iakopo 4:11–13. Faamalamalama atu o le Iakopo 4, o loo faasoa mai ai e Iakopo ni mataupu faavae ia e mafai ona fesoasoani ia i tatou ina ia taulai atu ai ia Iesu Keriso. Tofi tamaiti aoga e galulue taitoalua ma vaavaai mo nei mataupu faavae i se tasi o fuaitau o mau ua lisiina i luga o le laupapa. (E faalagolago i le aofaiga o tamaiti aoga o lau vasega, atonu e manaomia ona e atofa atua fuaitau taitasi i le sili atu ma le tasi le paga. Pe atonu e manaomia lou fai atu i se paga o tamaiti aoga e faitau ia sili atu ma le tasi le fuaitau.)
A mavae ni nai minute, valaaulia tamaiti aoga e lipoti mai a latou tali. A o latou faia lea mea, atonu e te manao e fai atu ni fesili e fesoasoani ai ia i latou e manatunatu loloto atili e uiga i mea ua latou aoaoina mai fuaiupu. Ina ia fesoasoani ia te oe e taitaia lenei talanoaga, o lea ua faatulaga ai fesili nei e tusa ma fuaiupu atofaina:
-
Iakopo 4:4–5. O faapefea ona fesoasoani molimau a perofeta ia te oe e taulai atu ai ia Iesu Keriso? O faapefea ona faamalosia oe e molimau a isi tagata e uiga i le Faaola? Na faapea mai Iakopo, o le usiusitai o lenei nuu i le tulafono a Mose na aoga i le “faasino atu ai o o [latou] agaga i le” Alii. O a auala e mafai ai e a tatou taumafaiga ia maua sauniga o le perisitua ma tausi poloaiga ona faasino o tatou agaga i le Alii?
-
Iakopo 4:6–7. E faapefea ona fesoasoani ia i tatou faaaliga o loo tuuina mai i perofeta, tatou te maua ai le faamoemoe ma le faatuatua ia Iesu Keriso? O faapefea ona faamalosia lou faatuatua e faaaliga faaletagata lava ia, po o molimau faaleagaga ua e mauaina? Aisea e te manatu ai e taua le manatuaina faapea, ua na o le alofa tunoa lava o le Alii e mafai ai ona tatou faia Lana galuega?
-
Iakopo 4:8–9. Aisea e te manatu ai e taua le iloaina faapea o galuega a le Alii e “silisili ma ofoofogia”? O faapefea e le iloa ai o le galuega a le Faaola, i le avea ai ma Lē Foafoa o le lalolagi, ona aafia ai lau molimau e uiga ia te Ia? O le a le uiga ia te oe, o le “aua le inoino i faaaliga a le Atua”? E faapefea ona tatou faaali atu i le Alii ua tatou faatauaina faaaliga na ia tuuina mai?
-
Iakopo 4:10. O a nisi o faataitaiga o le mafai e se tagata ona “aua le saili e fautuaina le Alii, a ia talia fautuaga mai lona aao”?
-
Iakopo 4:11–13. E pei ona sa taua i le lesona 35, o le upu faaleleia o lona uiga o le aumaia ia ogatusa lelei. E faapefea ona fesoasoani le Togiola e aumai ai i tatou ia ogatusa lelei ma lo tatou Tama Faalelagi? Na faamanatu mai e Iakopo ia i tatou le taua o le aoao atu e uiga i le Togiola, e ala i le fesili, “Aisea tatou te le tautatala ai e uiga i le togiola a Keriso … ?” E faapefea ona tatou mulimuli i lenei mataupu faavae, pe a tatou faasoa atu a tatou molimau i isi ma pe a tatou maua nisi avanoa e aoao atu ai le talalelei? Pe a tatou faasoa atu a tatou molimau, aisea e taua ai le faia o lena mea i se auala o le a malamalama ai tagata? O a auala e fesoasoani ai le Agaga ia i tatou e ausia lenei tulaga?
I le avea ai ma se taunuuga o lenei talanoaga, ia mautinoa ua manino le upumoni lenei: E ala i le Togiola a Iesu Keriso, e mafai ona faatumulia i tatou i le faamoemoe ma faaleleia i tatou lava ma le Atua.
Faasoa atu ou lagona o le agaga faafetai mo le Faaola ma Lana Togiola. Molimau atu o Iesu Keriso o le “faailoga” lea e tatau ona taulai atu i ai o tatou olaga. Ina ia faaiuina le lesona, fai atu i tamaiti aoga e mafaufau i mea o le a latou faia e taulai atu ai i le Faaola i nai aso ia o le a sosoo ai. Atonu e te manao e fautua atu e tusi a latou fuafuaga i totonu o a latou api talaaga mo le suesueina o tusitusiga paia. Mafaufau e valaaulia nisi o i latou e faamatala i le vasega mea ua latou fuafua e fai.
Iloiloga o le Mau Tauloto
O le faisoo [o se mea] e fesoasoani ai i tamaiti aoga e manatua le vaega e maua ai fuaitau o mau tauloto. O se tasi auala e uunaia ai le faia soo, o le faaaogaina lea o kata o mau tauloto (aitema numera 10459; o loo maua foi i se faila PDF i le si.lds.org). Afai e te le o mauaina kata, ia fesoasoani i tamaiti aoga e faia a latou lava kata, e ala i le tusiaina o upu autu mai fuaitau i le tasi itu o le kata, ma le maufaasino i le isi itu. Vaevae taitoalua tamaiti aoga. Tuu atu ia i latou e faaalu ni nai minute e suesueina ai e le tasi le isi i kata. Mo se faataitaiga, e mafai e le tasi tamaitiiti aoga ona faitau upu autu, ae fuafua e le isi po o le a le mau faasino. Valaaulia tamaiti aoga e faaaoga soo nei kata e suesue ai i latou lava ma le tasi ma le isi.
Manatua: O le umi o lenei lesona e mafai ona maua ai se taimi mo lenei gaoioiga o le iloiloga o mau tauloto. E mafai ona e faia le gaoioiga i le amataga o le vasega, e fai ma malologa i va o vaega o le lesona, po o le tuu i le faaiuga o le vasega. Ia faapuupuu le gaoioiga, ina ia lava ai le taimi mo le lesona. Mo isi gaoioiga faaleiloiloga, tagai i le faaopoopoga i totonu o le tusi lesona lenei.
Tala ma Faamatalaga o Talaaga
Iakopo 4:4. Sa molimau mai perofeta o le Feagaiga Tuai e uiga ia Iesu Keriso
E silia ma le 400 tausaga, a o le i fanau mai Iesu Keriso, na saunoa ai Iakopo faapea o perofeta uma lava i luma atu o ia, na molimau e uiga i le Faaola (tagai i le Iakopo 4:4). Atonu e tuufesili nisi pe aisea ua le tele ai ni faamatalaga i le Fegaiga Tuai e uiga ia Iesu Keriso. Na siitia mai e Elder Jeffrey R. Holland o le Korama a Aposetolo e Toasefululua le faamalamalamaga a Nifae e uiga i “vaega ua manino ma sili ona pele” ua “aveese mai” mai le Tusi Paia (tagai i le 1 Nifae 13:26–29) ona matau lea:
“E mautinoa lava o upumoni aupito sili ona manino ma taua o upumoni uma ua leiloloa mai le Tusi Paia, aemaise lava le Feagaiga Tuai, o tautinoga manino ma le le mafaatusalia ia o le misiona a Iesu Keriso, o lana matafaioi muai faauuina o se Mesia ma le Faaola o le lalolagi, ma elemene faalefeagaiga o lana talalelei, ia na aoaoina mai le taimi o Atamu e oo atu i tisipenisione taitasi na sosoo ai. O le mea lea, o le faamoemoega aupito sili ona maualuga o le Tusi a Mamona, o le toefuatai mai lea i le aiga lautele o le Atua o lena malamalama taua o le matafaioi a Keriso i le faaolataga o alii, tamaitai, ma fanau uma o e o loo soifua nei, pe sa soifua, po o le a soifua i luga o le fogaeleele” (Christ and the New Covenant: The Messianic Message of the Book of Mormon [1997], 6–7).
Iakopo 4:5. Tapuai i le Tama i le suafa o Iesu Keriso
O tusitusiga a Iakopo ua tuuina mai ai se malamalamaaga taua e uiga i le tulafono a Mose ma le Feagaiga Tuai. I le Iakopo 4:5, ua tatou aoao ai faapea o perofeta i luma atu o le taimi o Iakopo, na tapuai i le Tama Faalelagi e ala i le suafa o Iesu Keriso, e faaalia ai na latou iloaina o le Tama ma le Alo o ni tagata mavaevae. O upu a Iakopo ua faailoa mai ai faapea o le tulafono a Mose, sa sili atu nai lo le na o se seti o poloaiga malolosi ma tulafono, e pei ona taua e nisi o tagata popoto o aso nei. O le tulafono a Mose ua molimau mai e uiga ia Iesu Keriso, ma sa taitai atu ai e amiotonu i le faapaiaina e ala i Lana Togiola.
Iakopo 4:10. “Talia fautuaga mai lona aao”
Na faamalamalama mai e Peresitene Marion G. Romney o le Au Peresitene Sili le taua o le iloaina ma le mulimuli i le fautuaga a le Alii:
“Ou te le manatu e toatele ni tagata o le Ekalesia e [mulimuli] ma le mautinoa i faatauanauga a tagata po o a latou lava fautuaga, nai lo le faalogo atu i le fautuaga a le Alii. Peitai, pe a tatou le manatunatu i tatou lava po o le a se fautuaga a le Alii, ua tatou tuua i tatou lava e suitulaga e a tatou lava fautuaga Ana fautuaga. O le mea moni, e leai lava se isi mea e mafai ona tatou faia, ae na o lo tatou mulimuli atu i a tatou lava fautuaga, pe a tatou le iloaina faatonuga a le Alii” (“Aua Tou Te Saili e Faatonu Atu i le Alii,” Liahona,, Fep./Mat. 1986, 5).