Lesona 93: Alema 36

Lesona 93

Alema 36

Faatomuaga

Ina ua maea lana misiona i sa Sorama, na fautuaina e Alema ona atalii uma taitoatasi. O lana fautuaga i lona atalii o Helamana o loo maua i le Alema 36 ma le 37. Na molimau atu Alema ia Helamana o le a laveaiina e le Atua i latou o e faalagolago ia te Ia. O le faailoaina atu o lenei upu moni, na faamatala ai e Alema lona aafiaga i tausaga ua mavae ina ua laveaiina o ia mai le tiga o ana agasala e ala i le Togiola a Iesu Keriso. Na ia faamatalaina foi ana taumafaiga e aumaia isi ia Keriso ma le lagonaina o le olioli o le salamo mo i latou lava.

Faaaliga: O le Lesona 94 o loo tuuina atu ai se avanoa mo ni tamaiti aoga se toatolu e aoao atu ai. Afai e te lei faia, atonu e te manao e filifili i le taimi lenei ni tamaiti aoga se toatolu ma tuu atu ia i latou ni kopi o ni vaega ua filifilia o le lesona 94 e mafai ai ona latou saunia. Uunaia i latou e suesue ma le agaga tatalo i anomea o le lesona ma saili le taitaiga a le Agaga Paia ina ia latou iloa ai le auala e fetuunai ai le lesona e tusa ma manaoga o a latou uo aoga.

Fautuaga mo le Aoaoga

Alema 36:1–5

Ua aoao atu e Alema ia Helamana e uiga i le mana o le Atua e laveai ai

Fai i tamaiti e mafaufau e uiga i ni auala lelei na aafia ai i latou e le molimau po o se aoaoga faapitoa a o latou matua. Valaaulia se tamaitiiti se toatasi po o le toalua foi e faasoa mai o laua manatu i le vasega.

Faamatala atu o mataupu 36–42 i le tusi o Alema o loo i ai ni fautuaga mai ia Alema mo ona atalii. Mataupu 36–37 e mo Helamana, mataupu 38 e mo Sepulona, ma le mataupu 39–42 e mo Korianetona.

Uunaia ia tamaiti ina ia vaai faalemafaufau ia i latou lava i le tulaga o Helamana a o ia faalogologo i le molimau a lona tama o i le Alema 36:1–5. Tuu atu i tamaiti e faitau le leoa nei mau, vaavaai mo mea e faagaeetia ai i latou e uiga i le molimau a Alema.

I nei mau, o a mea ua sili ona faagaeetia ai oe? Aisea?

Alema 36:6–22

Na faamatalaina e Alema lona tetee ma faamatalaina le auala na ia maua ai le faamagaloga

Faamatala atu ao molimau atili atu i le mana o le Atua e laveai ai i latou o e faalagolago atu ia Ia, na faasoa mai ai e Alema lona aafiaga o le laveaiina mai le tiga o ana agasala. Fai i tamaiti e suesue i le Alema 36:6–9 ma aotele mai le mea na tupu ia Alema ao latou o atu ma atalii o Mosaea e saili e faaumatia le Ekalesia.

Valaaulia se tamaitiiti aoga e faitau leotele le Alema 36:10. Fai i le vasega e faailoa mai le umi na mafatia ai Alema mo ana agasala. Faamatala atu i le Alema 36:11–17 ua tatou maua ai se faamatalaga sili ona auiliili mai o le mea na oo i ai Alema i aso e tolu ma po e tolu o lona mafatiaga nai lo mea ua tatou maua mai i isi tala e uiga i lona liliu mai (tagai i le Mosaea 27 ma le Alema 38). Tofi tamaiti e galulue i paga. Valaaulia ia paga e suesue i le Alema 36:11–17, vaavaai mo le faaaliga o le fefe po o le tiga o Alema. Atonu e te manao e fautuaina tamaiti e faailoga mea latou te mauaina. Tuu atu i tamaiti e lipoti mai ni upu ma ni fasifuaitau latou te mauaina. (Atonu e te manao e tusiina [upu ma fasifuaitau] i luga o le laupapa.) Atonu e te manao e fai atu fesili nei ina ia faaloloto ai le malamalama o tamaiti e uiga i upu ma fasifuaitau lea sa latou lipotiina mai.

O le a sou manatu o le uiga o lena fasifuaitau (po o upu)? O le a se mea na mafua ai ona lagona faapena Alema?

Ina ia fesoasoani i tamaiti ia malamalama atili i upu ia o le tigaina, atuatuvale, ma le puapuaga, faitau le saunoaga lenei mai ia Peresitene Boyd K. Packer o le Korama a Aposetolo e Toasefululua:

“O le tiga o lona uiga o le ‘mafatia.’ O aso anamua, o se fata sa faaaoga e faataoto ai se tagata mafatia faatasi ma ona tapulima uma ma tapuvae e nonoa i se auvili lea e mafai ai ona faataavili ma mafua ai le tiga e le lavatia.

“O se suotosina o se uamea lea e i ai ni ona tala matuituia. Afai e toso i luga o le palapala, e faapena ona sunui i lalo ma sua a’e ai i luga le palapala. E masani ona ta’u soo mai e tusitusiga paia ia mafaufau ma agaga ua “atuatuvale” i le tausalaina.

“O le puapuaga o lona uiga o le ‘mimilo,’ o se auala e faasalaina ai e matuai tiga e oo lava i tagata le sala e ta’u atu lava se mea latou te le’i faia ina ia faasaoina mai ai” (“O Le Pa’i Mai o le Aao o le Matai,” Liahona, Iulai 2001, 25).

O le a se mea e mafai e le mea na oo ia Alema na aoaoina ai i tatou e uiga i aafiaga o le agasala? (Fesoasoani i tamaiti ia iloa le upu moni lenei: O le agasala e taitaiina atu ai i le tiga maoae, mafatiaga, ma le faanoanoa.)
Pe na foliga mai na aafia Alema i le tiga ma le faanoanoa mo ana agasala i le taimi tonu lava lea na uma ai ona faatinoina ai? Aisea e te manatu ai e taua le iloaina e mafai ona tatou lagonaina ia aafiaga o a tatou agasala i se taimi vave?

Fai i tamaiti e mafaufau i aafiaga lea sa latou lagonaina ai le tiga po o le faanoanoa mo a latou agasala. Ona faitau atu lea o le faamatalaga lea a Peresitene Packer:

“Atonu ua tofu tofo i tatou i le tiga o le lotofuatiaifo e mulimuli mai i a tatou mea sese. …

“Afai o loo mamafa ia te oe lagona faavaivai o le tausalaina, faanoanoa, faatoilaloina, po o le maasiasi, e i ai le fofo” (“O Le Pa’i Mai o le Aao o le Matai,” 25).

Faasino atu e ui na lagonaina e Alema le tiga matuitui ma le lagona faanoanoa mo ana agasala, ae na ia manatuaina le fofo mo lona tiga.

E tusa ma le Alema 36:17, o le a se mea na ia manatuaina?

Tuu atu i se tamaitiiti e faitau leotele mai le Alema 36:18. Valaaulia le vasega e vaavaai mo le mea na faia e Alema e faatino ai ia aoaoga a lona tama. Ina ia fesoasoani i tamaiti ia malamalama atili i nei mau, fai i tamaiti e faitau le saunoaga lenei a Elder Jeffrey R. Holland o le Korama a Aposetolo e Toasefululua:

“Na ootia Alema i aoaoga a lona tama, peitai o le valoaga na ia manatuaina lea na matuai taua lava o le valoaga lea e faatatau ‘i le afio mai o se tasi o Iesu Keriso, o se Atalii o le Atua, e togiola mo agasala a le lalolagi’. (Alema 36:17.) O le igoa ma le savali lena e tatau ona faalogo i ai tagata uma. … Po o a lava isi tatalo tatou te tuuina atu, po o a lava isi manaoga o ia i tatou, e faalagolago uma lava i lena aioiga: ‘Iesu e, o le Alo o le Atua, ia alofa mutimutivale mai ia te au.’ Ua saunia o Ia e tuuina mai lena alofa mutimutivale. Na Ia totogiina i lona lava ola ina ia mafai ona tuuina mai” (However Long and Hard the Road [1985], 85).

Aisea e te manatu ai e taua mo i tatou e le gata i le aoao e uiga ia Iesu Keriso ae ia ole atu foi mo faamanuiaga o Lana Togiola?

Uunaia ia tamaiti e mafaufau le leoa pe sa latou tatalo ina ia maua faamanuiaga o le Togiola a Iesu Keriso, e aofia ai le faamanuiaga o le faamagaloga.

Fai i tamaiti e suesue le leoa i le Alema 36:19–22, vaavaai mo upu ma fasifuaitau lea e faamatalaina ai le auala na suia ai lagona o Alema ina ua uma ona ia tatalo mo le alofa mutimutivale.

O a upu po o fasifuaitau na e mauaina o loo faamatala ai le auala na suia ai lagona o Alema?

Fai atu le fesili lenei e uiga i upu ma fasifuaitau taitasi ia na mauaina e tamaiti:

O le a se mea o aoao mai ia te oe e lena fasifuaitau (po o upu) e uiga i le mana o le Togiola a le Faaola? (A o tali mai tamaiti, fesoasoani ia i latou ia iloa e le gata na aveesea tiga o Alema, ae na faatumulia foi o ia i le fiafia.)

Tusi le fuaiupu lea e le i maea i luga o le laupapa: Afai tatou te faaaogaina le faatuatua ia Iesu Keriso ma Lana Togiola, o le a Ia …

Mai le aafiaga o Alema, o le a se mea tatou te aoao mai ai e uiga i le mea e faia e le Alii mo i tatou pe a tatou salamo ma le faamaoni? (Atonu e eseese matupu faavae e faasoaina e tamaiti, peitai ia mautinoa o loo latou faaalia mai afai tatou te faaaogaina le faatuatua ia Iesu Keriso ma Lana Togiola, o le a Ia laveaiina i tatou mai le tiga o a tatou agasala ma faatumulia i tatou i le fiafia. Atonu e te manao e faamaea le faamatalaga o loo i luga o le laupapa.)
O le a se mea e mafai ona tatou faia e faaaoga ai le faatuatua ia Iesu Keriso ina ia mafai ona laveaiina i tatou mai lagona o le tiga po o le faanoanoa e mafua mai ona a tatou agasala?

Faitau leotele le tulaga lenei, ma fai i tamaiti e mafaufau pe faapefea ona latou tali mai:

O se uo o loo faitauina le Tusi a Mamona na faaalia le popole i upu a Alema o i le Alema 36:19. Na fesili atu lau uo ia te oe, “Afai e mafai ona ou manatuaina au agasala ma lagonaina pea le faanoanoa i ai, o lona uiga la e lei faamagaloina au?”

Fai i tamaiti e faamatala mai pe faapefea ona fesootai ia aafiaga o Alema ma le mea lenei. A uma ona tali mai tamaiti, faitau le saunoga lenei mai ia Peresitene Dieter F. Uchtdorf o le Au Peresitene Sili:

“O le a taumafai Satani e faatalitonu i tatou e le faamagaloina a tatou agasala aua e mafai ona tatou manatuaina. O Satani o le pepelo; e taumafai o ia e faapuaoa la tatou vaaiga ma taitai ese mai ai i tatou mai le ala o le salamo ma le faamagaloga. E lei folafola mai le Atua faapea, o le a tatou le manatuaina a tatou agasala. O le manatuaina o le a fesoasoani ia i tatou e aloese mai ai i le toe faia o mea sese lava na. Peitai, afai tatou te tumau i le moni ma le faamaoni, o le a oo ina manifinifi le manatua o a tatou agasala. O le a avea lena ma vaega o le faagasologa o le faamalologa ma le faapaiaga o loo manaomia. Na molimau mai Alema ina ua uma ona ia alaga atu mo le alofa mutimutivale o Iesu, sa mafai lava ona ia manatuaina ana agasala, peitai o le manatuaina o ana agasala sa le toe faaatuatuvale ma pagatia ai o ia, aua sa ia iloa ua faamagaloina o ia (tagai Alema 36:17–19).

O lo tatou tiutetauave le aloese mai soo se mea e toe aumaia ai le manatua o agasala ua leva. A faaauau pea lo tatou maua o se ‘loto momomo ma le agaga salamo’ (3 Nifae 12:19), e mafai ona tatou talitonuina o le a le ‘toe manatuaina lava [a tatou agasala] e le Atua’” (“Vaega Tonu o le Toe Foi Saogalemu,” Ensign po o le Liahona, Me 2007, 101).

E tusa ma le saunoaga a Peresitene Uchtdorf, e faapefea ona e faamatalaina le uiga o le “atuatuvale e ala i le le toe manatuaina o a [tatou] agasala”? (Alema 36:19).

Molimau atu afai tatou te faaaogaina le faatuatua ia Iesu Keriso ma Lana Togiola, o le a Ia laveaiina i tatou mai le tiga o a tatou agasala ma o le a faatumulia i tatou i le fiafia. Uunaia tamaiti e mafaufau i le auala latou te ono faatatau ai mea sa latou aoaoina mai le mea na oo ia Alema. Afai e lava se taimi, tuu i le vasega e usu le pese, “O Fea Lo’u Filemu?” (Viiga, nu. 68).

Alema 36:23–30

Ua faamatala e Alema le mafuaaga ua ia galue ai ma le le taofia ina ia aumai isi i le salamo.

Ina ia fesoasoani i tamaiti ia malamalama i le mafuaaga na galue ai Alema e aumai isi i le salamo, mafaufau e faaaoga le gaoioiga lenei. (Afai e le mafai ona saunia ni meaai mama mo lau vasega, a le o lena e mafai ona e faamatalaina le gaoioiga.)

Faaali atu se meaai mama (e pei o se kuki po o se fasi lole) ma fesili atu pe i ai se tagata i le vasega e fiafia i lenei ituaiga meaai. Tago e u, ma faailoa atu le manaia o le meaai. Tau atu i le vasega e matuai manaia lava o le meaai ma e te fia faasoaina atu i le vasega atoa. Faaali atu nisi meaai o lea lava ituaiga, ma fesili atu pe i ai nisi e fia tofo i ai. Faasoa atu le meaai i tagata uma o e fia mananao i ai.

Valaaulia se tamaitiiti aoga e faitau leotele le Alema 36:23–24. Fai i le vasega e mulimuli i le faitauga, vaavaai pe faapefea ona fesootai le gaoioiga o le tofoina o le meaai ma le aafiaga a Alema ina ua mavae lona liliu mai.

Na faapefea ona tai tutusa ia galuega a Alema ma le gaoioiga o le tofoina o le meaai? O le a se mea na manao Alema e tofo i ai isi tagata?

Valaaulia se tamaitiiti aoga e faitau leotele le Alema 36:25–26. Fai i le vasega e faailoa mai pe na faapefea ona faatosinaina o ia faapea ma isi i taumafaiga a Alema e aoao atu le talalelei.

Na faapefea ona faatosinaina o ia faapea ma isi i aoaoga a Alema?
O a mataupu faavae e mafai ona tatou aoaoina mai nei fuaiupu?(E mafai ona eseese upu e faaaoga e tamaiti, ae ia mautinoa latou te faailoa mai e mafai ona tatou maua le olioli sili a o tatou saili e aumai isi ia Keriso.)

Aotele le Alema 36:27–30 e ala i le faamatala atu faapea na toe molimau atu Alema ia Helamana o le a laveaiina e le Alii i latou o e faalagolago atu ia te Ia. Molimau atu i le fiafia tatou te mauaina ao tatou faaaogaina le faatuatua ia Iesu Keriso ma ao tatou uunaia isi e faia foi faapea. Ina ia fesoasoani i tamaiti e faaaoga mea sa latou aoaoina mai le Alema 36, fai atu i ai latou e faatino se tasi o gaoioiga o i lalo. (Atonu e te manao e tusi mea nei i luga o le laupapa.)

Mafaufau pe na e lagona na laveai oe e le Faaola mai le agasala ma faatumulia oe i le fiafia. I totonu o lau api talaaga mo le suesueina o tusitusiga paia, faaamatala le mea o le a e faia ina ia e maua ai nei faamanuiaga.
Mafaufau i se tagata (e pei o se uo, tei, po o se tagata o le uarota) atonu o le a manuia i lau molimau e uiga i le Faaola. Tusi se tusi i lenei tagata ma faaaofia ai lau molimau i le auala e mafai ona laveai ai i tatou e Iesu Keriso mai le tiga o le agasala ma faatumulia i tatou i le fiafia.

Tala ma Faamatalaga o Talaaga

Alema 36:12. “Ona sa … lo’u agaga … ma falo tigaina i au agasala uma”

Na aoao mai Elder Dallin H. Oaks o le Korama a Aposetolo e Toasefululua faapea o nisi vaega o le mafatia ai mo a tatou agasala o se vaega taua lea o le salamo:

“E manaomia e le faamasinoga tonu le tagata agasala e lē salamo e mafatia mo ana lava agasala [tagai MF&F 19:16–19]. …

“… Ae a tagata agasala ua salamo? E faasalaina i latou? E tatau ona latou mafatia? …

“… O le tagata e salamo e le manaomia ona ia mafatia ‘e pei’ o le Faaola lea na mafatia mo lena agasala. O tagata agasala o e o loo salamo o le a lagonaina nisi o mafatiaga, peitai, talu ai ona ua latou salamo ma talu ai ona o le Togiola, o le a latou le tofo i tulaga ‘silisili’ ona oona o le faatiga e faavavau lea na oo i ai le Faaola ona o lena agasala.

“Na saunoa mai Peresitene Spencer W. Kimball, o le sa ia tuuina atu aoaoga manino faapena e uiga i le salamo ma le faamagaloina, o le puapuagatia patino ‘o se vaega taua naua o le salamo. E le amataina e se tasi ona salamo seiloga ua matua puapuagatia o ia mo ana agasala’ (Aoaoga a Spencer W. Kimball, i. 88).

“‘Afai e lei puapuagatia se tagata, e lei salamo o ia.… E tatau ona i ai se suiga i lona tagata lea na te puapuagatia ai ona mafai lea ona faamagaloina’ (Aoaoga a Spencer W. Kimball, i. 99).

“O mea patino uma tatou te oo i ai ua faamaonia mai ai le mea moni e tatau ia i tatou ona onosaia puapuaga patino i le gasologa o le salamo—ma mo solitulafono mamafa, ma o lena puapuaga e mafai ona mamafa ma faafualoaina. Ou te talitonu o tatou uma lava o le e faamaoni ia te ia lava o le a iloa le moni o lenei mataupu faavae. Ua tatou lagonaina i o tatou lava olaga, ma ua tatou vaaia i olaga o isi.

“E tatau foi ona tatou matauina o o tatou puapuaga faaletagata lava ia mo se agasala e patino, e le faalauaiteleina. E masani lava e na o le tagata solitulafono ma le Alii ma le auauna a le Alii e silafia le mea o loo tupu. E ese mai ai i le natura lautele o le faasalaga e tuuina atu e ala i tulafono a tagata, o le puapuagatia lea e oo atu ai i le alofa mutimutivale i lalo o le tulafono a le Atua e matuai patino lava” (“Sins, Crimes, and Atonement” [lauga i faiaoga faalelotu a le OAE , Fep. 7, 1992], 4–6,si.lds.org).

Alema 36. Fefulisa’iga

O le fefulisaiga (e ta’ua i nisi taimi o se faatusatusaga le tutusa) o se masani faitau lea e masani ona faaaoga i vaitaimi anamua i solo faaSemeti ma le faaEleni faapea foi ma tusi a isi aganuu. I le fefulisaiga, e faatulagaina upu po o manatu i se faatulagaga faapitoa ona toe faatulaga lea i le faasologa sese. O lenei toe faiga e faamamafa atu ai ia manatu ma upu e taua. O le manatu autu a le tusitala e masani lava ona i ai i le ogatotonu o le fefulisaiga. I le siata o i lalo, matau mai o le savali autu o le fefulisaiga i le Alema 36 o loo taulai atu i se vaitaimi o le olaga o Alema ina ua ia liliu atu ia Iesu Keriso mo se laveai.

A. fuaiupu 1
 E. fuaiupu 2
  I. fuaiupu 3
   O. fuaiupu 4–5
    U. fuaiupu 6
     F. fuaiupu 10
      G. fuaiupu 14
       L. fuaiupu 16
        M. fuaiupu 17
        M. fuaiupu 18
       L. L.fuaiupu 19–21
      G. fuaiupu 22
     F. fuaiupu 23
    U. fuaiupu 24
   O. fuaiupu 26
  I. fuaiupu 27
 E. fuaiupu 28–29
A. fuaiupu 30