Lesona 119: 3 Nifae 8–10

Lesona 119

3 Nifae 8–10

Faatomuaga

I le tolusefulu-tolu tausaga talu ona mavae le vaaia o faailoga o le soifua mai o le Faaola, na amata ai e sa Nifaē ona saili mo le faailoga na valoia e Samuelu le sa Lamanā, o le maliu o le Faaola. E ui sa tele faailoga na tuuina mai, ae na tulai mai masalosaloga ma fevaevaeaiga i le va o tagata. I totonu o le tausaga na sosoo ai, na faataunuuina ai le valoaga a Samuelu. Ina ua mavae afā tetele, mafuie, ma isi mafatiaga na mafua ai le faaumatiaga tele, na ufitia le laueleele i le pouliuli mo aso e tolu aso. I totonu o le pouliuli, o tagata na faasaoina mai le faatafunaga na latou faalogoina le siufofoga o Iesu Keriso. Na Ia valaaulia i latou ina ia salamo ma foi mai ia te Ia. Ina ua alu ese le pouliuli, na liua le auega a tagata i le olioli ma viiga ia Iesu Keriso.

Fautuaga mo le Aoaoga

3 Nifae 8:1–18

O le faatafunaga tele na faailo mai ai le maliu o Iesu Keriso, ma faataunuu ai le valoaga a Samuelu le sa Lamanā

Amata le vasega e ala i le fai atu o fesili nei:

Pe o e iloaina ea ni faailoga ua uma ona faataunuuina, ia o loo faaalia ai ua latalata le Afio Mai Faalua o le Faaola? (Atonu e te manao e faamanino atu faapea e tele valoaga, e pei o le Toefuataiga o le talalelei, o le oo mai o le perofeta o Elia, ma le talaiina atu o le talalelei i le lalolagi atoa, ua uma ona faataunuuina pe ua faapea ona faataunuuina.)
O le a sou lagona ina ua e iloaina se mea e manino e pei o le faailoga o le Afio Mai Faalua o le Faaola ua latalata mai lava?

Faamatala atu faapea, ua tatou ola i se taimi e talitutusa ma le taimi, a o le’i toe mamao ona asiasi atu lea o Iesu Keriso ia sa Nifaē. E faapei lava ona vaavaai atu le au sa Nifaē mo faailoga na valoia e Samuelu le sa Lamanā faapea o le a faailo mai ai le maliu ma le Toetu o Iesu Keriso, e tatau foi ona tatou vaavaai atu mo faailoga o le Afio Mai Faalua o le Faaola.

Valaaulia tamaiti aoga e faitau lē leoa le 3 Nifae 8:3–4 ma faailoa mai eseesega o lagona o nisi o le au sa Nifaē e uiga i faailoga. Fai atu i tamaiti aoga e lipoti mai mea ua latou mauaina. (E ui ina sa tulimatai atu tagata mo faailoga “ma le naunautai tele,” sa faapea ona i ai ia i latou “masalosaloga ma finauga tetele.)

O a auala e tutusa ai le mea o loo faamatalaina i le 3 Nifae 8:3–4 ma tulaga i le lalolagi i aso nei?
E mafai faapefea ona tatou faamalolosia lo tatou faatuatua ia Iesu Keriso e tusa lava pe o le toatele o loo siomia i tatou o loo faaalia le masalosalo?

Fesili atu i tamaiti pe ua latou feagai ea ma se afa matautia, mafuie, po o se isi faalavelave matautia. A o tali mai tamaiti aoga, valaaulia i latou e faasoa mai lagona na latou mauaina i le taimi o le faalavelave, ma le mae’a ai.

Valaaulia se tamaitiiti aoga e faitau leotele le 3 Nifae 8:5–7. Fai atu i le vasega e mulimuli i le faitauga, ma vaavaai mo mea na tutupu i le tausaga lona 34 ina ua mavae le soifua mai o Iesu Keriso. Ona valaaulia lea o tamaiti e faitau lē leoa le 3 Nifae 8:8–18 ma vaavaai mo mea na tutupu i tagata na nofoia ia aai. Tuu le avanoa i tamaiti e lipoti mai ai mea ua latou mauaina. Faamanatu atu i tamaiti faapea, o Samuelu le sa Lamanā na valoiaina nei mea (tagai i le Helamana 14:20–27). Faamamafa atu faapea o saunoaga a perofeta o le a faataunuuina uma lava ma faapea o le a faamasinoina e le Atua le au amioleaga mo a latou gaoioiga.

3 Nifae 8:19–25

Ua ufitia le laueleele i le pouliuli mo aso e tolu

Faamalamalama atu faapea, ina ua mavae afa ma mafuie, ona ufitia lea o le laueleele e le pouliuli mo aso e tolu. Tapē molī o le potu mo sina taimi. Ona fesili atu lea i tamaiti, pe na i ai se taimi na latou i ai ai i totonu o se nofoaga matuā pogisā lava, e pei o se ana, po o se potu e leai ni faamalama.

O le a se lagona na e mauaina, a o e i ai i lena nofoaga?

Faamanino atu faapea, o le pouliuli na ufitia ai le laueleele mo aso e tolu, na ese lava mai le pouliuli e o’o mai pe a tatou tapēina molī, pe o atu i se nofoaga e leai ni faamalama. Fai atu i tamaiti e faitau lē leoa le 3 Nifae 8:19–23 ma vaavaai mo fuaitau o loo faamatala ai le pouliuli na o’o ia sa Nifaē. (O tali atonu e aofia ai le “pouliuli mafiafia,” “ausa o le pouliuli,” “ao o le pouliuli,” ma le “leai se malamalama.”)

Fai atu i tamaiti e faitau lē leoa le 3 Nifae 8:23–25 ma vaavaai mo le aafiaga na i ai tagata sa Nifaē o e na faasaoina mai le faatafunaga, ona o le pouliuli. Tuu atu i tamaiti e lipoti mai mea ua latou mauaina.

3 Nifae 9:1–14

I le pouliuli, ua valaaulia ai e Iesu Keriso i latou o e na faasaoina mai le faatafunaga ina ia salamo ma o mai ia te Ia

Tusi fesili nei i luga o le laupapa: Valaaulia tamaiti e faitau lē leoa le 3 Nifae 9:1–12 ma vaavaai mo tali i fesili nei.

Aisea na tupu ai lenei faatafunaga?

Na faapefea ona tali atu Satani i lenei faatafunaga?

O le a le mea ua aoao mai e lenei tulaga e uiga ia Satani, ma le auala na te faia ai i latou o e mulimuli ia te ia?

Faitau leotele le 3 Nifae 9:13–14 i le vasega. Fai atu i tamaiti e mulimuli i le faitauga, ma vaavaai mo le valaaulia a le Faaola ia i latou o e na faasaoina mai le faatafunaga. Fai atu i tamaiti e vaai faalemafaufau i na tagata sa Nifaē, o faalogologo atu i le siufofoga o le Faaola i le pouliuli. Na “faasaoina [i latou] ona sa sili atu lo latou amiotonu nai lo” i latou o e na faaumatiaina, peitai sa manaomia pea lava ona latou salamo ma suia (tagai i le 3 Nifae 9:13; 10:12).

Faamata o le a sou manatu i le mea na lagonaina e sa Nifaē, ina ua latou faalogoina lenei valaaulia mai le Faaola? Aisea?

Valaaulia se tamaitiiti e faitau le faamatalaga lenei mai ia Elder C. Scott Grow o le Fitugafulu:

“O Iesu Keriso o le Fomai Sili o o tatou agaga. …

“A tatou faia le agasala, e ta’u mai e Satani ua le toe aoga i tatou. I se eseesega, ua ofo mai e lo tatou Togiola le faaolataga mo tagata uma—e tusa lava po o le a le mea sese ua tatou faia—o lena ofo e mo oe ma au ” (“O Le Vavega o le Togiola,” Ensign po o le Liahona, Me 2011, 109).

Faamautu atu faapea o le valaaulia a le Faaola o loo i le 3 Nifae 9:13—ina ia o mai ia te Ia ma ia faamaloloina—o loo faalauaitele mai ia i tatou taitoatasi. Ina ia mafai e le Faaola ona faamaloloina i tatou, e ao ona tatou talia Lana valaaulia e o mai ia te Ia, salamo mai a tatou agasala, ma ia liuaina. Fai atu i tamaiti e manatunatu e uiga i vaega o o latou olaga lea latou te manaomia ai le faamalologa a le Faaola. Ona valaaulia lea o i latou e tali mai fesili nei i totonu o a latou api po o api talaaga mo le suesueina o tusitusiga paia:

O le a le mea e manaomia ona e faia ina ia mafai ai e oe ona maua le faamalologa a le Faaola i lou olaga?

3 Nifae 9:15–22

Ua folafola mai e le Faaola faapea e ala i Lana taulaga, ua faataunuuina ai le tulafono a Mose

Faitau leotele le 3 Nifae 9:19. Fai atu i le vasega e mulimuli i le faitauga, ma vaavaai mo mea na fetalai Iesu Keriso o le a Ia lē toe taliaina mai tagata sa Nifaē. Atonu e manaomia le toe faamanatu atu i tamaiti faapea o tagata sa Nifaē sa ola i le tulafono a Mose i lea taimi. I le avea ai o se vaega o le tulafono a Mose, na poloaiina ai e le Alii Lona nuu e osi atu taulaga i manu, o se ituaiga ma le faaataataga o le taulaga o le a ofoina mai e le Faaola, e ala i Lana Togiola.

Valaaulia tamaiti e faitau lē leoa le 3 Nifae 9:20 ma vaavaai mo mea na fetalai le Faaola ina ia ofoina atu e tagata sa Nifaē i le taimi nei, e fai ma taulaga. Tuu atu i tamaiti e lipoti mai mea ua latou mauaina.

O le a sou manatu i le uiga o le osi atu o se taulaga “o le loto momomo ma le agaga salamo?
O a faamanuiaga ua folafola mai e le Faaola ia i latou o e ō mai ia te Ia ma se loto momomo ma le agaga salamo?

Faamalamalama atu faapea, na aoao mai e Elder D. Todd Christofferson o le Korama a Aposetolo e Toasefululua, se tasi auala e manatunatu ai e uiga i fuaitau o le “loto momomo” ma le “agaga salamo.” Faitau le faamatalaga lenei, ma fai atu i tamaiti e faalogologo mo upu na faaaoga e Elder Christofferson, e fesoasoani ai ia i tatou ia malamalama i nei fuaitau:

Ata

Elder D. Todd Christofferson

“E mafai ona e ofoina atu i le Alii le meaalofa o lou loto momomo po o le loto salamo, ma lou agaga nutimomoia, po o le agaga usitai. O le mea moni lava, o le ofoina atu lea o oe lava—po o le a lava le tulaga o e i ai ma pe o le a foi le ituaiga tagata ua avea ai oe.

“Pe o i ai ea se mea i lou olaga e le o mama, pe le o agavaa? Pe a mafai ona e lafoa’ia, o se meaalofa lena i le Faaola. Pe o i ai ea se mausa lelei po o se uiga tausaafia e le o maua i lou olaga? Pe afai e te taliaina ma avea o se vaega o lau amio, ua e avatua se meaalofa i le Alii” (“Pe a Liua Mai Oe” Ensign po o le Liahona, Me 2004, 12).

O le a le upu na faaaoga e Elder Christofferson, e fesoasoani ai ia i tatou ia malamalama i le fuaitau “loto momomo”? (Salamo.) O le a le uiga o le i ai o se loto salamo?
O le a le upu na faaaoga e Elder Christofferson e fesoasoani ai ia i tatou ia malamalama i le fuaitau “agaga salamo”? (Usiusitai.) Faamata e faapefea ona e faamatalaina se tagata ua i ai se agaga usiusitai?

Fai atu i tamaiti e faitau lē leoa le 3 Nifae 9:21–22 ma vaavaai mo le faamatalaga a le Faaola, o le auala e tatau ona tatou o mai ai ia te Ia. Tuu atu ia i latou e lipoti mai mea ua latou mauaina. Ia tuu i luga se ata o se tamaitiiti laitiiti, atonu o se tasi mai lou aiga.

E faapefea ona e vaai faalemafaufau i se tamaitiiti o sau i le Faaola? E faapefea ona fesoasoani lena mea ia te oe, ia malamalama ai i le auala e tatau ona tatou o mai ai i le Faaola?

Tusi le faamatalaga lenei i luga o le laupapa:

Pe a tatou o mai ia Keriso ma se loto momomo ma le agaga salamo, o le a Ia …

Fai atu i tamaiti e iloilo le 3 Nifae 9:13–15, 19–22 ina ia faailoa ai auala e faauma ai le faamatalaga o loo i luga o le laupapa. Valaaulia i latou e lipoti mai mea ua latou mauaina. O tali atonu e aofia ai le faapea, o le a Ia faamaloloina i tatou (tagai i le 3 Nifae 9:13), tuu mai ia i tatou le ola e faavavau (tagai i le 3 Nifae 9:14), ma taliaina i tatou (tagai i le 3 Nifae 9:22). A mae’a ona tali mai tamaiti, faauma le faamatalaga o loo i luga o le laupapa: Pe a tatou o mai ia Keriso ma se loto momomo ma le agaga salamo, o le a Ia taliaina i tatou, faamalolo i tatou, ma tuu mai ia i tatou le ola e faavavau.

3 Nifae 10

Ua ofo mai le Alii o le a Ia faapotopoto Lona nuu e faapei o se matuamoa ona ofaofata’i i lana toloai

Otooto le 3 Nifae 10:1–3 e ala i le faamalamalama atu faapea, ina ua mae’a ona faalogoina le siufofoga o le Faaola, na matuā taufaiofo tagata ma sa leai se pisa mo le tele o itula. Ona Ia toe fetalai mai lea i tagata.

Valaaulia ni nai tamaiti aoga e feauauai i le faitauina leotele mai o le 3 Nifae 10:4–6. Faamanino atu faapea i totonu o nei fuaiupu, o loo fetalai mai ai le Alii i le aiga o Isaraelu, Lona nuu o le feagaiga.

O a auala ua pei ai le Faaola o se matuamoa o loo puipuia lana toloai mai tulaga matautia? Aisea na lē faapotopotoina ma puipuia ai e le Alii le aiga uma o Isaraelu? (Sa le’i o mai i latou ia te Ia.)
O le a le mea na folafola atu e le Faaola ia i latou, o ē o le a salamo ma foi mai ia te Ia? (O le a Ia faapotopotoina i latou faapei o se matuamoa ona faapotopoto i lana toloa’i.)

Fai atu i tamaiti aoga e tali mai le fesili lenei i totonu o a latou api po o api talaaga mo le suesueina o tusitusiga paia. (Atonu e te manao e tusi le fesili lenei i luga o le laupapa pe faitau lemū, ina ia mafai e tamaiti ona tusi i lalo.)

O anafea na e lagonaina ai le valaaulia a le Faaola e talia Lana tausiga ma le puipuiga?

Valaaulia se tamaitiiti aoga e faitau leotele le 3 Nifae 10:9–11. Fai atu i le vasega e mulimuli i le faitauga, ma vaavaai mo mea na tutupu ina ua mae’a ona fetalai atu le Faaola i tagata. Atonu e te manao e faai’u e ala i le molimau atu faapea, e alofa mutimutivale le Faaola ia i latou uma o e o mai ia te Ia ma se loto momomo ma se agaga salamo. Atonu foi e te manao e faamalamalama atu faapea i le lesona e sosoo ai, o le a talanoaina ai e tamaiti aoga le asiasiga a le Faaola i tagata, ma le ala na Ia auauna patino ai ia i latou taitoatasi.

Tala ma Faamatalaga o Talaaga

3 Nifae 9:2. “Ua ata le tiapolo, ma olioli ana agelu”

Na aoao mai Elder Robert D. Hales o le Korama a Aposetolo e Toasefululua e uiga i le tali a le tiapolo pe a tatou agasala:

Na paʼū Atamu ina ia i ai tagata; ma ua i ai tagata, ina ia latou maua le olioli.2 Nifae 2:25

“O nisi taimi e galo ai ia i tatou e finagalo lo tatou Tama Faalelagi ina ia tatou tofu maua uma lenei olioli. E na o le gauai atu i faaosoosoga ma le agasala tatou te le maua ai lena olioli. Ma o le gauai atu o le mea tonu lena e manao Satani ia tatou faia.

“Na i ai se taimi na ou maua ai se avanoa ma te o faatasi ai ma Peresitene Spencer W. Kimball i se atunuu mamao lava. Na ma maua se maimoaga taamilo i nofoaga eseese i le eria, na aofia ai le ana e i ai tuugamau—o fanua maliu o tagata o e na faasalaina e le au mateletele i le faa-Kerisiano. A o ma o a’ea’e atu i luga o na faasitepu vaiti, pogisa o lena nofoaga, na aoaoina au e Peresitene Kimball i se lesona e le mafaagaloina. Na ia tosoina le pito o lo’u peleue ma faapea mai, ‘Ou te popole lava i taimi uma i mea e faia e le tiapolo e faaaoga ai le suafa o lo tatou Faaola.’ Ona ia faapea mai lea, ‘Robert, e le mafai ona maua e le tiapolo le fiafia vagana ua e agasala ma ou agasala.’

“A o ou mafaufau i lenei manatu ma suesue i tusitusiga paia, na amata ona ou malamalama i le uiga o le saunoaga a Peresitene Kimball. O a tatou agasala e ataata ai le tiapolo; o o tatou faanoanoaga e maua ai e ia le olioli taufaasese.

“E ui lava ina ataata le tiapolo, ae e tapulaa lona mana. Atonu e manatua e nisi se faaupuga ua leva: ‘O le tiapolo na ou faia ai.’ O le asō, ou te fia ta’u atu ai, i ni upu moni a’ia’i e faapea, e le mafai e le tiapolo ona faamalosi i tatou e fai se mea. E taoto o ia i o tatou faitotoa, e pei ona fai mai ai tusitusiga paia, ma e mulimuli mai o ia ia i tatou i aso taitasi. Soo se taimi lava tatou te o atu ai i fafo, soo se filifiliga tatou te faia, tatou te filifili pe agai atu i lana itu, po o le itu a lo tatou Faaola. Ae e tatau lava ona aluese le tiapolo pe a tatou fai atu ia te ia e aluese. E le mafai ona ia uunaia i tatou seiiloga tatou te faatagaina o ia, ma ua ia iloa lena mea! Na pau le taimi e mafai ona ia faaaafiaina ai o tatou mafaufau ma tino—o o tatou lava agaga—pe a tatou faatagaina o ia e fai. I se isi faaupuga, e le manaomia ona tatou gauai atu i ana faatosinaga!” (“E Filifili Mo I Tatou Lava: O Le Meaalofa ma Faamanuiaga o le Saolotoga,” Ensign po o le Liahona, Me 2006, 5–6).

3 Nifae 9:19–20. “O le loto momomo ma le agaga salamo”

Na faamatalaina e Elder Neal A. Maxwell o le Korama a Aposetolo e Toasefululua le uiga o le ofoina atu i le Alii se loto momomo ma se agaga salamo:

“O le osigataulaga moni a le tagata lava ia, sa lē o le tuuina o se manu i luga o le fatafaitaulaga. Nai lo lena, o se naunautaiga e tuu le manu o loo i totonu o i tatou i luga o le fatafaitaulaga ina ia faamuina! O le ‘taulaga lena i le Alii … o se loto momomo ma le agaga salamo’ (MF&F 59:8)” (“Ia Teena e Outou le Amioletonu Uma,” Liahona, Iulai 1995, 73).