Lesona 85
Alema 23–24
Faatomuaga
Ina ua mavae lona liua, na folafola atu e le tupu o sa Lamana le saolotoga faalelotu i lona nuu. O lenei folafolaga na faatagaina ai Arona ma ona uso e talai atu le talalelei ma faatuina ni lotu i totonu o aai o sa Lamana. E faitau afe sa Lamana na faaliliuina ma sa lei toe pauu ese lava. Na osifeagaiga nei sa Lamana na faaliliuina latou te tuu i lalo a latou auupega o le taua, ma sa latou faailoga ese i latou lava mai sa Lamana ia e lei faaliliuina e ala i le faaigoaina o i latou o Aneti-Nifae-Liae. Ina ua osofaia i latou e tagata sa Lamana e lei faaliliuina, na ositaulaga e nisi o Aneti-Nifae-Liae o latou ola ina ia tausia ai la latou feagaiga.
Faaaliga: I le lesona 83, atonu sa e uunaia ia tamaiti ina ia tuuina atu a latou molimau ma ni faataitaiga amiotonu e faatosina mai ai isi, e pei o le maa lea na faagalugalua totonu o se vaitaele. Afai sa e faia, mafaufau e amata lenei lesona i le fai atu i tamaiti e lipoti mai i ni a latou taumafaiga.
Fautuaga mo le Aoaoga
Alema 23
E faitau afe ia sa Lamana na faaliliuina i le Alii
I luga o le laupapa, tusi ai se ata o ni tagata se toalua (e lava a ni ata faigofie). Ona faitau lea o le saunoaga lenei mai ia Elder Richard G. Scott o le Korama a Aposetolo e Toasefululua:Fai i le vasega e faalogo i le faamatalaga a Elder Scott e uiga i ituaiga tagata eseese se toalua.
“Ua tofu vaaia e i tatou nisi tagata e faia pea lava pea mea tonu i o latou olaga. E foliga mai e fiafia lava i latou, e sagisagi fiafia foi i le olaga. Pe a oo ina faia ni faaiuga faigata i le olaga, e foliga mai latou te faia lava e le aunoa faaiuga sa’o, tusa lava pe i ai nisi mea e faatosinaina ai i latou. Tatou te iloa e mafai ona latou gauai atu i tofotofoga, ae e foliga mai latou te le ano i ai. E faapena foi ona tatou vaaia isi e le totoa i a latou faaiuga e fai. I se siosiomaga mamana faaleagaga, latou te faia faaiuga o le a latou faia le mea e lelei atu, e suia o latou olaga, e faataatia ese uiga masani leaga. E matua faamaoni lava lo latou naunau e suia, ae e le umi ae toe foi lava i le mea lava lea na tonu ia i latou e lafoai.
“O le a le mea e mafua ai le eseesega o olaga o nei ituaiga tagata e lua? E mafai faapefea ona e faia pea lava pea o faaiuga sa’o?” (“O Le Liua Atoatoa e Aumaia ai le Fiafia,” Liahona, Iulai 2002, 24).
Fai i tamaiti pe faapefea ona latou faailogaina ia fika e lua ia o loo i luga o le laupapa e tusa ai ma manatu faaalia o Elder Scott. Faailoga le fika e tasi i luga o le laupapa Faamaoni ae faailoga le isi fika Le Tumau. Fai i tamaiti pe faapefea ona latou taliina ia fesili ia na fesiligia e Elder Scott:
-
O le a le mea e mafua ai le eseesega o olaga o nei ituaiga tagata e lua?
-
E mafai faapefea ona e faia pea lava pea o faaiuga sa’o?
A o suesue e le vasega le Alema 23–24, uunaia ia tamaiti e mafaufau i se mea o loo musuiaina le toatele o tagata o le Ekalesia ina ia tumau faamaoni ma le faatuatua i o latou olaga atoa.
Aotele le Alema 23:1–5 e ala i le faamatalaina faapea ina ua uma ona faaliliuina le tupu o sa Lamana, na ia auina atu se folafolaga i ona tagata e faasilasila atu ai e ao ona latou faatagaina Arona ma ona uso e talai atu le afioga a le Atua i le laueleele atoa e aunoa ma se teena ma aua nei afaina i latou. O lenei folafolaga na mafai ai e faifeautalai ona faatuina lotu i totonu o sa Lamana. O se taunuuga, e faitau afe sa Lamana na faaliliuina.
Valaaulia se tamaitiiti aoga e faitau leotele le Alema 23:6. Fai i le vasega e mulimuli i le faitauga, vaavaai mo ni mea se lua na fesoasoani i le faaliliuina o tagata sa Lamana. Valaaulia tamaiti e lipoti mea sa latou mauaina.
-
Aisea e te manatu ai na taua le aoaoina e Amona ma ona uso o sa Lamana “e tusa ma le agaga o faaaliga ma valoaga”?
-
O le a sou manatu o le uiga o “le faia e le mana o le Atua o vavega” i tagata sa Lamana?
-
O anafea na e lagona ai le mana o le Atua o fesoasoani atu ia te oe ina ia liua? O anafea na e vaaia ai le mana o le Atua o loo galue e fesoasoani atu i se isi tagata ina ia liua?
Valaaulia tamaiti e toe faitau le Alema 23:6, faailoa mai ia fasifuaitau ia o loo faamatala maia ia sa Lamana ia na talitonu i le talaiga a Amona ma ona uso. (Ia faamautinoa atu o loo malamalama ia tamaiti aoga o nei sa Lamana na “faaliliuina i le Alii,” ae le o le Ekalesia po o faifeautalai ia na aoaoina i latou. Ia faamautinoa atu foi ina ia vaaia e tamaiti e “le pauu ese lava” nei tagata. Tusi Faaliliuina i le Alii ma le E le pauu ese lava i luga o le laupapa i lalo o le fika o loo faailogaina Faamaoni.)
-
A tatou fetaiai ma tulaga faigata ma puapuaga, aisea e taua ai lo tatou liliu atu i le Alii nai lo isi tagata po o ni manatu?
Fai i tamaiti e faitau le leoa le Alema 23:7, 16–18 , vaavaai mo upu ma fasifuaitau ia o loo aumaia ai se faamautinoaga o le faaliliuina o sa Lamana. Valaaulia tamaiti e lipoti mea sa latou mauaina. E mafai ona e lisiina nei upu ma fasifuaitau i luga o le laupapa i lalo o le fika o faailogaina Faamaoni. Ina ia fesoasoani i tamaiti aoga e suesue atili i nei fuaiupu, atonu e te manao e fai atu fesili nei:
-
Na faapefea ona avea le manaoga o tagata mo se igoa fou ma se faamaoniga o lo latou suia?
-
O faapefea ona “faailoga ese” i latou o faaliliuina i lenei vaitaimi mai isi?
-
E tusa ma le Alema 23:18, na amata ona avea tagata sa Lamana ia na faaliliuina ma tagata toaaga ma sa fealofani ma tagata sa Nifae. Pe a o taumafai se tagata e salamo pe suia lona olaga, e faapefea ona e fesoasoani atu ia te ia pe faafesootai o ia ma isi tagata ua faaliliuina?
Tusi upu nei i luga o le laupapa: O le faaliliuina o lona uiga …
Valaaulia tamaiti e aotele mai mea sa latou aoaoina mai le Alema 23 i le faamaeaina o le faamatalaga o i luga o le laupapa. E mafai ona eseese upu e faaaoga e tamaiti ia latou tali, peitai e tatau ona latou faaalia mai le upu moni lenei: O le faaliliuina o lona uiga o le suia ma avea ma se tagata fou e ala i le mana o le Atua. Faamaea le faamatalaga o loo i luga o le laupapa.
Faasino tamaiti i upu Faamaoni ma le Le Tumau o i luga o le laupapa. Uunaia i latou e mafaufau po o fea o nei faaupuga e sili le faamatalaina ai o lo latou tulaga o le faaliliuina.
Alema 24
Na osifeagaiga tagata Aneti-Nifae-Liae e le toe faaaogaina lava a latou auupega.
Valaaulia tamaiti e mafaufau lemu pe sa i ai se taimi sa latou naunautai ai e aloese mai i le toe faia o se mea sese faapitoa pe agasala ae mulimuli ane toe faia foi lena lava agasala, po o le toe agasala. Faamalamalama atu afai sa latou oo i lenei tulaga, e tatau la ona faaauau pea le taumafai e faaleleia. A o latou suesue le Alema 24, o le a latou iloa ai upu moni ia o le a fesoasoani ia i latou.
Aotele le Alema 24:1–5 e ala i faamatalaina faapea o sa Amaleka ma sa Amulona, ia sa avea muamua ma sa Nifae, sa faaosoina le toatele o sa Lamana ia feita faasaga i lo latou tupu ma isi Aneti-Nifae-Liae. I lo latou feita, na saunia ai nei tagata sa Lamana e osofaia le nuu o Aneti-Nifae-Liae. I lenei vaitaimi o le vevesi, na maliu ai le tupu o Aneti-Nifae-Liae. Na faaee atu le malo i se tasi o ona atalii. Na faatasitasi Amona ma le tupu fou faapea ma Lamonae ma isi e fefautuaai faatasi ma fuafua pe faapefea ona puipuia i latou mai tagata sa Lamana.
Fai i tamaiti e faitau le leoa le Alema 24:6, vaavaai mo le mea na naunautai tagata Aneti-Nifae-Liae ia aua nei o latou faia. A uma ona lipoti mai e tamaiti mea sa latou mauaina, tuu atu i nisi o tamaiti e feauauai i le faitauina leotele mai o le Alema 24:7–10, 12–14. Fai i le vasega e mulimuli i le faitauga, faalogologo i auala uma na faailoa mai ai e le tupu o Aneti-Nifae-Liae le faamanuiaina o i latou e le Atua.
-
E tusa ma le Alema 24:9, o le a se tasi o agasala na faia muamua e tagata Aneti-Nifae-Liae?
-
E tusa ma le Alema 24:13, aisea na latou mumusu ai e tau i le taua?
Vaevae tamaiti i ni vaega se lua. Fai i le vaega muamua e faitau le Alema 24:11, 15, tagai mo fasifuaitau ia e faailoa mai ai taumafaiga a tagata Aneti-Nifae-Liae ina ia salamo. Fai i le vaega lona lua e faitau le Alema 24:16–19, tagai i le mea na faia e tagata Aneti-Nifae-Liae e faamautinoa ai o le a latou tumau ai i le mama. A ua lava loa le taimi e faitau ai tamaiti aoga, valaaulia i latou e faasoa mai mea sa latou mauaina. Atonu o le e faaaogaina ia fesili nei e aumaia ai nisi manatu:
-
O le a sou manatu o le uiga o le tala a le tupu, “Talu ai ona pau lea o le mea e mafai ona tatou faia … tatou te salamo ai”? (Alema 24:11). (O lenei fasifuaitau o loo faamatala mai ai taumafaiga ma naunautaiga maoae a tagata Aneti-Nifae-Liae ina ia salamo mai a latou agasala.)
-
O le upu molimau e faatolu ona taua i le Alema 24:15–16, 18. Na faapefea ona avea le tanu loloto i le eleele o a latou auupega e avea o se molimau? (Ua faaalia atu ai i isi tagata ma le Atua ua latou lafoaia, pe ua faagalo, a latou agasala.)
Valaaulia se tamaitiiti aoga e faitau le faamatalaga lenei mai ia Peresitene Spencer W. Kimball:
“E le mafai e se tasi ona na o le manao mo ni tulaga lelei i le matua lafoaia lea o le agasala. … E tatau ona mautinoa lelei, e le gata ina lafoaia e ia le agasala, ae ua faapea foi ona suia e ia tulaga o loo siosiomia ai le agasala. E tatau ia te ia ona aloese mai nofoaga ma tulaga na tupu mai ai le agasala, aua e mafai ona foi ona toe tupu mai ai le agasala i ia mea. E tatau ia te ia ona lafoaia tagata o e na latou fai le agasala. E le tatau ia te ia ona ita i tagata na aafia ai, peitai e tatau ia te ia ona aloese mai ai faapea ma mea uma na pogai ai le agasala” (O Le Vavega o le Faamagalo Atu [1969], 171–72).
-
O le a se mea na faia e tagata Aneti-Nifae-Liae e aloese mai ai tulaga ma tagata lea e ono faaosoosoina i latou e toe faia a latou agasala tuai?
Atonu e te manao e tuu atu i tamaiti sina taimi e mafaufau ai pe o i ai se faafitauli i o latou olaga o manaomia lo latou suia ina ia mafai ai ona salamo ma lafoai se agasala o loo latou tauivi ai pea.
Tusi le mea lenei i luga o le laupapa: Afai tatou te … , o le a faia e le Atua …
Fai i tamaiti e toe iloilo le Alema 24:10–18, tagai mo ni auala atonu latou te faamaeaina ai le faamatalaga o i luga o le laupapa. (Atonu e te manao e fautuaina tamaiti aoga e tusi se faamatalaga e pei o le faamatalaga lenei i totonu o a latou tusitusiga paia: Afai tatou te faia mea uma tatou te mafaia e salamo ai, o le a aveesea e le Atua lo tatou lagona tausalaina ma fesoasoani ina ia tatou tumau ai i le mama.)
Toe faasino tamaiti i le Alema 24:17.
-
O a nisi faataitaiga o auupega o le fouvale (tagai Alema 23:7) e ono tuu i lalo pe tanuina e tagata ao amata ona latou liliu atu i le Alii? (Fesoasoani i tamaiti aoga ina ia iloa o auupega o le fouvale e mafai ona aofia ai uiga faaagasala po o amioga ia e tatau i tagata ona tuuese ina ia mafai ai ona liliu atu i le Alii.)
Valaaulia se tamaitiiti aoga e faitau le faamatalaga a Elder Jeffrey R. Holland o le Korama a Aposetolo e Toasefululua:
“E tai tutusa lava le umi o le taimi e te salamo ai ma le taimi e te faapea atu ai ‘o le a e sui’—ma o le uiga moni lava lea o lau faamatalaga. O le a faapea ona i ai faafitauli i le taumafaia o lea tulaga. Atonu e sili atu—o le mea moni lava e tatau ona e faaaluina se taimi—o lou olaga atoa e faamaonia atu ai e moni lou salamo i lou tumau lea” (“Mo Taimi o Faigata,” Liahona, Ape. 1982, 11.
Fai i tamaiti e faamatala mai ni uiga e ono faia e se alii talavou po o se tamaitai talavou e aloese mai ai i le toe faia o nei agasala taitasi: solia o le Upu o le Poto, matamata i ponokalafi, ma le agaleaga i sona tei.
Fai i tamaiti e vaai faalemafaufau i lagona o Aneti-Nifae-Liae atonu na i ai ina ua uma ona latou tanuina a latou auupega ona iloaina lea o loo sau se autau a sa Lamana e osofaia i latou. Fai i tamaiti e mafaufau i lenei tulaga ao latou faitaua ma le le leoa le Alema 24:20–22.
Tusi le upu moni lenei i luga o le laupapa: As we keep our covenants, we can help others become converted. Valaaulia ni nai tamaiti aoga e feauauai i le faitauina leotele mai o le Alema 24:23–27. Fai i le vasega e mulimuli i le faitauga, tagai i upu po o fasifuaitau ia o loo aoao maia le mataupu faavae lea o loo tusia i luga o le laupapa.
-
O faapefea ona aafia e lenei tala lou naunautaiga e tausia au feagaiga?
-
O le a se mea e mafai ona tatou faia e faamalosia ai lo tatou naunautaiga ma le tomai i le tausiaina o feagaiga sa tatou osia ma le Alii?
Valaaulia ia tamaiti e faasoa mai soo se aafiaga sa latou mauaina ma le mataupu faavae o i le laupapa. Faaiu e ala i le faasoaina atu o lau molimau e uiga i mataupu faavae na aoaoina i lenei lesona.
Tala ma Faamatalaga o Talaaga
Alema 23:17. “Sa oo ina latou taua o latou igoa o Aneti-Nifae-Liae”
“O tagata sa Lamana na faaliliuina e atalii e toafa o Mosaea ma a latou soa faifeautalai na latou aveina i o latou luga le igoa o ‘Aneti-Nifae-Liae.’(Alema 23:17; Alema 24:1–5.) O le vaega o le igoa ‘Nifae-Liae’ masalo e i ai se faatatauga i le laueleele o Nifae ma Liae (po o tagata na nonofo ai i na laueleele) nai lo e na tupuga mai ia Nifae po o Liae.
“Ae ui o lea, na maua e Dr. Hugh Nibley ‘se tusitusiga faaSemeti ma le Indo-European e tetee ai i lena uiga “i le feagai ai” po o le “faafesagai,” e pei o se tasi o loo faafesagai ma se faata, ma i le faalauteleina a le o se “tasi o loo tetee” po o “se tasi o loo faataitaia.”’ (Quoted in Eldin Ricks, Book of Mormon Study Guide, i. 63.) O lea la o le faaupuga ‘Aneti-Nifae-Liae’ e ono faasino ia i latou o e faataitaia ia aoaoga a e tupuga mai a Nifae ma Liae” (Daniel H. Ludlow, A Companion to Your Study of the Book of Mormon [1976], 209–10).