Lesona 96: Alema 39

Lesona 96

Alema 39

Faatomuaga

Na aoaiina e Alema lona atalii faalogogata o Korianetona, o le sa tuua le galuega ma faia le agasala o le feuiai. Na aoao atu e Alema o ia i le matautia o ana amioga ma faaalia le faanoanoa ona ua agasala Korianetona i lea ituaiga o agasala matautia. Na poloaiina e Alema lona atalii ina ia aua nei taitaiina o ia i manaoga o ona mata ma ia salamo. (O le fautuaga a Alema ia Korianetona e uiga i isi mea o loo faaauauina i mataupu 40–42.)

Fautuaga mo le Aoaoga

Alema 39:1–8

Ua faamatalaina e Alema i lona atalii o Korianetona le matautia o le agasala o le feuiai

Tusi le fesili lenei i luga o le laupapa: Aisea ua sili atu ai le matautia o nisi agasala nai lo isi?

Fai i tamaiti aoga e mafaufau le leoa i tali o lenei fesili. Fautua atu o le fautuaga a Alema o loo faamaumauina i le Alema 39 e mafai ona fesoasoani ia i tatou ina ia malamalama i le tulaga matautia o nisi o agasala.

Fai i tamaiti e vaavaai i le faamatalaga o loo i luga ae o le ulutala o le mataupu e 39. Fai atu ia i latou e faailoa mai po o ai o loo saunoa i lenei mataupu ma po o ai foi o loo ia saunoa atu i ai (o Alema o loo saunoa atu i lona atalii o Korianetona). Faamalamalama atu sa malaga faatasi Korianetona ma lona uso o Sepulona ma Alema e talai le talalelei i totonu o sa Sorama, peitai na pau atu o ia i le agasala. Faailoa atu o le malamalama i le mea na faia e Korianetona e sese, o le a fesoasoani lea i tamaiti aoga ina ia malamalama lelei atili i le fautuaga a Alema ia te ia i lenei mataupu ma mataupu e tolu o loo sosoo ai.

Valaaulia se tamaitiiti aoga e faitau leotele le Alema 39:1–5. Fai i le vasega e tagai mo le mea na faia e Korianetona lea na avea ma se mea sese. (Atonu e manaomia lou faamatalaina atu o le upu fafine talitane i le fuaiupu e 3 e faasino lea i se fafine e le ola mama po o se paumutu.)

O le a se mea na faia e Korianetona na avea ma mea sese? O fea o ana agasala na sili ona mamafa? (Feuiaiga po o le feusuaiga le mama.)
I totonu o sa Sorama, na mitamitavale Korianetona i lona malosi ma lona poto (tagai i le Alema 39:2). O a ni auala e mafai ai e se uiga faamaualuga ona taitaiina atu ai i se agasala mamafa e pei o le feusuaiga le mama? O a nisi o faataitaiga faaonapo nei o ni uiga faamaualuluga ua taitaiiina atu ai tagata i le faia o le agasala o le feusuaiga? (A o talanoaina e tamaiti nei fesili, faailoa atu afai e mitamitavale tagata, e masani lava ona latou manatu mamafa i lo latou lava malosi, e aofia ai lo latou gafatia e teena ai le faaosoosoga. O nisi o faataitaiga faaonapo nei o lenei mea o le vave ona tafao faamasani ma le na o le toatasi lava se tagata e tafao faamasani i ai.

Fai i tamaiti e faitau le leoa le Alema 39:5, vaavaai i le auala na faamatala ai e Alema le tulaga matautia o le agasala o le feusuaiga. (Atonu o le a fesoasoani le faamatalaina atu faapea o le upu inosia e faasino i se mea e le mama, amioleaga, pe mataga.)

O le a se lagona o le Alii i le agasala o le feusuaiga? (A o tali mai tamaiti, fesoasoani atu ia i latou ia iloa le upu moni lea o le agasala o le feusuaiga o se mea inosia lea i le silafaga a le Alii.)
Aisea tou te manatu ai o le faitaaga ma le mulilua ua tuuina i talaane o le fasioti tagata i se tulaga matautia?

Ina ia fesoasoani i tamaiti ia malamalama i le tulaga faatonuina a le Alii ma folafolaga e o faatasi ma le mama mai feusuaiga, valaaulia i latou e faitau le leoa ia parakalafa e lua muamua o le vaega o loo faaulutalaina “Mama Atoatoa i Tulaga Feusuai” i le Mo Le Malosi o le Autalavou. Fai atu ia i latou e vaavaai mo tali i le fesili lenei ao latou faitau. (Atonu e te manao e tusi le fesili i luga o le laupapa. Atonu e te manao foi e fautuaina tamaiti e faailoga i totonu o le tusi ia tali sa latou mauaina.)

O a ni faamanuiaga o le tumau i le mama atoatoa mai tulaga feusuai?

A ua lava se taimi e faitau ai tamaiti ma lipoti mai a latou tali sa mauaina, fai atu i ai e faitau le leoa le vaega o totoe o le “Mama Atoatoa i Tulaga Feusuai”, vaavaai mo ni tali i le fesili lenei:

O a ni tulaga faatonuina ua setiina e le Alii mo i tatou ina ia tumau ai i le mama atoatoa mai tulaga feusuai?

Valaaulia tamaiti e mafaufau po o le a se savali latou te lagona e finagalo le Alii latou te aoaoina mai le mea lea faatoa latou faitauina. Molimau atu i le matautia o le agasala o le feusuai faapea foi ma faamanuiaga o le a oo mai i le mama atoatoa i tulaga feusuai.

Faailoa atu o le fautuaina o lona atalii e uiga i se mataupu maaleale, na faataunuu ai e Alema lona tiute o se matua. Fai i tamaiti e mafaufau i le auala atonu latou te tali atu ai i se fautuaga mai o latou matua po o taitai o le Ekalesia e uiga i le mama atoatoa mai tulaga feusuai. Valaaulia i latou e faitau le leoa le Alema 39:7–8, vaavaai mo le faamoemoega a Alema i le aoaoina o Korianetona i le matautia o le agasala o le feusuai.

O le a se mafuaaga na ia Alema mo le aoaoina o Korianetona i le matautia o lana agasala? (Ina ia fesoasoani atu ia Korianetona ia salamo ma ia le tu atu ai ma le tausalaina i luma o le Atua.)
O le a se auala e tatau ona tatou tali atu ai pe a valaaulia i tatou e se tagata ina ia salamo?

Ina ia fesoasoani i tamaiti ia iloa le mafuaaga e fai atu ai matua, e pei o Alema, ia latou fanau ina ia salamo, faitau le saunoaga lenei mai ai Elder D. Todd Christofferson o le Korama a Aposetolo e Toasefululua:

“O le valaaulia e salamo o se faailoaga o le alofa. … Afai tatou te le valaauliaina isi ina ia sui ma pe afai foi tatou te le salamo i tatou lava ia, ua tatou toilalo i se tiute autu lea e tatau ona fai i le tasi ma le isi ma i tatou lava ia. O matua e tuu a latou fanau e agasala, se uo manatu faapito, se taitai palaai o le Ekalesia, o le mea moni lava ua sili atu ona latou popole mo i latou lava nai lo le tulaga lelei ma le fiafia o i latou e mafai ona fesoasoani atu i ai. Ioe, o le valaau ina salamo ia i nisi o taimi ua manatu i ai o le le onosaia po o le faatiga, ma e ono oo foi lava i le itagiaina, ae o le taialaina e le Agaga, o le tulaga moni lava o se faatinoga o le popole moni” (“O Le Meaalofa Paia o le Salamo,” Ensign po o le Liahona, Nov. 2011, 39).

Alema 39:9–19

Ua uunaia e Alema Korianetona ina ia salamo

Ina ia faalauiloa atu le fautuaga a Alema i lona atalii e uiga i le auala e salamo ai ma liliu atu ai i le Alii, tusi le mea lenei i luga o le laupapa: O le salamo e aofia ai …

Valaaulia ni nai tamaiti aoga e feauauai i le faitauina leotele mai o le Alema 39:9–13.Taofi i va o fuaiupu taitasi e fai atu i tamaiti ia fesili nei:

Alema 39:9

O le a le uiga o le “lafoai au agasala”? (O le taofi o le faia o agasala.)
O le a le faiā o fasifuaitau nei “aua e te alu e tusa ma tuinanau o ou mata” ma le “ia e faafiti oe lava i nei mea uma” ma le lafoaiina o se agasala? (Atonu o le a fesoasoani i le faamatalaina atu faapea, i lo tatou vaitaimi o le fasifuaitau “tuinanau o ou mata” e mafai ona faasino i ata ma mea faafiafia lea e avea ma ni ata mataga i soo se auala. Ina ia faamamafa atu le tulaga matautia o ponokalafi, mafaufau e fai atu i tamaiti aoga e faitau le fautuaga o i lenei mataupu i le itulau e 12 o le Mo Le Malosi o le Autalavou. Atonu e mafai foi ona e faamatala atu o le fasifuaitau “faafiti oe lava” o lona uiga o le faaaogaina o le puleaina o oe lava ia; tagai i le vaefaamatalaga 9e.)
O a nisi auala e mafai ai e talavou o le Au Paia o Aso e Gata Ai ona puleaina e i latou lava ia mai tulaga e faatatau i le mama mai tulaga feusuai ma le aloese mai i le o atu e tusa ai ma tuinanau o o latou mata? (Ina ia fesoasoani i tamaiti ia talanoaina auiliili lenei fesili, atonu e te manao e faamatalaina nisi o tulaga e talafeagai ai ma tu ma aga a au tamaiti aoga. Mo se faataitaiga, atonu o le a e fai atu se tala faapenei: Ua filifili se tamaitai talavou a le Au Paia o Aso e Gata Ai ina ia “faafiti ia lava,” peitai o se alii talavou na te faamemelo i ai ua valaauliaina o ia i se pati e le talafeagai. O le a se auala na te tali atu i ai?)

Faasino atu o le Alema 39:9 o se fasifuaitau o se mau tauloto. Atonu e te manao e fautuaina tamaiti aoga e faailoga lenei fasifuaitau i totonu o a latou tusitusiga paia ina ia faigofie ai ona latou mauaina.

Alema 39:10

O a ni auala o le a mafai ona fesoasoani ia i tatou le sailia o se fafagaina faaleagaga —atonu mai matua, taitai o le Ekalesia, tei, po o ni uo faamoemoeina —ina ia salamo ai?

Alema 39:11

O le a le uiga o le “aua e te tuu atu oe lava ia taitai ese”? (Atonu e manaomia lou faamatalaina atu faapea o le upu mafatia o lona uiga o le faatagaina.)
O a nisi o mea “ua le aoga pe ua faavalevalea” ua e vaai o taitaiese ai tagata i lenei vaitaimi?

Alema 39:12

O le a le uiga o le taofia mai amioletonu? (O le aloese mai le agasala.)

Alema 39:13

Faamalamalama atu o le salamo o lona uiga “ua liliu atu lona loto i le Atua” (tagai i le Taiala i Tusitusiga Paia, “Salamo”). I tusitusiga paia, o le fasifuaitau “liliu atu i le Alii” e masani lava ona faailoa mai ai le salamo.

O le a sou manatu o le uiga o le “liliu atu i le Alii ma lou manatu atoa, mafaufau atoa, ma lou malosi atoa”?

Faamanatu atu i tamaiti i le taimi o le misiona i sa Sorama, o le amio a Korianetona na taitaiina ai nisi o tagata i le le fia talitonu i upu a Alema (tagai i le Alema 39:11).

Afai ae afaina isi ona o a tatou agasala, o le a se mea e tatau ona tatou faia e avea o se vaega o lo tatou salamo? (Faailoa atu pe tautau atu o tatou faaletonu ia i latou ua tatou faatiga i ai ma saili e toe faaleleia mea ua tiga.)

Tusi le upu moni lenei i luga o le laupapa: O le salamo e aofia ai le faailoaina atu ma le lafoai o a tatou agasala ma liliu atu i le Alii ma o tatou manatu atoa, mafaufau atoa, ma le malosi atoa. Atonu e te manao e fautuaina tamaiti e tusi le faamatalaga lenei i totonu o a latou tusitusiga paia i talaane o le Alema 39:13. Valaaulia ia tamaiti e tusi i totonu o a latou api o le vasega po o api talaaga mo le suesueina o tusitusiga paia e uiga i o latou lagona i le mea e finagalo le Alii ia latou faia ina ia liliu atu ai ma le atoatoa o latou loto ia te Ia.

Ina ia faamamafa atu le matafaioi a le Faaola i le faagasologa o le salamo, fai atu i se tamaitiiti e faitau leotele mai le Alema 39:15–16, 19. Fai i le vasega e vaavaai mo se fasifuaitau o loo ta’ua faatolu i nei mau. (O le fasifuaitau o le “tala fiafia”, lea atonu e te manao e faamatala atu ona uiga o ni “tala lelei”.)

O a ni “tala fiafia” na aoao atu e Alema i lona atalii? (E tatau ona aofia ai i tali ia e tuuina mai e tamaiti le upu moni faapea na afio mai Iesu Keriso e aveese agasala o le lalolagi. Atonu e te manao e tusi lenei mea i luga o le laupapa.)
Aisea na avea ai le afio mai o Iesu Keriso ma se tala fiafia mo Korianetona? (A o taliina e tamaiti le fesili lenei, atonu e te manao e tau atu ia i latou na salamo mulimuli ane Korianetona i ana agasala ma toe foi e avea ma se faifeautalai [tagai i le Alema 49:30].)

Mafaufau e faasoa atu i le vasega le auala na avea ai le savali o le Togiola a Iesu Keriso ma se “tala fiafia” mo oe po o i latou foi e te masani i ai. Faaopoopo atu lau molimau e uiga i mataupu faavae ia na talanoaina e le vasega mai le Alema 39. Faamalosiau atu i tamaiti ina ia mulimuli i uunaiga ia atonu sa latou mauaina i le taimi o le lesona ina ia malupuipuia ai lo latou mama ma liliu atu ai i le Alii e ala i le salamo.

Mau Tauloto—Alema 39:9

Vaevae le vasega i ni vaega se fa pe lima: Tuu atu i vaega taitasi se taisi e ono ona itu ma se penitala. (Afai e le maua se taisi, mafaufau e fetuunai le gaoioiga i le tuuina o ni fasi pepa laiti se ono, ia tofu ma se numera e amata mai le 1 e oo i le 6 o loo tusia ai i luga, i totonu o se teutusi po o se konateina.) O le a manaomia foi e tamaiti taitasi se fasi pepa e avanoa. Fai i vaega taitasi a tamaiti e nonofo vavalalata faataamilo i le laulau po o se li’o. Valaaulia i latou e sue a latou tusitusiga paia i le Alema 39:9.

Faamalamalama atu o le faamoemoega o le gaoioiga o le avea ma tagata muamua i le vaega e tusiina atoa le Alema 39:9. Ae peitai, talu ai ona na o le tasi le penitala i le vaega, e na o le tasi le tagata i le vaega e mafai ona tusi i le taimi. E mafai ona agavaa le tagata e faaaoga le penitala e ala i le mauaina o se 1 mai le faatavaleina o le taisi.

Tuu atu i tagata taitasi o le vaega e auauai i le faatavaleina o le taisi (pe ave se fasi pepa ona toe faafoi mai lea). Afai ae faatavale se tagata (pe filifili) se 1, e ave e ia le penitala ma amata ona tusi, ma tau leotele mai upu ao ia tusiina i lalo. I lena foi taimi, e feauauai ai isi tagata o le vaega e faatavale le taisi ina ia mafai ai ona faaaoga le penitala. Afai ae maua le 1 a se isi tamaitiiti o le vaega, e ave e lena tagata le penitala mai le tagata lea o loo tusitusi ma amata ona tusi le fuaiupu i luga o lana pepa ao tau mai ia upu. O le tagata lea na tusitusi muamua o le a ia faatasi atu ma isi tagata o le vaega e faataavale le taisi. Afai ae agavaa ia tamaiti mo le penitala ma ua uma ona tusia se vaega o le fuaiupu i luga o a latou pepa, e tatau ona latou faitauina leotele mai le vaega lea ua uma ona latou tusiaina ao lei tusiina nisi vaega o le fuaiupu. (O lenei mea o le a mafai ai ona toe fai ma toe fai ma o le a fesoasoani ai i tamaiti i le taulotoina o le mau.) O le a faamutaina lenei gaoioiga pe a atoa lelei ona tusia e se tamaitiiti mai vaega taitasi le Alema 39:9.

Fai i le vasega e toe fai faatasi mai le fuaiupu pe a maea le gaoioiga.

Faaaliga: Talu ai ona o le natura ma le umi o lenei lesona, atonu e te manao e faaaoga lenei gaoioiga i se isi aso, pe a lava se taimi.

Tala ma Faamatalaga o Talaaga

Alema 39:3. Taunuuga o le agasala o le feusuai

Na saunoa mai Elder Jeffrey R. Holland o le Korama a Aposetolo e Toasefululua e uiga i le tulaga matautia ma i taunuuga o le agasala o le feusuai:

“O le tuuina atu o se tulaga matuia i se tuinanau faaletino i se tulaga lautele, o le a le mea o loo taumafai le Atua e tau mai ia i tatou e uiga i lona tulaga i Lana fuafuaga mo alii ma tamaitai uma? Ou te tauina atu ia te outou o loo sa’o lelei le mea o loo Ia faia—o le faufautua mai lea i le fuafuaga lava ia o le ola. Ua manino mai o se tasi o Ona popolega silisili e faatatau i le olaga faaletino o le faapefea lea ona oo mai o se tasi i lenei lalolagi ma le auala e toe alu ese atu ai. Ua Ia faataatiaina ni faatapulaa maoti i nei mataupu.

“O le tino o se vaega taua o le agaga. O lea aoaoga taua ma tulaga ese a le Au Paia o Aso e Gata Ai e faamamafaina ai le mafuaaga e matuai ogaoga ai le agasala faalefeusuai. Matou te tautino atu o se tasi na te faaaogaina le tino o soo se tasi na tuuina mai i le Atua e aunoa ma se faatagana paia, ua ia faasaunoa pe ua faia faatautala le agaga o lena lava tagata, ua faasaunoa pe faia faatautala le faamoemoega autu ma faatulagaga o le olaga, ‘o le autu lena’ i le ola, e pei ona taua e Peresitene Boyd K. Packer i se tasi taimi [tagai i le Liahona, Ianuari 1999, 90, 91]. I le faaaogaina o le tino o le isi tagata—o lona uiga o le faaaogaina foi lea o lona agaga— ua faaleagaina e ia le Togiola a Keriso lea na laveaiina ai lena agaga ma maua ai le meaalofa o le ola e faavavau. Ma afai e ulagia e se tasi le Atalii o le Amiotonu, ua laa atu o ia i le malo o le afi, e vevela ma aasa atu nai lo le la i le aoauli. E le mafai ona e faia lena tulaga ae e te le mu ai.

“Faamolemole, aua nei faapea atu: ‘O ai e tiga ai? Aisea ou te le maua ai sina saolotoga? E mafai ona ou solitulafono nei ae salamo mulimuli.’ Faamolemole aua le faavalevalea, pe faatauagavale. E le mafai ona aunoa outou ma le faasalaina i le ‘toe faasatauroina o Keriso.’ [Tagai i le Eperu 6:6.] ‘Sosola ese mai le faitaaga,’ o le augani mai lea a Paulo [tagai i le 1 Korinito 6:18], ma sosola ese ‘mai soo se mea faapena,’ o le faaopoopo mai lea o le Mataupu Faavae ma Feagaiga [tagai i le MF&F 59:6; faaopoopo le faamamafa]. Aisea? Ona o le mafuaaga e tasi, talu ai ona o puapuaga e le mafaatusalia e le gata i le tino ae o le agaga na onosaia e le Faaola ole lalolagi ina ia mafai ai ona tatou sosola ese [tagai faapitoa lava i le MF&F 19:15–20]. O loo tatou nofo aitalafu ia te ia mo lena mea. E moni o loo tatou nofo aitalafu ia te Ia i mea uma. ‘E le aia outou ia te outou,’ o le tala lea a Paulo. ‘Aua ua faatauina outou i le tau:o lenei,ia outou vivii atu i le Atua i o outou tino, ma o outou agaga,o mea a le Atua ia1 Korinito 6:19–20, faamatala faaopopo; tagai foivv.13-18.] O le solia o tulafono faalefeusuai, ua oo atu ai le agaga atoa—le tino ma le agaga i se tulaga matautia. …

“I tulaga o le alofa molitino faaletagata, e tatau ona e faatali! E tatau ona e faatali sei mafai ona tuuina atu ia te oe mea uma, ma e le mafai ona e tuuina atu mea uma sei vagana ua e faaipoipoina faaletulafono. O le tuuina atu o se mea e lei faatulafonoina e le o se mea a oe e tuuina atu (manatua, ‘e le aia foi outou ia te outou’) ma le tuuina atu na o se vaega o oe , lea e le mafai ona mulimuli mai ai ma le tuuina atu o lou tagata atoa, o le tulaga matautia lea o le faaleagaina o lagona. … Afai e te faaauau pea ona saili le faamalieina faaletino e aunoa ma le faamaoniga mai le lagi, ua e uia le ala matautia e afaina ai lagona faaleagaga lea e mafai ona e faaleagaina ai lou manao i fesootaiga faaletino ma lou malosi e tuu atu ai se naunautaiga atoatoa i se tasi ua e alofa moni i ai i le lumanai. E mafai ona e oo atu i lena taimi moni o le alofa faauuina, o le tuufaatasiga moni, ae ua e iloaina ma le faanoanoa ua leai lou tulaga mama po o lou taupou sa tatau ona faasaoina, ma na o le alofa tunoa o le Atua e mafai ona toe faaleleia ai mea laiti ua toesea o le mama na e faatalale i ai. I le aso o lau faaipoipoga o le meaalofa silisili e mafai ona e tuuina atu i lau soa e faavavau o lou tagata sili lea ona—mama ma agavaa foi mo se mama e tauia mai ai” (“O Le Mama o le Tagata Lava Ia,” Liahona, Ian. 1999, 90–92).

Alema 39:6. O le a le agasala e le mafaamagaloina?

Na tuuina mai e le Perofeta o Iosefa Samita se malamalamaaga atili e uiga i le agasala e le mafaamagaloina:

“O le a faamagaloina agasala uma, vagana ai le agasala o le faafitia o le Agaga Paia; aua o le a laveaiina e Iesu tagata uma vagana ai le atalii o le malaia. O le a se mea e tatau ona faia e se tagata e faia ai le agasala e le mafaagaloina? E tatau ona ia maua le Agaga Paia, tatala mai le lagi ia te ia, ma iloa le Atua, ona agasala lea e faasaga ia te ia. A uma ona agasala se tagata e faasaga i le Agaga Paia, e leai se salamo mo ia. E tatau ona ia fai mai e le susulu lava le la ao ia vaai atu i ai; e tatau ona ia faafitia Iesu Keriso pe a tatalaina mai lagi ia te ia, ma ia faafitia le ata o le faaolataga ao matala atu ona mata i le upu moni; ma o le a avea o ia ma se fili mai lena lava taimi. O le tulaga lava lea o le toatele o tagata e liliuese mai le Ekalesia a Iesu Keriso o le Au Paia o Aso e Gata Ai” (i le History of the Church,, 6:314).

O se tagata o le na mauaina se molimau o le Agaga Paia ona pau ese lea pe amata ona le toe toaga mai i le Lotu e le o agasala o ia i le agasala e le mafaamagaloina.

Alema 39:13. Salamo: o le “liliu atu i le Atua”

Na faamatalaina e Elder Neil L. Andersen o le Korama a Aposetolo e Toasefululua le salamo o se liliuga po o le toe foi atu i le Atua:

“A tatou agasala, tatou te liliu ese mai le Atua. A tatou salamo ona tatou liliu atu lea i le Atua.

“O le valaau ia salamo e seasea lava [faalogoina] o se leo o le aoaiga, ae o se talosaga agaalofa ia toe liliu mai, ma ‘toe foi mai’ i le Atua” (“Salamo … Ina Ia Ou Faamaloloina Outou,” Ensign po o le Liahona, Nov. 2009, 40).

Alema 39:15. O le a aveesea e Iesu Keriso ia agasala a le lalolagi

Na faamatalaina e Elder D. Todd Christofferson o le Korama a Aposetolo e Toasefululua le auala tatou te maua ai le avanoa i faamanuiaga o le Togiola:

“Ua na o le salamo lava e taitai atu ai i se olaga sili atu. Ma, e moni lava, ua na o le salamo lava tatou te maua ai le avanoa i le alofa tunoa togiola a Iesu Keriso ma le faaolataga. O le salamo o se meaalofa paia, ma e tatau ona tatou fiafia pe a tatou talanoaina le salamo. Na te faasino atu i tatou i le saolotoga, talitonuga, ma le filemu. Nai lo le faalavefauina o le faafiafiaga, o le meaalofa o le salamo o le pogai lea o le faafiafiaga moni.

“Ua mafua ona i ai le salamo ona o le Togiola a Iesu Keriso. O Lana taulaga le mafuatia lea ua ‘aumai ai ala i tagata e mafai ai ona latou maua o le faatuatua e salamo ai’ (Alema 34:15). O le salamo o le tulaga tatau lea, ma le alofa tunoa o Keriso o le mana lea e ‘mafai ai e le alofa mutimutivale ona faamalie manaoga o le faamasinotonu’ (Alema 34:16). …

“… O le salamo e manaomia ai faamoemoega moni ma se naunautaiga e taumafai pea, e oo lava i tiga. O ni taumafaiga e fatu se lisi o ni laasaga patino o le salamo atonu e aoga i isi, ae e ono taitai atu ai foi i se metotia le mafaufauina o le salamo e aunoa ma se lagona moni po o se suiga. O le salamo moni e le o se mea papa’u. Na tuuina mai e le Alii ni mea autu se lua e manaomia: ‘O le mea lenei e mafai ai ona outou iloa pe afai ua salamo se tagata i ana agasala—faauta, e tautau atu e ia i latou ma lafoai i ai’ (MF&F 58:43)” (“O Le Meaalofa Paia o le Salamo,” Ensign po o le Liahona, Nov. 2011, 38, 40).