Lesona 109: Helamana 6–7

Lesona 109

Helamana 6–7

Faatomuaga

I le mavae ai o taumafaiga faafaifeautalai a Nifae ma Liae, sa faapea ona faateteleina le amiotonu o sa Lamana. Peitai, sa amata ona amioleaga sa Nifae ma amata ona lagolago atu i le au faomea a Katianetona, ma sa aluese mai le Agaga o le Alii ia i latou. Sa vavalo atu Nifae afai e faaauau pea ona ola sa Nifae i le amioleaga, o le a faaumatia i latou. Sa ia valoiaina foi ona o le amiotonu o sa Lamana, o le a alofa mutimutivale ai le Alii ia i latou ma laveai i latou.

Fautuaga mo le Aoaoga

Helamana 6

Sa amiotonu sa Lamana ma tau e tetee atu i au faomea a Katianetona, a o sa Nifae sa faateteleina lo latou amioleaga ma lagolagoina le au faomea a Katianetona

Tusi le ata lenei i le ogatotonu o le laupapa:

Ata

aū e alu i luga

Fai atu i tagata o le vasega e sue ma mafaufau i uiga faaalia ma amioga e oo mai i le faateleina o uunaiga a le Agaga Paia i o latou olaga ma uiga ma amioga e oo mai i le faaitiitia o uunaiga a le Agaga Paia.

Faamatala atu sa tusia e Mamona sa aveese mai e le Alii Lona Agaga mai ia sa Nifae ma amata ona liligi atu Lona Agaga i luga o sa Lamana (tagai i le Helamana 6:35–36). Faamanatu atu i tagata o le vasega o sa Nifae sa “faapea ona latou vaivai, ona o lo latou solitulafono” (Helamana 4:26). “Ua le toe faasaoina i latou e le Agaga o le Alii” (Helamana 4:24), ma ua “matua ai [i latou] mo le faafanoga” (Helamana 5:2).

Fai atu i se tagata o le vasega e faitau leotele le Helamana 6:2. Fai atu i le vasega e mulimuli i le faitauga, ma vaavaai mo amioga ma uiga o le a taitai atu ai sa Nifae i le faaauau pea ona “[matutua] mo se faaumatiaga tumau-faavavau” (Helamana 6:40). A o lipoti mai e tagata o le vasega mea latou te maua, tuu atu i se tamaitiiti e tusi a latou tali i le afa pito i lalo o le laupapa, i lalo ifo pe o talaane o le aū e alu i lalo. (Atonu e te manao e faamalamalama atu o le upu lē salamo o lona uiga o le le salamo ma e leai se salamo.)

Faamanatu atu i tagata o le vasega ona o taumafaiga faafaifeautalai a Nifae ma Liae i le tausaga na muamua atu, e faitau afe sa Lamana i Saraemila na papatisoina, ma o le toatele foi o sa Lamana i le laueleele o Nifae sa liliu mai i le talalelei (tagai i le Helamana 5:19–20, 50–51). Fai atu i se tamaitiiti e faitau leotele le Helamana 6:1, 3–5. Fai atu i le vasega e mulimuli i le faitauga, ma vaavaai mo amioga ma uiga sa taitaiina atu ai sa Lamana e olioli i se uunaiga faateleina a le Agaga. A o lipoti mai e tagata o le vasega mea ua latou maua, fai atu i se tamaitiiti e tusi a latou tali i le afa pito i luga o le laupapa, i luga ae po o talaane o le aū o loo faasaga i luga.

O le a le uiga ia te oe o le maumausali ma le maumaututu i le faatuatua? (Tagai i le Helamana 6:1.)
Na faapefea ona tali atu tagata o le Ekalesia i le liliuga a sa Lamana? (Atonu e te manao e faailoa atu o le fefaasoaai o le talalelei ma le faaaumea ma le Au Paia e mafai ona aumaia ai le olioli tele, e tusa lava pe o siomia i tatou e le amioleaga.)

Otooto le Helamana 6:7–14 e ala i le fai atu e tusa e tolu lelei lava tausaga, sa fiafia ai sa Nifae ma sa Lamana i le filemu. A o faateleina pisinisi ma faafetauaiga i lo latou va, sa faamanuiaina uma ia nuu. Ona oo lea i le tausaga lona 66 o le nofoaiga a faamasino, sa faapea ona fasiotia ai faamasinosili e toalua. Fai atu i se tagata o le vasega e faitau leotele le Helamana 6: 16–17. Fai atu i le vasega e mulimui i le faitauga, sue nisi uiga ma amioga na mafua ai ona aluese mai le Agaga mai ia sa Nifae. A o lipoti mai e tamaiti mea latou te maua, fai atu i se tasi e tusi a latou tali i le afa pito i lalo o le laupapa, i lalo ifo po o talaane o le aū faasaga i lalo.

Faasoa atu i tagata o lau vasega ia mea moni nei:

O le fatu e taua i lo tatou ola faaletino. Na te pamuina le toto i o tatou tino ina ia mafai ona oo atu le okesene ma isi niuterene i o tatou matāuaola uma. E pei o le lapoa o se moto, o le averesi o le pamu o le fatu o se tagata matua e 2,000 kalone (7,570 lita) o le toto i aso taitasi. E tata pe a ma le 70 taimi i le minute, po o le 100,000 tata i le aso.

O le iloaina o le natura taua o lou fatu faaletino, o le a se mea o le a e naunau lava e fai ia tausisia ai le maloloina?

Tusi ia mau nei i luga o le laupapa: Helamana 6:17, 21, 26, 28–31. Ta’u atu o fuaiupu taitasi i lenei mau e faaaoga ai le upu loto pe o loto, e faatatau i o tatou fatu faaleagaga. Tuu atu i tagata o le vasega se taimi e suesue ai nei fuaiupu ma mafaufau loloto i tali i fesili nei. (Ina ia sefe le taimi, tusi fesili nei i le laupapa a o le’i amataina le vasega pe saunia foi o ni pepa e tufa atu mo tagata e faatatau i ai a o latou suesue i fuaiupu ua lisiina i luga o le laupapa.)

E te manatu aisea e manao tele ai Satani i loto o le fanau a le Atua?

O le a le mea sa fai e sa Nifae na mafai ai e Satani ona uumau i o latou loto? (Tagai i le Helamana 6:17.)

O le a le mea e tupu i le loto o se tagata e uunaia pe pulea e Satani? (Tagai i le Helamana 6:21, 28, 30–31.)

Fai atu i ni tagata o le vasega e tali i fesili. Ona fai atu lea i se tamaitiiti e faitau leotele le saunoaga lenei a Peresitene Boyd K. Packer o le Korama a Aposetolo e Toasefululua. Fai atu i le vasega e faalogo lelei ia iloa ai auala o loo taumafai Satani e totō ia faaosoosoga i o tatou loto.

Ata

Peresitene Boyd K. Packer

“E mafai ona i ai faaaliga pepelo, uunaiga mai le tiapolo, faaosoosoga! Po o le a lava le umi e te ola ai, po o le a foi lava le itu, o le a taumafai lava le tiapolo e taitai sese oe. …

“Afai e i ai se taimi e te maua ai se uunaiga e fai se mea e te lagona ai le le nofo lelei, o se mea e te iloa i lou mafaufau e sese ma feteenai ma aoaoga faavae amiotonu, aua e te tali atu i ai!” (“O Faaaliga mo le Tagata Lava Ia: O le Meaalofa, o le Tofotofoga ma le Folafolaga,” Liahona, Ian. 1995, 72).

Faaopoopo i ai le faalogo ma le gauai atu i faaosoosoga i le lisi i le afa pito i lalo o le laupapa. Fai atu i ni tagata o le vasega e feauauai i le faitauina leotele mai o le Helamana 6:20–21, 37–38. Fai atu i le vasega e mulimuli i le faitauga, ma vaavaai mo tali eseese a sa Lamana ma sa Nifae i uunaiga a le au faomea a Katianetona.

Fai atu i tagata o le vasega, ina ua uma ona faamaumauina e Mamona le mea sa tupu ia sa Nifae ma sa Lamana, sa ia faasino mai lesona e mafai ona tatou aoaoina mai o latou aafiaga. Tusi faamatalaga nei e le o uma i luga o le laupapa:

Sa aluese le Agaga mai ia sa Nifae ona …

Sa sasaa mai e le Alii Lona Agaga i luga o sa Lamana ona …

Fai atu i tagata o le vasega e faitau le Helamana 6:34–36, ma vaavaai mo faamatalaga o le a fesoasoani latou te faauma ai faamatalaga o loo i luga o le laupapa.

E faavae i mea sa e faitauina i nei fuaiupu, e faapefea ona e faaumaina ia faamatalaga o loo i luga o le laupapa? (Atonu e te manao e faauma ia faamatalaga o loo i le laupapa e faaaoga ai tali a tagata o le vasega.)
O a ni mea o aoao mai e nei fuaiupu e uiga i mea e mafai ona tatou faia ia faatasi ai le Agaga ma i tatou? (E ui e ono ta’u mai e tagata o le vasega ni nai talli, ia mautinoa latou te faailoa mai e faapeape a tatou talitonu ma usitai i afioga a le Alii, o le a Ia sasaa mai Lona Agaga i o tatou luga. E tatau i tagata o le vasega ona faailoa mai e faapea a tatou faatagaina Satani e uumau i o tatou loto, o le a aluese le Agaga o le Alii mai ia i tatou.)

Tatai atu mafaufau o tagata o le vasega i lisi sa latou tusia i luga a’e ma lalo ifo o ‘aū o loo i le laupapa. Ia fai atu o amioga ma uiga o loo i le afa pito i luga o le laupapa e faatusa i lo tatou mananao e talitonu ma usitai i afioga a le Alii, ae o amioga ma uiga o loo i le afa pito i lalo o le laupapa e faatusa i le amioleaga ma le loto-maaa.

O le a se mea o loo e faia e valaaulia malosi ai le uunaiga a le Agaga Paia i lou olaga ae taofi ai i fafo uunaiga a Satani mai lou loto?
Na faapefea ona fesoasoani le faia o se tasi o amioga o loo i le afa pito i luga o le laupapa e valaaulia ai le Agaga Paia i lou olaga? Atonu foi e te fai atu i tagata o le vasega e mafaufau loloto pe na latou faia soo se amioga pe o ia i latou soo se uiga o loo lisi i le afa pito i lalo o le laupapa ma ia mafaufau pe na faapefea ona taunuu ai i le faaitiitia o uunaiga a le Agaga i o latou olaga.)

Fai atu i tagata o le vasega e tusi i a latou api po o api talaaga mo suesuega o tusitusiga paia se mea se tasi o le a latou faia e valaaulia ai le Agaga o le Alii i o latou olaga. Uunai i latou e mulimuli i ai e ala i a latou sini.

Helamana 7

Ua talai atu Nifae i sa Nifae amioleaga ma poloaiina i latou ia salamo

Mo fesili taitasi o loo i lalo, fai atu i tagata o le vasega e faaaoga a latou tusitusiga paia e sue ai tali i se vave latou te mafai ai. Faatonu i latou e tutu i luga pe a latou maua le tali. Tofi le tagata e muamua tu e tali i fesili taitasi. Ona fai atu lea i tamaiti e nonofo i lalo a’o lei faitauina atu le isi fesili e sosoo ai.

E tusa ai ma le Helamana 7:1, o ai le igoa o le perofeta sa toe foi mai mai le laueleele i matu?
O le fea fuaitau i le Helamana 7:2 o loo faamatala ai le mea sa aoao atu e Nifae i tagata i le laueleele i matu?
E tusa ai ma le Helamana 7:3, aisea na tuua ai e Nifae le laueleele i matu?
E tusa ai ma le Helamana 7:4, o ai na nofoia le nofoa faamasino i le taimi sa toe foi ifo ai Nifae i Saraemila?

Fai atu i se tagata o le vasega e faitau leotele le Helamana 7:5, ma fai atu i le vasega e ta’u mai pe sa faapefea ona taitai e le au faomea a Katianetona le nuu.

Otooto le Helamana 7:6–12 i le faamatala atu lea ina ua vaai Nifae i le tulaga o lona nuu, “sa malena ae lona loto ma le faanoanoa” (Helamana 7:6). Sa alu ae o ia i luga o se olo i lana faatoaga e tatalo ma aue ai i le amioleaga o le nuu. Ina ua faalogo le nuu o tatalo ma aue o ia, sa faapotopoto ae le motu o tagata e fia iloa pe aisea sa le fiafia ai o ia. Sa ia faaaogaina le avanoa e aoao ai i latou.

Fai atu i tagata o le vasega e faitau filemu le Helamana 7:15–16.

Aisea na fai mai ai Nifae “ua tatau tele ai [i le nuu] ona ofo”?
O le a le mea o loo sailia e Satani?

Fai atu i tagata o le vasega e nonofo ma mafaufau e uiga i faatusa na faaaoga e Nifae. A uma ona uumau e Satani loto o le nuu, ona ia saili lea e lafo ese o latou agaga i lalo i le pagatia tumau-faavavau.

Aisea e te manatu ai sa lapataia ai e Nifae le nuu e uiga i faamoemoega o Satani? O le a le mea sa manao Nifae ia latou aloese ai?

Fai atu i ni tagata o le vasega e feauauai i le faitauina leotele mai le Helamana 7:17–22, 26–28. Fai atu i le afa o le vasega e ta’u mai agasala a sa Nifae, ae fai atu i le isi afa e ta’u mai taunuuga sa lapatai atu Nifae o le a oo i ai pe afai e le salamo le nuu.

A o lipoti mai e le afa muamua o le vasega mea na latou maua, ia taulai atu i vaega talitutusa i mea o loo tusia i le afa pito i lalo o le laupapa. A o lipoti mai le afa lona lua o le vaega, fai atu fesili nei:

O le a le fuaitau i le Helamana 7:22 o loo ta’ua ai se mea e taofia e le Alii mai ia i latou o e mumusu e salamo? (Atonu e te manao e fautua atu i tagata o le vasega e faailoga le fuaitau lenei i a latou tusitusiga paia.)
E tusa ai ma le Helamana 7:28, o le a le mea na oo i ai ina ua mumusu le nuu e salamo? (O le a latou fano. Atonu e te manao e faamalamalama atu i le tulaga o sa Nifae, o lo latou mumusu e salamo o lona uiga o le a latou fano i le faaletino ma le faaleagaga.)

Tusi le upu moni lenei i luga o le laupapa: Afai tatou te mumusu e salamo i a tatou agasala, o le a aveesea le puipuiga a le Alii ma faamanuiaga o le ola faavavau.

Ina ia fesoasoani ia malamalama tagata o le vasega i le mataupu faavae lenei, fai atu ia i latou e faamatala po o a taunuuga e ono oo mai i tagata i tulaga o loo ta’ua i lalo: (1) E musu se alii talavou e salamo i se mausa o ponokalafi; (2) O se tulaga e sili ona ave i ai le faamuamua a se tamaitai talavou o le avea ma se tamaitai ta’uta’ua ma lauiloa, e ui lava ina ese mea sa aoaoina ai e ona matua; (3) E ui ina faalogo o ia i aoaoga a perofeta e suesue i tusitusiga paia ma tatalo, ae e musu se alii talavou e fai se mea o na mea.

Fai atu i tagata o le vasega e mafaufau loloto i auala e ono manaomia ai ona salamo. Uunaia i latou e salamo ina ia mafai ona latou maua e le aunoa le malosi ma le puipuiga a le Alii i o latou olaga.

Tala ma Faamatalaga o Talaaga

Helamana 6:35–36. “Ua amata ona aluese le Agaga o le Alii”

Sa aoao mai Elder David A. Bednar o le Korama a Aposetolo e Toasefululua e faapea, o a tatou filifiliga ma amioga e mafai ona mafua ai lo tatou o ese mai le Agaga Paia:

“E tatau foi ona tatou taumafai e iloatino le taimi tatou te ‘aveese ai [tatou lava] mai le Agaga o le Alii, ia leai sona nofoaga i totonu ia te [i tatou] e taitai ai [tatou] i ala o le poto ina ia mafai ona [tatou] manuia ai, ma uluola, ma faasaoina’ (Mosaea 2:36). O le mea tonu lava, ona o le faamanuiaga folafolaina ia tatou maua pea Lona Agaga e faatasi ma i tatou, o lea e tatau ai ona tatou faalogo atu ma aoao mai filifiliga ma uunaiga e vavaeese ai i tatou mai le Agaga Paia.

“E manino lava le tulaga faatonuina. Afai o se mea tatou te mafaufau i ai, vaai i ai, faalogoina, pe faia foi e faataumamao ai i tatou mai le Agaga Paia, o lona uiga ua tatau loa lava ona taofia loa le mafaufau i ai, vaai i ai, faalogologo i ai, po o le faia o lena mea. Mo se faataitaiga afai o le mea o loo faamoemoe e faafiafia ai, e tavavaeese mai ai tatou mai le Agaga Paia, ua manino mai ai o na ituaiga o faafiafiaga e le mo i tatou. Talu ai e le mafai ona mafuta le Agaga ma mea faatufanua, o mea paaa, pe le tausaafia foi, o lona uiga e manino lava e le mo i tatou foi na mea. Ona tatou te vaveesea le Agaga o le Alii pe a tatou auai i gaoioiga ua tatou iloa e tatau ona tatou teena, o mea la faapena e mautinoa lava e le mo i tatou” (“That We May Always Have His Spirit to Be with Us,” Ensign po o le Liahona, Me 2006, 30).

Helamana 6:35–36. “Ua amata ona liligi ifo e le Alii lona Agaga”

Sa saunoa atu Peresitene Henry B. Eyring o le Au Peresitene Sili i faiaoga seminare ma le inisitituti e uiga i le tiute o le Agaga Paia i le aoaoina o le talalelei:

“E le mafai e o tatou tagata o le vasega ona iloa le Atua, ma faapea ona alolofa ai e pei ona tatau ai ona latou alolofa atu, sei vagana ua aoaoina i latou e le Agaga Paia. E na o le Agaga lava e mafai ai ona latou iloa o le Tama Faalelagi ma Lona Alo toetu ma faamamaluina na faaali ane ia Iosefa Samita. E na o le Agaga lava e mafai ai ona latou iloa o le Tusi a Mamona o le afioga moni a le Atua. E na o le mauaina o na molimau, teufatuina loloto i o latou loto e le Agaga Paia, o le a mafai ai ona faamauaaina i se faavae mautu e tutu mausali e ala i tofotofoga ma faigata i o latou olaga” (“To Know and to Love God” [address to CES religious educators, Feb. 26, 2010], 2, si.lds.org).