Lesona 142

Mamona 9

Faatomuaga

Na faaiu e Moronae le talafaamaumau a lona tama i le valaau atu ia i latou e lei talitonu ia Iesu Keriso ia liliu mai i le Alii e ala i le salamo. Na ia aoao atu o le Atua o se Atua o vavega e le suia, ma e na o le lē talitonu e taofia ai vavega. Na ia fautuaina tagata ia talitonu ia Iesu Keriso ma ia tatalo i le Tama ma o latou loto atoa i le suafa o Iesu Keriso ina ia latou maua mea latou te manaomia.

Fautuaga mo le Aoaoga

Mamona 9:1–6

Ua valaau atu Moronae ia i latou e le talitonu ia Iesu Keriso ia salamo

Fai atu i tamaiti aoga e mafaufau i se tulaga na latou lagona ai le le mautonu. Valaaulia nai tamaiti aoga e faamatala mai ni o latou aafiaga ma faamalamalama mai pe aisea na latou le mautonu ai. E mafai foi ona e fesili ia i latou pe o le a se mea semanu e mafai ai ona latou lagona le sili atu ona mautonu i na tulaga.

Valaaulia tamaiti aoga e faitau le leoa le Mamona 9:1–5, ma vaavaai mo le tulaga le mautonu na faamatalaina e Moronae. (Atonu foi e te manao e valaaulia tamaiti aoga e faitau le Alema 12:12–15 ma tusi lenei mau i autafa o le Mamona 9:1–5.)

• I le Faamasinoga Mulimuli, o le a faapefea lagona o e amioleaga i le afioaga o le Atua le Tama ma Iesu Keriso? Aisea o le a latou lagona ai faapea?

Valaaulia se tamaitiiti aoga e faitau leotele le saunoaga lenei mai ia Peresitene Iosefa Filitia Samita:

Peresitene Iosefa Filitia Samita

“E le mafai ona i ai le faaolataga e aunoa ma le salamo. E le mafai ona ulu atu se tagata i le malo o le Atua ma ana agasala. O se mea o le a lē fetaui mo se tagata le sau i le afioaga o le Tama ma nofo ai ma ana agasala i le afioaga o le Atua. …

“Ou te manatu e toatele naua tagata i luga o le fogaeleele, atonu e toatele i latou i le Ekalesia—ni nai tagata i le Ekalesia—o e i ai se manatu e mafai ona latou ola i lenei olaga i le faia e pei ona latou mananao ai, solia o poloaiga a le Alii ma i le iuga e latou te o atu i lona afioaga. Latou te manatu o le a latou salamo, pe atonu i le lalolagi o agaga.

“E tatau ona latou faitau i nei upu a Moronae [upusii Mormon 9:3–5].

“Pe tou te manatu ea o se tagata sa le faamaoni i lona olaga, o le na tetee i le Atua, o le na le maua le agaga o le salamo, o le a fiafia pe mafanafana pe a faatagaina e sau i le afioaga o le Atua?” (Doctrines of Salvation, ed. Bruce R. McConkie, 3 vols. [1954–56], 2:195–96; ua aveese faatusilima sa muai i ai).

• Aisea tatou te manaomia ai ia salamo i a tatou agasala ae aua le faatali i le Faamasinoga? (Ina ia fesoasoani i tamaiti aoga e tali lenei fesili, atonu e te manao e valaaulia i latou e faitau le Alema 34:33–38.)

Valaaulia se tamaitiiti aoga e faitau leotele le Mamona 9:6. Fai atu i le vasega e mulimuli i le faitauga, ma vaavaai po o a mea e tatau ona fai e i latou e le talitonu ina ia latou lagona ai le fiafia i le afioaga o le Atua. A uma ona lipoti mai e tamaiti aoga mea na latou maua, fai atu ia i latou e faailoa mai upu ma fuaitau i le Mamona 9:6 o loo faamatalaina ai i latou na liliu i le Alii ma tatalo mo le faamagaloga. Atonu e te manao e fautuaina tamaiti aoga e faailoga upu ma fuaitau na latou maua.

Valaaulia tamaiti aoga e tusi i api po o api talaaga o le suesueina o tusitusiga paia se mataupu faavae o loo otooto ai Mamona 9:6. Valaau i ni tamaiti aoga se toalua pe toatolu e faitau mea na latou tusia. E ui lava e eseese upu na faaaoga e tamaiti aoga, o a latou tali e tatau ona faamatalaina ai le mea moni lenei: Afai tatou te salamo, o le a maua i tatou ua le pona pe a tatou o mai i le afioaga o le Atua.

Valaauina o tamaiti taitoatasi

O le valaauina o tamaiti taitoatasi e mafai ona uunaia ai le auai o i latou e le masani ona faasoa mai. Fesoasoani i tamaiti ia saunia e faasoa mai e ala i le tuuina atu o le taimi ia te i latou e mafaufau ai ae lei valaauina i latou. Ia faaeteete ia aua nei faamaina i latou pe faamalosia i latou e faasoa mai pe afai latou te le o mautonu e faia.

Molimau atu o le salamo ma le ola amiotonu, e mafai ona tatou saunia ai e lagona le mafanafana i le afioaga o le Alii. Valaaulia tamaiti ia mafaufau loloto i le mea e tatau ona latou faia nei ina ia saunia ai e fetaiai ma le Alii.

Mamona 9:7–20

Na folafola mai e Moronae e faia e le Atua vavega ma tali i tatalo a e faatuatua

Tusi le vavega i luga o le laupapa. Fai atu i tamaiti aoga pe faapefea ona latou faamatalaina lenei upu. A uma ona tali mai ni nai tamaiti, valaaulia le vasega e sue le vavega i le Taiala i Tusitusiga Paia. Fai atu ia i latou e faitau le tusiga, ma vaavaai mo faamatalaga e ono faamanino pe faaopoopo i le uiga na latou fautuaina mai.

• Aisea i lou manatu e le talitonu ai nisi tagata i vavega?

Otooto le Mamona 9:7–8 e ala i le faamatalaina faapea o Moronae na lauga i tagata i aso e gata ai o e faapea mai o faaaliga, valoaga, meaalofa faaleagaga, ma vavega e le o toe i ai.

Vaevae tamaiti i ni paga tai toalua. Valaaulia se paga e faitau le leoa le Mamona 9:9–11, ao faitau e isi le Mamona 9:15–19. Fai atu i tamaiti aoga taitasi e tusi mea taua na fai e Moronae e faatauanau ai tagata ia talitonu i vavega. Pe a lava le taimi mo tamaiti aoga e faauma ai, valaaulia i latou e lipoti ia latou paga mea na latou tusia.

I le itu tauagavale o le laupapa, tusi ai E leai ni vavega pe a tatou …

I le itu taumatau o le laupapa, tusi ai E tutupu vavega pe a tatou …

Valaaulia se tamaitiiti e faitau leotele le Mamona 9:20, ma fai atu i le vasega e vaavaai mo mafuaaga e tolu e le faia ai e le Atua ni vavega i Ana fanau. Valaaulia se tamaitiiti e tusi nei mafuaaga i le laupapa e faauma ai le fuaitau i le itu tauagavale o le laupapa, e pei ona faaalia i le kata lenei.

Fai atu i tamaiti aoga e toe faaupu fuaitau taitasi e uiga i le le toe i ai o ni vavega i se auala e faamatala ai se tulaga e mafai ona tutupu ai vavega. O a latou tali e tatau ona pei o faataitaiga i le itu taumatau o le kata.

E leai ni vavega pe a tatou …	E tutupu vavega pe a tatou …
Faaitiitia i le le talitonu	Faateleina lo tatou faatuatua
Aluese mai le ala sao	Ola i le ala sao, po o le tausia o poloaiga a le Atua
Le iloa le Atua lena e tatau ona tatou talitonuina	Oo ina iloa ma talitonu i le Atua

Valaaulia tamaiti aoga e iloilo vave le Mamona 9:9, 19, ma vaavaai mo aoaoga a Moronae e uiga i le natura o le Atua. A uma ona lipoti mai e tamaiti aoga mea na latou maua, fesili:

• Ona ua tatou iloa o le Atua e le masuia ma na Ia faia vavega i totonu o Ana fanau i taimi ua mavae, o le a se mea e mafai ona tatou iloa e uiga i Lona naunau e faia nei vavega i o tatou olaga? (E ui lava e ono faaaoga e tamaiti aoga ni upu eseese, e tatau ona latou faamatalaina le mataupu faavae lenei: Na masani ona fai e le Atua vavega, ma ona o Ia e le masuia, o loo ia faia pea vavega e tusa ai ma lo tatou faatuatua. Atonu e te manao e tusi lenei mataupu faavae i le laupapa ma fautuaina tamaiti aoga e tusi i autafa o le Mamona 9:19–20 ia latou tusitusiga paia.)

Faamatala atu faapea e mafai ona tatou maua le mana faavavega o le Atua i o tatou olaga i le tele o auala. Ina ia fesoasoani i tamaiti aoga e mafaufau i auala o loo avea ai pea le Atua ma Atua o vavega, valaaulia se tamaitiiti aoga e faitau le saunoaga lenei a Sister Sydney S. Reynolds o le au peresitene aoao o le Peraimeri:

“Ua ou aoaoina … o le a fesoasoani ai le Alii ia i tatou i tulaga uma o o tatou olaga pe afai tatou te taumafai e auauna ia te Ia ma faia Lona finagalo.

“Ou te talitonu o i tatou uma lava e mafai ona molimauina nei vavega laiti. Tatou te iloa ni tamaiti na tatalo i ni mea na leiloloa ma toe mauaina. Tatou te iloa ni tagata talavou na maua le lototetele e tutu atu ai o ni molimau a le Atua ma lagonaina Lona aao lagolago. Tatou te iloa ni uo na totogiina sefuluai i ni tupe mulimuli lava, ma e ala i se vavega, na mafai e i latou lava ona totogiina o latou pili o le aoga, po o o latou pili o fale mautotogi, pe na mafai foi ona maua meaai mo o latou aiga. E mafai ona tatou fetufaai mea na tutupu i tatalo na taliina ma faamanuiaga o le perisitua na tuuina atu le lototele, aumaia le faamafanafanaga, po o le toefuataiina o le malosi. O nei vavega i aso taitasi o loo fesoasoani ia i tatou ina ia iloa ai le aao o le Alii i o tatou olaga” (“O Se Atua o Vavega,” Liahona, Iulai 2001, 13).

• O a ni aafiaga na e oo i ai ua faamaonia ai o le Atua o loo avea pea ma Atua o vavega?

Mamona 9:21–37

Ua apoapoai mai Moronae i e le talitonu ina ia talitonu ia Iesu Keriso ma tatalo i Lona suafa

Valaaulia se tamaitiiti aoga e faitau leotele le Mamona 9:21. Fai atu i le vasega ia mulimuli i le faitauga, ma vaavaai mo mea na aoao mai e Moronae e uiga i le tatalo i le Tama Faalelagi.

• O le a le folafolaga na tuuina mai e Moronae? (O tali a tamaiti aoga e tatau ona atagia mai ai le mataupu faavae lenei: Afai tatou te tatalo i le faatuatua i le suafa o Keriso, o le a tuuina mai e le Tama Faalelagi soo se mea tatou te ole atu ai.)

Ina ia fesoasoani ia malamalama tamaiti aoga i le uiga o le tatalo “i le suafa o Keriso,” valaaulia se tamaitiiti aoga e faitau le faamatalaga lenei:

“Tatou tatalo atu i le suafa o Keriso pe afai o o tatou mafaufau o le mafaufau o Keriso, ma o o tatou manaoga o manaoga ia o Keriso,—pe a tumau foi ana upu ia i tatou (Ioane15:7). Ona tatou ole atu ai lea mo mea ua saʼo ma o le a mafai e le Atua ona tuuina mai. O ni isi tatalo e lē mafai ona maua mai ni tali ona ua le faia i le suafa o Keriso: ua lē tusa ai ma le finagalo o Keriso ae ua faia ia tatalo i le manatu faapito o le tagata (Taiala i Tusitusiga Paia, “Tatalo”).

Atonu e te manao e fai atu nei fesili:

• E faapefea ona tatou mautinoa o mea tatou te tatalo atu ai e atagia ai mea e finagalo ai le Alii mo i tatou?

• O anafea na tatou vaai ai i le folafolaga o loo aumai i le Mamona 9:21 ua faataunuuina? (E manaomia lou tuuina atu o le taimi i tamaiti aoga e mafaufau ai i lenei fesili ae latou te lei tali mai.)

Otooto le Mamona 9:22–25 e ala i le faamatalaina faapea na folafola atu e le Faaola i Ona soo ia faamanuiaga ina ua Ia auina atu i latou e talai le talalelei. Fai atu i tamaiti aoga e saili le Mamona 9:22–25 ma faailoa mai nisi o na faamanuiaga.

• O le a le uiga ia te oe faapea o le Faaola o le a “faamaonia [Ana] upu uma”? (Mamona 9:25).

Valaaulia tamaiti aoga e faitau le leoa le Mamona 9:27–29, ma vaavaai mo uiga ma amioga o le a fesoasoani ia i latou e agavaa ai ma maua le fesoasoani a le Atua. Atonu e te manao e fai atu i tamaiti aoga e tusi ni aotelega o nei fuaiupu i api po o api talaaga o le suesuega o tusitusiga paia.

Ina ia faaiuina lenei lesona, aotele le Mamona 9:30–34 i le tauina atu i tamaiti aoga faapea na popole Moronae ona o nisi o tagata i aso e gata ai o le a teena le savali o le Tusi a Mamona ona o le le atoatoa o i latou na tusiaina le tusi ma le gagana na tusia ai. Valaaulia se tamaitiiti aoga e faitau leotele le Mamona 9:35–37. Fai atu i le vasega e mulimuli i le faitauga, ma vaavaai mo mafuaaga na tatalo ai Moronae ma isi ina ia oo mai le Tusi a Mamona i aso e gata ai. (Ina ia mafai e i latou e tupuga mai i o latou uso, o sa Lamana, ona toefuataiina i le “malamalama o Keriso” ma feagaiga na osia e le Atua ma le aiga o Isaraelu.)

Ina ia fesoasoani i tamaiti aoga e aotele mea na latou aoaoina i le aso, fai atu fesili nei:

• E faapefea ona avea le Tusi a Mamona o se faamaoniga o le Atua o se Atua o vavega ma e tali mai o Ia i tatalo?

• O a mea moni na e aoaoina i le aso o le a uunaia ai au tatalo patino?

Iloiloga o le Mamona

Faaalu se taimi e fesoasoani ai i tamaiti aoga e iloilo ai le tusi a Mamona. Fai atu ia i latou e mafaufau i mea na latou aoaoina mai lenei tusi, i seminare ma a latou lava suesuega i tusitusiga paia. Valaaulia i latou e iloilo vave nisi o aotelega o mataupu i le Mamona e fesoasoani ia i latou e manatua ai. Fai atu i nai tamaiti aoga e faasoa mai se mea mai ia Mamona na musuia ai i latou pe na fesoasoani ia i latou e maua ai se faatuatua sili atu ia Iesu Keriso.

Tala ma Faamatalaga o Talaaga

Mamona 9:9–10. “O le Atua e tasi o ananafi, o le aso, ma le faavavau”

Na folafola mai e Moronae faapea o le Atua ua leai se feliuliuai e “tutusa lava ia ananafi, i le aso, ma le faavavau” (Mamona 9:9). E tusa ai ma le Mataupu Faavae ma Feagaiga 20:11–12, o le oo mai o le Tusi a Mamona ua faamaonia ai o loo faaauau pea ona “musuia e le Atua tagata ma valaaulia i latou i lana galuega paia” i o tatou aso e pei ona Ia faia i aso ua mavae, “ua faaalia mai ai o ia lava o le Atua e tasi o ananafi, i le aso, ma le faavavau.”

Ua tau mai e Lectures on Faith faapea ina ia mafai ona maua le faatuatua atoatoa i le Atua, e tatau ona i ai i se tasi “se manatu sao i le uiga o [Atua], lona atoatoa, ma ona mana” (Lectures on Faith [1985], 38). O se tasi o uiga o le Atua o le a le suia o Ia: “e le liliu o Ia, pe ia te Ia foi se mea faaletumau; peitai e tutusa o Ia mai le vavau e oo atu lava i le faavavau, o Ia lava mai ananafi, le aso, e oo atu lava i le faavavau; ma o lona ala o se taamiloga faavavau e tasi, e le masuia.”(Lectures on Faith, 41).

Mafaufau i faamanuiaga o le iloaina o le Atua o loo faaauau Lana galuega paia i o tatou aso ma o le a tutusa ananafi, le aso, ma le faavavau.

Mamona 9:10–26. Vavega

Na tuuina mai e Moronae faamaoniga e tele o loo molimauina ai vavega a le Atua—le foafoaina o le lagi ma le lalolagi, le foafoaina o le tagata, ma vavega na faia e Iesu ma Aposetolo (tagai Mamona 9:17–18). O “vavega a le Atua” o loo faamatalaina e Moronae o loo mafai ona tupu pea i le asō. Na aoao mai Elder Dallin H. Oaks o le Korama a Aposetolo e Toasefululua faapea e tele vavega e tutupu i o tatou aso ma o loo maua i le Ekalesia moni a Iesu Keriso:

“E tele vavega o loo tupu i aso uma i le galuega a la tatou Ekalesia i olaga o o tatou tagata. E toatele outou ua molimauina vavega, atonu e sili atu nai lo lo outou silafia.

“O le vavega ua faauigaina o se ‘mea e tupu taua e ala i le mana paia lea e le malamalama i ai mea faitino ma mo i latou lava e le mafai ona faia ni kopi.’ Aumaia mai le Daniel H. Ludlow, ed., Encyclopedia of Mormonism, 5 vols. (1992), 2:908. O le manatu ua auina mai nei mea e tutupu e ala i le mana paia, ua teena e le tele o tagata e le lolotu ma e oo lava i nisi o e lolotu.

“… O vavega e tutupu mai i le mana o le perisitua e masani ona maua i le Ekalesia moni a Iesu Keriso. [Tagai George Q. Cannon, Gospel Truth (1987), sel. Jerreld L. Newquist, 151–52. Ua aoao mai le Tusi a Mamona e faapea o le ‘Atua ua saunia le auala e mafai ai e le tagata, e ala mai i le faatuatua, ona mafai ona fai vavega maoae’ (Mosaea 8:18). O le ‘auala’ ua saunia o le mana o le perisitua (tagai Iakopo 5:14–15; MF&F 42:43–48), ma o lena mana e tupu ai vavega e ala mai le faatuatua (tagai Eteru 12:12; Moro. 7:37)” (“Miracles,” Ensign, June 2001, 6, 8).

Mamona 9:32–34. Na tusia e Moronae i le gagana liua a Aikupito

Na taua e Moronae faapea na ia te ia le gafatia e tusi ai e le itiiti ifo ma le lua gagana: Eperu ma le Aikupito liua. Na ia taua pe ana fai “e lava le tetele o a matou papatusi,” semanu na te tusia i le faa-Eperu; ae ui i lea, o i latou na tausia talafaamaumau na faaaogaina le “Aikupito liua” ona o le le lava o le avanoa (tagai Mamona 9:32–33). Talu ai nei lava i le Tusi a Mamona, na faaalia ai e Nifae ma le Tupu o Peniamina lo la faaaogaina o le gagana Aikupito. Na taua e Nifae faapea na ia tusia i “le gagana a tagata Aikupito” a o ia vaneina papatusi laiti (1 Nifae 1:2). A o ia talanoa atu i ona atalii e uiga i le taua o papatusi apamemea, na taua e le Tupu o Peniamina faapea na mafai e Liae ona faitau le talafaamaumau ona “sa aoaoina o ia i le gagana a tagata Aikupito” (Mosaea 1:4). O le mea lea, ua tatou malamalama ai na aoao atu e Liae le talalelei ma le gagana Aikupito “i ana fanau, ina ia mafai ona latou aoao atu ia latou fanau” (Mosaea1:4). E manino lava, o lenei mamanu na faaauau i tupulaga o tausi talafaamaumau o e na mulimuli mai seia aoaoina e Moronae le gagana mai lona tama. A e ui i lea, na faaalia e Moronae faapea na ia tusia i le “faa-Aikupito liua” lea na “tuulima faasolo mai ma matou suia … e tusa ma la matou gagana” (Mamona 9:32), e faaalia mai ai na faia ni nai suiga i le faaaogaina o le gagana i le silia ma le afe tausaga talu mai le taimi o Liae. O lenei mea e ono faamatalaina pe aisea na faaiuina ai e Moronae i se faaupuga faapea “na leai ni isi tagata latou te iloaina la matou gagana” ae peitai o le Atua na “ia saunia ai ala” mo le faamatalaina ma le faaliliuina mulimuli ane o le talafaamaumau (Mamona 9:34). O le gagana Aikupito na masani ona faaaogaina i aso o Liae, ae maise lava e le au faatau mai ma faatau atu na femalagaai solo i le atunuu atoa o Ierusalema. Afai, e pei ona fautuaina mai e nisi, o le galuega a Liae na manaomia ai o ia e faimalaga i le atunuu atoa, e foliga mai e tatau lava ona ia mautinoa na aoaoina lana fanau i le gagana Aikupito e lagolago ai le galuega a le aiga.