1 Nifae 15–19 (Iunite 4)

Sauniuniga o Anomea mo le Faiaoga o Suesuega e Faia i le Aiga

Aotelega o Lesona o Suesuega e Faia i le Aiga i Aso Taitasi

O le otootoga lenei o aoaoga ma mataupu faavae na aoaoina e tamaiti aoga, a o latou suesueina le 1 Nifae 15–19 (Iunite 4) e le o faamoemoeina ina ia aoao atu o se vaega o lau lesona. O le lesona e te aoaoina atu e taulai atu, tau lava o sina vaega o nei a aoaoga ma mataupu faavae. Mulimuli i uunaiga a le Agaga Paia, a o e mafaufau i manaoga o tamaiti aoga.

Aso 1 (1 Nifae 15)

Sa eseese le tali atu a Nifae ma ona uso i valoaga a Liae. I le suesueina ai o gaoioiga a Nifae, o le a iloa ai e tamaiti aoga faapea, afai tatou te fesili atu i le Alii, i le faatuatua, ma usiusitai i Ana poloaiga, o le a tatou saunia ai e maua faaaliga ma le taitaiga mai ia te Ia. Na faamalamalama mai e Nifae le uiga o le ai uamea, e ala i le faaali mai faapea, o le suesueina ma le mulimuli ai i le afioga a le Atua i aso taitasi, e faamalosia ai i tatou faasaga i faaosoosoga a Satani.

Aso 2 (1 Nifae 16)

Mai le tali atu a Lamana ma Lemuelu i aoaoga a Nifae, na vaai ai tamaiti aoga faapea, “e ave e tagata ua sala le upumoni o se mea faigata” (1 Nifae 16:2). Ina ua gausia e Nifae lana aufana, na ia faaalia faapea, afai tatou te faia mea uma tatou te mafaia ma sailia le taitaiga a le Alii, o le a fesoasoani mai le Alii ia i tatou i o tatou faigata. E ala i le suesueina o le auala na taitaia ai le aiga o Liae e le Liahona, na aoaoina ai e tamaiti aoga faapea “e ala i ala faatauvaa, e mafai e le Alii ona faataunuu ai mea tetele” (1 Nifae 16:29).

Aso 3 (1 Nifae 17)

Na toe faamatala e Nifae le aumau ai o lona aiga i le vao ma le taunuuga i le laueleele o Nuumau. Ina ua poloaiina o ia e fau se vaa, na ia faaalia faapea, afai tatou te tausia poloaiga, ona faamalosia lea e le Alii i tatou ma saunia auala mo i tatou e faataunuuina ai le mea ua Ia poloaiina ai i tatou. Na valaauina e le Alii uso o Nifae ina ia salamo i le tele o auala. Na aoaoina e tamaiti aoga faapea o le Agaga Paia e tautala mai i se leo filemu itiiti, lea e sili atu ona tatou lagonaina nai lo le faalogoina. Sa latou lisiina tulaga ma nofoaga ia e ono taofia ai i latou mai le iloaina o le leo filemu itiiti.

Aso 4 (1 Nifae 18–19)

O le faataitaiga a Nifae i le fausiaina o le vaa, na faaalia ai i tamaiti aoga faapea, o le faataunuuina o le mea e poloai mai ai le Alii, tatou te manaomia ai le sailia o Lana fesoasoaniga, ma tuu atu la tatou lava taumafaiga. O le suesueina o le malaga a le aiga o Liae i le laueleele folafolaina, na aoao mai ai faapea o le agasala e taitai atu ai i mafatiaga mo i tatou lava, ma o nisi taimi mo isi. O le faataitaiga a Nifae, ina ua sauaina o ia e ona uso, na aoao mai ai faapea, e mafai ona tatou vaai atu i le Atua ma tumau i le faatuatua i taimi o o tatou tofotofoga, ma e mafai e le tatalo ona fesoasoani ia i tatou e maua ai le filemu i taimi o o tatou tofotofoga.

Faatomuaga

I lenei vaiaso, ua aoao ai e tamaiti aoga mea taua na tutupu, a o faimalaga ai le aiga o Liae i le vao ma sopoia atu le vasa i le laueleele folafolaina. O lenei lesona, o le a fesoasoani i tamaiti aoga e toe iloilo na mea na tutupu ma talanoa ma molimau e uiga i aoaoga faavae na latou aoaoina. Fesoasoani i tamaiti aoga e mataitu, pe faapefea ona tumau le faatuatua o Nifae i taimi faigata. Uunai i latou e mulimuli i lana faataitaiga o le usiusitai ma le faalagolago i le Alii i taimi faigata.

Fautuaga mo le Aoaoga

1 Nifae 15–18

Ua faaalia e Nifae le usiusitai ma le faalagolago i le Alii e ui i tofotofoga

Afai o maua ata nei, sauni e faapipii i luga:

O Le Liahona (62041; Tusi Ata o le Talalelei [2009], nu. 68)
Ua Taofia e Nifae ona Uso Tetee (62044; Tusi Ata o le Talalelei, nu. 70)
O Liae ma Lona Nuu ua Taunuu i le Nuu o le Folafolaga(62045; Tusi Ata o le Talalelei, nu. 71)

Ina ia fesoasoani i tamaiti aoga e toe iloilo ma malamalama i le talaaga o mea na latou suesueina i lenei vaiaso, faapipii faafeleiloagai ata i luga, ma fai atu i tamaiti aoga e faavasega i latou i le faatulagaga sao. Valaaulia i latou e mafaufau faapea o i latou o faatonu o tala faasalalau, ma e manaomia le tusiaina o se ulutala e tolu i le ono upu mo ata taitasi. Faaali atu ata i le faasologa sa’o, ma fai atu i le vasega e tali mai i se ulutala talafeagai. Atonu e te manao e faitau leotele otootoga o mataupu mo le 1 Nifae 15–18 ina ia maua ai ni o latou manatu.

Ina ia saunia tamaiti aoga e talanoaina le 1 Nifae 15, fai atu ia i latou e faamatala mai se gaoioiga na latou auai lea na manaomia ai taumafaiga mai ia i latou, a o le’i o’o ina mafai ona latou fiafia i o latou taunuuga. O nei mea, atonu e aofia ai gaoioiga e pei o meaaoga, tataina o se mea faifaaili, po o taaloga.

Tusi le 1 Nifae 15:2–3, 7–11 i luga o le laupapa, ma tuu atu i tamaiti aoga le taimi e faitau ai nei fuaiupu. Fesili atu ia i latou, pe aisea na le mauaina ai e uso o Nifae le malamalamaaga e tasi lea na mauaina e Nifae e faatatau i faaaliga a Liae.

Pe a uma ona faalogologo atu ia latou tali, fesoasoani ia i latou ia iloa faapea o le mauaina o musumusuga ma le taitaiga mai le Alii, e manaomia muamua ai le ola amiotonu, taumafaiga, ma le faatuatua mai ia i tatou. Atonu e te manao e faamamafa atu lenei mataupu faavae e ala lea i le tusiaina i luga o le lauapapa.

Fai atu i tamaiti aoga e mafaufau loloto ma tali le fesili lenei: O a mea na tutupu ia te oe, ua fesoasoani ai ia te oe e iloa e moni lenei mataupu faavae?

Tusi le le maluelue i luga o le laupapa. Fesili atu i tamaiti aoga po o le a le uiga o le le maluelue? Pe a uma ona tuuina mai a latou tali, tusi i luga o le laupapa: malosi ma le le motusiaina i taimi o faigata po o le tele o mea e fai.

Ina ia fesoasoani i tamaiti aoga ia malamalama pe faapefea ona fesootai le upu le maluelue ia Nifae, tuu atu se tasi o mataupu nei i tamaiti aoga taitasi: 1 Nifae 16, 17, po o le 18. Afai e toatele lau vasega, atonu e fesoasoani le tuu o tamaiti aoga i vaega, ma fai atu ia i latou e galulue faatasi i se mataupu.

Tusi fesili nei i luga o le laupapa: Uunai tamaiti aoga e faaaoga la latou mataupu na tuuina atu ma le vaega talafeagai mai le tusi a le tamaitiiti aoga, e tali ai fesili.

O a tofotofoga na feagai ma Nifae i le mataupu na outou iloiloina?
Na faapefea ona faaaogaina e Nifae le faatuatua i lena tulaga? O a fuaiupu po o faaupuga ua faaalia ai le faamaoniga faapea o le faatuatua o Nifae sa le maluelue?
O a mataupu faavae o le talalelei ua faaalia i totonu o le mataupu? O a ni mea na tutupu ia te oe, faatasi ma nei mataupu faavae, ua faapea ona faatupulaia ai lau molimau?

Tuu atu se taimi ia lava mo tamaiti aoga e faauma ai lenei galuega. Ona fai atu lea i se tamaitiiti aoga se toatasi na tuuina atu i ai mataupu taitasi e faasoa mai ana tali. (Afai e lava au tamaiti aoga, atonu e te manao e fai i se tamaitiiti aoga e lipoti mai i fesili taitasi mo mataupu taitasi.)

Valaaulia se tamaitiiti aoga e faitau leotele mai le faamatalaga lenei mai ia Elder Russell M. Nelson o le Korama a Aposetolo e Toasefululua:

“Aisea tatou te manaomia ai se faatuatua le maluelue faapena? Aua foi o loo i luma atu aso faigata. I le lumanai, o le a seasea lava faigofie pe lauiloa le avea ma se tagata faatuatua o le Au Paia o Aso e Gata Ai. O le a tofotofoina i tatou uma taitoatasi. … O lena lava sauaga e mafai ona olopala ai oe seia e matua vaivai ai lava, pe faaosofia ai foi oe ia e avea ma faataitaiga lelei ma lototele atili i lou olaga i aso uma.

“O le auala e te taulimaina ai tofotofoga o le olaga, o se vaega o le atinaega o lou faatuatua. E oo mai le malosi, pe a e manatua o loo i ai sou natura paia, o se tofi e le uma lona taua” (“Faasaga Atu ma le Faatuatua i le Lumanai,” Ensign po o leLiahona, Me 2011, 35–36).

Valaaulia tamaiti aoga e faasoa mai manatu e uiga i le auala e mafai ai ona latou faafetaiaia luitau o le olaga ma tofotofoga faaletagata lava ia, e pei ona sa faia e Nifae.

1 Nifae 19

Na faamaumau e Nifae valoaga e uiga ia Iesu Keriso e faatauanau ai i tatou e manatua o Ia

Pe a lava le taimi, fai atu i tamaiti aoga e toe iloilo mea na latou tusiaina i totonu o a latou api talaaga mo le suesueina o tusitusiga paia mo le aso 4, galuega fai lona 5. Fesili atu pe i ai nisi o i latou e mananao e faasoa mai mea na latou tusia e uiga i lo latou alofa mo le Faaola. Ona faasoa atu lea o ou lagona e uiga i le Faaola.

Na alofa Nifae i le Faaola ma manatua o Ia i taimi o ona tofotofoga. Molimau atu faapea, a o tatou alolofa ma manatuaina le Faaola, o le a Ia fesoasoani mai ma lagolagoina i tatou i o tatou tofotofoga.

Iunite e Sosoo Ai (1 Nifae 20–2 Nifae 3)

I le iunite e sosoo ai, o le a suesueina ai e tamaiti aoga nisi o upu mulimuli a Liae i lona aiga a o le’i maliu o ia. O le a faapea foi ona latou faitauina se valoaga sili ona mamao i tua lona aso, mamao lava a o le’i afio mai Keriso, e uiga i le Perofeta o Iosefa Samita.