Helamana 8–9

Faatomuaga

Ina ua uma ona folafola atu e Nifae e ao i tagata ona salamo a leai o le a faaumatiaina, sa faaosofia e faamasino piopio le toatele o tagata e tetee ia te ia. O nisi o tagata sa matilatila lo latou puipuia o ia. Sa aoao atu Nifae e faapea, o tagata e teena lana molimau ua teenaina foi molimau a perofeta uma o e sa muamua atu ia te ia, o i latou uma sa molimau ia Iesu Keriso. I le avea ai ma se molimau o ia o se perofeta, sa faaali atu ai e Nifae ua maliu fasia le faamasino sili. Ina ua faamaonia upu a Nifae, sa taliaina o ia o se perofeta e nisi o tagata.

Fautuaga mo le Aoaoga

Helamana 8:1–10

Sa taumafai faamasino piopio e faaoso tagata ia tetee ia Nifae

O a nisi o uunaiga e taumafai e tauanau oe ia aua e te talitonu i upu a perofeta?

A o talanoaina e tagata o le vasega le fesili lenei, fai atu i se tamaitiiti e tusi a latou tali i luga o le laupapa. Fai atu i tagata o le vasega e vaavaai mo malamalamaaga e uiga i mea e tatau ona latou faia pe a latou fetaiai ma uunaiga e pei o ia o le a latou faitau i ai i le aso i le Helamana 8.

Faamanatu atu i tagata o le vasega sa momoli atu ma le lototoa e Nifae se savali o le salamo i lona nuu (tagai i le Helamana 7). Fai atu i ni tagata eseese o le vasega e feauauai i le faitauina leotele mai le Helamana 8:1–6. Fai atu i le vasega e mulimuli i le faitauga, e faailoa ai le ala na tali atu ai faamasino i le aoaoga a Nifae. Atonu e te manao e faailoa atu o nisi o faamasino sa avea ma se vaega o le au pulega faalilolilo a Katianetona.

O le a le savali a faamasino i le nuu? (Sa latou taumafai e faatauanau le nuu ia feita ia Nifae.)
E tusa ai ma le Helamana 8:4, aisea na le faasalaina ai e faamasino ia Nifae?

Fai atu i tagata o le vasega e mafaufau i se mea latou te faia pe afai e taumafai se tasi e tauanau i latou e lafoai i upu a perofeta.

Ta’u atu i tagata o le vasega, sa i ai nisi o tagata sa faaali lo latou le mananao i le manatu lea e fai ni faamasino. Fai atu i se tagata o le vasega e faitau leotele le Helamana 8:7–9. Ia ta’u atu, e pei foi i le tumutumu o ni tagata, e mafai ona sii ae o tatou leo e lagolago ai le perofeta, e tusa lava pe e le o se mea taatele lea e fai.

Pe sa i ai ni taimi o lou olaga sa e sii ae ai lou leo e lagolago le perofeta soifua, e tusa lava pe sa le fiafia le toatele i ana aoaoga? Na faapefea ona fai e lenei mea se eseesega i lou olaga? Na faapefea ona uunaia ai isi?

Fai atu i tagata o le vasega e faitau filemu le Helamana 8:10 e sue ai pe na faapefea ona fai e upu a nei tagata se eseesega.

O le a se eseesega sa faia ai ina ua lagolagoina e nisi o nei tagata le perofeta? Aisea e te manatu ai e taua lo tatou faia o lea mea i aso nei?

Fai atu i se tagata o le vasega e faitau le faamatalaga a Elder M. Russell Ballard o le Korama a Aposetolo e Toasefululua:

“E moomia ona tatou manatuaina le saunoaga a Edmund Burke: ‘E na o le pau le mea e moomia e le tiapolo ina ia manumalo ai o le leai lea o se mea e faia e tagata lelei .’ [Attributed in John Bartlett, comp., Familiar Quotations, 15th ed. (1980), ix.] E moomia ona sii i luga o tatou leo faatasi ma isi tagatanuu popole i le lalolagi atoa i le tetee atu i nei faiga ua fotu mai. E moomia ona tatou ta’u atu i e o loo lagolagoina nei ala o faasalalauga mataga ua lava nei mea ua i ai. E tatau ona tatou lagolagoina polokalama ma oloa e lelei ma musuia. O le aufaatasi ma tuaoi ma uo o e tutusa o tatou atugaluga, e mafai ai ona tatou auina atu se savali manino ia i latou e nafa ma na mea” (“Ia Lagonaina O Tatou Leo,” Ensign po o le Liahona, Nov. 2003, 18).

E mafai faapefea ona tatou teena uunaiga o loo taumafai e tauanau i tatou ia tetee atu i upu a perofeta?
O a nisi o auala talafeagai e tautatala atu ai e tetee i uunaiga leaga ae lagolago ai upu a perofeta?

Fai atu i tagata o le vasega e faamatala atu se taimi sa latou, po o se tasi latou te iloa, tutu atu ai e tetee i na ituaiga uunaiga.

Helamana 11–24

Ua aoao mai Helamana o perofeta uma e molimau mai ia Iesu Keriso

Fai atu i se tagata o le vasega e faitau leotele le Helamana 8:13. Fai atu i le vasega e mulimuli i le faitauga ma ta’u mai upu sa fai atu e Nifae ia sa teena e le nuu. Faaali atu i tagata o le vasega le ata o Mose ma le Gata Apamemea (62202; Tusi Ata o le Talalelei [2009], nu. 16). Fai atu ia i latou e faitau le Helamana 8:14–15 ma ta’u mai mea sa aoao mai e Mose e uiga i le Faaola.

O a nisi o auala e mafai e se tagata ona “vaai atu ai i le Alo o le Atua ma le faatuatua”?
Ina ia i ai se “agaga salamo,” e pei ona faaalia i le Helamana 8:15, ia lotomaualalo, salamo, ma gauai atu i le finagalo o le Alii. Aisea e taua lenei uiga faaalia a o tatou vaai atu i le Faaola?
E mafai faapefea e le iloaina o le misiona a le Faaola ona fesoasoani ia i tatou e tetee atu i le amioleaga?

Fai atu i tagata o le vasega e toe faamatala le aoaoga o loo i le Helamana 8:15, e faaaoga ai a latou lava upu. Mo se faataitaiga, latou te ono faapea mai afai tatou te taulai atu ia Iesu Keriso ma faaaoga le faatuatua ia te Ia, o le a tatou maua le ola faavavau.

Fai atu i se tagata e faitau leotele le Helamana 8:16. Fai atu i le vasega e mulimuli i le faitauga, ma ta’u mai isi o e sa aoaoina atu le savali o loo ta’u mai i le Helamana 8:15. Ona fai atu lea i tagata e sue vave i le Helamana 8:17–22 mo igoa o isi perofeta o e sa molimau ia Keriso. Fai i ai e mafaufau i le tele o molimau e uiga ia Iesu Keriso ua latou faitau pe faalogo i ai mai perofeta anamua ma perofeta o aso e gata ai.

Faamatala atu e toatele tagata sa teena Nifae ma lana savali. Fai atu i le vasega e faitau le Helamana 8:24–26 ma ta’u mai po o a taunuuga na oo i ai sa Nifae ona o lo latou teenaina o molimau a perofeta.

Aisea e te manatu ai na feagai i latou o e sa teenaina pea lava pea le upumoni ma tetee i le Atua ma taunuuga ogaoga faapena?
O le a se taimi sa fesoasoani ai se savali a se perofeta e te liliu atu ai i le Alii?

Fai atu i tagata o le vasega e mafaufau pe mafai faapefea ona latou faaleleia atili a latou taumafaiga e liliu atu i le Faaola. Ia uunaia i latou e taulai atu i se auala se tasi o le a latou faaleleia i le vaiaso o lumanai.

Helamana 8:25–9:41

Ua faaalia e Nifae ua fasiotia le faamasino sili

Otooto le Helamana 8:25–28 i le faamatala atu lea, o se faamaoniga sa i ai le nuu i se tulaga agasala ma sa tautala atu Nifae i le afioga a le Atua, sa faaali atu ai e Nifae ua fasiotia le faamasino sili. Vaevae le vasega i ni vaega taitoalua. Fai atu i paga taitasi e vaai faalemafaufau o i latou o ni leoleo nana i le mataupu e suesue ai po o ai sa fasiotia le faamasino sili. Tusi fesili nei i luga o le laupapa pe fai o se pepa e tufa atu mo paga taitasi.

Aso Muamua o le Suesuega:

Ina ua suesue e ni tagata se toalima le tautinoaga a Nifae, o le a le mea sa latou maua? Aisea na latou pauu ai i le eleele? (Tagai i le Helamana 9:1–5.)
O ai sa masalomia e le nuu o i latou ia o le au fasioti tagata? (Tagai i le Helamana 9:7–9.)

Aso Lona Lua o le Suesuega:

O ai sa faasaoloto? (Tagai i le Helamana 9:10–13, 18.)
O ai sa tuua’ia? (Tagai i le Helamana 9:16–17, 19.)
O a isi faamatalaga faaopoopo sa ta’u atu e Nifae? (Tagai i le Helamana 9:25–36.)
O ai la le fasioti tagata? (Tagai i le Helamana 9:37–38.)

Fai atu i paga e sue tali i fesili 1 ma le 2. A ua lava loa le taimi na tuu atu i ai, ia fesili atu:

Ina ua maua e tagata e toalima le faamasino sili ua maliu, o le a le mea sa latou talitonu i ai? O le a le mea sa latou fefefe i ai? (Tagai i le Helamana 9:5.)

Fai atu i paga e tali uma loa fesili e faauma ai a latou suesuega. Ona fesili atu lea:

E tusa ai ma le faamatalaga a Nifae, o le a le tala o le a fai atu e Seanetuma pe a uma ona ia ioeina lona ta’usalaina? (Tagai i le Helamana 9:36.)
E tusa ai ma le Helamana 9:39–41, aisea na talitonu ai nisi o tagata ia Nifae?

Fai atu i tagata o le vasega e otooto mea ua latou aoaoina mai le Helamana 9 e uiga i tuleiga a perofeta. E ono faailoa mai e tagata o le vasega ni manatu eseese, ae ia mautinoa latou te ta’uina mai le mataupu faavae lenei: O le a faataunuuina lava upu a perofeta. Ina ia faamamafa atu lenei upumoni, atonu e te manao e faitau e tagata o le vasega le Mataupu Faavae ma Feagaiga 1:37–38.

O a ni aafiaga ua faamalosia ai lau molimau o loo i ai ni o tatou perofeta moni i le lalolagi i aso nei?

Faaiu i lau molimau o le a faataunuuina lava upu a perofeta.

Tala ma Faamatalaga o Talaaga

Helamana 8:14–15. “O le gata apamemea”

Ina ua tautala Nifae e uiga ia Mose i lona sii ae o se “gata apamemea,” sa ia faatatau atu i se taimi sa faamalaiaina ai le fanauga a Isaraelu i “gata uogo” (tagai i le Numera 21:6–9; ia matau o le upu apamemea o lona uiga o le apa). O le tulaga na muamua atu i faafitauli o tagata Isaraelu o le, sa latou tautala leaga e uiga i le Atua ma Lana perofeta (tagai i le Numera 21:5). O i latou sa tetepa atu i le gata apamemea sa faamaloloina, ae o i latou o e sa filifili e le tilotilo atu i ai sa faafanoina (tagai i le Numera 21:9; 1 Nifae 17:41).

E pei foi o na tagata Isaraelu, o le toatele o tagata i aso o Nifae sa tautala tetee i le Atua ma Lana perofeta. Ina ua toe ta’ua e Nifae lena tala i le gata apamemea, sa ia faamamafa atu e tatau i lona nuu “vaai ae i luga ma le faatuatua i le Alo o le Atua” ma ola ai (Helamana 8:15; tagai foi i le Ioane 3:14–15, lea sa faatatau atu foi Iesu Keriso lava Ia i le gata apamemea o se faailoga o Lona Faasatauroga o le a oo mai). Ona faamanatu atu lea e Nifae i tagata e faapea, o perofeta uma sa molimau e uiga ia Keriso (tagai i le Helamana 8:16–23).