Lesona 92

Alema 34–35

Faatomuaga

Ina ua uma ona aoao e Alema sa Sorama ina ia talitonu i le Alo o le Atua, na folasia atu e Amoleka lana foi molimau e uiga ia Iesu Keriso, tuuina atu ai se molimau lona lua. O Amoleka, o le soa a Alema, na ia faamamafa atu le manaomia o le Togiola a Iesu Keriso mo le olataga o tagata uma ma e mafai e tagata taitoatasi ona mauaina ia faamanuiaga uma o le Togiola pe a latou faaaogaina le faatuatua e salamo ai. O le toatele o sa Sorama na talia le valaauga a Amoleka ina ia salamo. Ina ua tutuli ese i fafo mai le laueleele sa Sorama na salamo e o latou taitai ma faitaulaga amioleaga, na tausia i latou e sa Nifae ma le nuu o Amona ma fafaga, faalavalava, ma tuu atu fanua e fai mo o latou tofi. O se taunuuga la, na amata ona sauniuni sa Lamana ma sa Sorama e lei salamo mo se taua e faasagatau atu ia Sa Nifae ma le nuu o Amona.

Aoao atu i le Agaga ma molimau atu ia Iesu Keriso

Ia faia mea uma e te mafaia e fausia ai se siosiomaga e mafai ai ona aoaoina tamaiti e le Agaga Paia. O se tasi o auala sili ona anoa e fausia ai sea ituaiga siosiomaga o le taulai atu lea o au faataitaiga ma talanoaga i le Faaola, molimau soo atu e uiga ia te Ia, ma tuu atu ni avanoa i tamaiti e molimau mai ai e uiga ia te Ia.

Fautuaga mo le Aoaoga

Alema 34:1–14

Na aoao atu Amoleka i sa Sorama e uiga i le Togiola a Iesu Keriso

Tusi fuaiupu nei i luga o le laupapa ao lei amataina le vasega. Fai i tamaiti e tusi i totonu o api o le vasega po o luga o ni fasi pepa pe latou te manatu o fuaiupu taitasi o se mea sao po o se mea sese.

1. Ina ua togiola Iesu Keriso mo agasala a tagata, na Ia mafatia mo na o tagata amiotonu.

2. E manaomia e tagata uma le Togiola ina ia laveai ai.

3. E mafai e soo se tagata ona togiola pe totogi agasala a se tasi tagata.

A ua maua e tamaiti se taimi e faamaumau ai a latou tali, toe faamanatu atu ia i latou na aoaoina e Alema se vaega o sa Sorama i le auala e maua ai le afioga a le Atua ma faaaoga ai le faatuatua ia Iesu Keriso (tagai i le Alema 32–33). Aotele le Alema 34:1–7 e ala i le faamatala atu o Amoleka na mulimuli ia Alema i le faasoaina atu o lana lava molimau e uiga i le Faaola. Fai i tamaiti e suesue le leoa ia aoaoga a Amoleka i le Alema 34:8–9, 11, matau fasifuaitau ia o loo faailoa mai ai pe sao pe sese ia fuaiupu taitasi ia o loo luga o le laupapa. Ona toe iloilo faatasi lea o se vasega ia fuaiupu. O tali sao ia:

1. Sese—“O le a ia togiola mo agasala a le lalolagi” (Alema 34:8).

2. Sao—“E ao ona faia o se togiola, a leai o le a le maalofia le fano o tagata uma” (Alema 34:9).

3. Sese—“E leai se tagata e mafai ona ia taulagaina lona lava toto e togiola mo agasala a se tasi” (Alema 34:11).

A uma ona talanoaina e tamaiti le tali i le fuaiupu e 3, fesili:

• Aisea tou te manatu ai ua na o Iesu Keriso lava e mafai ona togiola mo agasala a le lalolagi?

Ina ia fesoasoani i tamaiti e tali le fesili lenei, valaaulia i latou e faitau le leoa le Alema 34:10, 14. Ona faitau lea o le faamatalaga lenei a Elder Russell M. Nelson o le Korama a Aposetolo e Toasefululua:

Elder Russell M. Nelson

“O Lana Togiola e le faatuaoia—e leai sona uiga. E le faatuaoia foi ina ia mafai ona faaolaina tagata ola uma mai le oti e le uma. E le faatuaoia pe a fuafua i Lona puapuagatia tele. … E le faatuaoia i se tulaga—na faia i le taimi e tasi mo tagata uma. Ma sa faalautele atu le alofa mutimutivale o le togiola e le gata i tagata e le mafaitaulia, ae faapena foi i lalolagi e le mafaitaulia na foafoaina e Ia. E le faatuaoia i le tulaga e le oo i ai se fua faatatau po o se malamalama o le tagata soifua.

“E na o Iesu lava e mafai ona ofoina atu lea ituaiga togiola le faatuaoia talu ona soifua mai o Ia i se tina faitino, ma se Tama e tino ola pea. Talu ai lena tofi tulaga ese, o Iesu o se Tagata e le faatuaoia” (“O Le Togiola,” Liahona, Ian. 1997, 39, 40).

“E tusa ma tulafono e faavavau, sa manaomia i lena togisala se taulaga e faia e se Tagata tino ola pea ua i ai le pule i le oti. Peitai e tatau ona Ia maliu ma toe faatuina mai Lona lava tino. Sa na’o le Faaola lava sa mafai ona ia faia lenei mea. Sa ia maua mai Lona tino faaletino le mana e maliu ai. A e sa ia maua mai Lona Tama le mana e manumalo ai i le oti” (“O Le Tumau i le Lotolotoi o Suiga,” Liahona, Ian. 1994, 41).

• O faapefea ona fesoasoani ia i tatou ia aoaoga a Amoleka faapea foi ma faamatalaga a Elder Nelson ina ia tatou malamalama ai i le mafuaaga ua na o Iesu Keriso lava e mafai ona togiola mo agasala a le lalolagi?

• E faapefea ona e aoteleina mea ua uma ona e aoaoina mai le Alema 34 e uiga i le Togiola a Iesu Keriso? (E mafai ona fautua mai e tamaiti aoga nisi upu moni, peitai e tatau ona mautinoa ua latou malamalama o le Togiola le faatuaoia ma le faavavau a Iesu Keriso ua maua ai e tagata uma le olataga.)

Ina ia fesoasoani i tamaiti ia talisapaia atili le manaomiaina o le Togiola i le fuafuaga o le faaolataga a le Tama Faalelagi, filifili e faaaoga le gaoioiga lenei. Atonu e te manao e fetuutuunai le gaoioiga lenei ina ia fetaui ma manaoga ma mea e fiafia i ai tamaiti o loo e aoaoina.

Tusi le fasifuaitau lenei i luga o le laupapa: Vaai faalemafaufau atu i le olaga e aunoa …

Tuu i luga se mea faitino e taua i le toatele o tagata talavou (e pei o se telefoni feaveai) ma fesili atu:

• O le a sou vaai faalemafaufau i le tulaga o le a i ai le olaga pe a leai le mea faitino lenei?

Ma le isi, tuu i luga se fagu po o se ipu vai (po o se isi mea ese e taua i le tausiga o le ola).

• O le a se tulaga semanu e i ai le olaga pe a leai se vai?

A uma ona talanoaina e tamaiti le tulaga manaomia o le vai, faatumu le faamatalaga o i le laupapa ina ia faitauina faapea: Vaai faalemafaufau i le olaga pe a leai le Togiola a Iesu Keriso.

• E faapefea ona ese le olaga pe a leai le Togiola a Iesu Keriso? (Tuu atu i tamaiti se taimi e mafaufau ai i lenei fesili ao lei talosaga atu mo ni tali. Afai e lava se taimi, atonu e te manao e valaaulia i latou e tusi ni tali o lenei fesili.)

Alema 34:15–41

Ua aoao atu e Amoleka sa Sorama i le auala e faaaoga ai le faatuatua e salamo ai

Faasino atu e ui na faataunuuina e Iesu Keriso le Togiola mo tagata uma, ae e le otometi ona tatou mauaina uma ia ona faamanuiaga. Na aoaoina e Amoleka le mea e tatau ona tatou faia ina ia maua uma ai faamanuiaga lea ua mafai ona maua ona o le Togiola. Valaaulia tamaiti e faitau le leoa le Alema 34:15–17 ma faailoa mai se fasifuaitau na faafa ona tauina e Amoleka. (“Faatuatua e salamo ai.”)

• O le a se mea o mafai ona tatou aoaoina mai le Alema 34:15–17 e uiga i le mea e ao ona tatou faia e mauaina atoa faamanuiaga o le Togiola? (Ia mautinoa o malamalama ia tamaiti ina ia mafai ona mauaina atoa faamanuiaga o le Togiola, e ao ona tatou faaaogaina le faatuatua e salamo ai.)

• O le a sou manatu o le uiga o le faaaoga le faatuatua e salamo ai?

Ina ia fesoasoani i tamaiti aoga ia malamalama i le uiga o le faaaogaina o le faatuatua e salamo ai, faitau le faamatalaga lenei mai ia Peresitene Dieter F. Uchtdorf o le Au Peresitene Sili:

“Tatou te manaomia se faatuatua malosi ia Keriso ina ia mafai ai ona salamo. … O le faatuatua ia Keriso o le a suia ai o tatou mafaufauga, talitonuga, ma amioga ia e le tusa ai ma le finagalo o le Atua. … O le salamo o lona uiga o se suia lea o le mafaufau ma le loto—tatou te tuu le faia o mea e sese, ma amata ona tatou faia mea e sa’o” (“Vaega Tonu o le Toe Foi Saogalemu,” Ensign po o le Liahona, Me 2007, 100).

• Aisea e taua ai le malamalama o le salamo e manaomiaina, e le gata i le tatou taofia o mea sese o loo tatou faia, ae e tatau ona tatou amata faia ia mea sa’o?

• E tusa ma le Alema 34:16, o a ni taunuuga e oo i ai pe a tatou faaaogaina le faatuatua e salamo ai?

• O le a le mea e tupu pe a tatou le faaaogaina le faatuatua e salamo ai? (Atonu e te manao e faamatala atu o le “tualiali i le tulafono atoa o manaoga o le faamasinotonu” o lona uiga o le pagatia lea i taunuuga uma o a tatou agasala ma ua le mauaina le faamanuiaga o le ola e faavavau.)

• E tusa ma le Alema 34:17, o le a se mea e tasi e mafai ona tatou faia e faaaoga ai le faatuatua e salamo ai?

Fai i tamaiti aoga e faitau le leoa le Alema 34:17–28. Fai i ai latou te vaavaai mo le mea na aoao atu e Amoleka ia sa Sorama e uiga i le tatalo, e aofia ai le taimi ma le mea e tatalo ai.

• O le a se mea na aoao atu e Amoleka e uiga i le tatalo lea e fesootai ai ma lou olaga? Aisea e te manatu ai o le tatalo o se vaega taua o le faaaogaina o le faatuatua e salamo ai?

• Na fai mai Amoleka e leai se mea tatou te maua mai ia tatou tatalo, pe ua lea aoga foi, pe afai tatou te le fesoasoani atu ia i latou o loo siomiaina i tatou (tagai i le Alema 34:28). Aisea e te manatu ai e moni lenei mea?

Ina ia fesoasoani i tamaiti e mafaufau i ni auala faaopoopo e mafai ai ona tatou faaaogaina le faatuatua e salamo ai, fai atu ia i latou e tali mai i faataitaiga nei:

1. Ua atinaeina e se alii talavou se uiga masani o le faaaogaina o se gagana le talafeagai. O a nisi auala e mafai ona ia faatino ai le faatuatua e salamo ai ina ia saoloto ai mai lenei uiga masani? (O tali e ono aofia ai le tatalo atu mo se fesoasoani, talosagaina o se fesoasoani mai tagata o aiga ma uo, ma le auai i gaoioiga e valaaulia ai le Agaga.)

2. O se tamaitai talavou ma se alii talavou ua amata ona aafia i se fegalegaleaiga le talafeagai. Sa la lagonaina le uunaiga a le Agaga Paia ina ia faamutaina lenei fegalegaleaiga i se taimi vave lava. E faapefea ona avea le mulimuli i lenei uunaiga o se faatusa o le faatuatua e salamo ai? O a nisi laasaga e ono manaomia e i latou ina ia faamautinoa ai ua latou i ai i le ala e faataunuu ai le salamo? (O tali e ono aofia ai le sailia o le taitaiga mai le epikopo po o le peresitene o le paranesi ma le tatalo mo le malosi ma le faamagaloga.)

• O le a le uiga o le faatuai? O a nisi mafuaaga e faatuatuai ai tagata?

Valaaulia tamaiti e faitau le leoa le Alema 34:33, vaavaai mo le mea na lapataia ai e Amoleka tagata sa Sorama e aua nei faatuai le faia. Valaaulia ni nai tamaiti aoga e feauauai i le faitauina leotele mai o le Alema 34:32–35. Ao latou faitau, fai i le vasega e vaavaai i taunuuga o le faatuai ona tatou salamo. A uma ona lipoti mai e tamaiti mea sa latou mauaina, tusi le upu moni lenei i luga o le laupapa: O le olaga lenei o le taimi lea mo i tatou e saunia ai e feiloai ma le Atua.

• Faamata e faapefea ona e faamatalaina lenei upu moni i se tagata?

• Mafaufau o loo i ai sau uo o loo solia ma le iloa nisi o poloaiga peitai o loo fuafua e salamo mulimuli ane. O le a se mea o le a e aoaoina atu i lenei uo e faatatau lea i le mea sa e aoaoina mai le Alema 34:32–35?

Faamatala atu o Amoleka sa le gata i le lapataia o taunuuga o le faatuai o le salamo; sa ia aoao atu foi e uiga i faamanuiaga o le filifili e salamo i le taimi lenei. Valaaulia tamaiti e faitau le leoa le Alema 34:30–31 ma matau mai lenei faamanuiaga.

• I le Alema 34:31, o le a se faamautinoaga o loo tuuina atu ia i latou o e salamo i le taimi lenei? (“O le taimi nei lava o le a faataunuu ai le fuafuaga tele o le togiolaina ia te outou.”)

Faitau le faamatalaga lenei a Peresitene Boyd K. Packer o le Korama a Aposetolo e Toasefululua:

“E te le tau manaomia ona iloa mea uma a o lei aoga le mana o le Togiola mo oe. Ia faatuatua ia Keriso ona amata ai lea ona galue ia te oe i le aso lava e te ole atu ai!” (“Fufulu Faamama,” Liahona, Iulai 1997, 10).

• O faapefea ona fesoasoani lenei faamautinoaga ia i tatou? O a ni auala na e lagona ai le amata aoga o le Togiola mo oe ina ua amata ona e faalagolago i ai?

Faitau le faamatalaga lenei mai ia Peresitene Harold B. Lee. Fai i tamaiti e faalogo i le mea na ta’ua e Peresitene Lee “o le tulafono sili ona taua”.)

“Pe afai ua outou faia ni mea sese, ia amata i le aso nei ona sui o outou olaga. Ia fulitua i le mea sese sa e faia. O le poloaiga e aupito sili ona taua a le Atua, o le poloaiga lena e tasi o loo faigata ia te oe ona tausia i le aso nei. Afai o le tasi o le le faamaoni, afai o le tasi o le le ola mama, afai o le tasi o le taufaasese, o le le tautala sa’o, o le aso lenei e te galue ai i lena mea seia iu ina mafai ona e faatoilaloina lena vaivaiga. … Ia faatoilaloina lena faafitauli ona amata lea i le isi tasi lena e pito sili ona faigata ia te oe le tausiaina” (Aoaoga a Peresitene o le Ekalesia: Harold B. Lee [2000], 33, 34).

• E tusa ai ma Peresitene Lee, o le a le poloaiga e sili ona taua? Aisea?

Tusi faamatalaga nei e lei maea i luga o le laupapa. Fai i tamaiti e tusi faamaea i totonu o a latou api o le vasega po o api talaaga mo le suesueina o tusitusiga paia.

I lenei vaitaimi, o le poloaiga sili ona taua ia te au o le …

O le a amata nei ona ou faaaogaina le faatuatua e salamo ai …

Alema 35

Ua o sa Sorama ua salamo e nonofo faatasi ma tagata amiotonu

Aotele le Alema 35 e ala i faamatalaina faapea o le toatele o sa Sorama na salamo mai a latou agasala. Na tutulieseina i latou mai le laueleele e o latou taitai ma faitaulaga amioleaga, ma sa latou o atu ma nonofo i le laueleele o Seasona faatasi ai ma le nuu o Amona. Na tuuina atu ia latou e le nuu o Amona fanua e fai mo o latou tofi.

Molimau atu e mafai ona tatou maua faamanuiaga o le Togiola a le Faaola i le taimi lava tatou te faaaoga ai le faatuatua e salamo ai. Uunaia ia tamaiti e mulimuli i le faataitaiga a le nuu o Amona ma sa Nifae e ala i le faaalia o le agalelei ma le tuuina atu o le lagolagosua ia i latou o e o saili ina ia salamo.

Manatu Faaopoopo Faafaiaoga

Alema 35. Fesoasoani atu ia i latou o e toe foi i le faatuatua

Valaaulia se tamaitiiti aoga e faitau leotele le Alema 35:7-9. Tuu atu i le vasega e vaai poo le a le mea na faia e Alema ma le nuu o Amona mo le salamo o sa Sorama. A uma ona tali mai tamaiti, faamatala atu o loo i ai i lenei vaitaimi ni tagata faapei o sa Sorama ia na salamo, i latou o loo saili ina ia salamo ma toe malolosi atoatoa i le Ekalesia ma e o loo manaomia ai le lagolagosua ma le faamalosiauga mai isi.

• O faapefea ona tatou mulimuli i le faataitaiga a Alema ma le nuu o Amona ao tatou faifai mea faatasi ai ma i latou o e o saili ina ia salamo ma toe malolosi atoatoa i le Ekalesia?

• Faamata e faapefea ona fesoasoani ia i latou lo tatou agalelei, lagolagosua, ma le faamalosiauga ina ia latou tumau ai ma le faamaoni?