Faatomuaga i Le Tusi a Iakopo
Aisea e suesueina ai lenei tusi?
E ala i le suesueina o le tusi a Iakopo, o le a mafai ai e tamaiti aoga ona aoaoina lesona taua mai se alii, o le sa i ai se faatuatua e le maluelue e uiga ia Iesu Keriso. Na faifai pea ona molimau Iakopo e uiga i le Faaola, ma valaaulia lona nuu ma i latou o e o le a faitau i ana upu ina ia salamo. Na ia aoao atu ma faaalia le taua o le faataunuuina ma le filiga o valaauga mai le Alii. Na ia lapataia lona nuu e uiga i le matautia o le faamaualuga, oa, ma le amio le mama. Na sii mai foi e Iakopo ma faaalia lona manatu e uiga i le talafaatusa a Senosa i laau o olive, lea ua faaalia ai taumafaiga le faavaivaia a le Faaola, ina ia aumaia le olataga i fanau uma a le Atua, ma tuuina mai se vaaiga lautele o fegalegaleaiga a le Atua ma le aiga o Isaraelu. I la laua fetaiaiga ma Serema, o se aneti-Keriso, na faaalia ai e Iakopo le ala e tali atu ai ma le amiotonu ia i latou o e fesiligia, pe faitioina lo tatou faatuatuaga.
O ai na tusiaina lenei tusi?
O Iakopo, le atalii lona lima a Sarai ma Liae, na tusiaina lenei tusi. Na fanaua o ia i le vao, i le taimi o le malaga a lona aiga agai atu i le laueleele folafolaina. I lona talavou, “na mafatia [ai Iakopo] i puapuaga ma le faanoanoa tele, ona o le le migao o [ona] uso” (2 Nifae 2:1). E ui i lea, na folafola atu e Liae ia Iakopo e faapea o le Atua o le a “faapaiaina [ona] puapuaga mo [lona] manuia” ma o le a ia faaaluina ona aso “i le galuega a [lona] Atua” (2 Nifae 2:2–3). I lona talavou, na vaai ai Iakopo i le mamalu o le Faaola (tagai i le 2 Nifae 2:3–4). Na faapaia e Nifae ia Iakopo e fai ma faitaulaga ma aoao mo sa Nifae (tagai i le 2 Nifae 5:26) ma mulimuli ane tuu atu ia te ia papatusi laiti a Nifae (tagai i le Iakopo 1:1–4). I le avea ai ma se taitai perisitua ma aoao faamaoni, na auauna ma le filiga Iakopo e faatauanau lona nuu ia talitonu ia Keriso (tagai i le Iakopo 1:7). Na ia mauaina faaaliga e faatatau i le Faaola, mauaina asiasiga a agelu, faalogoina le siufofoga o le Alii (tagai i le Iakopo 7:5), ma vaai i lona Togiola (tagai i le 2 Nifae 11:2–3). O Iakopo, o le tamā o Enosa, lea na ia tuuina atu i ai papatusi a o le’i o’o i lona maliu.
O ai na faatatau i ai le tusiaina o lenei tusi, ma pe aisea foi?
Na faatonuina e Nifae ia Iakopo e faamaumau aoaoga paia, faaaliga, ma valoaga “mo Keriso, ma mo le manuia o o matou tagata” (Iakopo 1:4). Na usitaia e Iakopo lenei faatonuga ma faasaoina tusitusiga ia na ia “manatu ua sili ona pele” (Iakopo 1:2). Na ia tusia e faapea: “Ua matou galulue ma le filiga e togitogi nei upu i luga o papatusi, i le faamoemoe o le a maua e o matou uso ma a matou fanau ia upu ma loto faafetai. … Aua, o le faamoemoe lenei ua matou tusia ai nei mea, ina ia mafai ona latou iloa, sa matou iloa e uiga ia Keriso, ma sa i ai ia te i matou se faamoemoe i lona mamalu i le tele o selau o tausaga i luma mai o lona afio mai” (Iakopo 4:3–4). Na faaalia se manatu o Iakopo i se autu tutotonu o ana tusitusiga, ina ua ia faapea mai, “Aisea tatou te le tautatala ai e uiga i le togiola a Keriso, ma saili ia maua se malamalama atoatoa e uiga ia te ia … ?” (Iakopo 4:12).
O anafea ma o fea foi na tusia ai lenei tusi?
E amata le tusi a Iakopo pe tusa o le 544 T.L.M., ina ua tuuina atu e Nifae ia Iakopo papatusi laiti. E faaiuina i le latalata ai i le faaiuga o le soifuaga o Iakopo, ina ua ia tuuina atu papatusi i lona atalii o Enosa. Na tusia e Iakopo lenei faamaumauga, a o nofo ai i le laueleele o Nifae.
O a nisi o vaaiga iloga o lenei tusi?
O le tusi a Iakopo ua tuuina mai ai faamatalaga e uiga i le faigamalo a sa Nifae, ina ua mavae le maliu o Nifae. Na faauuina e Nifae se alii e sosoo ma ia, e avea ma tupu ma taitai o le nuu, a o faaauau ona avea Iakopo ma lona uso o Iosefa, o ni taitai faaleagaga o sa Nifae. O se tasi vaaiga iloga o lenei tusi o le ta’usalaina e Iakopo o le faia ma le le faatagaina o autaunonofo. Na o le pau le mau faasino i lenei mataupu i totonu o le Tusi a Mamona o loo i le Iakopo 2. O le tusi a Iakopo, o loo aofia ai foi le mataupu sili ona umi i totonu o le Tusi a Mamona, Iakopo 5, lea o loo aofia ai le faataoto i laau o olive. I le faaopoopo atu i ai, o le tusi a Iakopo o loo faamaumauina ai le taimi muamua na matua lapataia ai e se perofeta o le Tusi a Mamona ia sa Nifae e uiga i le faamaualuga—le agasala lea o le a oo ina aumaia ai lo latou faafanoga (tagai i le Iakopo 2:12–22; Moronae 8:27). O loo faamaumauina ai foi le uluai oo atu o se aneti-Keriso ia sa Nifae.
1. Otootoga
Iakopo 1 Ua usitaia e Iakopo le poloaiga a Nifae e tausia se faamaumauga paia. Ua maliu Nifae. Ua auauna atu Iakopo ma Iosefa i tagata, e ala i le aoaoina o i latou i le afioga a le Atua.
Iakopo 2–3 I le lauga ai i le malumalu, ua lapatai atu e Iakopo ia sa Nifae e uiga i le faamaualuga, o le manao i le oa, ma le amio le mama.
Iakopo 4–6 Ua molimau atu Iakopo e uiga ia Keriso ma ia sii maia le talafaatusa a Senosa i laau o olive. Ua ia uunaia lona nuu ia salamo, talia le alofa mutimutivale o le Alii, ma ia sauniuni mo le faamasinoga.
Iakopo 7 Faatasi ma le fesoasoani a le Alii, ua faafememeaiina e Iakopo Serema, o se aneti-Keriso. Ua ia ta’ua feteenaiga i le va o sa Nifae ma sa Lamana, ma tuu atu papatusi laiti ia Enosa.