2 Nifae 32–Iakopo 4 (Iunite 9)

Sauniuniga o Anomea mo le Faiaoga o Suesuega e Faia i le Aiga

Aotelega o Lesona o Suesuega e Faia i le Aiga i Aso Taitasi

O lenei aotelega o aoaoga faavae ma mataupu faavae, na aoaoina e tamaiti aoga a o latou suesueina le 2 Nifae 32–Iakopo 4 (Iunite 9) e le o faamoemoeina e aoao atu o se vaega o lau lesona. O le lesona e te aoao atu ua na ona taulai atu i ni nai aoaoga faavae ma mataupu faavae nei. Mulimuli i uunaiga a le Agaga Paia a o e iloiloina manaoga o au tamaiti aoga.

Aso 1 (2 Nifae 32)

A o suesueina e tamaiti aoga le 2 Nifae 32, na latou aoao ai faapea, pe a tatou taumamafa i afioga a Keriso, o le a tau mai e afioga a Keriso ia i tatou mea uma e tatau ona tatou faia. Na latou aoaoina foi faapea, a tatou tatalo i taimi uma o le a mafai ona tatou faia mea uma o le a tuu mai e le Alii tatou te faia mo le manuia o o tatou agaga. Sa valaaulia e le lesona tamaiti aoga e faaaofia i totonu o se taimi e 24-itula mea na latou aoaoina e uiga i le tatalo i taimi uma.

Aso 2 (2 Nifae 33)

I lenei lesona e uiga i le molimau faaiu a Nifae, na aoao ai e tamaiti aoga faapea tatou te filifili pe tatou te tatalaina o tatou loto pe leai i musumusuga a le Agaga Paia. Na latou iloiloina foi le 1 Nifae ma le 2 Nifae, i le filifiliaina o se mau na musuia ai i latou e faia se mea lelei, pe ina ia talitonu ai ia Keriso.

Aso 3 (Iakopo 1–2)

I la latou lesona e uiga i le Iakopo 1–2, na aoao ai e tamaiti aoga faapea e galulue ma le filiga taitai perisitua e fesoasoani ia i tatou e o mai ia Keriso, ma e i ai se tiutetauave paia ua tuuina mai ia i latou e aoao atu le afioga a le Atua ma lapatai atu ia tetee i le agasala. E ala i le suesueina o le lauga a Iakopo i lona nuu, na aoao ai tamaiti aoga faapea e tatau ona latou sailia le malo o le Atua e sili atu i lo isi mea uma e fiafia i ai. Na latou tusia i a latou api talaaga mo le suesueina o tusitusiga paia e uiga i se tasi o auala e mafai ona latou faaaogaina ai faamanuiaga ma avanoa ua tuuina mai e le Alii ia i latou e fausia ai le malo o le Atua ma faamanuia ai olaga o isi. Na latou taulai atu foi i le upumoni faapea e fiafia le Alii i le le gaoia po o le ola mama o tagata uma, o alii faapea ma tamaitai. Na talosagaina i latou e mafaufau loloto pe faapefea e le ola i le tulafono o le lē gaoiā ona faamanuiaina ai aiga ma faafiafiaina ai le Alii.

Aso 4 (Iakopo 3–4)

A o faaauau ona suesueina e tamaiti aoga le lauga a Iakopo, na latou aoaoina faapea o le a faamafanafanaina e le Atua ē loto mama i o latou mafatiaga. Na taulai atu le lesona i le aoaoga faavae lenei: E ala i le Togiola a Iesu Keriso, e mafai ai ona faatumulia i tatou i le faamoemoe ma faaleleia ai i tatou lava ma le Atua. Na tusia e tamaiti aoga a latou lava mafuaaga faaletagata lava ia mo le mananao ai e molimau atu e uiga ia Iesu Keriso ma le Togiola.

Faatomuaga

O lenei lesona o le a fesoasoani i tamaiti aoga ia malamalama faapea na molimau atu Nifae e uiga i le misiona a Iesu Keriso. O le a maua e tamaiti aoga se avanoa e fefaasoaai ai pe mafai faapefea e upu a Iakopo ona fesoasoani ia i latou e faatoilaloina le faamaualuga ma faaaoga o latou faamanuiaga mai le Atua e fausia ai Lona malo. O le a latou maua se avanoa e faaaoga ai mataupu faavae ma aoaoga faavae latou te aoaoina i le Iakopo 2 e talanoaina ai le taua o le usitaia o le tulafono a le Alii o le lē gaoiā. O le a latou talanoaina auala e saili ai avanoa e tautatala ai e uiga ia Iesu Keriso ma le Togiola.

Fautuaga mo le Aoaoga

2 Nifae 32–33

Ua fautua mai Nifae ia i tatou e saili le taitaiga faalelagi e ala i afioga a Iesu Keriso

Amata le lesona lenei e ala i le fai atu o fesili nei:

O le a se tasi o taaloga po o gaoioiga e sili ona e fiafia i ai?
O a tomai faavae e ao ona e faataitaia soo ina ia mafai ai ona e matua lelei ai i lena taaloga po o le gaoioiga?
O le a le mea e tupu pe afai e le faataitaiina e se tasi na tomai faavae?

Tau atu i le vasega e i ai faatinoga faavae e valaaulia ai le Agaga Paia e aumaia ia i tatou le taitaiga mai le Tama oi le Lagi. Kopi i lalo le siata lenei i luga o le laupapa pe saunia o se tufaaga.

Tatalo	O le Mauaina o le Taitaiga mai le Agaga Paia	Suesueina o Tusitusiga Paia
2 Nifae 32:8–9	2 Nifae 32:5 33:1–2	2 Nifae 32:3; 33:4

Fai atu i tamaiti aoga taitasi e filifili se tasi o faatinoga o loo i le siata, ona faitau lea o fuaitau o mau e fetaui i ai. Vaevae le vasega taitoalua po o ni vaega laiti. Fai atu i tamaiti aoga e feauauai i le fefaasoaai mai o auala e fesoasoani ai le tatalo, mauaina o le taitaiga mai le Agaga Paia, ma le suesueina o tusitusiga paia ia i latou e maua ai le taitaiga mai le Atua.

Atonu e te manao e fai atu i tamaiti aoga e lipoti mai pe na faapefea e aoaoga a Elder David A. Bednar e uiga i le poloaiga ia tatalo i taimi uma ona fesoasoani ia i latou. E mafai foi ona e fai atu ia i latou pe na faapefea ona faaleleia a latou tatalo e ala i le galuega atofaina o le faaaofia i totonu o le 24 itula o mea na latou aoaoina e uiga i le tatalo ai i taimi uma. (O galuega atofaina nei mai le aso 1.)

Iakopo 1–2.

Ua aoaia e Iakopo lona nuu ona o lo latou fiafia i oa, faamaualuga, ma feusuaiga lē mama

Tusi le fuaiupu lenei i luga o le laupapa: Talu ai ona o nisi tagata e sili atu mea latou te maua … nai lo isi, atonu e faaosoosoina ai i latou e talitonu ua sili atu i latou nai lo isi.

Valaaulia tamaiti aoga e fautua mai ni upu eseese e mafai ona faauma ai lenei faamatalaga. O tali talafeagai e aofia ai tupe, oa, agavaa faamusika, tomai faaafeleti, taleni, aoga, poto, avanoa e tuputupua’e ai, malamalama o le talalelei, ma oloa faaletino. Valaaulia tamaiti aoga e mafaufau lemu ifo lava pe o lenei faamatalaga, faatasi ai ma soo se upu eseese ua latou fautuaina mai, ua tupu moni ea ia i latou.

Faamanatu atu i tamaiti aoga faapea, ona o le alofa o Iakopo i lona nuu ma lona usiusitai i poloaiga a le Alii, na ia lapataia ai lona nuu e uiga i o latou vaivaiga ma agasala. Valaaulia tamaiti aoga e faitau le Iakopo 2:12–13 ma tau mai auala atonu latou te faaumaina ai le faamatalaga o loo i luga o le laupapa ina ia faamatalaina ai nisi o tagata sa Nifae i le taimi o le galuega a Iakopo.

Valaaulia tamaiti aoga e faitau le Iakopo 2:17–21 ma saili upu faafautuaga ia e mafai ona fesoasoani ia i latou e faatoilaloina ai le faamaualuga. (Atonu ua uma ona latou faailogaina nei upu faafautuaga i le taimi o a latou lava suesuega a le tagata ia.) Valaaulia tamaiti aoga e faasoa mai nisi o na upu faafautuaga na latou mauaina, ma ia faamalamalama mai pe faapefea e lenei fautuaga ona fesoasoani ia i latou e faatoilalo ai le faamaualuga.

Faamalamalama atu o nei fuaiupu o loo aoao mai ai le upumoni lenei: E tatau ona tatou sailia le malo o le Atua nai lo isi lava manaoga. Valaaulia nisi o tamaiti aoga e faasoa mai se auala se tasi e mafai ai e i latou ona faaaoga faamanuiaga ma avanoa ua tuuina mai e le Alii ia i latou, e fausia ai le malo o le Atua ma faamanuia ai isi.

Ina ia saunia tamaiti aoga e iloilo aoaoga a Iakopo e uiga i le mama faalefeusuaiga, valaaulia i latou e vaai faalemafaufau faapea ua fesili atu se tasi ia i latou pe aisea latou te talitonu ai i le tausiaina o le tulafono o le lē gaoiā. Fai atu i tamaiti aoga e faitau le Iakopo 2:28–35 mo fesoasoaniga e taliina ai lenei fesili. Atonu e fesoasoani le faamanatu ia i latou faapea na latou aoaoina le upumoni lenei o se vaega o la latou lava suesuega: E fiafia le Alii i le le gaoia. Na latou suesueina foi taunuuga o le le mama faalefeusuaiga ua faamatalaina i nei fuaiupu. Valaaulia tamaiti aoga e faasoa mai pe faapefea ona latou faamalamalamaina, e ala i le Iakopo 2:28–35, le auala latou te taliina ai lenei fesili.

Fesili atu: E tusa ai ma le Iakopo 2:27, o le a le “afioga a le Alii” e faatatau i le i ai o le sili atu i le tasi le ava? (Ia mautinoa ua manino faapea, ua poloai mai le Alii e tatau i se alii ona faaipoipo atu i le na o le tasi le ava.)

Faamanino atu faapea, i nisi o taimi patino i le talafaasolopito o le lalolagi, na poloaiina ai e le Alii Lona nuu e faia autaunonofo. Mo le faataitaiga, na faia autaunonofo i taimi o le Fegaiga Tuai e Aperaamo ma Sarai (tagai i le Kenese 16:1–3; MF&F 132:34–35, 37) ma e ala i lo laua atalii o Isaako ma le atalii o lo laua atalii o Iakopo (tagai i le MF&F 132:37), ma sa faia foi mo se taimi i popofou o le Ekalesia toefuataiina, i le amata mai i le Perofeta o Iosefa Samita (tagai i le MF&F 132:32–33, 53). Peitai ane, i le 1890, na poloaiina ai e le Atua Lana perofeta o Uilifoti Uitilafi e faamutaina le faia o autaunonofo (tagai i le MF&F, Folafolaga Aloaia 1).

Tuu atu i tamaiti aoga se taimi e mafaufau loloto ai pe faapefea e filifiliga o loo latou faia ia lē gaoia ma mama, ona fiafia ai le Alii ma isi. Valaaulia i latou e faamalamalama mai pe faapefea e le tausiaina o le tulafono o le lē gaoiā po o le ola mama i le taimi nei ona faamanuia ai i latou ma o latou aiga —i le taimi nei ma le lumanai. Faamalamalama atu pe na faapefea ona faamanuiaina oe ma lou aiga i le tausiaina o le tulafono o le lē gaoiā.

Iakopo 3–4

Ua uunaia e Iakopo lona nuu ia salamo ma maua se faamoemoe faapea e mafai ona latou toe foi atu i le afioaga o le Atua

Faapipii se tamai ata o Iesu Keriso i le ogatotonu o le laupapa, i luga o se pepa malo, po o se fasipepa. I autafa o le ata, tusi ai ni nai upu e suitulaga i mea atonu e tosina ese atu ai tagata mai le Faaola ma Lana talalelei. Fai atu i tamaiti aoga e su’e i le Iakopo 4:14. Faamalamalama atu o lenei fuaiupu e aofia ai le fuaitau “vaai i tala atu o le faailoga.” Fesili atu ia i latou pe o le a le mea e faasino i ai le “faailoga” i lenei fuaiupu. (O Elder Neal A. Maxwell o le Korama a Aposetolo e Toasefululua na aoao mai faapea “o le faailoga o Keriso” [“Jesus of Nazareth, Savior and King,” Liahona, Tesema. 2007, 45].) Pe a mae’a ona faasoa atu lenei faamalamalamaga, valaaulia se tamaitiiti aoga e faitau leotele le Iakopo 4:14–15.

Fesili atu: O le a sou manatu o le a le uiga o le vaai i tala atu o le faailoga? (O le taulai atu o o tatou olaga i soo se isi lava mea nai lo le Faaola ma Lana talalelei.)

Valaaulia tamaiti aoga e faitau le Iakopo 4:4–12 faailoa mai mafuaaga eseese na talitonu ai Iakopo ia Iesu Keriso, ma pe aisea na ia lagona ai le taua o le faailoa atu i isi e uiga i le Togiola. I le avea ai o se taunuuga o lenei talanoaga, ia mautinoa ua manino le upumoni lenei: O le Togiola a Iesu Keriso, ua mafai ai ona faatumulia i tatou i le faamomoe ma faaleleia i tatou lava ma le Atua.

Faasoa atu ou lagona o le lotofaafetai mo le Faaola ma Lana Togiola. Molimau atu faapea o Iesu Keriso o le “faailoga” lea e tatau ona taulai atu i ai o tatou olaga. Ina ia faaiu le lesona, fai atu i tamaiti aoga e mafaufau po o le a le mea o le a latou faia e taulai atu ai i le Faaola i nai aso e sosoo ai.

Iunite e Sosoo Ai (Iakopo 5 e oo i le Ominae)

Fesili atu i tamaiti aoga: O le a le aneti-Keriso? Faamata e faapefea ona e tali atu i se aneti-Keriso? A o outou faitauina tusitusiga paia i le isi iunite e sosoo ai, matau le tala ma le mea na faia e Iakopo ina ua faafetaiaia e Selema, o se aneti-Keriso. Ae le gata i lea, vaavaai mo faamanuiaga na maua e Enosa ona sa ia sailia le Atua ma lona loto atoa, e ala i le tatalo i le aso atoa e oo lava i le po. Vaai mo mafuaaga na tuua ai e Sa Nifae le laueleele o lo latou uluai tofi ae faatasi atu ma Sa Molekā.